AbaHlulelii
1 Ngemva kokuhlongakala kwakaJotjhuwa,+ ama-Israyeli abuza uJehova athi:+ “Ngubani ozokukhuphuka qangi hlangana nathi ayokulwa namaKanana?” 2 UJehova wathi: “Amadoda wakwaJuda+ ngiwo azokukhuphuka. Qala! Nginikela* inarha esandleni sawo.” 3 Amadoda wakwaJuda athi kubafowabo, amadoda wakwaSimiyoni: “Khuphukani nathi siye esifundeni*+ esabelwe sona bona siyokulwa namaKanana. Nathi sizokukhamba nani esifundeni enabelwe sona.” Yeke amadoda wakwaSimiyoni akhamba nawo.
4 Amadoda wakwaJuda nakakhuphukako, uJehova wanikela amaKanana namaPerizi ezandleni zawo,+ ahlula amadoda azii-10 000 eBhezeki. 5 Afumana u-Adoni-Bhezekhi eBhezeki, alwa naye lapho begodu ahlula amaKanana+ namaPerizi.+ 6 Kwathi u-Adoni-Bhezekhi nakabalekako, amgijimisa bewambamba, aqunta abothubhakghuru neenzwani zakhe ezikulu. 7 U-Adoni-Bhezekhi wathi: “Kunamakhosi ama-70 aquntwa abothubhakghuru neenzwani zabo ezikulu begodu adobha ukudla ngaphasi kwetafulami. UZimu ungibuyisele ngokwezenzo zami.” Ngemva kwalokho, amletha eJerusalema,+ wahlongakalela khona.
8 Ngaphezu kwalokho, amadoda wakwaJuda alwa neJerusalema+ bewayithumba; ayirhayila ngesabula bewatjhisa idorobho. 9 Ngemva kwalokho, amadoda wakwaJuda ehla ayokulwa namaKanana ahlala esifundeni seentaba, nahlala eNegebhi neTjhefela.+ 10 Yeke amadoda wakwaJuda amatjha ayokulwa namaKanana ebewahlala eRhebroni (ngaphambilini iRhebroni beyaziwa ngokuthi yiKhiriyathi-Ariba), arhayila uTjhetjhayi, u-Arhimani noTalimayi.+
11 Asuka lapho amatjha ayokulwa nezakhamuzi zeDebhiri.+ (Igama leDebhiri bekuyiKhiriyathi-Seferi phambilini.)+ 12 UKalebi+ wathi: “Indoda erhayila iKhiriyathi-Seferi beyiyithumbe, ngizoyinikela u-Akisa indodakazami bona abe mkayo.”+ 13 U-Otiniyeli+ indodana kaKhenazi,+ umfowabo omncani kaKalebi, wayithumba. Yeke uKalebi wamnikela u-Akisa indodakazakhe bona abe mkakhe. 14 Kwathi u-Akisa nakaya ekhaya, wancenga u-Otiniyeli bona abawe isimu kuyise uKalebi. Yeke u-Akisa wahlika kudumbanakhe.* UKalebi wambuza wathi: “Ufunani?” 15 U-Akisa wathi: “Ngibawa ungibusise njengombana ungiphe ingcenye yenarha engesewula;* nginikela neGulothi-Mayimi.”* Yeke uKalebi wamnikela iGulothi engeHla neGulothi engeNzasi.
16 Iinzukulwana zamaKheni,+ umukhwe kaMosi,+ zakhuphuka zivela edorobheni lemithi yesundu+ nabantu bakwaJuda zaya emmangweni wakwaJuda esewula ye-Aradi.+ Zaya lapho zahlala hlangana nabantu.+ 17 Kodwana amadoda wakwaJuda araga nokumatjha namadoda wakwaSimiyoni abafowabo, asahlela amaKanana ahlala eTsefathi bewayitjhabalalisa.+ Abiza idorobhelo ngokuthi yiRhorema.*+ 18 Ngemva kwalokho, amadoda wakwaJuda athumba iGaza+ nesifunda sayo, i-Atjhikheloni+ nesifunda sayo kunye ne-Ekroni+ nesifunda sayo. 19 UJehova bekanamadoda wakwaJuda, athatha isifunda seentaba kodwana akhenge akghone ukuqotha izakhamuzi zommango othabaleleko, ngombana bezineenkarana zepi ezinemikhwa emide emavilinazo.*+ 20 Anikela uKalebi iRhebroni njengombana uMosi bekathembisile+ begodu waqotha amadodana amathathu ka-Anakhi+ lapho.
21 Kodwana bakwaBhenjamini akhenge baqothe amaJebusi ebekahlala eJerusalema, yeke amaJebusi asahlala nebakwaBhenjamini eJerusalema bekube kunamhlanjesi.+
22 Kusesenjalo, indlu kaJosefa+ yakhuphuka yayokulwa neBhetheli begodu uJehova bekanayo.+ 23 Indlu kaJosefa yathumela iinhloli eBhetheli (ngaphambilini idorobheli belaziwa ngokuthi yiLuzi),+ 24 iinhloli zabona indoda iphuma edorobheni. Yeke zathi kiyo: “Sibawa usitjengise indlela yokungena ngedorobheni, sizokuphatha ngomusa.”* 25 Ngalokho indoda le yazitjengisa indlela yokungena ngedorobheni, zarhayila idorobho ngesabula kodwana zavumela indoda le nomndenayo woke bona bakhambe.+ 26 Indoda le yatjhinga enarheni yamaRhiti yakha idorobho beyalibiza ngokuthi yiLuzi, leli kuseseligama lalo bekube kunamhlanjesi.
27 UManase akhenge athathe iBhethe-Tjhani namadorobho ayibhodileko, iTanaki+ namadorobho ayibhodileko, izakhamuzi zeDori namadorobho ayibhodileko, izakhamuzi zeJibiliyamu namadorobho ayibhodileko nezakhamuzi zeMegido namadorobho ayibhodileko.+ AmaKanana aphikelela nokuhlala enarheni le. 28 Kwathi u-Israyeli nakaba namandla, wakatelela+ amaKanana bona amsebenzele kodwana akhenge awaqothe ngokupheleleko.+
29 Bakwa-Efrayimu akhenge baqothe amaKanana ebekahlala eGezeri. AmaKanana araga nokuhlala hlangana nabo eGezeri.+
30 BakwaZebuloni akhenge baqothe izakhamuzi zeKhithironi nezakhamuzi zeNahaloli.+ AmaKanana araga nokuhlala hlangana nabo begodu akatelelwa bona abasebenzele.+
31 Ama-Atjheri akhenge aqothe izakhamuzi ze-Ako nezakhamuzi zeTsidoni,+ ze-Arhilaba, ze-Akziba,+ zeRhelibha, ze-Afekhi+ nezeRerhobu.+ 32 Yeke ama-Atjheri araga nokuhlala namaKanana akhe enarheni ngombana akhenge awaqothe.
33 BakwaNafitali akhenge baqothe izakhamuzi zeBhethe-Tjhemetjhi nezakhamuzi zeBhethe-Anathi,+ kodwana baraga nokuhlala hlangana namaKanana akhe enarheni.+ Izakhamuzi zeBhethe-Tjhemetjhi neBhethe-Anathi zakatelelwa bona zibasebenzele.
34 Ama-Amori akatelela bakwaDani bona bahlale esifundeni seentaba akhenge abavumele ukuthi behlele emmangweni othabaleleko.+ 35 Yeke ama-Amori aphikelela nokuhlala eNtabeni iHari-Rheresi, nemadorobheni we-Ayaloni+ neTjhalibimu.+ Kodwana amandla wendlu kaJosefa nawakhulako, akatelelwa bona ayisebenzele budisi. 36 Isifunda sama-Amori besithoma emkhuphukeleni we-Akhirabhimu,+ kusukela eSela ukuya phezulu.