Yesibili YamaKhosi

4 Nje-ke omunye wabafazi bamadodana wabaphorofidi+ walila ku-Elitjha wathi: “Isisebenzi sakho indodami, ihlongakele begodu wazi kuhle ukuthi isisebenzi sakho besihlala sisaba uJehova.+ Nje-ke kufike umuntu othileko ebekakolodwa sisebenzi sakho wazokuthatha bobabili abantwabami bona babe ziingqila zakhe.” 2 U-Elitjha wathi kuye: “Ngingakwenzelani? Akhutjho, unani ngendlini?” Waphendula wathi: “Isisebenzi sakho asinalitho ngendlini ngaphandle komjeka wamafutha.”+ 3 Yeke wathi kuye: “Phumela ngaphandle, ubawe imijeka enganalitho kibo boke abomakhelwana bakho. Bawa eminengi ngendlela ongakghona ngayo. 4 Ngemva kwalokho uzivalele ngendlini wena namadodanakho. Uzalise yoke imijeka leyo, kuthi ezeleko uyibekele ngeqadi.” 5 Yeke umfazi loyo wasuka kuye.

Wangena ngendlini bewazivalela yena namadodanakhe. Amadodanakhe bewamdlulisela imijeka, yena bekasolo athela amafutha ngakiyo.+ 6 Kwathi imijeka nayizeleko, wathi kwenye yamadodanakhe: “Letha omunye umjeka.”+ Kodwana yona yathi kuye: “Imijeka iphelele.” Khonokho amafutha azange asaphuma.+ 7 Waya emuntwini kaZimu weqiniso wambikela, yena wathi: “Khamba uyokuthengisa amafutha lawo bese ubhadale iinkolodo zakho, okusalako, wena namadodanakho nizakuphila ngakho.”

8 Ngelinye ilanga u-Elitjha waya eTjhunemu,+ lapho bekunomfazi odumileko begodu wamncenga bona adle isidlo kwakhe.+ Qobe nakadlulako, bekaphambukela lapho adle. 9 Yeke umfazi lo wathi endodenakwakhe: “Ngiyazi ukuthi umuntu lo ojayele ukudlula la, mumuntu ocwengileko kaZimu. 10 Ngibawa simenzele ikumba encani ephahleni+ simbekele umbhede, itafula, isihlalo nelithi lesibani. Kuzakuthi qobe nakeze kithi ahlale khona.”+

11 Ngelinye ilanga nakalapho, watjhinga ekumbeni esephahleni bona ayokulala. 12 Ngemva kwalokho, wathi kuGerhazi+ umsizakhe: “Akhubize umfazi weTjhunemu+ lo.” Wambiza, weza wajama phambi kwakhe. 13 U-Elitjha wathi kuGerhazi: “Ngibawa uthi kuye, ‘Qala bona uzitshwenye kangangani ngebanga lethu.+ Khuyini ongenzelwa yona?+ Kghani ngikukhulumele nekosi+ namkha nenduna yebutho?’” Kodwana waphendula wathi: “Awa, ngihlezi kuhle hlangana nabantu bekhethu.” 14 Yeke wathi: “Alo angenzelwani umfazi lo?” UGerhazi wathi: “Akanandodana+ begodu indodakhe seyiluphele.” 15 Khonokho u-Elitjha wathi: “Mbize.” Wambiza, wajama emnyango. 16 Yeke wathi kuye: “Ngesikhathesi ngomnyaka ozako uzabe usingethe indodana.”+ Kodwana yena wathi: “Awa kosami, muntu kaZimu weqiniso! Ungaleyi amala esisebenzini sakho.”

17 Nanyana kunjalo, umfazi lo waba sidisi wabeletha indodana ngesikhathi esifanako ngomnyaka olandelako njengombana u-Elitjha amtjela. 18 Umntwana lo wakhula, kwathi ngelinye ilanga waphuma waya kuyise obekanabavuni. 19 Wasolo athi kuyise: “Ihlokwami, maye! Ihlokwami!” Yeke uyise wathi esisebenzini sakhe: “Mguge umuse kunina.” 20 Yamguga yamusa kunina, wahlala phezu kwakanina bekwaba semini ekulu, ngemva kwalokho wahlongakala.+ 21 Wakhuphuka naye, wamlalisa embhedeni womuntu kaZimu weqiniso,+ waphuma wavala umnyango. 22 Wabiza indodakhe wathi kiyo: “Ngibawa ungithumele isisebenzi sinye nodumbana munye begodu ngibawa ungivumele ngithi rathu ngiye emuntwini kaZimu weqiniso, ngizakubuya.” 23 Kodwana wathi: “Kubayini ufuna ukumbona namhlanjesi? Akusikuthwasa kwenyanga+ namkha isabatha.” Yena waphendula wathi: “Ungatshwenyeki, koke kulungile.” 24 Wabophela udumbana wathi esisebenzini: “Gijima. Ungehlisi ibelo ngaphandle kokuthi ngikutjele bona wenze njalo.”

25 Nje-ke waya emuntwini kaZimu weqiniso eNtabeni iKarameli. Kwathi msinyana umuntu kaZimu weqiniso nakambona asesekude, wathi kuGerhazi umsizakhe: “Qala umfazi weTjhunemi lapha! 26 Ngibawa ugijime uyombuza uthi, ‘Athini amavuko? Ivukile indodakho? Uvukile umntwana?’” Waphendula wathi: “Sivukile umraro awukho.” 27 Nakafika emuntwini kaZimu weqiniso entabeni, wafese wabamba iinyawo zakhe.+ Khonokho uGerhazi watjhidela afuna ukumsunduza amsuse kodwana umuntu kaZimu weqiniso wathi: “Mlise ngombana usebuhlungwini obukhulu begodu uJehova ungifihlele azange angitjele.” 28 Yeke wathi: “Kghani ngabawa indodana ekosinami na? Akhenge ngitjho na ukuthi, ‘Ungangithembisi into engekho’?”+

29 Msinyana u-Elitjha wathi kuGerhazi: “Bopha izambatho zakho edinini,+ uthathe idondolo lami ukhambe. Nawungahlangana nomuntu, ungamlotjhisi; nakungaba nokulotjhisako, ungamphenduli. Khamba uyokubeka idondolo lami ebusweni bomsana.” 30 Kodwana unina lomsana wathi: “Ngifunga ngoJehova uZimu ophilako, angekhe ngikhambe nawungakhambiko.”+ Yeke wasikima wakhamba naye. 31 Kodwana uGerhazi wabafikelela, wabeka idondolo ebusweni bomsana kodwana kwathula kwathi du akhenge kube nento esikinyekako.+ Wabuyela emva wayokuhlangabeza u-Elitjha wathi kuye: “Umsana azange avuke.”

32 U-Elitjha nakafika ngendlini, umsana bekalele embhedenakhe afile.+ 33 Wangena wazivalela ngaphakathi kwaba ngibo bobabili kwaphela, wathoma ukuthandaza kuJehova.+ 34 Ngemva kwalokho, wakhwela embhedeni, walala phezu komntwana wabeka umlomakhe emlonyeni womsana, amehlwakhe emehlwenakhe nezandla zakhe phezu kwezandla zakhe, wasolo alele phezu kwakhe. Umzimba womntwana wathoma ukufuthumala.+ 35 Wakhambakhamba ngendlini begodu wakhwela embhedeni walala phezu komntwana godu. Umsana lo wathimula kalikhomba, ngemva kwalokho wavula amehlo.+ 36 Nje-ke u-Elitjha wabiza uGerhazi wathi kuye: “Biza umfazi weTjhunemi.” Wambiza, weza kuye. U-Elitjha wathi kuye: “Guga indodanakho.”+ 37 Wangena wawela eenyaweni zakhe, waguqa phambi kwakhe, ngemva kwalokho waguga indodanakhe waphuma.

38 Ngesikhathi u-Elitjha abuyela eGiligali bekunendlala enarheni.+ Amadodana wabaphorofidi+ bewahlezi phambi kwakhe begodu wathi kumsizakhe:+ “Beka ipoto ekulu eziko, uphekele amadodana wabaphorofidi ukudla.” 39 Nje-ke omunye wabo waphuma waya emmangweni ayokukha imirorho, wafumana isitjalo semmangweni wakha iinthelo zalo, wazizalisa esambathweni sakhe. Wabuya wazirhabelela ngepotweni kodwana bekangazi ukuthi zizinto bani. 40 Ngokukhamba kwesikhathi baphakela amadoda la bona adle kodwana kwathi msinyana nakadla ukudlokhu arhuwelela athi: “Maye! Muntu kaZimu weqiniso, kunokufa ngepotweni le.” Babhalelwa kukudla. 41 Yeke wathi: “Ngilethelani iflowuru.” Wayithela ngepotweni, ngemva kwalokho wathi: “Phakelani abantu.” Azange kusaba nento eyingozi ngepotweni.+

42 Kwafika umuntu avela eBhali-Tjhalitjha+ aphathele umuntu kaZimu weqiniso uburotho obuma-20 bebhali+ obenziwe ngeenthelo zokuthoma ezivuthiweko, amphathele nomgodla weenthoro ezitjha.+ U-Elitjha wathi: “Kunikele abantu badle.” 43 Kodwana umsizakhe wathi: “Ngingakubeka njani ukudla okuncani kangaka phambi kwamadoda ali-100?”+ Kodwana wathi: “Nikela abantu badle ngombana uJehova uthi, ‘Bazokudla bekusale.’”+ 44 Yeke wakubeka phambi kwabo, badla bekwasala+ ngokuvumelana nelizwi lakaJehova.