Jotjhuwa

8 Ngemva kwalokho, uJehova wathi kuJotjhuwa: “Ningathukwa namkha nihlengezele.+ Thatha woke amadoda wepi nikhuphuke niyokulwa ne-Ayi. Qala, ikosi ye-Ayi ngiyinikele esandleni sakho, abantu bayo, idorobho layo nenarhayo.+ 2 Kufuze utjhabalalise i-Ayi nekosayo njengombana watjhabalalisa iJerikho nekosayo,+ nanyana kunjalo ningayithatha ipahlayo nefuywayo. Yeke khukhuthelani idorobho ngemuva.”

3 Ngemva kwalokho, uJotjhuwa nawo woke amadoda wepi bakhuphuka bayokulwa ne-Ayi. UJotjhuwa wakhetha iingorho ezizii-30 000 begodu wazikhambisa ngobusuku. 4 Waziyala wathi: “Qalani, kufuze nikhukhuthele idorobho ngemuva. Ningayi kude nalo, zilungiseleleni noke. 5 Mina-ke nabo boke abantu engikhamba nabo sizokutjhidela ngedorobheni, nabaphumako bona bazokulwa nathi+ njengaphambilini, sizokuhlehla kibo. 6 Nabaphumako bazosigijimisa, sizobakhuphela ngaphandle kwedorobho bese bazokuthi, ‘Qalani bayahlehla njengaphambilini.’+ Yeke sizokuhlehla ukuya phambili. 7 Nina-ke kufuze nivumbuke begodu nithumbe idorobho; uJehova uZimenu uzolinikela kini. 8 Kuzakuthi nasele nilivimbezele, nilitjhise.+ Kufuze nenze njengombana uJehova akhulumile. Ngilezi-ke iinqophiso engininikele zona.”

9 Ngemva kwalokho, uJotjhuwa wazithumela, zamatjhela endaweni ebezizokukhukhutha ngakiyo; bezahlala hlangana kweBhetheli ne-Ayi, ngetjingalanga ye-Ayi, ebusukwinobo uJotjhuwa bekanabantu egade akhamba nabo.

10 UJotjhuwa wavuka ekuseni khulu wabuthelela amasotja, yena nabadala bakwa-Israyeli bawadosa phambili ukuya e-Ayi. 11 Yeke woke amadoda wepi+ ebewanaye akhuphuka atjhidela phambi kwedorobho ngaphambili. Ahloma ikampa ngetlhagwini ye-Ayi, bewahlukaniswe mrhoba phakathi kwawo ne-Ayi. 12 Hlangana nesikhatheso, wathatha amadoda angaba zii-5 000 begodu wawabeka bona akhukhuthe+ hlangana kweBhetheli+ ne-Ayi, ngetjingalanga yedorobho. 13 Yeke abantu bahloma ikampa ekulu ngetlhagwini yedorobho+ begodu amasotja asahlelako bewangetjingalanga yedorobho,+ uJotjhuwa wangena phakathi komrhoba ngobusukobo.

14 Kuthe ikosi ye-Ayi nayibona lokhu, yaphuma ngokurhabako ekuseni namadoda wedorobho bona iyokuqalana nama-Israyeli epini endaweni ethileko eqale ummango othabaleleko. Beyingazi ukuthi kunabantu abayikhukhuthelako ngakwelinye ihlangothi ledorobho. 15 Kuthe amadoda we-Ayi nawasahlelako, uJotjhuwa nawo woke ama-Israyeli babalekela endleleni etjhinga emmangweni.+ 16 Ngemva kwalokho, kwabizwa boke abantu ebebangedorobheni bona babagijimise; njengombana bagijimisa uJotjhuwa baphumela ngaphandle kwedorobho. 17 Woke amadoda aphuma agijimisa u-Israyeli, akhenge kusale nayinye e-Ayi neBhetheli. Atjhiya idorobho livuliwe, agijimisa u-Israyeli.

18 Ngemva kwalokho, uJehova wathi kuJotjhuwa: “Yelulela umkhonto osesandleni sakho e-Ayi+ ngombana ngizoyinikela kuwe.”+ UJotjhuwa walulela umkhonto ebekawuphethe ngedorobheni. 19 Uthe nakalula umkhonto loyo, abasahlelako bavumbuka msinyana eendaweni zabo, bagijimela ngedorobheni balivimbezela. Batjhisa idorobho khonokho.+

20 Kuthe amadoda we-Ayi nawajikako, abona intuthu ikhuphuka edorobheni, aphelelwa mamandla wokubalekela ngapha nangapha. Ngemva kwalokho, abantu egade babalekela erhalawumbeni bajikela abantu ababagijimisako. 21 UJotjhuwa no-Israyeli woke nababona ukuthi amadoda asahlelako athumbe idorobho begodu babona kukhuphuka iintuthu ngedorobheni, bajika bona bayokulwa neengorho ze-Ayi. 22 Amanye amabutho ebewazokusahlela aphuma ngedorobheni ukuthi abahlangabeze bona amadoda we-Ayi azifumane avaleleke phakathi nendawo, amanye ama-Israyeli bewangakwelinye ihlangothi, amanye angakwelinye, abulala boke akhenge kusinde namunye namkha kuphunyurhe namunye.+ 23 Ngemva kwalokho, babamba ikosi ye-Ayi+ isaphila, bayiletha phambi kwakaJotjhuwa.

24 Ama-Israyeli nakaqeda ukubulalela zoke izakhamuzi ze-Ayi erhalawumbeni egade ziwagijimisela kilo begodu zoke zibulewe ngesabula, ama-Israyeli abuyela e-Ayi abulala ngesabula boke egade basele ngemuva. 25 Boke abantu ababulawa ngelangelo bekumadoda nabafazi abazii-12 000, kwabulawa boke abantu be-Ayi. 26 UJotjhuwa akhenge ehlise isandla sakhe ebesilulele umkhonto phezulu+ bekwaba kulapho kutjhatjalaliswe zoke izakhamuzi ze-Ayi.+ 27 Nokho, ama-Israyeli azithathela ifuyo nepahla yedorobhelo, enza ngokuvumelana nomyalo uJehova awunikela uJotjhuwa.+

28 Ngemva kwalokho, uJotjhuwa watjhisa i-Ayi kwasala isiqorho samatje kwaphela+ bekube kunamhlanjesi. 29 Wabulala ikosi ye-Ayi begodu wayiphanyeka esigodweni bekwaba sentambama, kwathi ilanga nalitjhingako, uJotjhuwa wayala bona kwehliswe isidumbu sayo esigodweni.+ Ngemva kwalokho, basiphosela ebungenweni besango ledorobho begodu babeka isiqorho samatje phezu kwaso, isiqorhweso sisesekhona nanamhlanjesi.

30 Kungesikhatheso uJotjhuwa akhela uJehova uZimu ka-Israyeli i-aldara eNtabeni i-Ebali,+ 31 wenza njengombana uMosi inceku kaJehova bekayale ama-Israyeli, wenza nanjengombana bekutloliwe encwadini yomThetho+ kaMosi kuthiwa: “Yenza i-aldara ngamatje angakabazwa ngesisetjenziswa sesimbi.”+ Ama-Israyeli bewenzela uJehova iminikelo etjhiswako nemihlatjelo yetjhebiswano kilo.+

32 Ngemva kwalokho, wakopululela ematjeni umThetho+ uMosi awutlola phambi kwama-Israyeli.+ 33 Yeke woke ama-Israyeli, abadala, abaphathi nabahluleli bebajame ngapha nangapha komFaji phambi kwamaLevi abaphristi, ebewathwele umfaji wesivumelwano kaJehova. Abantu abavela kwezinye iinarha nabantu bendabuko nabo bebalapho.+ Ingcenye yabo beyijame phambi kweNtaba iGerizimu, enye ijame phambi kweNtaba i-Ebali+ (benza njengombana uMosi inceku kaJehova bekayalile ngaphambilini),+ bona kubusiswe abantu bakwa-Israyeli. 34 Ngemva kwalokho, wafunda ngokuzwakalako woke amezwi womThetho,+ amezwi lawo bewahlanganisa iimbusiso+ neenqalekiso,+ ngokuvumelana nakho koke ebekutlolwe encwadini yomThetho. 35 Akunalizwi nalinye kiwo woke uMosi awatjhoko uJotjhuwa angakhenge alifunde ngokuzwakalako phambi kwalo loke ibandla lakwa-Israyeli,+ kuhlanganise abafazi, abantwana nabantu abavela kwezinye iinarha ebebahlala* hlangana nabo.+