Yesibili YamaKhosi
9 Ngemva kwalokho, u-Elitjha umphorofidi wabiza enye yamadodana wabaphorofidi wathi kiyo: “Tantela izambatho zakho edinini, uthathe msinyana umjeka wamafutha lo uye eRamothi-Giliyadi.+ 2 Nawufika lapho, funa uJehu+ indodana kaJehotjhafathi indodana kaNimtjhi; ngena umtjele asikime hlangana nabafowabo, umthathe utjhinge naye ekumbeni efihlekileko. 3 Ngemva kwalokho, uthathe umjeka wamafutha uwathele ehlokwakhe uthi, ‘UJehova uthi: “Ngikuzesa bona ube yikosi kwa-Israyeli.”’+ Nawuqedako uvule umnyango ubaleke ngaphandle kokuriyada.”
4 Nje-ke umsizi womphorofidi wangena indlela etjhinga eRamothi-Giliyadi. 5 Nakafikako, iinduna zebutho bezihlezi lapho. Wathi: “Ngikuphathele umlayezo nduna.” UJehu wabuza wathi: “Utjho bani hlangana nathi?” Wathi: “Ngitjho wena nduna.” 6 Yeke uJehu wasikima wangena ngendlini; umsizi wathela amafutha ehlokwenakhe wathi kuye, “UJehova uZimu ka-Israyeli uthi: ‘Ngikuzesa bona ube yikosi ebantwini bakaJehova, phezu kwaka-Israyeli.+ 7 Kufuze urhayile indlu ka-Arhabi ikosakho begodu ngizokubuyiselela iingazi zeensebenzi zami abaphorofidi nazo zoke iinsebenzi zakaJehova ezifele ezandleni zakaJezebheli.+ 8 Yoke indlu ka-Arhabi izokutjhabalala; begodu ngizokurhayila woke umuntu omduna ongewaka-Arhabi, kuhlanganise abangasililitho nababogabogako kwa-Israyeli.+ 9 Ngizokwenza indlu ka-Arhabi ifane nendlu kaJerobhowamu+ indodana kaNebathi begodu ifane nendlu kaBhatjha+ indodana ka-Arhiya. 10 NakunguJezebheli yena, uzokudliwa zizinja esiqetjhaneni senarha eJizriyela,+ akekho ozombulunga.’” Ngemva kwalokho, umsizi wavula umnyango wabaleka.+
11 Kwathi uJehu nakabuyela eensebenzini zekosakhe, zambuza zathi: “Kukhamba kuhle koke? Ihlanyela belizokwenzani kuwe?” Waziphendula wathi: “Angithi niyawazi umhlobo wabantu lo, nendlela okhuluma ngayo.” 12 Kodwana zathi: “Akusiliqiniso lokho! Sibawa usitjele.” Yeke wathi: “Nakhu akutjho kimi, ngemva kwalokho ungezelele wathi, ‘UJehova uthi: “Ngikuzesa bona ube yikosi kwa-Israyeli.”’”+ 13 Msinyana ngemva kokuzwa lokho, ngamunye wazo wathatha isambatho sakhe wasendlala eentepisini bona akhambe phezu kwazo,+ zabetha ipalapala zathi: “UJehu sekayikosi!”+ 14 Nje-ke uJehu+ indodana kaJehotjhafathi indodana kaNimtjhi waluka amano wokusahlela uJehoramu.
UJehoramu bekagade no-Israyeli woke eRamothi-Giliyadi,+ ngebanga lakaRhazayeli+ iKosi yeSiriya. 15 Ngokukhamba kwesikhathi iKosi uJehoramu yabuyela eJizriyela+ bona iyokuphola emancebeni ewabangelwe maSiriya ngesikhathi ilwa noRhazayeli iKosi yeSiriya.+
Nje-ke uJehu wathi: “Nangabe niyavuma, ningavumeli muntu aphunyurhe edorobheni ayokubika lokhu eJizriyela.” 16 Yeke uJehu wabophela ikaranakhe waya eJizriyela ngombana uJehoramu bekarabhalele phasi alimele begodu iKosi yakwaJuda u-Arhaziya beyehlele lapho iyomhlola. 17 Njengombana umlindi bekajame embhotjhongweni eJizriyela, wabona isiqubuthu samadoda kaJehu sitjhidela. Msinyana wathi: “Ngibona isiqubuthu samadoda.” UJehoramu wathi: “Thatha isotja elikhamba ngenjomani ulithume bona liyowahlangabeza, lithi kiwo, ‘Niza ngokuthula na?’” 18 Yeke umkhweli wenjomani wakhamba wayowahlangabeza wathi: “Ikosi ithi, ‘Niza ngokuthula na?’” Kodwana uJehu wathi: “Wazini wena ‘ngokuthula’? Bhodela ngemva kwami ungilandele!”
Ngemva kwalokho, umlindi wabika wathi: “Isithunywa sifikile kibo kodwana asikabuyi.” 19 Yeke wathumela umkhweli wenjomani wesibili, wathi nakafika kiwo: “Ikosi ithi, ‘Niza ngokuthula na?’” Kodwana uJehu wathi: “Wazini wena ‘ngokuthula’? Bhodela ngemva kwami ungilandele!”
20 Yeke umlindi wabika wathi: “Ufikile kibo kodwana akakabuyi begodu ukutjhayela kwakhona kunjengokutjhayela kwakaJehu umzukulwana* kaNimtjhi ngombana utjhayela njengehlanya.” 21 UJehoramu wathi: “Bophelani ikarana!” Babophela ikaranakhe yepi begodu uJehoramu iKosi yakwa-Israyeli no-Arhaziya+ iKosi yakwaJuda baphuma ngeenkarana zabo bayokuhlangana noJehu. Bahlangana naye esiqetjhaneni senarha sakaNabhothi+ umJizriyela.
22 Kwathi msinyana uJehoramu nakabona uJehu, wathi: “Uza ngokuthula na Jehu?” Kodwana wathi: “Ngikuphi ukuthula okungaba khona nakusesenobungwadla bakaJezebheli+ unyoko nobuloyi bakhe burhagele kangaka?”+ 23 Msinyana uJehoramu wajikisa ikaranakhe bona abaleke, wathi ku-Arhaziya: “Sikhohlisiwe Arhaziya!” 24 UJehu wathatha umsubelakhe wadumuza uJehoramu hlangana namahlombe, umcibitjholo waphumela ehliziywenakhe, wawela ngekaranenakhe yepi. 25 Ngemva kwalokho, wathi kuBidikhari isekela lakhe: “Mthathe uyomlahlela esimini kaNabhothi umJizriyela.+ Khumbula ukuthi mina nawe besitjhayela ndawonye ngemva kwaka-Arhabi uyise, ngesikhathi uJehova enza isimemezelwesi ngokuphathelene naye:+ 26 ‘“Ngokuqinisekileko njengombana ngibone iingazi zakaNabhothi+ neengazi zamadodanakhe izolo,” kutjho uJehova, “iingazi zabezo ngizozibuyiselela+ kuwe khona esiqetjhaneni senarhesi,” kutjho uJehova.’ Nje-ke mthathe uyomlahlela esiqetjhaneneso senarha, ngokuvumelana nelizwi lakaJehova.”+
27 U-Arhaziya iKosi+ yakwaJuda nakabona okwenzekako, wabaleka ngendlela yendlu yesivande. (Ngokukhamba kwesikhathi uJehu wamgijimisa wathi: “Naye akabulawe!” Nje-ke bamsahlela ekaranenakhe njengombana akhuphukela eGuri engeJibiliyamu.+ Kodwana waraga nokubaleka bewafika eMegido wafela khona. 28 Yeke iinsebenzi zakhe zamthatha ngekarana zatjhinga naye eJerusalema, zambulunga ethuneni lakhe nabokhokho bakhe eDorobheni lakaDavida.+ 29 U-Arhaziya+ waba yikosi yakwaJuda ngomnyaka we-11 wokubusa kwakaJehoramu indodana ka-Arhabi.)
30 Kwathi uJehu nakafika eJizriyela,+ uJezebheli+ wezwa ngakho. Nje-ke wapenda amehlwakhe ngepende enzima, wakghabisa ihlokwakhe begodu wahlola phasi ngefesidere. 31 Njengombana uJehu angena ngesango, uJezebheli wathi: “Kwamkhambela kuhle na uZimri, umbulali wekosakhe?”+ 32 UJehu waqala phezulu efesidereni wathi: “Ngubani ongehlangothini lami? Ngubani?”+ Khonokho iinkhulu zesigodlo ezimbili namkha ezintathu zahlola phasi zamqala. 33 Wathi: “Mphoseni phasi!” Nje-ke zamphosela phasi ezinye zeengazi zakhe zarhatjhekela ebodeni neenjomanini begodu wamgadanga. 34 Ngemva kwalokho, wangena ngendlini wadla bewasela. Yeke wathi: “Ngibawa niyokutjheja umfazi oqalekisiweko loya benimbulunge. Phela uyindodakazi yekosi.”+ 35 Kodwana nabathi bayombulunga, azange bafumane litho ngaphandle kwekhakhayi, iinyawo nezandla zakhe.+ 36 Nababuyako bambikela lokho, wathi: “Lokhu kuzalisa ilizwi lakaJehova+ alikhuluma ngencekwakhe u-Eliya umTitjhibe, nakathi, ‘Izinja zizokudla inyama kaJezebheli+ esiqetjhaneni senarha seJizriyela. 37 Isidumbu sakaJezebheli sizokuba njengomsuqwa esimini esiqetjhaneni senarha yeJizriyela bona kungathiwa: “Nangu uJezebheli.”’”