Hezekiyeli

16 Ilizwi lakaJehova lafika kimi godu, lathi: 2 “Ndodana yomuntu, tjela iJerusalema ngezenzo zalo ezinyenyisako.+ 3 Kufuze uthi, ‘Nakhu iKosi ePhakemeko uJehova ekutjhoko eJerusalema: “Indabukwakho nendawo owabelethelwa kiyo bekuyinarha yamaKanana. Ubabakho bekamAmori+ begodu ummakho amRhiti.+ 4 Malungana nokubelethwa kwakho, ngelanga owabelethwa ngalo, inongwakho akhenge isikwe, akhenge uhlanjiswe emanzini bona uhlwengeke, akhenge uhlikihlwe ngetswayi, akhenge uphuthelwe ngamatjhila. 5 Akekho umuntu owakuzwelako bona akwenze izintwezi. Akekho umuntu owakurhawukelako. Kunalokho, walahlelwa etatawini elivulekileko ngombana wahloywa ngelanga owabelethwa ngalo.

6 “‘“Kuthe nangidlulako, ngakubona urarhararha eengazini zakho begodu ulele lapho eengazini zakho, ngathi: ‘Ragela phambili uphila!’ Yeke ngathi kuwe ulele eengazini zakhwezo: ‘Ragela phambili uphila!’ 7 Ngakwenza waba sitjhaba esikhulu, njengeentjalo ezitlhurha esimini, wakhula wadlondlobala begodu wazikghabisa ngezinto zezinga eliphezulu. Amabelakho bewaqinile neenhluthu zakho zakhula; kodwana bewusesehlubule.”’

8 “‘Nangidlulako begodu nangikubonako, ngatjheja ukuthi ukhule ngokwaneleko bona usome. Nje-ke nganabisela isambatho sami phezu kwakho,+ ngagubuzesa ubuhlubule bakho ngenza isifungo bengangena esivumelwaneni nawe,’ kutjho iKosi ePhakemeko uJehova, ‘begodu ube ngowami. 9 Ukungezelela kilokho, ngakuhlambisa ngamanzi begodu ngapula iingazi zakho ngakuzesa ngamafutha.+ 10 Ngikumbathise ngesambatho esinomthungo ohlotjisiweko ngakunikela amapatlagwana wesikhumba sezinga eliphezulu ngakuphuthela ngelineni lezinga eliphezulu, ngakumbathisa izambatho ezidurako. 11 Ngikumbathise imikghabiso ngakufaka imihlobiso yezandleni ngakufaka nemigejiso entanyenakho. 12 Ngibuye ngakufaka icici epumulweni ngakufaka amacici eendlebeni begodu ngakufaka isihlohlo esihle ehlokwenakho. 13 Bewusolo uzihlobisa ngegolide nesiliva begodu umbatha ilineli lezinga eliphezulu nepahla edurako, nesambatho esinomthungo wokuhlobisa. Bewudla iflowuru esefiweko, iliju namafutha, waba muhle khulu,+ wafanelekela ukuba yindlovukazi.’”

14 “‘Idumo* lakho lathoma ukwaziwa hlangana neentjhaba+ ngebanga lobuhle bakho, ube muhle khulu ngebanga lephazimulo engiyibeke phezu kwakho,’+ kutjho iKosi ePhakemeko uJehova.”

15 “‘Kodwana wathoma ukuthembela ebuhleni bakho,+ waba yingwadla ngebanga ledumo lakho.+ Ungwadle khulu nabo boke abantu abadlulako+ begodu ubuhle bakho wabunikela bona. 16 Uthethe ezinye zezambatho zakho wenza iindawo eziphakemeko zemibalabala lapho ungwadlela khona,+ izintwezi akukafuzi zenzeke. 17 Ubuye wathatha izinto zakho ezihle zokuzihlobisa ezenziwe ngegolide nesiliva ebengikunikele zona wazenzela iinthombe zamadoda* begodu wangwadla nazo.+ 18 Uthethe izambatho zakho ezinomthungo wokuhlobisa begodu wazigubuzesa ngazo,* wazinikela amafuthami nepephwami.+ 19 Uburotho engikunikela bona obenziwe ngeflowuru esefiweko, amafutha neliju engikunikele zona ukuthi uzidle nazo wanikela ngazo njengephunga elimnandi.+ Ngilokho okwenzeka,’ kutjho iKosi ePhakemeko uJehova.”

20 “‘Uthethe amadodanakho namadodakazakho ongibelethele wona,+ wanikela ngawo eenthombenezi bona ziwarhiribidele,+ kghani awukaneliswa bungwadla obenzileko bekube nje? 21 Uhlahlele amadodanami, wawenza aba mhlatjelo.*+ 22 Lokha nawenza yoke imikghwakho enyenyisako nezenzo zobungwadla, akhenge ukhumbule amalanga wobutjha bakho lokha nawuhlubule begodu ubulanzi, urarhararha eengazini zakho. 23 Ngemva kwakho koke ukukhohlakala kwakho, maye! Maye! Kuwe,’+ kutjho iKosi ePhakemeko uJehova. 24 ‘Uzakhele indunduma begodu wazenzela indawo ephakemeko kiwo woke amatatawu. 25 Uzakhele iindawo eziphakemeko eendaweni ezidume khulu kizo zoke iindlela begodu uphendule ubuhle bakho baba yinto enyenyisako, ngokuzinikela kiwo woke umuntu odlulako,+ wandisa nezenzo zakho zobungwadla.+ 26 Ungwadle namadodana weGibhide,+ abomakhelwana bakho abanekanuko, wangizwisa ubuhlungu ngezenzo zakho ezinengi zobungwadla. 27 Nje-ke ngizokulula isandla sami ngikujezise begodu ngizokuphungula isabelo sakho sokudla+ ngikunikele eenkanukweni zabafazi abakuhloyako,+ amadodakazi wabaFilista, ebebathuswe zizenzo zakho ezinyenyisako.+

28 “‘Ngombana akhenge waneliseke, ngemva kwalokho ungwadle namadodana we-Asiriya,+ kodwana ngemva kokungwadla nawo, nalapho akhenge waneliseke. 29 Nje-ke wandise ubungwadla bakho enarheni yabathengisi* nakumaKhaledi*+ kodwana nalapho akhenge waneliseke. 30 Qala bona ihliziywakho beyibuthathaka kangangani,* kutjho iKosi ePhakemeko uJehova, ‘nawenza zoke izintwezi, bewuziphatha njengengwadla engananhloni!+ 31 Lokha nawakha indundumakho endaweni edume khulu eendleleni zoke begodu nawenza indawakho ephakemeko kiwo woke amatatawu, bewungafani nengwadla, ngombana wale ukubhadelwa. 32 Umfazi ofebako othatha abantu abangaziwako kunokuthatha indodakhe!+ 33 Abantu banikela zoke iingwadla izipho+ kodwana wena nguwe onikela boke abakukhanukelako izipho,+ uyabafumbathisa bona beze kuwe bavela kizo zoke iindawo bona kungwadlwe.+ 34 Wena awufani nabanye abafazi abangwadlako. Akekho ongwadla ngendlela ongwadla ngayo! Ubhadela abanye, esikhundleni sokuthi babhadele wena. Indlelakho ihlukile.’

35 “Nje-ke maye! Ngwadla,+ yizwa ilizwi lakaJehova. 36 Nakhu iKosi ePhakemeko uJehova ekutjhoko: ‘Ngombana ikanukwakho ikghuthuliwe, ubulanzi bakho bembuliwe ngesikhathi sobungwadla bakho neenthandwa zakho nangazo zoke izinto neenthombe zakho ezinyenyisako*+ onikele kizo ngeengazi zamadodanakho,+ 37 Nje-ke ngibuthelela zoke iinthandwa ozithabisileko, boke obathandileko nabo boke obahloyileko. Ngizobabuthelela ndawonye ngokujamelene nawe bavela kizo zoke iindawo, ngizokwembula ubuhlubule bakho kibo begodu bazokubona uhlubule.+

38 “‘Ngizokujezisa ngezahlulelo ezifanele abafebako+ nabafazi abaphalaza iingazi+ begodu iingazi zakho zizokuphalaka ngelaka nomona.+ 39 Ngizokunikela ezandleni zabo, bazokugiriza iindunduma zakho neendawo zakho eziphakemeko zizokugirizwa;+ bazokuhlubulisa izambatho zakho,+ bathathe izinto zakho zokuzikghabisa ezihle+ bakutjhiye uhlubule begodu wembuliwe. 40 Bazokuletha isiqubuthu ngokujamelene nawe,+ sizokukghadlha ngamatje+ begodu sizokurhayila ngeensabula zaso.+ 41 Bazokutjhisa izindlu zakho ngomlilo+ begodu bakhuphe isahlulelo kuwe phambi kwamehlo wabafazi abanengi; ngizokuqeda ubungwadla bakho+ begodu angekhe usabhadela ubungwadla. 42 Ngizokwanelisa ilaka lami ngokujamelene nawe,+ ukusilingeka kwami kuzokusuka kuwe,+ ngizokwehlisa ummoya begodu angekhe ngisezwa ubuhlungu.’

43 “‘Ngombana akhenge ukhumbule amalanga wobutjha bakho+ begodu ungisilingile ngokwenza zoke izintwezi, nje ngizokuletha imiphumela yezenzo zakho ehlokwenakho,’ kutjho iKosi ePhakemeko uJehova, ‘angekhe usaziphatha ngokuhlazisako nangazo zoke izenzo zakho ezinyenyisako.

44 “‘Qala boke abantu abasebenzisa izaga bazokusebenzisa isagesi kuwe: “Indodakazi ifuze unina!”+ 45 Uyindodakazi kanyoko, onyaze indodakhe nabantwabakhe. Ungudade wabodadwenu, abanyaze amadodabo nabantwababo. Ummakho bekamRhiti begodu ubabakho bekamAmori.’”+

46 “‘Udadwenu omdala yiSamariya,+ ohlala etlhagwinakho* namadodakazakhe*+ begodu udadwenu omncani, ohlala esewulakho,* yiSodoma+ namadodakazakhe.+ 47 Akhenge ukhambe eendleleni zabo nje kwaphela begodu ulandele izenzo zabo ezinyenyisako kodwana ngesikhatjhana nje besele ukhohlakele khulu kikho koke ukuziphatha kwakho ukudlula bona.+ 48 Nangisaphilako,’ kutjho iKosi ePhakemeko uJehova, ‘iSodoma udadwenu namadodakazayo akhenge benze lokho wena namadodakazakho enikwenzileko. 49 Qala nakhu umtjhapho owenziwa yiSodoma udadwenu: Yena namadodakazakhe+ bebazikhakhazisa+ begodu banokudla okunengi+ banokuthula okungapheliko;+ nanyana kunjalo akhenge basekele abezwa ubuhlungu nabatlhagako.+ 50 Bahlala bazikhakhazisa+ begodu benza izenzo ezinyenyisako ngiqalile,+ nje-ke ngakubona kufaneleka ukubasusa.+

51 “‘Ngitjho neSamariya+ akhenge yenze izono ezinengi njengawe. Bewusolo wenza izenzo ezinyenyisako ezinengi ukudlula bona, bekwafikela lapho abodadwenu babonakala balungile ngebanga lazo zoke izenzo zakho ezinyenyisako.+ 52 Kufuze uthwale ihlazo lakho ngombana usekele ukuziphatha kwabodadwenu. Ngebanga lesono sakho sokuziphatha ngendlela enyenyisa khulu ukudlula bona, balunge khulu ukudlula wena. Nje-ke yiba neenhloni begodu uthwale ihlazo lokwenza abodadwenu babonakale balungile.’

53 “‘Ngizokubuthelela abathunjiweko babo, abathunjiweko beSodoma namadodakazayo nabathunjiweko beSamariya namadodakazayo; ngizokubuye ngibuthelele abathunjiweko bakho kunye nabo,+ 54 bona uthwale ihlazo lakho begodu uzokuhlaziseka ngebanga lalokho okwenzileko ngokubaduduza. 55 Abodadwenu, iSodoma namadodakazayo, bazokubuyela ebujamweni babo bakade, iSamariya namadodakazayo izokubuyela ebujamweni bakade begodu wena namadodakazakho nizokubuyela ebujamweni benu bakade.+ 56 ISodoma udadwenu bekungasiyinto ongakhuluma ngayo ngelanga lokuzikhakhazisa kwakho, 57 ngaphambi kobana ukukhohlakala kwakho kwembulwe.+ Nje-ke amadodakazi weSiriya nabomakhelwana bakho bakudelela namadodakazi wamaFilista,+ nabo boke abakubhodileko, bahlekisa ngawe. 58 Uzokuthwala imiphumela yokuziphatha kwakho okuhlazisako nezenzo zakho ezinyenyisako,’ kutjho uJehova.”

59 “Ngombana nakhu iKosi ePhakemeko uJehova ekutjhoko: ‘Ngizokwenza kuwe njengombana wenzile+ ngombana udelele isifungo ngokuphula isivumelwano sami.+ 60 Kodwana mina ngizokukhumbula isivumelwano engasenza nawe emalangeni wobutjha bakho begodu ngizokudzimelelisa isivumelwano nawe ngokungapheliko.+ 61 Uzokukhumbula ukuziphatha kwakho, uzizwe uhlazisekile+ lokha nawamukela abodadwenu, abadala kunawe kuhlanganise nabancani kunawe begodu ngizokunikela bona njengamadodakazi kodwana ingasi ngebanga lesivumelwano sakho.’

62 “‘Kodwana mina ngizokudzimelelisa isivumelwano sami nawe; begodu kuzokufuze wazi ukuthi nginguJehova. 63 Nje-ke uzokukhumbula begodu uzokuba neenhloni khulu ukuvula umlomakho ngebanga lehlazo lakho,+ nangikwenzela umhlatjelo wokulitjalelwa kwezono ngaphezu kwakho koke okwenzileko,’+ kutjho iKosi ePhakemeko uJehova.”