Joromiya
9 Maye! Ngathana ihlokwami beyimamanzi,
Amehlwami amthombo weenyembezi.+
Bengizokulila imini nobusuku
Ngililele abantu bami abarhayiliweko.
2 Maye! Ngathana benginendawo yesikhambi emmangweni.
3 Bagoba ilimu labo njengomsubela;
Kubusa amala enarheni ingasi ukuthembeka.+
“Basuka kokumbi baye kokumbi khulu,
Abangilaleli,”+ kutjho uJehova.
4 “Woke umuntu akatjheje umakhelwanakhe,
Angamthembi ngitjho nomfowabo.
5 Woke umuntu ukhohlisa umakhelwanakhe,
Akekho okhuluma iqiniso.
Bafundise ilimu ukukhuluma amala.+
Baziqeda amandla ngokwenza okungakalungi.
6 Uhlala phakathi kwekohliso.
Ngekohliswabo bale ukungazi,” kutjho uJehova.
7 Yeke uJehova wamabutho uthi:
“Ngizobahlunga begodu ngizobalinga,+
Ngombana yini enye engingayenza ngendodakazi yabantu bami?
8 Ilimu labo limcibitjholo obulalako okhuluma amala.
Umuntu ukhuluma ukuthula nomakhelwanakhe,
Kodwana ngaphakathi uluka amano wokusahlela.”
9 “Kghani akukafuzi ngibajezise ngebanga lezintwezi?” kutjho uJehova.
“Kghani akukafuzi ngizibuyiselele esitjhabeni esinje?+
10 Ngizokulila begodu ngirhahlawule ngebanga leentaba
Ngizokubhinela amadlelo wemmangweni ingoma yesililo,
Ngombana zitjhile bona kungabi nomuntu odlulako,
Begodu itjhada lefuyo alizwakali.
Iinyoni zezulu neembandana zibalekile; azisekho.+
11 Ngizokwenza iJerusalema libe liqubi lamatje,+ indawo iimpungutjha ezilala kiyo,+
Begodu ngizokwenza amadorobho wakwaJuda abe marubhi, kungabi nesakhamuzi.+
12 Ngubani ohlakaniphe ngokwaneleko bona azwisise lokhu?
Umlomo kaJehova ukhulume nobani bona abikezele lokhu?
Kubayini inarha itjhabalele?
Kubayini itjhe njengommango,
Bona kungabi nomuntu odlula kiyo?”
13 UJehova waphendula wathi: “Ngebanga lokuthi akhenge balalele umthethwami engiwubeke phambi kwabo, nangebanga lokuthi akhenge bawulandele begodu balalele ilizwi lami. 14 Kunalokho, balandele iinhliziyo zabo ngekani+ begodu balandele iinthombe zaboBhali njengombana aboyise babafundise bona benze njalo.+ 15 Nje-ke nakhu uJehova wamabutho, uZimu ka-Israyeli akutjhoko, ‘Qala ngenza abantwaba badle inghana begodu ngizobenza basele amanzi anetjhefu.+ 16 Ngizokuphadlhalaja abantwaba hlangana neentjhaba abangazaziko naboyise abangazazi,+ ngizokuthumela isabula ngemva kwabo bekube kulapho ngibarhayila.’+
17 Nakhu uJehova wamabutho akutjhoko,
‘Zindlani ngalokho okwenzekako.
Bizani abafazi ababhina ingoma yesililo,+
Begodu thumelani bona kubizwe abafazi abanekghono,
18 Bona barhabe basililele,
Bona amehlwethu ageleze iinyembezi
Neenkophe zethu zitshege amanzi.+
19 Ngombana itjhada lesililo lizwakele eZiyoni:+
“Qala bona sitjhatjalaliswe kangangani!
Qala bona sihlaziseke kangangani!
Ngombana sitjhiye inarhethu begodu bagirize imizethu.”+
20 Nina bafazi, lalelani ilizwi lakaJehova.
Kwanga iindlebe zenu zingamukela ilizwi lomlomakhe.
Fundisani amadodakazenu isililwesi,
Nifundisane ingoma yesililo le.+
21 Ngombana ukufa kungene ngamafesiderethu;
Kungene emibhotjhongwenethu evikelekileko
Bona kuthathe abantwana eendleleni
Namasokana ematatawini.’+
22 Ithi, ‘UJehova uthi:
“Iindumbu zabantu zizokuwa njengomsuqwa esimini,
Njengekoroyi etja esikiweko ngemva komvuni,
Kuzabe kunganamuntu oyibuthelelako.”’”+
23 Ngilokhu uJehova akutjhoko:
“Ohlakaniphileko akangazikhakhazisi ngokuhlakanipha kwakhe;+
Onamandla akangazikhakhazisi ngamandlakhe;
Onjingileko akangazikhakhazisi ngobunjinga bakhe.”+
24 “Kodwana ozikhakhazisako, akazikhakhazise ngalokhu:
Ukuthi unelemuko nelwazi ngami,+
Ukuthi nginguJehova, onethando elithembekileko, ubulungiswa nokulunga ephasini,+
Ngombana ngithatjiswa zizintwezi,”+ kutjho uJehova.
25 “Qala! Kuza amalanga,” kutjho uJehova, “begodu ngizokubeka woke umuntu umlandu, osokiweko nongakasokwa,+ 26 okutjho iGibhide,+ bakwaJuda,+ bakwa-Edomu,+ ama-Amoni,+ bakwaMowabi+ nabo boke abanamarhwanqa arhuniweko abahlala emmangweni;+ ngombana zoke iintjhaba azikasokwa begodu yoke indlu yakwa-Israyeli ayikasokwa ehliziyweni.”+