Yesibili YeenKronike

25 U-Amaziya bekaneminyaka ema-25 nakaba yikosi, wabusa iminyaka ema-29 eJerusalema. Igama lakanina bekunguJehowadani weJerusalema.+ 2 Waraga nokwenza okuhle emehlweni kaJehova kodwana bekangakwenzi ngehliziyo yoke. 3 Msinyana ngemva kobana umbuswakhe sewunzinzile, wabulala iinsebenzi zakhe ezabulala uyise ikosi.+ 4 Kodwana akhenge abulale amadodana weensebenzi zakhe, wenza ngokuvumelana nalokho okutlolwe emThethweni, encwadini kaMosi lapha uJehova athi khona: “Abobaba akukafuzi babulawe ngebanga lamadodanabo, namadodana akukafuzi abulawe ngebanga laboyise; kodwana ngamunye kufuze abulawe ngebanga lesono sakhe.”+

5 U-Amaziya wabuthelela amaJuda, wawajamisa ngokweenkoro zawo, ngokweenduna zeenkulungwana nangokweenduna zamakhulu kiyo yoke inarha yakwaJuda nakwaBhenjamini.+ Wawabala kusukela kwabaneminyaka ema-20 ubudala kuye phezulu.+ Wafumana iingorho ezibanduliweko ezizii-300 000 ebezizokuba sebuthweni nezikghona ukuphatha umkhonto nesiviko esikhulu. 6 Wabuya waqatjha iingorho ezizii-100 000 kwa-Israyeli ngamatalende* wesiliva ali-100. 7 Kodwana umuntu kaZimu weqiniso weza kuye wafese wathi: “Kosami, ungavumeli ibutho lakwa-Israyeli bona likhambe nawe ngombana uJehova akasino-Israyeli+ begodu akekho namunye anaye kwa-Efrayimu. 8 Yeke wena khamba, uthathe igadango, ube nesibindi epini ngombana uZimu weqiniso unamandla wokukusiza,+ kanti godu unamandla wokwenza amanabakho akuhlule.” 9 Yeke u-Amaziya wathi kumuntu kaZimu weqiniso: “Alo kuzokwenzekani ngamatalende ali-100 engiwanikele amabutho wakwa-Israyeli?” Umuntu kaZimu weqiniso wamphendula wathi: “UJehova angakupha okudlula lokho.”+ 10 Nje-ke u-Amaziya wawajikisa amabutho ebeweze kuye avela kwa-Efrayimu, wawabuyisela emakhaya. Akwatele abantu bakwaJuda, abuyela emakhaya asilingeke kwamanikelela.

11 U-Amaziya waba nesibindi, wathatha ibutho lakhe watjhinga nalo emRhobeni weTswayi,+ wabulala amadoda weSeyiri+ azii-10 000. 12 Amadoda wakwaJuda abamba abantu abazii-10 000 baphila ngemva kwalokho aya nabo phezulu edwaleni, afika lapho abaphosela phasi begodu boke batatlaka bebaba ziinquqwana. 13 Amabutho ajikiswa ngu-Amaziya athi nakabuyela emva asahlela+ amadorobho wakwaJuda, kusukela eSamariya+ kufikela eBethe-Rhoroni,+ abulala abantu abazii-3 000 bewathatha nezinto ezinengi ezifunyenwe epini.

14 Kodwana kwathi u-Amaziya nakabuya ukuyokuhlula ama-Edomu, wabuya nabozimu beSeyiri bona azobalotjha.+ Waguqa phambi kwabo, wabathunyisela nentuthu yomhlatjelo. 15 Yeke uJehova wasilingeka khulu ngebanga lalokho okwenziwe ngu-Amaziya, wathumela umphorofidi bona ayokukhuluma naye, wafika wathi: “Kubayini ulandela abozimu abangakhenge basindise abantu babo engibanikele esandleni sakho?”+ 16 Asakhuluma nayo, ikosi yathi: “Akhuthule! Ngubani othe ngitlhoga iseluleko sakho?+ Uzokufa+ nange ungaraga nokukhuluma!” Nje-ke umphorofidi wathula kodwana ngaphambi kokuthi akhambe wathi: “Ngiyazi bona uZimu uqunte ukukutjhabalalisa ngombana wenze lokhu begodu akhenge ulalele iseluleko sami.”+

17 Ngemva kokuthi iKosi yakwaJuda u-Amaziya ikhulumisene nabeluleki bayo, yathumela umlayezo ekosini yakwa-Israyeli uJowatjhi indodana kaJehowarhazi indodana kaJehu, yathi: “Yewize sizokulwa epini.”+ 18 UJowatjhi ikosi yakwa-Israyeli wathumela umlayezo ku-Amaziya ikosi yakwaJuda wathi: “Ikhula elinameva eliseLibhanoni lathumela umlayezo emthini womsedari oseLibhanoni lathi, ‘Vumela indodanami bona ithathe indodakazakho ibe mkayo.’ Kodwana isibandana seLibhanoni sadlula lapho sagadanga ikhula elinameva. 19 Nje-ke uzitjele wathi, ‘Qala! Ngihlule u-Edomu.’+ Wazikhakhazisa, wafuna nokudunyiswa. Hlala emzinakho,* kubayini ufuna ukuzibangela ihlekelele begodu utjhabalale nabantu bakwaJuda?”

20 Kodwana u-Amaziya akhenge alalele,+ lokho kwenziwa nguZimu weqiniso bona amnikele esandleni senaba+ lakhe ngombana walandela abozimu bakwa-Edomu.+ 21 Nje-ke uJowatjhi ikosi yakwa-Israyeli wakhuphuka begodu yena no-Amaziya ikosi yakwaJuda bayokuzwana amandla epini eBhethe-Tjhemetjhi,+ yakwaJuda. 22 Yeke amaJuda ahlulwa ma-Israyeli epini begodu omunye nomunye wabalekela emzinakhe.* 23 UJowatjhi ikosi yakwa-Israyeli wathumba iKosi yakwaJuda u-Amaziya indodana kaJowatjhi indodana kaJehowarhazi eBhethe-Tjhemetjhi. Ngemva kwalokho, wakhamba naye eJerusalema, wafika lapho wagiriza umthangala wakhona kusukela eSangweni lakwa-Efrayimu+ kufikela eSangweni eliseKhoneni+ okulibanga elimakhubhithi* ama-400. 24 Wathatha loke igolide nesiliva nazo zoke izinto ezafunyanwa ngendlini kaZimu weqiniso ebezitjhejwe ngu-Obede-Edomu, wathatha nebezingemabulungelweni wamagugu angendlini yekosi,+ wathatha neenthunjwa. Ngemva kwalokho, wabuyela eSamariya.

25 Ikosi yakwaJuda u-Amaziya+ indodana kaJowatjhi+ yaphila iminyaka eli-15 ngemva kokuhlongakala kwekosi yakwa-Israyeli uJowatjhi indodana kaJehowarhazi.+ 26 Woke omunye umlando ka-Amaziya kusukela ekuthomeni kufikela emaphethelweni, awukatlolwa na eNcwadini yamaKhosi wakwaJuda newakwa-Israyeli? 27 Kusukela ngesikhathi u-Amaziya alisa ukulandela uJehova, bamlukela amano+ wokumsahlela eJerusalema, yeke wabalekela eLakitjhi kodwana bathumela amadoda bona amlandele eLakitjhi begodu ambulalela khona. 28 Abuya naye amthwele ngeenjomani, ambulunga nabokhokho bakhe edorobheni lakwaJuda.