Yesibili YeenKronike
7 Msinyana ngemva kokuthi uSolomoni aqede ukuthandaza,+ kwehla umlilo uvela ezulwini+ watjhisa umnikelo otjhiswako nemihlatjelo begodu iphazimulo kaJehova yazala indlu.+ 2 Abaphristi bebangakghoni ukungena ngendlini kaJehova ngombana iphazimulo kaJehova beyizele indlu kaJehova.+ 3 Boke abantu bakwa-Israyeli bebaqalile nakwehla umlilo begodu iphazimulo kaJehova igubuzese indlu, yeke bakhothama bahloma iinhloko ecabazini eligangadelweko bese baguqa badumisa uJehova, “ngombana muhle; ithando lakhe* lihlala ngokungapheliko.”
4 Nje-ke ikosi nabo boke abantu benzela uJehova imihlatjelo.+ 5 IKosi uSolomoni yanikela ngemihlatjelo yeenkomo ezizii-22 000 nezimvu ezizii-120 000. Ngokunjalo-ke ikosi nabantu boke bavula indlu kaZimu weqiniso.+ 6 Abaphristi bebajame eendaweni abasebenzela kizo njengombana bekunjalo nangamaLevi ebewaneenliliso zokubhinela uJehova.+ (IKosi uDavida yenza iinliliswezi bona ithokoze uJehova “ngombana ithando lakhe* lihlala ngokungapheliko,” lokha uDavida adumisa nawo.*) Abaphristi bebabethela amabhorompita phezulu+ phambi kwamaLevi, kukulapho woke ama-Israyeli ajamile.
7 USolomoni wacwengisa indawo ephakathi yesirhodlo esiphambi kwendlu kaJehova ngombana bekufuze ayinikele lapho iminikelo etjhiswako+ nomhlwehlwe wemihlatjelo yetjhebiswano ngombana iminikelo etjhiswako, iminikelo yeenthoro+ nomhlwehlwe+ beyinganeli e-aldareni lekhopha+ uSolomoni ebekalenzile. 8 Ngesikhatheso uSolomoni wenza umnyanya wamalanga alikhomba+ no-Israyeli woke, ibandla elikhulu khulu kusukela eLebo-Rhamathi* kwehle bekuyokufika emRhobeni* weGibhide.+ 9 Kodwana ngelanga lobunane* babamba umhlangano ocwengileko,+ ngombana bebagidinge ukuvulwa kwe-aldara amalanga alikhomba begodu baba nomnyanya amalanga alikhomba. 10 Kwathi ngelanga lama-23 lenyanga yekhomba, waphadlhalaja abantu babuyela emakhabo bathabile+ bese bathaba khulu eenhliziyweni zabo ngebanga lobuhle uJehova abenzele uDavida noSolomoni nabantu bakhe u-Israyeli.+
11 Nje-ke uSolomoni waqeda indlu kaJehova nendlu yekosi;*+ koke ebekufika ehliziyweni kaSolomoni bona akwenzele indlu kaJehova nendlwakhe, wakwenza ngokuphumelelako.+ 12 Ngemva kwalokho, uJehova wabonakala kuSolomoni+ ebusuku wathi kuye: “Ngiwuzwile umthandazwakho begodu ngizikhethele indawo le bona ibe yindlu yomhlatjelo.+ 13 Nangivala umkayi bese izulu lingani, nalokha nangiyala isikhonyani bona siyokurhiribidela inarha begodu ngithumela isifo phakathi kwabantu bami, 14 nange abantu bami, ababizwa ngegama lami,+ bayazithoba,+ bathandaze, bafune ubuso bami bebaphenduke eendleleni zabo ezimbi,+ ngizokuzwa ngisezulwini bese ngilibalele isono sabo bengilaphe nenarhabo.+ 15 Nje-ke amehlwami azokuvuleka neendlebe zami zizowutjheja umthandazo owenziwa endaweni le.+ 16 Nje-ke ngikhethe bengacwengisa indlu le ukuze igama lami libe lapho safuthi,+ amehlwami nehliziywami kuzakuhlala kulapho.+
17 “Nje-ke wena, nawungakhamba phambi kwami njengombana uyihlo uDavida akhamba ngokwenza koke engikuyale ngakho, ulalele iinqophiso nezahlulelo zami,+ 18 mina-ke ngizokunzinzisa isihlalo sakho sobukhosi,+ njengombana ngenza isivumelwano noyihlo uDavida+ ngathi, ‘Kuzokuhlala kunomuntu osizukulwana sakho esihlalweni sobukhosi sakwa-Israyeli.’+ 19 Kodwana naningajika nitjhiye imithethwami nemiyalwami engiyibeke phambi kwenu begodu nikhambe niyokulotjha abanye abozimu benibakhothamele,+ 20 ngizokuruthula u-Israyeli enarhenami engimnikele yona,+ nendlu le engiyicwengisele igama lami ngizoyisusa phambi kwamehlwami, ngizokwenza bona ihlekwe bekuhlekiswe ngayo eentjhabeni zoke.+ 21 Godu indlu le izokuba liqubi lamarubhi. Woke umuntu odlula ngakiyo uzoyihlahlela amehlo ararekile+ athi, ‘Kubayini uJehova enze lokhu enarheni le nendlini le?’+ 22 Nje-ke bazokuthi, ‘Kungombana bafulathele uJehova+ uZimu wabokhokho babo, owabakhupha enarheni yeGibhide,+ bamukela abanye abozimu, babakhothamela bese babalotjha.+ Kungebangelo-ke abalethele isizeli.’”+