Yesibili YamaKhosi
3 UJehoramu+ indodana ka-Arhabi waba yikosi yakwa-Israyeli eSamariya ngomnyaka we-18 wokubusa kwakaJehotjhafathi ikosi yakwaJuda, wabusa iminyaka eli-12. 2 Waragela phambili nokwenza okumbi emehlweni kaJehova kodwana ingasi ngezinga okwenza ngalo uyise nonina ngombana yena wasusa isika ecwengileko kaBhali eyenziwa nguyise.+ 3 Kodwana wanamathela ezonweni uJerobhowamu indodana kaNebathi abangela u-Israyeli bona azenze.+ Akhenge asuke kizo.
4 Nje-ke uMetjha ikosi yakwaMowabi bekamfuyi wezimvu begodu bekajayele ukuthumela umthelo wezimvu ezizii-100 000 namaramu angakarhunwa azii-100 000 ekosini yakwa-Israyeli. 5 Msinyana ngemva kokuhlongakala kwaka-Arhabi,+ ikosi yakwaMowabi yahlubuka ekosini yakwa-Israyeli.+ 6 Nje-ke iKosi uJehoramu yasuka eSamariya mhlokho yabuthelela woke u-Israyeli bona aye epini. 7 Godu yathumela umlayezo kuJehotjhafathi iKosi yakwaJuda, yathi: “Ikosi yakwaMowabi ingihlubukile. Uzokukhamba nami na ukuyokulwa noMowabi?” Yena wathi: “Ngizokukhamba nawe.+ Mina nawe siyafana. Abantu bami bafana nabantu bakho. Iinjomani zami zifana neenjomani zakho.”+ 8 Nje-ke wabuza wathi: “Sikhuphuke ngayiphi indlela?” Yamphendula yathi: “Ngendlela yemmangweni wakwa-Edomu.”
9 Nje-ke ikosi yakwa-Israyeli yakhamba nekosi yakwaJuda nekosi yakwa-Edomu.+ Ngemva kokuzomba amalanga alikhomba, azange kube namanzi webutho nawefuyo ebebanayo. 10 Ikosi yakwa-Israyeli yathi: “Qala bona kumbi kangangani lokhu! UJehova ubize amakhosi amathathu la bona awanikele esandleni sakwaMowabi!” 11 UJehotjhafathi wathi: “Kghani akekho umphorofidi kaJehova endaweni le esingabuza ngaye kuJehova?”+ Yeke omunye weensebenzi zekosi yakwa-Israyeli waphendula wathi: “Ukhona u-Elitjha+ indodana kaTjhafathi, obekajayele ukuthela amanzi ezandleni zaka-Eliya.”*+ 12 UJehotjhafathi wathi: “Ilizwi lakaJehova likuye.” Yeke ikosi yakwa-Israyeli, uJehotjhafathi nekosi yakwa-Edomu behlela kuye.
13 U-Elitjha wathi ekosini yakwa-Israyeli: “Ngihlangene ngani nawe?+ Iya ebaphorofidini bakayihlo nebaphorofidini bakanyoko.”+ Kodwana ikosi yakwa-Israyeli yathi kuye: “Awa ngombana nguJehova obize amakhosi amathathu la bona awanikele esandleni sakwaMowabi.” 14 Nje-ke u-Elitjha wathi: “Ikani uJehova wamabutho engimlotjhako nakasaphilako, ngathana bengingahloniphi uJehotjhafathi+ iKosi yakwaJuda, bengingekhe ngikuqale namkha ngikutjheje nokukutjheja.+ 15 Ngibawa ningilethele umbethi weharibha.”+ Kuthe umbethi weharibha nakathoma ukubetha iharibha, isandla sakaJehova sehlela ku-Elitjha.+ 16 Wathi, “UJehova uthi: ‘Yembani imisele eminengi emrhobeni lo, 17 ngombana uJehova uthi: “Angekhe kube nomoya namkha kube nezulu; kodwana umrhoba lo uzokuzaliswa ngamanzi+ bese nina nefuywenu nizokusela kiwo nezinye iinlwana zenu.”’ 18 Kodwana lokho yinto encani emehlweni kaJehova,+ ngombana uzokunikela noMowabi ezandleni zenu.+ 19 Kufuze nitjhabalalise woke amadorobho avikelekileko+ namadorobho akhethekileko, niqunte yoke imithi emihle begodu nonakalise nanyana ngisiphi isiqetjhana senarha esihle ngokuphosela amatje kiso.”+
20 Ekuseni, ngesikhathi somnikelo weenthoro wekuseni,+ kungakalindeleki, amanzi ageleza avela ngehlangothini lakwa-Edomu begodu inarha yazala amanzi.
21 Boke abantu bakwaMowabi bezwa bona amakhosi akhuphuke bona azokulwa nabo, yeke babizela ndawonye woke amadoda angakghona ukuphatha iinkhali, bajama emkhawulweni wenarhabo. 22 Ekuseni nabavukako, ilanga belihlabe emanzini begodu ebantwini bakwaMowabi abangakwelinye ihlangothi, amanzi bewabonakala abomvu njengeengazi. 23 Abantu bakwaMowabi bathi: “Lezi ziingazi! Kwamambala amakhosi lawa abulelene ngesabula. Nje-ke Mowabi, khamba uyozitapela ipahlabo!”+ 24 Nabafika ekampeni yama-Israyeli, ama-Israyeli avuka abasahlela, abantu bakwaMowabi bathoma ukubaleka.+ Yeke ama-Israyeli atjhidela kwaMowabi, asolo abulala abantu bakwaMowabi njengombana atjhidela. 25 Agiriza amadorobho, indoda ngayinye yaphosela ilitje esiqetjhaneni senarha esihle, asigubuzesa ngamatje; avala yoke imithombo yamanzi,+ aqunta nayo yoke imithi emihle.+ Emaswapheleni kwasala kujame kwaphela amaboda wamatje weKiri-Rhareseti,+ begodu amasotja abhoda idorobho, alahlela amatje ngeensarwayi bona alisahlele begodu alitjhabalalisa.
26 Ikosi yakwaMowabi nayibona ukuthi ihlulekile epini, yathatha amadoda ama-700 ahlome ngeensabula bona isahlele ikosi yakwa-Edomu+ kodwana yabhalelwa. 27 Nje-ke yathatha indodanayo elizibulo ebeyizokubusa esikhundleni sayo yenza ngayo umhlatjelo otjhiswako+ ebodeni. Bawakwatela khulu ama-Israyeli, nje-ke balisa ukusahlela, babuyela enarhenabo.