Yesibili YeenKronike
22 Ngemva kwalokho, abantu beJerusalema babeka u-Arhaziya indodanakhe encani bona ibe yikosi esikhundleni sakhe ngombana ibutho labadlelezeli eleza nama-Arabhu labulala woke amadodanakhe amakhulu.+ Nje-ke u-Arhaziya indodana kaJehoramu waba yikosi yakwaJuda.+ 2 U-Arhaziya bekaneminyaka ema-22 nakaba yikosi, wabusa umnyaka munye eJerusalema. Igama lakanina bekungu-Ataliya+ umzukulwana* ka-Omri.+
3 Naye wakhamba emtlhaleni wabantu bendlu ka-Arhabi+ ngombana unina bekamhlohlozela bona enze okumbi. 4 Waragela phambili nokwenza okumbi phambi kwakaJehova njengabantu bendlu ka-Arhabi ngombana ngemva kokuhlongakala kwakayise baba beluleki bakhe, kwaba kutjhatjalaliswa kwakhe. 5 Walandela isinqophiso sabo wakhamba noJehoramu indodana ka-Arhabi ikosi yakwa-Israyeli bona bayokulwa noRhazayeli+ ikosi yeSiriya eRamothi-Giliyadi,+ kulapho abadumuzi bemisubela balimaza khona uJehoramu. 6 Wabuyela eJizriyela+ bona ayokupholisa amanceba awafumene eRama nakalwa noRhazayeli ikosi yeSiriya.+
U-Arhaziya* indodana kaJehoramu+ ikosi yakwaJuda wehlela eJizriyela bona ayokuhlola uJehoramu+ indodana ka-Arhabi ngombana bekalimele.+ 7 UZimu wenza bona u-Arhaziya abulawe ngesikhathi avakatjhele uJehoramu. Uthe nakafika lapho, wakhamba noJehoramu bayokuhlangana noJehu+ umzukulwana kaNimtjhi loyo uJehova amzesa bona abulale abantu bendlu ka-Arhabi.+ 8 UJehu nakakhupha isigwebo phezu kwendlu ka-Arhabi wafumana amakhosana wakwaJuda, amadodana wabafowabo baka-Arhaziya neensebenzi zaka-Arhaziya, wababulala.+ 9 Ngemva kwalokho, wafuna u-Arhaziya, bamfumana abhace eSamariya, bamusa kuJehu. Bambulala bebambulunga+ bathi: “Lo mzukulwana kaJehotjhafathi owalotjha uJehova ngehliziywakhe yoke.”+ Akakho namunye endlini ka-Arhaziya obekanamandla wokubusa.
10 Nje-ke u-Ataliya,+ unina laka-Arhaziya nakabona bonyana indodanakhe ihlongakele, wakhamba wayokubulala zoke iindlalifa zebukhosini bakwaJuda.+ 11 Kodwana uJehotjhabathi+ indodakazi yekosi wathatha uJowatjhi indodana ka-Arhaziya wameba hlangana namadodana wekosi ebewayokubulawa, wamfihla nembelesakhe ngekumbeni engaphakathi. UJehotjhabathi indodakazi yeKosi uJehoramu+ (bekamkaJehoyada+ umphristi begodu angudadwabo laka-Arhaziya) wakghona ukumfihlela u-Ataliya bona angambulali.+ 12 Wahlala nabo iminyaka esithandathu babhace ngendlini kaZimu weqiniso, ngesikhathi u-Ataliya abusa enarheni.