DUTERONOMI

1 La mamezwi uMosi awatjela ama-Israyeli woke asemmangweni esifundeni seJordani, emmangweni othabaleleko phambi kweSufi hlangana neParana, iTofeli, iLabani, iRhatserothi neDizahaba. 2 Kuthatha amalanga ali-11 ukusuka eRhorebe uye eKhadetjhi-Bharineya+ nawukhamba ngendlela yeNtaba iSeyiri. 3 Ngomnyaka wama-40,+ enyangeni ye-11, ngelanga lokuthoma lenyanga, uMosi watjela ama-Israyeli ngakho koke uJehova amyale bona awatjele khona. 4 Lokhu kwenzeka ngemva kobana ahlule uSirhoni+ ikosi yama-Amori obekahlala eRhetjhibhoni, no-Ogi+ ikosi yeBhatjhani obekahlala e-Atjhitarothi e-Edreyi.+ 5 UMosi wawahlathululela umThetho+ esifundeni seJordani enarheni yakwaMowabi, wathi:

6 “UJehova uZimethu wakhuluma nathi eRhorebe wathi, ‘Senihlezi isikhathi eside esifundeni seentabezi.+ 7 Khambani niye esifundeni seentaba sama-Amori+ nakizo zoke iindawo eziseduze e-Araba,+ esifundeni seentaba eTjhefela, eNegebhi, esifundeni esiseligwini lelwandle,+ enarheni yamaKanana neLibhanoni*+ beniyokufika emlanjeni omkhulu iYufrathe.+ 8 Qalani, ngininikele inarha le. Khambani niyokuthatha inarha le uJehova afunga kiboyihlo, u-Abrahama, u-Isaka+ noJakopo+ bona uzobanikela yona neenzukulwana zabo.’+

9 “Nganitjela ngathi, ‘Angekhe ngakghona ukunidosa phambili ngingedwa.+ 10 UJehova uZimenu unenze naba banengi, nakhu namhlanjesi nibanengi njengeenkwekwezi.+ 11 Kwanga uJehova, uZimu waboyihlomkhulu, anganandisa+ nibe banengi khulu begodu anibusise njengombana anithembisile.+ 12 Ngingakghona njani ukunidosa phambili ngithwale imithwalwenu nokunghonghoyila+ kwenu ngingedwa? 13 Khethani hlangana neenkoro zenu amadoda ahlakaniphileko, anekghono nanelemuko ngizowabeka abe ziinhloko phezu kwenu.’+ 14 Nangiphendula nathi, ‘Kuhle bona senze koke ositjela khona.’ 15 Ngathatha iinhloko eenkorweni zenu, amadoda ahlakaniphileko nanelemuko ngawabeka bona abe ziinhloko phezu kwenu, iinduna zeenkulungwana, iinduna zamakhulu, iinduna zamatjhumi amahlanu, iinduna zamatjhumi nabarholi beenkoro zenu.+

16 “Ngatjela abahluleli benu ngathi, ‘Lokha abantu nababa nomraro bebawulethe kini, kufuze nahlulele ngobulungiswa,+ kungaba kukuthi umlandu loyo uhlangana kwama-Israyeli amabili namkha umIsrayeli nomuntu ovela kwenye inarha+ ohlala hlangana nani. 17 Akukafuzi nibandlulule nanahlulelako.+ Kufuze nimuphe indlebe otlhagako njengalokha nanilalela onjingileko.+ Akukafuzi nithuswe babantu+ ngombana isahlulelo sivela kuZimu,+ nangabe umlandu loyo uyanibhalela kufuze niwulethe kimi, ngizowulalela.+ 18 Nganitjela koke okufuze nikwenze.

19 “Sasuka eRhorebe, sakhamba woke ummango omkhulu nosabekako+ enawubonako endleleni eya esifundeni seentaba sama-Amori,+ njengombana uJehova uZimethu asiyalile, ekugcineni safika eKhadetjhi-Bharineya.+ 20 Ngathi kini, ‘Senifikile esifundeni seentaba sama-Amori uJehova uZimethu aninikela sona. 21 Qalani, uJehova uZimenu uninikele inarha. Khambani niyoyithatha njengombana uJehova uZimu wabokhokho benu anitjelile.+ Ningasabi.’

22 “Noke neza kimi nathi, ‘Asithumeni amadoda bona ayosihlolela inarha, abuye azositjela ukuthi kufuze sikhambe ngayiphi indlela nokuthi anjani amadorobho esizokuya kiwo.’+ 23 Ngawubona umuhle umbonwenu, nje-ke ngakhetha amadoda ali-12, yinye ekorweni ngayinye.+ 24 Akhuphukela esifundeni seentaba+ ayokufika emRhobeni we-Etjhikolo ayihlola. 25 Athatha ezinye iinthelo zenarha asilethela zona, aletha nombiko athi, ‘Inarha uJehova uZimethu asinikela yona yihle.’+ 26 Kodwana akhenge nivume ukukhuphukela enarheni leyo, akhenge nilalele umyalo kaJehova uZimenu.+ 27 Benisolo ninghonghoyila ngematendenenu nithi, ‘UJehova usihloyile, kungebangelo asikhuphe enarheni yeGibhide wasinikela ezandleni zama-Amori bona asitjhabalalise. 28 Yindawo enjani esiya kiyo? Abafowethu basithusile+ bathi, “Abantu bakhona bakhulu bebade kunathi, banamadorobho amakhulu, aphakamileko naqinileko,+ sibone neenzukulwana zaka-Anakhi+ lapho.”’

29 “Nje-ke ngathi kini, ‘Ningathukwa begodu ningabasabi.+ 30 UJehova uZimenu uzokukhamba phambi kwenu, uzonilwela+ njengombana enza eGibhide phambi kwenu.+ 31 Nayibona indlela uJehova uZimenu anitlhogomela ngayo emmangweni njengobaba nakatlhogomela indodanakhe, wanitlhogomela kizo zoke iindawo enidlule kizo benafika endaweni le.’ 32 Naphezu kwakho koke lokhu, akhenge nikholelwe kuJehova uZimenu,+ 33 obekakhamba phambi kwenu bona anihlolele indawo enizokukampa kiyo, aninqophisa ngomlilo ebusuku nangelifu emini bona anitjengise indlela okufuze nikhambe ngayo.+

34 “Soke isikhathesi uJehova bekakuzwa enikutjhoko begodu wasilingeka khulu bewafunga+ wathi, 35 ‘Akakho namunye umuntu esizukulwaneni esikhohlakelekwesi ozokubona inarha ehle engafunga ukuyinikela aboyihlo,+ 36 ngaphandle kwakaKalebi indodana kaJefune. Yena uzoyibona begodu inarha akhamba kiyo ngizomnikela yona, yena namadodanakhe ngombana ulandele uJehova ngehliziyo yoke.+ 37 (UJehova wasilingeka nangami ngebanga lenu, wathi, “Nawe angekhe ungene.+ 38 UJotjhuwa indodana kaNuni ojame phambi kwakho,+ nguye ozokungena enarheni.+ Mqinise+ ngombana nguye ozokudosa phambili ama-Israyeli awangenise enarheni.”) 39 Ngaphezu kwalokho, abantwabenu enathi bazokuthunjwa+ namadodanenu namhlanjesi angakghoni ukuhlukanisa okumbi nokuhle, azokungena, ngizowanikela yona ibe ngeyawo.+ 40 Kodwana nina, jikani nibuyele emmangweni nikhambe ngendlela yeLwandle eliBomvu.’+

41 “Nathi kimi, ‘Sonile kuJehova. Nje-ke sizokukhamba siyokulwa njengombana uJehova uZimethu asiyalile!’ Omunye nomunye wenu wathatha isikhali sokuya epini, nicabanga bona kuzokuba lula ukukhuphukela entabeni+ niyokuhlula. 42 Kodwana uJehova wathi kimi, ‘Atjele uthi: “Ningakhuphuki niyokulwa ngombana angekhe ngibe nani.+ Nanikhuphukako, nizokuhlulwa manabenu.”’ 43 Nje-ke ngakhuluma nani kodwana akhenge ningilalele, akhenge nilalele umyalo kaJehova naba nekani, nalinga ukukhuphukela entabeni. 44 Ama-Amori ebekahlala entabeni leyo aphuma njengeenyosi azokuhlangana nani, anigijimisa narhatjheka eSeyiri benayokufika eRhorema. 45 Nje-ke nabuya, nathoma ukulila phambi kwakaJehova kodwana uJehova akhenge anilalele begodu akhenge anitjheje. 46 Kungebangelo nahlala eKhadetjhi isikhathi eside.

2 “Nje-ke sajika saya emmangweni sikhamba ngendlela yeLwandle eliBomvu njengombana uJehova gade angiyalile,+ sakhamba amalanga amanengi eNtabeni iSeyiri. 2 Ekugcineni uJehova wathi kimi, 3 ‘Senijikajike khulu entabeni le, nje-ke tjhingani ngetlhagwini. 4 Nikela abantu isinqophiswesi: “Nizokudlula ngemkhawulweni wabafowenu, iinzukulwana zaka-Esewu+ ezihlala eSeyiri,+ zizonisaba+ kodwana kufuze nitjheje khulu. 5 Ningalwi nazo ngombana angekhe ngininikele inarhazo, ngitjho nesiqetjhana senarha ngombana nginikele u-Esewu iNtaba iSeyiri bona ibe lilifa lakhe.+ 6 Kufuze nibanikele imali yokudla enizokudla, nibhadele namanzi enizowasela.+ 7 Ngombana mina Jehova uZimenu ngibusise koke enikwenzileko. Ngikutjhejile ukukhamba kwenu emmangweni omkhulu. Mina Jehova uZimenu benginani iminyaka ema-40 begodu akhenge nitlhoge litho.+ 8 Nje-ke sadlula ngakubafowethu, iinzukulwana zaka-Esewu+ ebezihlala eSeyiri, akhenge sikhambe ngendlela ye-Araba, ye-Elathi neye-Etsiyoni-Gebere.+

Ngemva kwalokho, sabuyela emva sakhamba ngendlela yommango wakwaMowabi.+ 9 UJehova wathi kimi, ‘Ningalwi nabakwaMowabi ngombana angekhe ngininikele inarhabo bona ibe lilifa lenu, nginikele iinzukulwana zakaLothi+ i-Ari bona libe lilifa lazo. 10 (Ama-Emi+ bewahlala lapho, abantu abanamandla, abanengi nabade njengama-Anakhi. 11 AmaRafa+ bewafana nama-Anakhi,+ abantu bakwaMowabi bebawabiza ngokuthi ma-Emi. 12 AmaRhori+ bewahlala eSeyiri kodwana iinzukulwana zaka-Esewu zawathathela inarha zawatjhabalalisa, zahlala enarhenawo,+ nama-Israyeli azokwenza njalo enarheni elilifa lawo uJehova azowanikela yona.) 13 Nje-ke khambani niyokuyama umRhoba weZeredi. Sakhamba sayama umRhoba weZeredi.+ 14 Kwasithatha iminyaka ema-38 ukukhamba sisuka eKhadetjhi-Bharineya besayokuyama umRhoba weZeredi, bekwaba kulapho soke isizukulwana samadoda wepi sitjhabalele ekampeni, njengombana uJehova afunga kiso.+ 15 Isandla sakaJehova besijamelene nawo bona awatjhabalalise ekampeni bekube kulapho sewaphele woke.+

16 “Kwathi woke amadoda wepi nasekahlongakele,+ 17 uJehova wakhuluma nami godu wathi, 18 ‘Namhlanjesi nizokudlula ngesifundeni sakwaMowabi, i-Ari. 19 Nanitjhidela kuma-Amoni, ningawathuseli ngombana angekhe ngininikele inarhawo bona ibe lilifa lenu, ngiyinikele iinzukulwana zakaLothi bona ibe lilifa lazo.+ 20 Inarha le beyibizwa ngokuthi yinarha yamaRafa.+ (AmaRafa bewahlala lapho begodu ama-Amoni bebawabiza ngokuthi maZamzumi. 21 Bekubabantu abanamandla, babanengi, babade njengama-Anakhi+ kodwana uJehova wabatjhabalalisa phambi kwama-Amoni. Ama-Amoni abaqotha ahlala enarhenabo. 22 Ngilokho akwenzela iinzukulwana zaka-Esewu, kwanjesi ezihlala eSeyiri,+ lokha nakatjhabalalisa amaRhori+ phambi kwazo bona zithathe inarhawo bezahlala kiyo bekube kunamhlanjesi. 23 Ama-Avimu bewahlala eendaweni ezinabileko bezafika eGaza,+ bekwaba kulapho amaKafitori avela eKafitori*+ awatjhabalalisa athatha inarhawo.)

24 “‘Sikimani, khambani niyokuyama umRhoba i-Arinoni,+ nginikele ikosi yeRhetjhibhoni uSirhoni+ umAmori esandleni senu. Nje-ke thathani inarhakhe begodu nilwe naye. 25 Namhlanjesi ngizokwenza abantu bathukwe nabezwa umbiko omalungana nani. Bazokutshwenyeka bebarhidlwe livalo ngebanga lenu.’+

26 Nasisemmangweni weKhedemothi,+ ngathumela iinthunywa kuSirhoni ikosi yeRhetjhibhoni, ngiziphathise umlayezo wokuthula,+ 27 ‘Ngibawa ungivumele ngidlule enarhenakho. Ngizokukhamba endleleni kwaphela, angekhe ngiphambukele ngesidleni namkha ngesinceleni.+ 28 Ngizokudla ukudla ongithengisela khona ngisele namanzi ongithengisela wona. Ngibawa ungivumele ngidlule enarhenakho kwaphela, 29 ngilokho iinzukulwana zaka-Esewu ezihlala eSeyiri nabantu bakwaMowabi abahlala e-Ari abangenzele khona bekwaba kulapho ngiyama iJordani bengayokufika enarheni uJehova uZimethu asinikela yona.’ 30 Kodwana uSirhoni ikosi yeRhetjhibhoni akhenge asivumele bona sidlule, ngombana uJehova uZimenu wamvumela bona aqinise ihloko+ begodu abe nekani bona amnikele esandleni senu njengombana kwenzekile.+

31 “Nje-ke uJehova wathi kimi, ‘Nginikele uSirhoni nenarhakhe esandleni sakho. Mhlule uthathe inarhakhe.’+ 32 Lokha uSirhoni nakaphuma namabuthwakhe bazokuhlangana nathi epini eJahatsi,+ 33 uJehova uZimethu wamnikela esandleni sethu, samhlula, sahlula amadodanakhe sahlula nalo loke ibutho lakhe. 34 Ngesikhatheso sathumba woke amadorobhakhe, satjhabalalisa woke amadorobho kuhlanganise amadoda, abafazi nabantwana. Akhenge sitjhiye namunye ophilako.+ 35 Sazithathela ifuyo nezinto esazithola emadorobheni esawathumbako. 36 Kusukela e-Aroweri+ esemkhawulweni womRhoba i-Arinoni (kuhlanganise nedorobho elingemrhobeni), ukuyokufika eGiliyadi, akunadorobho esingakhenge silihlule ngombana uJehova uZimethu wawanikela kithi woke nje.+ 37 Nanyana kunjalo, akhenge niye enarheni yama-Amoni,+ emRhobeni weJabokhi+ nemadorobheni asesifundeni seentaba namkha nanyana ngiyiphi enye inarha uJehova uZimethu athe singayi kiyo.

3 “Sajika sakhuphuka ngendlela yeBhatjhani. U-Ogi ikosi yeBhatjhani, waphuma nabo boke abantu bakhe wazosihlangabeza epini e-Edreyi.+ 2 UJehova wathi kimi, ‘Ungamsabi, ngizokunikela yena esandleni sakho, abantu bakhe boke nayo yoke inarhakhe begodu uzomhlula njengombana wahlula uSirhoni ikosi yama-Amori, ebeyihlala eRhetjhibhoni.’ 3 UJehova uZimethu wanikela u-Ogi ikosi yeBhatjhani nabo boke abantu bakhe esandleni sethu besisolo sibamadlha akhenge kusinde namunye. 4 Sathumba woke amadorobhakhe. Alikho nalinye esingakhenge silithumbe emadorobheni ama-60, soke isifunda se-Arigobho umbuso ka-Ogi eBhatjhani.+ 5 Woke amadorobho la bewavikelwe ngemithangala ephakamileko, amasango neenqabo, sathatha namadorobho amanengi amancani. 6 Nanyana kunjalo, sawatjhabalalisa amadorobho la,+ njengombana satjhabalalisa amadorobho kaSirhoni ikosi yeRhetjhibhoni kuhlanganise amadoda, abafazi nabantwana.+ 7 Sazithathela yoke ifuyo nezinto zemadorobheni lawo.

8 “Ngesikhatheso sathatha inarha yamakhosi amabili wama-Amori+ ebewasesifundeni seJordani ukusuka emRhobeni i-Arinoni ukuyokufika eNtabeni iRherimoni.+ 9 (amaTsidoni bewajayele ukuyibiza ngokuthi yiSiriyoni, ama-Amori bewayibiza ngokuthi yiSeniri), 10 woke amadorobho asembundwini, yoke iGiliyadi nayo yoke iBhatjhani ukuyokufika eSaleka ne-Edreyi,+ amadorobho asembusweni ka-Ogi eBhatjhani. 11 Ikosi yeBhatjhani u-Ogi nguye wokugcina owasalako kumaRafa. Umkghadakhe* bewenziwe ngesimbi, usesekhona eRabha yama-Amoni. Umakhubhithi* alithoba ubude namakhubhithi amane ububanzi. 12 Ngesikhatheso sathatha iinarha nanzi ezilandelako: Ukusukela e-Aroweri+ eduze nomRhoba i-Arinoni nengcenye yesifunda seentaba eGiliyadi benganikela ikoro kaRubeni neyakwaGadi+ amadorobhazo. 13 Yoke ingcenye yeGiliyadi nayo yoke iBhatjhani yombuso ka-Ogi ngiyinikele ingcenye yekoro kaManase.+ Soke isifunda se-Arigobho okungeseBhatjhani ebesaziwa ngokuthi yinarha yamaRafa.

14 “UJayire+ indodana kaManase wathatha soke isifunda se-Arigobho+ ukuyokufikela emkhawulweni wamaGetjhuri namaMakathi,+ wathiyelela iindawo zeBhatjhani ngaye wathi yiRhavothi-Jayire,*+ zaziwa njalo bekube kunamhlanjesi. 15 Nginikele uMakiri+ iGiliyadi. 16 Ikoro yakwaRubeni neyakwaGadi+ ngiyinikele kusukela eGiliyadi ukuyokufika emRhobeni i-Arinoni, phakathi nomrhoba kuzokuba mkhawulo wakhona ukuyokufika eJabokhi, umrhoba omkhawulo wama-Amoni, 17 I-Araba, iJordani nomkhawulo ukusukela eKinerethi ukuya eLwandle le-Araba, iLwandle leTswayi, elisekuthomeni kwemikhuphukela yePisiga ukuya ngepumalanga.+

18 “Nje-ke nganinikela umyalo lo: ‘UJehova uZimenu uninikele inarha le bona ibe lilifa lenu. Woke amadoda anesibindi azokuhlomela ipi ayame phambi kwabafowenu, ama-Israyeli.+ 19 Emadorobheni engininikele wona la, kuzokuhlala kwaphela abafazi benu, abantwana benu nefuywenu (ngombana ngiyazi ukuthi ninefuyo enengi khulu), 20 bekube kulapho uJehova aphumuza khona abafowenu njengombana enzile nakini, nabo bazokufumana inarha uJehova uZimenu azobanikela yona ngaphetjheya kweJordani. Nizokubuya, omunye nomunye wenu abuyele elifeni engimnikele lona.’+

21 “Ngesikhatheso nganikela uJotjhuwa+ umyalo lo: ‘Ubonile indlela uJehova uZimenu enze ngayo emakhosini amabili la. UJehova uzokwenza okufanako nakiyo yoke imibuso enizokudlula kiyo.+ 22 Akukafuzi niyisabe ngombana uJehova uZimenu nguye onilwelako.’+

23 “Ngesikhatheso ngancenga uJehova ngathi, 24 ‘Maye! Jehova Kosi ePhakemeko, sewuthomile ukutjengisa isisebenzi sakho ubukhulu bakho namandlakho+ ngombana ngimuphi uzimu ezulwini namkha ephasini ongenza imisebenzi yamandla njengawe?+ 25 Ngiyakubawa, ngivumela ngidlule ngiyokubona inarha ehle ngaphetjheya kweJordani, isifunda seentaba esihle neLibhanoni.’+ 26 Kodwana uJehova bekasasilingekile ngami begodu angafuni nokungilalela ngebanga lenu.+ UJehova wathi kimi, ‘Kwanele! Ungasathomi ukhulume nami ngendaba le. 27 Khuphukela esiqongolweni sePisiga,+ uqale etjingalanga, etlhagwini, esewula nepumalanga ubone inarha ngombana angekhe uyiyame iJordani le.+ 28 Khetha uJotjhuwa,+ umkhuthaze bewumqinise ngombana nguye ozokudosa phambili+ abantwaba bona baye enarheni ozoyibona begodu bazokuhlala kiyo.’ 29 Koke lokhu kwenzeka ngesikhathi sihlala emrhobeni phambi kweBhethe-Pewori.+

4 “Nina ma-Israyeli, lalelani iinqophiso nemithetho enginifundisa yona, niyenze khona nizokuphila,+ nikhambe nithathe inarha uJehova uZimu wabokhokho benu aninikela yona bona ibe lilifa lenu. 2 Ningangezeleli litho namkha niphungule kilokhu enginiyala ngakho,+ lalelani imithetho kaJehova uZimenu enginiyala ngayo.

3 “Nikubonile lokho uJehova akwenza endabeni kaBhali wePewori; uJehova uZimenu watjhabalalisa woke umuntu hlangana nani obekalandela uBhali wePewori.+ 4 Kodwana nina enisakakarele kuJehova uZimenu nisaphila noke namhlanjesi. 5 Qalani, nginifundise iinqophiso nemithetho+ njengombana uJehova uZimami angiyalile bona niyilalele enarheni enizoyithatha bona ibe ngeyenu. 6 Kufuze nilalele koke lokhu ngokutjhejisisa+ ngombana abantu abazokuzwa ngeenqophiswezi bazokubona ukuthi nihlakaniphile+ beniyazwisisa,+ bazokuthi, ‘Abantwaba bahlakaniphile begodu bayazwisisa.’+ 7 UJehova uZimethu uyasizwa qobe nasithandaza kuye, sikhona na isitjhaba esikhulu abozimu baso abaseduze naso?+ 8 Ngisiphi isitjhaba esikhulu esineenqophiso nemithetho elungileko, njengomThetho lo engininikela wona namhlanjesi?+

9 “Zitjhejeni beniqiniseke bona anizilibali izinto enazibonako ukuthi zingasuki eenhliziyweni zenu ukuphila kwenu koke. Kufuze nizitjele amadodanenu neenzukulwana zenu.+ 10 Ngelanga enajama ngalo phambi kwakaJehova uZimenu eRhorebe, uJehova wathi kimi, ‘Hlanganisa abantu phambi kwami bona bezwe amezwami,+ bafunde ukungisaba+ kikho koke ukuphila kwabo begodu bafundise namadodanabo.’+

11 Nje-ke natjhidela najama hlanu kwentaba, intaba beyivutha, umlilo wakhona ufika ezulwini, bekumnyama kunelifu elinzima.+ 12 UJehova wakhuluma nani asemlilweni.+ Nezwa umuntu akhuluma kodwana akhenge nimbone,+ nezwa ilizwi kwaphela.+ 13 Wanitjela isivumelwano sakhe,+ aniyala bona nisilalele okumiYalo eliTjhumi.+ Ngemva kwalokho, wayitlola ematjeni amabili.+ 14 Ngesikhatheso uJehova wangiyala bona nginifundise iinqophiso nemithetho okufuze niyilalele enarheni enizokungena kiyo.

15 “Ngelanga uJehova akhuluma nani eRhorebe aphakathi komlilo, akhenge nimbone, nje-ke zitjhejeni 16 bona ningaziphathi ngendlela ekhohlakeleko nizenzele iinthombe ezibaziweko, ezimfanekiso wananyana yini, ezijamele indoda namkha umfazi,+ 17 umfanekiso wananyana ngisiphi isilwana sephasini namkha umfanekiso wananyana ngiyiphi inyoni,+ 18 umfanekiso wananyana yini erhurhubako namkha umfanekiso wananyana ngiyiphi ihlambi.+ 19 Naniqala phezulu nibona loke ibutho lezulwini, ilanga, inyezi neenkwekwezi, ningayengeki bona nizikhothamele benizilotjhe.+ UJehova uZimenu uzidalele boke abantu ephasini. 20 UJehova wanikhupha emlilweni wokuncibilikisa isimbi eGibhide, bona nibe babantu bakhe abakhethekileko+ njengombana ningibo namhlanjesi.

21 UJehova wasilingeka ngami ngebanga lenu,+ wafunga ukuthi angeze ngiyamele ngale kweJordani namkha ngiye enarheni ehle uJehova uZimenu aninikela yona bona ibe lilifa lenu.+ 22 Mina ngizokufela enarheni le; angekhe ngiyame iJordani+ kodwana nina nizoyiyama benithathe inarha ehle le bona ibe ngeyenu. 23 Ningasilibali isivumelwano uJehova uZimenu asenze nani,+ ningazenzeli isithombe esibaziweko sananyana yini uJehova uZimenu athe ningayenzi.+ 24 Ngombana uJehova uZimenu umlilo otjhabalalisako,+ unguZimu ofuna kulotjhwe yena yedwa.+

25 “Nange nihlezi isikhathi eside enarheni naba nabantwana neenzukulu, nenza ngokukhohlakeleko, nazenzela isithombe esibaziweko+ sananyana yini begodu nenza into embi kuJehova uZimenu bona nimzwise ubuhlungu,+ 26 ngithatha izulu nephasi bona zibe bofakazi bami ngokujamelene nani namhlanjesi ukuthi nangambala nizokutjhabalala msinya enarheni eniyama iJordani bona niyoyithatha. Angekhe nihlale kiyo isikhathi eside, nizokutjhatjalaliswa.+ 27 UJehova uzoniqothela eentjhabeni,+ bambalwa abazokusinda+ eentjhabeni uJehova azoniqothela kizo. 28 Lapho nizokulotjha abozimu abenziwe ngeengodo, ngamatje, abenziwe babantu,+ abozimu abangaboniko, abangezwako, abangadliko nabanganukeleliko.

29 “Nanifuna uJehova uZimenu lapho, nizomfumana,+ nanimfuna ngeenhliziyo zenu zoke nangemiphefumulwenu* yoke.+ 30 Esikhathini esizako nanisebuhlungwini begodu zoke izintwezi zenzeke kini, nizokubuyela kuJehova uZimenu nilalele ilizwi lakhe.+ 31 Ngombana uJehova uZimenu, unguZimu onomusa.+ Angekhe anilahle, angekhe anitjhabalalise namkha alibale isivumelwano asifunga kibokhokho benu.+

32 “Nje-ke buzani ngezinto ezenzeka esikhathini esidlulileko, ngaphambi kobana nibe khona; kusukela ngelanga uZimu adala ngalo umuntu ephasini, funisisani kusukela komunye umkhawulo wephasi ukuya komunye. Into ekulu kangaka yakhe yenzeka namkha ukhona na okhe wezwa ngayo?+ 33 Bakhona na abanye abantu abakhe bezwa ilizwi lakaZimu likhuluma emlilweni ngendlela enalizwa ngayo begodu baragela phambili baphila?+ 34 Kghani uZimu wakhe walingeka bona azithathele isitjhaba hlangana nesinye isitjhaba ngezahlulelo, ngamatshwayo, ngemmangaliso,+ ngepi,+ ngesandla esinamandla,+ ngomkhono onamandla nangezinto ezithusako,+ njengombana uJehova uZimenu anenzela eGibhide phambi kwenu? 35 Nina natjengiswa izintwezi bona nazi ukuthi uJehova unguZimu weqiniso,+ akakho omunye ngaphandle kwakhe.+ 36 Wanenza nezwa ilizwi lakhe lisuka ezulwini bona anilungise, wanenza nabona umlilo omkhulu ephasini, nezwa namezwakhe aphuma emlilweni.+

37 “Ngebanga lokuthi bekabathanda abokhokho benu, wakhetha iinzukulwana zabo bona zibe babantu bakhe,+ wakhamba nani lokha nakanikhupha eGibhide ngamandlakhe amakhulu. 38 Waqotha phambi kwenu iintjhaba ezikulu nezinamandla kunani bona anilethe enarhenazo begodu aninikele inarhazo ibe lilifa lenu njengombana kunjalo namhlanjesi.+ 39 Namhlanjesi, kufuze nazi benikhumbule ukuthi uJehova unguZimu weqiniso ezulwini nephasini.+ Akekho omunye.+ 40 Kufuze nilalele iinqophiso nemiyalwakhe enginiyala ngayo namhlanjesi, khona kuzanikhambela kuhle nina namadodanenu bona niphile isikhathi eside enarheni uJehova uZimenu aninikela yona.”+

41 Khonokho uMosi wakhetha amadorobho amathathu angepumalanga yeJordani.+ 42 Nange umuntu abulala omunye umuntu angakahlosi begodu angakhenge amhloye,+ kufuze abalekele kwelinye lamadorobho la, angekhe abulawe.+ 43 Idorobho iBhetseri+ elisemmangweni osembundwini lizokuba ngelabakwaRubeni, iRamothi+ eseGiliyadi izokuba ngeyakwabaGadi, iGolana+ eseBhatjhani izokuba ngeyabakwaManase.+

44 Lo, mThetho+ uMosi awunikela abantu bakwa-Israyeli. 45 Lezi ziinkhumbuzo, iinqophiso, nemithetho uMosi ayinikela ama-Israyeli ngemva kokuphuma eGibhide,+ 46 esifundeni seJordani, emrhobeni oqalene neBhethe-Pewori,+ enarheni kaSirhoni iKosi yama-Amori obekahlala eRhetjhibhoni+ loyo uMosi nama-Israyeli abamhlulako nabaqeda ukuphuma eGibhide.+ 47 Bathatha inarhakhe nenarha ka-Ogi iKosi+ yeBhatjhani, amakhosi amabili wama-Amori ebewahlala esifundeni esingepumalanga yeJordani, 48 Ukusuka e-Aroweri+ esemkhawulweni womRhoba i-Arinoni, ukukhuphukela eNtabeni iSiwoni okuyiRherimoni,+ 49 naso soke isifunda se-Araba esisepumalanga yeJordani, ukuyokufika eLwandle le-Araba, ekuthomeni kwemikhuphukela yePisiga.+

5 UMosi wabiza woke ama-Israyeli wathi kiwo: “Nina ma-Israyeli, lalelani iinqophiso nemithetho enginitjela yona namhlanjesi, kufuze niyifunde beniyilandele. 2 UJehova uZimethu wenza nathi isivumelwano eRhorebe.+ 3 UJehova akhenge enze isivumelwano nabokhokho bethu kodwana wasenza nathi soke esilapha namhlanjesi. 4 UJehova wakhuluma nami ngokunqophileko entabeni, aphakathi komlilo.+ 5 Bengijame phakathi kwenu noJehova+ ngidlulisela kini ilizwi lakaJehova ngombana benisaba umlilo, akhenge nikhuphukele entabeni.+ Wathi:

6 “‘NginguJehova uZimenu, owanikhupha eGibhide lapha benigqilazwa khona.+ 7 Akukafuzi nibe nabanye abozimu ngaphandle kwami.+

8 “‘Ningazenzeli isithombe esibaziweko+ namkha umfanekiso wananyana yini esezulwini, ephasini namkha emanzini. 9 Ningazikhothameli namkha nizilotjhe+ ngombana mina Jehova uZimenu, nginguZimu ofuna nizinikele kimi kwaphela,+ ngiletha isijeziso somtjhapho wabobaba phezu kwamadodana, phezu kwesizukulwana sesithathu naphezu kwesizukulwana sesine kilabo abangihloyako,+ 10 kodwana ngizokuthanda nesizukulwana sekulungwana salabo abangithandako nabalalela imiyalwami.

11 “‘Ningaphathi igama lakaJehova uZimenu ngelize+ ngombana uJehova uzobajezisa labo abaphatha igama lakhe ngelize.+

12 “‘Gidingani iSabatha ngombana licwengile njengombana uJehova uZimenu aniyala.+ 13 Kufuze nisebenze amalanga asithandathu,+ 14 kodwana ilanga lekhomba lisabatha lakaJehova uZimenu.+ Kufuze ningasebenzi,+ wena, indodanakho, indodakazakho, isigqila sakho esiduna, isigqila sakho esisikazi, ikunzakho, udumbanakho nananyana ngiyiphi ifuywakho, nomuntu ovela kwenye inarha ohlala emadorobhenenu,+ khona isigqila sakho esiduna nesigqila sakho esisikazi zizakuphumula njengawe.+ 15 Khumbulani bona naba ziingqila enarheni yeGibhide begodu uJehova uZimenu wanikhupha khona ngesandla esinamandla nangomkhono onamandla.+ Kungebangelo uJehova uZimenu aniyala bona nigidinge ilanga leSabatha.

16 “‘Hlonipha uyihlo nonyoko+ njengombana uJehova uZimakho akuyalile bona uphile isikhathi eside begodu uphumelele enarheni uJehova uZimenu aninikela yona.+

17 “‘Ungabulali.+

18 “‘Ungafebi.*+

19 “‘Ungebi.+

20 “‘Ungafakazi amala ngomakhelwanakho.+

21 “‘Ungamkhanuki umfazi kamakhelwanakho.+ Ungakhanukeli indlu kamakhelwanakho, isimakhe, isigqila sakhe esiduna, isigqila sakhe esisikazi, ikunzakhe, udumbanakhe namkha nanyana yini ekungeyakhe.’+

22 Le, miyalo uJehova ayikhuluma ngelizwi elikhulu kilo loke ibandla entabeni aphakathi komlilo, nelifini elinzima,+ akhenge angezelele litho. Nje-ke wayitlola ematjeni amabili, wanginikela amatje lawo.+

23 “Kodwana kwathi naniqeda ukuzwa ilizwi liphuma ebumnyameni, intaba isavutha,+ zoke iinhloko zeenkoro zenu nabadala beza kimi. 24 Nje-ke nathi, ‘UJehova uZimethu usitjengise iphazimulwakhe namandlakhe amakhulu, sizwe ilizwi lakhe liphuma emlilweni.+ Namhlanjesi sibonile ukuthi uZimu angakhuluma nomuntu begodu umuntu loyo angaragela phambili aphila.+ 25 Kubayini kufuze sife? Ngombana umlilo omkhulu lo uzositjhisa. Nange singaragela phambili sizwa ilizwi lakaJehova uZimethu sizokufa. 26 Ebantwini boke, ngubani owezwa uZimu ophilako akhuluma asemlilweni njengathi begodu wangafi? 27 Wena kufuze utjhidele uzwe koke uJehova uZimethu azokutjho begodu nguwe ozositjela koke uJehova uZimethu akukhulumileko, thina sizokulalela, senze.’+

28 “Nje-ke uJehova wezwa koke enikukhulume kimi, uJehova wathi kimi, ‘Ngiwazwile amezwi abantwaba abawakhulume kuwe. Koke abakutjhwileko kulungile.+ 29 Ngifisa ngathi bangahlala bangisaba+ begodu balalele yoke imiyalwami;+ kuzobakhambela kuhle, bona namadodanabo ngokungapheliko!+ 30 Khamba uthi kibo: “Buyelani ematendenenu.” 31 Kodwana wena hlala lapha nami, ngikutjele imiyalo, imithetho neenqophiso okufuze ubafundise zona, kufuze bazilandele enarheni engibanikela yona bona ibe ngeyabo.’ 32 Nje-ke nina bantu kufuze nitjheje bona nenza njengombana uJehova uZimenu aniyalile.+ Akukafuzi nitjhinge ngesidleni namkha ngesinceleni.+ 33 Kufuze nikhambe endleleni uJehova uZimenu aniyale ngayo+ khona nizakuphila beniphumelele begodu niphile isikhathi eside enarheni eniyoyithatha.+

6 “Le miyalo, iinqophiso nemithetho uJehova uZimenu aninikela yona bona anifundise khona nizazilandela enarheni eniyoyithatha bona ibe ngeyenu, 2 khona nizakusaba uJehova uZimenu benilalele yoke imiyalwakhe nemithethwakhe enginiyala ngayo namhlanjesi, nina, amadodanenu neenzukulu zenu+ koke ukuphila kwenu bona niphile isikhathi eside.+ 3 Nina ma-Israyeli kufuze niyilalele beniyilandele khona nizakuphumelela, nibe banengi enarheni egeleza ibisi neliju njengombana uJehova uZimu wabokhokho benu anithembisa.

4 “Lalelani nina ma-Israyeli, uJehova uZimethu nguJehova munye.+ 5 Kufuze nithande uJehova uZimenu ngeenhliziyo zenu zoke, ngemiphefumulwenu*+ yoke nangawo woke amandlenu.+ 6 Amezwi enginiyala ngawo namhlanjesi kufuze abe seenhliziyweni zenu, 7 kufuze uwabuyelele emadodanenakho,+ uwakhulume nanihlezi endlinakho, nanikhamba endleleni, nanilalako nalokha nanivukako.+ 8 Kufuze uwabophe esandleni khona uzakuhlala uwakhumbula, kufuze abe njengebhande lehloko epandlakho.+ 9 Atlole emagosenini wendlwakho nemasangwenakho.

10 UJehova uZimenu nakaniletha enarheni afunga ngayo kibokhokho benu u-Abrahama, u-Isaka noJakopo bona uzoninikela yona,+ amadorobho amakhulu namahle eningakhenge niwakhe,+ 11 izindlu ezizele zoke izinto ezihle eningakhenge nizisebenzele, imithombo eningakhenge niyembe, imithi yamadiribe nemithi ye-oliva eningakhenge niyitjale, nasele nidlile benaneliseka,+ 12 yelelani bona ningamlibali uJehova+ owanikhupha eGibhide, lapha benigqilazeka khona. 13 Kufuze nisabe uJehova uZimenu,+ nilotjhe yena kwaphela+ begodu nifunge ngegama lakhe.+ 14 Akukafuzi nilandele abanye abozimu, nanyana ngibaphi abozimu beentjhaba ezinibhodileko,+ 15 ngombana uJehova uZimenu ohlangana nani unguZimu ofuna nizinikele kuye kwaphela.+ Naningenzi njalo, uJehova uZimenu uzokusilingeka khulu ngebanga lenu+ begodu uzonitjhabalalisa ephasini.+

16 “Akukafuzi nilinge uJehova uZimenu+ ngendlela enamlinga ngayo eMasa.+ 17 Kufuze nizimisele ukulalela imiyalo kaJehova uZimenu, iinkhumbuzo zakhe neenqophiso aniyale bona nizilandele. 18 Kufuze nenze okulungileko nokuhle phambi kwakaJehova khona nizakuphumelela begodu niyokuthatha inarha ehle, uJehova afunga ngayo kibokhokho benu,+ 19 ngokuqotha woke amanabenu phambi kwenu njengombana uJehova athembisile.+

20 “Esikhathini esizako, amadodanenu nawanibuzako athi, ‘Kubayini uJehova uZimethu aninikela iinkhumbuzwezi, iinqophiswezi nemithetho le?’ 21 nizokuthi kiwo, ‘Saba ziingqila zakaFaro eGibhide kodwana uJehova wasikhupha ngesandla sakhe esinamandla. 22 UJehova bekasolo enza amatshwayo neemangaliso phambi kwethu, zaba zikulu zatjhabalalisa iGibhide,+ uFaro nakho koke ekungekwakhe.+ 23 Wasikhupha lapho bona azosinikela inarha afunga ngayo kibokhokho bethu.+ 24 Nje-ke uJehova wasiyala bona silandele zoke iinqophiswezi, simsabe uJehova uZimethu khona izinto zizokuhlala zisikhambela kuhle,+ siragele phambili siphila+ njengombana siphila namhlanjesi. 25 Sizokuba babantu abalungileko nange sitjhejisisa, siyilandele yoke imiyalo le begodu silalele uJehova uZimethu njengombana asiyalile.’+

7 “Lokha uJehova uZimenu nakaniletha enarheni enizoyithatha bona ibe ngeyenu,+ uzokususa phambi kwenu iintjhaba ezinabantu abanengi:+ AmaRhiti, amaGirigatjhi, ama-Amori,+ amaKanana, amaPerizi, amaRhivi namaJebusi,+ iintjhaba ezilikhomba ezinabantu abanengi nabanamandla kunani.+ 2 UJehova uZimenu uzozinikela kini begodu nizozihlula.+ Kufuze nizitjhabalalise.+ Akukafuzi nenze nanyana ngisiphi isivumelwano nazo namkha nibe nomusa kizo.+ 3 Akukafuzi nitjhadiselane nazo. Ningendiseli amadodakazenu kizo namkha nithathele amadodanenu abafazi kizo.+ 4 Ngombana azokuphambukisa amadodanenu angasangilandela, alotjhe abanye abozimu;+ uJehova uzokusilingeka khulu ngebanga lenu begodu uzonitjhabalalisa msinyana.+

5 “Kunokuthi nenze njalo, nakhu ekufuze nikwenze kizo: Kufuze nigirize ama-aldarazo, niphadlhe iinsika zazo ezicwengileko,+ niqunte iingodo zazo ezicwengileko,+ nitjhise neenthombe zazo ezibaziweko.+ 6 Ngombana nibabantu abacwengileko kuJehova uZimenu begodu uJehova uZimenu unikhethile bona nibe babantu bakhe, abantu bakhe abakhethekileko* kizo zoke iintjhaba ezisephasini.+

7 “UJehova akhenge anithande bekanikhethe+ ngombana nibanengi, benibancani kibo boke abantu.+ 8 Kunalokho, uJehova wanikhetha ngombana anithanda begodu wazalisa isifungo asenza kibokhokho benu,+ kungebangelo uJehova anikhupha ngesandla esinamandla, anihlenga lapha benigqilazeka khona,+ emandleni kaFaro ikosi yeGibhide. 9 Nazi kuhle ukuthi uJehova uZimenu, nguZimu weqiniso, uZimu othembekileko, owenza okuvunyelenwe ngakho nothanda iinkulungwana zeenzukulwana zalabo abamthandako nabalalela imiyalwakhe.+ 10 Kodwana labo abamhloyako uzobabuyiselela ngokubatjhabalalisa.+ Angekhe ariyade ukujezisa labo abamhloyako; uzobabuyiselela ngokubajezisa. 11 Nje-ke, lalelani imiyalo, iinqophiso nemithetho enginiyala ngayo namhlanjesi, niyenze.

12 “Nange niragela phambili nilalela imithetho le beniyenze, uJehova uZimenu uzokuthembeka esivumelwaneni asenza nabokhokho benu begodu uzonithanda. 13 Uzonithanda, anibusise bekanandise. Uzonibusisa ngabantwana abanengi,+ enze bona inarhenu ithele, anibusise ngesivuno senu seenthoro, iwayini lenu elitjha, amafuthenu,+ amakonyana weenkomo zenu neemvana zemihlambenu enarheni afunga kibokhokho benu bona uzoninikela yona.+ 14 Nizokubusiswa ukudlula boke abantu;+ akunandoda namkha umfazi ongekhe angabi nabantwana hlangana nani nefuywenu izokuzala.+ 15 UJehova uzokususa koke ukugula kini begodu angekhe anilethela ukugula okumbi enakubona eGibhide.+ Kunalokho, uzokwehlisela phezu kwalabo abanihloyako. 16 Kufuze nitjhabalalise boke abantu uJehova uZimenu abanikela kini.+ Akukafuzi nibazwele+ begodu akukafuzi nilotjhe abozimu babo+ ngombana lokho kuzokuba sithiyo kini.+

17 “Nange kwenzeka nithi eenhliziyweni zenu, ‘Iintjhabezi zinengi kunathi. Singaziqotha njani?’+ 18 Ningazisabi.+ Kufuze nikhumbule lokho uJehova uZimenu akwenza kuFaro neGibhide yoke,+ 19 iinlingo enazibonako, amatshwayo, iimangaliso,+ isandla esinamandla nomkhono onamandla uJehova uZimenu anikhupha ngawo.+ Ngilokho uJehova uZimenu azokwenza kibo boke abantu enibasabako.+ 20 UJehova uZimenu uzobenza bathukwe. Labo abaseleko+ nalabo abazifihlileko bazokutjhabalala. 21 Ningabi nevalo ngebanga labo ngombana uJehova uZimenu unani,+ uZimu omkhulu nosabekako.+

22 UJehova uZimenu uzokuqotha iintjhabezi kancanikancani.+ Angekhe anivumele niziqede msinyana, khona iimbandana zingazokuba zinengi ukudlula nina. 23 UJehova uZimenu uzozinikela kini begodu nizozihlula bekube kulapho zitjhabalala khona.+ 24 Uzokunikela amakhosazo esandleni senu+ begodu akunamuntu ozokukhumbula amagamawo.+ Akunamuntu ozokujamelana nani+ bekube kulapho nibatjhabalalisa boke.+ 25 Kufuze nitjhise iinthombe ezibaziweko zabozimu babo.+ Ningarhaleli isiliva negolide labo namkha nizithathele lona,+ khona lingazokuba sithiyo kini ngombana lingokuthileko okunyenyisako kuJehova uZimenu.+ 26 Akukafuzi nilethe ngendlinenu nanyana yini uZimu ayihloyako khona angazonitjhabalalisa nezintwezo. Kufuze nizihloye ngeenhliziyo zenu zoke, kufuze zitjhatjalaliswe.

8 “Kufuze niyilalelisise kuhle yoke imiyalo enginiyala ngayo namhlanjesi, khona nizakuragela phambili niphila,+ nibe banengi begodu nikhambe niyokuthatha inarha uJehova afunga ukuyinikela abokhokho benu.+ 2 Khumbulani indlela ede uJehova uZimenu anenza nayikhamba iminyaka ema-40 emmangweni+ bona anenze nithobeke bewanilinga+ bona azi okuseenhliziyweni zenu+ nokuthi nizoyilalela imiyalwakhe namkha angekhe. 3 Wanenza nathobeka, wanilisa nabulawa yindlala,+ wanipha imana+ eningayaziko naboyihlo ebebangayazi bona nazi ukuthi umuntu akaphili ngoburotho bodwa kodwana uphila nangamezwi aphuma emlonyeni kaJehova.+ 4 Iminyaka ema-40 le, izambatho zenu akhenge zirathuke neenyawo zenu akhenge zivuvuke.+ 5 Nazi kuhle ukuthi njengobaba nakakhalima indodanakhe noJehova uZimenu bekasolo anikhalima.+

6 “Kufuze nilalele imiyalo kaJehova uZimenu ngokukhamba eendleleni zakhe benimsabe. 7 UJehova uZimenu uniletha enarheni ehle,+ inarha egeleza amanzi nemithombo egeleza emrhobeni othabaleleko nesifundeni seentaba, 8 enarheni yekoroyi nebhali, enarheni yamadiribe nemithi yamafeyi namarharinada,+ enarheni yamafutha we-oliva neliju,+ 9 enarheni kuzokuba nokudla okunengi angekhe nitlhoge litho, enarheni amatje wakhona anesimbi neentabeni zakhona nizokwemba ikhopha.

10 “Nasele nidlile benaneliseka, kufuze nidumise uJehova uZimenu ngenarha ehle aniphe yona.+ 11 Tjhejani, ningamkhohlwa uJehova uZimenu ngokungalaleli imiyalwakhe nemithethwakhe enginiyala ngayo namhlanjesi. 12 Nasele nidlile naneliseka, nakha izindlu ezihle benahlala kizo,+ 13 lokha iinkomo zenu nezimvu zenu nasele zandile, isiliva negolide lenu selilinengi nalokha nasele ninezinto ezinengi, 14 ningazikhukhumezi+ begodu ningamkhohlwa uJehova uZimenu owanikhupha enarheni yeGibhide lapha benigqilazwa khona,+ 15 owanenza nakhamba emmangweni omkhulu nosabekako, endaweni eyomileko nenganamanzi,+ eneenyoka ezinetjhefu nabofezela. Wanikhuphela amanzi edwaleni,+ 16 wanipha imana emmangweni,+ aboyihlo ebebangayazi, wanenza nathobeka+ bewanilinga bona niphile kamnandi esikhathini esizako.+ 17 Nawungathi ehliziywenakho, ‘Umnono lo ngiwufumene ngamandlami nangekghono lami,’+ 18 khumbulani bona nguJehova uZimenu onipha amandla wokufumana umnono+ bona azalise isivumelwano asifunga kibokhokho benu, njengombana kunjalo namhlanjesi.+

19 “Naningamlibala uJehova uZimenu nilandele abanye abozimu, nibalotjhe benibakhothamele, ngiyaniyelelisa namhlanjesi bona nizokutjhabalala.+ 20 Nizokutjhabalala njengeentjhaba uJehova uZimenu azitjhabalalisa phambi kwenu ngombana akhenge nilalele ilizwi lakaJehova uZimenu.+

9 “Lalelani, nina ma-Israyeli, namhlanjesi niyama iJordani+ niyokuthatha inarha yeentjhaba ezikulu nezinamandla kunani,+ amadorobho amakhulu navikeleke ngemithangala emide efika ezulwini,+ 2 abantu abanamandla nabade, amadodana ka-Anakhi+ enaziko ngabo nenezwa kuthiwa ngabo, ‘Ngubani ongalwa namadodana ka-Anakhi?’ 3 Nje-ke kufuze nazi ukuthi ngelangeli uJehova uZimenu uzokukhamba phambi kwenu.+ Umlilo otjhabalalisako+ begodu uzobatjhabalalisa. Uzobatjhabalalisa phambi kwamehlwenu bona nibaqothe benibatjhabalalise msinyana, njengombana uJehova athembisile.+

4 “Lokha uJehova nakabaqotha phambi kwenu, akukafuzi nithi eenhliziyweni zenu, ‘UJehova usilethe enarheni le bona ibe lilifa lethu ngombana silungile.’+ UJehova uqotha abantwaba phambi kwenu+ ngebanga lokukhohlakala kwabo. 5 Anizokuthatha inarha le bona ibe ngeyenu ngebanga lokuthi nilungile namkha nithembekile. Kunalokho uJehova uqotha iintjhabezi phambi kwenu+ ngebanga lokukhohlakala kwazo nokuthi enze lokho uJehova akufunga kibokhokho benu u-Abrahama,+ u-Isaka+ noJakopo.+ 6 Kufuze nazi ukuthi uJehova uZimenu akaniphi inarha ehle le ngebanga lokulunga kwenu ngombana nibabantu abanekani.+

7 “Nikhumbule indlela enasilinga ngayo uJehova uZimenu emmangweni.+ Navukela uJehova kusukela ngelanga enaphuma ngalo enarheni yeGibhide benifike enarheni le.+ 8 NeRhorebe nasilinga uJehova begodu uJehova wasilingeka khulu wabe wafuna ukunitjhabalalisa.+ 9 Lokha nangikhuphukela entabeni ngiyokuthatha amatje+ wesivumelwano uJehova asenza nani,+ ngahlala amalanga ama-40 nobusuku obuma-40+ ngingadli begodu ngingaseli amanzi. 10 UJehova wanginikela amatje amabili atlolwe ngesandla sakhe,* kiwo bekutlolwe woke amezwi uJehova awakhuluma kini entabeni emlilweni ngelanga ebenihlangene ngalo.+ 11 Ekupheleni kwamalanga ama-40 nobusuku obuma-40 uJehova wanginikela amatje amabili wesivumelwano, 12 uJehova wathi kimi, ‘Sikima wehle msinya ngombana abantu bakho owabakhupha eGibhide benze ngokukhohlakala.+ Baphambuke msinya endleleni engabayala bona bakhambe kiyo. Bazenzele isithombe sesimbi.’+ 13 UJehova wathi kimi, ‘Ngibabonile abantwaba ukuthi baneenhloko eziqinileko!+ 14 Ngivumela ngibatjhabalalise ngenze igama labo lingasakhunjulwa ephasini begodu ngenze wena ube sitjhaba esinamandla nesikhulu ukudlula bona.’+

15 “Nje-ke ngehla entabeni, intaba ivutha+ ngiphethe amatje amabili wesivumelwano.+ 16 Ngathi nangiqalako ngabona ukuthi nonile kuJehova uZimenu! Nizenzele ikonyana lesimbi.* Niphambuke msinya endleleni uJehova aniyala bona nikhambe kiyo.+ 17 Ngawathatha amatje amabili lawo ngawalahlela phasi, aphuka phambi kwenu.+ 18 Nje-ke ngakhothama phambi kwakaJehova njengekuthomeni, amalanga ama-40 nobusuku obuma-40. Akhenge ngidle namkha ngisele amanzi+ ngebanga lazo zoke izono enizenzileko ngokwenza okukhohlakeleko phambi kwakaJehova benamsilinga. 19 Bengithukwe khulu ngebanga lokuthi uJehova bekasilingekile ngani,+ alungele ukunitjhabalalisa. Nanyana kunjalo, uJehova wangilalela godu.+

20 “UJehova wasilingeka ngebanga laka-Aroni kangangobana besele alungele ukumtjhabalalisa+ kodwana ngathandaza kuZimu ngabawa bona angamtjhabalalisi u-Aroni. 21 Ngathatha ikonyana+ elanibangela bona nenze isono ngalitjhisa emlilweni, ngaliphihliza, ngaligaya laba yiputjhana bengayirhatjha emlanjeni egade ugeleza usuka entabeni.+

22 “ETabhera,+ eMasa+ neKhibrothi-Hatava+ nasilinga uJehova godu. 23 UJehova nakanithuma nisuka eKhadetjhi-Bharineya+ wathi kini, ‘Khambani niyokuthatha inarha engafunga bona ngizoninikela yona!’ Navukela umyalo kaJehova uZimenu+ godu, akhenge nikholwe+ kuye begodu akhenge nimlalele. 24 Solo ngathoma ukunazi benivukela uJehova.

25 “Ngasolo ngikhothama phambi kwakaJehova amalanga ama-40 nobusuku obuma-40,+ ngakhothama ngendlela le ngombana uJehova bekathe uzonitjhabalalisa. 26 Ngathoma ukunibawela kuJehova ngathi, ‘Jehova Kosi ePhakemeko, ungabatjhabalalisi. Balilifa lakho owalihlenga ngamandlakho,+ wabakhupha eGibhide ngesandla sakho esinamandla.+ 27 Khumbula iinsebenzi zakho u-Abrahama, u-Isaka noJakopo.+ Ungakutjheji ukuba nekani kwabantwaba, ukukhohlakala kwabo nesono sabo.+ 28 Nakungasinjalo, abantu benarha owasikhupha kiyo bangathi: “UJehova ubhalelwe ukungenisa abantwaba enarheni abathembise yona ngombana wabahloya, wabakhupha bona azobabulalela emmangweni.”+ 29 Bababantu bakho, ilifa lakho,+ wabakhupha ngamandlakho amakhulu nangomkhonwakho onamandla.’+

10 “Ngesikhatheso uJehova wathi kimi, ‘Baza amatje amabili asipara anjengewokuthoma,+ ukhuphukele kimi entabeni uzenzele nomfaji ngeengodo. 2 Ngizokutlola ematjeni lawo amezwi ebekatlolwe ematjeni wokuthoma, owawaphulako, kufuze uwafake ngemfajini.’ 3 Ngenza umfaji ngeengodo zomunga, ngabaza amatje amabili aba njengewokuthoma, ngakhuphukela entabeni ngiphethe amatje amabili.+ 4 Watlola ematjeni amezwi awatlola ematjeni wokuthoma+ okuMiyalo eliTjhumi+ uJehova anitjela yona entabeni emlilweni+ ngelanga ebenihlangene ngalo,+ uJehova wanginikela wona. 5 Nje-ke ngehla entabeni,+ ngathatha amatje engiwabazileko ngawafaka ngemfajini, ahlala lapho njengombana uJehova angiyalile.

6 “Ama-Israyeli asuka eBherothi Bheni-Jakhani aya eMosera. U-Aroni wahlongakala bewabulungelwa lapho,+ indodanakhe u-Elazara yaba mphristi esikhundleni sakhe.+ 7 Asuka lapho aya eGudigoda, asuka eGudigoda aya eJothibata,+ inarha enemilanjana.

8 “Ngesikhatheso uJehova wahlukanisa ikoro yamaLevi+ bona ithwale umfaji wesivumelwano sakaJehova,+ ijame phambi kwakaJehova imenzele umsebenzi, ibusise ngegama lakhe+ njengombana yenza namhlanjesi. 9 Kungebangelo amaLevi angakanikelwa isabelo namkha ilifa hlangana nabafowabo. UJehova ulilifa lawo njengombana uJehova uZimenu atjho kiwo.+ 10 Mina ngahlala entabeni amalanga ama-40 nobusuku obuma-40+ njengombana ngenza phambilini, uJehova wangilalela godu.+ UJehova bekangafuni ukunitjhabalalisa. 11 UJehova wathi kimi, ‘Khamba phambi kwabantu, ubalungiselele indlela khona bazakukhamba bathathe inarha engafunga kibokhokho babo bona ngizobanikela yona.’+

12 “Nje-ke nina ma-Israyeli, khuyini uJehova uZimenu ayibawa kini?+ Ngilokhu kwaphela: Kufuze nisabe uJehova uZimenu,+ nikhambe eendleleni zakhe zoke,+ nimthande, nilotjhe uJehova uZimenu ngeenhliziyo zenu zoke nangemiphefumulwenu* yoke,+ 13 nilalele imiyalo nemithetho kaJehova enginiyala ngayo namhlanjesi bona kunikhambele kuhle.+ 14 Izulu nakho koke okukilo nephasi nakho koke okukilo ngekwakaJehova uZimenu.+ 15 Kodwana uJehova watjhidela kibokhokho benu kwaphela begodu wabathanda, wakhetha nina nzukulwana zabo+ hlangana nabantu boke njengombana kunjalo namhlanjesi. 16 Kufuze nihlanze iinhliziyo zenu,+ nilise ukuba nekani.+ 17 UJehova uZimenu nguZimu wabozimu,+ yiKosi yamakhosi, nguZimu omkhulu, onamandla nosabekako, ophatha abantu ngokungakhethululi+ begodu akathathi isifumbathiso. 18 Wahlulela intandani nomhlolokazi ngobulungiswa+ begodu uthanda umuntu ovela kwenye inarha,+ umnikela ukudla nezambatho. 19 Nani kufuze nithande umuntu ovela kwenye inarha ngombana nakhe nahlala enarheni ekungasi ngeyenu eGibhide.+

20 “Kufuze nisabe uJehova uZimenu, nimlotjhe,+ ninamathele kuye begodu nifunge ngegama lakhe. 21 Nguye okufuze nimdumise.+ NguZimenu, onenzele zoke izinto ezikulwezi nezisabekako enizibone ngamehlwenu.+ 22 Abokhokho benu nabehlela eGibhide+ bebama-70, kwanjesi uJehova uZimenu unenze naba banengi njengeenkwekwezi.+

11 “Kufuze nithande uJehova uZimenu+ begodu nihlale nikhumbula isifungo senu sokulalela imithetho, iinqophiso nemiyalwakhe. 2 Namhlanjesi ngikhuluma nani, ingasi amadodanenu angasaziko nangakhenge asibone isijeziso esivela kuJehova uZimenu,+ angakhenge abone amandlakhe, isandla sakhe esinamandla+ nomkhonwakhe onamandla.+ 3 Akhenge awabone amatshwayo nezenzo zakhe azenza eGibhide ekosini uFaro nenarhenakhe yoke;+ 4 namkha lokho akwenza emabuthweni weGibhide, eenjomaneni zakaFaro neenkaraneni zepi ezagutjuzeswa mamanzi weLwandle eliBomvu lokha amaGibhide nakanigijimisako, uJehova wawatjhabalalisa kwaba kanye.+ 5 Akhenge akubone anenzele khona emmangweni bekube kulapho nifika endaweni le, 6 namkha lokho akwenza phambi kwama-Israyeli, kuDatani no-Abiramu, amadodana ka-Eliyabu indodana kaRubeni, lokha iphasi nalivulekako labaginya, bona, imindenabo, amatendabo nakho koke okuphilako ebekubalandela.+ 7 Amehlwenu abona zoke izenzo ezikulu ezenziwa nguJehova.

8 “Kufuze nilalele yoke imiyalo engininikela yona namhlanjesi bona nibe namandla beniyamele enarheni enizoyithatha bona ibe ngeyenu, 9 khona nizakuphila isikhathi eside+ enarheni uJehova afunga ukuyinikela abokhokho benu neenzukulwana zabo,+ inarha egeleza ibisi neliju.+

10 “Inarha eniyoyithatha bona ibe ngeyenu ayifani nenarha yeGibhide lapha niphuma khona, eGibhide benijayele ukutjala imbewenu begodu nisebenze budisi bona niyithelelele njengalokha nanithelelela isimenu yemirorho. 11 Kodwana inarha eniyamela kiyo bona niyoyithatha, yinarha yeentaba nemirhoba ethabaleleko.+ Ithelelelwa mamanzi wezulu;+ 12 Yinarha etlhogonyelwa nguJehova uZimenu. UJehova uhlala ayitjhejile kusukela ekuthomeni komnyaka bekube sekupheleni kwawo.

13 “Nange niyilalela kuhle imiyalwami enginiyala ngayo namhlanjesi begodu nithande uJehova uZimenu benimlotjhe ngeenhliziyo zenu zoke nangemiphefumulwenu* yoke,+ 14 ngizokunisa izulu enarhenenu ngesikhathi esifaneleko, izulu lesiruthwana nezulu letwasahlobo, nizokubuthelela isivuno senu seenthoro, iwayini lenu elitjha namafuthenu.+ 15 Ngizokwenza kumile utjani emasiminenu khona ifuywenu izakudla, nani nidle benaneliseke.+ 16 Tjhejani, ningavumeli iinhliziyo zenu zilingeke bona niphambuke nilotjhe abanye abozimu benibakhothamele.+ 17 Nakungasinjalo uJehova uzokusilingeka ngebanga lenu, avale izulu lingasani nenarha ingasatheli,+ nizokutjhabalala msinya enarheni uJehova aninikela yona.+

18 “Amezwi la kufuze niwafake eenhliziyweni zenu beniphile ngawo, niwabophe ezandleni zenu njengesikhumbuzo, kufuze abe njengebhande lehloko eempandla zenu.+ 19 Niwafundise abantwabenu, niwakhulume nanihlezi eendlini zenu, nanikhamba endleleni, nanilalako nalokha nanivukako.+ 20 Niwatlole emagosenini wezindlu zenu nemasangwenenu, 21 khona amadodanenu azakuphila isikhathi eside+ enarheni uJehova afunga ukuyinikela abokhokho benu,+ ikani izulu nephasi nazisesekhona.*

22 “Nanilalelisisa umyalo engininikela wona lo begodu niwenze, nithande uJehova uZimenu,+ nikhambe kizo zoke iindlela zakhe, ninamathele kuye,+ 23 UJehova uzoziqotha zoke iintjhabezi phambi kwenu+ begodu nizokuthatha iinarha zeentjhaba ezinamandla nezinabantu abanengi ukudlula nina.+ 24 Yoke inarha enigadanga kiyo izokuba ngeyenu.+ Umkhawulwenu uzokusukela emmangweni ukuyokufika eLibhanoni, kusukela eMlanjeni iYufrathe ukuyokufika elwandle* elingetjingalanga.+ 25 Akunamuntu ozokujamelana nani.+ UJehova uZimenu uzokwenza boke abantu benarheni enidlula kiyo banisabe,+ njengombana anithembisa.

26 “Qalani, namhlanjesi ngibeka phambi kwenu isibusiso nesiqalekiso:+ 27 Nizokufumana isibusiso nanilalela imiyalo kaJehova uZimenu enginiyala ngayo namhlanjesi,+ 28 nizokufumana isiqalekiso naningalaleli imiyalo kaJehova uZimenu,+ naniphambuka endleleni enginiyala bona nikhambe ngayo namhlanjesi begodu nalokha nanilandela abozimu eningabaziko.

29 UJehova uZimenu nakaniletha enarheni bona niyithathe ibe ngeyenu, kufuze nibusise abantu eNtabeni iGerizimu, niqalekise abantu eNtabeni i-Ebali.+ 30 Bangakwelinye ihlangothi leJordani ukuya ngetjingalanga, enarheni yamaKanana ahlala e-Araba, eqalene neGiligali hlanu kwemithi emikhulu yeMore.+ 31 Ngombana niyama iJordani, niyokuthatha inarha uJehova uZimenu aninikela yona.+ Nanithatha inarha benihlale kiyo, 32 kufuze nitjheje benilandele zoke iinqophiso nemithetho enginitjela yona namhlanjesi.+

12 “Lezi ziinqophiso nemithetho okufuze niyilandele kikho koke ukuphila kwenu enarheni uJehova uZimu wabokhokho benu azoninikela yona. 2 Kufuze nitjhabalalise zoke iindawo lapha iintjhaba enizozithatha zilotjhela khona abozimu bazo,+ kungaba seentabeni eziphakamileko namkha emibundwini namkha ngaphasi kwananyana ngimuphi umuthi omkhulu. 3 Kufuze niphadlhe ama-aldarazo, niphadlhe iinsika zazo ezicwengileko,+ nitjhise iingodo zazo ezicwengileko,* niphadlhe neenthombe ezibaziweko zabozimu bazo,+ nitjhabalalise amagamabo endaweni leyo.+

4 Akukafuzi nilotjhe uJehova uZimenu ngendlela le.+ 5 Kunokuthi nenze njalo, khambani niye endaweni uJehova uZimenu ayikhethileko bona igama lakhe lihlale kiyo nalapho ahlala khona hlangana neenkoro zenu, nimlotjhe lapho.+ 6 Kulapho nizokuletha khona iminikelwenu etjhiswako,+ imihlatjelwenu, kwetjhumi kwenu,+ iminikelwenu+ yesifungo, iminikelwenu esuka ehliziyweni+ nezibulo lekomo namkha lemvu, nanyana yini enifuna ukuyinikela.+ 7 Nina nemindenenu kufuze nidlele lapho phambi kwakaJehova uZimenu+ begodu nithabele yoke into eniyenzileko+ ngombana uJehova uZimenu unibusisile.

8 “Akukafuzi nenze lokho esikwenza lapha namhlanjesi, omunye nomunye uzenzela umathanda, 9 ngombana anikafiki endaweni yokuphumula+ begodu anikalifumani ilifa uJehova uZimenu aninikela lona. 10 Naniyama iJordani+ niyokuhlala enarheni uJehova uZimenu aninikela yona, uzonenza niphumule emanabenenu begodu nizokuhlala nivikelekile.+ 11 Nizokuletha koke enginiyala ngakho endaweni uJehova uZimenu ayikhethileko bona igama lakhe lihlale kiyo,+ nizokuletha iminikelwenu etjhiswako, imihlatjelwenu, kwetjhumi kwenu,+ yoke iminikelwenu yesifungo enifunge ukuyinikela uJehova, nanyana yini enifuna ukuyinikela. 12 Nizokuthaba phambi kwakaJehova uZimenu,+ nina, amadodanenu, amadodakazenu, iingqila zenu eziduna nezisikazi nomLevi ohlala emadorobhenenu ngombana akakanikelwa isabelo namkha ilifa hlangana nani.+ 13 Kufuze nitjheje ninganikeli iminikelwenu etjhiswako kinanyana ngiyiphi indawo eniyibonako.+ 14 Kufuze ninikele iminikelwenu etjhiswako kwaphela endaweni ekhethwe nguJehova ezokuba kesinye seemfunda seenkoro zenu, kulapho okufuze nenze koke enginiyala ngakho.+

15 “Nanikhanukela inyama, ningahlaba nidle+ ngokuvumelana nesibusiso uJehova uZimenu anibusise ngaso kiwo woke amadorobhenu. Umuntu ongakahlwengeki nohlwengekileko bangayidla, njengalokha nanidla iqina namkha ihlangumataka. 16 Kodwana akukafuzi nidle iingazi;+ kufuze nizithululele phasi njengamanzi.+ 17 Angekhe nivunyelwe ukudlela emadorobhenenu, kwetjhumi kweenthoro zenu, iwayini lenu elitjha, amafuthenu, izibulo leenkomo zenu nezibulo lezimvu zenu+ namkha nanyana ngimuphi umnikelo wesifungo enifunga ngawo, iminikelwenu esuka ehliziyweni namkha nanyana yini eninikela ngayo. 18 Izintwezi nizozidlela phambi kwakaJehova uZimenu endaweni ekhethwe nguJehova uZimenu,+ nina, amadodanenu, amadodakazenu, isisebenzi senu esiduna nesisikazi nomLevi ohlala emadorobhenenu; kufuze nithabe phambi kwakaJehova uZimenu kikho koke enikwenzako. 19 Kufuze nitjheje ningakhohlwa umLevi+ nanisahlala enarhenenu.

20 “UJehova uZimakho nakakwandisela inarha+ njengombana akuthembisile+ begodu uthi, ‘ngikhanukele inyama,’ ungayidla inyama nanyana kunini nawuyikhanukeleko.+ 21 Nange indawo uJehova uZimenu ayikhethileko bona igama lakhe+ lihlale khona ikude nani, kufuze nihlabe enye yeenkomo zenu namkha izimvu zenu uJehova aniphe zona njengombana nginiyalile, kufuze niyidlele phakathi kwamadorobhenu nanyana kunini naniyikhanukelako. 22 Ningayidla njengalokha nanidla iqina namkha ihlangumataka;+ umuntu ongakahlwengeki nohlwengileko bangayidla. 23 Kufuze niqiniseke bona ningadli iingazi+ ngombana iingazi zikuphila,+ akukafuzi nidle inyama eneengazi. 24 Akukafuzi nizidle. Kufuze nizithululele phasi njengamanzi.+ 25 Akukafuzi nizidle khona kuzanikhambela kuhle nabantwana benu, ngombana nizabe nenza okulungileko kuJehova. 26 Kufuze nithathe kwaphela izinto ezicwengileko okungezenu, neminikelwenu yesifungo lokha naniya endaweni uJehova azoyikhetha. 27 Nanilapho nizokunikela iminikelwenu etjhiswako, inyama neengazi+ e-aldareni lakaJehova uZimenu, iingazi zemihlatjelwenu kufuze nizithele eqadi kwe-aldara+ lakaJehova uZimenu kodwana inyama ningayidla.

28 “Tjhejani bona niwalalela woke amezwi enginiyale ngawo, khona kuzanikhambela kuhle nina namadodanenu ngombana nenza okuhle nokulungileko phambi kwakaJehova uZimenu.

29 “UJehova uZimenu nakatjhabalalisa iintjhaba eniyokuthatha iinarha zazo+ begodu nihlale eenarhenezo, 30 tjhejani bona ningalandeli iindlela zazo ngemva kobana zitjhatjalalisiwe phambi kwenu. Ningabuzi ngabozimu bazo nithi, ‘Iintjhabezi bezibalotjha njani abozimu bazo? Nathi sizokwenza okufanako.’+ 31 Akukafuzi nenzele uJehova uZimenu lokhu, ngombana iintjhabezi zenzela abozimu bazo zoke izinto ezinyenyisako kuJehova, zitjhisela nabozimu bazo amadodanazo namadodakazazo.+ 32 Woke amezwi enginiyala ngawo kufuze nizimisele ukuwalalela.+ Akukafuzi niphungule namkha ningezelele.+

13 “Nange kuvela hlangana nani umphorofidi namkha umuntu obikezela ngengomuso asebenzisa amabhudango, akunikele itshwayo namkha isibonakaliso, 2 itshwayelo namkha isibonakalisweso akhulume ngaso senzeke njengombana asakhuluma nawe athi, ‘Asikhambe siyokulotjha abanye abozimu,’ abozimu ongakhenge ubazi, ‘asikhambe siyobalotjha,’ 3 ningawalaleli amezwi womphorofidi loyo namkha womuntu obikezela ngengomuso asebenzisa amabhudango,+ ngombana uJehova uZimenu uyanilinga+ bona abone ukuthi nimthanda ngeenhliziyo zenu zoke nangemiphefumulwenu* yoke uJehova uZimenu.+ 4 Kufuze nilandele uJehova uZimenu, nimsabe, nilalele imiyalwakhe, nilalele ilizwi lakhe, nguye okufuze nimlotjhe begodu ninamathele kuye.+ 5 Umphorofidi loyo namkha umuntu obikezela ngengomuso asebenzisa amabhudango, kufuze abulawe+ ngombana ukhuthaza ukuvukela uJehova uZimenu owanikhupha enarheni yeGibhide, wanihlenga lapha benigqilazeka khona, uniphambukisa endleleni uJehova uZimenu aniyale bona nikhambe ngayo. Kufuze nisuse okukhohlakeleko hlangana nani.+

6 “Nange umfowenu namkha indodanakho namkha indodakazakho namkha umkakho omthandako namkha umnganakho alinge ukukuyenga ngemsitheleni athi, ‘Asikhambe siyokulotjha abanye abozimu,’+ abozimu ongabaziko nabokhokho bakho abangabaziko, 7 ukusukela kibozimu babantu abanibhodileko, kungaba seduze nani namkha abakude nani, kusukela emkhawulweni wenarha ukuya komunye, 8 akukafuzi uvumelane naye, umlalele,+ uzwelane naye namkha umvikele; 9 Kunalokho, kufuze umbulale nya.+ Uzokuba ngewokuthoma ukumkghadlha ngamatje umbulale, ngemva kwalokho kuzokulandela boke abantu.+ 10 Kufuze nimkghadlhe ngamatje afe,+ ngombana bekafuna ukuniphambukisa kuJehova uZimenu owanikhupha eGibhide lapha benigqilazeka khona. 11 Woke ama-Israyeli azokuzwa ngakho asabe, angeze asathoma enze nanyana yini embi njengale hlangana nani.+

12 “Nange nizwa kwelinye lamadorobho uJehova uZimenu aninikela lona bona nihlale kilo kukhulunywa ngalokhu, 13 ‘Amadoda angasizi ngalitho aphume hlangana nani ayokuphambukisa abantu bedorobheni, athi: “Asikhambeni siyokulotjha abanye abozimu,” abozimu eningabaziko,’ 14 kufuze niyiqalisise indaba le, nifunisise begodu nibuze ngayo.+ Nangabe kuyaqinisekiswa bona into enyenyisako le yenziwe hlangana nani, 15 kufuze nibulale abantu bedorobhenelo ngesabula.+ Nitjhabalalise idorobhelo ngesabula nakho koke okukilo kuhlanganise nefuyo yakhona.+ 16 Kufuze nithathe zoke izinto zakhona eziligugu ezisetatawini lakhona nitjhise idorobhelo, izinto zakhona eziligugu zizokuba mnikelo oya kuJehova uZimenu. Lizokuhlala limarubhi. Akukafuzi livuselelwe. 17 Akukafuzi nithathe litho okufuze litjhatjalaliswe,+ khona uJehova azokulisa ukusilingeka anirhawukele, abe nomusa begodu anenze nibe banengi, njengombana afunga kibokhokho benu.+ 18 Kufuze nilalele uJehova uZimenu nilandele yoke imiyalwakhe enginiyala ngayo namhlanjesi, ngokwenza lokhu nizabe nenza okulungileko kuJehova uZimenu.+

14 “Nimadodana kaJehova uZimenu. Ningazisiki namkha nizigude*+ ngebanga lomuntu ohlongakeleko.+ 2 Ngombana nibabantu abacwengileko+ kuJehova uZimenu begodu uJehova unikhethile bona nibe babantu bakhe, abantu bakhe abakhethekileko* kizo zoke iintjhaba ezisephasini.+

3 “Ningadli nanyana yini enyenyisako.+ 4 Lezi ziinlwana eningazidla:+ Ikunzi, imvu, imbuzi, 5 ihlangumataka, iqina, itsephe, imbuzi yommango, ipofu, imvu yommango nemvu yentaba. 6 Nanyana ngiziphi iinlwana ezihlukanisa iinqatha kabili begodu ezetjisako ningazidla. 7 Akukafuzi nidle iinlwana ezilandelako ezetjisako namkha ezihlukanisa iinqatha kabili: Ikamela, umqasa nembila ngombana ziyetjisa kodwana azihlukanisi iinqatha kabili. Zisilaphele kini.+ 8 Ifarigi ngombana ihlukanisa iinqatha kabili kodwana ayetjisi. Isilaphele kini. Akukafuzi nidle inyamazo namkha nithinte iindumbu zazo.

9 “Eenlwaneni ezihlala ngemanzini, ngilezi eningazidla: Nanyana ngiziphi iinlwana ezineengwedlo neempepha ningazidla.+ 10 Nanyana ngiziphi iinlwana ezinganangwedlo neempepha, akukafuzi nizidle. Zisilaphele kini.

11 “Ningadla nanyana ngiyiphi inyoni ehlwengileko. 12 Kodwana akukafuzi nidle iinyoni ezilandelako: Ikhozi, ikhozi elidla iinhlambi, idlanga elinzima,+ 13 ikhozi elibomvu, ikhozi elinzima nayo yoke imihlobo yamakhozi, 14 yoke imihlobo yamagubulu, 15 inciliba, isikhova, inyoni yelwandle nayo yoke imihlobo yamakhozi, 16 isikhova esincani, isikhova esineendlebe ezide, idada, 17 iphelikheni, idlanga, ikhomoranti,* 18 udoyi, yoke imihlobo yamakhwalimanzi, inukani nomaphelaphelani. 19 Zoke iinunwana ezinamaphiko zisilaphele kini. Akukafuzi nizidle. 20 Nanyana ngiziphi iinlwana eziphaphako ezihlwengileko ningazidla.

21 “Akukafuzi nidle isilwana enisifumene sifile.+ Kufuze nisinikele umuntu ovela kwenye inarha ohlala emadorobhenenu, angasidla, namkha nisithengisele umuntu ovela kwenye inarha. Ngombana nina nibabantu abacwengileko kuJehova uZimenu.

“Akukafuzi nibilise inyama yembuzana ngebisi lakanina.+

22 “Kufuze nikhuphe kwetjhumi kwaso soke isivuno senu umnyaka nomnyaka.+ 23 Kufuze nidle kwetjhumi kweenthoro zenu, iwayini lenu elitjha, amafuthenu, izibulo leenkomo nezibulo lezimvu zenu phambi kwakaJehova uZimenu endaweni ayikhethileko bona igama lakhe lihlale kiyo,+ khona nizakufunda ukuhlala nisaba uJehova uZimenu.+

24 “Nange indawo uJehova uZimenu azoyikhetha bona igama lakhe lihlale kiyo+ ikude nani begodu ikhambo lenu liba lide, ngombana uJehova uZimenu anibusisile ningasakghoni ukuthwala izintwezi, 25 kufuze nizithengise, imali yakhona niyifake ngesikhwameni, nikhambe niye endaweni uJehova uZimenu azoyikhetha. 26 Ngemali leyo ningathenga nanyana yini eniyifunako, iinkomo, izimvu, iimbuzi, iwayini notjwala; nizozidlela lapho phambi kwakaJehova uZimenu begodu nithabe, nina nemindenenu.+ 27 Ningamlahli umLevi ohlala emadorobhenenu,+ ngombana akakanikelwa isabelo namkha ilifa hlangana nani.+

28 “Qobe ekupheleni kweminyaka emithathu, kufuze nilethe kwetjhumi kwesivuno senu somnyaka loyo nisifake emadorobhenenu.+ 29 Nje-ke umLevi ongakanikelwa isabelo namkha ilifa hlangana nani, umuntu ovela kwenye inarha, intandani nomhlolokazi abahlala emadorobhenenu bazokuza bazokudla,+ khona uJehova uZimenu azonibusisa kikho koke enikwenzako.+

15 “Qobe ekupheleni kweminyaka elikhomba, kufuze nisule iinkolodo.+ 2 Nasi indlela enizokwenza ngayo lokhu: Omunye nomunye umuntu okolodwako uzokutjhaphulula umakhelwanakhe esikolodweni sakhe. Akukafuzi nifune ukubhadelwa ngumakhelwanenu namkha umfowenu, ngombana isikolodwesi sisuliwe phambi kwakaJehova.+ 3 Ungayifuna imalakho emuntwini ovela kwenye inarha+ kodwana kufuze usisule isikolodo somfowenu sananyana yini akukoloda yona. 4 Akekho okufuze atlhage hlangana nani ngombana uJehova uzonibusisa+ enarheni uJehova uZimenu aninikela yona bona ibe ngeyenu, 5 kodwana lokhu kuzokwenzeka nange nilalelisisa ilizwi lakaJehova uZimenu, nenze yoke imiyalo enginiyala ngayo namhlanjesi.+ 6 UJehova uZimenu uzonibusisa njengombana anithembisile, nizokuboleka iintjhaba ezinengi imali kodwana nina ngekhe kutlhogeke bona niboleke kizo,+ nizokubusa iintjhaba ezinengi kodwana zona ngekhe zinibuse.+

7 “Nange omunye umfowenu atlhaga hlangana nani emadorobheni uJehova uZimenu aninikela wona, kufuze nimzwele, nibe nesandla esivulekileko, niphe umfowenu otlhagileko.+ 8 Kufuze umuphe ngesandla esivulekileko+ begodu umboleke nanyana yini ayitlhogako namkha anganayo. 9 Kufuze nitjheje ningabi nombono okhohlakeleko lo eenhliziyweni zenu nithi, ‘Umnyaka wekhomba, umnyaka wokusulwa kweenkolodo utjhidele,’+ ngebangelo ningasizi umfowenu otlhagako namkha nimuphe akutlhogako. Uzokubiza uJehova amtjele enimenze khona begodu nizokuba mlandu.+ 10 Kufuze nimuphe ngesandla esivulekileko,+ ningezwa ubuhlungu eenhliziyweni zenu nanimuphako, kungebangeli uJehova uZimenu azonibusisa kikho koke enikwenzako.+ 11 Abantu abatlhagileko bazokuhlala bakhona enarheni.+ Kungebangelo nginiyala ngithi kini, ‘Kufuze nibe nesandla esivulekileko niphe umfowenu otlhagileko enarhenenu.’+

12 “Nange uthengiselwe umfowenu, indoda emHebheru namkha umfazi omHebheru begodu akusebenzele iminyaka esithandathu, emnyakeni wekhomba kufuze umtjhaphulule.+ 13 Nange umtjhaphulula, ungamkhambisi anganalitho. 14 Kufuze nimuphe okuthileko emhlambinenu, eselelweni senu, emafutheni newayinini lenu. Njengombana uJehova uZimenu anibusisile, nani kufuze nimuphe. 15 Khumbulani bona naba ziingqila enarheni yeGibhide, uJehova uZimenu wanihlenga. Kungebangelo nginiyala bona nenze lokhu namhlanjesi.

16 “Kodwana nange athi kuwe, ‘Angizukusuka kuwe!’ ngebanga lokuthi uyakuthanda wena nomndenakho begodu bekakuthabela ukukusebenzela,+ 17 kufuze umsamise emnyango bese uthathe isungulu umthumbuse indlebe, uzokuba sigqila sakho ngokungapheliko. Kufuze wenze okufanako nesigqilakazini sakho. 18 Akungabi budisi kuwe ukumtjhaphulula bona akhambe ngombana umsebenzi akwenzele wona iminyaka esithandathu ulingana nomrholo wesisebenzi esiqatjhiweko ngokubuyelelwe kabili begodu uJehova uZimakho ukubusisile kikho koke okwenzileko.

19 “Kufuze nicwengisele uJehova uZimenu woke amazibulo aduna weenkomo zenu newezimvu zenu.+ Akukafuzi nenze nanyana ngimuphi umsebenzi ngamazibulo weenkomo zenu namkha nirhune amazibulo wezimvu zenu. 20 Nina nemindenenu kufuze niwadlele phambi kwakaJehova uZimenu qobe mnyaka endaweni uJehova azoyikhetha.+ 21 Kodwana nange irholophele, kungaba kukuthi iyahluza, ayiboni namkha nanyana ngikuphi ukurholophala, akukafuzi nenze ngayo umhlatjelo kuJehova uZimenu.+ 22 Kufuze nizidlele ngaphakathi kwamadorobhenu, umuntu ongakahlwengeki nohlwengileko bangazidla njengalokha nanidla iqina namkha ihlangumataka.+ 23 Kodwana iingazi zazo akukafuzi nizidle;+ kufuze nizithululele phasi njengamanzi.+

16 “Ningayikhohlwa inyanga ka-Abibi,* gidingelani uJehova uZimenu+ iPhasika, ngombana ngenyanga ka-Abibi uJehova uZimenu wanikhupha eGibhide ebusuku.+ 2 Kufuze nenzele uJehova uZimenu umhlatjelo wePhasika+ ngeenkomo nangezimvu zenu,+ endaweni uJehova ayikhethileko bona igama lakhe lihlale kiyo.+ 3 Kufuze nidle inyama yeenlwanezi noburotho obunganasibiliso,+ amalanga alikhomba, akukafuzi nidle nanyana yini enesibiliso, kufuze nidle kwaphela uburotho obunganasibiliso njengombana nenza nanisuka eGibhide nirhabile.+ Nanenza lokhu nizokukhumbula umtlhago enaqalana nawo, angekhe nikhohlwe indlela enatjhatjhululwa ngayo eGibhide.+ 4 Amalanga alikhomba akukafuzi kube nehlama ebilisiweko kiyo yoke indawenu,+ inyama enizokwenza ngayo umhlatjelo ntambama ngelanga lokuthoma akukafuzi ihlale ubusuku boke bekube sekuseni.+ 5 Angekhe nivunyelwe bona nenze umhlatjelo wePhasika kinanyana ngiliphi idorobho uJehova uZimenu aninikela lona. 6 Kufuze niwenzele endaweni uJehova uZimenu ayikhethileko bona igama lakhe lihlale kiyo. Kufuze nenze umhlatjelo wePhasika ntambama nakutjhinga ilanga,+ ngesikhathi esibekiweko sokuphuma kwenu eGibhide. 7 Kufuze niyipheke,+ niyidlele endaweni uJehova uZimenu azoyikhetha,+ ekuseni ningabuyela ematendenenu. 8 Kufuze nidle uburotho obunganasibiliso amalanga asithandathu, elangeni lekhomba kuzokuba nomhlangano okhethekileko kaJehova uZimenu. Akukafuzi nisebenze.+

9 “Kufuze nibale iimveke ezilikhomba. Kufuze nithome ukubala iimveke ezilikhombezo kusukela nanithoma ukuvuna iinthoro emasimini.+ 10 Nizokugidinga umNyanya weemVeke kaJehova uZimenu+ nilethe umnikelwenu osuka ehliziyweni, kuye ngokwalokho uJehova uZimenu anibusise ngakho.+ 11 Nithabe phambi kwakaJehova uZimenu, nina namadodanenu, amadodakazenu, iingqila zenu eziduna, iingqila zenu ezisikazi, umLevi ohlala emadorobhenenu, umuntu ovela kwenye inarha, intandani nomhlolokazi abahlala hlangana nani endaweni uJehova uZimenu ayikhethileko bona igama lakhe lihlale kiyo.+ 12 Khumbulani bona naba ziingqila enarheni yeGibhide,+ nje-ke lalelani benilandele iinqophiswezi.

13 “Kufuze nigidinge umNnyanya wemiTlhatlhana+ amalanga alikhomba lokha nanibuthelela iinthoro ngeselelweni namafutha newayini lapha kutlhodlhelwa khona. 14 Kufuze nithabe emnyanyenenu,+ nina, amadodanenu, amadodakazenu, iingqila zenu eziduna, iingqila zenu ezisikazi, umLevi, umuntu ovela kwenye inarha, intandani nomhlolokazi abahlala emadorobhenenu. 15 Amalanga alikhomba nizokugidingela+ uJehova uZimenu umnyanya endaweni ekhethwe nguJehova, ngombana uJehova uZimenu uzokubusisa soke isivuno senu nakho koke enikwenzako,+ nizokuthaba kwamambala.+

16 “Woke amadoda kufuze avele kathathu ngomnyaka phambi kwakaJehova uZimenu endaweni azoyikhetha: EmNyanyeni woBurotho obunganaSibiliso,+ emNyanyeni weemVeke+ nemNyanyeni wemiTlhatlhana,+ akunandoda okufuze ivele phambi kwakaJehova ingakaphathi litho. 17 Isipho umuntu omunye nomunye asilethako kufuze siye ngokwalokho uJehova uZimenu anibusise ngakho.+

18 “Kufuze nibeke abahluleli+ neenkhulu ekorweni ngayinye kiwo woke amadorobho uJehova uZimenu aninikela wona, kufuze bahlulele abantu ngobulungiswa. 19 Akukafuzi nihlanakele ubulungiswa,+ nibandlulule+ namkha namukele ukufunjathiswa ngombana isifumbathiso sivala amehlo wabahlakaniphileko+ begodu senza abantu abalungileko bakhulume amala. 20 Yenzani ngobulungiswa, landelani ubulungiswa+ khona nizakuragela phambili niphila, nithathe inarha uJehova uZimenu aninikela yona.

21 “Akukafuzi nitjale nanyana ngimuphi umuthi bona ube sigodo esicwengileko*+ hlanu kwe-aldara enilenzele uJehova uZimenu.

22 “Akukafuzi nizenzele isika ecwengileko+ ngombana uJehova uZimenu uyayinyenya.

17 “Ningenzeli uJehova uZimenu umhlatjelo ngekunzi namkha imvu erholopheleko namkha engakaphili kuhle ngombana uzokuba yinto enyenyisako kuJehova uZimenu.+

2 “Nange kwelinye lamadorobhenu uJehova uZimu aninikele wona kufunyanwa indoda namkha umfazi owenza ukukhohlakala emehlweni kaJehova uZimenu begodu aphule isivumelwano sakhe,+ 3 aphambuke alotjhe abanye abozimu abakhothamele namkha akhothamele ilanga, inyanga namkha loke ibutho lezulwini,+ okuyinto engingakhenge nginiyale ngayo.+ 4 Nange indaba le ibikwa kini namkha nizwe ngayo kufuze niyifunisise. Nange kuqinisekiswa+ bona into enyenyisako le yenziwe kwa-Israyeli, 5 indoda namkha umfazi owenze into ekhohlakeleko le kufuze alethwe emasangweni wedorobho, akghadlhwe ngamatje bekafe.+ 6 Umuntu ekufuze abulawe lo, kufuze abulawe nange kunabofakazi+ ababili namkha abathathu. Akukafuzi abulawe nange kunofakazi oyedwa.+ 7 Boke abofakazi kufuze babe ngebokuthoma ukumkghadlha ngamatje bona bambulale, ngemva kwalokho kulandele boke abantu. Kufuze nisuse okumbi hlangana nani.+

8 “Nange emadorobhenenu kuba nomlandu obudisi enibhalelwa kuwahlulela, kungaba mlandu obandakanya ukuphalaza iingazi,+ amalungelo womthetho, ukwenziwa kweenturhu namkha ezinye iindaba, kufuze niye endaweni uJehova uZimenu azoyikhetha.+ 9 Kufuze niye kubaphristi abamaLevi nakumahluleli+ ozabe ahlulela emihleni leyo, nibike indabenu, bazonitjela isiqunto ngendaba leyo.+ 10 Kufuze nenze ngokwesiqunto abaninikele sona endaweni uJehova azoyikhetha. Tjhejani bona nenze koke abaniyale ngakho. 11 Kufuze nenze ngokomthetho abanifundise wona nangokwesiqunto abanitjele sona.+ Kufuze nilalele lokho abanitjela khona ningaphambuki kikho.+ 12 Umuntu oziphakamisako ongafuni ukulalela umphristi osebenzela uJehova uZimenu namkha umahluleli, kufuze afe.+ Kufuze nisuse okumbi kwa-Israyeli.+ 13 Boke abantu nabezwa ngalokho, bazokuthukwa begodu angekhe basaziphakamisa.+

14 “Nanifika enarheni uJehova uZimenu aninikela yona bona niyithathe benihlale kiyo, nithi, ‘Asizibekele ikosi sifane neentjhaba ezisibhodileko,+ 15 nange kunjalo, kufuze nikhethe ikosi uJehova uZimenu ayikhethako.+ Kufuze nikhethe ikosi hlangana nabafowenu. Anikavunyelwa ukukhetha umuntu ovela kwenye inarha. 16 Kufuze angazibutheleleli iinjomani ezinengi+ namkha abuyisele abantu eGibhide bona afumane iinjomani ezinengi+ ngombana uJehova wathi kini, ‘Ningabuyeli emuva ngendlela le.’ 17 Akukafuzi azithathele abafazi abanengi khona ihliziywakhe ingeze yaphambuka+ begodu akukafuzi azibuthele isiliva negolide elinengi.+ 18 Nakathoma ukubusa, kufuze azikopululele umThetho lo encwadini ehlala kubaphristi abamaLevi.+

19 “Kufuze ahlale anayo, ayifunde ukuphila kwakhe koke+ khona azakufunda ukusaba uJehova uZimakhe, alalele woke amezwi neenqophiso ezisemThethweni loyo.+ 20 Nakenza njalo, angekhe aziphakamise kubafowabo begodu angekhe aphambuke emyalweni lo, atjhinge ngesidleni namkha ngesinceleni, khona yena namadodanakhe bazakuba makhosi kwa-Israyeli isikhathi eside.

18 “Abaphristi abamaLevi nekoro yoke kaLevi angekhe banikelwe isabelo namkha bafumane ilifa nama-Israyeli. Bazokudla eminikelweni eyenziwe ngomlilo eya kuJehova ngombana balilifa lakhe.+ 2 Akukafuzi abe nelifa hlangana nabafowabo. UJehova ulilifa lawo njengombana awatjelile.

3 “Nakhu abantu okufuze bakulethe kubaphristi: Nanyana ngubani owenza umhlatjelo, kungaba ngewekunzi namkha wemvu, kufuze alethe kumphristi umkhono, imihlathi nomrhoru. 4 Kufuze nimnikele isivuno senu sokuthoma seenthoro, iwayini lenu elitjha, amafuthenu noboya enizoburhuna bokuthoma ezimvwini zenu.+ 5 UJehova uZimenu umkhethile yena namadodanakhe kizo zoke iinkoro zenu bona ahlale asebenzela abantu egameni lakaJehova.+

6 “Kodwana nange umLevi akhamba kwelinye lamadorobhenu lapha bekahlala khona+ akhanuke ukuyokuhlala endaweni uJehova ayikhethileko,*+ 7 angasebenza lapho egameni lakaJehova uZimakhe njengabo boke abafowabo, amaLevi asebenza lapho phambi kwakaJehova.+ 8 Uzokufumana ukudla okulingana nokwabanye,+ ngitjho nanyana afumene imali yezinto azithengisileko ezivela kibokhokho bakhe.

9 “Nawufika enarheni uJehova uZimakho akunikela yona, akukafuzi ulingise izinto ezinyenyisako ezenziwa ziintjhabezo.+ 10 Akungabi nomuntu hlangana nani owenza indodanakhe namkha indodakazakhe ibe mhlatjelo,*+ umuntu othukulako,+ owenza imilingo,+ umloyi,+ 11 nanyana ngubani osebenzisa imilingo bona alimaze abanye, obuza esangomeni+ namkha kumbikezeli wekusasa+ namkha nanyana ngubani obuza kwabafileko.+ 12 Nanyana ngubani owenza izintwezi uyanyenyisa kuJehova begodu uJehova uZimenu uyaziqotha iintjhabezi phambi kwenu ngebanga lezinto ezinyenyisakwezi. 13 Kufuze nibe msulwa phambi kwakaJehova uZimenu.+

14 “Iintjhaba eniyokuthatha iinarha zazo bona zibe ngezenu bezijayele ukulalela labo abenza imilingo+ nabathukulako+ kodwana uJehova uZimenu akanivumeli bona nenze izinto ezinjalo. 15 UJehova uZimu uzonivusela umphorofidi onjengami hlangana nabafowenu. Kufuze nimlalele.+ 16 Le yipendulo yesibawo enasenza kuJehova uZimenu eRhorebe ngelanga ebenihlangene ngalo+ lokha nanithi, ‘Ungangivumeli bona ngizwe ilizwi lakaJehova uZimami namkha ngibone umlilo omkhulu lo, bona ngingafi.’+ 17 UJehova wathi kimi, ‘Lokho abakutjhwileko kuhle. 18 Ngizobavusela hlangana nabafowabo umphorofidi onjengawe,+ ngizokufaka amezwami emlonyenakhe,+ uzobatjela koke engimyala ngakho.+ 19 Umuntu ongekhe alalele amezwami akhulunywa mphorofidi loyo ngegama lami ngizomjezisa.+

20 “‘Nanyana ngimuphi umphorofidi oziphakamisako okhuluma egameni lami ngingakamyali namkha okhuluma egameni labanye abozimu, kufuze abulawe.+ 21 Nange kwenzeka nicabange nithi: “Sizokwazi njani bona uJehova akakalikhulumi ilizweli?” 22 Lokha umphorofidi nakakhuluma egameni lakaJehova begodu lokho akukhulumileko kungenzeki, kutjho bona uJehova akakakhulumi amezwi lawo. Umphorofidi lo ukhulume ngombana aziphakamisa. Akukafuzi nimsabe.’

19 “Lokha uJehova uZimenu nakatjhabalalisa iintjhaba zeenarha uJehova uZimenu aninikela zona bona nithathe inarhazo, nasele nihlezi emadorobhenazo neendlini zazo,+ 2 kufuze nikhethe amadorobho amathathu enarhenenu uJehova uZimenu aninikela yona.+ 3 Kufuze nihlukanise isifunda senarha uJehova uZimenu aninikela yona bona ibe ngeyenu sibe ziingcenye ezintathu, nilungise iindlela bona umbulali abalekele kwelinye lamadorobho lawo.

4 “Nakhu ekufuze kwenzeke malungana nomuntu obulele omunye bewabalekela emadorobheni la bona angabulawa: Lokha nakamadlha umfowabo angakahlosi begodu angakhenge amhloye;+ 5 njengalokha umuntu nakakhamba nomunye ehlathini bona bayokutheza, aphakamise izembe akape umuthi kodwana ihloko yezembe iphume ikape omunye umuntu imbulale, umbulali kufuze abalekele kwelinye lamadorobho la bona aphile.+ 6 Umbuyiseleli weengazi+ angasilingeka agijimise umbulali, ambambe bekambulale ngombana edorobheni bekukude. Nanyana kunjalo, bekungakafuzi afe ngombana bekangamhloyi umuntu ambuleleko.+ 7 Kungebangelo nginiyala bona: ‘Nibekele ngeqadi amadorobho amathathu.’

8 UJehova uZimenu uzokwandisa isifunda senu njengombana afunga kibokhokho benu+ begodu uzoninikela yoke inarha afunga kibokhokho benu ukuninikela yona,+ 9 bona lokhu kwenzeke kufuze nilalele yoke imiyalo enginiyala ngayo le namhlanjesi, nithande uJehova uZimenu begodu nihlale nikhamba eendleleni zakhe,+ nasele inarhenu ikhulisiwe kufuze ningezelele amadorobho amathathu wobuphephelo.+ 10 Nanenza njalo, azikho iingazi ezinganamlandu ezizokuphalazwa+ enarhenenu uJehova uZimenu aninikela yona bona ibe lilifa lenu begodu angeze nibe nomlandu weengazi.+

11 “Nange umuntu ahloye omunye umuntu,+ alindele ithuba lokumsahlela amlimaze bekambulale, umuntu obuleleko abalekele kwelinye lamadorobho la, 12 abadala bedorobheni lakhe bazokulayela bona ayokuthathwa asiwe kumbuyiseleli weengazi, kufuze abulawe.+ 13 Kufuze ningamrhawukeli begodu kufuze nisuse umlandu wokuphalaza iingazi ezinganamlandu kwa-Israyeli+ khona kuzanikhambela kuhle.

14 “Lokha nanifumana ilifa lenu enarheni uJehova uZimenu aninikela yona bona ibe ngeyenu, kufuze ningatjhidisi isikhonkhwani sakamakhelwanenu+ endaweni lapha abokhokho babeke khona imikhawulo.

15 “Akunamuntu ozokubekwa umlandu nange kunofakazi munye otjengisa bona umuntu lo wonile.+ Kufuze kube nabofakazi ababili namkha abathathu abazokuqinisekisa indaba.+ 16 Nange ufakazi oneenhloso ezimbi amangalela omunye umuntu,+ 17 abantwabo bobabili bazokujama phambi kwakaJehova, phambi kwabaphristi naphambi kwabahluleli abazobe basebenza ngesikhatheso.+ 18 Abahluleli bazoyihlolisisa indaba le,+ nange indoda enikela ubufakazi ifakaza amala begodu imangalela umfowabo ngamala, 19 kufuze nenze kuye njengombana bekahlele ukwenza kumfowabo,+ kufuze nisuse into embi hlangana nani.+ 20 Abanye abantu nabezwa ngalokhu bazokuthukwa, angekhe basenza into ekhohlakele kangaka hlangana nani.+ 21 Kufuze ningamtlhuweli:+ Ukuphila ngokuphila, ilihlo ngelihlo, izinyo ngezinyo, isandla ngesandla, inyawo ngenyawo.+

20 “Nange niyokulwa namanabenu nibone iinjomani zawo, iinkarana zawo namabuthwawo amanengi ukudlula nina, ningasabi ngombana uJehova uZimenu owanikhupha enarheni yeGibhide unani.+ 2 Nasele nizokuthoma ukulwa, umphristi kufuze atjhidele akhulume nabantu.+ 3 Kufuze athi kibo, ‘Lalelani ma-Israyeli, senizokulwa namanabenu. Ningangenwa mamanzi emadolweni. Ningathukwa namkha nihlengezele ngebanga labo, 4 ngombana uJehova uZimenu ukhamba nani bona ayonilwela emanabenenu begodu uzonisindisa.’+

5 Iinduna nazo kufuze zithi ebantwini, ‘Ngubani owakhe indlu etja wangayivula? Akabuyele emzinakhe. Ngombana nakungasinjalo, angafa epini bese enye indoda ivule indlwakhe. 6 Ngubani otjale isimu yamadiribe wangayivuna? Akabuyele emzinakhe. Ngombana nakungasinjalo, angafela epini omunye umuntu athome ukuvuna. 7 Ngubani othembise intombi umtjhado begodu akakabi ukuyitjhada? Akakhambe abuyele emzinakhe.+ Ngombana nakungasinjalo, angafela epini itjhadwe ngenye indoda.’ 8 Godu iinduna kufuze zibuze abantu zithi, ‘Ngubani osabako nolitjhatjha?+ Akabuyele emzinakhe khona angeze athusa abafowabo basabe njengaye.’+ 9 Lokha iinduna nasele ziqedile ukukhuluma nabantu, kufuze zikhethe amakhosana wamabutho bona adose phambili abantu.

10 “Nange nitjhidela edorobheni bona nilwe nalo, kufuze nilazise ngemibandela yokwenza isivumelwano sokuthula.+ 11 Nange livuma ukwenza ukuthula nani linivulele amasango, boke abantu balapho bazokuba ziingqila zenu begodu bazonisebenzela.+ 12 Kodwana nange lingafuni ukwenza ukuthula nani lifune ukulwa nani, kufuze nibhode idorobhelo ngamabutho ahlomileko, 13 uJehova uZimenu uzolinikela esandleni senu, kufuze nibulale woke amadoda alapho ngesabula. 14 Nanyana kunjalo, abafazi, abantwana, ifuyo nazo zoke izinto zedorobhenelo ningazithathela zona,+ nidle izinto zamanabenu uJehova uZimenu aninikela zona.+

15 “Ngilokho enizokwenza kiwo woke amadorobho akude nani, ingasi amadorobho weentjhaba eziseduze nani. 16 Emadorobheni wabantwaba, uJehova uZimenu aninikela wona bona abe lilifa lenu, akunamuntu okufuze nimlise aphile.+ 17 Kunalokho, kufuze nitjhabalalise amaRhiti, ama-Amori, amaKanana, amaPerizi, amaRhivi namaJebusi+ njengombana uJehova uZimenu aniyalile, 18 khona zingeze zanifundisa bona nenze zoke izinto ezinyenyisako ezizenzela abozimu bazo, zinenze none kuJehova uZimenu.+

19 “Nange nibhoda idorobho ngamabutho ahlomileko bona nilithumbe ngemva kokuthi nilwe nalo amalanga amanengi, akukafuzi nitjhabalalise imithi yakhona ngokuyiqunta ngezembe. Ningadla emithini leyo kodwana akukafuzi niyiqunte.+ Inga-kghani kufuze nisahlele umuthi kwanga nisahlela umuntu? 20 Ningatjhabalalisa kwaphela imithi enaziko bona ayidliwa. Ningayiqunta niyisebenzisele ukusahlela idorobho elilwa nani bekube kulapho nilithumba khona.

21 “Nange kufunyanwa umuntu abulewe esimini yenarha uJehova uZimenu aninikela yona bona ibe ngeyenu begodu kungaziwa ukuthi ubulawe ngubani, 2 abadala nabahluleli+ kufuze bakhambe bayokumeda ibanga elihlangana nesidumbu namadorobho aseduze naso. 3 Abadala bedorobho eliseduze nesidumbu kufuze bathathe emhlambinabo ikonyana elingakhenge lisetjenziswe, elingakhenge libotjhelwe ejogini, 4 abadala bedorobhenelo kufuze base ikonyana emrhobeni ogeleza amanzi lapho kungakhenge khekulinywe namkha kutjalwe khona, kufuze baphule intamalo emrhobeni loyo.+

5 “Abaphristi abamaLevi bazokutjhidela ngombana uJehova uZimenu uwakhethile bona amsebenzele,+ amemezele iimbusiso egameni lakaJehova.+ Bazokutjho ukuthi ukungavumelani okubandakanya ukubulala kufuze kulungiswe njani.+ 6 Boke abadala bedorobheni eliseduze nesidumbu kufuze bahlambele izandla zabo+ phezu kwekonyana eliphulwe intamo ngemrhobeni, 7 kufuze bathi, ‘Izandla zethu akhenge ziphalaze iingazezi begodu akhenge sikubone ukuphalazwa kweengazokhu. 8 Jehova, ungabeki ama-Israyeli umlandu, abantu bakho owabahlengako,+ tjhaphulula abantu bakho ama-Israyeli+ emlandwini wokuphalazwa kweengazi lo.’ Nje-ke umlandu wokuphalazwa kweengazi lo angekhe usaba phezu kwabo. 9 Ngendlela le nizokususa umlandu wokuphalazwa kweengazi ezimsulwa hlangana nani ngokwenza okuhle phambi kwakaJehova.

10 “Naniya epini niyokulwa namanabenu begodu uJehova uZimenu anihlulele wona niwathumbe,+ 11 nange ubona umfazi omuhle hlangana nabathunjiwekwabo, umthande, ufune ukumthatha bona abe mkakho, 12 ungamletha emzinakho. Kufuze agude ihloko, aqunte iinzipho zakhe, 13 ahlubule nezambatho zakhe zekuthunjweni, ahlale ngendlinakho. Inyanga yoke uzokulilela uyise nonina,+ ngemva kwalokho ungatjhinga naye emabhayini; uzokuba yindodakhe yena abe mkakho. 14 Kodwana nange ungasathabi ngaye, kufuze umlise akhambe+ aye nanyana kukuphi lapha afuna ukuya khona. Akukafuzi umthengise namkha umphathe kumbi ngombana umhlazisile.

15 “Nange indoda inabafazi ababili, ithande omunye khulu ukudlula omunye bese bobabili bayibelethele amadodana kodwana indodana elizibulo ibe ngeyomfazi ongathandwako,+ 16 ngelanga enikela ngalo amadodanayo ilifa, ngekhe ivunyelwe ukuphatha indodana yomfazi othandwako njengezibulo layo esikhundleni sendodana yomfazi ongathandwako, elizibulo. 17 Kufuze itjengise bona indodana yomfazi ongathandwako ngiyo elizibulo ngokuyinikela ilifa elidlula labanye babantwana bakhe ngokubuyelelwe kabili kikho koke anakho, ngombana ubelethelwe yona asesenamandla. Ilungelo lobuzibulo lizokuba ngelayo.+

18 “Nange indoda inendodana enekani, engahloniphiko nengalaleli uyise namkha unina,+ balingile nokuyikhalima kodwana akhenge ifune ukubalalela,+ 19 uyise nonina kufuze bayithathe bayise kubadala esangweni ledorobho lapha ihlala khona, 20 kufuze bathi kubadala bedorobho, ‘Indodanethu le inekani, ayihloniphi, ayifuni nokusilalela. Isirhiribideli+ begodu isidakwa.’+ 21 Woke amadoda wedorobheni kufuze ayikghadlhe ngamatje beyife. Kufuze nisuse okumbi hlangana nani, ama-Israyeli woke azokuzwa ngalokhu asabe.+

22 “Nange indoda yenza isono ifumane isigwebo sokufa begodu ibulawe,+ iphanyekwe esigodweni,+ 23 isidumbu sayo akukafuzi sihlale esigodweni ubusuku boke.+ Kunalokho kufuze nimbulunge ngelangelo ngombana umuntu ophanyekiweko uqalekisiwe kuZimu,+ akukafuzi nisilaphaze inarhenu uJehova uZimenu aninikela yona bona ibe lilifa lenu.+

22 “Nange ubona ikunzi namkha imvu yomfowenu ilahleka, ungayilisi ngabomu.+ Kufuze uyibuyisele kumfowenu. 2 Nange umnikazi wesilwaneso angahlali eduze nawe namkha ungamazi, kufuze uthathe isilwaneso usise kwakho, sihlale kwakho bekube kulapho umnikazaso asifuna. Kufuze umnikele sona.+ 3 Ngilokho okufuze ukwenze ngodumbanakhe, isambatho sakhe nananyana yini elahlekele umfowenu wena wayifumana. Kufuze ungayilisi ngabomu.

4 “Nange ubona udumbana namkha ikunzi yomfowenu iwile endleleni, akukafuzi uyilise ngabomu. Kufuze umsize niyivuse.+

5 “Umfazi akukafuzi ambathe isambatho sendoda, nendoda akukafuzi imbathe isambatho somfazi. Ngombana nanyana ngubani owenza njalo uyamnyenyisa uJehova uZimenu.

6 “Nange kwenzeka ubone isidleke senyoni hlanu kwendlela sinabantwana namkha amaqanda, kungaba semthini namkha ehlabathini, ubone nonina ahlezi phezu kwabantwanabo namkha amaqanda lawo, ungathathi unina nabantwanabo.+ 7 Qotha unina, ngemva kwalokho ungazithathela abantwana. Wenze lokhu khona kuzokukhambela kuhle, uphile isikhathi eside.

8 “Nange wakha indlu etja, kufuze uyenzele isirhodlwana emfulelweni+ khona ungazokuba nomlandu weengazi nange umuntu awa emfulelweni.

9 “Ungatjali isimakho yamadiribe ngemihlobo emibili yembewu.+ Nakungasinjalo, koke okuvezwa yimbewu oyitjalileko kuhlanganise nesivuno samadiribe, kuzokusiwa endaweni ecwengileko.

10 “Ungalimi ngekunzi epanelwe nodumbana.+

11 “Ungambathi izambatho ezenziwe ngewulu ehlanganiswe nelineni.+

12 “Kufuze uzenzele amatjharhatjharha emphethweni wesambatho sakho.+

13 “Nange indoda ithatha umfazi itjhinge naye emabhayini ngemva kwalokho imhloye, 14 imsole ngokuziphatha kumbi begodu imkhulume kumbi ithi: ‘Ngithethe umfazi lo kodwana nangitjhinga naye emabhayini, akhenge ngibuthole ubufakazi bokuthi akakalali nendoda,’ 15 uyise nonina womntazana kufuze balethe ubufakazi kubadala esangweni ledorobho bokuthi umntazana lo akhenge alale nenye indoda. 16 Uyise womntazana kufuze athi kubadala, ‘Nginikele indoda le indodakazami bona ibe mkayo kodwana iyihloyile, 17 iyisola ngokuthi akhenge iziphathe kuhle ithi: “Ngifumene ubufakazi bokuthi indodakazenu kheyatjhinga emabhayini nenye indoda.” Nje-ke ngilobu ubufakazi bokuthi indodakazami akhenge iye emabhayini nenye indoda.’ Bazokwendlala itjhila phambi kwabadala bedorobho. 18 Abadala bedorobho+ bazokuthatha indoda le bayibethe.+ 19 Bazoyihlawulisa amatjhekeli* wesiliva ali-100 bawanikele uyise womntazana ngombana indoda le ihlazise umntazana wakwa-Israyeli+ ongakhenge alale nendoda, umntazana uzokuragela phambili amkayo. Angekhe ivunyelwe bona imtlhale ukuphila kwayo koke.

20 “Nange iinsolwezo ziliqiniso begodu kungabi nobufakazi obutjengisa bona umntazana lo akhenge alale nendoda, 21 kufuze alethwe ebungenweni bendlu kayise, amadoda wedorobho amkghadlhe ngamatje bekafe ngombana wenze isenzo esihlazisako+ kwa-Israyeli ngokuziphatha kumbi ngokomseme* endlini kayise.+ Kufuze nisuse okumbi hlangana nani.+

22 “Nange kufunyanwa indoda ilele nomfazi wenye indoda, bobabili kufuze babulawe, indoda leyo nomfazi loyo.+ Kufuze nisuse okumbi kwa-Israyeli.

23 “Nange umntazana ongakhenge alale nendoda athenjiswe umtjhado, kwenzeke ahlangane nendoda edorobheni ilale naye, 24 bobabili kufuze nibakhuphele ngaphandle kwesango ledorobho nibakghadlhe ngamatje bebafe ngombana umntazana akhenge arhuwelele edorobheni nendoda leyo ihlazise umfazi wenye indoda.+ Kufuze nisuse okukhohlakeleko hlangana nani.

25 “Nange kwenzeka indoda ihlangane nomntazana othenjiswe umtjhado emmangweni, indoda leyo imhlule ngamandla beyilale naye, indoda leyo kufuze ibulawe, 26 ningamenzi litho umntazana ngombana akakenzi isono esingambangela bona abulawe. Umlandu lo ufana nalokha umuntu nakasahlela omunye umuntu bekambulale.+ 27 Ngombana umntazana othenjiswe umtjhado lo uhlangene nendoda le emmangweni warhuwelela kodwana akhenge kube nomsizako.

28 “Nange kwenzeka indoda ihlangane nomntazana ongakathenjiswa umtjhado imbambe begodu ilale naye ngemva kwalokho babanjwe,+ 29 indoda elele nomntazana lo kufuze ikhuphe amatjhekeli wesiliva ama-50, inikele uyise womntazana begodu umntazana lo uzokuba mkayo.+ Ngebanga lokuthi imhlazisile, indoda le ngeze ivumeleke ukumtlhala ukuphila kwayo koke.

30 “Akunandoda ekufuze ithathe umkayise bona ingahlazisi uyise.+

23 “Akunandoda ephakulwe ngokupatlwazwa amahlwayi namkha equntwe ubudoda bayo engeza ehlanganweni kaJehova.+

2 “Akunandodana elivezandlebe engeza ebandleni lakaJehova.+ Ngitjho nesizukulwaneni setjhumi, akunanzukulwana zakhe ezingeza ebandleni lakaJehova.

3 “Akunamuntu wakwa-Amoni namkha wakwaMowabi ongeza ebandleni lakaJehova.+ Ngitjho nesizukulwaneni setjhumi, akunanzukulwana zabo ezingeza ebandleni lakaJehova, 4 ngombana akhenge baniphe ukudla namanzi lokha naniphuma eGibhide+ begodu baqatjha uBhalami indodana kaBhewori wePetora yeMesopotamiya bona aniqalekise.+ 5 Kodwana uJehova uZimenu akhenge alalele uBhalami.+ Kunalokho, uJehova uZimenu watjhugulula isiqalekiso saba sibusiso kini+ ngombana uJehova uZimenu uyanithanda.+ 6 Akukafuzi nibasize bahlale ngokuthula begodu baphumelele ukuphila kwenu koke.+

7 “Akukafuzi nihloye umEdomu ngombana umfowenu.+

“Akukafuzi nihloye umGibhide ngombana khenahlala endaweni yekhabo.+ 8 Isizukulwana sesithathu sabantwana ababelethelwe bona singangena ebandleni lakaJehova.

9 “Nange nikampile bona niyokulwa namanabenu, kufuze nitjheje bona ningazisilaphazi.+ 10 Nange indoda iba ngesilapheleko ngebanga lokuphuma isidoda ebusuku,+ kufuze iphumele ngaphandle kwekampa ingabuyi. 11 Ilanga nalitjhingako, kufuze ihlambe ngemva kwalokho ingabuyela ngekampeni.+ 12 Kufuze kube nendawo ngaphandle kwekampa lapha nizozithuma khona. 13 Kufuze nihlale ninerharafana. Lokha naniyozithuma ngaphandle kwekampa, kufuze nembe ngayo ngemva kwalokho nidibizese. 14 UJehova uZimenu ukhamba hlangana nekampenu+ bona anisindise begodu anikele amanabenu ezandleni zenu, nje-ke ikampenu kufuze icwengeke+ khona uZimu angazokubona iinsila zenu alise ukukhamba nani.

15 “Nange isigqila sibalekela umphathaso size kuwe, akukafuzi usibuyisele kumphathaso. 16 Singahlala hlangana nani kinanyana ngiliphi lamadorobhenu, lapha sikhetha ukuhlala khona. Akukafuzi nisiphathe kumbi.+

17 “Akukho namunye wamadodakazi wama-Israyeli ongaba yingwadla yethempelini+ namkha amadodana wakwa-Israyeli angaba ziingwadla ethempelini.+ 18 Akukafuzi nilethe ngendlini kaJehova uZimenu imali ebhadelwe ingwadla emfazi namkha eyindoda bona kuzaliswe isifungo ngombana bobabili bayanyenyisa kuJehova uZimenu.

19 “Akukafuzi ubhadelise umfowenu amakonyana,+ kungaba ngewemali, ukudla namkha nanyana kukuphi lapho amakonyana angabhadeliswa khona. 20 Umuntu ovela kwenye inarha ungambhadelisa amakonyana+ kodwana akukafuzi ubhadelise umfowenu amakonyana,+ khona uJehova uZimenu anganibusisa kikho koke enikwenzako enarheni eniyoyithatha bona ibe lilifa lenu.+

21 “Nange nenza isifungo kuJehova uZimenu,+ ningariyadi ukusiphetha.+ Ngombana uJehova uZimenu ufuna bona nisiphethe; nakungasinjalo nizokuba nesono.+ 22 Kodwana naningasenziko isifungo, angekhe nibe nesono.+ 23 Kufuze nikwenze enikuthembisileko,+ isifungo senu sinjengomnikelo osuka ehliziyweni, kufuze nikwenze enikufunge kuJehova.+

24 “Nange ungena esimini yamadiribe kamakhelwanakho, ungadla usuthe kodwana akukafuzi ufake amanye ngesikhwameni.+

25 “Nawuya esimini yekoroyi kamakhelwanakho, ungakha evuthiweko ngesandla sakho kodwana akukafuzi usebenzise isegere.+

24 “Nange indoda itjhada umfazi kodwana ingasathabi ngaye ngombana ifumene into ehlazisako kuye, kufuze itlole incwadi yesehlukaniso,+ imnikele yona beyimqothe emzinayo.+ 2 Nasele akhambile emzinayo, angaba mfazi wenye indoda.+ 3 Nange indoda yesibili imhloya, imtlolele incwadi yesehlukaniso, imnikele yona beyimqothe emzinayo namkha nange indoda yesibili emtjhadileko ihlongakala, 4 indoda eyamqotha kokuthoma angekhe ivunyelwe ukumthatha abe mkayo, sele asilaphazekile ngombana lokho kuyinto enyenyisako kuJehova. Akukafuzi nenze isono esinjengalesi enarheni uJehova uZimenu aninikela yona bona ibe lilifa lenu.

5 “Indoda eqeda ukutjhada akukafuzi iye epini namkha inikelwe nanyana ngimiphi imisebenzi. Kufuze iliswe umnyaka bona ihlale ekhaya ithabise umkayo.+

6 “Akunamuntu okufuze athathe ilitje lokusila namkha imbokodo yalo bona ibe sibambiso+ ngombana nakenza njalo uzabe uthatha lokho omunye umuntu aziphilisa ngakho.

7 “Nange omunye umuntu afunyenwe athumbe omunye umIsrayeli, amphathe kumbi bekamthengise,+ othumbileko kufuze afe.+ Kufuze nisuse okumbi hlangana nani.+

8 “Nange kuba nomuntu onobulepheru,* tjhejani bona nenza koke abaphristi bamaLevi abazonitjela khona.+ Tjhejani nenze koke engabayala ngakho. 9 Khumbulani lokho uJehova uZimenu akwenza kuMiriyamu endleleni naniphuma eGibhide.+

10 “Nawuboleka umakhelwanakho+ nanyana yini, akukafuzi ungene endlinakhe uthathe isibambiso athembise ukukunikela sona. 11 Kufuze ujame ngaphandle, umuntu omboleke nanyana yini uzokulethela isibambiso lapha ujame khona. 12 Nange umuntu loyo atlhaga, akukafuzi ubambe isibambiso kuwe bekube lilanga elilandelako.+ 13 Nakutjhinga ilanga, kufuze ubuyisele nanyana yini akunikele yona bona ibe sibambiso, uzokulala anesambatho sakhe,+ uzokubusisa; nawenza njalo uzabe wenze okulungileko phambi kwakaJehova uZimakho.

14 “Akukafuzi nidlelezele isisebenzi esiqatjhiweko esitlhagileko, kungaba ngumfowenu namkha umuntu ovela kwenye inarha ohlala enarhenenu, emadorobhenenu.+ 15 Kufuze umnikele umrholwakhe ngelangelo,+ ngaphambi kokuthi kutjhinge ilanga ngombana utlhagile begodu uphila ngawo umrholo loyo. Nawungenzi njalo, uzokulilela uJehova ngebanga lakho begodu uzokuba nesono.+

16 “Abobaba akukafuzi babulawe ngebanga lezenzo zabantwababo nabantwana akukafuzi babulawe ngebanga lezenzo zaboyise.+ Umuntu kufuze abulawe ngebanga lesono sakhe.+

17 “Akukafuzi nihlanakele isahlulelo somuntu ovela kwenye inarha namkha sentandani+ begodu akukafuzi nithathe isambatho somhlolokazi bona sibe sibambiso.+ 18 Khumbulani bona naba ziingqila eGibhide begodu uJehova uZimenu wanihlenga.+ Kungebangelo nginiyala bona nenze lokhu.

19 “Nanivuna isivuno esiminenu nilibale inyanda, ningabuyeli emva niyoyithatha. Kufuze niyitjhiyele umuntu ovela kwenye inarha, intandani nomhlolokazi,+ khona uJehova uZimenu azonibusisa kikho koke enikwenzako.+

20 “Lokha nanibetha iimpande zomuthi wama-oliva bona niwavune, akukafuzi nibuyelele. Okuseleko kufuze nikutjhiyele umuntu ovela kwenye inarha, intandani nomhlolokazi.+

21 “Nanibutha amadiribe esiminenu yamadiribe, kufuze ningabuyeli niyokubuthelela aseleko. Kufuze niwatjhiyele umuntu ovela kwenye inarha, intandani nomhlolokazi. 22 Khumbulani bona naba ziingqila enarheni yeGibhide. Kungebangelo nginiyala bona nenze lokhu.

25 “Nange abantu baba nepikiswano, kufuze bayokuvela phambi kwabahluleli,+ bazobahlulela batjho ukuthi ngimuphi onomlandu, ngimuphi onganamlandu.+ 2 Nange onomlandu lo kufuze abetjhwe,+ umahluleli uzombhambalalisa phasi, abetjhwe phambi kwakhe. Imivimbo azokubetjhwa yona izokulingana nobukhohlakali abenzileko. 3 Angabetjhwa imivimbo engaba ma-40+ kodwana kungadluli lapho. Nange aragela phambili abetjhwa eminye imivimbo eminengi ukudlula le, umfowenu uzabe ahlazisiwe phambi kwamehlwenu.

4 “Lokha ikunzi nayibhulako ungayivali umlomo.+

5 “Nange abantwana bomuntu bahlala ndawonye bese omunye ahlongakale anganandodana, umfazi walo ohlongakeleko akukafuzi atjhade nomunye umuntu ongasililunga lomndeni. Umfowabo wendodakhe kufuze amthathe abe mkakhe, indoda le kufuze ithathe umfazi kamfowabo.+ 6 Izibulo lomfazi lo lizokubizwa ngegama lendodakhe ehlongakeleko,+ khona igama lendodakhe le lingeze latjhabalala kwa-Israyeli.+

7 “Nange indoda le ingafuni ukutjhada umfazi kamfowabo, umfazi kamfowabo kufuze aye kubadala esangweni ledorobho athi kibo, ‘Umfowabo wendodami akafuni ukukhulisa igama lakamfowabo kwa-Israyeli. Akafuni ukungithatha bona ngibe mkakhe.’ 8 Abadala bedorobho kufuze bambize bakhulume naye. Kodwana nange abhala athi, ‘Angifuni ukumthatha bona abe mkami,’ 9 umfazi kamfowabo kufuze atjhidele hlanu kwakhe phambi kwabadala, amhlubulise ipatlagwana lakhe,+ amkhafulele ebusweni, athi, ‘Ngilokhu okwenziwa endodeni engafuni ukwakha indlu kamfowabo.’ 10 Ngemva kwalokho, igama lomndenakhe kwa-Israyeli lizokwaziwa ngokuthi, ‘Yindlu yaloyo owahlutjuliswa ipatlagwana.’

11 “Nange amadoda amabili alwa, umfazi wale enye angenele bona avikele indodakhe kiloyo oyibethako, alule isandla sakhe abambe izitho zayo zangaphasi, 12 kufuze nimqunte isandla. Akukafuzi nimzwele ubuhlungu.

13 “Akukafuzi niphathe amatje amabili angalinganiko eenkhwameni zenu,+ elincani nelikhulu. 14 Emzinenu, akukafuzi nibe namathunga amabili angalinganiko wokulinganisa.+ 15 Kufuze nibe neenlinganiso ezinembileko nezithembekileko, khona nizakuphila isikhathi eside enarheni uJehova uZimenu aninikela yona.+ 16 Nanyana ngimuphi umuntu ongakathembeki owenza izintwezi uJehova uZimenu uyamnyenya.+

17 “Khumbulani lokho ama-Amalekhi anenza khona endleleni naniphuma eGibhide,+ 18 khumbulani indlela ahlangana ngayo nani endleleni, asahlela boke ebebakhamba ngemva kwenu lokha nanidiniweko ningasanamandla. Akhenge amsabe uZimu. 19 Lokha uJehova uZimenu nakaninikela ukuphumula kiwo woke amanabenu anibhodileko enarheni uJehova uZimenu aninikela yona bona ibe lilifa lenu,+ kufuze nitjhabalalise ama-Amalekhi+ angasakhunjulwa. Ningakhohlwa.

26 “Nanifika enarheni uJehova uZimenu aninikela yona bona ibe lilifa lenu, niyithathe benihlale kiyo, 2 kufuze nithathe ezinye iinthelo zokuthoma zakho koke okumile enarheni leyo uJehova uZimenu aninikela yona, nizifake ngemantjini niye endaweni uJehova uZimenu ayikhethileko bona igama lakhe lihlale kiyo.+ 3 Kufuze niye kumphristi ozabe asebenza emihleni leyo nithi kuye, ‘Njengombana uJehova afunga kibokhokho bethu bona uzosinikela inarha le, sesihlala kiyo, nje-ke namhlanjesi size lapha bona sizokuthokoza uJehova uZimethu.’+

4 “Umphristi uzokuthatha umantji loyo esandleni sakho awubeke phambi kwe-aldara lakaJehova uZimenu. 5 Kufuze nithi kuJehova uZimenu, ‘Ubaba bekamAramiya okhambakhambako,*+ waya eGibhide+ wahlala lapho njengomuntu ovela kwenye inarha, emndeninakhe bekunabambalwa.+ Kodwana iinzukulwana zakhe zaba sitjhaba esikhulu, esinamandla nesinabantu abanengi.+ 6 Abantu beGibhide basiphatha kumbi, basigandelela bebasisebenzisa budisi.+ 7 Nje-ke salilela kuJehova uZimu wabokhokho bethu, uJehova wasizwa isililo sethu, wawubona umtlhagwethu, wabona umraro ebesiqalene nawo wabona nendlela ebesigandelelwa ngayo.+ 8 Emaswapheleni uJehova wasikhupha eGibhide ngesandla sakhe esinamandla, umkhonwakhe onamandla,+ izenzo ezisabekako, amatshwayo nangeemmangaliso.+ 9 Wasiletha endaweni le wasinikela yona, inarha egeleza ibisi neliju.+ 10 Nje, ngilethe iinthelo zokuthoma zenarheni uJehova asinikele yona.’+

“Kufuze uzibeke phambi kwakaJehova uZimakho begodu ukhothame phambi kwakaJehova uZimakho. 11 Uzokuthaba ngakho koke okuhle uJehova uZimakho akwenzele khona, wena, umndenakho, umLevi nomuntu ovela kwenye inarha ohlala hlangana nani.+

12 “Ngomnyaka wesithathu nasele niqede ukubuthelela koke kwetjhumi+ kwesivuno senu nizokunikela umLevi, umuntu ovela kwenye inarha, intandani, nomhlolokazi begodu bazokudla basuthe emadorobhenenu.+ 13 Uzokuthi phambi kwakaJehova uZimakho, ‘Ngikhuphe ingcenye ecwengileko emzinami ngayinikela umLevi, umuntu ovela kwenye inarha, intandani nomhlolokazi njengombana ungiyalile.+ Akhenge ngeqe umyalwakho namkha ngingawutjheji. 14 Akhenge ngiyidle ngisazilile namkha ngisuse enye yayo ngisilaphele namkha ngiyisebenzisele abahlongakeleko. Ngilalele ilizwi lakaJehova uZimami, ngenza koke ongiyale ngakho. 15 Qala phasi usendaweni ohlala kiyo ecwengileko, ezulwini, ubusise abantu bakho ama-Israyeli nenarha osinikele yona+ njengombana wafunga kibokhokho bethu,+ inarha egeleza ibisi neliju.’+

16 “Namhlanjesi uJehova uZimenu uyaniyala bona nilalele iinqophiso nemithetho le. Kufuze niyilalele beniyilandele ngeenhliziyo zenu zoke+ nangemiphefumulwenu* yoke. 17 Namhlanjesi nifumene ilizwi kuJehova lokuthi uzokuba nguZimenu nanikhamba eendleleni zakhe,+ nilalele iinqophiso zakhe,+ imiyalwakhe nemithethwakhe+ nalokha nanilalela ilizwi lakhe. 18 Namhlanjesi uJehova ufumene ilizwi lokuthi nizokuba babantu bakhe, abantu bakhe abakhethekileko*+ njengombana anithembisile nokuthi nizokulalela yoke imiyalwakhe 19 uzoniphakamisa ngaphezu kwazo zoke iintjhaba azenzileko,+ anidumise bekaniphazimulise nanihlala nibabantu abacwengileko kuJehova uZimenu,+ njengombana athembisile.”

27 UMosi namadoda amadala wakwa-Israyeli wayala abantu wathi: “Lalelani yoke imiyalo enginiyala ngayo namhlanjesi. 2 Ngelanga enizokuyama ngalo iJordani niye enarheni uJehova uZimenu aninikela yona, khethani amatje amakhulu niwasinde.+ 3 Nasele niyamile, tlolani kiwo woke amezwi womThetho ukwenzela bona ningene enarheni uJehova uZimenu aninikela yona, inarha egeleza ibisi neliju, njengombana uJehova uZimu wabokhokho benu anithembisa.+ 4 Nasele niyame iJordani, kufuze nibeke amatje la eNtabeni i-Ebali+ niwasinde, njengombana nginiyala namhlanjesi. 5 Kufuze nakhele uJehova uZimenu i-aldara lapho, i-aldara lamatje. Akukafuzi nisebenzise isimbi kiwo.+ 6 Kufuze nakhele uJehova uZimenu i-aldara ngamatje angakasikwa, ninikele kilo iminikelo etjhiswako eya kuJehova uZimenu. 7 Nizokwenza imihlatjelo yetjhebiswano+ niyidlele lapho,+ nizokuthaba phambi kwakaJehova uZimenu.+ 8 Woke amezwi womThetho la kufuze niwatlole ngokubonakalako phezu kwamatje.”+

9 UMosi nabaphristi abamaLevi bakhuluma nama-Israyeli woke, bathi: “Thulani ma-Israyeli, lalelani. Namhlanjesi nibe babantu bakaJehova uZimenu.+ 10 Kufuze nilalele ilizwi lakaJehova uZimenu, nilandele imiyalwakhe+ neenqophiso zakhe njengombana nginiyala namhlanjesi.”

11 Mhlokho, uMosi wayala abantu wathi: 12 “Iinkoro ezilandelako zizokujama eNtabeni iGerizimu+ zibusise abantu nasele niyame iJordani: Ikoro yakwaSimiyoni, yakwaLevi, yakwaJuda, yakwa-Isakari, yakwaJosefa neyakwaBhenjamini. 13 Iinkoro ezilandelako zizokujama eNtabeni i-Ebali+ zimemezele isiqalekiso: Ikoro yakwaRubeni, yakwaGadi, yakwa-Atjheri, yakwaZebuloni, yakwaDani neyakwaNafitali. 14 AmaLevi azokuphendula abantu bakwa-Israyeli ngelizwi elikhulu, athi:+

15 “‘Uqalekisiwe umuntu owenza isithombe esibaziweko+ asilotjhe ngemsitheleni, into eyenziwe sikghwari+ enyenyisako kuJehova.’+ (Boke abantu bazokuphendula bathi, ‘Amen!’)

16 “‘Uqalekisiwe umuntu odelela uyise nonina.’+ (Boke abantu bazokuphendula bathi, ‘Amen!’)

17 “‘Uqalekisiwe umuntu otjhidisa isikhonkhwani sakamakhelwanakhe.’+ (Boke abantu bazokuphendula bathi, ‘Amen!’)

18 “‘Uqalekisiwe umuntu ophambukisa isiphofu.’+ (Boke abantu bazokuphendula bathi, ‘Amen!’)

19 “‘Uqalekisiwe umuntu ohlanakela isahlulelo+ somuntu ovela kwenye inarha, sentandani namkha somhlolokazi.’+ (Boke abantu bazokuphendula bathi, ‘Amen!’)

20 “‘Uqalekisiwe umuntu otjhinga emabhayini nomfazi kayise ngombana uhlazisa uyise.’+ (Boke abantu bazokuphendula bathi, ‘Amen!’)

21 “‘Uqalekisiwe umuntu olala nesilwana.’+ (Boke abantu bazokuphendula bathi, ‘Amen!’)

22 “‘Uqalekisiwe umuntu otjhinga emabhayini nodadwabo, indodakazi kayise namkha indodakazi kanina.’+ (Boke abantu bazokuphendula bathi, ‘Amen!’)

23 “‘Uqalekisiwe umuntu otjhinga emabhayini nomkhwekazakhe.’+ (Boke abantu bazokuphendula bathi, ‘Amen!’)

24 “‘Uqalekisiwe umuntu okhukhuthela umakhelwanakhe bekambulale.’+ (Boke abantu bazokuphendula bathi, ‘Amen!’)

25 “‘Uqalekisiwe umuntu othatha isifumbathiso bona abulale umuntu omsulwa.’+ (Boke abantu bazokuphendula bathi, ‘Amen!’)

26 “‘Uqalekisiwe umuntu ongalandeli amezwi womThetho lo.’+ (Boke abantu bazokuphendula bathi, ‘Amen!’)

28 “Nange nilalela ilizwi lakaJehova uZimenu, nitjhejisise bona nilalela imiyalwakhe enginiyala ngayo namhlanjesi, uJehova uZimenu uzoniphakamisa ngaphezu kwazo zoke iintjhaba zephasini.+ 2 Zoke iimbusiswezi nizozifumana+ ngombana nilalela ilizwi lakaJehova uZimenu:

3 “Nizokubusiswa edorobheni, nibusiswe nesimini.+

4 “Abantwana benu, iinthelo zenu, ifuywenu, amakonyanenu neemvana zenu+ zizokubusiswa.+

5 “Ababusiswe abomantji benu+ neenkotlelo enibhicela ngakizo ihlama.+

6 “Nizokubusiswa kikho koke enikwenzako.

7 “UJehova uzokwenza amanaba alwa nani bona atjhatjalaliswe phambi kwenu.+ Azonisahlela ngendlela yinye kodwana azokubaleka ngeendlela ezilikhomba.+ 8 UJehova uzokubusisa iinlulu zenu+ nakho koke enikwenzako, ngokuqinisekileko uzonibusisa enarheni uJehova uZimenu aninikela yona. 9 UJehova uzonenza nibe babantu bakhe abacwengileko,+ njengombana afunga kini+ ngombana niragele phambili nilalela imiyalo kaJehova uZimenu benakhamba eendleleni zakhe. 10 Boke abantu ephasini bazokubona ukuthi nibizwa ngegama lakaJehova+ begodu bazonisaba.+

11 “UJehova uzonibusisa ngabantwana abanengi, ifuyo enengi nesivuno esinengi+ enarheni uJehova afunga kibokhokho benu bona uzoninikela yona.+ 12 UJehova uzonivulela isilulu sakhe, izulu, anise izulu enarhenenu ngesikhathi salo+ begodu anibusise kikho koke enikwenzako. Nizokuboleka iintjhaba ezinengi kodwana nina ngekhe kutlhogeke bona niboleke.+ 13 UJehova uzonenza nibe phambili ingasi emva, uzonenza nibe phezulu+ ingasi phasi, nange nilalela imiyalo kaJehova uZimenu enginiyala ngayo namhlanjesi begodu niyenze. 14 Akukafuzi niphambuke emezwini enginiyala ngawo namhlanjesi, niye ngesidleni namkha ngesinceleni,+ ningalandeli abanye abozimu bona nibalotjhe.+

15 “Nange ningalaleli ilizwi lakaJehova uZimenu, ningalaleli yoke imiyalwakhe nemithethwakhe enginiyala ngayo namhlanjesi, zoke iinqalekiswezi zizonehlela:+

16 “Nizokuqalekiswa edorobheni, niqalekiswe nesimini.+

17 “Umantjenu uzokuqalekiswa nesikotlelo+ enibhicela kiso ihlama+ sizokuqalekiswa.

18 “Abantwabenu, isivuno senu, amakonyanenu neemvana zenu+ kuzokuqalekiswa.+

19 “Nizokuqalekiswa kikho koke enikwenzako.

20 “UJehova uzoniqalekisa kikho koke enikwenzako, uzonenza ningenwe mamanzi emadolweni, uzonijezisa bekube kulapho senitjhatjalaliswe msinyana ngombana nenze izinto ezimbi benamkhohlwa.+ 21 UJehova uzokwenza bona ukugula kungasuki kini bekube kulapho anitjhabalalisa enarheni eniyoyithatha bona ibe ngeyenu.+ 22 UJehova uzonimadlha ngesifo samaphaphu, umgomani omumbi,+ ukuvuvuka, umtjhiso omkhulu, isabula,+ ubori nokukghora;+ zizonisahlela benitjhabalale. 23 Ngizokwenza izulu* lingasani enarhenenu, ngenze inarhenu ingasatheli.*+ 24 UJehova uzokwenza izulu lenarhenenu libe njengeputjhana nethuli lehla livela ezulwini bekube kulapho nitjhabalele khona. 25 UJehova uzokwenza bona nitjhatjalaliswe manabenu.+ Azonisahlela ngendlela yinye kodwana nina nizokubaleka ngeendlela ezilikhomba; yoke imibuso yephasi izokusaba nayibona okwenzeke kini.+ 26 Iindumbu zenu zizokuba kukudla kwayo yoke imihlobo yeenyoni neenlwana zephasini, zizokudla, angekhe kube nomuntu ozozithusa.+

27 “UJehova uzonimadlha ngamathumba weGibhide, iinlonda,* isibabu nobuzikazikani begodu ngekhe niphole. 28 UJehova uzonenza nihlanye, ningasaboni+ begodu nihlangahlangane. 29 Nizokuphumbutha emini lihlabile, njengalokha isiphofu nasiphumbutha ebumnyameni,+ akunalitho enizolenza elizokuphumelela; nizokuhlala nidlelezelwa, akekho ozonisindisa.+ 30 Uzokuthembisa umfazi umtjhado kodwana enye indoda izomkata. Uzokwakha indlu kodwana ngekhe uhlale kiyo.+ Uzokutjala isimu yamadiribe kodwana ngekhe uwadle.+ 31 Ikunzakho izokuhlatjwa phambi kwakho kodwana angekhe uyidle. Udumbanakho uzokwetjiwa phambi kwakho kodwana ngeze usamfumana. Imvakho izokunikelwa amanabakho kodwana akekho ozokusindisa. 32 Amadodanakho namadodakazakho azokunikelwa abanye abantu+ uqalile, uzowahlulukela kodwana ayikho into ozoyenza. 33 Isivuno sakho sizokudliwa babantu ongabaziko,+ uzokugandelelwa bewuphathwe kumbi. 34 Ozokubona kuzokwenza uhlanye.

35 “UJehova uzonimadlha ngamathumba abuhlungu nangalaphekiko emadolweni nemilenzeni, kusukela ngaphasi kwenyawo ukuyokufikela ehloko. 36 Nina nekosi enizoyikhetha uJehova uzoniqothela esitjhabeni eningakhenge nisazi nabokhokho benu abangakhenge basazi,+ nanilapho nizokulotjha abanye abozimu, abozimu abenziwe ngesigodo nangamatje.+ 37 Nanifika eendaweni uJehova aniqothela kizo, abantu bazonisaba ngebanga lezinto ezenzeke kini, bazonihleka bebahlekise ngani.+

38 “Nizokutjala imbewu enengi esimini kodwana enizokuvuna kuzokuba kuncani+ ngombana kuzokudliwa ziintethe. 39 Nizokutjala amasimu wamadiribe kodwana angeze nisele iwayini namkha niwavune,+ azokudliwa ziimbungu. 40 Esifundeni senu nizokuba nemithi yama-oliva kodwana angekhe nizizese ngamafuthawo ngombana ama-olivenu azokuthintitheka. 41 Nizokubeletha amadodana namadodakazi kodwana angekhe ahlale angewenu ngombana azokuthunjwa.+ 42 Iintethe zizokutjhabalalisa yoke imithenu neenthelo zenu. 43 Umuntu ovela kwenye inarha ohlala hlangana nani uzokuba namandla kunani, kukulapho nina niphelelwa mamandla ebeninawo. 44 Uzokuboleka kodwana wena angeze umboleke litho.+ Uzokudosa phambili, kukulapho wena uzabe umlandela.+

45 “Zoke iinqalekiswezi zizonehlela,+ zinigijimise bekube kulapho senitjhabalele khona+ ngombana akhenge nilalele ilizwi lakaJehova uZimenu, akhenge nilalele imiyalwakhe nemithethwakhe aniyale ngayo.+ 46 Zizokuhlala ziphezu kwenu neenzukulwaneni zenu, zibe litshwayo nesibonakaliso esingapheliko,+ 47 ngombana akhenge nilotjhe uJehova uZimenu nithabile lokha naninenala yezinto zoke.+ 48 UJehova uzokuthumela amanabenu bona azokulwa nani, nizowasebenzela+ nilambile,+ nomile, ninganazambatho begodu ninganalitho. Uzokubeka ijogi lesimbi phezu kweentamo zenu bekube kulapho nitjhabalele khona.

49 “UJehova uzokuthumela isitjhaba esivela kude+ bona sizonisahlela njengekhozi+ nalidla isilwana, ilimi elikhulunywa sitjhabeso angeze nilizwisise,+ 50 isitjhaba esinelaka, esingekhe sirhawukele omdala namkha sibe nomusa komncani.+ 51 Sizokudla ifuywakho nesivuno sakho bekube kulapho sikutjhabalalise khona. Angekhe sinitjhiyele iinthoro zenu, iwayini elitjha, amafutha, amakonyana namkha izimvu bekube kulapho sinitjhabalalise khona.+ 52 Sizonivalela, singavumi bona niphumele ngaphandle kwamadorobhenu bekube kulapho imithangalenu ephezulu nevikelekileko eniyithembileko iwile. Sizonivalela kiwo woke amadorobhenu enarheni uJehova uZimenu aninikele yona.+ 53 Nje-ke nizokudla abantwabenu, inyama yamadodanenu namadodakazenu+ uJehova uZimenu aniphe bona, ngebanga lokuvalelwa nokugandelelwa manabenu.

54 “Ngitjho nendoda enesineke hlangana nani angekhe izwele umfowabo namkha umkayo emthandako namkha amadodanayo aseleko, 55 ngebanga lokuthi amanabenu abhode amadorobho, ayayitshwenya, ayisanalitho, izokudla inyama yabantwana bayo begodu angekhe iphe muntu.+ 56 Nomfazi ophila mabothobotho, onesineke hlangana nani nongeze athintisa inyawo lakhe phasi ngebanga lokuthi uphila mabothobotho,+ ngeze azwele indodakhe ayithandako, indodanakhe namkha indodakazakhe, 57 angekhe afune ukupha nanyana ngubani inyama yabantwabakhe ngitjho nengubo yomntwana ephuma esibelethweni sakhe, koke lokhu uzokudlela emsitheleni ngebanga lokuvalelwa nokugandelelwa manaba emadorobhenenu.

58 “Naningatjhejisisi, nilalele woke amezwi womThetho atlolwe encwadini le,+ nisabe igama eliphazimulako+ nelibabazekako lakaJehova+ uZimenu, 59 uJehova uzonilethela ihlekelele, nina neenzukulwana zenu, ihlekelele ekulu nengapheliko+ nokugula okumbi okungapholiko. 60 Uzonibuyisela koke ukugula kweGibhide ebenikusaba, kuzoninamathela begodu angekhe kusuke kini. 61 Ngaphezu kwalokho, uJehova uzonilethela koke ukugula namkha isibetho esingakhenge sitlolwe encwadini yomThetho le bekube kulapho senitjhabalele. 62 Nanyana senibanengi njengeenkwekwezi zezulwini,+ bambalwa abazokusala+ ngombana akhenge nilalele ilizwi lakaJehova uZimenu.

63 “Njengombana uJehova akuthabela ukunenza niphumelele nibe banengi, uJehova uzokuthabela ukunitjhabalalisa aniqede; nizokutjhatjalaliswa enarheni eniyoyithatha.

64 “UJehova uzonirhatjha hlangana nazo zoke iintjhaba ukusukela komunye umkhawulo wephasi ukuya komunye,+ nanilapho nizokulotjha abozimu abenziwe ngeengodo nabenziwe ngamatje, nina nabokhokho benu eningakhenge nibazi.+ 65 Angekhe nibe nokuthula hlangana neentjhabezo+ namkha nibe nendawo yokuhlala. UJehova uzonenza nibe nevalo,+ ningasaboni emehlweni begodu nilahle ithemba.+ 66 Ukuphila kwenu kuzokuba sengozini, nizokuhlala nisaba ubusuku nemini; angekhe niqiniseke ukuthi nizokusinda na. 67 Ekuseni nizokuthi, ‘Ngathana kusebusuku!’ Ebusuku nithi, ‘Ngathana kusekuseni’ ngebanga lokusaba nalokho enizokubona. 68 UJehova uzonibuyisela eGibhide ngomkhumbi, nizokukhamba ngendlela athi ngayo kini, ‘Angeze nisayibona godu,’ nanifika lapho nizozithengisa, nibe ziingqila eziduna nezisikazi kodwana akunamuntu ozonithenga.”

29 Naka amezwi wesivumelwano uJehova ayala uMosi bona asenze nabantu bakwa-Israyeli enarheni yakwaMowabi, ukungezelela esivumelwaneni asenza nabo eRhorebe.+

2 Nje-ke uMosi wabiza woke ama-Israyeli wathi kiwo: “Nikubonile koke uJehova akwenza phambi kwenu enarheni yeGibhide, kuFaro, kizo zoke iinsebenzi zakhe nakiyo yoke inarhakhe,+ 3 iinlingo ezikulu enazibonako, amatshwayo amakhulu neemangaliso.+ 4 Bekube kunamhlanjesi, uJehova akhenge aninikele amandla wokuzwisisa bona izinto enazibonako nenazizwako zitjho ukuthini.+ 5 ‘Lokha nangininqophisako emmangweni iminyaka ema-40,+ izambatho zenu akhenge zirathuke namapatlagwanenu akhenge aphele.+ 6 Akhenge nidle uburotho, akhenge nisele iwayini namkha utjwala bona nazi ukuthi nginguJehova uZimenu.’ 7 Nigcine nifikile endaweni le, uSirhoni ikosi yeRhetjhibhoni+ no-Ogi ikosi yeBhatjhani+ baphuma bona bazokulwa nathi kodwana sabahlula.+ 8 Ngemva kwalokho, sathatha inarhabo sayinikela bakwaRubeni, bakwaGadi nengcenye yekoro yakwaManase bona ibe lilifa labo.+ 9 Nje-ke lalelani amezwi wesivumelwanesi niwenze, khona koke kuzanikhambela kuhle.+

10 “Namhlanjesi noke nijame phambi kwakaJehova uZimenu, iinhloko zeenkoro zenu, amadoda amadala wenu, iinkhulu zenu, woke amadoda wakwa-Israyeli, 11 abantwana benu, abafazi benu,+ abantu abavela kwezinye iinarha+ abahlala hlangana nani emakampenenu, kusukela konithezela iinkuni ukuya konikhela amanzi. 12 Nilapha bona nenze isifungo sokwenza isivumelwano noJehova uZimenu, isivumelwano uJehova uZimenu asenza nani namhlanjesi+ 13 khona azanenza abantu bakhe namhlanjesi+ begodu yena abe nguZimenu+ njengombana anithembisa, wafunga kibokhokho benu u-Abrahama,+ u-Isaka+ noJakopo.+

14 “Isivumelwano nesifungwesi angisenzi nani kwaphela, 15 kodwana ngisenza nalabo abajame nathi namhlanjesi phambi kwakaJehova uZimethu nalabo abangekho namhlanjesi. 16 (Ngombana niyazi kuhle indlela ebesiphila ngayo eGibhide nendlela esidlule ngayo hlangana neentjhaba ezihlukahlukeneko.+ 17 Benijayele ukubona izinto zazo ezinyenyisako, iinthombe zazo ezinyenyisako*+ ezenziwe ngesigodo nangamatje, isiliva nangegolide.) 18 Tjhejani bona kungabi nendoda namkha umfazi, umndeni namkha ikoro hlangana nani namhlanjesi ofulathela uJehova uZimethu ayokulotjha abozimu beentjhabezo,+ umuntu loyo ufana nemirabhu yesitjalo esikhula siveze iinthelo ezibabako nezinetjhefu.+

19 “Nange umuntu ezwa amezwi wesifungwesi azikhakhazise athi, ‘Akunalitho elizokwenzeka kimi ngitjho nanyana ngiphila ngendlela engifuna ngayo,’ lokho kuzokutjhabalalisa nanyana ngubani oseduze kwakhe, 20 uJehova angekhe amlibalele.+ Kunalokho, uJehova uzokusilingeka khulu ngebanga lomuntu loyo, nesiqalekiso soke esitlolwe encwadini le sizokwehlela phezu kwakhe,+ uJehova uzolisula igama lakhe ephasini. 21 UJehova uzokuhlukanisa umuntu lo kizo zoke iinkoro zakwa-Israyeli amenze ehlelwe yihlekelele ngokuya ngokwesiqalekiso sesivumelwano esitlolwe encwadini yomThetho le.

22 “Iinzukulwana zenu ezisezako nomuntu ovela kwenye inarha ozokuza asuka enarheni ekude bazokubona iimbetho neenhlekelele ezilethwe nguJehova. 23 Wathumela isibabuli, itswayi nomtjhiso khona inarha ingekhe isatjalwa namkha kuhlonywe litho, izokufana nalokha uJehova atjhabalalisa iSodoma neGomora,+ i-Adima neTseboyimu+ ngelaka lakhe 24 amadodanenu nabantu abavela kwezinye iinarha nazo zoke iintjhaba bazokukateleleka ukuthi, ‘Kubayini uJehova enze lokhu enarheni?+ Yini emenze wasilingeka kangaka?’ 25 Bazokuthi, ‘Kungombana baphule isivumelwano sakaJehova,+ uZimu wabokhokho babo asenza nabo nakabakhupha enarheni yeGibhide.+ 26 Kodwana balotjha abanye abozimu babakhothamela, abozimu abangakhenge babazi begodu uZimu angakhenge abavumele bona babalotjhe.+ 27 UJehova wasilingeka khulu ngebanga lenarha leyo, wayehlisela isiqalekiso esitlolwe encwadini le.+ 28 UJehova asilingekile, wabasiphula enarhenabo wabasa kwenye inarha lapha bakhona namhlanjesi.’+

29 “UJehova uZimethu wazi zoke izinto ezifihliweko,+ uzambulela thina neenzukulwana zethu zoke khona sizakwenza koke okutjhiwo mamezwi womThetho lo.+

30 “Amezwi la nakenzeka kini, isibusiso nesiqalekiso engisibeke phambi kwenu+ bona nikhethe begodu niwakhumbule+ nikizo zoke iintjhaba uJehova uZimenu anirhatjhele kizo,+ 2 nina namadodanenu nibuyele kuJehova uZimenu+ ngeenhliziyo zenu zoke nangemiphefumulwenu* yoke nilalele ilizwi lakhe enginiyala ngalo namhlanjesi.+ 3 UJehova uZimenu uzonibuyisa ekuthunjweni,+ anirhawukele,+ anibuthelele godu, nisuke eentjhabeni uJehova uZimenu ebekanirhatjhele kizo.+ 4 Ngitjho nanyana ningarhatjhekela emkhawulweni wephasi, uJehova uZimenu uzonibuthelela anibuyise.+ 5 UJehova uZimenu uzonisa enarheni yabokhokho benu, izokuba ngeyenu. Uzonenza niphumelele, anenze nibe banengi ukudlula abokhokho benu.+ 6 UJehova uZimenu uzokuhlanza iinhliziyo zenu neenhliziyo zeenzukulwana zenu+ khona nizokuthanda uJehova uZimenu ngeenhliziyo zenu zoke nangemiphefumulwenu* yoke, niphile.+ 7 UJehova uZimenu uzokuletha zoke iinqalekiswezi phezu kwamanabenu anihloyako nanihlunguphazako.+

8 “Nizokubuya, nilalele ilizwi lakaJehova nilandele yoke imiyalwakhe enginiyala ngayo namhlanjesi. 9 UJehova uZimenu uzonibusisa kikho koke enikwenzako, andise abantwabenu,+ ifuywenu nalokho enikuvunako, ngombana uJehova uzokuthabela ukunenza niphumelele godu njengombana athabela ukwenza abokhokho benu baphumelele.+ 10 Nizokulalela ilizwi lakaJehova uZimenu, nilalele imiyalwakhe nemithethwakhe etlolwe encwadini yomThetho begodu nizokubuyela kuJehova uZimenu ngeenhliziyo zenu zoke nangemiphefumulwenu* yoke.+

11 “Umyalo enginiyala ngawo namhlanjesi awusibudisi kini begodu awusikude nani.+ 12 Awusisezulwini bona ningathi, ‘Ngubani ozokukhuphukela ezulwini ayosithathela wona bona siwuzwe besiwenze?’+ 13 Awusingakwelinye ihlangothi lelwandle bona ningathi, ‘Ngubani ongasiyamela ilwandle ayosithathela wona bona siwuzwe besiwenze?’ 14 Ngombana ilizwi liseduze khulu nani, lisemlonyenenu neenhliziyweni zenu+ bona niphile ngalo.+

15 “Qalani, ngibeka phambi kwenu ukuphila nokuhle, ukufa nokumbi.+ 16 Nange nilalela imiyalo kaJehova uZimenu enginiyala ngayo namhlanjesi, ngokuthanda uJehova uZimenu,+ ngokukhamba eendleleni zakhe nangokulalela imiyalwakhe, imithethwakhe neenqophiso zakhe, nizokuphila nibe banengi+ begodu uJehova uZimenu uzonibusisa enarheni eniyoyithatha.+

17 “Nange iinhliziyo zenu ziphambuka,+ ningalaleli begodu niyengeke bona nikhothamele abanye abozimu benibalotjhe,+ 18 namhlanjesi ngiyanitjela ngithi nizokutjhabalala.+ Angekhe niphile isikhathi eside enarheni eniyama iJordani bona niyoyithatha. 19 Ngibeka izulu nephasi bona zibe bofakazi ngokujamelene nani, namhlanjesi ngibeka ukuphila nokufa phambi kwenu, isibusiso nesiqalekiso,+ kufuze nikhethe ukuphila khona nizokuragela phambili niphila,+ nina neenzukulwana zenu,+ 20 ngokuthanda uJehova uZimenu,+ ngokulalela ilizwi lakhe nangokunamathela kuye+ ngombana yena ukuphila kwenu begodu ngaye nizokukghodlhelela isikhathi eside enarheni uJehova afunga ukuyinikela abokhokho benu, u-Abrahama, u-Isaka, noJakopo.”+

31 UMosi waphuma wayokutjela woke ama-Israyeli amezwi la, 2 wathi kiwo: “Namhlanjesi sengineminyaka eli-120.+ Angekhe ngisavunyelwa ukunidosa phambili ngombana uJehova uthe kimi, ‘Angekhe uyame iJordani le.’+ 3 UJehova uZimenu nguye ozokuyama phambi kwenu, uzokutjhabalalisa iintjhabezi phambi kwenu begodu nizoziqotha.+ UJotjhuwa nguye ozonidosa phambili bona niyokuyama njengombana uJehova akhulumile.+ 4 UJehova uzozitjhabalalisa njengalokha nakatjhabalalisa uSirhoni+ no-Ogi,+ amakhosi wama-Amori kuhlanganise nenarhawo.+ 5 UJehova uzonihlulela zona, enizokwenza eentjhabenezo kufuze kukhambisane nayo yoke imiyalo engininikele yona.+ 6 Qinani nibe nesibindi.+ Ningangenwa mamanzi emadolweni phambi kwabo+ ngombana uJehova uZimenu ukhamba nani. Angekhe anilahle namkha anitjhiye.”+

7 UMosi wabiza uJotjhuwa phambi kwawo woke ama-Israyeli, wathi kuye: “Qina ube nesibindi+ ngombana nguwe ozokungenisa abantwaba enarheni uJehova afunga kibokhokho babo bona uzobanikela yona, wena uzobanikela yona bona ibe lilifa labo.+ 8 UJehova ukhamba phambi kwenu begodu uzokuhlala anani.+ Angekhe anilahle namkha anitjhiye. Ningathukwa namkha nihlengezele.”+

9 Nje-ke uMosi watlola umThetho lo,+ wawunikela abaphristi, amaLevi aphatha umfaji wesivumelwano sakaJehova nabo boke abadala bakwa-Israyeli. 10 UMosi wabayala, wathi: “Qobe ekupheleni kweminyaka elikhomba, ngesikhathi esibekiweko ngomnyaka wokutjhatjhululwa,+ hlangana nomNyanya wemiTlhatlhana,+ 11 lokha woke ama-Israyeli nakavela phambi kwakaJehova+ uZimenu endaweni ayikhethileko, kufuze nifundele woke ama-Israyeli umThetho lo awuzwe.+ 12 Buthela abantu ndawonye,+ amadoda, abafazi, abantwana nomuntu ovela kwenye inarha ohlala emadorobhenenu, khona bazakufunda ngoJehova uZimenu, bamlalele bebamsabe, benze koke okutjhiwo mamezwi womThetho lo. 13 Amadodanawo angawaziko umThetho lo, azokulalela+ bekafunde ukusaba uJehova uZimenu woke amalanga enizowahlala enarheni eniyama iJordani bona niyoyithatha.”+

14 UJehova wathi kuMosi: “Qala! Isikhathi sokuthi uhlongakale sesitjhidele.+ Biza uJotjhuwa, niye etendeni lokuhlangana khona ngizambeka bona abe mdosiphambili.”+ Nje-ke uMosi noJotjhuwa baya etendeni lokuhlangana bajama lapho. 15 UJehova wavela etendeni asesikeni yelifu, isika yelifu yajama ebungenweni betende.+

16 UJehova wathi kuMosi: “Qala! Sewuzokuhlongakala, abantwaba bazokuthoma ukungathembeki kimi balotjhe abosingazimu abangabaziko abahlangana nabo enarheni abayoyithatha.+ Bazongikhohlwa,+ baphule isivumelwano engasenze nabo.+ 17 Ngesikhatheso ngizokusilingeka khulu ngebanga labo,+ ngizobalisa+ ngibafihlele ubuso bami+ bekube kulapho batjhabalala khona. Ngemva kweenhlekelele nokugandeleleka okuzobehlela,+ bazokuthi, ‘Iinhlekelelezi azisehleli ngebanga lokuthi uZimethu akasihlangana nathi na?’+ 18 Ngelangelo ngizobafulathela ngebanga lakho koke ukukhohlakala abakwenzileko ngokulotjha abanye abozimu.+

19 “Nje-ke, zitloleleni ingoma le+ niyifundise ama-Israyeli.+ Afundiseni yona khona izakuba ngufakazami ngokujamelene nabantu bakwa-Israyeli.+ 20 Nangibaletha enarheni engafunga ngayo kibokhokho babo,+ inarha egeleza ibisi neliju,+ bazokudla basuthe baphumelele,+ bazokulotjha abanye abozimu, bangidelele, baphule nesivumelwano sami.+ 21 Lokha nabehlelwa ziinhlekelele ezinengi begodu bagandeleleka,+ ingoma le izokuba ngufakazi kibo (neenzukulwana zabo akukafuzi ziyilibale) ngombana ngaphambi kokuthi ngiwalethe enarheni engafunga ngayo le, besele ngikwazi acabanga ukukwenza.”+

22 Nje-ke uMosi wayitlola phasi ingoma le ngelangelo, wayifundisa ama-Israyeli.

23 UZimu wabeka uJotjhuwa+ indodana kaNuni bona abe mrholi, wathi kuye: “Qina, ube nesibindi+ ngombana nguwe ozokungenisa ama-Israyeli enarheni engafunga ukuyinikela wona,+ ngizokuhlala nginawe.”

24 Kwathi uMosi nakaqeda ukutlola woke amezwi womThetho lo encwadini,+ 25 wayala amaLevi athwala umfaji wesivumelwano sakaJehova, wathi: 26 “Thathani incwadi yomThetho le+ niyibeke ngehlangothini lomfaji+ wesivumelwano sakaJehova uZimenu, izokuba ngufakazi kaZimu ngokujamelene nani. 27 Ngikwazi kuhle ukuvukela kwenu+ nokuba nekani kwenu.+ Nanivukele uJehova ngisese nani, ngisaphila, nizokuvukela kangangani nasele ngihlongakele! 28 Ngibuthela boke abadala beenkoro zenu, ngizokukhuluma amezwi la bawezwe begodu ngenza izulu nephasi bona libe bofakazi ngokujamelene nabo.+ 29 Ngazi kuhle bona ngemva kokuhlongakala kwami nizokwenza ngokukhohlakala,+ nizokuphambuka endleleni enganiyala ngayo. Ihlekelele izonehlela+ esikhathini esizako ngombana nizokwenza okumbi phambi kwakaJehova, nimzwise ubuhlungu ngezenzo zenu.”

30 UMosi wakhuluma amezwi wengoma le, kusukela ekuthomeni ukufikela emaphethelweni ihlangano yoke yakwa-Israyeli ilalele:+

 3 Ngizokumemezela igama lakaJehova.+

Ngikhulume ngobukhulu bakaZimethu!+

 5 Bababantu abenze ngokukhohlakala.+

Abasibantwabakhe, ngibo abanomtjhapho.+

Basizukulwana esikhohlakeleko nesikhohlisako!+

15 UJetjhuruni* nakanonako, wavukela umphathakhe.

Unonile, wasutha khulu, waba budisi.+

29 Ngathana bebahlakaniphile!+ Bebazokucabangisisa ngalokhu.+

Bebazokucabanga ngomphumelabo.+

Abasikime babasize.

Ababe yindawenu yesiphephelo.

Ngiyabulala, ngiyaphilisa.+

44 UMosi noHotjheya*+ indodana kaNuni beza bakhuluma woke amezwi wengoma le, abantu balalele.+ 45 UMosi nakaqeda ukukhuluma woke amezwi la kuma-Israyeli, 46 wathi kiwo: “Cabangisisani ngawo woke amezwi enginiyelelise ngawo namhlanjesi,+ khona nizakuyala amadodanenu bona alalele woke amezwi womThetho lo.+ 47 Ngombana amezwi la akusimamezwi angatjho litho kini kodwana nizokuphila+ nange niwalalela begodu nange niwalalela nizokuphila isikhathi eside enarheni eniyama iJordani bona niyoyithatha.”

48 Ngelangeli uJehova wakhuluma noMosi, wathi: 49 “Khuphukela entabeni i-Abarimu,+ iNtaba iNebo+ esenarheni yakwaMowabi, eqale ngeJerikho ubone inarha yeKanana engiyinikela ama-Israyeli bona ibe lilifa lawo.+ 50 Uzokuhlongakalela entabeni ozokukhuphukela kiyo le begodu uzokubulungwa nabantu bekhenu, njengombana u-Aroni ahlongakala eNtabeni iHori+ wabulungwa nabantu bekhabo, 51 ngombana nobabili akhenge nithembeke kimi hlangana nama-Israyeli emanzini weMeriba+ yeKhadetjhi, emmangweni weTsini ngombana akhenge ningicwengise phambi kwabantu bakwa-Israyeli.+ 52 Uzokubona inarha yakhona ukude kodwana angekhe ungene enarheni leyo engiyinikela abantu bakwa-Israyeli.”+

33 Lesi sibusiso uMosi, inceku kaZimu weqiniso asimemezela kuma-Israyeli ngaphambi kokuhlongakala kwakhe.+ 2 Wathi:

 7 Watjho isibusiswesi ngoJuda:+

 8 NgoLevi wathi:+

12 NgoBhenjamini wathi:+

13 NgoJosefa wathi:+

18 NgoZebuloni wathi:+

19 Bazokubizela abantu entabeni.

Kulapho bazokunikela khona imihlatjelo yokulunga.

20 NgoGadi wathi:+

“Ubusisiwe loyo onabisa imikhawulo kaGadi.+

Abadosiphambili babantu bazokuhlangana.

22 NgoDani wathi:+

“UDani libhubezana.+

Uzokusahlela asuka eBhatjhani.”+

23 Wathi ngoNafitali:+

Uzokuhlala etjingalanga nesewula.”

24 Ngo-Atjheri wathi:+

“U-Atjheri akabusiswe ngamadodana.

29 Niyathaba ma-Israyeli!+

34 UMosi wakhuphuka asuka emmangweni othabaleleko wakwaMowabi bewaya eNtabeni iNebo,+ esiqongolweni sePisiga,+ esiqale iJerikho.+ UJehova wamtjengisa yoke inarha kusukela eGiliyadi ukuya kwaDani,+ 2 inarha yakwaNafitali, inarha yakwa-Efrayimu nenarha yakwaManase nayo yoke inarha yakwaJuda ukuyokufika ngelwandle* elingetjingalanga,+ 3 iNegebhi+ nesiFunda+ seJordani, umrhoba othabaleleko weJerikho, idorobho lemithi yesundu ukuyokufika eTsowari.+

4 UJehova wathi kuye: “Le yinarha engafunga ngayo ku-Abrahama, u-Isaka, uJakopo, ngathi, ‘Ngizoyinikela iinzukulwana zenu.’+ Ngikuvumele ukuthi uyibone kodwana angekhe uyamele kiyo.”+

5 Ngemva kwalokho, uMosi inceku kaJehova wafela lapho enarheni yakwaMowabi njengombana uJehova atjhwile.+ 6 Wambulunga emrhobeni enarheni yakwaMowabi, phambi kweBhethe-Pewori, akunamuntu olaziko ithuna lakhe bekube kunamhlanjesi.+ 7 UMosi bekaneminyaka eli-120 nakahlongakalako.+ Amehlwakhe bekasabona kuhle begodu angakaphelelwa mamandla. 8 Abantu bakwa-Israyeli balilela uMosi emmangweni othabaleleko wakwaMowabi amalanga ama-30.+ Ngemva kwalokho, amalanga wokulilela uMosi aphela.

9 UJotjhuwa indodana kaNuni bekahlakaniphile ngombana uMosi wabeka isandla sakhe phezu kwakhe,+ ama-Israyeli amlalela enza njengombana uJehova bekayale uMosi.+ 10 Akhenge kusaba nomphorofidi onjengoMosi+ kwa-Israyeli, loyo uJehova ebekakhuluma naye ubuso nobuso.+ 11 Wenza woke amatshwayo neemangaliso uJehova amthuma bona azenze eGibhide, kuFaro, kizo zoke iinsebenzi zakhe nakiyo yoke inarhakhe,+ 12 kuhlanganise isandla esinamandla nezenzo ezibabazekako uMosi azenza phambi kwama-Israyeli woke.+