Yokuthoma YamaKhosi

22 Kwaba minyaka emithathu yoke kunganapi hlangana kweSiriya no-Israyeli. 2 Ngomnyaka wesithathu, iKosi yakwaJuda uJehotjhafathi+ yehlela ekosini yakwa-Israyeli.+ 3 Nje-ke ikosi yakwa-Israyeli yathi eensebenzini zayo: “Niyazi na bona iRamothi-Giliyadi+ ngeyethu? Kodwana siyazaza ukuyithatha ekosini yeSiriya.” 4 Ngemva kwalokho, yathi kuJehotjhafathi: “Uzokukhamba nami na ukuyokulwa neRamothi-Giliyadi?” UJehotjhafathi wathi ekosini yakwa-Israyeli: “Mina nawe siyafana. Abantu bami bafana nabantu bakho. Iinjomani zami zifana neenjomani zakho.”+

5 Kodwana uJehotjhafathi wathi ekosini yakwa-Israyeli: “Ngibawa ubuze+ uJehova qangi.”+ 6 Ikosi yakwa-Israyeli yabuthelela abaphorofidi ndawonye, okumadoda angaba ma-400, yathi kibo: “Ngikhambe na ngiyokulwa neRamothi-Giliyadi namkha ngingayi?” Bathi: “Khuphuka, uJehova uzoyinikela esandleni sekosi.”

7 UJehotjhafathi wathi: “Akunamphorofidi kaJehova na? Akasibuzele kuZimu.”+ 8 Khonokho ikosi yakwa-Israyeli yathi kuJehotjhafathi: “Usesekhona umuntu ongasibuzela kuJehova;+ kodwana ngiyamhloya,+ ngombana akaphorofidi izinto ezihle ngami, uphorofida ezimbi kwaphela.+ NguMikaya indodana kaYimla.” Kodwana uJehotjhafathi wathi: “Ikosi akukafuzi ikhulume njalo.”

9 Yeke ikosi yakwa-Israyeli yabiza isikhulu sesigodlo, yathi: “Rhaba ubize uMikaya indodana kaYimla.”+ 10 Ikosi yakwa-Israyeli noJehotjhafathi ikosi yakwaJuda bebahlezi ngamunye esihlalweni sakhe sobukhosi, bambethe izambatho zobukhosi, bangeselelweni ebungenweni besango leSamariya begodu boke abaphorofidi bebaphorofida phambi kwabo.+ 11 UTsedekhiya indodana kaKenana wazenzela iimpondo zesimbi, wathi: “UJehova uthi, ‘Ngeempondwezi uzokuhlaba amaSiriya bewuwaqede.’” 12 Boke abanye abaphorofidi bebaphorofida ngendlela efanako, bathi: “Khuphuka uye eRamothi-Giliyadi uzokuphumelela; uJehova uzoyinikela esandleni sekosi.”

13 Nje-ke isithunywa ebesiyokubiza uMikaya sathi kuye: “Qala! Amezwi wabaphorofidaba avumelana ngokuhle ekosini. Ngibawa nelizwi lakho lifane namezwabo likhulume okuhle.”+ 14 Kodwana uMikaya wathi: “Ikani uJehova nakasaphilako, ngizokutjho nanyana yini uJehova angitjela yona.” 15 UMikaya waya ekosini begodu ikosi yathi kuye: “Mikaya, sikhambe na siyokulwa neRamothi-Giliyadi namkha singayi?” Waphendula wathi: “Khuphukani begodu nizokuphumelela; uJehova uzoyinikela esandleni sekosi.” 16 Khonokho ikosi yathi kuye: “Kufuze ngikufungise kangakhi ukuthi nanyana yini oyikhuluma kimi egameni lakaJehova kufuze ibe liqiniso kwaphela?” 17 Nje-ke wathi: “Ngibona woke ama-Israyeli aphadlhalele eentabeni+ njengezimvu ezinganamalusi. UJehova wathi: ‘Laba abanakosi. Ngamunye akabuyele emzinakhe ngokuthula.’”

18 Ngemva kwalokho, ikosi yakwa-Israyeli yathi kuJehotjhafathi: “Aphi amangami, ngikutjelile ukuthi angekhe aphorofide izinto ezihle ngami kodwana uzokuphorofida ezimbi kwaphela.”+

19 UMikaya wathi: “Lalelani umlayezo ovela kuJehova: Ngibone uJehova ahlezi esihlalweni sakhe sobukhosi+ begodu loke ibutho lakhe lezulwini lijame hlanu kwakhe, ngesidleni nangesinceleni sakhe.+ 20 UJehova wathi, ‘Ngubani ozokuyenga u-Arhabi bona akhuphuke begodu ayokufela eRamothi-Giliyadi?’ Omunye bekatjho lokhu omunye atjho okhunye. 21 Ngemva kwalokho, ingilozi+ yatjhidela yajama phambi kwakaJehova yathi, ‘Mina ngizomyenga.’ UJehova wayibuza, ‘Uzokwenza njani lokho?’ 22 Yaphendula yathi: “Ngizokwenza abaphorofidi bakhe bakhulume amala.+ Yeke uZimu wathi, ‘Kwamambala uzomyenga begodu uzokuphumelela. Khamba-ke uyokwenza njalo.’ 23 Nje-ke uJehova wenze abaphorofidi bakhwaba bona bakhulume amala+ kodwana uJehova ubikezele ihlekelele malungana nawe.”+

24 UTsedekhiya indodana kaKenana watjhidela, wabetha uMikaya emhlathini, wathi: “Kuze njani ummoya kaJehova ungidlule uyokukhuluma nawe?”+ 25 UMikaya wamphendula wathi: “Uzakubona ukuthi udlule njani ngelanga ozakungena ngalo ekumbeni efihlekileko bona ubhace.” 26 Ngemva kwalokho, ikosi yakwa-Israyeli yathi: “Thathani uMikaya nimuse ku-Amoni induna yedorobho nakuJowatjhi indodana yekosi. 27 Nithi kibo, ‘Nakhu ikosi ekutjhoko: “Fakani umrhali lo ngejele,+ nimuphe uburotho obuncani namanzi, bekube kulapho ngibuya ngokuthula.”’” 28 Kodwana uMikaya wathi: “Nange ungabuya ngokuthula, uJehova uzabe angakakhulumi nami.”+ Ngemva kwalokho, wathi: “Tjhejani nina noke bantu.”

29 Yeke ikosi yakwa-Israyeli noJehotjhafathi ikosi yakwaJuda bakhuphukela eRamothi-Giliyadi.+ 30 Ikosi yakwa-Israyeli yathi kuJehotjhafathi: “Ngizozenza ngasuthi ngingomunye umuntu ngingene epini kodwana wena kufuze umbathe isambatho sakho sobukhosi.” Yeke ikosi yazenza ngasuthi ingomunye umuntu+ begodu yangena epini. 31 Ikosi yeSiriya yayala abalawuli beenkarana zayo zepi ezima-32 yathi:+ “Ningalwi nananyana ngubani, omncani namkha omkhulu kodwana yilwani nekosi yakwa-Israyeli kwaphela.” 32 Msinyana kuthe abalawuli beenkarana zepi nababona uJehotjhafathi, bazitjela bathi: “Kwamambala yikosi yakwa-Israyeli.” Nje-ke bajikela ngakuye bona balwe naye; uJehotjhafathi wathoma ukurhuwelela abawa isizo. 33 Abalawuli beenkarana zepi nababona ukuthi akusiyikosi yakwa-Israyeli, msinyana balisa ukumlandela.

34 Kodwana enye indoda izidubulela nje ngomsubelayo, yanemba ikosi yakwa-Israyeli lapho kuhlangana khona isambatho sayo sepi. Ikosi yathi kumlawuli wekaranayo yepi: “Jika, ngikhupha epini ngombana ngilimele khulu.”+ 35 Ipi yaraga ilanga loke, ikosi kwatlhogeka bona isanyiswe ekaraneni iqale amaSiriya. Iingazi zenceba layo zageleza ngaphakathi kwekarana yepi, yahlongakala ntambama leyo.+ 36 Ilanga nasele lizokutjhinga kwahlatjwa umkhosi ekampeni, kuthiwa: “Ngamunye akabuyele edorobheni lekhabo! Ngamunye akabuyele enarheni yekhabo!”+ 37 Ngalokho ikosi yahlongakala, yalethwa eSamariya; bayibulungela eSamariya. 38 Nabahlanza ikarana yepi ngesizibeni seSamariya, izinja zakhotha iingazi zayo begodu iingwadla zahlamba lapho,* ngokuvumelana nelizwi elakhulunywa nguJehova.+

39 Malungana nawo woke omunye umlando ka-Arhabi, koke akwenzileko nendlu* yezinyo lendlovu+ ayakhako nawo woke amadorobho awakhileko, akukatlolwa na encwadini yomlando weenkhathi zamakhosi wakwa-Israyeli? 40 Ngemva kwalokho, u-Arhabi walaliswa nabokhokho bakhe;+ indodanakhe u-Arhaziya+ yaba yikosi esikhundleni sakhe.

41 UJehotjhafathi+ indodana ka-Asa waba yikosi kwaJuda ngomnyaka wesine wokubusa kwaka-Arhabi ikosi yakwa-Israyeli. 42 UJehotjhafathi bekaneminyaka ema-35 nakaba yikosi begodu wabusa iminyaka ema-25 eJerusalema. Igama lakanina bekungu-Azuba indodakazi kaTjhilirhi. 43 Wakhamba emtlhaleni kayise u-Asa.+ Akhenge aphambuke kiwo begodu wenza okulungileko phambi kwakaJehova.+ Kodwana iindawo eziphakemeko akhenge zisuswe, abantu bebasenza imihlatjelo begodu bathunyisa intuthu yomhlatjelo eendaweni eziphakemeko.+ 44 UJehotjhafathi wasolo asebenzisana ngokuthula nekosi yakwa-Israyeli.+ 45 Malungana nawo woke omunye umlando kaJehotjhafathi, izenzo zakhe zamandla nendlela alwa ngayo ipi, akukatlolwa na encwadini yomlando weenkhathi zamakhosi wakwaJuda? 46 Wasusa enarheni neengwadla zamadoda zethempelini+ ezasala emihleni kayise u-Asa.+

47 Ngesikhatheso bekunganakosi kwa-Edomu;+ isekela belimjaphethe wekosi.+

48 UJehotjhafathi wenza nemikhumbi yeTaratjhitjhi* bona iye e-Ofira bona iyokuthatha igolide,+ kodwana akhenge ikhambe ngombana yaphahlazeka e-Etsiyoni-Gebere.+ 49 Kungesikhatheso u-Arhaziya indodana ka-Arhabi bekathe kuJehotjhafathi: “Vumela iinsebenzi zami zikhambe neensebenzi zakho ngemikhumbi” kodwana uJehotjhafathi wala.

50 Nje-ke uJehotjhafathi wahlongakala bewabulungwa nabokhokho+ bakhe eDorobheni lakaDavida ukhokhwakhe, indodanakhe uJehoramu+ yaba yikosi esikhundleni sakhe.

51 U-Arhaziya+ indodana ka-Arhabi waba yikosi kwa-Israyeli eSamariya ngomnyaka we-17 wokubusa kwekosi yakwaJuda uJehotjhafathi begodu wabusa kwa-Israyeli iminyaka emibili. 52 Waraga nokwenza okumbi emehlweni kaJehova, wakhamba endleleni kayise+ nonina,+ nendleleni kaJerobhowamu indodana kaNebathi, owabangela u-Israyeli bona one.+ 53 Waraga nokulotjha uBhali+ begodu amkhothamela, wasolo asilinga uJehova uZimu ka-Israyeli+ njengombana kwenza uyise.