USamyela Wesibili

15 Ngemva kwazo zoke izintwezi, u-Absalomu wazifumanela ikarana neenjomani nabantu abama-50 bona bagijime phambi kwakhe.+ 2 U-Absalomu bekavuka ekuseni ajame eqadi kwendlela etjhinga esangweni ledorobho.+ Qobe nakunomuntu onomlandu okufuze usiwe ekosini bona iyokwahlulela,+ u-Absalomu bekambiza athi kuye: “Uvela kiliphi idorobho?” Umuntu loyo bekathi: “Isisebenzi sakho sivela kwesinye seentjhaba zakwa-Israyeli.” 3 U-Absalomu bekathi kuye: “Qala, iinlilo zakho ziyezwakala begodu ulila kufanele kodwana akunamuntu ovela ekosini bona azokulalela indabakho.” 4 U-Absalomu bekathi: “Ngathana bengibekwe bona ngibe ngumahluleli enarheni! Omunye nomunye umuntu onomlandu namkha otlhoga isahlulelo bekazokuza kimi, mina bengizokuqinisekisa ukuthi ufumana ubulungiswa.”

5 Bekuthi umuntu nakatjhidela kuye bona amkhothamele, u-Absalomu bekalula isandla sakhe ambambe begodu ammange.+ 6 Ngilokho u-Absalomu ebekakwenza kiwo woke ama-Israyeli ebeweza ekosini bona azokufuna isahlulelo; ngalokho u-Absalomu wasolo athumba* iinhliziyo zabantu bakwa-Israyeli.+

7 Ekupheleni kweminyaka emine,* u-Absalomu wathi ekosini: “Ngibawa ungivumele ngiye eRhebroni+ ngiyokuphetha isifungo engasenza kuJehova. 8 Ngombana isisebenzi sakho senza isifungo+ ngesikhathi sihlala eGetjhuri+ eSiriya sathi: ‘Nange uJehova angangibuyisela eJerusalema, ngizokwenza umnikelo kuJehova.’” 9 Nje-ke ikosi yathi kuye: “Khamba ngokuthula.” Yeke wasikima waya eRhebroni.

10 U-Absalomu wathumela iinhloli kizo zoke iintjhaba zakwa-Israyeli, wathi: “Msinyana nanizwa itjhada lepalapala, nirhuwelele nithi, ‘U-Absalomu sekayikosi eRhebroni!’”+ 11 Nje-ke bekunabantu abama-200 abavela eJerusalema ebebaye lapho bakhamba no-Absalomu; bebamenyiwe begodu batjhinga lapho bangasoli litho, bangazi bona kwenzekani. 12 Godu nakenza imihlatjelo, u-Absalomu wathumela bona kuyokubizwa u-Arhitofeli+ umGilo, umeluleki kaDavida,+ edorobheni lekhabo iGilo.+ Amaqhinga ka-Absalomu asolo adlondlobala begodu abantu ebebamsekela bebanda.+

13 Ngokukhamba kwesikhathi, kwafika umuntu obika iindaba kuDavida, wathi: “Iinhliziyo zabantu bakwa-Israyeli zitjhugulukele ku-Absalomu.” 14 Khonokho uDavida wathi kizo zoke iinsebenzi zakhe ebezinaye eJerusalema: “Sikimani sibaleke+ ngombana akekho namunye hlangana nathi ozokuphunyurha ku-Absalomu! Rhabani ngombana ngisaba ukuthi angasifikela msinyana asilethele ihlekelele bese arhayile idorobho ngesabula!”+ 15 Iinsebenzi zekosi zaphendula ikosi zathi: “Iinsebenzi zekosi zikulungele ukwenza nanyana yini ikosi eyiquntako.”+ 16 Yeke ikosi yaphuma ilandelwa ngiwo woke umuzayo kodwana yatjhiya amakhohlo+ alitjhumi bona atlhogomele indlu.* 17 Njengombana ikosi iphuma, beyilandelwa babantu boke begodu bajama eBhethe-Merhaki.

18 Zoke iinceku zayo bezikhamba nayo begodu woke amaKereti, amaPeleti,+ namaGathi+ ama-600 ebewasolo ayilandela kusukela eGathi,+ bebadlula njengombana ikosi ibahlolisisa. 19 Yeke ikosi yathi ku-Itayi+ umGathi: “Kubayini nawe kufuze ukhambe nathi? Buyela emva uyokuhlala nekosi etja ngombana uvela kwenye inarha begodu udingisiwe nalapho ubuya khona. 20 Ufike izolo, alo namhlanjesi kufuze ngikwenze uzulazule nathi, ukhambe nakufuze ngikhambe bewuye lapho ekufuze ngiye khona? Buyela emva begodu uthathe abafowenu ukhambe nabo, kwanga uJehova angakutjengisa ithando* bekathembeke kuwe.”+ 21 Kodwana u-Itayi waphendula ikosi wathi: “Ngifunga ngoJehova uZimu ophilako begodu ngifunga ngekosami ephilako, nanyana kukuphi lapha ikosami ingaba khona, kungaba sekufeni namkha ekuphileni, kulapho nesisebenzi sakho sizokuba khona!”+ 22 Yeke uDavida wathi ku-Itayi:+ “Ungayamela ngaphetjheya komrhoba.” Ngalokho u-Itayi umGathi wayamela ngaphetjheya komrhoba nabo boke abantu bakhe nabantwana.

23 Woke umuntu enarheni bekarhahlawula isililo ngesikhathi boke abantwaba bayama, ikosi beyijame hlanu komRhoba iKidroni;+ boke abantu bebayamela endleleni etjhinga emmangweni. 24 UTsadokhi+ naye bekalapho begodu bekakunye nawo woke amaLevi+ athwele umfaji+ wesivumelwano kaZimu weqiniso;+ babeka umFaji kaZimu weqiniso phasi; u-Abhiyathari+ wakhuphuka, kukulapho boke abantu abavela edorobheni baqedelela ukuyama. 25 Kodwana ikosi yathi kuTsadokhi: “Thatha umFaji kaZimu weqiniso ubuyele nawo edorobheni.+ Nangingafumana umusa emehlweni kaJehova, uzongibuyisa bese angivumele ngiwubone bengibone nendawo ohlala kiyo.+ 26 Kodwana nakangathi, ‘Awungithabisi,’ akangenze nanyana yini ebonakala ilungile emehlwenakhe.” 27 Ikosi yathi kuTsadokhi umphristi: “Angithi umboni wemibono?+ Buyela edorobheni ngokuthula begodu thatha amadodanenu akhambe nani, u-Arhimahatsi indodanakho noJonathani+ indodana ka-Abhiyathari. 28 Qala, ngizokuriyada emazibukweni asemmangweni bengifumane ilizwi elivela kini.”+ 29 Ngalokho uTsadokhi no-Abhiyathari bathatha umFaji kaZimu weqiniso babuyela nawo eJerusalema bahlala khona.

30 Njengombana uDavida akhuphuka iNtaba yama-Oliva,+ bekalila, ihlokwakhe beyigubuzesiwe begodu bekakhamba angakambathi amanyathelo. Boke abantu ebebanaye bebagubuzese iinhloko zabo begodu nabo bebalila njengombana bakhuphuka. 31 UDavida wafumana umbiko othi: “U-Arhitofeli ungomunye walabo abahlanganyela ezungwini+ laka-Absalomu.”+ Yeke uDavida wathi: “Maye! Jehova+ Ngibawa utjhugulule iseluleko saka-Arhitofeli sibe budlhadlha.”+

32 Kwathi uDavida nakafika esiqongolweni lapho abantu egade bakhothamela khona uZimu, uRhutjhayi+ umAriki+ bekalapho azomhlangabeza, isambatho sakhe besirathukile begodu anethuli ehloko. 33 Nokho uDavida wathi kuye: “Nawungayama nami, uzokuba mthwalo kimi. 34 Kodwana nawungabuyela edorobheni bese uthi ku-Absalomu, ‘Ngisisebenzi sakho Kosi. Bengisisebenzi sakayihlo esikhathini esidlulileko kodwana nje sengisisebenzi sakho,’+ ungakghona ukungitjharaganisela iseluleko saka-Arhitofeli.+ 35 UTsadokhi no-Abhiyathari abaphristi nabo balapho. Kufuze utjele uTsadokhi no-Abhiyathari abaphristi yoke into oyizwa ngendlini yekosi.+ 36 Qala! Amadodanabo amabili alapho nawo, u-Arhimahatsi+ indodana kaTsadokhi noJonathani+ indodana ka-Abhiyathari, thumelani wona bona azongazisa koke enikuzwako.” 37 Yeke uRhutjhayi umngani*+ kaDavida wangenisana no-Absalomu eJerusalema.