Yesibili YeenKronike
19 Nje-ke uJehotjhafathi ikosi yakwaJuda wabuyela emzinakhe*+ eJerusalema aphephile. 2 UJehu+ indodana kaRhanani+ waphuma wayokuhlangabeza iKosi uJehotjhafathi bese wathi kiyo: “Ucabanga bona kulungile na ukusiza abakhohlakeleko+ begodu uthande abahloya uJehova?+ Yeke ngebanga lalokho ilaka lakaJehova lijamelene nawe. 3 Nanyana kunjalo, zikhona izinto ezihle ozenzileko,+ ususe iingodo ezicwengileko* enarheni, walungiselela nehliziywakho bona ulotjhe uZimu weqiniso.”+
4 UJehotjhafathi waragela phambili ahlala eJerusalema, wakhamba godu asuka eBheritjheba waya esifundeni seentaba sakwa-Efrayimu+ bona ayokukhuthaza abantu bonyana babuyele kuJehova uZimu wabokhokho babo.+ 5 Wabeka abahluleli enarheni yakwaJuda, kiwo woke amadorobho wayo avikelekileko.+ 6 Wathi ebahlulelini: “Tjhejani enikwenzako ngombana anahluleleli umuntu kodwana nahlulelela uJehova begodu unani nanikhupha isahlulelo.+ 7 Nje-ke sabani uJehova.+ Tjhejani kilokho enikwenzako ngombana uJehova uZimethu unobulungisa,+ akakhethi+ begodu akafunjathiswa.”+
8 EJerusalema uJehotjhafathi wabeka amanye wamaLevi nabaphristi nezinye zeenhloko zeenkoro zakwa-Israyeli bona babe bahluleli bakaJehova bese bararulule imilandu yabantu beJerusalema.+ 9 Wabayala wathi: “Nakhu okufuze nikwenze ekusabeni kwenu uJehova ngokuthembeka nangehliziyo yoke: 10 Nanyana kunini abafowenu abahlala kwamanye amadorobho nabaletha umlandu obandakanya ukuphalazwa kweengazi+ namkha umbuzo omalungana nomthetho, umyalo, iinqophiso namkha izahlulelo, kufuze nibayelelise bona bangoni kuJehova ngombana nabamonako ilaka lakhe lizokujamelana nawe nabafowenu. Lokhu ngikho okufuze nikwenze bona ningabi mlandu. 11 Nangu u-Amariya umphristi omkhulu owengamele zoke iindaba ezimalungana noJehova.+ UZebadiya indodana ka-Itjhimayeli umdosiphambili wendlu kaJuda kizo zoke iindaba ezimalungana nekosi. AmaLevi wona azokuba ziinkhulu zenu. Nje-ke qinani nithathe igadango, nivumele uJehova abe nalabo abenza okuhle.”+