IVANGELI NGOKUKAMARKOSI

1 Ukuthoma kweendaba ezimnandi ngoJesu Krestu, iNdodana kaZimu: 2 Njengombana kutloliwe ku-Isaya umphorofidi ukuthi: “(Ngithumela isithunywa sami ngaphambi kwakho, esizokuhlahla indlelakho.)+ 3 Ilizwi lomuntu orhuwelela emmangweni, lithi: ‘Lungisani indlela kaJehova! Yenzani iindlela zakhe zinqophe.’”+ 4 UJwanisi uMbhabhadisi bekasemmangweni, atjhumayela ukubhajadiswa njengetshwayo lokutjengisa ukutjhuguluka ngomnqopho wokulitjalelwa kwezono.+ 5 Nje-ke soke isifunda seJudiya nabo boke abantu beJerusalema bebeza kuye, ababhabhadise* eMlanjeni iJordani, bavume izono zabo.+ 6 UJwanisi bekambatha izambatho zoboya bekamela, abophe nebhande lesikhumba edinini,+ adla iintethe neliju.+ 7 Bekatjhumayela athi: “Ngemva kwami kuza onamandla kunami, loyo imitja yamapatlagwanakhe engingafaneleki ukukhothama ngiyitjhaphulule.+ 8 Mina nginibhabhadisa ngamanzi kodwana yena uzonibhabhadisa ngommoya ocwengileko.”+

9 Ngemihla leyo, uJesu wasuka eNazaretha yeGalile wabhajadiswa nguJwanisi eJordani.+ 10 Msinyana nakaphuma ngemanzini, wabona izulu livuleka, ummoya ocwengileko wehlela kuye unjengejuba.+ 11 Kwazwakala ilizwi livela ezulwini lithi: “Wena uyiNdodanami, engiyithandako; ngikwamukele.”+

12 Msinyana ngemva, kwalokho ummoya kaZimu wamraga bona aye emmangweni. 13 Wahlala emmangweni amalanga ama-40, alingwa nguSathana.+ Lapho bekaneembandana kodwana iingilozi bezimtjheja.+

14 Ngemva kokubotjhwa kwakaJwanisi, uJesu waya eGalile,+ atjhumayela iindaba ezimnandi zakaZimu+ 15 athi: “Isikhathi esibekiweko sesifikile, nomBuso kaZimu sewubandamele. Tjhugulukani,+ nikholwe iindaba ezimnandi.”

16 Uthe asakhamba magega neLwandle leGalile, wabona uSimoni nomfowabo u-Andrisi+ baphosela amanedabo ngelwandle+ ngombana bebabathiyi beenhlambi.+ 17 UJesu wathi kibo: “Ngilandelani, ngizonenza abathiyi babantu.”+ 18 Khonokho batjhiya amanedabo bamlandela.+ 19 Waya phambidlana, wabona amadodana kaZebediya, uJakopo nomfowabo uJwanisi, basesikepeni sabo balungisa amanedabo,+ 20 wababiza msinyana. Batjhiya uyise uZebediya namadoda aqatjhiweko ngesikepeni, bamlandela. 21 Batjhinga eKapernawumi.

Nakuthoma iSabatha, waya esinagogeni wathoma ukufundisa.+ 22 Abantu bararwa yindlelakhe yokufundisa ngombana bekabafundisa njengomuntu onelawulo, ingasi njengabatloli.+ 23 Ngesikhatheso, esinagogenabo bekunendoda enedimoni, irhuwelela ithi: 24 “Usifunani, wena Jesu weNazaretha?+ Uzele ukuzosibhubhisa na? Ngazi kuhle ukuthi ungubani, ungoCwengileko kaZimu!”+ 25 Kodwana uJesu walikhalima, wathi: “Thula, uphume kuye!” 26 Idimonelo labhudabhuda indoda leyo phasi begodu larhuwelela, ngemva kwalokho laphuma kiyo. 27 Abantu barareka khulu kangangobana bathoma ukukhuluma bodwa, bathi: “Khuyini lokhu? Yifundiso etja! Unamandla wokukhalima namadimoni, amlalele.” 28 Nje-ke iindaba ezimalungana naye zarhatjheka msinyana kiso soke isifunda seGalile.

29 Ngemva kwalokho, baphuma esinagogeni baya emzini lapho kuhlala khona uSimoni no-Andrisi bakunye noJakopo noJwanisi.+ 30 Umkhwekazi kaSimoni+ bekalele agula aphethwe mgomani, msinyana babikela uJesu ngaye. 31 Waya kuye, wambamba ngesandla wamphakamisa. Umgomani waphola, wathoma ukubenzela ukudla.

32 Kuthe ntambama, ngemva kokutjhinga kwelanga, abantu baletha kuye boke abantu abagulako nabanamadimoni;+ 33 idorobho loke labuthana emnyango. 34 Walapha abanengi ebebaphethwe malwele ahlukahlukeneko,+ waqotha namadimoni amanengi kodwana bekangawavumeli amadimoni akhulume ngombana bewamazi ukuthi unguKrestu.*

35 Ekuseni khulu, kusesemnyama, wavuka waya ngaphandle endaweni enganamuntu, wathandaza.+ 36 USimoni nalabo ebekanabo bakhamba bayomzuma 37 bebamfumana, bathi kuye: “Boke abantu bafunana nawe.” 38 Kodwana wathi kibo: “Nambani sikhambe, siye kwamanye amadorobho aseduze bona ngiyokutjhumayela nakiwo ngombana ngizele lokho.”+ 39 Wakhamba, atjhumayela emasinagogeni kiyo yoke iGalile aqotha namadimoni.+

40 Kweza kuye indoda enobulepheru,* yamrabhela iguqe ngamadolo, yathi: “Nangabe uyathanda, ungangihlambulula.”+ 41 UJesu wayirhawukela, walula isandla sakhe wayithinta, wathi kiyo: “Ngiyathanda! Hlambuluka.”+ 42 Khonokho ubulepheru basuka kiyo, yahlambuluka. 43 Wathi ikhambe kodwana wayidosa ngendlebe, 44 wathi kiyo: “Ungatjeli muntu ngokwenzekileko, khamba uyoziveza kumphristi wenze nomnikelo wokuhlanjululwa kwakho, njengokutjho komthetho kaMosi,+ kube bufakazi kibo.”+ 45 Ngemva kokuthi isuke lapho, indoda leyo yathoma ukuyimemezela nokuyirhatjha khulu indaba leyo kangangobana uJesu bekangasakghoni ukungena edorobhenelo ngokutjhaphulukileko, wahlala ngaphandle eendaweni ezinganabantu. Nanyana kunjalo bebasolo beza kuye bavela kiwo woke amahlangothi.+

2 Ngemva kwamalangana uJesu wabuyela eKapernawumi, kwarhatjheka iindaba zokuthi ukhona ekhaya.+ 2 Kwabuthana abantu abanengi kangangobana indlu yazala swi, bekwayokufikela emnyango, yeke wathoma ukutjhumayela kibo ilizwi.+ 3 Kwalethwa kuye umuntu orholopheleko agugwe madoda amane.+ 4 Kodwana akhenge akghone ukumngenisa ngokunqophileko kuJesu ngebanga lesiqubuthu, ngalokho avula itjhuba ephahleni elingehla kwakaJesu, ehlisa umkghadi* ebekulele kiwo umuntu orholopheleko. 5 UJesu nakabona ukukholwa kwawo,+ wathi korholopheleko: “Ndodana, izono zakho zilitjalelwe.”+ 6 Nje-ke abanye babatloli bebalapho, bahlezi bacabanga ngeenhliziyweni zabo bathi:+ 7 “Kubayini umrhali lo akhuluma ngendlela le? Uyahlambalaza. Ngubani ongalibalela izono ngaphandle kwakaZimu yedwa?”+ 8 Khonokho uJesu alemuka lokho abakucabangako ngeenhliziyweni zabo, wathi kibo: “Kubayini nicabanga izinto enizicabangakwezo ngeenhliziyweni zenu?+ 9 Ngikuphi okulula, ukuthi emuntwini orholopheleko, ‘Izono zakho zilitjalelwe,’ namkha ukuthi, ‘Vuka uthathe umkghadakho ukhambe’? 10 Kodwana bona nazi ukuthi iNdodana yomuntu+ inamandla wokulibalela izono ephasini,”+ wathi endodeni erholopheleko: 11 “Ngithi kuwe, Vuka, uthathe umkghadakho, ukhambe uye ekhaya.” 12 Khonokho yavuka, yathatha umkghadayo yakhamba phambi kwabo boke. Nje-ke boke abantu bamangala, badumisa uZimu, bathi: “Okunje khona siyathoma ukukubona.”+

13 Godu waya eqadi kwelwandle, soke isiqubuthu besilokhu simlandela, wathoma ukusifundisa. 14 Njengombana adlula, wabona uLevi indodana ka-Alfiyosi ahlezi e-ofisini lomthelo, wathi kuye: “Ngilandela.” Khonokho wasikima wamlandela.+ 15 Kamva uJesu bekangendlini kaLevi adla, abathelisi abanengi nezoni bebadla naye nabafundi bakhe ngombana bebabanengi kibo abamlandelako.+ 16 Kodwana abatloli babaFarisi nababona ukuthi udla nezoni nabathelisi, bathi ebafundini bakhe: “Kanti udla nabathelisi nezoni na?” 17 Nakezwa lokho, uJesu wathi kibo: “Abaphilileko abamtlhogi udorhodere kodwana ngabagulako abamtlhogako. Angikazeli ukubiza abantu abalungileko kodwana ngizele ukubiza izoni.”+

18 Nje-ke abafundi bakaJwanisi nabaFarisi bebazila ukudla. Beza kuye bathi: “Kubayini abafundi bakaJwanisi nabafundi babaFarisi bazila ukudla kodwana abafundi bakho bangazili?”+ 19 UJesu wathi kibo: “Abangani bomkhwenyana abanalo ibanga lokuzila ukudla umkhwenyana+ nakasesenabo, akusinjalo? Awa angekhe bazile, umkhwenyana nakasesenabo. 20 Kodwana kuzokufika isikhathi umkhwenyana azokuthathwa kibo,+ bazokuzila-ke mhlokho. 21 Akakho othungela ipetjhi yetjhila elitjha esambathweni esidala. Nakangenza njalo, itjhila elitjha lizokudosa elidala bese kuvuleka itjhuba elidlula lekuthomeni.+ 22 Godu akakho othela iwayini elitjha ngeenkhwanyeni* zewayini ezidala. Nakangenza njalo, iwayini lizokurathula iinkhwamezo, konakale iwayini neenkhwama. Kodwana iwayini elitjha lithelwa ngeenkhwanyeni zewayini ezitjha.”

23 Kuthe nakadlula emasimini wekoroyi ngeSabatha, abafundi bakhe bathoma ukukha iinqwambi zekoroyi njengombana bakhamba.+ 24 Yeke abaFarisi bathi kuye: “Akhuqale abafundi bakho! Kubayini benza into engakavumeleki ngeSabatha?” 25 Wathi kibo: “Azange nifunde na ukuthi uDavida wenzani lokha nakadududu kukulapho yena namadoda ebekakhamba nawo balambile?+ 26 Endabeni emalungana no-Abhiyathari+ umphristi omkhulu, uDavida wangena ngendlini kaZimu wadla uburotho bomnikelo,* obungakavumeleki bona budliwe nginanyana ngubani ngaphandle kwabaphristi+ nokuthi wanikela amanye wamadoda akhambisana nawo obunye babo.” 27 Bese wathi kibo: “ISabatha libe khona ngebanga lomuntu,+ ingasi bona umuntu ube khona ngebanga leSabatha. 28 Ngalokho-ke iNdodana yomuntu iyiKosi ngitjho neyeSabatha.”+

3 Godu uJesu wangena ngesinagogeni, wafumana kunendoda enesandla esitjhwabeneko.*+ 2 AbaFarisi bamqalisisa bafuna ukubona ukuthi uzoyilapha na ngeSabatha, ukuze bammangalele. 3 Wathi endodeni etjhwabene* isandla: “Sikima uze phakathi nendawo.” 4 Wathi kibo: “Kuvumelekile na ukwenza okuhle, ukulimaza, ukusindisa ukuphila* namkha ukubulala ngeSabatha?”+ Kodwana bathula du. 5 Wabaqala asilingekile, ezwa nobuhlungu ngokungabi nezwelo kweenhliziyo zabo,+ wathi endodeni leyo: “Thabulula isandla sakho.” Yasithabulula, isandla sayo sathabuluka. 6 Khonokho abaFarisi baphuma benza umhlangano nabalandeli behlangano kaHerode,+ barerisana ngaye ukuze bambulale.

7 UJesu wakhamba nabafundi bakhe baya elwandle, iwoma labantu abavela eGalile neJudiya lamlandela.+ 8 Ngitjho newoma labantu abavela eJerusalema, e-Idumiya, ngaphetjheya kweJordani, namagega neTirosi neSidoni, nalizwa ngezinto ezinengi ebekazenza leza kuye. 9 Watjela abafundi bakhe ukuthi bamlungiselele isikepe esincani khona isiqubuthu singazomminyezela. 10 Ngombana walapha abantu abanengi, boke ebebagula khulu bebasunduzelana kuye bona bamthinte.+ 11 Ngitjho nemimoya emimbi,+ nayimbonako, beyiguqa ngamadolo phambi kwakhe irhuwelele ithi: “UyiNdodana kaZimu!”+ 12 Kodwana kanengi bekayikhalima bona ingakhulumi ukuthi ungubani.+

13 Wakhuphukela entabeni wabiza labo abafunako, beza kuye.+ 14 Wakhetha isiqhema sabali-12, wasibiza ngokuthi bapostoli, bekazokukhamba naso asithume bona siyokutjhumayela 15 wasinikela namandla wokuqotha amadimoni.+

16 Isiqhema sabali-12+ asikhethako,* bekunguSimoni, loyo amthiya ngokuthi nguPitrosi,+ 17 uJakopo indodana kaZebediya noJwanisi umfowabo kaJakopo (nalaba wabathiya igama elithi Bhowanerigesi elitjho ukuthi, “Amadodana Womdumo”),+ 18 u-Andrisi, uFlebhe, uBhartholomewu, uMatewu, uTomasi, uJakopo indodana ka-Alfiyosi, uThadiyosi, uSimoni umKanana,* 19 noJudasi Iskariyodi, owathengisa uJesu ngokukhamba kwesikhathi.

Ngemva kwalokho, uJesu waya ngendlini ethileko, 20 godu isiqubuthu sababungelela kangangobana akhenge bafumane nethuba lokudla. 21 Iinhlobo zakhe nazizwa ngalokhu, zaphuma zifuna ukuyombamba ngombana bezithi: “Uyarhapha.”+ 22 Nabatloli ebebavela eJerusalema bebathi: “UnoBhelzabhulu,* uqotha amadimoni ngombusi wamadimoni.”+ 23 Wababiza, wakhuluma nabo asebenzisa imifanekiso wathi: “USathana angamqotha njani uSathana? 24 Nangabe umbuso uhlukene phakathi, umbuso loyo angeze wajama;+ 25 nomuzi nangabe uhlukene phakathi, umuzi loyo angeze wakghona ukujama. 26 NoSathana nakalwa yedwa, uhlukene phakathi, angeze akwazi ukujama kodwana kuzokuba kuphela kwakhe. 27 Akunamuntu ongangena ngendlini yekakaramba ebe izinto zayo ngaphandle kobana ayibophe qangi. Nasele ayibophile, angakghona-ke ukuthatha izinto ezingendlinayo. 28 Ngiqinisile ngithi kini, abantu bazokulitjalelwa zoke izinto, ngitjho nanyana ngiziphi izono abazenzileko namkha ukuhlambalaza abakukhulumileko. 29 Kodwana nanyana ngubani ohlambalaza ummoya ocwengileko, angeze alitjalelwe bekube nini nanini+ kunalokho unomlandu wesono esingapheliko.”+ 30 Watjho lokhu ngombana bebathi: “Unommoya omumbi.”+

31 Nje-ke kwafika unina nabafowabo,+ bajama ngaphandle bathumela othileko bona ayombiza.+ 32 Njengombana bekunesiqubuthu sihlezi simbungelele, bathi kuye: “Unyoko nabafowenu bangaphandle bayakufuna.”+ 33 Wabaphendula wathi: “Ngubani umma nabafowethu na?” 34 Ngemva kwalokho waqala labo abahlezi phasi bambungelele wathi: “Nangu umma nabafowethu!+ 35 Nanyana ngubani owenza intando kaZimu, loyo nguye ongumfowethu nodadwethu nomma.”+

4 Godu wathoma ukufundisa aseqadi kwelwandle, isiqubuthu esikhulu sabuthana eduze kwakhe. Wakhwela ngesikepeni, wahlala kiso kudanyana neligu kodwana soke isiqubuthu besiseduze nelwandle, magega neligu.+ 2 Wathoma ukusifundisa izinto ezinengi asebenzisa imifanekiso, wathi kiso:+ 3 “Yenilalele. Kwaphuma umtjali ayokutjala.+ 4 Njengombana atjala, enye imbewu yawela eqadi kwendlela, kwafika iinyoni zayidla. 5 Enye yawela endaweni enamatje lapho bekunganahlabathi enengi khona, yamila khonokho ngombana ihlabathi beyiyincani.+ 6 Kodwana kuthe nakuphuma ilanga, layitjhisa beyatjhwaba ngombana beyinganamirabhu. 7 Enye imbewu yawela emeveni, ameva akhula ayiminyanisa, azange ithele.+ 8 Kodwana enye yawela ehlabathini ehle, yakhula yanda, yathoma ukuthela, yathela ngokubuyelelwe ngama-30, ngama-60 nange-100.”+ 9 Godu wathi: “Oneendlebe, akezwe.”+

10 Kuthe nakayedwa, abanye abafundi nabapostoli abaliTjhumi namBili beza kuye bambuza ngemifanekiso ayenzileko.+ 11 Wathi kibo: “Nina ninikelwe ifihlo ecwengileko+ yomBuso kaZimu kodwana kilabo abangaphandle zoke izinto zingemifanekiso,+ 12 khona kuzakuthi, nanyana baqalile, bangaboni, nanyana bezwa, bangazwisisi; bangatjhuguluki balitjalelwe.”+ 13 Waraga wathi kibo: “Nanibhalelwa kuzwisisa umfanekiso lo, nizoyizwisisa njani eminye imifanekiso?

14 “Umtjali utjala ilizwi.+ 15 Nje-ke, laba ngilabo abaseqadi kwendlela lapho ilizwi litjalwe khona; kwathi msinyana ngemva kokulizwa, kwafika uSathana+ wasusa ilizwi elitjalwe kibo.+ 16 Ngokufanako, laba ngilabo abatjalwe endaweni enamatje; msinyana ngemva kokuzwa ilizwi, balamukela ngethabo.+ 17 Nje-ke abanayo imirabhu kibo kodwana baraga isikhatjhana; bese kuthi nakuvela amatshwenyeko namkha ukuhlunguphazwa ngebanga lelizwi, bayawa. 18 Kusese nabanye abatjalwe hlangana nameva. Laba ngilabo abezwe ilizwi,+ 19 kodwana amatshwenyeko+ wephaseli namandla akhohlisako wobunjinga+ nesifiso+ sakho koke, kungena eenhliziyweni zabo kuminyanise ilizwi, kulenze lingatheli. 20 Emaswapheleni, labo ebebatjalwe ehlabathini ehle ngilabo abalalele ilizwi balamukela ngokutjhaphulukileko, bathela ngokubuyelelwe ngama-30, ngama-60 nange-100.”+

21 Godu wathi kibo: “Isibani asibekwa ngaphasi kwesitja* namkha ngaphasi kombhede. Sibekwa endaweni ephakemeko.+ 22 Ngombana akukho okufihliweko okungekhe kwambulwe; akukho okufihlwe ngobuthakgha okungekhe kwambulwe.+ 23 Oneendlebe akezwe.”+

24 Godu wathi kibo: “Tjhejani lokho enikuzwako.+ Ngesilinganiso enilinganisa ngaso, nani bazonilinganisela ngaso, kwamambala, kuzokungezelelwa okunengi kini. 25 Ngombana loyo onakho uzokunikelwa okungeziweko+ kodwana loyo onganakho, ngitjho nalokho anakho uzokumukwa khona.”+

26 Waraga wathi: “Ngokunjalo umBuso kaZimu unjengalokha umuntu arhatjha imbewu ehlabathini. 27 Uyalala ebusuku avuke ekuseni, imbewu iyatlhurha ikhule ukuthi lokho kwenzeka njani, akazi. 28 Ihlabathi ngokwayo iveza iinthelo kancanikancani, ithoma ngokuveza ihlanga bese kuza isiqwambi, iswaphelise ngokuveza iinthoro ngesiqwanjini. 29 Kodwana msinyana isitjalo nasivuthiweko, ufaka isegere ngombana isikhathi sokuvuna sesifikile.”

30 Waraga wathi: “Singawufanisa nani umBuso kaZimu namkha singawuhlathulula ngamuphi umfanekiso? 31 Unjengembewu yemastedi etjalwa ehlabathini, iyimbewu encani kunazo zoke ephasini.+ 32 Kodwana nasele itjaliwe, iyakhula idlule zoke ezinye iintjalo zemirorho ibe neempande ezikulu, kangangobana iinyoni zikghona ukufumana indawo yokuhlala ngaphasi komthunzayo.”

33 Wakhuluma ilizwi kibo asebenzisa imifanekiso enjalo eminengi,+ kuye ngokuthi bebakghona ukuzwisisa kangangani. 34 Kwamambala, bekangakhulumi nabo ngaphandle komfanekiso kodwana zoke izinto bekazihlathulula ebafundini bakhe ngerhorhomejeni.+

35 Mhlokho nakuhlwako, wathi kibo: “Asiyameleni ngeligwini elingaphetjheya.”+ 36 Kuthe ngemva kobana bakhambise isiqubuthu, bamthatha ngesikepe, lapho ebekakhona bekunezinye iinkepe.+ 37 Yeke kwavuka isiwuruwuru esikhulu, amagagasi bewasolo abetha isikepe, kangangobana bekusele kancani bona isikepe sizale amanzi.+ 38 Kodwana bekangemva esikepeni, alele emsamelweni. Ngalokho bamvusa bathi kuye: “Mfundisi, akukutshwenyi na ukuthi siyafa?” 39 Khonokho wavuka wakhalima umoya, wathi elwandle: “Thula uthi du!”+ Umoya wathula, kwathula du! 40 Wathi kibo: “Kubayini nisaba kangaka? Anikabi nokukholwa nanje?” 41 Kodwana bafikelwa kukwesaba okungakajayeleki, bakhuluma babodwa bathi: “Kuhlekuhle ngubani umuntu lo? Ngitjho nomoya nelwandle kuyamlalela.”+

5 Ngemva kwalokho, bayamela ngaphetjheya kwelwandle esifundeni samaGerasene.+ 2 UJesu uthe angahlika esikepeni, wahlangana nendoda enedimoni ivela emathuneni. 3 Beyithanda ukuhlala emathuneni, bekube mhlokho, akunamuntu namunye obekakghona ukuyibopha ayiqinise, beyibhalela ngitjho neenketani. 4 Ibotjhwe kanengi ngamakhamandela nangeenketani kodwana beyiqhasula iinketani iphule namakhamandela; akunamuntu obekanamandla wokuyihlula. 5 Ubusuku nemini, beyirhuwelela emathuneni neentabeni izisike nangamatje. 6 Kodwana ithe nayibona uJesu kudanyana, yagijima yaguqa phambi kwakhe.+ 7 Yarhuwelela ngelizwi elikhulu yathi: “Ungifunani Jesu, Ndodana kaZimu oPhezukoke? Ngikufungisa ngoZimu bona ungangitlhorisi.”+ 8 Yarhuwelela njalo ngombana uJesu bekathi kilo: “Phuma kuye, wena dimoni ndina.”+ 9 Kodwana uJesu wayibuza wathi: “Ungubani igama lakho?” Yaphendula yathi: “NginguLegiyona* ngombana sibanengi.” 10 Yaphikelela irabhela uJesu bona angaqothi amadimoni lawo enarheni leyo.+

11 Bekunomhlambi omkhulu weemfarigi+ udla lapho entabeni.+ 12 Ngalokho amadimoni amncenga athi: “Sithumela eemfarigini, bona singene kizo.” 13 Wawavumela. Amadimoni aphuma angena eemfarigini, umhlambi woke wagijimela ngeliweni wawela ngelwandle, iimfarigi ezingaba zii-2 000, zacwila ngelwandle. 14 Abelusi bazo babaleka bayokubika lokhu edorobheni neendaweni ezisemakhaya, abantu beza bazokubona okwenzekileko.+ 15 Ngalokho baya kuJesu, babona indoda ebeyingenwe lidimoni, leya ebeyineLegiyona, ihlezi lapho yembethe, ibuyelwe namkhumbulo, abantu basaba khulu. 16 Godu, labo abazibonele ngawabo babahlathululela ukuthi kwenzekeni endodeni ebeyinedimoni neemfarigini. 17 Yeke barabhela uJesu bona akhambe esifundeni sabo.+

18 Uthe nakasakhwela ngesikepeni, indoda ebeyingenwe lidimoni yamncenga ibawa ukukhamba naye.+ 19 Kodwana uJesu akhenge ayivumele, wathi kiyo: “Iya ekhaya emndeninakho, uzibikele zoke izinto uJehova* akwenzele zona nomusa akwenzele wona.” 20 Indoda le yakhamba yathoma ukutjhumayela eDekapolisi* ngazo zoke izinto uJesu ayenzele zona, yeke boke abantu barareka khulu.

21 Godu ngemva kobana uJesu ayamele eligwini elingaphetjheya ngesikepe, isiqubuthu esikhulu sabuthana kuye, bekaseduze nelwandle.+ 22 Omunye wabaphathi abengamele isinagogo, ebekuthiwa nguJayirosi, weza, wathi nakambonako, waguqa phambi kwakhe.+ 23 Wamncenga kanengi athi: “Umntazanyanami ugulela ukufa. Ngibawa uze uzombeka izandla+ bona aphole bekaphile.” 24 Khonokho uJesu wakhamba naye, isiqubuthu esikhulu samlandela sisunduzelana kuye.

25 Khonapho bekunomfazi obesekuminyaka eli-12+ aphethwe bulwele bokuphopha iingazi.+ 26 Watlhaga khulu* kibodorhodere abanengi bewaphelelwa ngikho koke ebekanakho kodwana akhenge alapheke, kunalokho, ukugula kwakhe kwarhagala khulu. 27 Kuthe nakezwa umbiko ngoJesu, wakhukhutha ngemva kwakhe hlangana nesiqubuthu, wakghwatha isambatho sakhe sangaphandle,+ 28 ngombana bekasolo athi: “Nangingakghwatha isambatho sakhe sangaphandle nje kwaphela, ngizokuphola.”+ 29 Khonokho ukuphopha kwakhe iingazi kwaphela, wezwa nemzimbenakhe ukuthi ulatjhiwe ekuguleni okubuhlungu.

30 Msinyana uJesu walemuka bona amandla+ aphumile kuye, wajika waqala isiqubuthu wasibuza wathi: “Ngubani okghwathe isambatho sami sangaphandle?”+ 31 Abafundi bathi kuye: “Uyasibona isiqubuthu sisunduzelana kuwe kodwana ubuza ukuthi, ‘Ngubani ongikghwathileko?’” 32 Nokho, wathalaza afuna ukubona ukuthi ngubani omkghwathileko. 33 Azi ukuthi kwenzekeni kuye, umfazi lo weza kuJesu ahlengezela ngokwesaba, waguqa phambi kwakhe wamtjela loke iqiniso. 34 Wathi kuye: “Ndodakazi, ukukholwa kwakho kukupholisile. Khamba ngokuthula+ uphole ekuguleni kwakho okubuhlungu.”+

35 Kuthe asakhuluma, amanye amadoda avela emzini womphathi owengamele isinagogo eza athi: “Indodakazakho ihlongakele! Usamtshwenyelani uMfundisi?”+ 36 Kodwana uJesu wakuzwa abakutjhoko, wathi kumphathi owengamele isinagogo: “Ungasabi, kholwa kwaphela.”+ 37 Nje-ke akhenge avumele nanyana ngubani bona amlandele ngaphandle kwakaPitrosi, uJakopo noJwanisi umfowabo kaJakopo.+

38 Kuthe nabafika emzini womphathi owengamele isinagogo, wabona kunesiphithiphithi nabantu abakhihla isililo esikhulu.+ 39 Wangena ngaphakathi, wathi kibo: “Kubayini nilila nibanga nesiphithiphithi? Umntwana lo akakahlongakali kodwana ulele.”+ 40 Nabezwa lokho, bamhleka ubudlhadlha. Kuthe sekabakhuphele boke ngaphandle, wathatha uyise nonina womntwana nalabo abakhamba naye, wangena lapho umntwana akhona. 41 Wabamba isandla somntwana, wathi kuye: “Thalitha kumi,” okutjho ukuthi, “Mntazanyana, ngithi kuwe, vuka!”+ 42 Khonokho umntazana wavuka wathoma ukukhamba. (Bekaneminyaka eli-12.) Nababona lokho, akhenge bakghone ukuzibamba ngombana bebathabe khulu. 43 Kodwana wabayala ngokubuyelelweko bona bangatjeli muntu ngalokhu+ nokuthi banikele umntwana loyo ukudla.

6 Wasuka lapho waya endawenekhabo,+ abafundi bakhe bamlandela. 2 Ngelanga leSabatha, wathoma ukufundisa esinagogeni, abantu abanengi abamuzwako bababaza bathi: “Umuntu lo uzithathaphi zoke izintwezi?+ Kubayini anikelwe ukuhlakaniphokhu neemangaliso ezinje zenzeka ngaye?+ 3 Kanti lo akasimbazi na,+ indodana kaMariya,+ umfowabo kaJakopo,+ uJosefa, uJudasi noSimoni?+ Kanti abodadwabo abasinathi lapha?” Babhala ukukholelwa kuye. 4 Kodwana uJesu wathi kibo: “Umphorofidi uyahlonitjhwa kwezinye iindawo ngaphandle kwendaweni yekhabo, ebantwini bekhabo nemzinakhe.”+ 5 Ngalokho akhenge enze nasinye isimangaliso ngaphandle kokubeka abantu abambalwa abagulako izandla, wabalapha. 6 Kwamambala, wararwa kungakholwa kwabo. Wabhoda izabelo zendawo leyo, afundisa.+

7 Wabiza abaliTjhumi namBili wabathuma ngababili,+ wabanikela namandla wokuqotha amadimoni.+ 8 Godu wabayala bona bangaphathi litho ekhambweni labo, uburotho, isikhwama sokudla nemali* eenkhwanyeni zabo kodwana bangaphatha idondolo kwaphela,+ 9 bambathe amapatlagwana kodwana bangambathi izambatho ezimbili.* 10 Wathi kibo: “Kinanyana ngimuphi umuzi eningena kiwo, hlalani lapho benikhambe endaweni leyo.+ 11 Nanyana kukuphi lapho banganamukeli namkha banganilaleli khona, naniphuma lapho, thintithani iinyawo zenu bona kube bufakazi kibo.”+ 12 Bakhamba-ke batjhumayela ukuthi abantu kufuze batjhuguluke,+ 13 baqotha amadimoni amanengi,+ bazesa abantu abanengi abagulako ngamafutha, babalapha.

14 IKosi uHerode yezwa ngalokhu ngombana igama lakaJesu besele lidume khulu, abantu bebathi: “UJwanisi uMbhabhadisi uvusiwe kwabafileko, kungakho anamandla wokwenza iimangaliso.”+ 15 Kodwana abanye bebathi: “Ngu-Eliya.” Kanti abanye bebathi: “Mphorofidi njengomunye wabaphorofidi bekadeni.”+ 16 UHerode nakezwa lokhu, wathi: “UJwanisi loya engamqunta ihloko, uvusiwe.” 17 Phela uHerode wathumela bona kubotjhwe uJwanisi, avalelwe ngejele ngebanga lakaHerodiya, umkaFlebhe umfowabo ngombana uHerode bekatjhade naye.+ 18 Ngombana uJwanisi bekasolo athi kuHerode: “Akukavumeleki ukuthi uthathe umkamfowenu.”+ 19 Kungalokho uHerodiya ambambela amavunda wafuna nokumbulala kodwana akhenge akghone. 20 UHerode bekamsaba uJwanisi, azi ukuthi uyindoda elungileko necwengileko,+ yeke bekamvikela. Qobe nakamzwako, bekangazi ukuthi enzeni kodwana waragela phambili athabela ukumlalela.

21 UHerodiya wafumana ithuba uHerode nakenzela iinkhulu zakhe neenduna zepi namadoda adumileko eGalile+ isidlo santambama ngelanga lakhe lamabeletho.+ 22 Indodakazi kaHerodiya yeza, yajida, yathabisa uHerode nalabo abahlezi naye etafuleni. Ikosi yathi emntazaneni: “Bawa nanyana yini oyifunako, ngizokunikela yona.” 23 Wafunga kuye wathi: “Nanyana yini oyibawako, ngizokunikela yona, ngitjho kungaba yingcenye yombuswami.” 24 Waphuma wathi kunina: “Ngibaweni?” Unina wathi: “Ihloko kaJwanisi uMbhabhadisi.” 25 Msinyana waya ekosini watjho isibawo sakhe, wathi: “Ngibawa unginikele ihloko kaJwanisi uMbhabhadisi ngesitja khona nje.”+ 26 Nanyana yezwa ubuhlungu, ikosi yasamukela isibawo sakhe, ngebanga lesifungo sayo neemvakatjhi zayo. 27 Khonokho ikosi yathumela unogada, yamyala bona alethe ihloko kaJwanisi. Yeke wakhamba wayokuqunta ihloko kaJwanisi ngejele, 28 wayiletha ngesitja. Wayinikela umntazana, yena wayinikela unina. 29 Abafundi bakhe nabezwa ngalokhu, bayokuthatha isidumbu sakhe basibulunga ethuneni.*

30 Abapostoli babuthana kuJesu bambikela koke abakwenzileko nabakufundisileko.+ 31 UJesu wathi kibo: “Nambani sikhambe siye endaweni enganabantu niyokuphumula kancani.”+ Ngombana banengi ebebafika nebebakhamba, akhenge bafumane isikhathi sokuphumula ngitjho nesokudla. 32 Bakhamba-ke ngesikepe baya endaweni enganabantu bona babe bodwa.+ 33 Kodwana abantu bababona nabakhambako, abanengi bazi ngakho, baphuma bavela kiwo woke amadorobho bagijima ngeenyawo babafikelela. 34 Kuthe nakahlikako, wabona isiqubuthu esikhulu, wasirhawukela+ ngombana besinjengezimvu ezinganamelusi.+ Wathoma ukusifundisa izinto ezinengi.+

35 Ntambama, abafundi bakhe beza kuye bathi: “Indawo le imumango begodu sekuntambama.+ 36 Tjela abantwaba bakhambe baye emaphandleni nezabelweni eziseduze bayozithengela ukudla.”+ 37 Wathi kibo: “Bapheni nina ukudla.” Bathi kuye: “Sikhambe na siyokuthenga uburotho obubiza abodenariyu abama-200 bese siphe abantwaba bona badle?”+ 38 Wathi kibo: “kheniyokuqala ukuthi ninoburotho obuyingakhi!” Nababuyako, bathi: “Buhlanu, neenhlambi ezimbili.”+ 39 Wayala boke abantu bona bahlale etjanini ngokweenqhema.+ 40 Yeke bahlala ngokweenqhema ezinabantu abali-100 nezinabantu abama-50. 41 Wathatha uburotho obuhlanu neenhlambi ezimbili, waqala ezulwini wathandaza.+ Wahlephula uburotho, wanikela abafundi bakhe bona banikele abantu, wahlukanisela boke abantu iinhlambi ezimbili. 42 Badla boke, basutha, 43 babuthelela iinsalela zoburotho zazala abomantji abali-12, ngaphandle kwebeenhlambi.+ 44 Labo abadla uburothobo, bekumadoda azii-5 000.

45 Msinyana ngemva kwalokho, watjela abafundi bakhe bona bakhwele ngesikepeni bamtjhiye baye eligwini elingaphetjheya ngeBhethesayida, yena nakasatjela isiqubuthu bona sikhambe.+ 46 Kodwana ngemva kokubalayelisa, waya entabeni wayokuthandaza.+ 47 Nasekurhwalele, isikepe besele siphakathi nelwandle kodwana yena bekayedwa enarheni leyo.+ 48 Nakababona batlhagiswa kugwedla isikepe ngombana umoya bewuphambana nabo, pheze ngomlindo wesine wobusuku,* weza ngakibo akhamba phezu kwelwandle; kodwana bekabonakala ngasuthi ufuna ukubadlula. 49 Kuthe nabambona akhamba phezu kwelwandle, bacabanga bathi: “Mbono!” Barhuwelela. 50 Boke bambona, bathukwa. Kodwana khonokho wakhuluma nabo wathi: “Yibani nesibindi! Ngimi; ningasabi.”+ 51 Wakhwela nabo ngesikepeni, umoya wathula du. Nababona lokhu barareka khulu, 52 ngombana akhenge bazwisise okutjhiwo simangaliso soburotho, iinhliziyo zabo zaragela phambili zilikhuni ekuzwisiseni.

53 Nasele bayamele ngaphetjheya kwenarha, baya eGenezaretha, babopha isikepe sabo eduze neligu.+ 54 Kodwana msinyana nabahlika ngesikepeni, abantu balemuka ukuthi nguJesu. 55 Bagijima soke isifundeso baletha kuye abagulako babathwele ngemikghadi babasa endaweni abezwe ukuthi ukiyo. 56 Nanyana kunini nakangena esabelweni namkha edorobheni namkha emaphandleni, bebaletha abagulako eendaweni zokuthengisela, bamrabhela bona abavumele bakghwathe umphetho wesambatho sakhe sangaphandle.+ Boke ebebasikghwatha bebaphola.

7 Nje-ke abaFarisi nabanye babatloli ebebavela eJerusalema babuthanela kuye.+ 2 Babona abanye babafundi bakhe badla ngezandla ezisilapheleko, okutjho ukuthi, ezingakahlanjwa.* 3 (Ngombana abaFarisi nawo woke amaJuda abadli bangakahlambi izandla bekufike endololwaneni, babambelela esikweni labokhokho babo, 4 godu nababuya eendaweni zokuthengisela, abadli bangakahlambi. Manengi namanye amasiko abawafumeneko nababambelela kiwo, njengokucwiliswa kweenkapho, imijeka, nezitja zekhopha.)+ 5 Yeke abaFarisi nabatloli bambuza bathi: “Kubayini abafundi bakho bangaphethi isiko labokhokho ngombana badla ngezandla ezisilapheleko?”+ 6 Wathi kibo: “U-Isaya waphorofida kufanele ngani bazenzisi njengombana kutloliwe ukuthi, ‘Abantwaba bangidumisa ngomlomabo kodwana iinhliziyo zabo zikude khulu nami.+ 7 Akusizi ukuthi bangilotjhe ngombana bafundisa imiyalo yabantu ngasuthi ziimfundiso zami.’+ 8 Nilisa umyalo kaZimu nikakarele esikweni labantu.”+

9 Wanaba wathi kibo: “Ninamano wokudelela umyalo kaZimu bona niphethe isiko lenu.+ 10 Ngokwesibonelo, uMosi wathi, ‘Hlonipha uyihlo nonyoko,’+ bewathi, ‘Othuka* uyise namkha unina kufuze abulawe.’+ 11 Kodwana nina nithi, ‘Nangabe umuntu uthi kuyise namkha kunina: “Nanyana yini enginayo ebeyinganisiza iyikorbana (okutjho ukuthi, isisipho esinikelwe kuZimu),”’ 12 anisamvumeli bona enzele uyise namkha unina ngitjho nento yinye.+ 13 Ngalokho nenza ilizwi lakaZimu lingasebenzi ngebanga lesiko lenu enilidlulisela kwabanye.+ Nenza nezinye izinto ezinengi ezifana nalokhu.”+ 14 Yeke wabizela isiqubuthu kuye godu, wathi kiso: “Ngilalelani noke, nizwisise nokuthi kutjho ukuthini lokhu.+ 15 Akunalitho elingena ngemlonyeni elingasilaphaza umuntu; kodwana izinto eziphuma ngaphakathi komuntu ngizo ezimsilaphazako.”+ 16 * ——

17 Nje-ke kwathi nasekangene ngendlini ekude nesiqubuthu, abafundi bakhe bambuza ngomfanekiso awenzileko.+ 18 Ngalokho wathi kibo: “Kanti nani anizwisisi njengabo? Anazi na bona okungena emlonyeni akumsilaphazi umuntu? 19 Ngombana akungeni ngehliziywenakhe kodwana kungena ngemathunjini bese kuphumele ngaphandle komzimba.” Ngokutjho lokhu, bekahlathulula ukuthi koke ukudla kuhlwengile. 20 Wanaba wathi: “Okuphuma ngaphakathi komuntu ngikho okumsilaphazako.+ 21 Ngombana ngaphakathi, eenhliziyweni zabantu,+ kuvela imicabango elimazako, ukuziphatha kumbi ngokomseme,* ukweba, ukubulala, 22 ukufeba,* ukuba marhamaru, ukwenza okumbi, ukukhohlisa, ukwenza amanyala ungabi neenhloni,* umona,* ukuhlambalaza, ukuzikhakhazisa nokungabi nangqondo. 23 Zoke izinto ezimbezi ziphuma ngaphakathi bese zisilaphaze umuntu.”

24 Wasuka lapho waya esifundeni seTirosi neSidoni.+ Lapho wangena ngendlini ethileko, bekangafuni bona abantu bazi kodwana azange akghone ukuzifihla. 25 Khonokho, umfazi othileko obekanomntazanyana onedimoni wezwa ngaye, weza kuye waguqa phambi kwakhe.+ 26 Umfazi loyo bekamGirigi, omSiriyafunisiya ngokubelethwa; wamrabhela ngokubuyelelweko bona aqothe idimoni endodakazinakhe. 27 Kodwana uJesu wathi kuye: “Kufuze kusuthe abantwana qangi ngombana akukalungi ukuthatha uburotho babantwana ubuphosele izinjana.”+ 28 Umfazi lo wamphendula wathi: “Iye, kosi kodwana ngitjho nezinjana ezingaphasi kwetafula zidla iintshutshuru eziwiswe bantwana abancani.” 29 Nakezwa lokho wathi kuye: “Ngombana utjho lokho, khamba; idimoni liphumile endodakazinakho.”+ 30 Wakhamba-ke waya kwakhe, wafumana umntwana alele embhedeni, idimoni liphumile kuye.+

31 Nakabuya esifundeni seTirosi, wakhamba ngeSidoni waya eLwandle leGalile, wadlula esifundeni seDekapolisi.*+ 32 Nje-ke baletha kuye indoda engezwako eendlebeni engakghoni nokukhuluma kuhle,+ bamrabhela bona ayibeke izandla. 33 Watjhinga nayo ngerhorhomejeni, lapho kunganasiqubuthu khona. Wafaka iminwakhe eendlebeni zendoda le, wakhafula, ngemva kwalokho wathinta ilimu layo.+ 34 Waqala phezulu ezulwini, wadosa ummoya wathi kiyo: “Efatha,” okutjho ukuthi, “Vuleka.” 35 Khonokho iindlebe zayo zavuleka,+ ilimu layo lararuluka, yathoma ukukhuluma kuhle. 36 Wayala abantu bona bangatjeli muntu+ kodwana nakabayalako, kulapho-ke ebebayirhatjha khona khulu indaba leyo.+ 37 Kwamambala, abantu barareka khulu,+ bathi: “Wenze koke kuhle. Wenze nabantu abangezwako bezwa neemumu zakhuluma.”+

8 Emihleni leyo, kwaba nesinye isiqubuthu esikhulu, naso besinganakudla. Yeke wabiza abafundi wathi kibo: 2 “Ngiyasirhawukela isiqubuthwesi+ ngombana sesihlezi nami amalanga amathathu, abe asikadli litho.+ 3 Nangingathi sikhambe siye emakhaya silambile, sizokuphelelwa mamandla endleleni ngombana abanye babuya kude.” 4 Abafundi bakhe bamphendula bathi: “Endaweni ekude kangaka nemizi, umuntu angabufumanaphi uburotho obaneleko obungasuthisa abantwaba?” 5 Wathi kibo: “Ninoburotho obungaki?” Bathi: “Obulikhomba.”+ 6 Wayala isiqubuthu bona sihlale phasi. Wathatha uburotho obulikhomba, wathokoza uZimu, wabuhlephula, wabunikela abafundi bakhe bona banikela isiqubuthu.+ 7 Godu bebaneenhlambi ezincani ezimbalwa, wathokoza uZimu, watjela abafundi bakhe ukuthi nazo bazinikele isiqubuthu. 8 Badla basutha, babutha abomantji abakhulu abalikhomba abazele ukudla okuseleko.+ 9 Nje-ke bekumadoda azii-4 000. Ngemva kwalokho, wathi bakhambe.

10 Msinyana wangena ngesikepeni nabafundi bakhe baya esifundeni seDalmanutha.+ 11 Kweza abaFarisi bathoma ukuphikisana naye, bamkatelela ukuthi abenzele isibonakaliso esivela ezulwini, banqophe ukumlinga.+ 12 Wabubula emmoyenakhe bese wathi: “Kubayini isizukulwanesi sifuna isibonakaliso?+ Ngiqinisile ngithi, akunasibonakaliso esizokwenzelwa isizukulwanesi.”+ 13 Wabatjhiya lapho, wakhwela ngesikepeni godu, wayamela ngeligwini elingaphetjheya.

14 Nokho, bakhohlwa ukuphatha uburotho, bebanganalitho kibo esikepeni ngaphandle koburotho bunye tere.+ 15 Wabayelelisa ngokukhanyako wathi: “Yelelani; nitjheje isibiliso sabaFarisi nesibiliso sakaHerode.”+ 16 Bathoma ukuphikisana bodwa ngokuthi abanaburotho. 17 Alemuka lokho, wathi kibo: “Kubayini niphikisana ngokuthi aninaburotho? Anikaboni begodu anikalemuki na? Kghani iinhliziyo zenu ziseselikhuni ekuzwisiseni? 18 ‘Nanyana ninamehlo, aniboni na; nanyana nineendlebe, anizwa na?’ Anikhumbuli na ukuthi 19 lokha nangihlephulela amadoda azii-5 000 uburotho obuhlanu,+ nabutha abomantji abangaki abazele ukudla okuseleko?” Bathi kuye: “Abalitjhumi nambili.”+ 20 “Nalokha nangihlephulela amadoda azii-4 000 uburotho obulikhomba, nabutha abomantji abakhulu abangaki abazele ukudla okuseleko?” Bathi kuye: “Abalikhomba.”+ 21 Ngalokho wathi kibo: “Anikazwisisi nanje?”

22 Nje-ke bafika eBhethesayida. Lapho abantu baletha kuye indoda esiphofu, bamrabhela bona ayithinte.+ 23 Wabamba indoda esiphofu leyo ngesandla, waya nayo ngaphandle kwemizi. Wayikhafulela emehlweni,+ wabeka izandla zakhe kiyo wayibuza: “Ubonani?” 24 Indoda leyo yaqala yathi: “Ngibona abantu kodwana babonakala njengemithi ekhambakhambako.” 25 Godu wabeka izandla zakhe emehlweni wendoda leyo, yabona kuhle. Amehlwayo alapheka, yabona yoke into kuhle. 26 Wayithumela ekhaya, wathi: “Ungangeni ngemzini.”

27 UJesu nabafundi bakhe baya ezabelweni zeKhesariya Filipi, nabasendleleni wathoma ukubuza abafundi bakhe, wathi: “Abantu bathi ngingubani?”+ 28 Bathi kuye: “Batjho unguJwanisi uMbhabhadisi+ kodwana abanye bathi ungu-Eliya,+ abanye bathi ungomunye wabaphorofidi.” 29 Wabuza bona ukuthi: “Alo-ke, nina nithi ngingubani?” UPitrosi wathi: “UnguKrestu.”+ 30 Yeke wabayala ngokuqinileko bona bangatjeli muntu ngaye.+ 31 Wathoma ukubafundisa bona iNdodana yomuntu kufuze iqalane namatshwenyeko amanengi begodu ininwe badala, baphristi abakhulu nabatloli, beyibulawe,+ ivuke ngemva kwamalanga amathathu.+ 32 Kwamambala, watjho lokho ngokutjhaphulukileko. Kodwana uPitrosi wamdosela eqadi, wamkhalima.+ 33 Nakezwa lokho wajika, waqala abafundi bakhe, wakhalima uPitrosi, wathi: “Iya emva kwami, Sathana! Ngombana awucabangi imicabango kaZimu kodwana yabantu.”+

34 Nje-ke wabizela isiqubuthu nabafundi bakhe kuye wathi kibo: “Nanyana ngubani ofuna ukungilandela, akazidele athathe isigodo sakhe sokuhlunguphazwa* angilandele qobe.+ 35 Ngombana nanyana ngubani ofuna ukusindisa ukuphila kwakhe kuzomlahlekela kodwana nanyana ngubani olahlekelwa kuphila kwakhe ngebanga lami nangebanga leendaba ezimnandi uzokusindisa.+ 36 Kuzomsiza ngani umuntu ukuzuza iphasi loke kodwana alahlekelwe kuphila kwakhe?*+ 37 Namkha khuyini umuntu anganikela ngayo bona afumane ukuphila kwakhe?*+ 38 Nanyana ngubani oneenhloni ngami nangamezwami esizukulwaneni esifebako* nesinesonwesi, iNdodana yomuntu izokuba neenhloni ngaye+ nayiza ngephazimulo kaYise ineengilozi ezicwengileko.”+

9 UJesu wathi kibo: “Ngiqinisile ngithi kini kunabanye abajame lapha abangekhe bafe bangakawuboni umBuso kaZimu sewufike ngamandla.”+ 2 Ngemva kwamalanga asithandathu, uJesu wathatha uPitrosi, uJakopo noJwanisi bakhuphukela entabeni ede babodwa. UJesu watjhuguluka phambi kwabo;+ 3 izambatho zakhe zathoma ukumanyazela, zaba mhlophe twa! Ukudlula indlela nanyana ngimuphi umhlanzi wezambatho ephasini egade angazenza zibe mhlophe ngayo. 4 Godu, kwabonakala u-Eliya noMosi bakhuluma noJesu. 5 UPitrosi wathi kuJesu: “Rabi, kuhle ngathi ukuba lapha. Nje-ke sivumela sihlome amatende amathathu, elinye kube ngelakho, elinye kube ngelakaMosi bese elinye kube ngelaka-Eliya.” 6 Eqinisweni, uPitrosi bekangazi ukuthi angathini ngombana bebathukwe khulu. 7 Kwavela ilifu, labasibekela, kwazwakala ilizwi+ elifini lithi: “Le yiNdodanami, engiyithandako.+ Yilaleleni.”+ 8 Ngemva kwalokho, bathalaza babona ukuthi akusenamuntu ngaphandle kwabo noJesu.

9 Njengombana behla entabeni, uJesu wabatjela indlebe ukuzwa bona bangatjeli muntu ngalokho abakubonileko+ bekube kulapho iNdodana yomuntu seyivukile kwabafileko.+ 10 Yeke ilizwelo balibeka ehliziyweni* kodwana babonisana bodwa ukuthi ukuvuswokhu kwabahlongakeleko kutjho ukuthini. 11 Bathoma ukumbuza, bathi: “Kubayini abatloli bathi u-Eliya+ kufuze eze qangi?”+ 12 Wathi kibo: “Nangambala u-Eliya uza qangi abuyisele zoke izinto esigeni;+ kodwana kuza njani kutlolwe ngeNdodana yomuntu bona izakutlhaga khulu beyininwe na?+ 13 Kodwana ngithi kini u-Eliya,+ kuhlekuhle, weza, bazenzela umathanda ngaye njengombana kutloliwe ngaye.”+

14 Kuthe nabafika kwabanye abafundi, babona isiqubuthu esikhulu sibabungelele, lapho bekunabatloli baphikisana nabo.+ 15 Kodwana msinyana soke isiqubuthu sithe nasimbonako, sarareka khulu, sagijimela kuye bona siyomlotjhisa. 16 Ngalokho wababuza: “Niphikisana ngani nabo?” 17 Omunye esiqubuthwini wamphendula wathi: “Mfundisi, ngilethe indodanami kuwe ngombana inommoya oyenza ingakghoni ukukhuluma.+ 18 Uthi nawuyibambako, uyidule phasi, ibhubhudlhe amagwebu, iququde amazinyo beyiphelelwe mamandla. Ngibawe abafundi bakho bona bawukhuphe kodwana babhalelwe.” 19 Wathi kibo: “Maye! Sizukulwana esingakholwako,+ kuzabe kube kunini nginani? Kufuze nginibekezelele isikhathi esingangani? Mletheni kimapha.”+ 20 Baletha umsana loyo kuye kodwana kuthe ummoya nawubona uJesu, wabhudabhuda umsana. Ngemva kokumdula phasi, wasolo agedeka phasi, abhubhudlha amagwebu. 21 UJesu wabuza uyise womsana wathi: “Sekusikhathi esingangani lokhu kwenzeka?” Wathi: “Kusukela ebuntwaneni bakhe, 22 sekukanengi umlahlela emlilweni nemanzini ufuna ukumbulala. Kodwana nawungakghona ukumlapha, sibawa usirhawukele, usisize.” 23 UJesu wathi kuye: “Kubayini uthi, ‘Nawungakghona’? Ngombana zoke izinto ziyenzeka emuntwini okholwako.”+ 24 Msinyana uyise womntwana warhuwelela wathi: “Ngiyakholwa! Ngisiza lapha ngitlhoga khona ukukholwa!”+

25 UJesu, abona ukuthi isiqubuthu sigijimela ngakibo, wakhalima ummoya omumbi, wathi kiwo: “Wena mmoya omenza angakghoni ukukhuluma begodu angezwa, ngikuyala bona uphume kuye, ungasangeni kuye godu!”+ 26 Ngemva kokurhuwelela nokubhudabhudeka kanengi, waphuma, umntwana wabonakala ngasuthi uhlongakele, kangangobana abantu abanengi bebathi: “Uhlongakele!” 27 Kodwana uJesu wambamba ngesandla wamvusa, wajama ngeenyawo. 28 Wangena ngendlini, abafundi bakhe bambuza ngemsitheleni bathi: “Kubayini thina sibhalelwe kuwuqotha?”+ 29 Wathi kibo: “Umhlobo lo ungaphuma kwaphela ngomthandazo.”

30 Basuka lapho badlula ngeGalile kodwana akhenge afune abantu bazi ngakho. 31 Ngombana bekafundisa abafundi bakhe athi kibo: “INdodana yomuntu izokukghatjhelwa ezandleni zabantu, bazoyibulala,+ naphezu kokubulawa, izokuvuswa ngemva kwamalanga amathathu.”+ 32 Nokho, akhenge bawazwisise amezwakhe, basaba nokumbuza.

33 Bafika eKapernawumi. Kuthe nabangendlini, wababuza: “Beniphikisana ngani endleleni?”+ 34 Bathula ngombana endleleni bebaphikisana ngokuthi ngubani omkhulu phakathi kwabo. 35 Wahlala phasi wabiza abaliTjhumi namBili wathi kibo: “Nanyana ngubani ofuna ukuba ngewokuthoma, kufuze abe ngewokugcina kikho koke begodu abe sisebenzi sabo boke.”+ 36 Ngalokho wabiza umntwana wamjamisa phambi kwabo; wamsingatha, wathi kibo: 37 “Nanyana ngubani owamukela munye wabantwana abanjengalo+ ngebanga legama lami, uyangamukela nami nanyana ngubani ongamukelako akamukeli mina kwaphela kodwana wamukela naloyo ongithumileko.”+

38 UJwanisi wathi kuye: “Mfundisi, sibone umuntu aqotha amadimoni ngegama lakho, silinge ukumvimba ngombana bekangasimlandelethu.”+ 39 Kodwana uJesu wathi: “Ningalingi ukumvimba ngombana akunamuntu ongenza imisebenzi yamandla ngegama lami ongajika msinyana angithuke. 40 Ngombana nanyana ngubani ongaphikisani nathi, ungakithi.+ 41 Nanyana ngubani oninikela ikapho yamanzi bona nisele ngombana ningebakaKrestu,+ ngiqinisile ngithi kini, angekhe alahlekelwe mvuzwakhe.+ 42 Kodwana nanyana ngubani owisa omunye wabancanaba abakholwako, kuzokuba ngcono ngaye bona kubotjhelwe entanyenakhe ilitje lokusila elizombeleziswa ngudumbana bese aphoselwe ngelwandle.+

43 “Nangabe isandla sakho sikwenza wone, siqunte. Kungcono ukungena ekuphileni urholophele kunokobana ungene eGehena* emlilweni ongapheliko unezandla zombili.+ 44 *—— 45 Nangabe inyawo lakho likwenza wone, liqunte. Kungcono ungene ekuphileni usirhole kunokobana uphoselwe eGehena* uneenyawo ezimbili.+ 46 *—— 47 Nangabe ilihlo lakho likwenza wone, likhuphe ulilahle.+ Kungcono ukungena emBusweni kaZimu unelihlo linye kunokobana uphoselwe eGehena* unamehlo womabili,+ 48 lapho isibungu singafi khona nalapho umlilo ungacimi khona.+

49 “Woke umuntu kufuze afufuzelwe ngetswayi lomlilo.+ 50 Itswayi lilungile kodwana nangabe liphelelwa butswayi balo, uzolinunga ngani?+ Yibani netswayi kini+ begodu nihlale ninokuthula komunye nomunye.”+

10 Ukusuka lapho wasikima waya emikhawulweni yeJudiya ngaphetjheya kweJordani godu isiqubuthu sabuthanela kuye. Wathoma ukusifundisa njengombana bekajayele ukwenza njalo.+ 2 AbaFarisi baya kuye, bafuna ukumlinga, bambuza ukuthi kuvumelekile na ukuthi indoda itlhale umkayo.+ 3 Wabaphendula wathi: “Kanti uMosi waniyala wathini?” 4 Bathi: “UMosi wathi ungamtlolela incwadi yokumqotha, umtlhale.”+ 5 Kodwana uJesu wathi kibo: “Bekacabangela iinhliziyo zenu eziqinileko,+ kungakho anitlolela umyalo lo.+ 6 Nokho, kusukela ekuthomeni kokudala, ‘Wabenza kwaba yindoda nomfazi.+ 7 Ngalokho indoda izokutjhiya uyise nonina,+ 8 begodu ababilaba bazokuba yinyama yinye,’+ nje-ke abasese babili kodwana bayinyama yinye. 9 Ngalokho-ke, lokho uZimu akuhlanganisileko, akungabi nomuntu okuhlukanisako.”+ 10 Godu nabangendlini, abafundi bathoma ukumbuza ngendaba le. 11 Wathi kibo: “Nanyana ngubani otlhala umkakhe bese atjhade nomunye uyafeba*+ begodu akakathembeki kuye, 12 kanti-ke nakungenzeka umfazi ngemva kokutlhala indodakhe atjhade nenye, uyafeba.”+

13 Nje-ke abantu bathoma ukuletha abantwana kuye bona abathinte kodwana abafundi babakhalima.+ 14 Nakabona lokho, uJesu wasilingeka wathi kibo: “Vumelani abantwana beze kimi; ningalingi ukubavimba ngombana umBuso kaZimu ungewabanjalo.+ 15 Kwamambala ngithi kini nanyana ngubani ongamukeli umBuso kaZimu njengomntwana omncani, angekhe angene kiwo.”+ 16 Nje-ke wathatha abantwana wabasingatha, wababusisa, ababeka izandla.+

17 Njengombana akhamba, indoda ethileko yagijima yaguqa phambi kwakhe yambuza yathi: “Mfundisi omuhle, kufuze ngenzeni bona ngizuze ilifa lokuphila okungapheliko?”+ 18 UJesu wathi kiyo: “Ungibizelani ngokuthi ngimuhle? Akunamuntu omuhle ngaphandle kwakaZimu kwaphela.+ 19 Uyayazi imiyalo ethi: ‘Ungabulali,+ ungafebi,*+ ungebi,+ ungafakazi amala,+ ungadlelezeli,+ hlonipha uyihlo nonyoko.’”+ 20 Indoda leyo yathi kuye: “Mfundisi, ngiyilalele yoke imiyalo le kusukela ebutjheni bami.” 21 UJesu wayiqala, wayithanda wathi, “Yinye into otlhayela ngayo: Khamba, uyokuthengisa koke onakho begodu uphe abatlhagako, uzokuba nomnotho ezulwini; bese ube mlandelami.”+ 22 Indoda le yadana nayizwa lokho, yakhamba itlhuwile ngombana beyinepahla enengi.+

23 Ngemva kokuthalaza, uJesu wathi ebafundini bakhe: “Qalani ukuthi kuzokuba budisi kangangani ngalabo abanemali bona bangene emBusweni kaZimu!”+ 24 Amezwi lawo abarara khulu abafundi. Ngalokho uJesu wathi: “Bantwana, qalani ukuthi kubudisi kangangani ukungena emBusweni kaZimu! 25 Kubulula ngekamela ukungena entunjeni yenalidi kunomuntu onjingileko ukungena emBusweni kaZimu.”+ 26 Barareka khulu bathi kuye:* “Nakunjalo, ngubani ongasindiswa?”+ 27 UJesu wabaqala emehlweni, wathi kibo: “Ebantwini akwenzeki kodwana akusinjalo kuZimu ngombana zoke izinto ziyenzeka ngoZimu.”+ 28 UPitrosi wathi kuye: “Qala! Sitjhiye koke sakulandela.”+ 29 UJesu wathi: “Ngiqinisile ngithi kini, akakho otjhiye indlu namkha abafowabo namkha abodadwabo namkha unina namkha uyise namkha abantwana namkha amasimu ngebanga lami nangebanga leendaba ezimnandi+ 30 ongekhe afumane ngokubuyelelwe nge-100 esikhathini sanje, izindlu, abafowabo, abodadwabo, abomma, abantwana, amasimu, nokutlhagiswa+ begodu ephasini elizako, ukuphila okungapheliko. 31 Kodwana abanengi abangebokuthoma bazokuba ngebokugcina, nebokugcina bazokuba ngebokuthoma.”+

32 Nje-ke bebasendleleni bakhuphukela eJerusalema, uJesu bekakhamba phambi kwabo, abafundi barareka kodwana labo ababalandelako bathoma ukusaba. Godu wabizela abaliTjhumi namBili ngeqadi wathoma ukubatjela izinto ezizokwenzeka kuye:+ 33 “Lalelani! Sikhuphukela eJerusalema, iNdodana yomuntu izokunikelwa ebaphristini abakhulu nebatlolini. Bazoyigwebela ukufa, bayinikele ebantwini beentjhaba, 34 bazokuhlekisa ngayo bayikhafulele, bayirithe bebayibulale kodwana ngemva kwamalanga amathathu izokuvuka.”+

35 Nje-ke uJakopo noJwanisi amadodana kaZebediya,+ beza kuye bathi: “Mfundisi, sifuna usenzele nanyana yini esikubawa yona.”+ 36 Wathi kibo: “Nifuna nginenzeleni?” 37 Baphendula bathi: “Sivumela ukuthi omunye ahlale ngesidleni sakho bese omunye ngesinceleni sakho ephazimulwenakho.”+ 38 Kodwana uJesu wathi kibo: “Aniyazi into eniyibawako le. Ningayisela na ikapho engiyiselako namkha nibhajadiswe ngebhabhadiso engibhajadiswa ngalo?”+ 39 Bathi kuye: “Iye.” Yeke uJesu wathi kibo: “Ikapho engizoyisela, nizoyisela, nebhabhadiso engibhajadiswa ngalo nizokubhajadiswa ngalo.+ 40 Nokho, ukuhlala ngesidleni sami namkha ngesinceleni sami, akusingekwami bona ngingaphisana ngakho, kungekwalabo abalungiselelwe khona.”

41 Kwathi abanye abalitjhumi nabezwa ngendaba leyo, basilingeka ngebanga lakaJakopo noJwanisi.+ 42 Kodwana uJesu wababizela kuye wathi kibo: “Niyazi ukuthi labo abaqalwa njengababusi beentjhaba bakatelela ubukhosi babo phezu kweentjhaba namadoda aveleleko anelawulo phezu kwazo.+ 43 Akukafaneli kube njalo phakathi kwenu kodwana nanyana ngubani ofuna ukuba mkhulu phakathi kwenu, kufuze abe sisebenzi senu,+ 44 nanyana ngubani ofuna ukuba ngewokuthoma phakathi kwenu, kufuze abe sisebenzi senu noke. 45 Ngombana ngitjho neNdodana yomuntu ayikazeli ukwenzelwa kodwana ukwenzela abanye+ nokunikela ngokuphila kwayo kube sihlengo sabanengi.”+

46 Ngemva kwalokho, bafika eJerikho. Kodwana njengombana yena nabafundi bakhe nesiqubuthu esikhulu baphuma eJerikho, uBharthimewu (indodana kaThimewu), isikhombeli esisiphofu, bekahlezi eqadi kwendlela.+ 47 Nakezwa bona nguJesu umNazaretha odlulako, wathoma ukurhuwelela wathi: “Jesu, Ndodana kaDavida,+ ngirhawukela!”+ 48 Nabamzwako abanengi bamkhalima, bamtjela ukuthi athule kodwana warhuwelela khulu wathi: “Ndodana kaDavida, ngirhawukela!” 49 UJesu wajama wathi: “Mbizeni eze kimi.” Bayibiza-ke indoda esiphofu leyo, bathi kiyo: “Ungasabi! Sikima; uyakubiza.” 50 Yafuthela isambatho sayo sangaphandle phasi, yeqa yaya kuJesu. 51 UJesu wathi kiyo: “Ufuna ngikwenzeleni?” Isiphofu sathi kuye: “Raboni,* ngenze ngibone godu.” 52 UJesu wathi kiso: “Khamba. Ukukholwa kwakho kukupholisile.”+ Khonokho sabona godu,+ sathoma ukumlandela.

11 Kuthe nabatjhidela eJerusalema, eBhethifage neBhethaniya+ eNtabeni yama-Oliva, wathuma abafundi bakhe ababili+ 2 wathi kibo: “Iyani esabelweni lesa enisiqalileko, nizakuthi ningangena kiso, nifumane udumbanyana obotjhiweko ongakhenge ahlalwe mumuntu bekube nje. Mtjhaphululeni nimlethe kimi. 3 Nakungaba nomuntu othi kini, ‘Kubayini nenza lokhu?’ nithi, ‘IKosi iyamtlhoga, izombuyisa msinyazana.’” 4 Bakhamba, bafumana udumbana abotjhelwe hlanu komnyango, ngaphandle eduze kwendlela, bamtjhaphulula.+ 5 Kodwana abanye abantu ebebajame lapho bathi kibo: “Kubayini nitjhaphulula udumbanyana loyo?” 6 Babatjela lokho uJesu abatjele khona, babalisa bona bakhambe.

7 Baletha udumbanyana+ kuJesu, babeka izambatho zabo phezu kwakhe, wahlala phezu kwakhe.+ 8 Nabanye abanengi baqhisa izambatho zabo endleleni, abanye baqunta amatjhwaba emasimini.+ 9 Labo ebebakhamba ngaphambili nalabo ebebavela ngemva bebasolo barhuwelela bathi: “Siyakurabhela, msindise!+ Ubusisiwe oza ngegama lakaJehova!*+ 10 Ubusisiwe umBuso ozako kababethu+ uDavida! Siyakurabhela, msindise, wena osezulwini!” 11 Wangena eJerusalema, watjhinga ethempelini, waqalaqala koke kodwana njengombana besekuhlwile, waya eBhethaniya nabaliTjhumi namBili.+

12 Ngelanga elilandelako nabasuka eBhethaniya, walamba.+ 13 Uthe nakakudenyana, wabona umuthi wamafeyi unamakari, watjhinga kiwo ayokuqala ukuthi angeze afumana okuthileko na. Kodwana nakafika kiwo, akhenge afumane litho ngaphandle kwamakari ngombana bekungasisikhathi samafeyi. 14 Wathi kiwo: “Kungasabi nomuntu obuye adle isithelo kuwe.”+ Abafundi bakhe bebamlalele nakatjho njalo.

15 Nje-ke bangena eJerusalema. Nakafika lapho, watjhinga ethempelini waqotha abathengisako nabathengako, wagubuda amatafula wabatjhentjha imali neenhlalo zabathengisa amajuba,+ 16 akhenge avumele namunye bona avundle nento ethempelini. 17 Bekafundisa athi kibo: “Akukatlolwa na ukuthi, ‘Indlwami izokubizwa ngokuthi yindlu yokuthandaza yazo zoke iintjhaba’?+ Kodwana nina niyenze irholo labadlelezeli.”+ 18 Abaphristi abakhulu nabatloli bamuzwa, bathoma ukwenza amaqhinga wokumbulala+ kodwana bebamsaba ngombana soke isiqubuthu besirarwe yindlelakhe yokufundisa.+

19 Nakurhwaqelako, baphuma edorobheni. 20 Kodwana nabadlulako ekuseni khulu, babona umuthi wamafeyi sewutjhwabile kusukela emrajinawo.+ 21 UPitrosi wawukhumbula, wathi kuye: “Rabi, qala! Umuthi wamafeyi loya owuqalekisileko utjhwabile.”+ 22 UJesu waphendula wathi kibo: “Kholwani kuZimu. 23 Ngiqinisile ngithi kini nanyana ngubani othi entabeni le, ‘Suka lapha uphoseke ngelwandle’ begodu angabilayeli ehliziywenakhe kodwana akholwe ukuthi akutjhoko kuzokwenzeka, uzokwenza kwenzeke.+ 24 Kungalokho ngithi kini, zoke izinto enizithandazelako nenizibawako, yibani nokukholwa kokuthi senizamukele, nizozifumana.+ 25 Nanijamako nithandaza, libalelani nanyana ngimuphi umtjhapho abanye abawenze kini bona uYihlo osezulwini anilibalele nani imitjhaphwenu.”+ 26 *——

27 Babuyela eJerusalema. Njengombana uJesu akhambakhamba ethempelini, abaphristi abakhulu nabatloli nabadala beza 28 bathi kuye: “Uzenza ngamaphi amandla izintwezi? Namkha ngubani okunikele amandla wokwenza izintwezi?”+ 29 UJesu wathi kibo: “Ngizonibuza umbuzo munye tere. Ngiphendulani, nami ngizonitjela ukuthi ngizenza ngamaphi amandla izintwezi. 30 Ibhabhadiso lakaJwanisi+ belivela ezulwini namkha ebantwini? Ngiphendulani.”+ 31 Bathoma ukubonisana bodwa, bathi: “Nasingathi, ‘Ezulwini,’ uzokuthi, ‘Kubayini-ke, ningakhenge nimkholwe?’ 32 Kodwana nasingathi, ‘Ebantwini,’ kuzokwenzekani kithi?” Bebasaba isiqubuthu ngombana soke besiqala uJwanisi njengomphorofidi.+ 33 Ngalokho baphendula uJesu bathi: “Asazi.” UJesu wathi kibo: “Nami-ke angekhe nginitjele ukuthi ngizenza ngamaphi amandla izintwezi.”

12 Wakhuluma nabo asebenzisa imifanekiso wathi: “Indoda ethileko yatjala isimu yamadiribe,+ yakha umthangala magega nayo, yemba umgodi wokutlhodlhela iwayini, yakha nesithala;+ yayiqatjhisela abalimi yona yakhamba yaya enarheni ekude.+ 2 Ngesikhathi sokuvunwa kwamadiribe, yathumela isisebenzi kubalimi bona siyomthathela ezinye zeenthelo zayo zesivuno. 3 Kodwana basibamba, basidula, basibuyisela emuva singakaphathi litho. 4 Godu yathumela esinye isisebenzi kibo, leso basilimaza ehloko bebasihlambalaza.+ 5 Yathumela esinye, sona basibulala, yathumela nezinye ezinengi, ezinye bazibetha begodu ezinye bazibulala. 6 Yathumela indodanayo ethandekako+ kubalimi ithi, ‘Bazoyihlonipha indodanami.’ 7 Kodwana abalimabo barera babodwa bathi, ‘Le yindlalifa.+ Yizani siyibulale, sithathe ilifa layo libe ngelethu.’ 8 Ngalokho bayibamba, bayibulala, bayiphosela ngaphandle kwesimu yamadiribe.+ 9 Umninisimu wamadiribe uzokwenzani? Uzokuza abulale abalimaba bese anikele abanye isimu yamadiribe leyo.+ 10 Akhenge khenifunde na umtlolo lo othi: ‘Ilitje abakhi abalininako, libe lilitje eliqakatheke ukuwadlula woke.*+ 11 Livela kuJehova begodu liyakarisa emehlwenethu’?”+

12 Nabezwa lokho bafuna ukumbhudungela* kodwana basaba isiqubuthu ngombana bebazi ukuthi ukhuluma ngabo emfanekisweni lo. Yeke bamtjhiya bakhamba.+

13 Bathumela kuye godu abanye babaFarisi nabalandeli behlangano kaHerode bona bambambe ngamezwakhe.+ 14 Nabafikako, bathi kuye: “Mfundisi, siyazi bona uneqiniso, awunandaba nokuthi abantu bathini ngombana awuqali ukubumbeka kwangaphandle ebantwini kodwana ufundisa indlela kaZimu ngeqiniso. Kulungile na ukubhadela umthelo kuKhesari namkha awa? 15 Kufuze siwubhadele na namkha awa?” Abona ubuzenzisi babo, wathi kibo: “Ningilingelani? Ngitjengisani udenariyu.*” 16 Bamnikela, wathi kibo: “Ngewakabani umfanekiso nomtlolo lo?” Bathi kuye: “NgewakaKhesari.” 17 Yeke uJesu wathi: “Buyiselani izinto zakaKhesari kuKhesari+ kodwana izinto zakaZimu, kuZimu.”+ Barareka nabezwa lokho.

18 Nje-ke abaSadusi, abathi akukho ukuvuswa kwabafileko,+ beza kuye bambuza bathi:+ 19 “Mfundisi, uMosi wasitlolela ukuthi nakwenzeka umfowabo womuntu ahlongakale, atjhiye umfazi kodwana banganamntwana, umfowabo kufuze athathe umfazi loyo abelethele umfowabo abantwana.+ 20 Nje-ke bekunamadoda alikhomba abantwana bomuntu. Yokuthoma yathatha umfazi kodwana yahlongakala inganamntwana. 21 Yesibili yatjhada naye kodwana nayo yahlongakala inganabantwana, neyesithathu ngokufanako. 22 Wolikhomba akhenge abe nabantwana. Emaswapheleni, umfazi loyo wahlongakala. 23 Ekuvusweni kwabafileko, uzokuba mkabani? Ngombana wolikhomba bewatjhade naye.” 24 UJesu wathi kibo: “Nitjhaphile ngombana aniyazi imiTlolo namandla kaZimu.+ 25 Ngombana nabavuswa kwabafileko, amadoda awathathi nabafazi abendiswa kodwana banjengeengilozi ezulwini.+ 26 Malungana nokuvuswa kwabafileko, anikafundi na encwadini kaMosi, endabeni yomuthi wameva, ukuthi uZimu wathi kuye: ‘NginguZimu ka-Abrahama noZimu ka-Isaka noZimu kaJakopo’?+ 27 AkasinguZimu wabafileko kodwana ungewabaphilako. Nitjhaphe khulu.”+

28 Omunye wabatloli owafika wabezwa baphikisana, azi ukuthi ubaphendule kuhle, wambuza wathi: “Ngimuphi umyalo oqakatheke khulu kinayo yoke?”+ 29 UJesu waphendula wathi: “Wokuthoma ngilo, ‘Yizwa Israyeli, uJehova uZimethu nguJehova munye, 30 kufuze uthande uJehova uZimakho ngehliziywakho yoke nangomphefumulwakho* woke nangomkhumbulwakho woke nangamandlakho woke.’+ 31 Wesibili ngilo, ‘Kufuze uthande umakhelwanakho njengombana uzithanda wena.’+ Awukho omunye umyalo omkhulu kunale.” 32 Umtloli wathi kuye: “Mfundisi, ukhulume kuhle, ngokuvumelana neqiniso, ‘UZimu munye, akakho omunye ngaphandle kwakhe’+ 33 begodu ukumthanda ngehliziywakho yoke, ngelemuko lakho loke, ngamandlakho woke nokuthanda umakhelwana njengombana umuntu azithanda yena kuqakatheke khulu ukudlula iminikelo yokutjhiswa nemihlatjelo.”+ 34 UJesu nakabona ukuthi uphendule ngokuhlakanipha, wathi kuye: “Awusikude nomBuso kaZimu.” Kodwana akhenge kusaba nomuntu onesibindi sokumbuza omunye umbuzo godu.+

35 Nokho njengombana uJesu aragela phambili afundisa ethempelini, wathi: “Kuza njani abatloli bathi uKrestu uyindodana kaDavida?+ 36 Ngommoya ocwengileko,+ uDavida ngokwakhe wathi, ‘UJehova wathi eKosinami: “Hlala ngesidleni sami bekube kulapho ngibeka amanabakho ngaphasi kweenyawo zakho.”’+ 37 UDavida ngokwakhe umbiza Kosi, alo kwenzeka njani abe yindodanakhe?”+

Isiqubuthu esikhulu besimlalele kamnandi. 38 Nakafundisako waraga wathi: “Yelelani abatloli abathanda ukuzulazula bambethe iimphuraphura begodu bathanda ukulotjhiswa eendaweni zokuthengisela+ 39 neenhlalo eziphambili emasinagogeni neendaweni ezikhethekileko eminyanyeni.+ 40 Badlelezela izindlu zabahlolokazi,* benza imithandazo emide bona babukwe. Laba bazokufumana isigwebo esikhulu khulu.”

41 Wahlala waqalana namabhoksi womnikelo,+ wathoma ukubukela indlela abantu ebebaphosela ngayo imali emabhoksini womnikelo, abantu abanengi abanjingileko bebaphosela imali enengi.+ 42 Nje-ke kwafika umhlolokazi otlhagileko, waphosela iimpaparwana ezimbili zenani eliphasi khulu.*+ 43 Ngalokho wabiza abafundi bakhe wathi kibo: “Ngiqinisile ngithi kini umhlolokazi otlhagileko lo uphosele ukubadlula boke abanye abaphosele imali ngemabhoksini womnikelo.+ 44 Ngombana boke banghwathe emnothwenabo kodwana yena ekutlhageni kwakhe, unikele ngakho koke anakho nagade angaphila ngakho.”+

13 Nakaphuma ethempelini, omunye wabafundi bakhe wathi kuye: “Mfundisi, qala bona mahle kangangani amatje la nemakhiwo le!”+ 2 UJesu, wathi kuye: “Uyayibona imakhiwo emikhulu le? Akunalitje elizokutjhiywa phezu kwelinye lingagirizelwa phasi.”+

3 Asahlezi eNtabeni yama-Oliva aqalene nethempeli, uPitrosi, uJakopo, uJwanisi no-Andrisi bambuza ngemsitheleni bathi: 4 “Sitjela bona izintwezi zizokwenzeka nini nokuthi sizokuba yini isibonakaliso sokuphela kwazo?”+ 5 UJesu wathoma ukubatjela wathi: “Yelelani bona kungabi nomuntu onidurhisako.+ 6 Abanengi bazokuza ngegama lami, bathi, ‘Nginguye,’ badurhise abanengi. 7 Godu nanizwa ngezipi nemibiko yezipi, ningasabi; izintwezi kufuze zenzeke kodwana ukuphela kuzabe kungakafiki.+

8 “Isitjhaba sizokulwa nesitjhaba, umbuso ulwe nombuso;+ kuzokuba nokusikinyeka kwephasi eendaweni ngeendawo; kuzokuba nokutlhayela kokudla.+ Lokhu kuthoma kwemirhelo yokugandeleleka.+

9 “Kodwana nina, zitjhejeni. Abantu bazonisa emakhotho,+ nizokubetjhwa emasinagogeni,+ nijanyiswe phambi kwababusi namakhosi ngebanga lami bona kube bufakazi kibo.+ 10 Godu, iindaba ezimnandi kufuze zitjhunyayelwe kizo zoke iintjhaba qangi.+ 11 Nabanibambako bona banise ekhotho, ningatshwenyeki ngenizokutjho nanifika lapho; kodwana nanyana ngikuphi eninikelwa khona ngesikhatheso, kukhulumeni ngombana akusingini enikhulumako kodwana mmoya ocwengileko.+ 12 Ngalokho umuntu uzokuthengisa umfowabo bona abulawe, nobaba athengise umntwana nabantwana bazokuvukela ababelethi babangele bona babulawe.+ 13 Nizokuhloywa babantu boke ngebanga legama lami.+ Kodwana loyo okghodlhelele* bekwaba sekupheleni+ uzokusindiswa.+

14 “Nje-ke, nanibona into enyenyisako ebangela ukutjhabalala+ ijame lapha kungakafaneli khona (ofundako akalemuke), abaseJudiya ababalekele eentabeni.+ 15 Umuntu ophezu kwendlu angahliki namkha angene ngendlini ayokuthatha okuthileko ngendlinakhe 16 nomuntu osesimini angabuyeli emva ayokuthatha isambatho sakhe sangaphandle. 17 Maye! Ebafazini abasidisi nabamunyisako ngesikhatheso.+ 18 Hlalani nithandaza bona kungenzeki ebusika; 19 ngombana isikhatheso kuzokuba sikhathi sesizi+ elingakhenge khelibe khona, kusukela ekuthomeni kwendalo uZimu ayibumbileko bekube nje, nelingekhe libe khona godu.+ 20 Eqinisweni, ngathana uJehova akhenge awarhunyeze amalanga lawo, akunamuntu obekangasinda. Kodwana ngebanga labakhethiweko, uwarhunyezile amalanga lawo.+

21 “Nje-ke nangabe umuntu uthi kini, ‘Qalani! Nangu uKrestu,’ namkha ‘Nanguya,’ ningamkholwa.+ 22 Ngombana kuzokuvela aboKrestu bamala nabaphorofidi bamala,+ bazokwenza iimbonakaliso neemangaliso bona badurhise ngitjho nabakhethiweko nakukghonekako. 23 Yeke nina, yelelani.+ Nginitjele zoke izinto kusese ngaphambili.

24 “Kodwana emihleni leyo, ngemva kwesizelo, ilanga lizokufiphazwa, inyezi ayizukukhanya,+ 25 iinkwekwezi zizokuwa ezulwini namandla asezulwini azokusikinywa. 26 Bazokubona iNdodana yomuntu+ iza emafini inamandla amakhulu nephazimulo.+ 27 Izokuthumela iingilozi zibuthelele abakhethiweko bayo ndawonye bavela emagumbini amane wephasi, ukusukela emkhawulweni wephasi kuya emkhawulweni wezulu.+

28 “Nje-ke fundani emfanekisweni womuthi wamafeyi: Nawumila iimpande ezincani, utlhurha namakari, niyazi bona ihlobo selitjhidele.+ 29 Nani, nanibona izintwezi zenzeka, yazini ukuthi iNdodana yomuntu iseduze, isemnyango.+ 30 Ngiqinisile ngithi kini, isizukulwanesi angekhe sidlule zingakenzeki zoke izintwezi.+ 31 Izulu nephasi kuzokudlula+ kodwana amezwami angekhe adlule.+

32 “Malungana nelangelo namkha i-iri akakho owaziko, ngitjho neengilozi ezulwini neNdodana kodwana nguBaba kwaphela owaziko.+ 33 Hlalani niqalile, hlalani niphapheme+ ngombana anisazi isikhathi esibekiweko.+ 34 Kufana nendoda ekhamba iye enarheni ekude itjhiye indlwayo. Ngaphambi kobana ikhambe, inikela iinsebenzi zayo ilungelo lokulawula,+ ngasinye emsebenzinaso bese iyala umlindisango bona ahlale aphapheme.+ 35 Ngalokho-ke, hlalani niqalile ngombana anazi bona umninindlu ubuya nini,+ kungaba ntambama namkha phakathi nobusuku namkha ngamathathakusa* namkha ekuseni,+ 36 Bona nakafika ningakalindeli, anganifumani nilele.+ 37 Kodwana lokho engikutjhoko kini, ngikutjho kibo boke: Hlalani niqalile.”+

14 Bekusele amalanga amabili+ bona kube yiPhasika+ nomNyanya woBurotho+ obunganaSibiliso. Abaphristi abakhulu nabatloli bebafuna indlela yokumbamba* ngobugirikitjani bambulale;+ 2 ngombana bebathi: “Singakwenzi emnyanyeni abantu bangavusa umguruguru.”

3 Ngesikhathi aseBhethaniya adla emzini kaSimoni obekanobulepheru, kweza umfazi aphethe umjekana we-alabhasta unamafutha anuka kamnandi, abiza khulu, inarada* yamambala. Wavula umjekana we-alabhasta loyo wawathela ehloko kaJesu.+ 4 Abanye nababona lokhu, bakhuluma bodwa basilingekile bathi: “Kubayini kudlalwa ngamafutha anuka kamnandi la? 5 Phela amafutha la bekangathengiswa ngabodenariyu abangaphezu kwabama-300 bese imali leyo inikelwe abatlhagako!” Bamkgharameja khulu. 6 Kodwana uJesu wathi: “Mliseni. Nimtshwenyelani? Ungenzele into ehle.+ 7 Ngombana abatlhagako nihlala ninabo+ ningabenzela okuhle nanyana kunini nanifunako kodwana mina angekhe nihlale ninami.+ 8 Wenze angakwenza; ungizese ngamafutha anuka kamnandi ukulungiselela umzimbami ukubulungwa.+ 9 Ngiqinisile ngithi kini nanyana kukuphi lapho kutjhunyayelwa khona iindaba ezimnandi ephasini loke,+ nokwenziwe mfazi lo kuzokukhulunywa ngakho akhunjulwe.”+

10 UJudasi Iskariyodi, omunye wabaliTjhumi namBili, waya ebaphristini abakhulu bona ayokuthengisa uJesu kibo.+ 11 Nabezwa lokho, bathaba bamthembisa ukumnikela imali yesiliva.+ Yeke wathoma ukufuna ithuba lokumthengisa.

12 Ngelanga lokuthoma lomnyanya woBurotho obunganaSibiliso,+ ilanga ngokujayelekileko abenza ngalo umhlatjelo wePhasika,+ abafundi bakhe bathi kuye: “Ufuna siyokulungiselela kuphi lapho ungadlela khona iPhasika?”+ 13 Ngalokho wathumela abafundi bakhe ababili wathi kibo: “Khambani niye edorobheni, nizokuhlangana nomuntu ophethe umjeka wamanzi. Mlandeleni,+ 14 lapho angena khona, nithi kumnikazi wendlu leyo, ‘uMfundisi uthi: “Ikuphi ikumba yeemvakatjhi engingadlela kiyo iPhasika nabafundi bami?”’ 15 Uzonitjengisa ikumba ekulu ephezulu, elungisiweko begodu enayo yoke into esizoyitlhoga. Silungiselelani iPhasika lapho.” 16 Nje-ke abafundi bakhamba, baya edorobheni bafumana kunjengombana uJesu atjhwile, balungiselela iPhasika.

17 Kuthe nakurhwaqelako, weza nabaliTjhumi namBili.+ 18 Njengombana bahlezi etafuleni badla, uJesu wathi: “Ngiqinisile ngithi kini, omunye wenu odla nami uzongithengisa.”+ 19 Batlhuwa bathi kuye ngamunye ngamunye: “Akusingimi, angitjho?” 20 Wathi kibo: “Ngomunye wabaliTjhumi namBili, loyo otjheba nami esitjeni sinye.+ 21 Ngombana iNdodana yomuntu iyakhamba njengombana kutloliwe ngayo. Maye! Ngaloyo iNdodana yomuntu ezokuthengiswa ngaye.+ Bekuzokuba ngcono ngomuntu loyo ngathana azange abelethwe.”+

22 Njengombana baragela phambili badla, wathatha uburotho, wathandaza, wabuhlephula, wabanikela bona, wathi: “Thathani; lokhu kutjho umzimbami.”+ 23 Wathatha nekapho, wathandaza, wabanikela yona basela ngayo boke.+ 24 Wathi kibo: “Lokhu kutjho ‘iingazi zami+ zesivumelwano,’+ ezizokuphalazwa ngebanga labanengi.+ 25 Ngiqinisile ngithi kini, angekhe ngisalisela iwayini bekube mhlazana ngilisela lilitjha emBusweni kaZimu.” 26 Emaswapheleni ngemva kokuvuma iingoma zokudumisa,* baphuma baya eNtabeni yama-Oliva.+

27 UJesu wathi kibo: “Noke nizokuwa ngombana kutloliwe ukuthi: ‘Ngizokubetha umelusi,+ izimvu ziphadlhalale.’+ 28 Kodwana ngemva kokuvuswa kwami, ngizonikhambela phambili ngiye eGalile.”+ 29 UPitrosi wathi kuye: “Ngitjho nanyana abanye bangawa, mina angekhe ngikutjhiye.”+ 30 UJesu nakezwa lokho wathi kuye: “Ngiqinisile ngithi kuwe namhlanjesi, iye, ebusuku banamhlanjesi, ngaphambi kobana umkukurumbu ulile kabili, uzabe sewungiphike kathathu.”+ 31 Kodwana wasolo aphikelela athi: “Ngitjho nanyana kungafuze ngife nawe, angekhe ngikuphike.” Nabanye batjho okufanako.+

32 Bafika endaweni ekuthiwa yiGetsemani, wathi ebafundini bakhe: “Yijani nihlezi lapha ngisayokuthandaza.”+ 33 Wathatha uPitrosi, uJakopo noJwanisi wakhamba nabo,+ wathoma ukuzizwa agandeleleke kwamanikelela begodu atshwenyeke khulu. 34 Wathi kibo: “Ngilisizi khulu,+ bekube sekufeni. Hlalani lapha, nihlale niqalile.”+ 35 Waya phambidlana, waguqa wahloma nehloko phasi, wathandazela bona ngathana bekukghoneka, isikhathesi sidlule. 36 Wathi: “Abha,* Baba,+ zoke izinto ziyakghoneka kuwe; susa ikapho le kimi. Nokho ingasi ngokufuna kwami kodwana ngokufuna kwakho.”+ 37 Wabuya wabafumana balele, wathi kuPitrosi: “Simoni, ulele? Azange ube namandla wokuhlala uqalile i-iri linye na?+ 38 Hlalani niqalile begodu nithandaze qobe bona ningangeni esilingweni.+ Ummoya uyafisa kodwana inyama iyabogaboga.”+ 39 Wabuyela godu wayokuthandaza, watjho amezwi anjengewekuthomeni.+ 40 Wabuya godu wabafumana balele ngombana amehlwabo bewazele ubuthongo, akhenge bazi bona bamphendule bathini. 41 Wabuya kwesithathu wathi kibo: “Ngesikhathi esinje, nilele begodu niphumulile! Kwanele! I-iri selifikile!+ Qalani! INdodana yomuntu iyathengiswa ezandleni zezoni. 42 Sikimani sikhambeni. Loyo ongithengisako sekatjhidele.”+

43 Asakhuluma, uJudasi, omunye wabaliTjhumi namBili, wafika akhamba nesiqubuthu siphethe iinsabula neembhuku, sithunywe baphristi abakhulu, abatloli nabadala.+ 44 Umthengisakhe bekabanikele itshwayo ebebavumelene ngalo, wathi: “Loyo engizommanga, nguye enimfunako; mbambeni nimbophe nikhambe naye ngokuphepha.” 45 Watjhinga poro kuye wathi, “Rabi!” Wammanga ngomusa. 46 Bambamba bambopha. 47 Omunye wabagade bajame lapho warhwatjhula isabulakhe, warharhabula isisebenzi somphristi ophakemeko, wasiqunta indlebe.+ 48 UJesu wathi kibo: “Alo-ke niphumele ukuzokubopha mina niphethe iinsabula neembhuku ngasuthi nizokubamba isilelesi?+ 49 Mihla namalanga benginani ethempelini ngifundisa+ kodwana akhenge ningibambe. Nokho, lokhu kwenzeka bona kuzaliseke imiTlolo.”+

50 Boke bamtjhiya babaleka.+ 51 Isokana elithileko elizitantele ngetjhila lelineni lathoma ukumlandela eduze, balinga ukulibamba, 52 kodwana latjhiya itjhilelo lasala ngesambatho sangaphasi.

53 Nje-ke bathatha uJesu bamusa kumphristi ophakemeko,+ boke abaphristi abakhulu namadoda amadala nabatloli babuthana lapho.+ 54 UPitrosi, wamlandela akudenyana bewayokufika ngesirhodlweni somphristi ophakemeko; wahlala neensebenzi zendlu wotha umlilo.+ 55 Abaphristi abakhulu neSanhedrini yoke bebafuna ubufakazi ngoJesu bona bambulale kodwana bebangabufumani.+ 56 Abanengi bebanikela ubufakazi bamala ngaye+ kodwana ubufakazi babo bebungavumelani. 57 Nabathileko bebasikima banikele ubufakazi bamala ngaye, bathi: 58 “Simzwile athi, ‘Ngizokugiriza ithempeleli elenziwe ngezandla, ngakhe elinye ngamalanga amathathu elingakenziwa ngezandla.’”+ 59 Ngitjho nakilokhu, ubufakazi babo bebungavumelani.

60 Ngalokho umphristi ophakemeko wasikima phakathi kwabo wabuza uJesu wathi: “Awutjho litho bona uziphendulele? Zizinto bani lezi abantwaba abakumangalela ngazo?”+ 61 Kodwana wathula akhenge aphendule.+ Godu umphristi ophakemeko wambuza wathi kuye: “UnguKrestu iNdodana kaZimu oCwengileko na?” 62 UJesu wathi: “Nginguye begodu nizokubona iNdodana yomuntu+ ihlezi ngesandleni sokudla+ soMninimandla Woke begodu iza ngamafu wezulu.”+ 63 Nakezwa lokhu umphristi ophakemeko warathula izambatho zakhe wathi: “Sisabafunelani abanye abofakazi?+ 64 Nikuzwile ukuhlambalaza kwakhe. Nicabangani?” Boke bamgwebela ukufa.+ 65 Abanye bamkhafulela,+ bamgubuzesa ebusweni, bamdula ngamaguduva bathi kuye: “Phorofida!” Bambetha ebusweni, ngemva kwalokho, iinsebenzi zekhotho zamthatha.+

66 Kuthe lokha uPitrosi asenzasi ngesirhodlweni, kwafika umntazana osisebenzi somphristi ophakemeko.+ 67 Nakabona uPitrosi otha umlilo, wamqala ngemehlweni wathi: “Nawe bewunoJesu umNazaretha lo.” 68 Kodwana waphika, wathi: “Angimazi nokumazi umuntu lo begodu angazi ukuthi ukhuluma ngani,” waphumela ngaphandle ngasuthi uya esangweni. 69 Umntazana osisebenzi wambona godu wathi kilabo abajame lapho: “Lo ngomunye wabo.” 70 Waphika godu. Ngemva kwesikhatjhana, labo abajame lapho bathi kuPitrosi: “Kwamambala ungomunye wabo ngombana eqinisweni umGalile.” 71 Wathoma ukuqalekisa nokufunga wathi: “Angimazi umuntu enikhuluma ngaye lo!” 72 Khonokho umkukurumbu walila kwesibili,+ uPitrosi wakhumbula okwatjhiwo nguJesu kuye: “Ngaphambi kobana umkukurumbu ulile kabili, uzabe ungiphike kathathu.”+ Walila kabuhlungu.

15 Msinyana ngemva kokuphuma kwelanga, abaphristi abakhulu nabadala kunye nabatloli, iSanhedrini yoke, babuthana babonisana, ngemva kwalokho babopha uJesu bamusa kuPilatu.+ 2 UPilatu wamphosa ngombuzo wathi: “UyiKosi yamaJuda na?”+ Wamphendula wathi: “Wena ngokwakho uyatjho.”+ 3 Kodwana abaphristi abakhulu bebammangalela ngezinto ezinengi. 4 UPilatu wambuza godu, wathi: “Awuziphenduleli na?+ Qala ukuthi bakumangalela ngezinto ezinengi kangangani.”+ 5 Kodwana uJesu azange asaphendula, lokho-ke kwamrara uPilatu.+

6 Nokho, qobe nakuba nomnyanya, bekajayele ukubatjhaphululela isibotjhwa sinye abasibawako.+ 7 Ngesikhatheso bekunendoda ekuthiwa nguBharabhasi, yona nabanye ebebabotjhwe nayo bebamavukelambuso okwathi nabavukela umbuso njalo, babulala. 8 Nje-ke isiqubuthu seza ukuzokwenza isibawo saso ngokwalokho uPilatu ebekajayele ukusenzela khona. 9 Wasiphendula wathi: “Nifuna nginitjhaphululele iKosi yamaJuda na?”+ 10 UPilatu bekalemuka bona abaphristi abakhulu balethe uJesu kuye ngebanga lomona.+ 11 Kodwana abaphristi abakhulu bahlohlozela isiqubuthu bona sifune asitjhaphululele uBharabhasi kunoJesu.+ 12 UPilatu wathi kiso: “Alo-ke, ngenzeni ngalo enithi uyiKosi yamaJuda?”+ 13 Sarhuwelela sathi: “Akabulawelwe esigodweni!”+ 14 Kodwana uPilatu wathi kiso: “Kanti kubayini? Ngibuphi ubumbi abenzileko?” Nanyana kunjalo saraga ngokurhuwelela sithi: “Akabulawelwe esigodweni!”+ 15 Nje-ke uPilatu afuna ukuthabisa isiqubuthu, wasitjhaphululela uBharabhasi; ngemva kokuyala bona uJesu arithwe,+ wathi akayokubulawelwa esigodweni.+

16 Amasotja amusa ngesirhodlweni esingesigodlweni, abiza soke isihlopha samabutho ndawonye.+ 17 Ambathisa isambatho esisipiridzana, aluka isihlohlo sameva amthwesa sona; 18 amrhuwelela athi: “Bayede, wena Kosi yamaJuda!”+ 19 Godu, bekambetha ngomhlanga ehloko, amkhafulela begodu aguqe enza ngasuthi ayamhlonipha. 20 Emaswapheleni, ngemva kokuhlekisa ngaye, amhlubulisa isambatho esisipiridzana ambathisa izambatho zakhe zangaphandle. Aphuma naye ayombethela esigodweni.+ 21 Akatelela umuntu othileko ozidlulelako, uSimoni weSirene, obekavela endaweni yemakhaya, uyise ka-Alekzandra noRufosi bona athwale isigodo sakhe sokuhlunguphazwa.*+

22 Amusa endaweni ebizwa ngokuthi yiGolgotha, okutjho ukuthi, “iNdawo yeKhakhayi.”+ 23 Lapho alinga ukumnikela iwayini elinesidakamizwa ekuthiwa yimire+ kodwana wabhala ukulisela. 24 Ambethela esigodweni, abelana izambatho zakhe zangaphandle ngefumbe ukuqunta ukuthi ngubani ozokuthatha ini.+ 25 Ngesimbi yethoba ekuseni,* ambethela esigodweni. 26 Bekutlolwe umlandu abamthwesa wona othi: “IKosi yamaJuda.”+ 27 Ngaphezu kwalokho, abeka iinlelesi ezimbili eengodweni ziimphahlile, esinye ngesidleni esinye ngesinceleni.+ 28 *—— 29 Abantu abadlulako bebamthuka, banikina neenhloko+ bathi: “Wena owathi ungagiriza ithempeli bewulakhe ngamalanga amathathu,+ 30 zisindise ngokwehla esigodweni sokuhlunguphazweso.”* 31 Godu abaphristi abakhulu nabatloli bebakhuluma bodwa bahlekisa ngaye, bathi: “Abanye wabasindisa; yena ubhalelwa kuzisindisa!+ 32 UKrestu loyo, iKosi yakwa-Israyeli, akehle nje esigodweni sokuhlunguphazwa,* simbone bese siyamkholwa.”+ Ngitjho nalabo ebebaseengodweni bamphahlile bebamthuka.+

33 Nakubetha isimbi yetjhumi nambili ngamadina,* inarha yoke yasibekelwa bumnyama bekwaba yisimbi yesithathu ntambama.*+ 34 Ngesimbi yesithathu ntambama, uJesu warhuwelela ngelizwi elikhulu wathi: “Eli, Eli, lama sabakthani?” okutjho ukuthi, “Zimami, Zimami, ungitjhiyeleni na?”+ 35 Kwathi abanye ebebajame eduze nabezwa lokho, bathi: “Qalani! Ubiza u-Eliya.” 36 Omunye-ke wagijima, wafaka isipontji ngewayinini elimunyu, wasihloma emgabeni, wamnikela sona bona asele,+ athi: “Mliseni anjalo! Khesibone ukuthi u-Eliya uzokuza amehlise na.” 37 Kodwana uJesu warhuwelela khulu bese wahlongakala.*+ 38 Irharideni lethempeli+ latleruka laba ziingcenye ezimbili, ukusuka phezulu ukuya phasi.+ 39 Nje-ke isikhulu sebutho ebesijame lapho simqalile nasibona izinto ezenzekileko nokuthi uhlongakele, sathi: “Kwamambala indoda le beyiyiNdodana kaZimu.”+

40 Khonapho bekunabafazi ebebabukele bakudanyana, hlangana nabo bekunoMariya Marhdalina, uMariya unina kaJakopo Omncani* noJosisi, noSalome,+ 41 ebebajayele ukukhamba naye+ bamtlhogomele nakaseGalile nabanye abafazi abanengi ebebeze naye eJerusalema.

42 Njengombana besekurhwalele begodu kulilanga lokuLungiselela, okutjho, ilanga langaphambi kweSabatha, 43 kwafika uJosefa we-Arimathiya, ilunga loMkhandlu elihlonitjhwako naye ebekalindele umBuso kaZimu. Waba nesibindi sokuya kuPilatu wabawa isidumbu sakaJesu.+ 44 Kodwana uPilatu wazibuza ukuthi sekahlongakele na, ngalokho wabiza isikhulu sebutho, wasibuza ukuthi uJesu sekahlongakele na. 45 Ngemva kokufumana isiqinisekiso esikhulwini sebutho, wanikela uJosefa isidumbu. 46 Wathenga ilineni lezinga eliphezulu wamehlisa, wamphuthela ngalo wamlalisa ethuneni+ ebeligobhodlhwe edwaleni; wageda ilitje wavala ngalo umnyango wethuna.*+ 47 Kodwana uMariya Marhdalina noMariya unina kaJosisi bebasolo baqale lapho alaliswe khona.+

16 Kuthe nakuphela iSabatha,+ uMariya Marhdalina, uMariya+ unina kaJakopo noSalome bathenga amafutha anuka kamnandi bona bazokuzesa isidumbu sakaJesu.+ 2 Ekuseni khulu ngelanga lokuthoma leveke, baya ethuneni*+ kodwana bafika ilanga seliphumile. 3 Bebakhuluma bodwa bathi: “Kazi sizaligedelwa ngubani ilitje okuvalwe ngalo ithuna?” 4 Kodwana nabathi mehlo suka, babona ilitjelo ligediwe nanyana bekulilitjekazi elikhulu.+ 5 Kuthe nabangena ngethuneni, babona isokana lihlezi ngesidleni, limbethe isambatho esimhlophe, barareka. 6 Lathi kibo: “Ningarareki.+ Ngiyazi ukuthi nifuna uJesu weNazaretha obulawelwe esigodweni. Uvusiwe.+ Akekho la. Qalani, nasi indawo ebekalaliswe kiyo.+ 7 Khambani niyokubikela abafundi bakhe noPitrosi nithi, ‘Unikhambela phambili uya eGalile.+ Nizombona lapho njengombana anitjela.’”+ 8 Kuthe nabaphuma ethuneni, babaleka, bathuthumela begodu bararekile. Azange bakhulumise muntu ngombana bebasaba.*+