USamyela Wesibili
1 Ngemva kokuhlongakala kwakaSawula, uDavida obekabuya ukuyokuhlula* ama-Amalekhi, wahlala eTsikhilagi+ amalanga amabili. 2 Ngelanga lesithathu, kwafika umuntu ovela ekampeni kaSawula ombethe izambatho ezirathukileko begodu anethuli ehloko. Nakatjhidela kuDavida, wawela phasi bewaguqa.
3 UDavida wambuza wathi: “Uvelaphi?” Wamphendula wathi: “Ngibaleke ekampeni ka-Israyeli.” 4 UDavida wambuza wathi: “Zikhambe njani izinto? Ngibawa ungitjele.” Kilokhu wathi: “Amasotja abalekile epini begodu amanengi ahlongakele. Ngitjho noSawula nendodanakhe uJonathani bahlongakele.”+ 5 Yeke uDavida wabuza isokana elimlethele iindabezi wathi: “Wazi njani ukuthi uSawula nendodanakhe uJonathani bahlongakele?” 6 Isokana lamphendula lathi: “Kwenzekile bona ngibe seNtabeni iGilibowa,+ ngabona uSawula azisekele ngomkhontwakhe begodu iinkarana nabakhweli beenjomani besele batjhidele kuye.+ 7 Uthe nakaphendukako begodu angibona, wangibiza, ngathi kuye, ‘Ngilapha!’ 8 Wangibuza wathi, ‘Ungubani?’ Ngamphendula ngathi, ‘NgimAmalekhi.’+ 9 Nje-ke wathi, ‘Ngibawa ujame hlanu kwami ungibulale, ngombana ngisebuhlungwini obukhulu kodwana ngisaphila.’ 10 Yeke ngajama eqadi kwakhe ngambulala,+ ngombana bengazi ukuthi angekhe aphile ngemva kokuthi awile begodu alimele. Nje-ke ngathatha isihlohlo ebesisehlokwakhe nebhengele ebeyisemkhonwenakhe ngaziletha ekosinami.”
11 UDavida warathula izambatho zakhe begodu boke abantu ebebanaye benza okufanako. 12 Barhahlawula bebalila isibibithwana, bazila ukudla+ bekwaba sentambama ngebanga lakaSawula, lendodanakhe uJonathani, labantu bakaJehova nendlu ka-Israyeli,+ ngombana bebabulawe ngesabula.
13 UDavida wabuza isokana elimlethele iindabezi wathi: “Ubuyaphi?” Lathi: “Ubaba uvela kwenye inarha, umAmalekhi.” 14 UDavida wathi kuye: “Kubayini ungakabi nevalo lokuphakamisa isandla sakho ubulale ozesiweko kaJehova?”+ 15 UDavida wabiza elinye lamasokana wathi kilo: “Tjhidela kuye umrhayile.” Yeke lamhlaba ngesabula wahlongakala.+ 16 UDavida wathi kuye: “Iingazi zakho zisehlokwakho, ngombana uzifakazele ngokwakho wathi, ‘Ngimbulele ozesiweko kaJehova.’”+
17 Nje-ke uDavida wavumela uSawula noJonathani indodanakhe ingoma yesililo+ 18 begodu wathi abantu bakwaJuda kufuze bafundiswe ingoma le ebizwa ngokuthi “Umsubela,” etlolwe encwadini kaJatjhari:+
19 “Maye! Israyeli, ubuhle burabhalele eendaweni zakho eziphakemeko buhlongakele.+
Qala bona iintsitsirimba ziwe njani!
20 Ungakhulumi ngalokhu eGathi;+
Ungakumemezeli eendleleni ze-Atjhikheloni,
Ngombana amadodakazi wamaFilista azokuthaba,
Namadodakazi wamadoda angakasoki azokuthakasa.
21 Nina ntaba zeGilibowa,+
Akungabi nombethe namkha izulu phezu kwenu,
Kungabi namasimu akhiqiza iminikelo ecwengileko,+
Ngombana kini iinhlangu zeentsitsirimba zirhubutjhiwe,
Nesihlangu sakaSawula asisazeswa ngamafutha.
22 Umsubela kaJonathani nesabula kaSawula+
Bewududa eengazini zamanaba begodu bewuhlaba umhlwehlwe weengorho
Bewuhlala unemba.+
23 USawula noJonathani,+ bebathandeka begodu baligugu nabasaphilako,
Ngitjho nekufeni akhenge bahlukaniswe,+
Bebamsinya ukudlula amakhozi,+
Banamandla ukudlula amabhubezi.+
24 Maye! Madodakazi wakwa-Israyeli, lilelani uSawula
Owanimbathisa izambatho ezibomvu nezakanokutjho,
Owafaka imikghabiso yegolide ezambathweni zenu.
25 Qala bona iintsitsirimba ziwe njani epini!
UJonathani uwile eendaweni zakho eziphakamileko ahlongakele!+
26 Ngidanile ngebanga lakho, Jonathani mfowethu;
Bengikuthanda khulu.+
Ithando lakho kimi belidlula ithando labantu bengubo.+
27 Qala bona iintsitsirimba ziwe njani
Begodu iinkhali zepi zitjhabalele!”