Yesibili YeenKronike
28 U-Arhazi+ bekaneminyaka ema-20 nakaba yikosi, wabusa iminyaka eli-16 eJerusalema. Akhenge enze okuhle emehlweni kaJehova njengombana kwenza ukhokhwakhe uDavida.+ 2 Kunalokho, wakhamba emtlhaleni wamakhosi wakwa-Israyeli,+ wenza neenthombe zesimbi+ zaboBhali. 3 Ngaphezu kwalokho, wathunyisa intuthu yomhlatjelo emRhobeni weNdodana kaHinomu,* wenza nomhlatjelo* ngamadodanakhe.+ Wenza izinto ezinyenyisako ebezenziwa ziintjhaba+ uJehova aziqotha phambi kwama-Israyeli. 4 Waraga nokwenza umhlatjelo, athunyisa intuthu yomhlatjelo eendaweni eziphakemeko,+ emibundwini nangaphasi kwayo yoke imithi ehlaza.+
5 Nje-ke uJehova uZimakhe wamnikela esandleni sekosi yeSiriya,+ bamhlula, bathumba abantu abanengi, babasa eDamaseku.+ Godu wanikelwa esandleni sekosi yakwa-Israyeli, yarhayila abantu abanengi. 6 UPhekharhi+ indodana kaRemaliya wabulala amadoda anesibindi azii-120 000 kwaJuda ngelanga linye ngombana batjhiya uJehova uZimu wabokhokho babo.+ 7 UZikiri um-Efrayimu oyingorho wabulala indodana yekosi uMaseya, wabulala u-Azrikhamu obekatjheje isigodlo no-Elikhana obekalandela ikosi ngesikhundla. 8 Godu ama-Israyeli athumba abafowabo abazii-200 000, okuhlanganisa abafazi, amadodana namadodakazi. Athatha nezinto ezinengi ezifunyenwe epini, aya nazo eSamariya.+
9 Nokho bekunomphorofidi kaJehova lapho, igama lakhe kungu-Odedi. Waphuma wajama phambi kwebutho ebeliza eSamariya wathi: “UJehova uZimu wabokhokho benu unikele abantu bakwaJuda esandleni senu+ ngebanga lokuthi bamsilingile kodwana nina nibabulele ngesihlungu. Kwamambala nibe nenturhu kangangobana uZimu wakubona lokho. 10 Nje nifuna ukwenza abantu bakwaJuda nebeJerusalema bona babe ziinsebenzi zenu.+ Kanti nina anisimlandu na kuJehova uZimenu? 11 Nje-ke akhe ningilalele, nibuyisele abantu enibathumbe kubafowenu, ngombana ilaka lakaJehova lijamelene nani.”
12 Yeke amanye amakhosi wakwa-Efrayimu, u-Azariya indodana kaJehorhanani, uBherekiya indodana kaMetjhilemothi, uJezekhiya indodana kaTjhalumu no-Amasa indodana kaRhadilayi, bajamelana nalabo egade babuya epini, 13 bathi kibo: “Ningathomi nilethe abantu enibathumbileko lapha, ngombana sizakuba mlandu kuJehova. Into enihlose ukuyenza le izakungezelela phezu kwezono nomlandu esinawo, ngombana sele simlandu khulu begodu ilaka lakaZimu liphezu kwaka-Israyeli.” 14 Nje-ke amasotja ahlomileko atjhaphulula abantu abathunjiweko, athatha nezinto ezifunyenwe epini,+ azibeka phambi kwamakhosana nakilo loke ibandla. 15 Amadoda akhethiweko asikima asiza abantu abathunjiweko, egade bahlubule abanikela izembatho ebezisezintweni ezifunyenwe epini. Abambathisa, abanikela amapatlagwana, ukudla, okuselwako namafutha wokuzesa. Godu athatha egade babogaboga abakhambisa ngabodumbana, abasa kubafowabo eJerikho idorobho lemithi yesundu. Ngemva kwalokho, babuyela eSamariya.
16 Ngesikhatheso iKosi u-Arhazi yabawa amakhosi we-Asiriya bona ayisize.+ 17 Abantu bakwa-Edomu godu basahlela uJuda, bathumba nabantu. 18 NamaFilista+ asahlela amadorobho weTjhefela+ neNegebhi yakwaJuda, athumba iBhethe-Tjhemetjhi,+ i-Ayaloni,+ iGederothi, iSoko namadorobho ayibhodileko, iTimna+ namadorobho ayibhodileko neGimizo namadorobho ayibhodileko, ngemva kwalokho ahlala khona. 19 UJehova wathobisa abantu bakwaJuda ngebanga leKosi yakwa-Israyeli u-Arhazi ngombana waliselela abantu bakwaJuda, umphumela waba kungathembeki kuJehova.
20 Nje-ke uTiligathi-Pilineseri+ ikosi ye-Asiriya weza wazokujamelana naye, wambangela ukugandeleleka+ kunokuthi amqinise. 21 U-Arhazi wathatha koke okungendlini kaJehova, okusesigodlweni+ nokungeendlini zamakhosana, wapha nekosi ye-Asiriya isipho kodwana lokho akhenge kumsize. 22 Yeke ngesikhathi iKosi u-Arhazi igandelelekile, yathuwelela ngokungathembeki kuJehova. 23 Yathoma ukwenza imihlatjelo kibozimu beDamaseku+ abamhlulileko+ bese yathi: “Ngombana abozimu bamakhosi weSiriya bayabasiza, nje-ke nami ngizakwenza umhlatjelo kibo bona bangisize.”+ Kodwana lokho kwalimaza yona nabo boke abantu bakwa-Israyeli. 24 Godu u-Arhazi wathatha izitja zendlu kaZimu weqiniso,+ waziphula zaba ziinquqwana, wavala iminyango yendlu kaJehova,+ wazenzela nama-aldara kiwo woke amakhona weJerusalema. 25 Begodu kiwo woke amadorobho wakwaJuda, wenza iindawo eziphakemeko, bona kuthunyiselwe abanye abozimu intuthu yomhlatjelo.+ Wasilinga uJehova uZimu wabokhokho bakhe.
26 Malungana nawo woke omunye umlandwakhe, izinto azenzileko kusukela ekuthomeni kufikela ekupheleni, kutloliwe eNcwadini yamaKhosi wakwaJuda newakwa-Israyeli.+ 27 Nje-ke u-Arhazi walaliswa nabokhokho bakhe bese wabulungelwa edorobheni, eJerusalema. Akhenge bambulungele endaweni lapha kubulungelwa khona amakhosi wakwa-Israyeli.+ Ngemva kwalokho indodanakhe uHezekiya* yaba yikosi esikhundleni sakhe.