Jotjhuwa
7 Nokho ama-Israyeli akhenge athembeke malungana nezinto ebezinikelwe ekutjhatjalalisweni ngombana u-Akani+ indodana kaKarimi, indodana kaZabidi, indodana kaZerarhi wekoro yakwaJuda wathatha ezinye zezinto ebezinikelwe ekutjhatjalalisweni.+ Ngalokho ilaka lakaJehova lavuthela ama-Israyeli.+
2 UJotjhuwa wathumela amadoda asuka eJerikho bona aye e-Ayi,+ eseduze neBhethe-Aveni+ nepumalanga yeBhetheli, wathi kiwo: “Khuphukani niyokuhlola inarha.” Yeke amadoda la akhuphuka ayokuhlola i-Ayi. 3 Kwathi nawabuyela kuJotjhuwa, athi kuye: “Akutlhogeki bona abantu boke bakhuphuke. Amadoda angaba ziinkulungwana ezimbili namkha ezintathu anele bona ahlule i-Ayi. Ungabangeli abantu boke bona badinwe ngokuthi bakhambe ngombana ziimbalwa izakhamuzi zalapha.”
4 Yeke amadoda angaba zii-3 000 akhuphukela khona kodwana kwafuze abalekele amadoda we-Ayi.+ 5 Amadoda we-Ayi arhayila amadoda ama-36, awagijimisa kusukela ngaphandle kwesango ledorobho ukuyokufika eTjhebarimu* begodu araga nokuwarhayila emehlelweni. Yeke abantu baphelelwa mamandla.*
6 UJotjhuwa wadabula izambatho zakhe wawa ngobuso phambi komFaji kaJehova bekwaba sentambama, yena nabadala bakwa-Israyeli, bebasolo bazithela ngethuli ehloko. 7 UJotjhuwa wathi: “Maye! Kosi ePhakemeko Jehova, kubayini uyamise abantwaba iJordani bona uzosinikela kuma-Amori asitjhabalalise? Ngathana sahlala ngakwelinye ihlangothi leJordani!* 8 Tjhebetjhebe Jehova, ngingathini njengombana u-Israyeli abaleke phambi kwamanabakhe? 9 Lokha amaKanana nazo zoke izakhamuzi zenarha nazizwa ngakho, zizosibhoda zisule igama lethu ephasini. Alo, uzokwenzani ngegama lakho elikhulu?”+
10 UJehova waphendula uJotjhuwa wathi: “Sikima! Kubayini uhlome ihloko phasi? 11 Ama-Israyeli onile. Aphule isivumelwano+ engiwayale ngaso. Athethe ezinye zezinto ezinikelwe ekutjhatjalalisweni,+ azebile+ begodu azifihla hlangana nepahlawo.+ 12 Ngalokho, ama-Israyeli angeze akghone ukuqalana namanabawo. Azokufulathela amanabawo begodu abaleke phambi kwawo ngombana angokuthileko okunikelwe ekutjhatjalalisweni. Angeze ngibe nani godu ngaphandle kokuthi nitjhabalalise hlangana nani lokho ebekunikelwe ekutjhatjalalisweni.+ 13 Sikima ucwengise abantu!+ Uthi kibo, ‘Zicwengiseleni ilanga lakusasa ngombana uJehova uZimu ka-Israyeli uthi: “Kunento enikelwe ekutjhatjalalisweni phakathi kwenu ma-Israyeli. Angeze nikghone ukuqalana namanabenu bekube kulapho nisusa into enikelwe ekutjhatjalalisweni phakathi kwenu. 14 Kufuze nize ekuseni, ikoro ngekoro, ikoro uJehova ayikhethako+ kufuze itjhidele, umndeni ngomndeni, umndeni uJehova awukhethako kufuze utjhidele, umuzi ngomuzi, umuzi uJehova awukhethako kufuze utjhidele, indoda nendoda. 15 Loyo obanjwa aphethe into enikelwe ekutjhatjalalisweni uzokutjhiswa,+ yena nabo boke okungebakhe ngombana uphule isivumelwano+ sakaJehova begodu wenze into ehlazisako kwa-Israyeli.”’”
16 Yeke uJotjhuwa wavuka ekuseni ngakusasa wabiza u-Israyeli, ikoro ngekoro, kwakhethwa ikoro yakwaJuda. 17 Wabiza imindeni yakwaJuda, kwakhethwa umndeni wamaZerarhi,+ ngemva kwalokho wabiza umndeni wamaZerarhi, indoda nendoda, kwakhethwa uZabidi. 18 Ekugcineni wabiza umuzi kaZabidi, indoda nendoda begodu kwakhethwa u-Akani indodana kaKarimi, indodana kaZabidi, indodana kaZerarhi wekoro yakwaJuda.+ 19 UJotjhuwa wathi ku-Akani: “Ndodanami, ngibawa uhloniphe uJehova uZimu ka-Israyeli begodu uvume isono sakho kuye. Ngibawa ungitjele ukuthi wenzeni. Ungangifihleli.”
20 U-Akani waphendula uJotjhuwa wathi: “Eqinisweni ngimi engone uJehova uZimu ka-Israyeli begodu ngilokhu engikwenzileko. 21 Ngithe nangibona hlangana nepahla efunyenwe epini, isambatho esikhethekileko esivela eTjhinari,+ amatjhekeli* wesiliva ama-200 nesitina sinye segolide ubudisi baso obumatjhekeli ama-50, ngazifuna, yeke ngazithatha. Zenjelwe ngetendeni lami nemali ngaphasi kwazo.”
22 UJotjhuwa wathumela iinthunywa khonokho, zagijimela etendeni zafumana isambatho sifihlwe ngetendeni ka-Akani nemali ngaphasi kwaso. 23 Yeke zakhupha izinto ngetendeni zaziletha kuJotjhuwa nakuma-Israyeli woke begodu zazibeka phambi kwakaJehova. 24 Ngemva kwalokho, uJotjhuwa nawo woke ama-Israyeli ebewanaye bathatha u-Akani+ indodana kaZerarhi, isiliva, isambatho esikhethekileko, isitina segolide+ kunye namadodanakhe, amadodakazakhe, ikunzakhe, udumbanakhe, umhlambakhe, itende lakhe nakho koke okungekwakhe, batjhinga emRhobeni we-Akori.+ 25 UJotjhuwa wathi: “Kubayini usilethele ihlekelele?+ UJehova uzokuletha ihlekelele phezu kwakho namhlanjesi.” Ama-Israyeli woke amkghadlha ngamatje,+ ngemva kwalokho amtjhisa.+ Ngokunjalo abakghadlha boke ngamatje. 26 Abuthelela amatje amanengi phezu kwakhe, asesekhona nanamhlanjesi. Ilaka lakaJehova elitjhisako lehla.+ Kungebangelo indawo leyo isabizwa ngokuthi mRhoba we-Akori* nanamhlanjesi.