Isaya
16 Thumelani iramu kumbusi wenarha,
Lisuka eSela lidlula emmangweni
Liye entabeni yendodakazi yeZiyoni.
2 Njengenyoni eqothwe esidlekeni sayo,+
Ngokunjalo amadodakazi wakwaMowabi azokuba semazibukweni we-Arinoni.+
3 Khuphani iseluleko, yenzani isiqunto.
Yenzani umthunzenu ube njengobusuku emini ekulu.
Fihlani abaphadlhaleleko begodu ningabakghapheli ababalekako.
4 Kwanga abaphadlhaleleko bami bangahlala kuwe Mowabi.
Yiba yindawo yokubhaca kibo ngebanga lomtjhabalalisi.+
Ogandelelako uzokuphelelwa sikhathi,
Ukutjhabalalisa kuzokufika emaphethelweni,
Nalabo abagadangela abanye phasi bazokutjhabalala ephasini.
5 Nje-ke isihlalo sobukhosi sizokunzinziswa ngethando elithembekileko.
Loyo ohlala kiso etendeni lakaDavida uzokuthembeka;+
Uzokwahlulela ngobulungiswa begodu msinyana uzokwenza bona kube nokulunga.”+
6 Sizwile ngokuzikhakhazisa kwakaMowabi, uzikhakhazisa khulu,+
Ukuzikhukhumeza kwakhe, ukuzikhakhazisa kwakhe nokusilingeka kwakhe;+
Kodwana ikulumakhe engatjho litho, izokuphela.
7 Nje-ke uMowabi uzokulila ngehlekelelakhe;
Boke bakwaMowabi bazokulila.+
Labo ababetjhiweko bazokulilela amakhekhe wamadiribe omisiweko weKiri-Rhareseti.+
8 Ngombana amasimu weRhetjhibhoni+ atjhwabile,
Isimu yamadiribe yeSibhima,+
Ababusi beentjhaba bagadange iimpande zayo ezibomvu;
Bezifika eJazeri;+
Zidlulela emmangweni.
Amahlumelayo arhatjheke bekayokufika elwandle.
9 Kungebangeli ngililela isimu yamadiribe yeSibhima njengombana ngililela iJazeri.
Ngizokuthambisa ngeenyembezi zami, wena Rhetjhibhoni nawe-Eliyale,+
Ngombana ukurhuwelela ngebanga lesithelo sakho sehlobo nokuvuna kwakho kuphelile.*
10 Ithabo nokujekezela kususiwe esimini yeenthelo,
Begodu azikho iingoma zethabo namkha ukurhuwelela esimini yamadiribe.+
Akunamuntu ogadanga amadiribe ebutlhodlhelweni bewayini bona enze iwayini,
Ngombana ngibangele bona ukurhuwelela kuphele.+
11 Kungebangelo ngihlengezela ngaphakathi kwami ngebanga lokudana kwami ngoMowabi,+
Njengeentambo zeharibha,
Begodu ingaphakathi lami liyahlengezela ngebanga leKiri-Rhareseti.+
12 Ngitjho nanyana uMowabi angazitshwenya kangangani ngokuya endaweni ephakemeko begodu ayokuthandaza endawenakhe ecwengileko, angekhe azuze litho.+
13 Leli lilizwi uJehova alikhuluma phambilini malungana noMowabi. 14 Nje-ke uJehova wathi: “Eminyakeni emithathu njengeminyaka yesisebenzi esiqatjhiweko, iphazimulo kaMowabi izokuhlazeka ngehlangahlangano ekulu begodu abaseleko bazokuba mbalwa bese bangabi namandla.”+