Yesibili YeenKronike
21 Nje-ke uJehotjhafathi wahlongakala, wabulungwa nabokhokho bakhe eDorobheni lakaDavida, indodanakhe uJehoramu yaba yikosi esikhundleni sakhe.+ 2 Abafowabo, amadodana kaJehotjhafathi, bekungu-Azariya, uJerhiyeli, uZakariya, u-Azariya, uMikhayeli noTjhefathiya. Woke la bekumadodana kaJehotjhafathi ikosi yakwa-Israyeli. 3 Uyise bekawanikele izipho ezinengi zesiliva, zegolide nezinto eziligugu, kuhlanganise namadorobho avikelekileko wakwaJuda,+ kodwana wanikela uJehoramu+ umbuso ngombana bekalizibulo.
4 UJehoramu nasele abusa esikhundleni sakayise, wanzinzisa umbuswakhe ngokuthi abulale ngesabula abafowabo+ kuhlanganise namanye amakhosana wakwa-Israyeli. 5 UJehoramu bekaneminyaka ema-32 nakaba yikosi begodu wabusa iminyaka ebunane eJerusalema.+ 6 Wakhamba emtlhaleni wamakhosi wakwa-Israyeli,+ njengombana kwenza bendlu ka-Arhabi ngombana bekatjhade nendodakazi ka-Arhabi.+ Wasolo enza okumbi phambi kwakaJehova. 7 Kodwana uJehova akhenge atjhabalalise indlu kaDavida ngebanga lesivumelwano asenza naye ngombana wathembisa uDavida+ ukuthi uzokuhlala anikela yena namadodanakhe isibani.+
8 Emihleni kaJehoramu, u-Edomu wahlubuka kuJuda+ bese wazibekela ikosi.+ 9 Nje-ke uJehoramu neenduna zakhe bayamela kwa-Edomu neenkarana zakhe zoke zepi, wavuka ebusuku wasahlela ama-Edomu ebewaragelele yena nabalawuli beenkarana zepi, wawahlula. 10 Kodwana u-Edomu usolo ahlubuke kuJuda bekube kunamhlanjesi. ILibhina+ nayo yahlubuka ngesikhatheso ngombana yalahla uJehova uZimu wabokhokho bayo.+ 11 Wenza neendawo eziphakemeko+ eentabeni zakwaJuda bona ayenge abantu beJerusalema ukuthi bangwadle nabozimu bezinye iintjhaba* begodu waphambukisa uJuda kuZimu.
12 Emaswapheleni wafumana incwadi evela ku-Eliya+ umphorofidi, ethi: “UJehova uZimu kaDavida ukhokhwakho uthi, ‘Akhenge ulandele imitlhala kaJehotjhafathi+ uyihlo namkha ulandele imitlhala ka-Asa+ ikosi yakwaJuda. 13 Kodwana wakhamba emtlhaleni wamakhosi wakwa-Israyeli,+ wabangela uJuda nabantu beJerusalema bona bangwandle nabozimu bezinye iintjhaba njengobungwadla+ obenziwa endlini ka-Arhabi.+ Ubulele ngitjho nabafowenu,+ umndeni kayihlo ebewungcono kunawe. 14 Nje-ke uJehova uzokuletha ihlekelele ebantwini bakho, emadodanenakho, ebafazini bakho nakikho koke okungekwakho. 15 Uzokuphathwa kugula okunengi, uphathwe bulwele bamathumbu bekube kulapho amathumbakho aphumela ngaphandle ngebanga lokugula qobe langa.’”
16 Nje-ke uJehova wenza+ amaFilista+ nama-Arabhu+ ebewahlala eduze namaTopiya bona angazwani noJehoramu. 17 Asahlela uJuda, angena ngekani bese athatha yoke ipahla ebeyingendlini yekosi,*+ kubandakanye amadodana nabafazi bakhe kwatjhiywa kwaphela uJehowarhazi*+ indodanakhe yokugcina. 18 Ngemva kwakho koke lokhu, uJehova wambetha ngokugula okungalaphekiko kwamathumbu.+ 19 Ngokukhamba kwesikhathi, nasele kudlule iminyaka emibili amathumbakhe aphumela ngaphandle ngebanga lokugula kwakhe. Ukugula kwakhe kwambhokela khulu bewahlongakala begodu abantu bakhe akhenge bamhloniphe ngokubasa umlilo njengombana bebenzela abokhokho bakhe.+ 20 Bekaneminyaka ema-32 ubudala nakaba yikosi, wabusa iminyaka ebunane eJerusalema. Akunamuntu owamlilelako nakahlongakalako. Yeke bambulungela eDorobheni lakaDavida+ kodwana akhenge bambulungele emathuneni wamakhosi.+