Yesibili YamaKhosi

15 Ngomnyaka wama-27 wokubusa kwakaJerobhowamu* iKosi yakwa-Israyeli, u-Azariya*+ indodana ka-Amaziya+ iKosi yakwaJuda waba yikosi.+ 2 Bekaneminyaka eli-16 nakaba yikosi, wabusa iminyaka ema-52 eJerusalema. Igama lakanina bekunguJekholiya weJerusalema. 3 Waraga nokwenza okuhle emehlweni kaJehova njengombana kwenza uyise u-Amaziya.+ 4 Kodwana iindawo eziphakemeko akhenge zisuswe,+ abantu bebasenza imihlatjelo begodu bathunyisa intuthu yomhlatjelo eendaweni eziphakemeko.+ 5 UJehova wabetha ikosi le ngobulepheru+ bekwaba lilanga eyahlongakala ngalo; yahlala endlini engeqadi,+ kukulapho indodana yekosi uJothamu+ iphethe isigodlo, yahlulela nabantu benarha.+ 6 Malungana nawo woke omunye umlando ka-Azariya,+ koke akwenzileko, akukatlolwa na encwadini yomlando weenkhathi zamakhosi wakwaJuda? 7 Yeke u-Azariya wabulungwa nabokhokho bakhe,+ bambulunga nabokhokho bakhe eDorobheni lakaDavida; indodanakhe uJothamu yaba yikosi esikhundleni sakhe.

8 Ngomnyaka wama-38 wokubusa kwaka-Azariya+ iKosi yakwaJuda, uZakariya+ indodana kaJerobhowamu waba yikosi yakwa-Israyeli eSamariya, wabusa iinyanga ezisithandathu. 9 Wenza okumbi emehlweni kaJehova njengombana kwenza abokhokho bakhe. Azange asuke ezonweni uJerobhowamu indodana kaNebathi abangela u-Israyeli ukuthi azenze.+ 10 UTjhalumu indodana kaJabetjhi wamlukela amano wokumsahlela+ bese wambulala eJibiliyamu.+ Ngemva kokumbulala, waba yikosi esikhundleni sakhe. 11 Woke omunye umlando kaZakariya utloliwe encwadini yomlando weenkhathi zamakhosi wakwa-Israyeli. 12 Lokho kwazalisa ilizwi lakaJehova alikhuluma kuJehu nakathi: “Iinzukulwana ezine zamadodanakho+ zizokuhlala esihlalweni sobukhosi sakwa-Israyeli.”+ Kwenzeka bunjalo.

13 UTjhalumu indodana kaJabetjhi waba yikosi ngomnyaka wama-39 weKosi yakwaJuda u-Uziya,+ wabusa inyanga yinye eSamariya. 14 Ngemva kwalokho, uMenarhemu indodana kaGadi wakhuphuka asuka eTiritsa+ waya eSamariya, wabulala uTjhalumu+ indodana kaJabetjhi eSamariya. Ngemva kokumbulala, waba yikosi esikhundleni sakhe. 15 Woke omunye umlando kaTjhalumu nokuluka kwakhe amano, utloliwe encwadini yomlando weenkhathi zamakhosi wakwa-Israyeli. 16 Bekungesikhatheso lapho uMenarhemu afika avela eTiritsa wasahlela iThifisarhi nabo boke abakilo neendawo ezingaphasi kwalo ngombana azange limvulele amasangwalo. Walisahlela bewarathula izisu zabafazi bakhona abasidisi.

17 Ngomnyaka wama-39 ka-Azariya iKosi yakwaJuda, uMenarhemu indodana kaGadi waba yikosi yakwa-Israyeli, wabusa iminyaka elitjhumi eSamariya. 18 Waraga nokwenza okumbi emehlweni kaJehova. Kikho koke ukuphila kwakhe, azange asuke ezonweni uJerobhowamu indodana kaNebathi abangela u-Israyeli ukuthi azenze.+ 19 IKosi ye-Asiriya uPhuli+ yeza izokusahlela inarha, yeke uMenarhemu wanikela uPhuli amatalende* wesiliva ayi-1 000 azincengela ukuthi uPhuli amsekele bona anzinze embuswenakhe.+ 20 UMenarhemu wafumana isilivelo ngokubhadelisa amadoda adumileko aziinjinga.+ Indoda ngayinye yakhupha amatjhekeli* wesiliva ama-50, yena wawanikela ikosi ye-Asiriya. Yeke ikosi ye-Asiriya yabuyela emva azange ihlale enarheni. 21 Malungana nawo woke omunye umlando kaMenarhemu,+ koke akwenzileko, akukatlolwa na encwadini yomlando weenkhathi zamakhosi wakwa-Israyeli? 22 Ngemva kwalokho, uMenarhemu walaliswa nabokhokho bakhe; indodanakhe uPhekarhiya yaba yikosi esikhundleni sakhe.

23 Ngomnyaka wama-50 weKosi yakwaJuda u-Azariya, uPhekarhiya indodana kaMenarhemu waba yikosi yakwa-Israyeli eSamariya, wabusa iminyaka emibili. 24 Waraga nokwenza okumbi emehlweni kaJehova. Azange asuke ezonweni uJerobhowamu indodana kaNebathi abangela u-Israyeli ukuthi azenze.+ 25 Indunakhe uPhekharhi+ indodana kaRemaliya wamlukela amano wokumsahlela begodu wambulala akunye no-Arigobho no-Ariye eSamariya embhotjhongweni ovikelekileko wendlu yekosi.* Bekakunye namadoda weGiliyadi ama-50; ngemva kokumbulala waba yikosi esikhundleni sakhe. 26 Woke omunye umlando kaPhekharhi, koke akwenzileko, kutloliwe encwadini yomlando weenkhathi zamakhosi wakwa-Israyeli.

27 Ngomnyaka wama-52 weKosi yakwaJuda u-Azariya, uPhekharhi+ indodana kaRemaliya waba yikosi yakwa-Israyeli eSamariya, wabusa iminyaka ema-20. 28 Waraga nokwenza okumbi emehlweni kaJehova, azange asuke ezonweni uJerobhowamu indodana kaNebathi abangela u-Israyeli ukuthi azenze.+ 29 Emihleni kaPhekharhi iKosi yakwa-Israyeli, iKosi ye-Asiriya uTigilathi-Pileseri+ wasahlela, wathumba i-Iyoni, i-Abeli-Bhethe-Makha,+ iJanowarhi, iKhedetjhi,+ iRhatsori, iGiliyadi,+ neGalile, inarha yoke yakwaNafitali,+ wathatha izakhamuzi wazisa ekudingisweni e-Asiriya.+ 30 UHotjheya+ indodana ka-Ela waluka amano wokusahlela uPhekharhi indodana kaRemaliya, wamsahlela wambulala; waba yikosi esikhundleni sakhe ngomnyaka wama-20 kaJothamu+ indodana ka-Uziya. 31 Woke omunye umlando kaPhekharhi, koke akwenzileko, kutloliwe encwadini yomlando weenkhathi zamakhosi wakwa-Israyeli.

32 Ngomnyaka wesibili kaPhekharhi indodana kaRemaliya ikosi yakwa-Israyeli, uJothamu+ indodana ka-Uziya+ iKosi yakwaJuda waba yikosi. 33 Bekaneminyaka ema-25 nakaba yikosi, wabusa iminyaka eli-16 eJerusalema. Igama lakanina bekunguJerutjha indodakazi kaTsadokhi.+ 34 Waraga nokwenza okuhle emehlweni kaJehova njengombana kwenza uyise u-Uziya.+ 35 Kodwana iindawo eziphakemeko akhenge zisuswe, abantu bebasenza imihlatjelo begodu bathunyisa intuthu yomhlatjelo eendaweni eziphakemeko.+ Nguye owakha isango eliphezulu lendlu kaJehova.+ 36 Malungana nawo woke omunye umlando kaJothamu, koke akwenzileko, akukatlolwa na encwadini yomlando weenkhathi zamakhosi wakwaJuda? 37 Ngesikhatheso, uJehova wathoma ukuthumela uRetsini ikosi yeSiriya noPhekharhi+ indodana kaRemaliya bona bayokusahlela uJuda.+ 38 Ngemva kwalokho, uJothamu wahlongakala wabulungwa nabokhokho bakhe eDorobheni lakaDavida ukhokhwakhe. Indodanakhe u-Arhazi yaba yikosi esikhundleni sakhe.