USamyela Wesibili
6 UDavida wabuye wabuthelela woke amasotja akhamba phambili kwa-Israyeli, amadoda azii-30 000. 2 Ngemva kwalokho, uDavida nabo boke abantu ebebanaye batjhinga eBhala yakwaJuda bona bayokuthatha umFaji kaZimu weqiniso,+ lowo abantu ababiza phambi kwawo igama lakaJehova wamabutho,+ uZimu ohlala esihlalweni sobukhosi ngaphezu kwamakherubhi.*+ 3 Kodwana babeka umFaji kaZimu weqiniso ekaraneni etja+ bona bawukhambise ngayo, bawususa endlini ka-Abinadaba,+ ebeyisembundwini; u-Uza no-Arhiyo, amadodana ka-Abinadaba bebanqophisa ikarana etja le.
4 Yeke bathutha umFaji kaZimu weqiniso usuka endlini ka-Abinadaba esembundwini, u-Arhiyo bekakhamba phambi komFaji. 5 UDavida nayo yoke indlu ka-Israyeli bebagidinga phambi kwakaJehova ngayo yoke imihlobo yeenliliswa zekhuni lomjunipha, yamaharibha, yezinye iinliliso zesinara,+ yabosotjherere,+ yamafahlawana neyamasimbali.+ 6 Kodwana nabafika eselelweni seNakhoni, u-Uza walula isandla sakhe wabamba umFaji kaZimu weqiniso,+ ngombana iinkomo zapheze zawuwisa. 7 Khonokho ilaka lakaJehova lavuthela u-Uza, uZimu weqiniso wamumadlha phasi+ khonapho ngebanga lesenzo sakhe sokungahloniphi,+ wahlongakala lapho eqadi komFaji kaZimu weqiniso. 8 Kodwana uDavida wasilingeka ngebanga lokuthi uJehova umadlhe u-Uza begodu indawo leyo yabizwa ngokuthi yiPeretsi-Uza* bekube kunamhlanjesi. 9 Mhlokho uDavida wamsaba uJehova+ begodu wathi: “Alo umFaji kaJehova ungeza njani kimi?”+ 10 UDavida bekangafuni ukuletha umFaji kaJehova lapho bekakhona, eDorobheni lakaDavida.+ Kunalokho, uDavida wayala bona usiwe endlini ka-Obede-Edomu+ umGathi.
11 UmFaji kaJehova wahlala endlini ka-Obede-Edomu umGathi iinyanga ezintathu begodu uJehova wasolo abusisa u-Obede-Edomu nayo yoke indlwakhe.+ 12 IKosi uDavida yabikelwa ukuthi: “UJehova uyibusisile indlu ka-Obede-Edomu nakho koke okungokwakhe ngebanga lomFaji kaZimu weqiniso.” Yeke uDavida wakhamba wayokuthatha umFaji kaZimu weqiniso endlini ka-Obede-Edomu, wakhuphukela nawo eDorobheni lakaDavida ngethabo.+ 13 Kwathi abathwali+ bomFaji kaJehova nasele bakhambe amagadango asithandathu, wenza umhlatjelo ngekunzi nesilwana esinonisiweko.
14 UDavida bekajida azombeleza phambi kwakaJehova ngawo woke amandlakhe; soke isikhatheso uDavida bekambethe i-efodi yelineni.+ 15 UDavida nayo yoke indlu ka-Israyeli bakhuphula umFaji+ kaJehova barhuwelela ngethabo,+ babetha nepalapala.+ 16 Kodwana kwathi umFaji kaJehova nawufika eDorobheni lakaDavida, uMikali+ indodakazi kaSawula wahlola phasi ngefesidere, wabona iKosi uDavida yeqayeqa begodu ijida izombeleza phambi kwakaJehova; wathoma ukuyidelela ehliziywenakhe.+ 17 Yeke bangenisa umFaji kaJehova bawubeka endawenawo ngaphakathi kwetende uDavida ebekalihlomele wona.+ Ngemva kwalokho, uDavida wanikela iminikelo etjhiswako+ nemihlatjelo yetjhebiswano+ phambi kwakaJehova.+ 18 Kuthe lokha uDavida nakaqeda ukunikela iminikelo etjhiswako nemihlatjelo yetjhebiswano, wabusisa abantu egameni lakaJehova wamabutho. 19 Ngaphezu kwalokho, wabela boke abantu, soke isiqubuthu sakwa-Israyeli, indoda ngayinye nomfazi ngamunye, uburotho oburondo, ikhekhe leenthelo zesundu nekhekhe lamadiribe omisiweko, ngemva kwalokho boke abantu bakhamba, ngamunye waya endlinakhe.
20 UDavida nakabuyako azokubusisa umzakhe, uMikali+ indodakazi kaSawula waphuma ayomhlangabeza. Wathi kuDavida: “Qala bona ikosi yakwa-Israyeli iziphazimulise kangangani namhlanjesi nayihlubula phambi kweengqila zabantazana zeensebenzi zayo njengalokha isidlhadlha somuntu sihlubula tjhatjhalazi!”+ 21 UDavida waphendula uMikali wathi: “Bengigidinga phambi kwakaJehova, owakhetha mina kunoyihlo nayo yoke indlwakhe begodu wangibeka bona ngibe mrholi wabantu bakaJehova, u-Israyeli.+ Yeke ngizokugidinga phambi kwakaJehova, 22 ngisazozithoba khulu ukudlula lokhu begodu ngizokuba phasi ngitjho nemehlwenami. Kodwana iingqila zabantazana okhulume ngazo zizongiphazimulisa.” 23 Yeke uMikali+ indodakazi kaSawula azange abe nabantwana bekwaba lilanga ahlongakala ngalo.