ZAKARIYA
1 Ngenyanga yobunane emnyakeni wesibili wokubusa kwakaDariyasi,+ ilizwi lakaJehova lafika kumphorofidi uZakariya*+ indodana kaBherekiya indodana ka-Ido, lithi: 2 “UJehova wasilingeka khulu ngebanga laboyihlomkhulu.+
3 “Yithi kibo, ‘UJehova wamabutho uthi: “‘Buyelani kimi’ kutjho uJehova wamabutho, ‘nami ngizokubuyela kini,’+ kutjho uJehova wamabutho.”’
4 “‘Ningabi njengaboyihlomkhulu, abaphorofidi abathi ngabo: “Nakhu okutjhiwo nguJehova wamabutho, ‘Ngiyanibawa, tjhugulukani eendleleni zenu ezimbi nezenzweni zenu ezikhohlakeleko.’”’+
“‘Kodwana akhenge bangilalele begodu akhenge batjheje namezwami,’+ kutjho uJehova.
5 “‘Baphi aboyihlomkhulu njenganje? Kghani abaphorofidi baphila ngokungapheliko? 6 Malungana namezwami nemithetho engayala ngayo iinceku zami, abaphorofidi, aboyihlomkhulu akhenge bakubone lokho kwenzeka na?’+ Babuya kimi bathi: ‘UJehova wamabutho wenze lokho ebekacabanga ukukwenza kithi ngokuya ngokweendlela zethu nezenzo zethu.’”+
7 Ngelanga lama-24 enyangeni ye-11, okuyinyanga kaTjhebati,* emnyakeni wesibili wokubusa kwakaDariyasi,+ ilizwi lakaJehova lafika kumphorofidi uZakariya, indodana kaBherekiya indodana ka-Ido, lithi: 8 “Ngabona embonweni ebusuku. Bekunendoda ekhwele injomani ebomvu, yajama hlangana nemithi yemiritlili* ngemrhobeni; ngemva kwayo bekunenjomani ebomvu, enzotho nemhlophe.”
9 Nje-ke ngathi: “Bobani laba, kosami?”
Ingilozi ebeyikhuluma nami yaphendula yathi: “Ngizokutjengisa ukuthi bobani laba.”
10 Indoda ebeyijame hlangana nemithi yemiritlili yathi: “Laba ngilaba uJehova abathumele bona bayokuqala ephasini.” 11 Bathi engilozini kaJehova ebeyijame hlangana nemithi yemiritlili: “Sikhambakhambile ephasini, safumana bona iphasi loke linokuthula, alinayo ihlangahlangano.”+
12 Ingilozi kaJehova yathi: “Jehova wamabutho, kuzabe kube nini ungafuni ukwenzela iJerusalema namadorobho wakwaJuda umusa,+ ngombana bewasola akusilinga iminyaka ema-70?”+
13 UJehova waphendula ingilozi ebeyikhuluma nami ngamezwi anomusa naduduzako. 14 Ngemva kwalokho, ingilozi ebeyikhuluma nami yathi kimi: “Memezela, ‘Nakhu uJehova wamabutho akutjhoko: “Ngizimisele ukuvikela iJerusalema neZiyoni.+ 15 Ngisilingeke khulu ngeentjhaba ezicabanga bona ziphephile.+ Ngizimisele ukujezisa abantu ngesijeziso esilingeneko+ kodwana iintjhabezo zibalethele ihlekelele.”’+
16 “Nakhu uJehova akutjhoko: ‘“Ngizolirhawukela godu iJerusalema+ begodu indlwami izokwakhiwa lapho,”+ kutjho uJehova wamabutho, intambo yokulinganisa izokululelwa eJerusalema.”’+
17 “Memezela godu uthi, ‘Nakhu uJehova wamabutho akutjhoko: “Amadorobhami azokugeleza okulungileko godu; uJehova uzokududuza iZiyoni godu,+ akhethe iJerusalema godu.”’”+
18 Nje-ke ngaqala phezulu, ngabona iimpondo ezine.+ 19 Ngabuza ingilozi ebeyikhuluma nami, ngathi: “Khuyini lokhu?” Yaphendula yathi: “Lezi ziimpondo ezaphadlhalaja uJuda,+ u-Israyeli+ neJerusalema.”+
20 UJehova wangitjengisa amadoda amane aziinkghwari. 21 Ngabuza ngathi: “Azokwenzani amadoda la?”
Wathi: “Aziimpondo ezatjhabalalisa uJuda kangangobana akakho owakghona ukujamelana nazo. Amanye azokuza azozithusa begodu atjhabalalise iimpondo zeentjhaba ezijamelene nenarha yakwaJuda bona ziyitjhabalalise.”
2 Ngaqala phezulu bese ngabona indoda iphethe intambo yokulinganisa.+ 2 Ngayibuza ngathi: “Uyaphi?”
Yathi: “Ngiyokulinganisa iJerusalema, ngibone ububanzi balo nobude balo.”+
3 Ingilozi leya ebengikhuluma nayo yasuka kimi, kweza enye ingilozi yazokuhlangana nayo. 4 Yathi kiyo: “Gijimela lapha uyokutjela isokanela ukuthi, ‘“IJerusalema izokuba yindawo evulekileko* ngebanga labantu nefuyo ekilo.+ 5 UJehova uthi, “Kilo ngizokuba liboda lomlilo mahlangothi woke+ begodu ngizokuba yiphazimulo yalo.”’”+
6 “Yewize! Yewize! Baleka enarheni yetlhagwini,”+ kutjho uJehova.
“Ngombana ngikwenze warhatjhekela emahlangothini amane wephasi,”+ kutjho uJehova.
7 “Yenize bantu beZiyoni, phunyurhani nina enihlala nendodakazi yeBhabhiloni.+ 8 Ngemva kobana uJehova wamabutho aphazinyulisiwe, wangithumela eentjhabeni ebezinidlelezela+ wathi: “Nanyana ngubani onithintako, uthinta ilihlo lami.+ 9 Nje ngizokuphakamisa isandla sami ngokujamelene nazo, iingqila zazo zizokuthatha ipahla yeentjhabezi,+ ngokuqinisekileko nina nizokwazi bona uJehova wamabutho ungithumile.
10 “Bhina ngethabo ndodakazi yeZiyoni+ ngombana ngiyeza,+ ngizokuhlala hlangana nani,”+ kutjho uJehova. 11 “Iintjhaba ezinengi zizokuba ngehlangothini lakaJehova ngelangelo,+ zizokuba sitjhaba sami begodu ngizokuhlala hlangana nani.” Nizokwazi ukuthi nguJehova wamabutho ongithume kini. 12 UJehova uzokuthatha ipahla kaJuda njengelifa lakhe endaweni ecwengileko, godu uzolikhetha iJerusalema.+ 13 Thulani noke nina bantu phambi kwakaJehova ngombana uphuma endawenakhe ecwengileko bona azokuthatha igadango.
3 UZimu wangitjengisa uJotjhuwa+ umphristi ophakemeko, ajame phambi kwengilozi kaJehova begodu uSathana+ bekajame ngesandleni sakhe sokudla bona amphikise. 2 Ingilozi kaJehova yathi kuSathana: “Kwanga uJehova angakukhalima wena Sathana,+ uJehova okhethe iJerusalema+ kwanga angakukhalima! Kghani uJotjhuwa akasisigodo esikhutjhwe emlilweni?”
3 UJotjhuwa bekambethe izambatho ezisilapheleko begodu ajame phambi kwengilozi. 4 Ingilozi yathi kilabo ebebajame phambi kwakhe, “Mhlubuliseni izambatho ezisilaphelekwezi.” Yathi kuye, “Qala ngisuse umtjhaphwakho* begodu uzokumbathiswa izambatho ezisezingeni eliphezulu.”+
5 Nje-ke ngathi: “Mthweseni itjhila elithwalwa ehloko elihlwengileko.”+ Bamthwesa itjhila elithwalwa ehloko elihlwengileko begodu bambathisa izambatho ezitja, ingilozi kaJehova beyijame eduze. 6 Ingilozi kaJehova yathi kuJotjhuwa: 7 “Ngilokhu uJehova wamabutho akutjhoko, ‘Nawukhamba eendleleni zami bese wenze woke umsebenzakho phambi kwami, uzokuba ngumahluleli endlinami+ begodu uzokutlhogomela iinrhodlo zami, ngizokwenza ukghone ukungena phambi kwami njengeengilozi ezijame lapha.’
8 “‘Ngibawa ungilalele, wena Jotjhuwa Mphristi oPhakemeko, wena nabaphristi abahlala phambi kwakho ngombana amadoda la alitshwayo lalokho okuzokwenzeka esikhathini esizako. Qala! Ngiletha incekwami,+ igama layo nguHlumela.+ 9 Qala! Ilitje engilibeke phambi kwakaJotjhuwa! Elitjenelo kunamehlo alikhomba begodu ngigobhodlha kilo amagama,’ kutjho uJehova wamabutho. ‘Ngizokususa umlandu wenarha leyo ngelanga elilodwa.’+
10 UJehova wamabutho uthi, “Mhlokho ngamunye uzokubiza umakhelwanakhe bona azokuhlala ngaphasi komuthakhe wamadiribe nangaphasi komuthakhe wamafeyi.’”+
4 Ingilozi ebeyikhuluma nami yabuya yangivusa, bekungasuthi ngilele ubuthongo obukhulu. 2 Nje-ke yathi kimi: “Ubonani?”
Ngathi: “Ngibona ilithi lesibani elenziwe ngegolide,+ linesitja phezu kwalo. Kuneembani ezilikhomba phezulu+ begodu iimbanezi zinamaphayiphu alikhomba. 3 Hlanu kwalo kunemithi emibili yama-oliva,+ omunye ungesandleni sokudla sesitja, omunye ungesinceleni.”
4 Ngabuza ingilozi ebeyikhuluma nami ngathi: “Zitjho ukuthini izintwezi kosami?” 5 Ingilozi ebeyikhuluma nami yangibuza yathi: “Awazi bona izintwezi zitjho ukuthini?”
Ngaphendula ngathi: “Awa, kosami.”
6 Nje-ke yathi kimi: “Nakhu umlayezo kaJehova oya kuZerubhabheli: ‘“Lokhu kuzokwenzeka ingasi ngebutho lepi namkha ngamandla+ kodwana ngommoyami,”+ kutjho uJehova wamabutho. 7 Ngitjho nanyana kungaba nesiqabo esingangentaba phambi kwakaZerubhabheli,+ uzosigadanga sibe njengendawo ethabaleleko.+ Uzokuletha ilitje eliphezulu begodu abantu bazokurhuwelela bathi: “Qala bona kuhle kangangani!”’”
8 Ilizwi lakaJehova lafika kimi godu, lathi: 9 “Izandla zakaZerubhabheli zibeke isisekelo sendlu le+ begodu kufuze ziyiqede.+ Uzokwazi ukuthi uJehova wamabutho ungithume kuwe. 10 Ngubani owanyazako lokha nakusathonywa umsebenzi?+ Bathaba nababona uZerubhabheli aphethe intambo yokulinganisa. Lokhu okulikhomba kumamehlo kaJehova aqalaqala iphasi loke.”+
11 Nje-ke ngayibuza ngathi: “Itjho ukuthini imithi emibili yama-oliva engesidleni nesinceleni selithi lesibani?”+ 12 Ngayibuza kwesibili ngathi: “Zitjho ukuthini iimpande* ezimbili zemithi yama-oliva ekhupha amafutha wegolide ngamaphayiphu amabili wegolide?”
13 Yangibuza yathi: “Awazi bona izintwezi zitjho ukuthini?”
Ngaphendula ngathi: “Awa, kosami.”
14 Yathi: “Imithi le ijamele abazesiweko ababili abajame hlanu kweKosi yephasi loke.”+
5 Ngaqala phezulu godu ngabona umsongo ophaphako. 2 Ingilozi yangibuza yathi: “Ubonani?”
Ngathi: “Ngibona umsongo ophaphako omakhubhithi* ama-20 ubude, omakhubhithi ali-10 ububanzi.”
3 Nje-ke yathi kimi: “Lesi siqalekiso esiya ephasini loke ngombana woke umuntu owebako,+ akakajeziswa ngilokho okutlolwe ngakwelinye ihlangothi lomsongo begodu woke umuntu owenza isifungo esimamala,+ akakajeziswa ngilokho okutlolwe ngakwelinye ihlangothi lomsongo. 4 ‘Ngisithumele’ kutjho uJehova wamabutho ‘begodu sizokungena ngendlini yesigebengu nangendlini yaloyo owenza isifungo esimamala ngegama lami. Sizokuhlala ngendlini leyo siyidle, sidle neengodo zayo namatjayo.’”
5 Nje-ke ingilozi ebeyikhuluma nami yatjhidela kimi yathi: “Ngibawa uqale phezulu ubone ukuthi khuyini ephumako.”
6 Ngayibuza ngathi: “Khuyini?”
Yaphendula yathi: “Okuphumakokhu lithungana le-efa,”* Yaraga yathi: “Le yindlela abantu abakhohlakeleko ephasini loke abaqaleka ngayo.” 7 Ngabona othileko aphakamisa isivalo esirondo sethungana esenziwe ngomthofi begodu bekunomfazi ohlezi ngaphakathi kwalo. 8 Yathi: “Umfazi lo ujamele ukukhohlakala.” Yeke yambuyisela ngaphakathi kwethungana le-efa, ngemva kwalokho yavala ngesivalo esenziwe ngomthofi.
9 Ngaqala phezulu ngabona abafazi ababili batjhidela, bebaphapha emoyeni. Bebanamaphiko anjengewakadoyi. Baphakamisela ithungana emkayini. 10 Nje-ke ngabuza ingilozi ebeyikhuluma nami ngathi: “Balisaphi ithungana le-efa?”
11 Yathi: “Balisa enarheni yeTjhinari*+ kulapho bazokwakhela khona umfazi lo indlu; kuzakuthi nasele ilungile afakwe ngapho, ngiyo indawo emfaneleko.”
6 Ngaqala phezulu godu ngabona iinkarana ezine zivela hlangana neentaba ezimbili begodu iintabezo bekungezekhopha. 2 Ikarana yokuthoma beyineenjomani ezibomvu, ikarana yesibili ineenjomani ezinzima.+ 3 Ikarana yesithathu beyineenjomani ezimhlophe, ikarana yesine beyineenjomani ezimabalabala nezimabhadubhadu.+
4 Ngabuza ingilozi ebeyikhuluma nami ngathi: “Khuyini lokhu kosami?”
5 Ingilozi yangiphendula yathi: “Lezi ziimbunjwa ezine zommoya,+ eziphumako ngemva kokuvela phambi kweKosi yephasi loke.+ 6 Ikarana ebeyidoswa ziinjomani ezinzima itjhinga enarheni engetlhagwini;+ ebeyidoswa ziinjomani ezimhlophe itjhinga ngaphetjheya kwelwandle; begodu ebeyidoswa ziinjomani ezimabalabala itjhinga enarheni engesewula. 7 Iinjomani ezimabhadubhadu bezizimisele ukuqala ephasini.” Nje-ke ingilozi yathi: “Khambani niyokuqala ephasini.” Zathoma ukukhambakhamba ephasini.
8 Yangirhuwelela yathi kimi: “Qala, iinjomani eziphuma zitjhinga enarheni yetlhagwini zibangele ummoya kaJehova bona uhlale enarheni yetlhagwini.”
9 Ilizwi lakaJehova lafika kimi godu, lathi: 10 “Thatha umnikelo kuRhelidayi, uThobiya noJedaya ovela ebantwini abasekudingisweni; begodu ngelangelo kufuze ukhambe uye endlini kaJosiya, indodana kaZefaniya ukhambe nalaba abavela eBhabhiloni. 11 Thatha isiliva negolide wenze isihlohlo, usithwese uJotjhuwa+ indodana kaJehozadaki, umphristi ophakemeko. 12 Kufuze uthi kuye,
“‘Nakhu uJehova wamabutho akutjhoko: “Nasi indoda igama layo nguHlumela.+ Uzokuhluma endawenakhe begodu uzokwakha ithempeli lakaJehova.+ 13 Nguye ozokwakha ithempeli lakaJehova, nguye ozokufumana iphazimulo. Uzokuhlala phasi esihlalweni sakhe sobukhosi abuse begodu uzokuba mphristi esihlalweni sakhe sobukhosi,+ imisebenzi emibili* le uzoyenza ngokuthula. 14 Isihlohlwesi kufuze sibekwe ethempelini lakaJehova, sizokuba sikhumbuzo salokho okwenziwa nguHelemu, uThobiya, uJedaya+ noRheni indodana kaZefaniya. 15 Nabakude bazokuza bazokufaka isandla nakwakhiwa ithempeli lakaJehova.” Nizokwazi ukuthi uJehova wamabutho ungithume kini. Koke lokhu kuzokwenzeka nange nilalela ilizwi lakaJehova uZimenu.’”
7 Ngomnyaka wesine weKosi uDariyasi, ilizwi lakaJehova lafika kuZakariya+ elangeni lesine, enyangeni yethoba, okuyinyanga kaKhisilevu.* 2 Abantu beBhetheli bathumela uSaretseri noRerhemeleki nabantu bakhe bona bayosincengela uJehova, 3 bathi ebaphristini bendlu kaJehova wamabutho nakubaphorofidi: “Kghani kufuze ngilile na ngenyanga yesihlanu,+ ngizile nokudla njengombana bengenza eminyakeni eminengi?”
4 Ilizwi lakaJehova wamabutho labuya kimi, lathi: 5 “Nakhu okufuze ukutjho ebantwini benarheni nebaphristini, ‘Lokha nanizila ukudla begodu nilila ngenyanga yesihlanu nangenyanga yekhomba,+ iminyaka ema-70 yoke,+ benizila ukudla ngebanga lami na? 6 Lokha nanidlako nalokha naniselako beningazidleli nina begodu niziselela nina? 7 Akukafuzi na nilalele amezwi kaJehova awatjho asebenzisa abaphorofidi baphambilini,+ lokha eJerusalema nemadorobheni ayibhodileko kusahlala abantu begodu kunokuthula nalokha iNegebhi neTjhefela kusahlala abantu?’”
8 Ilizwi lakaJehova lafika godu kuZakariya, lathi: 9 “UJehova wamabutho uthi, ‘Yahlulelani ngobulungiswa nangendlela elungileko+ begodu niphathane ngethando+ nangomusa. 10 Ningadlelezeli umhlolokazi, intandani,+ umuntu ovela kwenye inarha+ namkha umuntu otlhagileko,+ ningahleli eenhliziyweni zenu ukwenza okumbi komunye nomunye.’+ 11 Bebasolo bangafuni ukungilalela,+ bangifulathela+ begodu bavala iindlebe zabo bona bangangizwa.+ 12 Baqinisa iinhliziyo zabo njengelitje,*+ akhenge balalele umthetho namezwi kaJehova wamabutho awuthumele ngommoyakhe asebenzisa abaphorofidi bekadeni.+ Nje-ke uJehova wasilingeka khulu.”+
13 “‘Njengombana bangazange balalele lokha nangikhuluma nabo,+ nami angeze ngibalalele nabatlhoga isizo,’+ kutjho uJehova wamabutho. 14 ‘Ngibenze barhatjhekela eentjhabeni abangazaziko+ ngomoya omkhulu, ngebangelo inarha yasala ingasanabantu, akhenge kube nomuntu odlulako namkha obuyako;+ indawo ebeyiyihle bayenze yaba yinto ethusako.’”
8 Ilizwi lakaJehova wamabutho lafika kimi godu, lathi: 2 “Nakhu uJehova wamabutho akutjhoko, ‘Ngizimisele ukuvikela iZiyoni+ begodu ngizimisele ukulivikela ngelaka elikhulu.’”
3 “Nakhu uJehova akutjhoko, ‘Ngizokubuyela eZiyoni+ begodu ngizokuhlala eJerusalema,+ iJerusalema izokubizwa ngokuthi lidorobho elithembekileko+ begodu intaba kaJehova wamabutho izokubizwa ngokuthi yintaba ecwengileko.’”+
4 “Nakhu uJehova wamabutho akutjhoko, ‘Amaqhegu neenlukazi azokuhlala ematatawini weJerusalema godu, ngamunye wabo uzokuphatha idondolo ngebanga lokuluphala.+ 5 Amatatawu azokugcwala abesana nabantazana abadlalako.’”+
6 “Nakhu uJehova wamabutho akutjhoko, ‘Nanyana kungabonakala kungeze kwenzeka kilabo abaseleko emihleni leyo, inga-kghani kufuze kubonakale kungekhe kwenzeka nakimi?’ Kutjho uJehova wamabutho.”
7 “Nakhu uJehova wamabutho akutjhoko, ‘Ngizokusindisa abantu bami enarheni yangepumalanga nenarheni yangetjingalanga.+ 8 Ngizobaletha, bazokuhlala eJerusalema,+ bazokuba babantu bami begodu mina ngizokuba nguZimabo+ ngeqiniso* nangokulunga.’”
9 “Nakhu uJehova wamabutho akutjhoko, ‘Yibani nesibindi*+ nina enizwa amezwi akhulunywa baphorofidi,+ okumamezwi akhulunywa ngelanga kubekwa isisekelo sendlu kaJehova wamabutho nakuzokwakhiwa ithempeli. 10 Ngaphambi kwesikhatheso, abantu neenlwana bebasebenza kodwana bangabhadelwa,+ bekungakaphephi, nje-ke abantu bebangakghoni ukukhambakhamba ngebanga lenaba ngombana ngabenza bajikelana.’
11 “Kodwana nje angekhe ngisebenzelane nabantu abaselekwaba njengekadeni,’+ kutjho uJehova wamabutho. 12 ‘Ngombana kuzokutjalwa imbewu yokuthula, isimu yamadiribe izokuveza iinthelo zayo nephasi liveze elikukhiqizileko,+ izulu lizokuletha umbethalo. Ngizokwenza abaseleko babantwaba bazuze zoke izintwezi.+ 13 Njengombana iintjhaba bezinibona niqalekisiwe,+ wena sitjhaba sakwaJuda nawe sitjhaba sakwa-Israyeli, nje-ke ngizonisindisa, nizokuba sibusiso.+ Ningasabi!+ Yibani nesibindi.’*+
14 “Ngombana ngilokhu uJehova wamabutho akutjhoko, ‘“Njengombana bengizimisele ukunilethela ihlekelele ngebanga lokobana abokhokho benu bangisilinga,” kutjho uJehova wamabutho “akhenge ngizisole,+ 15 nje-ke ngizimisele ukwenza okuhle eJerusalema nesitjhabeni sakwaJuda.+ Ningasabi!”’+
16 “‘Nanzi izinto okufuze nizenze: Tjelanani iqiniso,+ nalokha nanahlulelako emasangwenenu, kufuze nikwenze ngokweqiniso bese nisize abantu babe nokuthula.+ 17 “Ningalukelani amano eenhliziyweni zenu,+ ningenzi iimfungo ezimamala+ ngombana ngiyazihloya zoke izintwezi,’+ kutjho uJehova.”
18 Ilizwi lakaJehova wamabutho labuya kimi, lathi: 19 “Nakhu uJehova wamabutho akutjhoko, ‘Isikhathi sokuzila ukudla senyanga yesine,+ senyanga yesihlanu,+ senyanga yekhomba+ nesenyanga yetjhumi+ kuzokuba ziinkhathi ezithabisako esitjhabeni sakwaJuda, kuzokuba minyanya yethabo.+ Nje-ke thandani iqiniso nokuthula.’
20 “Nakhu uJehova wamabutho akutjhoko, ‘Kusazokuza abantu nezakhamuzi zemadorobheni amanengi, 21 izakhamuzi zedorobho elinye zizokuya ezakhamuzini zakwelinye idorobho zithi: “Rhabani, asikhambeni siyokuncenga uJehova, silotjhe uJehova wamabutho. Nathi sizokuya.”+ 22 Abantu abanengi neentjhaba ezinamandla zizokufuna uJehova wamabutho eJerusalema+ begodu zincenge uJehova.’
23 “Nakhu uJehova wamabutho akutjhoko, ‘Emihleni leyo amadoda alitjhumi avela eentjhabeni ezihlukahlukeneko nakhuluma amalimi ahlukahlukeneko+ azokukakarela umphetho wesambatho somJuda,* athi: “Sifuna ukukhamba nawe+ ngombana sizwile ukuthi uZimu unani.”’”+
9 Umlayezo ovela kuZimu:
“Ilizwi lakaJehova lijamelene nenarha yeHadraki,
Kodwana lijamelene khulu neDamaseku+
Ngombana uJehova uqale abantu+
Uqale nazo zoke iintjhaba zakwa-Israyeli
2 Nangokujamelene neRhamathi+ esemkhawulwenayo,
Nangokujamelene neTirosi+ neTsidoni,+ ngombana zihlakaniphe khulu.+
3 ITirosi lizakhele amaboda wokuzivikela.
Libuthelele isiliva laba linengi njengethuli
Negolide laba linengi njengedaka eendleleni.+
4 UJehova uzokuthatha izinto zeTirosi,
Uzokumadlha ibutho layo libe ngasuthi uliphosele ngelwandle;+
Begodu lizokutjhiswa ngomlilo.+
5 I-Atjhikheloni izokubona lokhu begodu izokuthukwa;
IGaza izokutshwenyeka khulu,
Ngokunjalo-ke ne-Ekroni ngombana inarha ebeyithembele kiyo ihlazisiwe.
Ikosi yeGaza itjhatjalalisiwe,
Begodu e-Atjhikheloni angeze kusahlala muntu.+
6 Indodana elivezandlebe izokuhlala e-Atjhidodi,
Begodu ngizokuphelisa ukuzikhakhazisa komFilista.+
7 Ngizokususa iingazi ezisemlonyenakhe
Ngisuse izinto ezinyenyisako ezisemazinywenakhe,
Oseleko uzokutjhiyelwa uZimu;
Uzokuba njengekosana kwaJuda,+
Abantu be-Ekroni, bazokuba njengamaJebusi.+
8 Ngizokuhloma itende phambi kwendlwami bona ngiyivikele,+
Bona kungabi nodlulako namkha obuyako;
Begodu akunamuntu ogandelela abanye ozokudlula lapho godu,+
Ngombana ngikubonile okwenzeke kibo.*
9 Thaba khulu, ndodakazi yeZiyoni.
Rhuwelela ngethabo, ndodakazi yeJerusalema.
Qala! Ikosakho iza kuwe.+
Ilungile, iletha isindiso,
Ithobekile+ begodu ikhwele udumbana,
10 Ngizokususa ikarana yepi kwa-Israyeli
Nenjomani eJerusalema.
Umsubela wepi uzokususwa.
Ikosakho izokumemezela ukuthula eentjhabeni;+
Izokubusa kusukela kwelinye ilwandle ukuya kwelinye
11 Kodwana wena Ziyoni, ngeengazi ezisivumelwano sakho,
Ngizokukhupha iimbotjhwa zakho ngemgodini onganamanzi.+
12 Buyelani endaweni yesiphephelo, nina mbotjhwa ezinethemba.+
Namhlanjesi ngiyakutjela wena Ziyoni,
‘Uzokufumana iimbusiso ezibuyelelweko.+
13 Ngombana ngizokugoba uJuda njengomsebami.
Ngizokwenza u-Efrayimu abe msubela womsebami,
Ngizokuvusa amadodanakho, Ziyoni,
Bona alwe namadodana weGirisi.
Ngizokwenza ube njengesabula yengorho.’
14 UJehova uzokutjengisa bona unabantu bakhe,
Umsubelakhe uzokuphuma njengombani.
IKosi ePhakemeko uJehova izokuvuthela iphondo,+
Begodu njengesiwuruwuru sangesewula, uzokutjhinga epini namanaba.
15 UJehova wamabutho uzokuvikela abantu bakhe,
Amanababo azobasahlela ngamatje wesarwayi kodwana angeze ahlule.+
Azokusela begodu atherezele kwanga asele iwayini;
Azokuba njengesitja esizele iwayini,
Njengamakhona we-aldara.+
16 UJehova uZimabo uzobasindisa ngelangelo
Njengomhlambi wabantu bakhe;+
Ngombana bazokuba njengamatje aligugu esihlohlweni esimanyazelako enarhenakhe.+
17 Qala bona ulunge+
Begodu uphazimula kangangani!
Ukudla newayini elitjha
Kuzokwenza amasokana nabantazana baqine.”+
10 “Bawani uJehova anise izulu letwasahlobo.
2 Iinthombe zamatherafimi zikhulume ikohliso;
Abathukulako babone amala.
Bakhulume amabhudango angatjho litho,
Balingile ukududuza kodwana akhenge kusize.
Kungebangelo bazokutjhagala njengezimvu.
Bazokutlhaga ngombana akunamelusi.
3 Ilaka lami lizobavuthela abelusi,
Nabadosiphambili* abagandelelako ngizobajezisa;
Ngombana uJehova wamabutho uwutjhejile umhlambakhe,+ indlu kaJuda,
Uwenze waba njengenjomanakhe yepi enamandla nephazimulako.
4 KuJuda kuvela umrholi,
Kuvela umbusi ozomsekela,
Kuvela umsebe wepi;
Kuphuma umtlhogomeli, boke nje bavela kuye.
5 Bazokuba njengeengorho,
Bagadange idaka eendleleni ngesikhathi sepi.
6 Ngizokwenza indlu kaJuda ibe namandla,
Indlu kaJosefa ngizoyisindisa.+
Ngizobabuyisela enarhenabo,
Ngizobenzela umusa;+
Kuzokuba ngasuthi akhenge khengibalahle;+
Ngombana nginguJehova uZimabo begodu ngizobaphendula.
7 Abantu bakwa-Efrayimu kufuze babe njengeengorho,
Iinhliziyo zabo zizokuthaba njengokungathi basele iwayini.+
Amadodanabo azokubona lokhu begodu athabe.
Iinhliziyo zawo zizokuthaba kuJehova.+
9 Ngitjho nanyana ngingabarhatjha njengembewu hlangana nabantu,
Bazongikhumbula baseendaweni ezikude;
Bona namadodanabo bazokwenziwa babe namandla amatjha begodu bazokubuya.
10 Ngizobathatha enarheni yeGibhide ngibabuyise
Begodu ngizobathatha nenarheni ye-Asiriya;+
Ngizobaletha enarheni yeGiliyadi+ neLibhanoni,
Ngitjho neenarhenezi angekhe babe nendawo eyaneleko.+
11 Kufuze adlule elwandle abangele ihlekelele;
Begodu uzokubetha amagagasi welwandle;+
Woke amanzi weNayili azokoma.
12 Mina Jehova ngizobenza babe namandla,+
Begodu bazoziphatha* ngendlela edumisa igama lami,’+ kutjho uJehova.”
11 “Vula iminyangwakho wena Libhanoni,
Bona umlilo utjhise imisedarakho.
2 Rhahlawula wena mjunipha ngombana umuthi womsedari uwile;
Imithi emikhulu nemihle itjhatjalalisiwe!
Rhahlawulani nina mithi ye-owuku yeBhatjhani,
Ngombana ihlathi eliminyeneko litjhatjalalisiwe!
3 Lalela ukurhahlawula kwabelusi,
Ngombana iphazimulwabo itjhatjalalisiwe.
Lalela amabhubezi amancani abhodlako,
Ngombana ihlathi eliminyeneko leJordani litjhatjalalisiwe.
4 “Nakhu uJehova uZimami akutjhoko, ‘Yelusa abantwaba abanjengomhlambi oyokuhlatjwa,+ 5 nabathenga umhlambi lo bayawuhlaba+ begodu bangabi nomlandu. Laba abawuthengisako+ bathi, “Kwanga uJehova angadunyiswa ngombana ngizokunjinga.” Abelusi bomhlambi lo abawurhawukeli.’+
6 “‘UJehova uthi angeze ngisabarhawukela abantu benarheni. Ngizokwenza bona omunye nomunye agandelelwe mnganakhe begodu agandelelwe yikosakhe; bazoyitjhabalalisa inarha le begodu angekhe ngibasindise ezandleni zabo.’”
7 Ngathoma ukwalusa abantu ebebanjengomhlambi oyokuhlatjwa,+ ngenzela nina enibogabogako emhlambini. Nje-ke ngathatha iintonga ezimbili, enye ngayibiza ngokuthi muMusa enye ngathi liBumbano,+ ngemva kwalokho-ke ngalusa umhlambi. 8 Ngaqotha abelusi abathathu ngenyanga yinye, ngabaphelela ihliziyo begodu nabo bebanginyenya. 9 Ngathi: “Angekhe ngisanilusa. Ofako akafe, otjhabalalako akatjhabalale. Abaseleko abadlane bodwa.” 10 Nje-ke ngathatha intongami engiyibiza ngoMusa+ ngayiqunta, ngaphula isivumelwano sami engasenza nabo boke abantu. 11 Ngasiphula mhlokho-ke begodu ababogabogako emhlanjini ebebangibukele babona ukuthi leli bekulilizwi lakaJehova.
12 Ngathi kibo: “Nangabe kuhle kini, ngibhadelani umrholwami kodwana nangabe akusinjalo, uthatheni.” Nje-ke bangibhadela iimpaparwana zesiliva ezima-30.+
13 UJehova wathi kimi: “Thatha imali leyo uyiphosele ngesilulwini, okuyimali encani abayibone ingifanele.”+ Nje-ke ngathatha iimpaparwana zesilivezo ezima-30 ngaziphosela esilulwini endlini kaJehova.+
14 Ngaqunta intongami yesibili engiyibiza ngokuthi liBumbano,+ ngokunjalo-ke ngaqeda ubuhlobo obuphakathi kwakaJuda no-Israyeli.+
15 UJehova wathi kimi: “Thatha izinto ezisetjenziswa ngumalusi ongasililitho.+ 16 Ngivumela bona kuvuke umalusi enarheni. Angekhe atlhogomele imvu etjhabalalako;+ angekhe ayifune imvu encani, angekhe ayilaphe elimeleko+ namkha adlise ekghona ukuzijamela. Kunalokho uzokutjhabalalisa inyama enonileko+ bese arathule iinqatha zemvu.+
17 Maye! Ngomelusami ongasililitho+ otjhiya umhlambi.+
Isabula izomumadlha umkhono nelihlo lakhe langesidleni.
Umkhonwakhe uzokutjhwaba,
Nelihlo lakhe langesidleni angeze lisabona.”
12 Isimemezelo:
“Leli lilizwi likaJehova elimalungana no-Israyeli,” kutjho uJehova,
Owalula izulu,+
Owabeka isisekelo sephasi,+
Begodu wanikela umuntu ummoya wokuphila.
2 “Ngenza inarha yeJerusalema ibe yikapho yewayini ebangela ukuthi boke abahlanu kwayo batherezele begodu inarha yakwaJuda neyeJerusalema zizokuragelelwa.+ 3 Ngelangelo, ngizokwenza iJerusalema libe lilitje elibudisi ebantwini boke. Boke abaliphakamisako bazokulimala kabuhlungu+ begodu zoke iintjhaba zizokubuthana zilwe nalo.”+ 4 UJehova uthi, “Ngelangelo, ngizokwenza zoke iinjomani zithukwe begodu ngizokwenza abakhweli bazo bahlanye. Ngizoyitjheja indlu kaJuda kodwana ngizokwenza iinjomani zabanye abantu zingasaboni. 5 Amakhosana wakwaJuda azokuthi eenhliziyweni zawo, ‘Izakhamuzi zeJerusalema zimamandla kithi ngebanga lakaJehova wamabutho uZimazo.’+ 6 Ngelangelo, ngizokwenza amakhosana wakwaJuda abe njengamalahle avuthako hlangana neenkuni nanjengelangabi lomlilo hlangana neenqwambi zekoroyi,+ azokutjhabalalisa boke abantu abangesidleni nabangesinceleni+ nezakhamuzi zeJerusalema zizokuragela phambili zihlala enarhenazo* iJerusalema.+
7 “UJehova uzokuthoma ngokusindisa amatende wakwaJuda bona ekugcineni, abantu bendlu kaDavida nezakhamuzi zeJerusalema angekhe badunyiswa ukudlula abantu bakwaJuda. 8 Mhlokho uJehova uzokuvikela abantu beJerusalema;+ obogabogako hlangana nabo uzokufana noDavida begodu indlu kaDavida izokufana noZimu, njengengilozi kaJehova ekhamba phambi kwabo.+ 9 Ngelangelo ngizokuqinisekisa bona ngitjhabalalisa zoke iintjhaba ezizokulwa neJerusalema.+
10 “Ngizokuthululela ummoyami endlini kaDavida nezakhamuzini zeJerusalema, ngizozamukela begodu zizokuthandaza kimi, zizokuqala loyo ezamhlabako,+ zizomlilela njengalokha umuntu nakalilela indodanakhe ekukuphela kwayo; zizokulila kabuhlungu njengalokha umuntu nakalilela indodana elizibulo. 11 Ngelangelo kuzokuba nesililo esikhulu eJerusalema, njengesililo seHadadi-Rimoni eMmangweni oThabaleleko weMegido.+ 12 Inarha izokulila, umndeni ngamunye uzokulila wodwa, umndeni wendlu kaDavida uzokulila wodwa nabafazi bakhona bazokulila bodwa; kuzokwenzeka okufanako nemndenini kaNathani;+ 13 umndeni kaLevi+ uzokulila wodwa nabafazi bakhona bazokulila bodwa; umndeni wamaTjhimeyi+ uzokulila wodwa nabafazi bakhona balile bodwa; 14 emindenini eseleko, umndeni ngamunye uzokulila wodwa nabafazi bakhona bazokulila bodwa.
13 “Mhlokho kuzokwenjiwa umthombo wendlu kaDavida newabahlali beJerusalema bona bazihlanze esonweni.+
2 UJehova wamabutho uthi, “Mhlokho ngizokusula amagama weenthombe enarheni+ begodu angeze zisakhunjulwa. Ngizokususa abaphorofidi+ nommoya ongakahlwengeki. 3 Nange umuntu aphorofida godu, uyise nonina bazokuthi kuye, ‘Uzokufa ngombana ukhulume amala egameni lakaJehova.’ Uyise nonina bazomhlaba ngebanga lokuphorofida kwakhe.+
4 “Ngelangelo, umphorofidi ngamunye uzokuba neenhloni ngombonwakhe lokha nakaphorofidako begodu angeze ambathe isambatho* esenziwe ngoboya+ bona akhohlise. 5 Uzokuthi, ‘Angisimphorofidi. Ngiyazilimela kwaphela ngombana ngathengwa ngisesemncani.’ 6 Nange othileko ambuza athi, ‘Ngewani amanceba asemahlombakho* la?’ Uzokuthi, ‘Amanceba la ngawafumana endlini yomnganami.’”*
“Betha umalusi+ kuphadlhalale umhlambi.+
Ngizokuphakamisa isandla sami ngokujamelene nabangakaqakatheki.”
8 UJehova uthi, “Enarheni yoke,
Inengi lizokubulawa,
Kuzokusala abambalwa kwaphela.
9 Abambalwa ngizobadlulisa emlilweni,
Ngizobahlunga njengalokha kuhlungwa isiliva.
Ngizobahlolisisa njengalokha kuhlolisiswa igolide.+
Bazokubiza igama lami,
Ngizobaphendula.
Ngizokuthi, ‘Bababantu bami,’+
Bazokuthi, ‘UJehova nguZimethu.’”
14 “Qala ilanga liyeza, ilanga lakaJehova lapho izinto zenu* zizokuhlukaniswa phakathi kwenu. 2 Ngizokubuthelela zoke iintjhaba bona zilwe neJerusalema begodu idorobho lizokuthunjwa, imizi idlelezelwe nabafazi bakatwe. Ingcenye yabantu bedorobho izokuya ekudingisweni kodwana abaseleko angeze basuswe edorobheni.
3 “UJehova uzokuphuma ayokulwa neentjhabezo+ njengalokha nakalwa ngelanga lepi.+ 4 Ngelangelo, iinyawo zakhe zizokujama eNtabeni yama-Oliva,+ eqale eJerusalema ehlangothini elingepumalanga. INtaba yama-Oliva izokuhlukana phakathi, kusukela ngepumalanga ukuya ngetjingalanga, izokwenza umrhoba omkhulu. Ingcenye yentaba izokuya ngetlhagwini, ingcenye enye iye ngesewula. 5 Nizokubalekela emrhobeni weentaba zami ngombana umrhoba oseentabeni uzokukhamba bewuyokufika e-Atseli. Nizokubaleka njengombana nabaleka ngebanga lokusikinyeka kwephasi emihleni yeKosi yakwaJuda u-Uziya.+ UJehova uZimami uzokuza nabo boke abacwengileko.+
6 Ngelangelo, angeze kwakhanya,+ izinto zizokulisa ukusebenza.* 7 Kuzokuba lilanga elaziwa ngokuthi ngelakaJehova.+ Angeze libe yimini namkha libe busuku, ntambama kuzokuba nokukhanya. 8 Ngelangelo amanzi wokuphila+ azokugeleza asuka eJerusalema,+ ingcenyawo izokutjhinga ngelwandle elingepumalanga,*+ ingcenyawo itjhinge ngelwandle elingetjingalanga.*+ Lokho kuzokwenzeka ehlobo nebusika. 9 UJehova uzokuba yiKosi ephasini loke.+ Ngelangelo nguJehova kwaphela ozokulotjhwa+ begodu igama lakhe ngilo kwaphela elizokudunyiswa.+
10 “Inarha yoke izokufana ne-Araba,+ ukusuka eGeba+ ukuya eRimoni+ engesewula yeJerusalema. IJerusalema izokuba yikulu begodu abantu bazokuhlala kiyo,+ kusukela eSangweni lakwaBhenjamini+ ukuyokufika endaweni yeSango lokuThoma, ukuyokufika eSangweni leKhona begodu kusukela embhotjhongweni kaRhananiyeli,+ ukuyokufika lapha kwenzelwa khona iwayini lekosi. 11 Abantu bazokuhlala kilo, angeze lisajeziswa ngokutjhatjalaliswa,+ abantu bazokuhlala eJerusalema bavikelekile.+
12 “Nasi isijeziso uJehova azokujezisa ngaso boke abantu abalwa neJerusalema.+ Inyamabo izokubola bajamile, amehlwabo azokubolela endawenawo namalimabo azokubolela ngemlonyeni.
13 “Ngelangelo, uJehova uzobatjharaganisa, ngamunye uzokubamba isandla somnganakhe begodu bazokulwa bodwa.+ 14 Inarha yakwaJuda izokulwa hlanu kweJerusalema begodu izokuthatha umnotho weentjhaba eziseduze, ithathe igolide, isiliva, nezambatho ngobunengi.+
15 “Isijeziso esifanako sizokwehlela neenjomani, iimeyila, amakamela, abodumbana nayo yoke ifuyo engemakampeni lawo.
16 “Boke abaseleko abavela eentjhabeni ebezizokulwa neJerusalema, qobe mnyaka bazokukhuphuka+ bayokulotjha iKosi uJehova wamabutho+ bebagidinge umNyanya wemiTlhatlhana.+ 17 Nanyana ngubani eentjhabeni zephasini ongeze akhuphukele eJerusalema bona ayokulotjha iKosi uJehova wamabutho, angeze kune izulu enarhenakhe.+ 18 Nange abantu beGibhide bangakhuphuki begodu bangene edorobheni, izulu angekhe line kibo. Kunalokho, bazokujeziswa ngesijeziso uJehova ajezisa ngaso iintjhaba ezingayi ukuyokugidinga umNyanya wemiTlhatlhana. 19 Lesi kuzokuba sijeziso sesono sabantu beGibhide nesesono seentjhaba zoke ezingakhuphuki ziyokugidinga umNyanya wemiTlhatlhana.
20 “Ngelangelo amezwi athi, ‘UJehova ucwengile!’+ Azokutlolwa eensinjaneni ezilenga eenjomaneni. Iimpoto+ ezingendlini kaJehova zizokuba njengeenkotlelo+ eziphambi kwe-aldara. 21 Zoke iimpoto zeJerusalema nezakwaJuda zizokucwengeka begodu zizokuba ngezakaJehova wamabutho. Boke abenza imihlatjelo bazokuza, bazokupheka ngazo inyama. Ngelangelo angeze kusaba nomKanana* endlini kaJehova wamabutho.”+
Litjho ukuthi “UJehova Ukhumbulile.”
Qala Isith. B15.
Mumuthi onamakari aphazimako begodu unamathuthumbo anuka kamnandi.
Kutjho enganawo amaboda wokuyivikela.
Namkha “umlandwakho.”
Kutjho iimpande zemithi ezizele iinthelo.
Ikhubhithi belilingana namasentimitha ayi-44.5. Qala Isith. B14.
I-efa beyilingana namalitha ama-22. Qala Isith. B14.
Kutjho iBhabhiloniya.
Kutjho indimakhe yokuba mbusi nomphristi.
Qala Isith. B15.
Ibizo lesiHebheru elisetjenziswe lapha lingaqalisela kudayimani namkha ilitje eliqinileko.
Namkha “ngokuthembeka.”
Namkha “qinisani izandla zenu.”
Namkha “qinisani izandla zenu.”
NgesiHebheru, “sendoda emJuda.”
Kungenzeka ukutlhaga kwabantu bakhe.
Namkha “udumbana omduna.”
Kutjho iYufrathe.
NgesiHebheru, “iimpongo.”
NgesiHebheru, “intonga yobukhosi.”
NgesiHebheru, “Bazokukhamba egameni lami.”
Namkha “endawenazo efaneleko.”
Namkha “isambatho sabaphorofidi.”
NgesiHebheru, “hlangana nezandla zakho?” Kutjho esifubeni namkha emhlana.
Namkha “kilabo abangithandako.”
Kutjho iJerusalema.
Namkha “kube ngasuthi zigongobaliswe makhaza.”
Kutjho iLwandle Elifileko.
Kutjho iLwandle iMeditera.
Namkha kungenzeka “umthengisi.””