ISETHULO

IMITLOLO eCwengileko yatlolwa ngesiHebheru, ngesi-Aramu nesiGirigi ngaphasi kokuphefumulelwa nguZimu. Abantu bazo “zoke iintjhaba” kufuze bazuze eliZwini lakaZimu, ngalokho imiTlolo le kutlhogeka bona itjhugululelwe emalimini amanengi. (Matewu 24:​14) Iincwadi ezimatjhumi amabili nekhomba ezithoma kuMatewu ukuya kusAmbulo, zibizwa ngokuthi “miTlolo yamaKrestu yesiGirigi,” ngombana ekuthomeni zatlolwa ngesiGirigi batloli abamaKrestu abaphefumulelweko bangekhulu lokuthoma C.E.

ITjhugululo Yephasi Elitjha YemiTlolo YamaKrestu YesiGirigi yatjhatjhululwa kokuthoma ngesiNgisi ngo-1950. Isekelwe khulukhulu emtlolweni odumileko wesiGirigi kaWestcott noHort, ovumelana nenengi lemitlolo yesiGirigi yekadeni. ITjhugululo Yephasi Elitjha itjhugulula umtlolo wesiGirigi ngokuthembeke ngendlela ekungakghoneka ngayo. Itjhugululo yesiNdebele le isekelwe egadangisweni lesiNgisi lango-2013, begodu ilwela ukunamathela ekuthembekeni okunjengekwegadangiso lesiNgisi.

Ibizo lakaZimu ekungelakhe yedwa, elithi Jehova, livela iinkhathi ezima-237 emitlolweni ye-Tjhugululo Yephasi Elitjha YemiTlolo YamaKrestu YesiGirigi. Ngebanga lokuqakatheka kokucwengiswa kwebizo lakaZimu netlhogeko yokuthi boke abantu babize ibizwelo bona basindiswe, itjhugululo le ibuyisela ibizo elithi Jehova lapho ekufuze libe khona emiTlolweni eCwengileko.​—Matewu 6:9; Roma 10:13.

Ibizo elithi, iTjhugululo Yephasi Elitjha, lisekelwe esithembisweni sakaZimu sephasi elitjha lokulunga elizokuzuzisa yoke imihlobo yabantu. (2 Pitrosi 3:​13) Abatjhugululi betjhugululo le, abathanda uZimu, uMtloli wemiTlolo eCwengileko, bazizwa banesibopho esikhethekileko kuye sokudlulisela imicabango neememezelo zakhe ngokunembe ngendlela ekungakghoneka ngayo. Sithandazela bona itjhugululo le idlale indima eqakathekileko ebafundini abathembekileko abalwela ‘ukufikelela elwazini elinembileko leqiniso.’​—1 Thimothi 2:4.