Jotjhuwa

16 Inarha eyanikelwa iinzukulwana zakaJosefa+ ngefumbe+ beyisuka eJordani eJerikho itjhinga emanzini angepumalanga yeJerikho, ikhamba emmangweni okhuphuka uvela eJerikho itjhinga esifundeni seentaba seBhetheli.+ 2 Beyisuka eBhetheli yeLuzi iraga itjhinga emkhawulweni wama-Ariki e-Atharothi, 3 yehlela etjingalanga emkhawulweni wamaJafilethi ukuyokufika emkhawulweni weBhethe-Rhoroni+ engeNzasi neGezeri+ begodu beyiphelela elwandle.

4 Yeke iinzukulwana zakaJosefa,+ okunguManase no-Efrayimu, zathatha inarhazo.+ 5 Nakhu umkhawulo weenzukulwana zaka-Efrayimu ngokwemindenazo: Umkhawulo welifa lazo ngepumalanga bekuyi-Atharothi-Adara,+ ukuya eBhethe-Rhoroni engeHla,+ 6 umkhawulo lo bewufika elwandle. Umkhawulo othoma eMikimetathi+ ngetlhagwini bewubhoda ngepumalanga utjhinga eTanathi-Tjhilo begodu udlula ngepumalanga uya eJanowarhi. 7 Wehla usuka eJanowarhi watjhinga e-Atharothi neNara wafika eJerikho+ begodu wadlulela eJordani. 8 Nawusuka eTapuwarhi+ umkhawulo waraga watjhinga etjingalanga emRhobeni weKhana, waphelela elwandle.+ Leli lilifa lekoro yakwa-Efrayimu ngokwemindenayo; 9 kuhlanganise nawo woke amadorobho neendawo zawo zokuhlala ebezihlangana nelifa lakaManase.+

10 Nokho ikoro yakwa-Efrayimu akhenge iqothe amaKanana ebewahlala eGezeri,+ amaKanana lawo asahlala hlangana nayo bekube kunamhlanjesi+ begodu akatelelwa bona ayisebenzele.+