Rhabakhukhu
1 Isimemezelo umphorofidi uRhabakhukhu* asifumana embonweni:
2 Kuzabe kube kunini Jehova ngisolo ngibawa isizo kodwana ungangizwa?+
Kuzabe kube kunini ngisolo ngibawa bona ungisindise enturhwini kodwana ungangisindisi?+
3 Kubayini ungenza ngibone ukungalungi?
Kubayini ubekezelela abantu abagandelela abanye?
Kubayini kunokutjhabalalisa nenturhu phambi kwami?
Kubayini kwande ukuphikisana nokulwa?
4 Nje-ke umthetho awusasebenzi,
Nobulungiswa abusekho.
Okhohlakeleko ugandelela olungileko,
Kungebangelo kuhlanakelwa ubulungiswa.+
5 “Qalani hlangana neentjhaba nibone okuzokwenzeka,
Qalani nirarekile,
Ngombana kunokuthileko okuzokwenzeka emihlenenu
Angeze nikholwe nanyana ningatjelwa ngakho.+
Azokukhamba afike neenarheni ezikude zephasi
Bona athathe izindlu ezingasi ngezawo.+
7 Ayathusa begodu ayasabeka.
Azibekela yawo imithetho begodu ayazilawula.+
8 Iinjomani zawo zinebelo ukudlula izingwe,
Begodu ziyingozi khulu ukudlula iimpisi ebusuku.+
Iinjomani zawo zepi zigijima ngamandla,
Iinjomani zawo zivela kude.
Zigijima njengekhozi nalibona ukudla.+
9 Woke azimisele ukulwa.+
Nawatjhinga phambili anjengomoya wepumalanga,+
Neembotjhwa zawo bezizinengi njengehlabathi.
10 Anyaza amakhosi
Ahleka iinkhulu.+
Ahleka zoke iindawo ezivikelekileko,+
Enza imibundu, angene ngayo athumbe amadorobho.
11 Aya phambili njengomoya begodu adlula enarheni,
Kodwana azokuba mlandu,+
Ngombana athi amandlawo nguzimawo.”+
12 AwusinguJehova kusukela nini nanini na?+
UnguZimami ocwengileko begodu awufi.*+
13 Amehlwakho acwengeke khulu bona angaqala okumbi,
Begodu angekhe ubekezelele ukukhohlakala.+
14 Kubayini uvumele umuntu bona aphathwe njengeenhlambi zelwandle,
Njengeenlwana zelwandle ezinganambusi?
15 Zoke uzibamba* ngewugu yokuthiya iinhlambi,
Uzibamba ngenedakhe,
Uzibuthelela enedenakhe yokuthiya iinhlambi.
Kungebangelo athaba khulu.+
16 Kungebangeli enzela inedakhe imihlatjelo
Begodu enzela inedakhe yokuthiya iinhlambi imihlatjelo,
Ngombana ngazo ufumene ukudla okunepilo,
Begodu udla ukudla okukhethekileko.
17 Uzokuragela phambili na athiya ngenedakhe?*
Uzokuragela phambili na abulala iintjhaba ngaphandle kokuzizwela?+