Jotjhuwa
6 Nje-ke iJerikho beyivalwe tu, ngebanga lama-Israyeli; bekunganamuntu ophumako begodu kunganamuntu ongenako.+
2 Yeke uJehova wathi kuJotjhuwa: “Qala, nginikele iJerikho, ikosi yakhona neengorho zayo esandleni sakho.+ 3 Noke nina madoda wepi kufuze nimatjhe nizombe idorobho, nilizombe kanye. Ngilokho ekufuze nikwenze amalanga asithandathu. 4 Kufuze kube nabaphristi abalikhomba abaphethe amaphondo alikhomba wamaramu phambi komFaji. Ngelanga lekhomba, kufuze nimatjhe nizombe idorobho amahlandla alikhomba begodu abaphristi kufuze bavuthele amaphondo.+ 5 Lokha iphondo leramu nalivuthelwako, msinyana nanizwa itjhada lephondo,* boke abantu kufuze bahlabe umkhosi wepi. Ngemva kwalokho, iboda ledorobho lizokugirika+ begodu abantu kufuze bakhuphuke, omunye nomunye anqophe phambili.”
6 Yeke uJotjhuwa indodana kaNuni wabiza abaphristi wathi kibo: “Thathani umfaji wesivumelwano begodu abaphristi abalikhomba kufuze baphathe amaphondo alikhomba wamaramu phambi komFaji kaJehova.”+ 7 Ngemva kwalokho, wathi ebantwini: “Khambani begodu nimatjhe nizombe idorobho, amasotja ahlomileko+ kufuze akhambe phambi komFaji kaJehova.” 8 Njengombana uJotjhuwa bekakhulumile ebantwini, abaphristi abalikhomba abaphethe amaphondo alikhomba wamaramu phambi kwakaJehova batjhinga phambili, bavuthela amaphondo begodu umfaji wesivumelwano kaJehova bewubalandela. 9 Amasotja ahlomileko bewakhamba phambi kwabaphristi ebebavuthela amaphondo begodu amasotja angemuva bekalandela umFaji njengombana amaphondo bekasolo avuthelwa.
10 UJotjhuwa bekayale abantu wathi: “Ningarhuweleli namkha nibange itjhada. Akukafuzi kuphume ilizwi emilonyenenu bekube lilanga engithi ngalo kini, ‘Rhuwelelani!’ Ngesikhatheso ningarhuwelela.” 11 Walayela bona bazombe idorobho bathwele umFaji kaJehova, balizomba kanye, ngemva kwalokho babuyela ekampeni begodu balala lapho.
12 Ngelanga elilandelako uJotjhuwa wavuka ngamasa, abaphristi bathwala umFaji+ kaJehova, 13 abaphristi abalikhomba abaphethe amaphondo alikhomba wamaramu bebakhamba phambi komFaji kaJehova, basolo bavuthela amaphondo. Amasotja ahlomileko bewakhamba phambi kwabo khisibe amasotja angemuva alandela umFaji kaJehova njengombana amaphondo asolo avuthelwa. 14 Bamatjha bazomba idorobho kanye ngelanga lesibili, ngemva kwalokho babuyela ekampeni. Ngilokho abakwenza amalanga asithandathu.+
15 Ngelanga lekhomba bavuka ngamasa, msinyana nakuthoma ukuvela ilanga, bamatjha bazomba idorobho ngendlela efanako amahlandla alikhomba. Kungelangelo kwaphela lapho bazomba khona idorobho amahlandla alikhomba.+ 16 Ngehlandla lekhomba, abaphristi bavuthela amaphondo, uJotjhuwa wathi ebantwini: “Rhuwelelani+ ngombana uJehova uninikele idorobho! 17 Idorobho nakho koke okukilo kufuze kutjhatjalaliswe;+ koke ngekwakaJehova. NguRarhabu+ ingwadla kwaphela ozokusinda, yena nabo boke abangendlinakhe ngombana wafihla iinthunywa esazithumelako.+ 18 Ningatjhideli ezintweni ezinikelwe ekutjhatjalalisweni+ bona ningazifuni benizithathe,+ nibangele ikampa yakwa-Israyeli bona itjhatjalaliswe ngokuyilethela ihlekelele.+ 19 Kodwana loke isiliva, igolide, izinto zekhopha nezesimbi zicwengile kuJehova.+ Kufuze ziye ebulungelweni lamagugu kaJehova.”+
20 Yeke abantu barhuwelela nakuvuthelwa amaphondo.+ Msinyana abantu nabezwa itjhada lephondo begodu bahlaba umkhosi wepi, iboda lagirika.+ Ngemva kwalokho, abantu bakhuphukela edorobheni, omunye nomunye anqophe phambili, bathumba idorobho. 21 Batjhabalalisa koke ebekusedorobheni ngesabula, indoda nomfazi, abatjha nabadala, ikunzi, imvu nodumbana.+
22 UJotjhuwa wathi emadodeni amabili ebekayokuhlola inarha: “Khambani niye endlini yengwadla, nikhuphe umfazi loyo nabo boke ekungebakhe, njengombana nifungile kuye.”+ 23 Yeke iinhloli zangena, zakhupha uRarhabu, uyise, unina, abafowabo nabo boke okungebakhe; iye, zakhupha umndenakhe woke+ bezakhamba nawo ngokuphephileko zawusa endaweni engaphandle kwekampa yakwa-Israyeli.
24 Ngemva kwalokho, batjhisa idorobho nakho koke okukilo. Kodwana isiliva, igolide, izinto zekhopha nezesimbi bazisa ebulungelweni lamagugu wendlu kaJehova.+ 25 NguRarhabu ingwadla nomndeni kayise nabo boke okungebakhe uJotjhuwa+ abasindisako; usahlala kwa-Israyeli bekube kunamhlanjesi+ ngombana wafihla iinthunywa uJotjhuwa azithumelako bona ziyokuhlola iJerikho.+
26 Ngesikhatheso uJotjhuwa wamemezela isifungo* wathi: “Uqalekisiwe phambi kwakaJehova umuntu olinga ukuvuselela idorobho iJerikho. Nakenza isisekelo salo, akalahlekelwe lizibulo lakhe begodu nakafaka iminyangwalo, akalahlekelwe buphetjhani bakhe.”+