Yesibili YeenKronike

35 UJosiya wagidinga iPhasika+ lakaJehova eJerusalema begodu bahlaba iinlwana zomhlatjelo wePhasika+ ngelanga le-14 enyangeni yokuthoma.+ 2 Wabeka abaphristi ezabelweni zabo, wabakhuthaza bona benze umsebenzi wendlu kaJehova.+ 3 Ngemva kwalokho wathi kumaLevi ebewafundisa boke abantu bakwa-Israyeli+ begodu acwengile kuJehova: “Bekani umFaji ocwengileko endlini eyakhiwa nguSolomoni indodana kaDavida ikosi yakwa-Israyeli;+ akusatlhogeki bona niwuthwale emahlombenu.+ Nje-ke lotjhani uJehova uZimenu nisebenzele nabantu bakhe u-Israyeli. 4 Zihleleni ngokweenkoro zenu, ngokweengaba zenu, nenze ngokwalokho okwatlolwa nguDavida+ ikosi yakwa-Israyeli nendodanakhe uSolomoni.+ 5 Ngenani ngendaweni ecwengileko, nijame ngokweenqhema zeenkoro zabafowenu, boke abanye abantu bajame ngokukhambisana nesiqhema sekoro yamaLevi. 6 Hlabani iinlwana zomhlatjelo wePhasika,+ nizicwengise nina, nilungiselele nabafowenu bona benze ngokwalokho uJehova akutjho ngoMosi.”

7 UJosiya wapha abantu iinlwana, okuzizimvu eziduna neembuzana eziduna bona kwenzelwe boke ebebakhona imihlatjelo yePhasika, inani elipheleleko belizii-30 000 kuhlanganise neenkomo ezizii-3 000. Koke lokhu bekuvela epahleni yekosi.+ 8 Amakhosana nawo apha abantu, abaphristi namaLevi umnikelo osuka ehliziyweni. URhilikhiya,+ uZakariya noJerhiyeli okubadosiphambili bendlu kaZimu weqiniso banikela abaphristi iinlwana zemihlatjelo yePhasika ezizii-2 600 neenkomo ezima-300. 9 UKonaniya nabafowabo okunguTjhemaya, uNetaneli kuhlanganise noRhatjhabiya, uJehiyeli noJozabadi iinduna zamaLevi, banikela amaLevi iinlwana zemihlatjelo yePhasika ezizii-5 000 neenkomo ezima-500.

10 Umsebenzi wahlelwa kuhle, abaphristi bajama eendaweni zabo begodu amaLevi ajama ngokweengaba zawo+ njengombana ikosi itjhwile. 11 Zahlatjwa-ke iinlwana zemihlatjelo yePhasika+ begodu abaphristi bafafaza iingazi zeenlwana abazifumene kumaLevi,+ kukulapho amaLevi wona ahlinza iinlwana.+ 12 Ngemva kwalokho, alungisa iminikelo etjhiswako bona ayinikele abantu ebebabuthene ngokweenkoro zabo ukuthi bayinikele kuJehova njengombana kutlolwe encwadini kaMosi, enza okufanako nangeenkomo. 13 Apheka* iminikelo yePhasika emlilweni ngokwesiko lakhona;+ apheka iminikelo ecwengileko ngeempoto, ngabonogalaza nangeempani ngemva kwalokho anikela boke abantu. 14 Ngemva kwalokho, azilungiselela wona nabaphristi umhlatjelo wePhasika ngombana abaphristi okuziinzukulwana zaka-Aroni benza imihlatjelo etjhiswako neyomhlwehlwe bekwahlwa. Kungebangelo-ke amaLevi azilungiselela wona nabaphristi okuziinzukulwana zaka-Aroni umhlatjelo wePhasika.

15 Abavumi okumadodana ka-Asafa+ bebajame eendaweni zabo ngokwalokho okwatjhiwo nguDavida,+ u-Asafa,+ uHemani noJedutuni+ umboni wemibono wekosi. Abalindisango bebajame emasangweni ahlukahlukeneko,+ bekungatlhogeki bona balise imisebenzabo ngombana abafowabo okumaLevi babalungiselela umhlatjelo wePhasika. 16 Yeke woke umsebenzi kaJehova walungiselelwa ngelangelo bona kugidingwe iPhasika,+ kwenziwe neminikelo etjhiswako e-aldareni lakaJehova, ngokuvumelana nomyalo weKosi uJosiya.+

17 Ama-Israyeli ebewakhona agidinga iPhasika ngesikhatheso nomNyanya woBurotho obunganaSibiliso amalanga alikhomba.+ 18 Akhenge khekugidingwe iPhasika elifana naleli kwa-Israyeli, kusukela emihleni kaSamyela umphorofidi; akhenge khekube namakhosi wakwa-Israyeli agidinga iPhasika elinjengalelo elagidingwa nguJosiya,+ baphristi, maLevi, babantu boke bakwaJuda nabakwa-Israyeli ebebakhona nabantu beJerusalema. 19 IPhasikeli lagidingwa ngomnyaka we-18 wokubusa kwakaJosiya.

20 Ngemva kwakho koke lokho, uJosiya nasele alungiselele ithempeli, uNekho+ ikosi yeGibhide weza bona azokulwa eKarikemitjhi engeYufrathe. UJosiya waphuma bona ayokulwa naye.+ 21 Wathumela iinthunywa kuye wathi: “Kosi yakwaJuda ngihlangene ngani nawe? Angikezi bona ngilwe nawe namhlanjesi kodwana ngiyokulwa nenye indlu begodu uZimu uthi kufuze ngirhabe. Ngombana uZimu unami, yeke lisa ukuphikisana naye, nakungasinjalo uzokutjhabalalisa.” 22 UJosiya akhenge asuke kuye kodwana wazifihla wazenza omunye umuntu+ bona ayokulwa naye, akhenge alalele amezwi kaNekho okumamezwi avela kuZimu, nje-ke waphuma bona ayokulwa naye eMmangweni oThabaleleko weMegido.+

23 Abadumuzi bemisubela badumuza iKosi uJosiya, yeke yathi eensebenzini zayo: “Ngikhuphani lapha ngombana ngilimele khulu.” 24 Iinsebenzi zayo zayihlisa ngekaraneni, zayikhweza ekaranenayo yesibili zayisa eJerusalema. Ngemva kwalokho yahlongakala, yabulungelwa emathuneni wabokhokho bayo+ begodu woke uJuda nabantu beJerusalema bayililela. 25 UJoromiya+ wavumela uJosiya ingoma yesililo begodu boke abavumi+ bamadoda nababafazi basavumela uJosiya ingoma yesililo bekube kunamhlanjesi. Yeke kwenziwa isiqunto sokobana kuvunywe iingomezi kwa-Israyeli bekube kunamhlanjesi, zitloliwe hlangana neengoma zesililo.

26 Malungana nawo woke omunye umlando kaJosiya, zoke izenzo zakhe zomusa ezikhambisana nalokho okutlolwe emThethweni kaJehova, 27 akwenzileko, kusukela ekuthomeni bekube sekupheleni, kutloliwe eNcwadini yamaKhosi wakwa-Israyeli newakwaJuda.+