Yesibili YeenKronike
10 URerhobhowamu watjhinga eTjhekemu,+ ngombana woke ama-Israyeli bekeze eTjhekemu bona azombeka ukuthi abe yikosi.+ 2 Msinyana uJerobhowamu+ indodana kaNebathi nakezwa ngalokho (bekasese seGibhide ngombana wabalekela iKosi uSolomoni),+ uJerobhowamu wabuya eGibhide. 3 Yeke kwathunyelwa bona abizwe, uJerobhowamu no-Israyeli woke baya kuRerhobhowamu bathi: 4 “Uyihlo wasithwesa ijogi elibudisi.+ Kodwana wena nawungenza umsebenzi kayihlo obudisi lo ube bulula, wehlise nobudisi bejogi* asithwese lona, sizokusebenzela.”
5 Wathi kibo: “Nibuye ngemva kwamalanga amathathu.” Nje-ke abantu bakhamba.+ 6 Ngemva kwalokho, iKosi uRerhobhowamu yabuza amadoda amadala ebewasebenzela uyise uSolomoni nakasaphilako, yathi: “Ningangiluleka nithini bona ngiphendule abantwaba?” 7 Amphendula athi: “Nawungaba nomusa ebantwinaba bese ubathabise, ubanikele nependulo abayifunako, bazokuhlala baziinceku zakho.”
8 Kodwana akhenge alalele iseluleko samadoda amadala, wabuza amasokana akhule nawo nje esele aziinsebenzi zakhe.+ 9 Wawabuza wathi: “Ningangiluleka nithini bona siphendule abantwaba abathe kimi, ‘Lenze libe bulula ijogi uyihlo asithwese lona’?” 10 Amasokana akhule nawo athi kuye: “Nakhu okufuze ukutjho ebantwini abathe kuwe, ‘Uyihlo wenze ijogi lethu laba budisi kodwana wena kufuze usenzele lona libe bulula’; yeke kufuze uthi kibo, ‘Utsetserwanami uzokuba mabhombo ukudlula iinyonga zakababa. 11 Ubaba wanithwesa ijogi elibudisi kodwana mina ngizokungezelela ejogini lenu. Ubaba wanijezisa ngeembebhu kodwana mina ngizonijezisa ngeembebhu ezineempente ezihlabako.’”
12 UJerobhowamu nabo boke abantu beza kuRerhobhowamu ngelanga lesithathu njengombana ikosi beyithe: “Buyani kimi ngelanga lesithathu.”+ 13 Kodwana ikosi yabaphendula ngokubakgharameja. Yeke iKosi uRerhobhowamu akhenge ilalele iseluleko samadoda amadala. 14 Yakhuluma nabo ngokuvumelana neseluleko samasokana, yathi: “Ngizokwenza ijogi lenu libe budisi ukudlula lokhu begodu ngizolingezelela. Ubaba wanijezisa ngeembebhu kodwana mina ngizonijezisa ngeembebhu ezineempente ezihlabako.” 15 Yeke ikosi akhenge ibalalele abantu ngombana izenzakalwezi zabangelwa nguZimu weqiniso+ bona kuzaliseke ilizwi uJehova alikhuluma ngo-Arhiya+ weTjhilo kuJerobhowamu indodana kaNebathi.
16 Kuthe lokha woke ama-Israyeli nakabona ukuthi ikosi iyabhala ukuwalalela, aphendula ikosi athi: “Sihlangene ngani noDavida? Asinalifa endodaneni kaJese. Ngamunye akatjhinge kibozimu bakhe, Israyeli! Uzazibona wena ndlu kaDavida.”+ Ngalokho ama-Israyeli woke abuyela eendlini zawo.+
17 Kodwana uRerhobhowamu waraga nokubusa ama-Israyeli ahlala emadorobheni wakwaJuda.+
18 Ngemva kwalokho, iKosi uRerhobhowamu+ yathumela uHadoramu, obekamphathi walabo abakatelelwe ukuthi basebenzele ikosi kodwana ama-Israyeli amkghadlha ngamatje bewafa. IKosi uRerhobhowamu yakghona ukukhwela ekaranenayo yabalekela eJerusalema.+ 19 Yeke ama-Israyeli bewasolo aphikisana nendlu kaDavida bekube kunamhlanjesi.