HAGAYI

1 Ngomnyaka wesibili weKosi uDariyasi, ngenyanga yesithandathu ngelanga lokuthoma lenyanga, ilizwi lakaJehova lafika kuZerubhabheli+ indodana kaTjheyalitiyeli umbusi wakwaJuda, nakuJotjhuwa indodana kaJehozadaki umphristi ophakemeko, ngomphorofidi uHagayi*+ lathi:

2 “Ngilokhu uJehova wamabutho akutjhoko, ‘Abantwaba bathi, “Isikhathi sokwakha* indlu kaJehova asikafiki.”’”+

3 Ilizwi lakaJehova lafika godu ngoHagayi+ umphorofidi, lathi: 4 “Kghani lesi sikhathi sokobana nihlale ngeendlini ezakhiwe ngeengodo ezihle, kukulapho indlu le imarubhi?+ 5 Nje-ke ngilokhu uJehova wamabutho akutjhoko, ‘Cabangisisani ngeendlela zenu. 6 Nitjale imbewu enengi, kodwana nivuna kancani.+ Niyadla, kodwana anisuthi. Niyasela, kodwana ananeliseki. Niyambatha, kodwana anifuthumali. Loyo orholako ngebanga lomsebenzakhe ufaka umrholwakhe esikhwameni esivuzako.’”

7 “Ngilokhu uJehova wamabutho akutjhoko, ‘Cabangisisani ngeendlela zenu.’

8 “‘Khuphukelani entabeni nize neengodo.+ Nakhe indlu+ bona ngithabe ngayo begodu ngiphazinyuliswe,’+ kutjho uJehova.”

9 “‘Benilindele okunengi nafumana okuncani; begodu nanikungenisa ngendlini, ngakuphephula.+ Ngebanga lani? Kutjho uJehova wamabutho. ‘Ngombana indlwami imarubhi, kukulapho ngamunye wenu aya phasi phezulu atjheja indlwakhe.+ 10 Yeke izulu akhenge linivezele umbethalo, nephasi akhenge linivezele umkhiqizwalo. 11 Bengisolo ngenza inarhenu neentaba zome, okwabangela bona kutlhayele iinthoro, iwayini elitjha, amafutha neentjalo, kokubili nina nefuyweni niyatlhaga begodu woke umsebenzenu obudisi ulilize.’”

12 UZerubhabheli+ indodana kaTjheyalitiyeli+ noJotjhuwa indodana kaJehozadaki+ umphristi ophakemeko, nabo boke abantu balalela ilizwi lakaJehova uZimabo namezwi kaHagayi umphorofidi, ngombana uJehova uZimabo bekamthumile; begodu abantu bathoma ukusaba ngebanga lakaJehova.

13 Ngemva kwalokho uHagayi isithunywa sakaJehova, wanikela abantu umlayezo lo ngokuvumelana nomyalo ovela kuJehova wathi: “‘Nginani,’+ kutjho uJehova.”

14 Yeke uJehova wakhuthaza*+ uZerubhabheli indodana kaTjheyalitiyeli umbusi wakwaJuda,+ noJotjhuwa+ indodana kaJehozadaki umphristi ophakemeko, nabo boke abantu; yeke beza bathoma ukwakha indlu kaJehova wamabutho, uZimabo.+ 15 Bathoma umsebenzi lo ngelanga lama-24 lenyanga yesithandathu ngomnyaka wesibili weKosi uDariyasi.+

2 Ngenyanga yekhomba ngelanga lama-21 lenyanga, ilizwi lakaJehova lafika kumphorofidi uHagayi,+ lathi, 2 “Ngibawa uthi kuZerubhabheli+ indodana kaTjheyalitiyeli, umbusi wakwaJuda+ noJotjhuwa+ indodana kaJehozadaki,+ umphristi ophakemeko nabo boke abantu: 3 ‘Ngubani oseleko hlangana nani owabona indlu le isese sephazimulwenayo yaphambilini?+ Ibonakala injani nje? Ayisililize na nayimadaniswa nephazimulwayo yaphambilini?’+

4 “‘Kodwana nje yiba nesibindi Zerubhabheli,’ kutjho uJehova, ‘Yiba nesibindi Jotjhuwa ndodana kaJehozadaki, umphristi ophakemeko.’

“‘Yibani nesibindi noke nina bantu benarha le,’+ kutjho uJehova, ‘begodu nisebenze.’

“‘Ngombana nginani,’+ kutjho uJehova wamabutho. 5 ‘Khumbulani enganithembisa khona naniphuma eGibhide+ begodu ummoyami uhlala hlangana nani.*+ Ningesabi.’”+

6 “Ngombana nakhu uJehova wamabutho akutjhoko, ‘Godu, kungasikade, ngizokusikinya izulu nephasi nelwandle nenarha eyomileko.’+

7 “‘Ngizokusikinya zoke iintjhaba begodu izinto eziligugu zazo zoke iintjhaba zizokungena;+ ngizokuzalisa indlu le ngephazimulo,’+ kutjho uJehova wamabutho.

8 “‘Isiliva ngelami negolide ngelami,’ kutjho uJehova wamabutho.

9 “‘Iphazimulo ezako yendlu le izokuba yikulu ukudlula yaphambilini,’+ kutjho uJehova wamabutho.

“‘Begodu indawo le ngizoyinikela ukuthula,’+ kutjho uJehova wamabutho.”

10 Ngelanga lama-24 ngenyanga yethoba, ngomnyaka wesibili kaDariyasi, ilizwi lakaJehova lafika kuHagayi+ umphorofidi, lathi: 11 “Ngilokhu uJehova wamabutho akutjhoko, ‘Ngibawa ubuze abaphristi ngomthetho, uthi:+ 12 “Nangabe umuntu uphethe inyama ecwengileko esambathweni* sakhe begodu isambathweso sithinte uburotho namkha isitjulu namkha iwayini namkha amafutha namkha omunye umhlobo wokudla, kuzokucwengeka na?”’”

Abaphristi baphendula bathi: “Awa!”

13 Nje-ke uHagayi wathi: “Nangabe othileko usilaphele ngebanga lokuthinta isidumbu, uthinta okhunye kwalokhu, kuzokusilaphala na?”+

Abaphristi baphendula bathi: “Kuzokusilaphala.”

14 Nje-ke uHagayi wathi: “‘Banjalo-ke abantwaba begodu sinjalo nesitjhabesi phambi kwami,’ kutjho uJehova begodu unjalo woke umsebenzi wezandla zabo; nanyana yini abayilethako isilaphele.’

15 “‘Nje-ke ngiyabawa, cabangisisani ngalokhu kusukela namhlanjesi ukuya phambili: Ngaphambi kobana ilitje libekwe phezu kwelitje ethempelini lakaJehova,+ 16 bebunjani ubujamo ngesikhatheso? Lokha umuntu nakeza equbini lekoroyi alindele ukuthola iinlinganiso ezima-20 kodwana afumane ezili-10 kwaphela; nalokha umuntu nakeza endaweni ekutlhodlhelwa kiyo iwayini azokukha iinlinganiso ezima-50 kiyo kodwana afumane ezima-20;+ 17 Nganibetha, ngabetha yoke imisebenzi yezandla zenu ngomoya otjhabalalisako, ubori+ nangesinanja kodwana akekho namunye wenu owaphendukela kimi,’ kutjho uJehova.  

18 “‘Ngibawa nicabangisise ngalokhu kusukela namhlanjesi ukuya phambili, kusukela ngelanga lama-24 enyangeni yethoba, kusukela ngelanga isisekelo sethempeli lakaJehova esabekwa ngalo;+ cabangisisani ngalokhu: 19 Kusese nembewu na ngesilulwini?+ Isimu yamadiribe, umuthi wamafeyi, wamarharinada newama-oliva, akukatheli. Kusukela namhlanjesi ngizokuletha isibusiso.’”+

20 Ilizwi lakaJehova lafika ihlandla lesibili kuHagayi ngelanga lama-24 lenyanga leyo,+ lathi: 21 “Tjela uZerubhabheli umbusi wakwaJuda, uthi, ‘Ngizokusikinya izulu nephasi.+ 22 Ngizokuketula isihlalo sobukhosi semibuso begodu ngiqede amandla wemibuso yeentjhaba;+ ngizokuketula ikarana nabakhweli bayo begodu iinjomani nabakhweli bazo, bazokuwa, ngamunye ngesabula yomfowabo.’”+

23 “‘Ngelangelo,’ kutjho uJehova wamabutho, ‘Ngizokuthatha wena ncekwami Zerubhabheli+ ndodana kaTjheyalitiyeli,’+ kutjho uJehova begodu ngizokwenza ube njengedzilamnwana yetshwayo ngombana ngikhethe wena,’ kutjho uJehova wamabutho.”