Isaya
2 Nakhu okwabonwa ngu-Isaya, indodana ka-Amotsi, malungana noJuda neJerusalema:+
2 Emihleni yokuphela,
Intaba yendlu kaJehova
Izokudzinyeleliswa ngaphezu kwesiqongolo seentaba,+
Izokuphakanyiswa ngaphezu kwemibundu,
Zoke iintjhaba zizokugelezela kiyo.+
3 Iintjhaba ezinengi zizokuza, zithi:
“Yenize, asikhuphukeleni entabeni kaJehova,
Endlini kaZimu kaJakopo.+
Uzosifundisa ngeendlela zakhe,
Begodu sizokukhamba eendleleni zakhe.”+
Ngombana umthetho uzokuphuma eZiyoni,
Nelizwi lakaJehova lizokuphuma eJerusalema.+
4 Uzokwahlulela hlangana neentjhaba
Begodu uzokulungisa iindaba hlangana neentjhaba ezinengi.
Zizokwenza iinsabula zazo zibe maplurhu
Nemikhontwazo ibe mimikhwa yokuthena imithi.+
Isitjhaba angeze sisaphakamisela esinye isitjhaba isabula,
Namkha sifunde ipi.+
5 Yenize nina bendlu kaJakopo,
Sikhambeni ekukhanyeni kwakaJehova.+
6 Ngombana ulahle abantu bakho, indlu kaJakopo,+
Ngombana bamukele amasiko amanengi wePumalanga;
Benza imilingo+ njengamaFilista,
Neenzukulwana zabantu
abavela kwezinye iinarha zihlala hlangana nabo.
7 Inarhabo izele isiliva negolide,
Namagugwabo awapheli.
Inarhabo izele iinjomani,
Neenkarana zabo azipheli.+
8 Inarhabo izele abozimu abangasizi ngalitho.+
Bakhothamela umsebenzi wezandla zabo,
Lokho iminwabo ekwenzileko.
9 Yeke umuntu uyakhothama begodu uyahlaziswa,
Angekhe ubalibalele.
10 Ngena edwaleni bese uzifihle ethulini
Ngebanga lelaka lakaJehova elisabekako
Namandlakhe aphazimulako.+
11 Amehlo womuntu ozikhukhumezako azokwehliswa,
Nabantu abazikhukhumezako bazokuthotjiswa.
NguJehova kwaphela ozokuphakanyiswa ngelangelo.
12 Ngombana lilanga lakaJehova wamabutho.+
Liyeza phezu kwawo woke umuntu ozikhakhazisako noziphakamisako,
Phezu kwawo woke umuntu ophakemeko namkha ophasi,+
13 Phezu kwayo yoke imithi yomsedari yeLibhanoni emide nephakamileko
Naphezu kwayo yoke imithi ye-owuku yeBhatjhani,
14 Phezu kwazo zoke iintaba eziphakamileko
Naphezu kwayo yoke imibundu ephezulu,
15 Phezu kwayo yoke imibhotjhongo ephezulu naphezu kwawo woke amaboda avikelekileko,
16 Phezu kwayo yoke imikhumbi yeTaratjhitjhi+
Naphezu kwazo zoke iinkepe ezihle.
17 Umuntu ozikhukhumezako uzokwehliswa,
Nabantu abazikhakhazisako bazokuthotjiswa.
NguJehova kwaphela ozokuphakanyiswa ngelangelo.
18 Abozimu abangasizi ngalitho bazokunyamalala ngokupheleleko.+
19 Abantu bazokungena emarholweni wamadwala
Nemigodini yehlabathi,+
Ngebanga lelaka lakaJehova elisabekako
Namandlakhe aphazimulako,+
Lokha nakasikima bona enze iphasi lihlengezele ngebanga lokusaba.
20 Ngelangelo abantu bazokuthatha abozimu babo abangasizi ngalitho besiliva nebegolide
Abazenzele bona, ukuthi babakhothamele
Begodu babaphose emakhondlweni nakibomaphelaphelani,+
21 Bona bangene emigodini esemadwaleni
Nemarharheni wamatje amakhulu,
Ngebanga lelaka lakaJehova elisabekako
Namandlakhe aphazimulako,
Lokha nakasikima bona enze iphasi lihlengezele ngebanga lokusaba.
22 Ngebanga lokuphila kwenu, lisani ukuthembela emuntwini,
Omphefumulo kwaphela.
Uzuzisa ngani?