Joromiya
8 “Ngesikhatheso,” kutjho uJehova, “amathambo wamakhosi wakwaJuda, amathambo wamakhosanawo, amathambo wabaphristi, amathambo wabaphorofidi namathambo wezakhamuzi zeJerusalema azokuthathwa emathunenabo. 2 Azokundlalwa elangeni, enyangeni nakilo loke ibutho lezulwini ebebalithanda, balilotjha, balilandela, balifuna begodu balikhothamela.+ Angekhe abuthelelwe namkha abulungwe. Azokuba njengomsuqwa ehlabathini.”+
3 “Abaseleko bomndeni omumbi lo abasindileko bazokukhetha ukufa kunokuphila kizo zoke iindawo engibarhatjhe kizo,” kutjho uJehova wamabutho.
4 “Kufuze uthi kibo, ‘UJehova uthi:
“Nange bawa angekhe bavuke godu?
Nange munye abuya, omunye angekhe abuye na?
5 Kubayini abantu beJerusalema bangakathembeki, ngokungathembeki okungapheliko?
Babambelela ekohlisweni;
Abafuni ukuphenduka.+
6 Ngatjheja begodu ngasolo ngilalele, kodwana indlela ebebakhuluma ngayo beyingakalungi.
Akunamuntu ophenduke ekukhohlakaleni kwakhe namkha obuze ukuthi, ‘Ngenzeni?’+
Omunye nomunye usolo abuyela endlelenakhe ayijayeleko, njengenjomani egijimela epini.
7 Ngitjho nodoyi ophapha emkayini uyasazi isikhathi sakhe somnyaka;
Ijuba, inyoni encani nenyoni ekulu ziyasazi isikhathi sazo sokubuya.
Kodwana abantu bami abasizwisisi isahlulelo sakaJehova.”’+
8 ‘Ngingatjho njani ukuthi: “Sihlakaniphile, begodu sinomthetho kaJehova”?
Kuhlekuhle, abatloli abanamala+ basebenzisa amapeni wabo ukutlola amala kwaphela.
9 Abahlakaniphileko bahlazisiwe.+
Babanjwe livalo begodu bazokubanjwa.
Qala! Bale ilizwi lakaJehova,
Begodu ngikuphi ukuhlakanipha abanakho?
10 Yeke ngizokuthatha abafazi babo ngibanikele amanye amadoda,
Namasimabo ngiwanikele abanye abantu;+
Kusukela komncani kuya komkhulu, omunye nomunye wenza inzuzo engakathembeki;+
Kusukela emphorofidini kuye emphristini, boke bayakhwabanisa.+
11 Balinga ukulapha ukuphuka kwendodakazi yabantu bami ngokukuthatha lula bathi,
“Kunokuthula! Kunokuthula!”
Kukulapho kunganakuthula.+
12 Baneenhloni na ngezinto ezinyenyisako abazenzileko?
Abananhloni nakancani!
Abazi nokwazi ukuthi liyini ihlazo!+
Yeke bazokuwa hlangana nabawileko.
Nangibajezisako, bazokuwa,’+ kutjho uJehova.
13 Nangibabuthelelako, ngizobaqeda,’ kutjho uJehova.
‘Angekhe kube namadiribe aseleko emthini wamadiribe, angekhe kube namafeyi emthini wamafeyi namakari azokutjhwaba.
Engibanikele khona kuzobalahlekela.’”
14 “Kubayini sihleli lapha?
Asihlanganeni ndawonye singene emadorobheni avikelekileko+ begodu sitjhabalale lapho.
Ngombana uJehova uZimethu uzositjhabalalisa,
Begodu usipha amanzi anetjhefu bona sisele,+
Ngombana sonile kuJehova.
15 Besilindele ukuthula kodwana akunalitho elihle elifikileko,
Besilindele isikhathi sokuphola kodwana kwafika ukusaba!+
16 Kuzwakala ukuthimula kweenjomani kuvela kwaDani.
Itjhada lokulila kweenjomani zakhe,
Yoke inarha iyasikinyeka.
Amanaba ayangena begodu arhiribidele inarha nakho koke okukiyo,
Idorobho nezakhamuzi zalo.”
17 Ngombana ngithumela iinyoka hlangana nani,
Iinyoka ezinetjhefu ezingekhe zalawulwa,
Begodu zizoniluma nakanjani,” kutjho uJehova.
18 Ubuhlungu bami abulapheki;
Ihliziywami iyagula.
19 Kunetjhada lokulilela isizo elivela enarheni ekude
Elivela endodakazini yabantu bami:
“Kghani uJehova akasiseZiyoni?
Namkha ikosakhe ayisinaye?”
“Kubayini bangisilinge ngeenthombe zabo ezibaziweko,
Ngabozimu babo beentjhaba abangasizi ngalitho?”
20 “Isivuno sidlulile, ihlobo liphelile,
Kodwana thina asikasindiswa!”
21 Kungiqede amandla ukuphuka kwendodakazi yabantu bami,+
Ngigandelelekile.
Ngirhidlwa livalo.
22 Ayikho na ibhalisamu eGiliyadi?+
Namkha akekho na umuntu olaphako lapho?+
Kubayini indodakazi yabantu bami ingakalatjhwa?+