Yokuthoma YeenKronike

10 Nje-ke amaFilista bewalwa nama-Israyeli. Abantu bakwa-Israyeli babaleka phambi kwamaFilista begodu abanengi barhayilwa eNtabeni iGilibowa.+ 2 AmaFilista asolo agijimisa uSawula namadodanakhe, abulala noJonathani, u-Abinadaba noMaliki-Tjhuwa+ amadodana kaSawula. 3 Ipi yaba budisi kuSawula begodu abadumuzi bemisubela bamfumana, bamlimaza.+ 4 Nje-ke uSawula wathi kumphathinkhalakhe: “Khupha isabulakho, ungihlabe ngayo bona amadoda angakasokwa la angafiki angiphathe ngelunya.”+ Kodwana umphathinkhalakhe bekangafuni ngombana bekarhidlwa livalo. Nje-ke uSawula wathatha isabula wawela phezu kwayo.+ 5 Umphathinkhalakhe nakabona ukuthi uSawula uhlongakele naye wawela phezu kwesabulakhe wahlongakala. 6 Nje-ke uSawula namadodanakhe amathathu bahlongakala nabo boke bendlwakhe bahlongakala ndawonye.+ 7 Boke abantu bakwa-Israyeli ebebasemrhobeni nababona ukuthi woke umuntu ubalekile nokuthi uSawula namadodanakhe bahlongakele, batjhiya amadorobhabo babaleka; nje-ke amaFilista eza ahlala kiwo.

8 Ngelanga elilandelako, amaFilista nakafika azokuhlubulisa abahlongakeleko, afumana uSawula namadodanakhe bahlongakele eNtabeni iGilibowa.+ 9 Nje-ke amhlubulisa, aqunta ihlokwakhe, athatha iinkhali zakhe, athumela ilizwi kiyo yoke inarha yamaFilista bona kurhatjhwe iindabezi eenthombeni zawo+ nebantwini. 10 Ngemva kwalokho, abeka izambatho zakhe zepi ngendlini kazimawo begodu abophelela ikhakhayi lakhe ngendlini kaDagoni.+

11 Kwathi boke abantu beJabetjhi+ eGiliyadi nabezwa ukuthi amaFilista amenzeni uSawula,+ 12 zoke iingorho zasikima, zathwala isidumbu sakaSawula neendumbu zamadodanakhe. Zaziletha eJabetjhi begodu zabulunga amathambabo ngaphasi komuthi omkhulu eJabetjhi,+ zazila ukudla amalanga alikhomba.

13 Nje-ke uSawula wafa ngebanga lokungathembeki kwakhe okukhulu kuJehova ngombana akhenge alalele ilizwi lakaJehova+ nangokuthi wathukula kwabasebenzelana nemimoya+ 14 kunokobana abuze kuJehova. Yeke wambulala wadlulisela ubukhosi kuDavida indodana kaJese.+