Joromiya
15 Yeke uJehova wathi kimi: “Ngitjho nanyana uMosi noSamyela bangajama phambi kwami,+ angekhe ngibazwele abantwaba. Baqothe phambi kwami. Abakhambe. 2 Begodu nabathi, ‘Siye kuphi?’ kufuze uthi kibo, ‘Ngilokhu uJehova akutjhoko:
Ofanelwe sibetho esibulalako, esibethweni esibulalako!
Ofanelwe yisabula, esabuleni!+
Ofanelwe yindlala, endlaleni!
Ofanelwe kuthunjwa, ekuthunjweni!”’+
3 “‘Begodu ngizokubeka iinhlekelele ezine phezu kwabo,’*+ kutjho uJehova, ‘isabula bona ibabulale, izinja bona zidose iindumbu zabo, iinyoni zezulu neembandana zephasi bona zirhiribidele begodu zitjhabalalise.+ 4 Ngizobenza into ethusako kiyo yoke imibuso yephasi+ ngebanga lakaManase indodana kaHezekiya, ikosi yakwaJuda, ngebanga lalokho akwenze eJerusalema.+
5 Ngubani ozokuzwela Jerusalema,
Ngubani ozokurhawukela,
Begodu ngubani ozokujama abuze ngehlalakuhle yakho?’
Ngizokuphakamisa isandla
sami ngokujamelene nawe bengikutjhabalalise.+
Ngidiniwe kuzwelana nawe.
7 Ngizobahlukanisa ngeforogo emasangweni wenarha.
Ngizobathathela abantwababo.+
Ngizokutjhabalalisa abantu bami,
Njengombana bangafuni ukutjhuguluka eendleleni zabo.+
8 Abahlolokazi babo bazokuba banengi phambi kwami ukudlula ihlabathi yelwandle.
Ngizokuletha umtjhabalalisi emini ngokujamelene nabo, ngokujamelene nabomma namasokana.
Ngizokuletha ukutshwenyeka nokusaba kibo kungakalindeleki.
9 Umma obelethe abantwana abalikhomba uphelelwe mamandla;
Ubhalelwa kuphefumula.
Ilanga lakhe limtjhingele kusesesemini,
Limbangele iinhloni nehlazo.’
‘Begodu abambalwa abaseleko
Ngizobanikela esabuleni ephambi kwamanababo,’ kutjho uJehova.”+
10 Maye! Kimi nakuwe mma, ngombana ungibelethile,+
Abantu bayo yoke inarha bayangiphikisa begodu balwa nami.
Akhenge ngikolodise namkha ngiboleke;
Kodwana boke bayangiqalekisa.
11 UJehova uthe: “Kwamambala ngizokusekela;
Kwamambala ngizokungenela ngesikhathi sehlekelele,
Ngizokusekela nawusahlelwa manabakho.
12 Ukhona na umuntu ongaphula isimbi ibe ziinquqwana,
Isimbi evela etlhagwini nekhopha?
13 Abantu bazozithathela izinto zakho namagugwakho,+
Angekhe zithengiswe, ngebanga lazo zoke izono zakho ozenze kizo zoke iimfunda zakho.
14 Ngizozinikela amanabakho
Akhambe nazo enarheni ongayaziko.+
Ngombana umlilo uyavutha ngebanga lelaka lami,
Begodu uvutha ngokujamelene nawe.”+
15 Maye! Jehova, wena uyazi
Ngikhumbula begodu ungitjheje.
Ngibuyiselela kilabo abangihlunguphazako.+
Ungangivumeli ngitjhabalale ngebanga lokungasilingeki kwakho msinya.
Tjheja bona ngenzela wena njengombana ngihlaziseka.+
16 Lokha ilizwi lakho nalifika kimi, ngalidla;+
Ilizwi lakho laba lithabo kimi begodu lathabisa ihliziywami,
Maye! Jehova Zimu wamabutho, ngombana igama lakho libizwe kimi.
17 Angihlali hlangana nabantu abathanda ukwenza amahlaya begodu bathabe.+
18 Kubayini ubuhlungu bami bungapheli nenceba lami lingalapheki?
Alifuni ukuphola.
Uzokuba mthombo wamanzi okhohlisako kimi
Okungekhe kwathenjelwa kiwo?
19 Yeke ngilokhu uJehova akutjhoko:
“Nawubuyako ngizokuvuselela,
Begodu uzokujama phambi kwami.
Nawuhlukanisa izinto eziligugu nezinto ezingasizi ngalitho,
Uzokuba njengomlomami.*
Kuzokufuze babuyele kuwe,
Kodwana angekhe ubuyele kibo.”
20 “Ngikwenza iboda elivikelekileko lekhopha ebantwinaba.+
Kwamambala bazokulwa nawe,
Kodwana angekhe bakuhlule,+
Ngombana nginawe, bona ngikusindise bengikuhlenge,” kutjho uJehova.
21 “Ngombana ngizokusindisa esandleni sabakhohlakeleko
Begodu ngikuhlenge esandleni sabanelunya.”