IVANGELI NGOKUKAJWANISI

1 Ekuthomeni bekunoLizwi, uLizwi+ bekanoZimu+ begodu uLizwi bekanguzimu.*+ 2 BekanoZimu kusukela ekuthomeni. 3 Zoke izinto zibe khona ngaye,+ akukho nakunye okwaba khona ngaphandle kwakhe.

Okube khona 4 ngaye kuphila, ukuphilokho kube kukhanya kwabantu.+ 5 Ukukhanya kukhanya ebumnyameni+ kodwana ubumnyama akhenge bukuhlule.

6 Kwavela umuntu obekathunyiwe, amjameli kaZimu; igama lakhe bekunguJwanisi.+ 7 Umuntu lo weza njengofakazi ukuthi azokufakazela ukukhanya,+ ukwenzela bona yoke imihlobo yabantu ikholwe ngaye. 8 Bekangasikukhanyokho+ kodwana wathunyelwa ukufakaza ngokukhanyokho.

9 Ukukhanya kwamambala okukhanyisela yoke imihlobo yabantu besele kuzokuza ephasini.+ 10 Bekasephasini+ begodu iphasi libe khona ngaye,+ iphasi akhenge limazi. 11 Weza ekhabo kodwana abantu bekhabo akhenge bamamukele. 12 Nanyana kunjalo, boke abamamukelako wabanikela ilungelo lokuba bantwana bakaZimu+ ngombana bakholwa egameni lakhe.+ 13 Akhenge babelethwe ngeengazi, ngentando yenyama namkha ngentando yomuntu kodwana ngokuvela kuZimu.+

14 Nje-ke uLizwi waba yinyama+ wahlala hlangana nathi, sabona iphazimulwakhe, iphazimulo ekungeyendodana ebelethwe yodwa+ kuyise; bekanomusa omkhulu kaZimu* neqiniso. 15 (UJwanisi wafakaza ngaye, kwamambala, warhuwelela wathi: “Lo nguye engithe ngaye, ‘Loyo oza emva kwami sekamkhulu kunami ngombana bekakhona mina ngingakabi khona.’”)+ 16 Soke usenzele umusa umkhulu ngebanga lokuthi unomusa omkhulu. 17 UmThetho wanikelwa ngoMosi+ kodwana ngoJesu Krestu wasinikela umusa omkhulu+ neqiniso. 18 Akunamuntu owakhewabona uZimu nakanye;+ uzimu okukuphela kwakhe+ osehlangothini lakaYise*+ nguye omhlathululileko.+

19 Lobu bufakazi uJwanisi abunikelako ngesikhathi amaJuda athumela abaphristi namaLevi avela eJerusalema azombuza ukuthi: “Ungubani?”+ 20 Akhenge ale ukuphendula kodwana watjho ngokunqophileko wathi: “AngisinguKrestu.” 21 Yeke bambuza ukuthi: “Alo-ke ungubani? Ungu-Eliya?”+ Wathi: “Angisinguye.” Bathi: “UMphorofidi na?”+ Wathi: “Awa!” 22 Ngalokho bathi kuye: “Ungubani-ke? Sitjela bona sizokubuyisela ipendulo kwabasithumileko. Uthi ungubani?” 23 Wathi: “Ngililizwi lomuntu orhuwelela emmangweni lithi, ‘Yenzani indlela kaJehova* inqophe,’+ njengombana kwatjho u-Isaya umphorofidi.”+ 24 Iinthunywezo bezivela kubaFarisi. 25 Nje-ke bamphosa ngemibuzo bathi kuye: “Alo-ke ubhabhadiselani nangabe awusinguKrestu namkha u-Eliya namkha umPhorofidi?” 26 UJwanisi wabaphendula wathi: “Mina ngibhabhadisa ngamanzi. Ukhona ojame hlangana nani eningamaziko, 27 oza ngemva kwami, engingakafaneli ukutjhaphulula umutja wamapatlagwanakhe.”+ 28 Lokhu kwenzeka eBhethaniya ngaphetjheya kweJordani, lapho uJwanisi bekabhabhadisela khona.+

29 Ngakusasa kwakhona wabona uJesu eza kuye, wathi: “Qalani, iMvana+ kaZimu esusa isono+ sephasi!+ 30 Lo nguye engithe ngaye: ‘Emva kwami kuza umuntu omkhulu kunami ngombana bekakhona mina ngingakabi khona.’+ 31 Nami bengingamazi, kodwana isizathu sokubhabhadisa kwami ngamanzi bekukobana abonakaliswe ku-Israyeli.”+ 32 Godu uJwanisi wafakaza wathi: “Ngabona ummoya wehla njengejuba uvela ezulwini, wahlala phezu kwakhe.+ 33 Nami bengingamazi kodwana loyo owangithuma bona ngibhabhadise ngamanzi wathi kimi: ‘Loyo ozokubona ummoya wehlela phasi bese uhlala kuye,+ loyo nguye obhabhadisa ngommoya ocwengileko.’+ 34 Ngikubonile lokho begodu ngafakaza ukuthi lo uyiNdodana kaZimu.”+

35 Godu ngelanga elilandelako, uJwanisi bekajame nabafundi bakhe ababili 36 njengombana aqale uJesu akhamba, wathi: “Qalani iMvana+ kaZimu!” 37 Abafundi ababilabo nabamuzwa atjho lokho, balandela uJesu. 38 UJesu nakajikako ababona bamlandela, wathi kibo: “Nifunani?” Bathi kuye: “Rabi (nakutjhugululwako kutjho ukuthi, “Mfundisi”), uhlalaphi?” 39 Wathi kibo: “Yizani nizokubona.” Bakhamba naye babona lapho ebekahlala khona, bahlala naye mhlokho; bekungaba yisimbi yesine ntambama.* 40 U-Andrisi+ umfowabo kaSimoni Pitrosi, bekangomunye wababili abezwa lokho okwatjhiwo nguJwanisi begodu balandela uJesu. 41 Wathoma ngokufumana umfowabo uSimoni, wathi kuye: “Simfumene uMesiya”+ (nakutjhugululwako kutjho ukuthi, “uKrestu”), 42 wamusa kuJesu. UJesu wamqala wathi: “UnguSimoni+ indodana kaJwanisi kodwana uzokubizwa ngokuthi Khefasi” (nalitjhugululwako lithi, “Pitrosi”).+

43 Ngelanga elilandelako wafuna ukuya eGalile. UJesu wafumana uFlebhe+ wathi kuye: “Ngilandela.” 44 UFlebhe bekangoweBhethesayida, idorobho u-Andrisi noPitrosi abavela kilo. 45 UFlebhe wafumana uNathaniyeli+ wathi kuye: “Simfumene loyo ekukhulunywe ngaye emitlolweni kaMosi, emThethweni nemitlolweni yabaPhorofidi: UJesu weNazaretha, indodana kaJosefa.”+ 46 Kodwana uNathaniyeli wathi kuye: “Ikhona intwehle engavela eNazaretha?” UFlebhe wathi kuye: “Yiza uzokubona.” 47 UJesu wabona uNathaniyeli eza ngakuye wathi kuye: “Qala! UmIsrayeli wamambala othembekileko.”+ 48 UNathaniyeli wathi kuye: “Ungazi njani?” UJesu wathi: “Ngikubone uFlebhe angakakubizi, usesengaphasi komuthi wamafeyi.” 49 UNathaniyeli wathi: “Rabi, wena uyiNdodana kaZimu, uyiKosi yakwa-Israyeli.”+ 50 UJesu wathi kuye: “Ukholwa ngombana ngikutjele ukuthi ngikubone ungaphasi komuthi wamafeyi? Uzokubona izinto ezikulu kunalezi.” 51 Yeke wathi kuye: “Kwamambala ngithi kini madoda, nizokubona izulu livulekile neengilozi zakaZimu zikhuphukela khona begodu zehlela eNdodaneni yomuntu.”+

2 Ngelanga lesithathu kwaba nomtjhado eKana yeGalile, unina kaJesu bekalapho. 2 UJesu nabafundi bakhe bebamenyiwe emtjhadweni loyo.

3 Kuthe nakutlhayela iwayini, unina kaJesu wathi kuye: “Baphelelwe liwayini.” 4 UJesu wathi kuye: “Mina nawe kusitshwenyelani lokho?* Isikhathi sami asikafiki.” 5 Unina wathi kilabo abasebenzako: “Yenzani koke anitjela khona.” 6 Bekunemijeka yamanzi esithandathu eyenziwe ngelitje ebekwe lapho njengombana bekuyifuneko yemithetho yamaJuda+ yokuhlambulula, umjeka ngamunye bewuziinlinganiso ezimbili namkha ezintathu zeketjezi.* 7 UJesu wathi kibo: “Zalisani imijeka ngamanzi.” Bayizalisa swi! 8 Ngemva kwalokho wathi kibo: “Nje-ke ningakhelela amanye wawo niwanikele umnqophisi womnyanya.” Bawakhelela. 9 Umnqophisi womnyanya wawezwa amanzi ebesekaphenduke iwayini, angazi ukuthi libuya kuphi (ngitjho nanyana iinsebenzi ezikhelele amanzi bezazi), umnqophisi womnyanya wabiza umkhwenyana 10 wathi kuye: “Woke umuntu ukhupha iwayini elimnandi qangi, kuthi abantu nasele badakiwe, akhuphe elisezingeni eliphasi. Kodwana wena ukhuphe iwayini elimnandi bekube nje.” 11 UJesu wenza lokhu eKana yeGalile kwaba simangaliso sakhe sokuthoma, wenza nephazimulwakhe yabonakala+ nabafundi bakhe bakholelwa kuye.

12 Ngemva kwalokho uJesu, unina, abafowabo+ nabafundi bakhe behlela eKapernawumi+ kodwana akhenge bahlale amalanga amanengi lapho.

13 IPhasika+ lamaJuda belitjhidele, yeke uJesu wakhuphukela eJerusalema. 14 Wafumana ngethempelini abathengisa iinkomo, izimvu, amajuba,+ nabatjhentjha imali bahlezi eentulweni zabo. 15 Wenza isibebhu ngeentambo, waqotha boke abanezimvu neenkomo ngethempelini, wakghuthula iimpaparwana zabatjhentjha imali waketula namatafulabo.+ 16 Wathi kilabo abathengisa amajuba: “Khuphani izintwezi ngapha! Lisani ukwenza indlu kaBaba indlu yokuthengisela!”+ 17 Abafundi bakhe bakhumbula bona kutloliwe ukuthi: “Ukukhuthalela indlwakho kuzokuba njengomlilo ovutha phakathi kwami.”+

18 Nje-ke amaJuda athi kuye: “Ngisiphi isibonakaliso ongasitjengisa sona+ njengombana wenza izintwezi?” 19 UJesu wabaphendula wathi: “Girizani ithempeleli, ngizolivusa ngamalanga amathathu.”+ 20 AmaJuda athi kuye: “Kwathatha iminyaka ema-46 ukwakha ithempeleli, wena uthi ungalivusa ngamalanga amathathu?” 21 Kodwana bekakhuluma ngethempeli elimzimbakhe.+ 22 Nakavuswako kwabahlongakeleko, abafundi bakhe bakhumbula ukuthi bekathanda ukutjho lokhu,+ bawukholwa umtlolo nalokho okwatjhiwo nguJesu.

23 NakaseJerusalema emnyanyeni wePhasika, abantu abanengi bakholwa egameni lakhe nababona iimangaliso ebekazenza. 24 Kodwana uJesu akhenge abathembe ngebanga lokuthi bekabazi boke, 25 bekangatlhogi umuntu bona amtjele ukuthi abantu bacabangani ngombana yena bekakwazi okuseenhliziyweni zabantu.+

3 BekunomFarisi othileko igama lakhe kunguNikhodemusi,+ ombusi wamaJuda. 2 Weza kuJesu ebusuku+ wathi kuye: “Rabi,+ siyazi ukuthi umfundisi ovela kuZimu ngombana akunamuntu ongenza iimbonakaliso+ ozenzakwezi ngaphandle kokuthi uZimu anaye.”+ 3 UJesu wathi kuye: “Kwamambala ngithi kuwe, ngaphandle kokuthi umuntu abelethwe kabutjha,*+ angekhe awubone umBuso kaZimu.”+ 4 UNikhodemusi wathi: “Umuntu angabelethwa njani sekamdala? Angithi angekhe angena ngesibelethweni sakanina abelethwe godu?” 5 UJesu waphendula wathi: “Kwamambala ngithi kuwe, ngaphandle kokuthi umuntu abelethwe ngamanzi+ nangommoya, angekhe angene emBusweni kaZimu. 6 Okubelethwe yinyama yinyama begodu okubelethwe ngommoya kumumoya. 7 Ungarareki ngombana ngithe kuwe: Kufuze nibelethwe kabutjha. 8 Umoya uvunguzela lapho ufuna khona, beniyalizwa itjhada lawo kodwana anazi ukuthi uvelaphi nokuthi uyaphi. Kunjalo nangawo woke umuntu obelethwe ngommoya.”+

9 UNikhodemusi wathi kuye: “Kungenzeka njani lokhu?” 10 UJesu wathi: “Kuza njani wena umfundisi wakwa-Israyeli kodwana ungakwazi lokhu? 11 Kwamambala ngithi kuwe, esikwaziko siyakukhuluma nesikubonileko sifakaza ngakho kodwana anibamukeli ubufakazi esibunikelako. 12 Nangabe anikholwa nanginitjela izinto zephasi, nizokukholwa njani nanginitjela izinto zezulwini? 13 Ngaphezu kwalokho, akunamuntu owakhuphukela ezulwini+ ngaphandle kwaloyo owehla ezulwini,+ iNdodana yomuntu. 14 Godu njengombana uMosi aphakamisa inyoka emmangweni+ neNdodana yomuntu kufuze iphakanyiswe+ 15 bona woke umuntu okholwa kiyo abe nokuphila okungapheliko.+

16 “Ngombana uZimu walithanda khulu iphasi kangangobana wanikela ngeNdodanakhe ebelethwe yodwa+ bonyana woke umuntu otjengisa ukukholwa kiyo angabhujiswa kodwana abe nokuphila okungapheliko.+ 17 UZimu azange athumele iNdodanakhe ephasini bona izokwahlulela iphasi kodwana bona iphasi lisindiswe ngayo.+ 18 Loyo otjengisa ukukholwa kiyo angekhe ahlulelwe.+ Loyo ongatjengisi ukukholwa kiyo sekahlulelwe ngombana akakatjengisi ukukholwa egameni leNdodana kaZimu ebelethwe yodwa.+ 19 Nje-ke nasi isisekelo sesahlulelo: kukuthi ukukhanya kuzile ephasini+ kodwana abantu bathande ubumnyama kunokukhanya ngombana imisebenzabo beyimimbi. 20 Ngebanga lokuthi loyo owenza izinto ezonakeleko uyakuzonda ukukhanya begodu akezi ekukhanyeni bona imisebenzakhe ingavezwa.* 21 Kodwana loyo owenza okuliqiniso uyeza ekukhanyeni+ ukuthi imisebenzakhe ibonakaliswe ukuthi yenziwe ngokuvumelana noZimu.”

22 Ngemva kwalokho uJesu nabafundi bakhe baya eendaweni ezisemaphandleni zeJudiya, wahlala nabo lapho isikhathi esithileko, abhabhadisa.+ 23 Kodwana noJwanisi bekabhabhadisa e-Ayinoni eduze kweSalima ngombana bekunamanzi amanengi lapho,+ nabantu bebasolo beza, babhajadiswa+ 24 ngombana uJwanisi bebangakamvaleli ngejele.+

25 Abafundi bakaJwanisi baphikisana nomJuda othileko malungana nokuhlambulula. 26 Yeke baya kuJwanisi bathi kuye: “Rabi, umuntu loya obekanawe ngaphetjheya kweJordani, loya owafakaza ngaye,+ uyabhabhadisa begodu boke abantu baya kuye.” 27 UJwanisi waphendula wathi: “Umuntu angekhe afumane nento yinye tere ngaphandle kokuthi anikelwe yona ivela ezulwini. 28 Nani ngokwenu nibofakazi bokuthi ngathi, ‘AngisinguKrestu+ kodwana ngithunyelwe ngaphambi kwakhe.’+ 29 Loyo onomakoti, mkhwenyana.+ Kodwana umngani womkhwenyana nakajama eduze kwakhe amuzwe, uthaba khulu ngokuzwa iphimbo lakhe. Nje-ke ithabo lami liphelelisiwe. 30 Yena kufuze akhule kodwana mina nginciphe.”

31 Loyo ovela phezulu,+ ungaphezu kwabo boke abanye. Loyo ovela ephasini uvela ephasini begodu ukhuluma izinto zephasi. Loyo ovela ezulwini, ungaphezu kwabo boke abanye.+ 32 Ufakaza ngezinto azibonileko nazizwileko+ kodwana akunamuntu owamukela ubufakazi bakhe.+ 33 Nanyana ngubani owamukele ubufakazi bakhe uqinisekisile ukuthi uZimu uneqiniso.+ 34 Ngombana loyo othunywe nguZimu+ ukhuluma amezwi kaZimu ngombana uZimu akadimani ngommoya ocwengileko.* 35 UBaba uyayithanda iNdodana+ begodu unikele zoke izinto esandleni sayo.+ 36 Loyo otjengisa ukukholwa eNdodaneni unokuphila okungapheliko;+ loyo ongalaleli iNdodana angekhe akubona ukuphila+ kodwana ilaka lakaZimu lizokuhlala liphezu kwakhe.+

4 IKosi nayilemuka bona abaFarisi bazwile ukuthi uJesu wenza bekabhabhadise+ abafundi abanengi kunoJwanisi 2 ngitjho nanyana uJesu ngokwakhe bekangabhabhadisi kodwana bekubhabhadisa abafundi bakhe 3 yasuka eJudiya yabuyela eGalile. 4 Kodwana bekutlhogeka adlule eSamariya. 5 Wafika edorobheni leSamariya ekuthiwa yiSikhari, hlanu kwesimu uJakopo ayinikela indodanakhe uJosefa.+ 6 Ekhabolakhona, ipetsi kaJakopo beyilapho.+ UJesu bekadiniwe ngebanga lekhambo, nje-ke wahlala epetsini leyo. Bekungaba yisimbi ye-12 ngamadina.*

7 Kweza umfazi womSamariya azokukha amanzi. UJesu wathi kuye: “Akhungiseze.” 8 (Abafundi bakhe bebasaye ngedorobheni bayokuthenga ukudla.) 9 Yeke umfazi womSamariya wathi kuye: “Kuza njani bona wena, nanyana umJuda, ungibawe bona ngikuseze ngitjho nanyana ngimfazi womSamariya?” (Ngombana amaJuda awatjhebisani namaSamariya.)+ 10 UJesu wathi kuye: “Ngathana bewazi ngesipho sesihle sakaZimu+ nokuthi ngubani lo othi kuwe, ‘Akhungiseze,’ bewuzambawa, yena bekazokunikela amanzi aphilako.”+ 11 Wathi kuye: “Mnumzana, awunalo ngitjho nethunga lokukha amanzi nepetsi le iyatjhinga. Alo-ke, amanzi aphilako lawo avela kimuphi umthombo? 12 Kghani wena umkhulu kunokhokhwethu uJakopo, owasipha ipetsi le bewasela kiyo yena, amadodanakhe neenkomo zakhe na?” 13 UJesu wamphendula wathi: “Woke umuntu osela emanzini la uzokoma godu. 14 Nanyana ngubani osela amanzi engizomupha wona angekhe asoma nakanye+ kodwana amanzi engizomupha wona azokuba mthombo wamanzi aphuphumako kuye bona amnikele ukuphila okungapheliko.”+ 15 Umfazi lo wathi kuye: “Mnumzana, ngipha amanzi lawo ukwenzela bona ngingasoma namkha ngisolo ngiza lapha ngizokukha amanzi.”

16 Wathi kuye: “Khamba, uyokubiza indodakho uze nayo lapha.” 17 Umfazi lo wathi kuye: “Anginandoda.” UJesu wathi kuye: “Uqinisile nawuthi, ‘Anginandoda.’ 18 Ngombana ube namadoda amahlanu nendoda ohlala nayo nje akusiyindodakho. Ukhulume iqiniso.” 19 Umfazi lo wathi kuye: “Mnumzana, ngiyabona ukuthi umphorofidi.+ 20 Abokhokho bethu bebalotjha uZimu entabeni le kodwana nina maJuda nithi iJerusalema yindawo abantu okufuze bamlotjhe kiyo.”+ 21 UJesu wathi kuye: “Ngikholwa mfazi, isikhathi siyeza lapho ningekhe nilotjhe uBaba entabeni le namkha eJerusalema. 22 Nina nilotjha eningakwaziko;+ thina silotjha esikwaziko ngombana isindiso ithoma ngamaJuda.+ 23 Yeke, isikhathi siyeza begodu ngiso lesi, lapho abalotjha ngeqiniso bazokulotjha uBaba ngommoya nangeqiniso ngombana kwamambala, uBaba ufuna ukulotjhwa babantu abanjalo.+ 24 UZimu Mmoya+ begodu labo abamlotjhako kufuze bamlotjhe ngommoya nangeqiniso.”+ 25 Umfazi lo wathi kuye: “Ngiyazi ukuthi uMesiya obizwa ngokuthi nguKrestu uyeza. Nakafikako, uzokumemezela zoke izinto kithi.” 26 UJesu wathi kuye: “Nguye lo okhuluma nawe.”+

27 Khonokho abafundi bakhe bafika, barareka ngombana bekakhuluma nomfazi. Kodwana akekho owathi kuJesu: “Ufunani emfazini lo?” Namkha “Kubayini ukhuluma naye?” 28 Ngemva kwalokho umfazi loyo watjhiya umjekakhe wamanzi, wakhamba waya edorobheni wafese wathi ebantwini: 29 “Yenize nizokubona umuntu ongitjele koke engikwenzileko. Kungenzeka na bona unguKrestu?” 30 Baphuma ngedorobheni baya kuJesu.

31 Kusese njalo, abafundi bebasolo bambawa bathi: “Rabi,+ yewudle.” 32 Kodwana wathi kibo: “Nginokudla engikudlako eningakwaziko.” 33 Yeke abafundi bathi komunye nomunye: “Kghani kunomuntu omlethele ukudla?” 34 UJesu wathi kibo: “Ukudla kwami kukwenza intando yongithumileko+ nokuqeda umsebenzakhe+. 35 Anitjho na ukuthi kusele iinyanga ezine ngaphambi kokuthi ukuvuna kufike? Ngithi kini: Phakamisani amehlwenu niqale amasimu bona sekalungele ukuvunwa.+ Nje 36 umvuni sekafumana umvuzo begodu ubuthelela iinthelo zokuphila okungapheliko, ukwenzela bona umtjali nomvuni bathabe boke.+ 37 Ngombana ngokwalokhu isitjhwesi siqinisile nasithi: Omunye mtjali bese omunye mvuni. 38 Nginithumele bona nivune lokho eningakhenge nikusebenzele. Abanye basebenzile begodu nizuzile emsebenzinabo.”

39 AmaSamariya amanengi wedorobhenelo akholelwa kuye ngebanga lobufakazi obanikelwa mfazi loya, nakathi: “Ungitjele koke engikwenzileko.”+ 40 Nje-ke amaSamariya nakafika kuye, ambawa bona ahlale nawo, ngalokho wahlala lapho amalanga amabili. 41 Yeke nabanye abanengi bakholwa ngebanga lalokho akutjhoko, 42 bathi emfazini lo: “Asisakholwa ngebanga lalokho ositjele khona kwaphela ngombana nathi sizizwele ngezethu begodu siyazi ukuthi umuntu lo kwamambala umsindisi wephasi.”+

43 Ngemva kwamalanga amabili, wasuka lapho watjhinga eGalile. 44 UJesu ngokwakhe wafakaza ukuthi umphorofidi akahlonitjhwa endaweni yekhabo.+ 45 Yeke nakafika eGalile, amaGalile amamukela ngombana bewabone koke akwenze eJerusalema emnyanyeni+ ngombana nawo bewayile emnyanyeni+ loyo.

46 Ngemva kwalokho wafika godu eKana yeGalile, lapho aphendula khona amanzi aba liwayini.+ Bekunesikhulu sebukhosini ebesigulelwa yindodanaso eKapernawumi. 47 Indoda le nayizwa bona uJesu usukile eJudiya wangena eGalile, yaya kuye yambawa bona ehle nayo azokulapha indodanayo ngombana beseyizokuhlongakala. 48 Kodwana uJesu wathi kiyo: “Ngaphandle kokuthi nina bantu nibone iimbonakaliso neemangaliso, angekhe nikholwe.”+ 49 Isikhulu sebukhosini sathi kuye: “Kosi, yehla nami ngaphambi kokuthi umsanyanami ahlongakale.” 50 UJesu wathi kiso: “Khamba; indodanakho iyaphila.”+ Indoda leyo yakukholelwa lokho uJesu ayitjele khona, yakhamba. 51 Nayisehlela khona, iinsebenzi zayo zayihlangabeza zizoyitjela ukuthi umsanyanayo upholile. 52 Yabuza iinsebenzi ukuthi uphole sikhathi bani. Zathi kiyo: “Umgomani umlise izolo ngesimbi yokuthoma ntambama.”* 53 Uyise wakhumbula ukuthi bekuli-irelo lokha uJesu nakathi kuye: “Indodanakho iyaphila.”+ Nje-ke yona nomndenayo woke bakholwa. 54 Lesi bekusibonakaliso sesibili+ esenziwa nguJesu nakasuka eJudiya angena eGalile.

5 Ngemva kwalokhu, kwaba nomnyanya+ wamaJuda, uJesu wakhuphukela eJerusalema. 2 Nje-ke eJerusalema eSangweni leziMvu+ kunesiziba ngesiHebheru esibizwa ngokuthi yiBhethesda, sinamathuri amahlanu. 3 Ngaphakathi kwawo bekunabantu abanengi abagulako, iimphofu, iinrhole, nabakokorene* iinyawo nezandla balele phasi. 4 *—— 5 Khonapho bekunendoda ebeseyigule iminyaka ema-38. 6 Nakabona indoda leyo ilele lapho, alemuka nokuthi seyigule isikhathi eside, uJesu wathi kiyo: “Uyafuna ukuphola na?”+ 7 Indoda egulako le yamphendula yathi: “Mnumzana anginamuntu ongangifaka ngesizibeni amanzi nakasikinywako, nangisathi ngiyangena, omunye ungena phambi kwami.” 8 UJesu wathi kiyo: “Sikima! Thatha umkghadakho* ukhambe.”+ 9 Khonokho indoda leyo yaphola, yathatha umkghadayo, yakhamba.

Ngelangelo bekuliSabatha. 10 Yeke amaJuda athi endodeni elatjhiweko leyo: “Lilanga leSabatha, akukavumeleki bona ungathwala umkghadi.”+ 11 Kodwana yabaphendula yathi: “Ongilaphileko uthe kimi, ‘Thatha umkghadakho ukhambe.’” 12 Bayibuza bathi: “Ngubani othe kuwe, ‘Thatha umkghadakho ukhambe’?” 13 Indoda elatjhiweko beyingazi ukuthi ngubani ngombana uJesu wangena msinyana esiqubuthwini ebesilapho.

14 Ngemva kwalokho uJesu wayifumana ethempelini wathi kiyo: “Uyabona, sewupholile. Ungasoni ukwenzela bona ungavelelwa ngokumbi khulu.” 15 Indoda leyo yakhamba yayokutjela amaJuda ukuthi nguJesu oyipholisileko. 16 Ngebanga lalokho amaJuda ahlunguphaza uJesu ngombana bekenza izintwezi ngeSabatha. 17 Kodwana wawaphendula wathi: “UBaba usolo asebenza bekube nje, nami solo ngiyasebenza.”+ 18 Kungebangelo amaJuda athoma ukufuna khulu ukumbulala ngombana bekathi akaphuli iSabatha kwaphela kodwana ubiza noZimu ngokuthi nguYise,+ uzenza ngasuthi ulingana noZimu.+

19 UJesu wawaphendula wathi: “Ngiqinisile ngithi kini, iNdodana yomuntu angekhe yenze litho ngokwayo kodwana yenza kwaphela lokho ebona uBaba akwenza.+ Ngombana nanyana ngiziphi izinto uBaba azenzako neNdodana iyazenza. 20 UBaba uyayithanda iNdodana+ begodu uyitjengisa zoke izinto azenzako, uzoyitjengisa nemisebenzi emikhulu kunale bona nirareke.+ 21 Njengombana uBaba avusa abafileko abenze baphile+ neNdodana iphilisa nanyana ngubani efuna ukumphilisa.+ 22 Ngombana uBaba akahluleli muntu kodwana uphathise iNdodana koke ukwahlulela+ 23 bona boke bahloniphe iNdodana njengombana bahlonipha uBaba. Nanyana ngubani ongahloniphi iNdodana, akamhloniphi noBaba oyithumileko.+ 24 Ngiqinisile ngithi kini nanyana ngubani ozwa ilizwi lami akholwe uBaba ongithumileko unokuphila okungapheliko,+ akangeni ekwahlulelweni kodwana udlulile ekufeni wangena ekuphileni.+

25 “Ngiqinisile ngithi kini, isikhathi siyeza begodu ngiso lesi, lapho abafileko bazokuzwa ilizwi leNdodana kaZimu, labo abalaleleko bazokuphila. 26 Njengombana uBaba anokuphila kuye,+ unikele neNdodana bona ibe nokuphila kiyo.+ 27 Uyinikele namandla wokwahlulela+ ngombana iyiNdodana yomuntu.+ 28 Kunganirari lokhu, isikhathi siyeza lapho boke abasemathuneni* bazokuzwa ilizwi layo+ 29 baphume, labo abenze okuhle bavuselwe ekuphileni begodu labo ebebanomukghwa wokwenza okumbi bavuselwe ekwahlulelweni.+ 30 Angeze ngenza litho ngokwami. Ngahlulela ngokwalokho engikuzwako, ukwahlulela kwami kulungile+ ngombana angifuni kwenzeke intandwami kodwana intando yongithumileko.+

31 “Nangabe mina ngingedwa ngiyazifakazela, ubufakazi bami abusiliqiniso.+ 32 Kunomunye ofakaza ngami, ngiyazi bona lokho akufakaza ngami kuliqiniso.+ 33 Nithumele abantu kuJwanisi begodu ufakazele iqiniso.+ 34 Nanyana kunjalo, angamukeli ubufakazi emuntwini kodwana ngitjho izintwezi bona nisindiswe. 35 Umuntu loyo bekasibani esivuthako nesiphazimulako begodu isikhatjhana esincani benizimisele ukuthaba khulu ekukhanyeni kwakhe.+ 36 Kodwana nginobufakazi obukhulu kunebakaJwanisi, ngombana imisebenzi uBaba angabele yona bona ngiyenze, okumisebenzi engiyenzako le, ngiyo efakazela ukuthi uBaba ungithumile.+ 37 NoBaba ongithumileko ufakaze ngami.+ Akhenge khenizwe ilizwi lakhe namkha nibone ukubumbeka kwakhe,+ 38 nelizwi lakhe alihlali kini ngombana animkholwa loyo amthumileko.

39 “Nihlolisisa imiTlolo+ ngombana nicabanga ukuthi nizokufumana ukuphila okungapheliko ngayo; imiTlolo leyo ngiyo efakaza ngami.+ 40 Nanyana kunjalo anifuni ukuza kimi+ bona nifumane ukuphila. 41 Angikwamukeli ukudunyiswa babantu 42 kodwana ngazi kuhle ukuthi animthandi uZimu. 43 Ngize ngegama lakaBaba kodwana aningamukeli. Nakungeza omunye umuntu ngegama lakhe, nizomamukela. 44 Nizokukholwa njani nanidumisana nodwa kodwana ningalifuni idumo elivela kuZimu okunguye yedwa?+ 45 Ningacabangi bona ngizonimangalela kuBaba; munye ummangaleli wenu, uMosi+ enibeke ithemba lenu kuye. 46 Eqinisweni ngathana namkholwa uMosi, benizongikholwa nami ngombana watlola ngami.+ 47 Kodwana nangabe aniyikholwa imitlolwakhe, nizokukholwa njani engikutjhoko?”

6 Ngemva kwalokhu uJesu waya ngaphetjheya kweLwandle leGalile namkha iThibheriyasi.+ 2 Kodwana isiqubuthu esikhulu besisolo simlandela+ ngombana besibone iimangaliso ebekazenza nakalapha abagulako.+ 3 Yeke uJesu wakhuphukela entabeni wahlala phasi nabafundi bakhe. 4 IPhasika,+ umnyanya wamaJuda, beselitjhidela. 5 UJesu waphakamisa amehlwakhe, wabona isiqubuthu esikhulu siza kuye, wathi kuFlebhe: “Sizobathengelaphi abantwaba uburotho bona badle?”+ 6 Bekamlinga ngokutjho lokho ngombana bekazi ukuthi uzokwenzani. 7 UFlebhe wathi: “Ngitjho noburotho obungathengwa ngabodenariyu* abamakhulu amabili, angekhe banela bona ngamunye wabo afumane ngitjho nesiqetjhana.” 8 Omunye wabafundi bakhe, u-Andrisi, umfowabo kaSimoni Pitrosi, wathi kuye: 9 “Nang’ umsanyana onoburotho bebhali obuhlanu neenhlambi ezimbili. Kodwana buyini bona bungasuthisa abantu abanengi kangaka?”+

10 UJesu wathi: “Hlalisani abantu phasi.” Njengombana bekunotjani obunengi endaweni leyo, abantu bahlala phasi, bekunamadoda angaba zii-5 000.+ 11 UJesu wathatha uburotho, wathokoza uZimu ngemva kwalokho wababela labo ebebahlezi phasi; wenza okufanako nangeenhlambi ezincani, badla basutha. 12 Kuthe sele basuthi, wathi ebafundini bakhe: “Buthelelani iinsalela, ukwenzela bona kungabi nalitho elimoroswako.” 13 Bazibuthelela begodu bazalisa abomantji abali-12 ngokudla okutjhiywe ngilabo abadle uburotho obuhlanu bebhali.

14 Abantu nababona isimangaliso asenzilekwesi, bathoma ukuthi: “Kwamambala lo Mphorofidi ebekazokuza ephasini.”+ 15 Nje-ke uJesu azi ukuthi bazokuza bambambe bona bamenze ikosi, wabuyela+ entabeni wahlala yedwa.+

16 Nakurhwaqelako, abafundi bakhe behlela elwandle,+ 17 bakhwela ngesikepeni, batjhinga ngaphetjheya kwelwandle eKapernawumi. Kodwana besele kumnyama, noJesu bekangakafiki kibo.+ 18 Godu, ilwandle belithoma ukuguruzela ngombana bekuvunguza umoya onamandla.+ 19 Nasele bagwedle amakhilomitha angaba mahlanu namkha asithandathu,* babona uJesu akhamba phezu kwelwandle atjhidela ngesikepeni, basaba. 20 Kodwana wathi kibo: “Ngimi; ningasabi!”+ 21 Nje-ke bamngenisa ngesikepeni, msinyana isikepe safika endaweni ebebaya kiyo.+

22 Ngelanga elilandelako, isiqubuthu ebesisele kwelinye ihlangothi lelwandle salemuka ukuthi okukuphela kwesikepe esincani ebesilapho asisekho, uJesu akhenge akhambe nabafundi bakhe ngesikepeso, ngombana abafundi bakhe bakhambe ngaso babodwa. 23 Kodwana imikhumbi evela eThibheriyasi, yafika hlanu kwendawo abadlele kiyo uburotho ngemva kobana iKosi ithokoze uZimu. 24 Nje-ke isiqubuthu nasibona ukuthi uJesu nabafundi bakhe abekho lapho, sakhwela eenkepeni zaso saya eKapernawumi siyokufuna uJesu.

25 Sathi nasimfumana ngaphetjheya kwelwandle, sathi kuye: “Rabi,+ ufike nini lapha?” 26 UJesu wasiphendula wathi: “Ngiqinisile ngithi kini, nifunana nami nje, ingasi ngombana nibone iimangaliso kodwana ngebanga lokuthi nidle uburotho nasutha.+ 27 Ningasebenzeli ukudla okonakalako kodwana sebenzelani ukudla okungonakaliko okunikela ukuphila okungapheliko,+ lokho enizokuphiwa yiNdodana yomuntu ngombana uBaba, uZimu ngokwakhe, ubeke kiyo itshwayo lokuyamukela.”+

28 Yeke sathi kuye: “Alo-ke kufuze senzeni bona samukelwe nguZimu?” 29 UJesu wathi kiso: “Nakhu uZimu afuna nikwenze, kukuthi nitjengise ukuthi niyakholwa kiloyo amthumileko.”+ 30 Sathi kuye: “Ngisiphi isibonakaliso+ osenzako, esizakuthi nasisibonako sikukholwe? Ngimuphi umsebenzi owenzako? 31 Abokhokho bethu badla imana emmangweni+ njengombana kutloliwe ukuthi: ‘Wabanikela uburotho obuvela ezulwini bona badle.’”+ 32 UJesu wathi kiso: “Ngiqinisile ngithi kini, uMosi azange aninikele uburotho obuvela ezulwini kodwana uBaba uninikela uburotho bamambala obuvela ezulwini. 33 Ngombana uburotho bakaZimu ngiloyo owehla ezulwini, onikela iphasi ukuphila.” 34 Nje-ke sathi kuye: “Kosi, sipha uburothobo ngaso soke isikhathi.”

35 UJesu wathi kibo: “Ngiburotho bokuphila. Nanyana ngubani oza kimi angekhe asalamba begodu nanyana ngubani otjengisa ukukholwa kimi angekhe asoma.+ 36 Njengombana ngitjhwile kini, ningibonile kodwana anikholwa.+ 37 Boke uBaba anginikela bona, bazokuza kimi, angekhe ngibaqothe labo abeza kimi+ 38 ngombana ngehle ngivela ezulwini+ ngingazokwenza intandwami kodwana ukwenza intando yaloyo ongithumileko.+ 39 Le yintando yaloyo ongithumileko ukuthi kungabi noyedwa ozongilahlekela kilabo angiphe bona kodwana ukuthi ngibavuse+ ngelanga lamaswaphela. 40 Ngombana nasi intando kaBaba ukuthi nanyana ngubani owamukela iNdodana atjengise nokukholwa kiyo, kufuze abe nokuphila okungapheliko+ begodu ngizomvusa+ ngelanga lamaswaphela.”

41 AmaJuda athoma ukunghonghoyila ngaye ngombana athe: “Ngiburotho obuvele ezulwini.”+ 42 Athi: “Kanti umrhali lo akusinguJesu indodana kaJosefa, uyise nonina akusingilabo esibaziko?+ Alo-ke kubayini sekathi, ‘Ngivela ezulwini’?” 43 UJesu wathi kibo: “Lisani ukunghonghoyila phakathi kwenu. 44 Akunamuntu ongeza kimi ngaphandle kokuthi uBaba, ongithumileko, amdosa+ begodu ngizomvusa ngelanga lamaswaphela.+ 45 Kutloliwe kubaPhorofidi ukuthi: ‘Boke bazokufundiswa nguJehova.’*+ Woke umuntu olalele uBaba wafunda, uza kimi. 46 Akunamuntu obone uBaba,+ ngaphandle kwaloyo ovela kuZimu; loyo-ke umbonile uBaba.+ 47 Ngiqinisile ngithi kini, nanyana ngubani okholwako unokuphila okungapheliko.+

48 “Ngiburotho bokuphila.+ 49 Abokhokho benu badla imana emmangweni kodwana bahlongakala.+ 50 Lobu burotho obuvela ezulwini ukwenzela bona nanyana ngubani obudlako angafi. 51 Ngiburotho obuphilako obuvele ezulwini. Nange umuntu adla uburothobu uzokuphila ngokungapheliko; kwamambala, uburotho engizokuphisana ngabo buyinyamami bona iphasi lifumane ukuphila.”+

52 AmaJuda athoma ukuphikisana wodwa, athi: “Umuntu lo angasinikela njani inyamakhe bona siyidle?” 53 Yeke uJesu wathi kiwo: “Ngiqinisile ngithi kini, ngaphandle kokuthi nidle inyama yeNdodana yomuntu nisele neengazi zayo, aninakuphila kini.+ 54 Nanyana ngubani odla inyamami, asele neengazi zami unokuphila okungapheliko, ngizomvusa+ ngelanga lamaswaphela 55 ngombana inyamami ikukudla kwamambala neengazi zami zisiselo samambala. 56 Nanyana ngubani odla inyamami, asele neengazi zami uhlala amunye nami, nami ngimunye naye.+ 57 Njengombana noBaba ophilako angithumile nami ngiphila ngebanga lakhe naloyo ongidlako uzokuphila ngebanga lami.+ 58 Lobu burotho obuvela ezulwini. Akusinjengombana abokhokho benu badla kodwana bahlongakala. Nanyana ngubani odla uburothobu uzokuphila ngokungapheliko.”+ 59 Watjho zoke izintwezi njengombana afundisa esinagogeni* eKapernawumi.

60 Inengi labafundi bakhe nalizwa lokho, lathi: “Ikulumo le ihlahlathelisa umzimba; ngubani ongayilalela?” 61 Kodwana uJesu azi ngaphakathi kuye ukuthi abafundi bakhe bebanghonghoyila ngalokhu, wathi kibo: “Kghani kuyanihlaba lokhu na? 62 Alo-ke kuthiwani naningabona iNdodana yomuntu ikhuphukela lapho beyikhona phambilini?+ 63 Mumoya onikela ukuphila;+ inyama ayinamsebenzi. Amezwi engiwatjhwe kini amumoya begodu akuphila.+ 64 Kodwana kukhona abanye benu abangakholwako.” Ngombana uJesu bekabazi kwekuthomeni abangakholwako naloyo ozomthengisa.+ 65 Waraga wathi: “Kungebangelo ngithe kini, akekho ongeza kimi ngaphandle kokuthi akunikelwe nguBaba.”+

66 Ngebanga lalokho, inengi labafundi bakhe labuyela ezintweni elizitjhiyileko+ azange lisakhamba naye. 67 Nje-ke uJesu wathi kwabali-12: “Kghani nani nifuna ukukhamba?” 68 USimoni Pitrosi wamphendula wathi: “Kosi, sizokuya kubani?+ Nguwe onamezwi wokuphila okungapheliko.+ 69 Siyakholwa begodu siyazi ukuthi ungoCwengileko kaZimu.”+ 70 UJesu wathi kibo: “Angithi nginikhethile nina abali-12?+ Kodwana omunye wenu umrhwayeli.”*+ 71 Kuhlekuhle, bekakhuluma ngoJudasi indodana kaSimoni Iskariyodi ngombana bekazomthengisa, nanyana bekangomunye wabali-12.+

7 Ngemva kwalokhu, uJesu waragela phambili akhambakhamba eGalile, bekangafuni ukukhambakhamba eJudiya ngombana amaJuda bewafuna ukumbulala.+ 2 Nje-ke umNyanya wamaJuda wemiTlhatlhana*+ bewutjhidela. 3 Abafowabo+ bakaJesu bathi kuye: “Khamba lapha uye eJudiya ukwenzela bona abafundi bakho nabo babone imisebenzi oyenzako. 4 Ngombana akakho owenza into ngemsitheleni nakafuna ukwaziwa tjhatjhalazi. Nawenza izintwezi zibonakalise ephasini.” 5 Eqinisweni, abafowabo bebangakholelwa kuye.+ 6 UJesu wathi kibo: “Isikhathi sami asikafiki+ kodwana kini nanyana ngisiphi isikhathi sinilungele. 7 Iphasi alinabanga lokunihloya kodwana liyangihloya mina ngombana ngifakaza ngalo ukuthi imisebenzalo mimbi.+ 8 Khuphukani nina niye emnyanyeni; mina angekhe ngiye nje emnyanyeni lo ngombana isikhathi sami asikafiki.”+ 9 Ngemva kokubatjela lokhu, wasala eGalile.

10 Kuthe abafowabo sebakhuphukele emnyanyeni, naye wakhuphukela khona kodwana akhange aye bamqalile, waya bangamboni. 11 Yeke amaJuda athoma ukumfuna emnyanyeni athi: “Iphi indoda leya?” 12 Kwaba nokuwomuzela okunengi hlangana nesiqubuthu. Abanye bebathi: “Uyindoda elungileko.” Abanye bathi: “Akasiyo. Udurhisa isiqubuthu.”+ 13 Kodwana akakho namunye obekakhuluma ngaye tjhatjhalazi ngombana bebasaba amaJuda.+

14 Umnyanya nasewuphakathi, uJesu wakhuphukela ethempelini, wathoma ukufundisa. 15 AmaJuda arareka, athi: “Kuza njani bona indoda le ibe nelwazi elingaka lemiTlolo+ ingakafundi eenkolweni?”*+ 16 UJesu wabaphendula wathi: “Engikufundisako akusingekwami kodwana kungekwaloyo ongithumileko.+ 17 Nanyana ngubani ofisa ukwenza intandwakhe, uzokwazi ukuthi engikufundisako kuvela kuZimu+ namkha ngikhuluma okuvela kimi. 18 Nanyana ngubani okhuluma okuvela kuye uzifunela idumo lakhe kodwana nanyana ngubani ofuna idumo laloyo omthumileko,+ loyo ungewamambala begodu akukho ukungalungi kuye. 19 UMosi waninikela umThetho,+ kghani akusinjalo? Kodwana akakho namunye wenu olalela umThetho loyo. Kubayini nifuna ukungibulala?”+ 20 Isiqubuthu sathi: “Unedimoni. Ngubani ofuna ukukubulala?” 21 UJesu wathi: “Ngenze isenzo sinye, noke nirarekile. 22 Ngebangelo uMosi uninikele ukusoka,+ ingasi ngombana kuvela kuMosi kodwana kuvela kibokhokho benu,+ nisoka umuntu ngesabatha. 23 Nangabe nisoka umuntu ngesabatha bona ningaphuli umThetho kaMosi, kubayini ningibhokela ngobukhali ngokuthi ngisindise umuntu ngesabatha?+ 24 Lisani ukwahlulela ngokuqaleka kwangaphandle kodwana yahlulelani ngesahlulelo esilungileko.”+

25 Nje-ke ezinye izakhamuzi zeJerusalema zathoma ukuthi: “Umuntu lo akusuye na loya abafuna ukumbulala?+ 26 Qalani, ukhuluma tjhatjhalazi kodwana abatjho litho kuye. Kghani ababusi sebayaqiniseka ukuthi unguKrestu? 27 Siyazi bona umuntu lo uvelaphi+ kodwana uKrestu nakezako, akakho ozokwazi ukuthi uvelaphi.” 28 Njengombana asafundisa ethempelini, uJesu wathi ngelizwi elikhulu: “Niyangazi mina, niyazi nalapha ngivela khona. Angikazizeli ngokuthanda kwami+ kodwana ongithumileko ungewamambala begodu animazi.+ 29 Mina ngiyamazi+ ngombana ngimjamelakhe begodu ungithumile.” 30 Bafuna ukumbamba+ kodwana akakho owamphakamisela isandla ngombana isikhathi sakhe besingakafiki.+ 31 Nanyana kunjalo, inengi labantu esiqubuthwini lakholwa kuye,+ lathi: “UKrestu nakezako, angekhe enze iimangaliso ezinengi ukudlula umuntu lo!”

32 AbaFarisi bezwa isiqubuthu sikhulumela phasi sitjho izintwezi ngaye, abaphristi abakhulu nabaFarisi bathumela abonogada bona bambambe.* 33 Yeke uJesu wathi: “Ngizokuba nani isikhatjhana ngaphambi kobana ngiye kongithumileko.+ 34 Nizongifuna kodwana angekhe ningifumane, nalapha ngikhona angekhe nize.”+ 35 Ngalokho amaJuda akhuluma wodwa athi: “Umuntu lo unqophe ukuyaphi, lapho singeze samfumana khona? Kghani unqophe ukuya emaJudeni arhatjhekele hlangana namaGirigi, afundise amaGirigi na? 36 Utjho ukuthini nakathi, ‘Nizongifuna kodwana angekhe ningifumane, nalapha ngikhona angekhe nize’?”

37 Ngelanga lamaswaphela, ilanga elikhulu lomnyanya,+ uJesu wasikima watjho ngelizwi elikhulu wathi: “Nanyana ngubani owomileko, akeze kimi asele.+ 38 Woke umuntu okholwa kimi njengombana imitlolo itjho: ‘Kuzokugeleza ngaphakathi kwakhe imisele yamanzi aphilako.’”+ 39 Watjho lokhu malungana nommoya, lowo obewuzokufunyanwa ngilabo abakholwa kuye ngombana bekube sikhatheso bekunganammoya+ ngebanga lokobana uJesu bekangakaphazinyuliswa.+ 40 Abanye esiqubuthwini abezwe amezwi la bathoma ukuthi: “Kwamambala lo Mphorofidi.”+ 41 Abanye bebathi: “Lo nguKrestu.”+ Kodwana abanye bathi: “UKrestu angavela njani eGalile?+ 42 Umtlolo awutjho na bona uKrestu uzokuvela esizukulwaneni sakaDavida+ begodu avele eBhetlehema,+ endaweni uDavida ebekavela kiyo?”+ 43 Yeke kwaba nokuhlukana esiqubuthwini ngebanga lakhe. 44 Nanyana abanye babo bebafuna ukumbamba* kodwana akakho namunye owamphakamisela isandla.

45 Abonogada babuyela ebaphristini abakhulu nabaFarisi; yeke abaFarisi bababuza bathi: “Kubayini ningakezi naye?” 46 Abonogada baphendula bathi: “Akakho umuntu owakhe wakhuluma ngendlela le.”+ 47 AbaFarisi bathi: “Kghani nani senidurhisiwe? 48 Ukhona omunye wababusi namkha wabaFarisi okholelwa kuye na?+ 49 Isiqubuthwesi esingawazi umThetho siqalekisiwe.” 50 UNikhodemusi, oweza kuye ngaphambilini nobekangomunye wabo, wathi kibo: 51 “NgokomThethwethu asimahluleli umuntu ngaphandle kobana aziphendulele qangi begodu sazi lokho akwenzako, akusinjalo?”+ 52 Bamphendula bathi kuye: “Kghani nawe ungeweGalile? Hlolisisa ubone bonyana akakho umphorofidi ozokuvela eGalile.”*

8 12 UJesu wakhuluma nabo godu, wathi: “Ngikukhanya kwephasi.+ Nanyana ngubani ongilandelako angekhe akhambe ebumnyameni kodwana uzokuba nokukhanya+ kokuphila.” 13 AbaFarisi bathi kuye: “Wena uyazifakazela; ubufakazi bakho abusiliqiniso.” 14 UJesu wathi kibo: “Nanyana ngizifakazela, ubufakazi bami buliqiniso, ngombana ngiyazazi ukuthi ngivelaphi nokuthi ngiyaphi. Kodwana nina anazi ukuthi ngivelaphi nokuthi ngiyaphi.+ 15 Nina nahlulela ngokucabanga kwabantu;*+ mina angahluleli muntu nakanye. 16 Kodwana nangahlulelako, ukwahlulela kwami kuliqiniso ngombana angisingedwa, uBaba ongithumileko unami.+ 17 Godu kutloliwe emThethwenenu ukuthi: ‘Ubufakazi babantu ababili buliqiniso.’+ 18 Mina ngifakaza ngami noBaba ongithumileko ufakaza ngami.”+ 19 Bathi kuye: “Ukuphi uYihlo na?” UJesu waphendula wathi: “Aningazi mina namkha uBaba.+ Ngathana beningazi, benizomazi noBaba.”+ 20 Watjho amezwi la endaweni ekubekwa kiyo amabhoksi weminikelo+ njengombana bekafundisa ngethempelini. Kodwana akakho owambambako ngombana isikhathi sakhe besingakafiki.+

21 UJesu wathi kibo: “Ngiyakhamba, nizongifuna kodwana nizokufela esonweni senu.+ Lapho ngiya khona, angekhe nize.”+ 22 Ngalokho amaJuda athi: “Kghani sekafuna ukuzibulala? Ngombana uthi, ‘Lapho ngiya khona, angekhe nize.’” 23 Waraga wathi kiwo: “Nina ningebaphasi; mina ngingewaphezulu.+ Nina nivela ephasineli; mina angiveli ephasineli. 24 Kungalokho ngithi kini: Nizokufela ezonweni zenu. Ngombana naningakholwako ukuthi nginguye, nizokufela ezonweni zenu.” 25 Ngalokho athi kuye: “Kanti wena ungubani?” UJesu wathi kiwo: “Ngisazitshwenyelani ngokukhuluma nani? 26 Nginezinto ezinengi engifuna ukuzitjho malungana nani nengifuze ngizahlulele. Eqinisweni, ongithumileko ungewamambala nezinto engizizwe kuye ngizitjela iphasi.”+ 27 Akhenge alemuke bona bekakhuluma nawo ngoYise. 28 Ngalokho uJesu wathi: “Ngemva kokuthi niphakamise iNdodana yomuntu,+ nizokwazi-ke ukuthi nginguye+ nokuthi angenzi litho ngokuthanda kwami+ kodwana ngikhuluma izintwezi njengombana uBaba angifundisile. 29 Loyo ongithumileko unami; akhenge angitjhiye ngingedwa ngombana qobe ngenza izinto ezimthabisako.”+ 30 Nakasatjho izintwezi, abanengi bakholwa kuye.

31 Yeke uJesu waraga wathi emaJudeni ebewakholelwa kuye: “Nanihlala nilalela ilizwi lami, kwamambala nibafundi bami, 32 nizolazi iqiniso+ begodu iqiniso lizonitjhaphulula.”+ 33 Athi kuye: “Siziinzukulwana zaka-Abrahama, akhenge khesibe ziingqila zamuntu. Kuza njani uthi, ‘Nizokutjhaphuluka’?” 34 UJesu wawaphendula wathi: “Ngiqinisile ngithi kini, woke umuntu owenza isono, usigqila sesono.+ 35 Ukungezelela kilokho, isigqila asihlali ngendlini yomphathaso ngokungapheliko; indodana yona ihlala ngokungapheliko. 36 Nje-ke nangabe iNdodana iyanitjhaphulula, nizokutjhaphuluka kwamambala. 37 Ngiyazi ukuthi niziinzukulwana zaka-Abrahama. Kodwana nifuna ukungibulala ngombana anamukeli ifundiswami. 38 Ngikhuluma izinto engizibone nanginoBaba+ kodwana nina nenza izinto enizizwe kubabenu.” 39 Athi kuye: “Ubabethu ngu-Abrahama.” UJesu wathi kiwo: “Ngathana benibantwana baka-Abrahama,+ benizokwenza imisebenzi ka-Abrahama. 40 Kodwana nje nifuna ukungibulala, mina onitjele iqiniso engilizwe kuZimu.+ U-Abrahama akhenge akwenze lokhu. 41 Nenza imisebenzi kababenu.” Athi kuye: “Asisimavezandlebe;* sinoBaba munye, uZimu.”

42 UJesu wathi kiwo: “Ngathana uZimu bekanguBabenu, benizongithanda+ ngombana ngibuya kuZimu begodu ngilapha. Angikezi ngokuthanda kwami kodwana uZimu ungithumile.+ 43 Kubayini ningakuzwisisi engikutjhoko? Kungombana angekhe nililalele ilizwi lami. 44 Nina nivela kuyihlo uDeveli, nifisa ukwenza iinkanuko zakayihlo.+ Yena bekambulali kusukela ekuthomeni+ begodu akhenge adzimelele eqinisweni ngombana iqiniso alikho kuye. Nakakhuluma amala, ukhuluma ngokuvumelana nesimilo sakhe ngombana umleyimala begodu unguyise wamala.+ 45 Ngombana mina, ngakwelinye ihlangothi, nginitjela iqiniso, aningikholwa. 46 Ngubani kini ongafakaza bona nginomlandu wesono na? Nangabe ngikhuluma iqiniso, kuza njani ningangikholwa? 47 Loyo ovela kuZimu ulalela lokho uZimu akutjhoko.+ Kungebangelo nina ningalaleli ngombana aniveli kuZimu.”+

48 AmaJuda athi kuye: “Kghani sinamala na nasithi, ‘UmSamariya+ begodu unedimoni’?”+ 49 UJesu waphendula wathi: “Anginadimoni kodwana ngihlonipha uBaba begodu nina aningihloniphi. 50 Angizifuneli idumo+ kodwana kukhona olifunako nowahlulelako. 51 Ngiqinisile ngithi kini, nanyana ngubani ohlonipha ilizwi lami, angekhe akubona ukufa nakanye.”+ 52 AmaJuda athi kuye: “Nje khona siyabona ukuthi unedimoni. U-Abrahama nabaphorofidi bahlongakala kodwana wena uthi, ‘Nanyana ngubani ohlonipha ilizwi lami, angekhe akuzwa ukufa nakanye.’ 53 Kghani wena umkhulu na kunobabethu u-Abrahama owahlongakalako? Abaphorofidi nabo bahlongakala. Nje-ke wena uthi ungubani?” 54 UJesu waphendula wathi: “Nangabe ngiyazidumisa, idumo lami alisililitho. UBaba nguye ongidumisako,+ loyo enithi unguZimenu. 55 Akhenge nimazi+ kodwana mina ngiyamazi.+ Ngathana ngithe angimazi, bengizokukhuluma amala njengani. Kodwana ngiyamazi begodu ngihlonipha ilizwi lakhe. 56 U-Abrahama uyihlo wakuthabela khulu ukubona ilanga lami begodu walibona wathaba.”+ 57 Yeke amaJuda athi kuye: “Awukabi neminyaka ema-50 ubudala kodwana sewubone u-Abrahama?” 58 UJesu wathi kiwo: “Ngiqinisile ngithi kini, ngaphambi kokuthi u-Abrahama abe khona, bengisolo ngikhona.”+ 59 Ngalokho adobha amatje bona amphose ngawo kodwana uJesu wabhaca, waphuma ethempelini.

9 Njengombana adlula, wabona umuntu owabelethwa asiphofu. 2 Abafundi bakhe bambuza bathi: “Rabi,+ ngubani owonileko, mumuntu lo namkha babelethi bakhe, bona abelethwe asiphofu nje?” 3 UJesu waphendula wathi: “Akukoni yena namkha ababelethi bakhe kodwana lokho kuvule ithuba lokuthi imisebenzi kaZimu ibonakaliswe ngaye.+ 4 Kufuze senze imisebenzi yaloyo ongithumileko kusesesemini;+ ubusuku buyeza lapho kungekhe kube nomuntu osebenzako. 5 Ikani nangisesesephasini, ngikukhanya kwephasi.”+ 6 Ngemva kokutjho lokhu, wakhafulela ehlabathini wenza idaka ngamathe, waninda idakelo emehlweni womuntu loyo+ 7 wathi kuye: “Khamba uyokuhlamba esizibeni seSilowama” (nakutjhugululwako kutjho ukuthi “Thunyiweko”). Wakhamba wayokuhlamba, wabuya abona.+

8 Abomakhelwana nalabo ebebajayele ukumbona abawa bathi: “Umuntu lo akusuye na loya obekajayele ukuhlala phasi abawe?” 9 Abanye bebathi: “Nguye.” Abanye bathi: “Akusinguye, ufana naye.” Kodwana yena bekasolo athi: “Nginguye.” 10 Yeke bambuza bathi: “Alo-ke amehlwakho avuleke njani?” 11 Wathi: “Umuntu okuthiwa nguJesu wenze idaka, walizesa emehlwenami wathi kimi, ‘Khamba uyokuhlamba eSilowama.’+ Ngatjhinga khona, ngahlamba bese ngabona.” 12 Nabezwa lokho bathi kuye: “Uphi umuntu loyo?” Wathi: “Angazi.”

13 Bathatha umuntu obekasiphofu lo batjhinga naye ebaFarisini. 14 Ngelanga uJesu enza ngalo idaka bese wavula amehlo wesiphofesi,+ bekuliSabatha.+ 15 NabaFarisi babuza umuntu lo ukuthi ubone njani. Wathi kibo: “Uninde idaka emehlwenami, ngahlamba, nje sengiyabona.” 16 Abanye babaFarisi bathi: “Umuntu loyo akaveli kuZimu ngombana akalihloniphi iSabatha.”+ Abanye bathi: “Umuntu osisoni angazenza njani iimbonakaliso ezinje?”+ Yeke kwaba nokuhlukana hlangana nabo.+ 17 Godu bathi emuntwini obekasiphofu: “Wena uthini ngaye njengombana avule amehlwakho nje?” Umuntu lo wathi: “Umphorofidi.”

18 Kodwana amaJuda bewangakholwa ukuthi bekasiphofu nokuthi sekayabona, bekwaba kulapho abiza ababelethi bomuntu obekasiphofu loyo. 19 Ababuza athi: “Yindodanenu le na enithi ibelethwe isiphofu? Alo-ke kuza njani seyibona nje?” 20 Ababelethi bakhe baphendula bathi: “Iye kuliqiniso ukuthi le yindodanethu nokuthi yabelethwa isiphofu. 21 Kodwana ukuthi kuza njani ukuthi nje seyiyabona, asazi nokuthi ngubani ovule amehlwayo, asazi. Ibuzeni. Seyiyidala. Ayizikhulumele.” 22 Ababelethi bakhe batjho njalo ngombana bebasaba amaJuda+ ngombana amaJuda besewavumelene ukuthi nanyana ngubani ozokuvuma ukuthi uJesu unguKrestu, kufuze aqothwe esinagogeni.+ 23 Kungebangelo ababelethi bakhe bathi: “Seyiyidala. Ibuzeni.”

24 Nje-ke babiza umuntu obekasiphofu ihlandla lesibili bathi kuye: “Dumisa uZimu; siyazi ukuthi umuntu lo usisoni.” 25 Wathi: “Ukuthi usisoni, angazi. Yinye into engiyaziko, kukuthi bengisiphofu kodwana nje sengiyabona.” 26 Bathi kuye: “Ukwenzeni? Uwavule njani amehlwakho?” 27 Wathi kibo: “Nginitjelile kodwana akhenge nilalele. Kubayini nifuna ukwizwa godu? Kghani nani senifuna ukuba bafundi bakhe?” 28 Nabezwa lokho bamkgharameja bathi: “Nguwe omfundi womuntu loyo, thina sibafundi bakaMosi. 29 Siyazi bona uZimu wakhuluma noMosi kodwana umuntu lo, asazi ukuthi uvelaphi.” 30 Umuntu obekasiphofu wathi kibo: “Yazi indaba le iyarara, anazi ukuthi uvelaphi kodwana uvule amehlwami. 31 Siyazi ukuthi uZimu akazilaleli izoni+ kodwana nangabe umuntu uyamsaba begodu enze intandwakhe, uyamlalela.+ 32 Kusukela kade azange khekuzwakale bona kukhona owavula amehlo womuntu owabelethwa asiphofu. 33 Ngathana umuntu lo bekangaveli kuZimu, bekangekhe enze litho.”+ 34 Bathi kuye: “Wena wabelethelwa esonweni kodwana ufundisa thina?” Bamqotha!+

35 UJesu wezwa ukuthi bamqothile, nakamfumanako wathi: “Uyakholelwa na eNdodaneni yomuntu?” 36 Umuntu lo wathi: “Mnumzana, ingubani, bona ngingakholelwa kiyo na?” 37 UJesu wathi kuye: “Uyibonile, kuhlekuhle, ngiyo le ekhuluma nawe.” 38 Wathi: “Ngiyakholelwa kiyo, Kosi.” Wamkhothamela. 39 Yeke uJesu wathi: “Ngizele isahlulelwesi ephasini ukuthi abangaboniko babone+ begodu ababonako baphophale.”+ 40 Abanye babaFarisi ebebanaye bamuzwa atjho lokho, bathi kuye: “Utjho bona nathi siziimphofu?” 41 UJesu wathi kibo: “Ngathana beniziimphofu, bengekhe nibe nesono. Kodwana nje nithi, ‘Siyabona.’ Isono senu angekhe silitjalelwe.”+

10 “Ngiqinisile ngithi kini nanyana ngubani ongangeni ngomnyango esibayeni sezimvu kodwana eqe ngenye indlela, ulisela begodu umdlelezeli.+ 2 Kodwana ongena ngomnyango, ungumelusi wezimvu.+ 3 Umlindisango uyamvulela+ nezimvu ziyalilalela ilizwi lakhe.+ Ubiza izimvu zakhe ngamagama, azirholele ngaphandle. 4 Nasele azikhuphele ngaphandle zoke, ukhamba phambi kwazo nezimvu ziyamlandela ngombana ziyalazi ilizwi lakhe. 5 Angeze zalandela umuntu ezingamaziko, zizombalekela ngombana azilazi ilizwi lomuntu loyo.” 6 UJesu wabatjela umfanekiso lo, akhenge bakuzwisise ebekabatjela khona.

7 Yeke uJesu wathi godu: “Ngiqinisile ngithi kini, ngimnyango wezimvu.+ 8 Boke labo abeze bazenza mina, bamasela nabadlelezeli kodwana izimvu akhenge zibalalele. 9 Mina ngimnyango nanyana ngubani ongena ngami uzokusindiswa, uzakungena aphume afumane amadlelo.+ 10 Isela lizela ukuzokweba, ukubulala nokutjhabalalisa kwaphela.+ Mina ngizele bona zifumane ukuphila begodu zibe nakho kube kunengi. 11 Ngingumelusi omuhle;+ umelusi omuhle udela ukuphila kwakhe* ngebanga lezimvu.+ 12 Umuntu oqatjhiweko, ongasingumelusi nongasimnikazi wezimvu, ubona ipisi iza, atjhiye izimvu abaleke bese ipisi iyazibhudungela ziphadlhalale 13 ngombana uqatjhiwe begodu akanandaba nezimvu. 14 Ngingumelusi omuhle. Ngiyazazi izimvu zami nazo ziyangazi+ 15 njengombana uBaba+ angazi nami ngiyamazi uBaba; ngidela ukuphila kwami ngebanga lezimvu.+

16 “Nginezinye izimvu ezingasizo zesibayesi+ nazo kufuze ngizingenise, zizolilalela ilizwi lami begodu zizokuba mhlambi munye nomelusi munye.+ 17 Kungebangelo uBaba angithanda+ ngombana ngidela ukuphila kwami+ bona ngikufumane godu. 18 Akunamuntu ongithathela kona kodwana ngikudela ngokuzithandela. Nginamandla wokukudela begodu nginamandla wokukufumana godu.+ Lo myalo engiwufumene kuBaba.”

19 Godu kwaba nokwahlukana hlangana kwamaJuda+ ngebanga lamezwi la. 20 Amanengi wawo bewathi: “Unedimoni begodu uyahlanya. Nimlalelelani?” 21 Abanye bathi: “La akusimamezwi womuntu onedimoni. Kghani idimoni lingakghona ukuvula amehlo weemphofu?”

22 Ngesikhatheso eJerusalema kwaba nomNyanya wokuHlanjululwa kwethempeli. Bekusebusika, 23 uJesu bekakhamba ethempelini emathurini kaSolomoni.+ 24 Yeke amaJuda ambungelela athi kuye: “Uzosenza sizibuze bekube kunini? Nangabe unguKrestu, sitjela ngokunqophileko.” 25 UJesu wathi kiwo: “Nginitjelile kodwana anikholwa. Imisebenzi engiyenza egameni lakaBaba, iyangifakazela.+ 26 Kodwana anikholwa ngombana anisizizimvu zami.+ 27 Izimvu zami ziyalilalela ilizwi lami, ngiyazazi begodu ziyangilandela.+ 28 Ngizinikela ukuphila okungapheliko,+ angeze zatjhatjalaliswa begodu akunamuntu ongazihluthula esandleni sami.+ 29 Lokho uBaba anginikele khona kukhulu kunazo zoke ezinye izinto begodu akunamuntu ongazihluthula esandleni sakaBaba.+ 30 Mina noBaba simunye.”*+

31 Godu amaJuda adobha amatje bona amkghadlhe ngawo. 32 UJesu wathi kiwo: “Nginitjengise imisebenzi eminengi emihle evela kuBaba. Ngimuphi wemisebenzi le eningikghadlhela wona?” 33 AmaJuda athi kuye: “Asikukghadlheli umsebenzi omuhle owenzako kodwana ukuhlambalaza+ ngombana wena nanyana umumuntu, uzenza uzimu.” 34 UJesu wathi: “Akukatlolwa na emThethwenenu ukuthi, ‘Ngithe: “Nibozimu”’?*+ 35 UZimu nakabize labo abalahlwa lilizwi lakhe ngokuthi ‘bozimu’+ nje-ke umtlolo angekhe wenziwa waba lilize 36 nithi kimi, mina uBaba amcwengisileko wamthumela ephasini, ‘Uyahlambalaza’ ngombana ngithe, ‘NgiyiNdodana kaZimu’?+ 37 Nangabe angenzi imisebenzi kaBaba, musani ukungikholwa. 38 Kodwana nangabe ngiyayenza, ngitjho nanyana ningangikholwa, kholwani imisebenzi,+ bona nazi begodu niragele phambili nazi ukuthi uBaba umunye nami nokuthi mina ngimunye noBaba.”+ 39 Yeke balinga ukumbamba godu kodwana wabaleka azange bamfumane.

40 Godu wayamela ngaphetjheya kweJordani endaweni lapha uJwanisi bekabhabhadisela khona kokuthoma,+ wahlala khona. 41 Abantu abanengi beza kuye bathi: “UJwanisi akhenge enze isibonakaliso nasinye kodwana koke uJwanisi akukhulumileko ngomuntu lo kuliqiniso.”+ 42 Abanengi bakholwa kuye lapho.

11 Umuntu othileko okuthiwa nguLazaru bekagula; bekavela esabelweni seBhethaniya, ekhaboMariya nodadwabo uMarta.+ 2 Lo nguMariya owazesa iKosi ngamafutha anuka kamnandi, wasula neenyawo zayo ngeenhluthu zakhe;+ uLazaru ogulako bekumfowabo. 3 Abodadwabo bathumela umlayezo kuJesu, bathi: “Kosi, umnganakho omthandako uyagula.” 4 Kodwana uJesu nakezwa lokho, wathi: “Isiphetho sokugulokhu angekhe kube kukufa kodwana kungokwephazimulo kaZimu,+ bona iNdodana kaZimu iphazinyuliswe ngakho.”

5 UJesu bekamthanda uMarta, uMariya noLazaru. 6 Nanyana kunjalo, nakezwa bona uLazaru uyagula, wahlala endaweni ebekakiyo amanye amalanga amabili. 7 Ngemva kwalokhu wathi ebafundini: “Asitjhingeni eJudiya godu.” 8 Abafundi bathi kuye: “Rabi,+ mhlapha nje amaJudiya bekafuna ukukukghadlha ngamatje,+ ufuna ukuya khona godu?” 9 UJesu waphendula wathi: “Imini inama-iri ali-12, akusinjalo?+ Nanyana ngubani okhamba emini, akakhutjwa lilitho ngombana ubona ukukhanya kwephaseli. 10 Kodwana nanyana ngubani okhamba ebusuku uyakhutjwa ngombana akanalitho elimkhanyiselako.”

11 Ngemva kokutjho lokhu, waraga wathi: “ULazaru umnganethu ulele+ kodwana ngitjhinga khona bona ngiyomvusa.” 12 Abafundi bathi kuye: “Kosi, nangabe ulele, uzakuphola.” 13 UJesu bekatjho ukuthi uhlongakele. Kodwana bona bebacabanga ukuthi ukhuluma ngokulala ubuthongo. 14 Ngemva kwalokho uJesu wathi kibo ngokunqophileko: “ULazaru uhlongakele+ 15 begodu ngebanga lenu ngiyathaba ukuthi bengingekho lapho, bona nikholwe. Kodwana asitjhingeni kuye.” 16 Yeke uTomasi, obekuthiwa liWele,* wathi ebafundini akunye nabo: “Asikhambeni nathi, bona sife kunye noJesu.”+

17 UJesu nakafikako, wafumana uLazaru sekanamalanga amane asethuneni. 18 Nje-ke iBhethaniya beyiseduze kweJerusalema, ngebanga elingaba makhilomitha amathathu.* 19 Inengi lamaJuda belize kuMarta noMariya lizobatjhiriya ngokuhlongakala komfowabo. 20 UMarta nakezwa bona uJesu uyeza, waphuma wayomhlangabeza, uMariya+ bekasolo ahlezi ekhaya. 21 UMarta wathi kuJesu: “Kosi, ngathana bewulapha, umfowethu ngangakafi. 22 Kodwana nanje ngiyazi ukuthi nanyana yini oyibawa kuZimu, uZimu uzokunikela yona.” 23 UJesu wathi kuye: “Umfowenu uzokuvuka.” 24 UMarta wathi kuye: “Ngiyazi ukuthi uzokuvuswa kwabafileko+ ngelanga lamaswaphela.” 25 UJesu wathi kuye: “Mina ngikuvuka nokuphila.+ Loyo okholwa kimi, ngitjho nanyana angafa, uzokuphila 26 bese kuthi woke umuntu ophilako akholwe kimi angekhe afe.+ Uyakukholwa lokhu na?” 27 Wathi kuye: “Iye Kosi, ngiyakholwa bona unguKrestu, iNdodana kaZimu, loyo ebekufuze eze ephasini.” 28 Ngemva kokutjho lokhu, wakhamba wayokubiza uMariya udadwabo, wathi kuye ngemsitheleni: “UMfundisi+ ulapha begodu uyakubiza.” 29 UMariya nakezwa lokho, wasikima msinyana watjhinga kuye.

30 UJesu bekangakangeni endaweni leyo, bekaseselapho uMarta amhlangabeze khona. 31 AmaJuda ebewanoMariya ngendlini amtjhiriya, nawambona asikima msinyana aphuma, amlandela, acabanga ukuthi uya ethuneni+ bona ayokulila khona. 32 UMariya nakafika lapho uJesu bekakhona begodu nakambonako, wawela eenyaweni zakhe wathi kuye: “Kosi, ngathana bewulapha, umfowethu ngangakafi.” 33 UJesu nakambona alila namaJuda eze naye nawo alila, wathinteka khulu ehliziyweni* begodu watshwenyeka. 34 Wathi: “Nimlalisephi?” Bathi kuye: “Kosi, iza uzokubona.” 35 UJesu walila.+ 36 Khonokho amaJuda athi: “Qalani bona bekamthanda kangangani!” 37 Kodwana abanye kibo bathi: “Nitjho ukuthi umuntu owavula amehlo wesiphofu+ bekangabhalelwa kuvimba lo bona angahlongakali?”

38 Ngemva kokuthinteka khulu ehliziyweni godu uJesu waya ethuneni. Gade lilirholo, livalwe ngelitje. 39 UJesu wathi: “Susani ilitje.” UMarta, udadwabo kamufi, wathi kuye: “Kosi, kufuze bona sekayanuka nje ngombana sekumalanga amane.” 40 UJesu wathi kuye: “Akhenge ngikutjele na ukuthi nawungakholwa uzokubona iphazimulo kaZimu?”+ 41 Ngalokho balisusa ilitje. Ngemva kwalokho uJesu waqala ezulwini,+ wathi: “Baba, ngiyathokoza ukuthi ungizwile. 42 Kwamambala, bengazi ukuthi uhlala ungizwa; kodwana ngikhulume ngebanga lesiqubuthu esijame lapha, bona sikholwe ukuthi ungithumile.”+ 43 Ngemva kokutjho lokhu, warhuwelela khulu wathi: “Lazaru, phuma!”+ 44 Umuntu obekahlongakele waphuma iinyawo nezandla zitantelwe ngamatjhila nobuso bakhe butantelwe ngetjhila. UJesu wathi kibo: “Mtjhaphululeni nimlise akhambe.”

45 Nje-ke, inengi lamaJuda ebelize kuMariya labona nalokho okwenziwe nguJesu, lakholwa kuye+ 46 kodwana amanye wawo atjhinga ebaFarisini abatjela okwenziwe nguJesu. 47 Ngalokho abaphristi abakhulu nabaFarisi babuthelela iSanhedrini ndawonye, bathi: “Sizokwenzani ngombana umuntu lo wenza iimangaliso ezinengi?+ 48 Nasingamlisa arage ngendlela enza ngayo le, boke abantu bazomkholwa namaRoma azokuza athathe kokubili indawethu* nesitjhaba sethu.” 49 Omunye wabo, uKhayafasi+ obekamphristi ophakemeko ngomnyaka loyo, wathi kibo: “Nina anazi litho 50 begodu akhenge nilemuke ukuthi kuzuzisa nina ukuthi umuntu munye afele isitjhaba kunokuthi isitjhaba soke sirhayilwe.” 51 Akhenge atjho lokhu ngokusuka kuye ngombana bekamphristi ophakemeko ngomnyaka loyo, waphorofida bona uJesu uzokufela isitjhaba 52 begodu ingasi isitjhaba kwaphela kodwana nokubuthelela ndawonye abantwana bakaZimu ebebahlakazekile. 53 Ngalokho kusukela mhlokho baluka amano wokumbulala.

54 Nje-ke, uJesu akhenge asakhamba tjhatjhalazi hlangana namaJuda, wasuka lapho waya esifundeni esihlanu kommango, edorobheni okuthiwa yi-Efrayimu,+ wahlala lapho nabafundi. 55 Nje-ke iPhasika+ lamaJuda belitjhidele, abantu abanengi bemaphandleni bakhuphukela eJerusalema bona bayokuhlanjululwa ngaphambi komnyanya wePhasika. 56 Bebafuna uJesu njengombana bajame ethempelini, bathi komunye nomunye: “Nicabangani? Kghani angekhe eze emnyanyeni?” 57 Kodwana abaphristi abakhulu nabaFarisi bebakhuphe umyalo wokuthi nakungenzeka kube nomuntu owaziko bona uJesu ukuphi, kufuze akubike, ukuthi bambambe.*

12 Emalangeni asithandathu ngaphambi kobana kube yiPhasika, uJesu wafika eBhethaniya, lapho bekuhlala uLazaru,+ owavuswa nguJesu kwabafileko. 2 Bamenzela isidlo santambama, uMarta bekabapha ukudla,+ uLazaru yena bekangomunye wabahlezi noJesu etafuleni. 3 UMariya wathatha isiquntu selitha yamafutha anuka kamnandi, abiza khulu, inarada yamambala, wazesa iinyawo zakaJesu, wazisula ngeenhluthu zakhe. Indlu yazala iphunga lamafutha anuka kamnandi.+ 4 Kodwana uJudasi Iskariyodi,+ omunye wabafundi bakhe, obekazomthengisa, wathi: 5 “Kubayini amafutha anuka kamnandi la angathengiswa ngabodenariyu* abama-300 bese imali leyo inikelwe abatlhagako?” 6 Watjho lokhu, ingasi ngebanga lokuthi bekatshwenyekile ngabantu abatlhagako kodwana bekalisela, aphatha ibhoksi lemali, ajayele nokweba imali efakwa kilo. 7 Yeke uJesu wathi: “Mliseni akwenze lokhu ukulungiselela ilanga lami lokubulungwa.+ 8 Ngombana abatlhagako nihlala ninabo+ kodwana mina angekhe nihlale ninami.”+

9 Isiqubuthu esikhulu samaJuda sezwa ukuthi uJesu ulapho, seza ingasi ngebanga lakaJesu kwaphela kodwana nokuzokubona uLazaru, amvuse kwabafileko.+ 10 Nje-ke abaphristi abakhulu baluka amano wokubulala noLazaru 11 ngombana bekungebanga lakhe amaJuda amanengi bewaya lapho begodu akholwa kuJesu.+

12 Ngelanga elilandelako, isiqubuthu esikhulu ebesize emnyanyeni sezwa ukuthi uJesu uza eJerusalema. 13 Sathatha iimpande zomuthi wesundu saphuma sayomhlangabeza, sarhuwelela sathi: “Siyakurabhela, msindise! Ubusisiwe oza ngegama lakaJehova,*+ iKosi yakwa-Israyeli!”+ 14 UJesu wafumana udumbanyana, wahlala phezu kwakhe+ njengombana kutloliwe: 15 “Ungasabi Ndodakazi yeZiyoni. Qala! Ikosakho iyeza, ihlezi phezu kwakadumbanyana.”+ 16 Abafundi bakhe akhenge bakuzwisise lokhu ekuthomeni kodwana lokha uJesu nakaphazinyuliswako,+ bakhumbula ukuthi lokhu kwatlolwa ngaye nokuthi benze izintwezi kuye.+

17 Isiqubuthu ebesinoJesu nakabiza uLazaru ethuneni+ amvusa kwabafileko sasolo sifakaza.+ 18 Leli ngelinye ibanga elenza isiqubuthu sayomhlangabeza, besizwile ukuthi wenze isimangaliswesi. 19 AbaFarisi bathi komunye nomunye: “Niyabona ukuthi asiyindawo. Qalani! Iphasi loke liyamlandela.”+

20 BekunamaGirigi athileko hlangana nalabo ebebeze ukuzokulotjha uZimu emnyanyeni. 21 Yeke aya kuFlebhe,+ obekavela eBhethesayida yeGalile, ambawa athi: “Mnumzana, sifuna ukubona uJesu.” 22 UFlebhe wayokutjela u-Andrisi. U-Andrisi noFlebhe bayokutjela uJesu.

23 Kodwana uJesu wathi kibo: “Sekusikhathi sokobana iNdodana yomuntu iphazinyuliswe.+ 24 Ngiqinisile ngithi kini, ngaphandle kokuthi ithoro yekoroyi iwele phasi bese iyafa, ihlala iyithoro yinye kodwana nayifako,+ izokuthela iinthelo ezinengi. 25 Nanyana ngubani othanda ukuphila kwakhe uyakutjhabalalisa kodwana nanyana ngubani ohloya ukuphila kwakhe+ ephasineli, uzokuvikela ukuze azuze ukuphila okungapheliko.+ 26 Nangabe umuntu ufuna ukuba sisebenzi sami, akangilandele begodu lapho ngikhona, kulapho nesisebenzi sami sizokuba khona.+ Nangabe umuntu ufuna ukuba sisebenzi sami, uBaba uzomdumisa. 27 Njenganje ngitshwenyekile,+ kufuze ngithini? Baba, ngisindisa esikhathinesi.+ Nanyana kunjalo, kungebangeli ngize ephasini, ngizele isikhathesi. 28 Baba, phazimulisa igama lakho.” Ngemva kwalokho kwazwakala ilizwi+ livela ezulwini lithi: “Ngiliphazimulisile begodu ngizoliphazimulisa godu.”+

29 Isiqubuthu ebesijame lapho salizwa, sathi kudume izulu. Abanye bathi: “Ingilozi ikhulume naye.” 30 UJesu wathi kibo: “Ilizweli alikazwakali ngebanga lami kunalokho lizwakele ngebanga lenu. 31 Nje iphaseli liyahlulelwa begodu umbusi wephaseli+ uzokuqothwa.+ 32 Nje-ke mina nangiphakanyiswako ephasini,+ ngizokudosela yoke imihlobo yabantu kimi.” 33 Kuhlekuhle bekatjho lokhu ukutjengisa ukuthi uzokufa njani.+ 34 Ngemva kwalokho isiqubuthu sathi kuye: “Sizwile emThethweni ukuthi uKrestu uzokuhlala ngokungapheliko.+ Utjho njani ukuthi iNdodana yomuntu kufuze iphakanyiswe?+ Ngubani iNdodana yomuntu le?” 35 UJesu wathi kibo: “Ukukhanya kuzokuba phakathi kwenu isikhatjhana. Khambani nisesenokukhanya ukwenzela bona ubumnyama bunganihluli, nanyana ngubani okhamba ebumnyameni akazi bona uyaphi.+ 36 Njengombana nisesenokukhanya, kholwani ekukhanyeni, bona nibe madodana wokukhanya.”+

UJesu watjho lokhu bese wakhamba wayobabhacela. 37 Nanyana bekenze iimangaliso ezinengi khulu phambi kwabo, bebangamkholwa 38 ukwenzela bona ilizwi laka-Isaya umphorofidi lizaliseke, nakathi: “Jehova,* ngubani okholwe into ayizwe kithi?+ Begodu malungana nomkhono kaJehova,* uvezwe kubani?”+ 39 Ibanga ebelibenza bangakholwa kukuthi u-Isaya godu wathi: 40 “Uphophaze amehlwabo, wathundubaza neenhliziyo zabo, ukuthi bangaboni ngamehlwabo, bangazwisisi ngeenhliziyo zabo, batjhuguluke begodu ngibalaphe.”+ 41 U-Isaya watjho lokhu ngombana wabona iphazimulwakhe, wakhuluma ngaye.+ 42 Eqinisweni, abanengi ngitjho nababusi bamkholwa+ kodwana akhenge bamvume ngebanga labaFarisi, bona bangazokuqothwa ngesinagogeni+ 43 ngombana bebathanda iphazimulo yabantu ukudlula iphazimulo kaZimu.+

44 Kusesenjalo, uJesu waphakamisa ilizwi wathi: “Nanyana ngubani onokukholwa kimi, akakholwa kimi kwaphela kodwana ukholelwa nakiloyo ongithumileko+ 45 begodu nanyana ngubani ongibonako ubona naloyo ongithumileko.+ 46 Ngize njengokukhanya ephasini,+ bona woke umuntu okholwa kimi angahlali ebumnyameni.+ 47 Kodwana nanyana ngubani owezwako amezwami angawenzi, angimahluleli ngombana angikazeli ukwahlulela iphasi kodwana ukusindisa iphasi.+ 48 Nanyana ngubani ongangihloniphi begodu angawamukeli amezwami, ukhona ozomahlulela. Ilizwi engilikhulumileko ngilo elizomahlulela ngelanga lamaswaphela. 49 Ngombana angikakhulumi ngokuthanda kwami kodwana uBaba ongithumileko nguye onginikele umyalo wokuthi ngithini nokuthi ngifundiseni.+ 50 Ngiyazi nokuthi umyalwakhe utjho ukuphila okungapheliko.+ Nje-ke nanyana yini engiyikhulumako, ngiyikhuluma njengombana uBaba angitjelile.”+

13 Nje-ke njengombana uJesu bekazi ngaphambi komnyanya wePhasika bona isikhathi sakhe sokukhamba ephasineli aye kuYise sesifikile,+ bekabathanda okungebakhe ebebasephasini, wabathanda bekwaba sekupheleni.+ 2 Isidlo santambama besiraga begodu uDeveli besekakufakile ehliziyweni kaJudasi Iskariyodi,+ indodana kaSimoni, ukuthi amthengise.+ 3 Yeke uJesu, azi ukuthi uBaba unikele zoke izinto ezandleni zakhe nokuthi uvele kuZimu begodu bekaya kuZimu,+ 4 wasikima esidlweni santambama wabeka izambatho zakhe zangaphandle eqadi. Wathatha ithawula walitantela edinini.+ 5 Ngemva kwalokho wathela amanzi ngesitjeni wahlambisa abafundi bakhe iinyawo wazisula ngethawula ebekazitantele ngalo. 6 Wafika kuSimoni Pitrosi. UPitrosi wathi kuye: “Kosi, ungihlambisa iinyawo?” 7 UJesu wathi kuye: “Lokhu engikwenzako awukuzwisisi nje kodwana uzokuzwisisa ngemva kwezintwezi.” 8 UPitrosi wathi kuye: “Awa, angekhe ungihlambise iinyawo.” UJesu wathi kuye: “Ngaphandle kokuthi ngikuhlambise,+ awunatjhebiswano nami.” 9 USimoni Pitrosi wathi kuye: “Kosi, ungangihlambisi iinyawo kwaphela kodwana ngihlambisa nezandla nehloko.” 10 UJesu wathi kuye: “Nanyana ngubani ohlambileko akutlhogeki ahlanjiswe okhunye ngaphandle kweenyawo zakhe kodwana uhlwenge ngokupheleleko. Nina madoda nihlwengile kodwana ingasi noke.” 11 Ngombana bekamazi umuntu ozomthengisa.+ Kungakho athi: “Akusingini noke enihlwengileko.”

12 Ngemva kokubahlambisa iinyawo wambatha izambatho zakhe zangaphandle, wahlala etafuleni godu wathi kibo: “Niyakuzwisisa na engikwenze kini? 13 Ningibiza ngokuthi ‘Mfundisi’ nokuthi ‘Kosi,’ nitjho kufanele ngombana ngingikho.+ 14 Nje-ke, nangabe mina, nanyana ngiyiKosi noMfundisi, nginihlambise iinyawo,+ nani kufuze nihlambisane* iinyawo.+ 15 Ngombana nginibekela isibonelo sokuthi njengombana ngenzile kini, nani nenze okufanako.+ 16 Ngiqinisile ngithi kini, isigqila asisisikhulu kunekosaso nothunyiweko akasimkhulu kunaloyo omthumileko. 17 Nje seniyazazi izintwezi kodwana nizokuthaba nanizenzako.+ 18 Angikhulumi ngani noke; ngiyabazi engibakhethileko. Kodwana lokhu kwenzeke bona umtlolo lo uzaliseke:+ ‘Loyo odla uburotho bami ungijikele.’*+ 19 Kusukela nje, nginitjela ngaphambi kobana kwenzeke, khona kuzakuthi nakwenzekako nikholwe bona nginguye.+ 20 Ngiqinisile ngithi kini, owamukela nanyana ngubani engimthumileko, wamukela nami+ begodu nanyana ngubani ongamukelako wamukela naloyo ongithumileko.”+

21 Ngemva kokutjho izintwezi, uJesu watshwenyeka emmoyeni, wafakaza, wathi: “Ngiqinisile ngithi kini, omunye wenu uzongithengisa.”+ 22 Abafundi baqalana, bebangazi ukuthi ukhuluma ngobani.+ 23 Omunye wabafundi, loyo uJesu ebekamthanda,+ bekahlezi eduze noJesu. 24 Nje-ke, uSimoni Pitrosi wakhomba umfundi lo ngehloko wathi: “Sitjela bona ukhuluma ngobani.” 25 Umfundi loyo wasama esifubeni sakaJesu wathi kuye: “Kosi, ngubani?”+ 26 UJesu waphendula wathi: “Ngiloyo engizomnikela isiqetjhana soburotho engibutjhebileko.”+ Yeke watjheba uburotho, wabunikela uJudasi, indodana kaSimoni Iskariyodi. 27 UJudasi wathatha isiqetjhana soburothobo, ngemva kwalokho uSathana wangena kuye.+ UJesu wathi kuye: “Lokho okwenzako, kwenze msinyana khulu.” 28 Nanyana kunjalo, akekho kilabo ebebahlezi etafuleni obekazi ukuthi kubayini atjho lokho kuye. 29 Kuhlekuhle, abanye bebacabanga bona njengombana uJudasi bekaphatha ibhoksi lemali,+ uJesu bekathi kuye, “Khamba uyokuthenga izinto esizitlhogela umnyanya” namkha bekathi kufuze anikele abadududu okuthileko. 30 Nje-ke kwathi bona athathe isiqetjhana soburothobo, waphuma khonokho. Bekusebusuku.+

31 Nasekaphumile, uJesu wathi: “Nje iNdodana yomuntu iphazinyulisiwe+ noZimu uphazinyulisiwe malungana nayo. 32 UZimu ngokwakhe uzoyiphazimulisa+ begodu uzoyiphazimulisa khona nje. 33 Bantwanyana, nginani isikhatjhana. Nizongifuna; godu lokho engikutjele amaJuda nangithi, ‘Lapho engiya khona angekhe nize,’+ ngikutjho nakini nje. 34 Ngininikela umyalo omutjha, wokuthi nithandane; njengombana nami nginithandile,+ nani thandanani.+ 35 Boke bazokwazi ngalokhu ukuthi nibafundi bami nanithandanako.”+

36 USimoni Pitrosi wathi kuye: “Kosi, uyaphi?” UJesu wathi: “Lapho ngiya khona, angekhe ungilandele nje kodwana uzongilandela ngokukhamba kwesikhathi.”+ 37 UPitrosi wathi kuye: “Kosi, kubayini ngingekhe ngikghone ukukulandela nje? Ngizokudela ukuphila kwami ngebanga lakho.”+ 38 UJesu wathi: “Uzokudela ukuphila kwakho ngebanga lami? Ngiqinisile ngithi kuwe, umkukurumbu angekhe ulile bekube kulapho sewungiphike kathathu.”+

14 “Ningatshwenyeki eenhliziyweni zenu.+ Kholwani kuZimu;+ kholwani nakimi. 2 Endlini kaBaba kuneendawo zokuhlala ezinengi. Ngathana bekungasinjalo, bengizonitjela ngombana ngiyakhamba ngiyonilungiselela indawo.+ 3 Nangikhambako ngiyonilungisela indawo, ngizokubuya ngizonithatha bona lapha ngikhona nani nibe khona.+ 4 Niyayazi nendlela yalapha ngiya khona.”

5 UTomasi+ wathi kuye: “Kosi, asikwazi lapho uya khona. Singayazi njani indlela?”

6 UJesu wathi kuye: “Ngiyindlela+ neqiniso+ nokuphila.+ Akakho oza kuBaba ngaphandle kokuthi eze ngami.+ 7 Ngathana nina madoda beningazi, benizomazi noBaba; kusukela nje niyamazi begodu nimbonile.”+

8 UFlebhe wathi kuye: “Kosi, sitjengisa uBaba, lokho kusanele.”

9 UJesu wathi kuye: “Ngitjho nangemva kobana madoda ngibe nani isikhathi eside kangaka, Flebhe, awukangazi? Nanyana ngubani ongibonileko ubone noBaba.+ Utjho njani nawuthi, ‘Sitjengisa uBaba’? 10 Awukholwa na bona ngimunye noBaba nokuthi uBaba umunye nami?+ Izinto engizitjho kini angizikhulumi ngokwami+ kodwana uBaba ohlala amunye nami wenza imisebenzakhe. 11 Ngikholwani nangithi ngimunye noBaba nokuthi uBaba umunye nami; nakungasinjalo, kholwani ngebanga lemisebenzi ngokwayo.+ 12 Ngiqinisile ngithi kini, nanyana ngubani okholwa kimi naye uzokwenza imisebenzi engiyenzako begodu uzokwenza imisebenzi emikhulu kunale+ ngombana ngiya kuBaba.+ 13 Godu nanyana yini eniyibawa ngegama lami, ngizoyenza bona uBaba aphazinyuliswe ngeNdodana.+ 14 Nanibawa nanyana yini ngegama lami, ngizoyenza.

15 “Nangabe niyangithanda, nizoyilalela imiyalwami.+ 16 Ngizakubawa uBaba, yena uzoninikela omunye umsizi* bona abe nani bekube ngokungapheliko,+ 17 ummoya weqiniso,+ iphasi elingeze lawamukela ngombana aliwuboni begodu aliwazi.+ Nina niyawazi ngombana uhlala kini begodu ukini. 18 Angeze nginitjhiye niziintandani. Ngizokubuya kini.+ 19 Kungasikade iphasi angeze lisangibona kodwana nina nizongibona+ ngombana ngiyaphila, nani nizokuphila. 20 Ngelangelo nizokwazi bona ngimunye noBaba begodu nina nimunye nami, nami ngimunye nani.+ 21 Owamukela imiyalwami bekayilalele, nguye ongithandako. Ongithandako uzokuthandwa nguBaba, nami ngizomthanda, ngizibonakalise ngokukhanyako kuye.”

22 UJudasi,+ ingasi u-Iskariyodi, wathi kuye: “Kosi, kuza njani unqophe ukuzibonakalisa ngokukhanyako kithi ingasi ephasini?”

23 UJesu wamphendula wathi: “Loyo ongithandako, uzolilalela ilizwi lami+ noBaba uzomthanda begodu sizokuza kuye sihlale naye.+ 24 Ongangithandiko akagcini amezwami. Ilizwi enilizwako akusingelami kodwana ngelakaBaba ongithumileko.+

25 “Ngikhulume izintwezi ngisesenani. 26 Kodwana umsizi, ummoya ocwengileko, uBaba azowuthumela ngegama lami, uzonifundisa zoke izinto, unikhumbuze nazo zoke izinto enginitjele zona.+ 27 Nginitjhiya nokuthula; ngininikela ukuthula kwami.+ Angininikeli khona ngendlela iphasi elininikela ngayo. Ningatshwenyeki eenhliziyweni zenu namkha nisabe. 28 Nizwile ngathi kini, ‘Ngiyakhamba begodu ngizokubuya kini.’ Ngathana beningithanda, benizokuthaba ukuthi ngiya kuBaba ngombana uBaba mkhulu kunami.+ 29 Nje-ke nginitjele ngaphambi kobana kwenzeke bona nikholwe nakwenzekako.+ 30 Angeze ngisakhuluma okunengi nani ngombana umbusi wephasi+ uyeza begodu akanamandla kimi.+ 31 Kodwana bona iphasi lazi ukuthi ngiyamthanda uBaba, ngenza njengombana uBaba angiyale bona ngenze.+ Sikimani, asikhambeni lapha.

15 “Mina ngisitjalo samadiribe samambala, uBaba mlimi. 2 Zoke iimpande ezingatheli uyazisusa kimi, ahlwengise zoke ezithelako bona zithele iinthelo ezingeziweko.+ 3 Nina senihlwengekile ngebanga lelizwi engilikhulume kini.+ 4 Hlalani nimunye nami, nami ngizokuhlala ngimunye nani. Njengombana ipande ingekhe izithelele ngokwayo ngaphandle kokuthi ihlale esitjalweni samadiribe, ngokunjalo nani angekhe nithele ngaphandle kokuthi nihlale nimunye nami.+ 5 Mina ngisitjalo samadiribe; nina niziimpande. Nanyana ngubani ohlala amunye nami, nami ngimunye naye, uthela iinthelo ezinengi+ ngombana ngaphandle kwami angekhe nenza litho. 6 Nanyana ngubani ongahlali amunye nami, uphoselwa ngaphandle njengepande bese uyatjhwaba. Abantu bayazibuthelela iimpandezo, baziphosele ngemlilweni, zitjhiswe. 7 Nangabe nihlala nimunye nami namezwami ahlala kini, bawani nanyana yini eniyifisako, izokwenzeka.+ 8 UBaba uphazinyuliswa kuragela kwenu phambili nokuthela iinthelo ezinengi nokuthi nizibonakalisa nibafundi bami.+ 9 Njengombana uBaba angithandile+ nami nginithandile; hlalani ethandweni lami. 10 Nanilalela imiyalwami, nizokuhlala ethandweni lami njengombana nami ngilalele imiyalo kaBaba begodu ngihlala ngisethandweni lakhe.

11 “Izintwezi ngizikhulume kini bona ithabo lami libe kini nethabo lenu lizaliswe.+ 12 Nakhu umyalwami, ukuthi nithandane njengombana nami nginithandile.+ 13 Akakho onethando elikhulu kunaleli bona umuntu angadela ukuphila kwakhe* ngebanga labangani bakhe.+ 14 Nibangani bami nanenza lokho enginiyala ngakho.+ 15 Angisanibizi ngokuthi niziingqila ngombana isigqila asikwazi okwenziwa yikosaso. Kodwana nginibize ngokuthi nibangani bami ngombana nginazise zoke izinto engizizwe kuBaba. 16 Akhenge ningikhethe kodwana ngimi onikhethileko, nginikhethele bona niragele phambili nokuthela iinthelo nokuthi iinthelo zenu zihlale ukwenzela bona nanyana yini eniyibawa kuBaba ngegama lami, aniphe yona.+

17 “Nginiyala ngezintwezi bona nithandane.+ 18 Nangabe iphasi liyanihloya, niyazi ukuthi langihloya nami ngaphambi kokuthi linihloye.+ 19 Ngathana beniyingcenye yephasi, iphasi belizokuthanda okungekwalo. Nje-ke ngebanga lokuthi anisiyingcenye yephasi+ kodwana nginikhethile ephasini, kungebangelo iphasi linihloya.+ 20 Khumbulani ilizwi enganitjela lona: Isigqila asisisikhulu kunekosaso. Nangabe bangihlunguphaza nani bazonihlunguphaza;+ nangabe balilalela ilizwi lami, bazolilalela nelenu. 21 Kodwana bazokwenza zoke izintwezi kini ngebanga legama lami ngombana abamazi loyo ongithumileko.+ 22 Ngathana akhenge ngize ngizokukhuluma nabo, bebangekhe babe nesono.+ Kodwana nje angekhe basiphika isono sabo.+ 23 Nanyana ngubani ongihloyako, uhloya noBaba.+ 24 Ngathana akhenge ngenze kibo imisebenzi engakhenge kheyenziwe ngomunye umuntu, bebangekhe babe nesono,+ nje bangibonile begodu bahloya mina noBaba. 25 Kodwana lokhu kwenzeke bona kuzaliseke ilizwi elitlolwe emThethwenabo nalithi: ‘Bangihloye ngaphandle kwesizathu.’+ 26 Nanginithumela umsizi ovela kuBaba, ummoya weqiniso,+ wona uzokufika uvela kuBaba begodu ufakaze ngami;+ 27 nani kufuze nifakaze+ ngami ngombana nibe nami kusukela ekuthomeni.

16 “Ngikhulume izintwezi kini bona ningawi. 2 Abantu bazoniqotha esinagogeni.+ Eqinisweni, kuza isikhathi lapho woke umuntu onibulalako+ azokucabanga bona wenzela uZimu umsebenzi ocwengileko. 3 Kodwana bazokwenza izintwezi ngombana abakamazi uBaba namkha mina.+ 4 Nanyana kunjalo, nginitjele izintwezi khona kuzakuthi nakufika isikhathi sokuthi zenzeke, nikhumbule ukuthi nganitjela zona.+

“Azange nginitjele izintwezi ekuthomeni ngombana benginani. 5 Nje ngiya kiloyo ongithumileko+ kodwana akakho namunye wenu ongibuzako ukuthi, ‘Uyaphi?’ 6 Ngebanga lokuthi nginitjele izintwezi, iinhliziyo zenu sezitlhuwe khulu.+ 7 Nanyana kunjalo, nginitjela iqiniso, ukukhamba kwami kuzokuzuzisa nina. Ngombana nangingakhambiko, umsizi+ angekhe eze kini kodwana nangikhambako, ngizomthumela kini. 8 Nakafikako, uzokunikela iphasi ubufakazi obukholisako malungana nesono, ukulunga nesahlulelo: 9 kokuthoma malungana nesono+ ngombana abakholelwa kimi+ 10 nangokulunga ngombana ngiya kuBaba begodu angeze nisangibona; 11 kuthi malungana nesahlulelo ngombana umbusi wephaseli wahlulelwe.+

12 “Ngisesenezinto ezinengi ekufuze nginitjele zona kodwana angekhe nikghone ukuzithwala nje. 13 Nanyana kunjalo, loyo* nakafikako, ummoya weqiniso,+ uzoninqophisa bona nizwisise iqiniso ngokuzeleko ngombana angekhe akhulume ngokuthanda kwakhe kodwana uzokukhuluma lokho akuzwako, uzonazisa nezinto ezisazokuza.+ 14 Loyo uzongiphazimulisa+ ngombana uzokuthatha lokho akuzwa kimi, akumemezele kini.+ 15 Zoke izinto uBaba anazo ngezami.+ Kungakho ngithi uthatha lokho akuzwa kimi, akumemezele kini. 16 Kuzaba sikhatjhana ningasangiboni+ bese kuthi ngemva kwesikhatjhana ningibone godu.”

17 Nabezwa lokho abanye babafundi bakhe bathi komunye nomunye: “Utjho ukuthini nakathi kithi, ‘Kuzaba sikhatjhana ningasangiboni kodwana ngemva kwesikhatjhana ningibone godu’ nokuthi ‘ngombana ngiya kuBaba’?” 18 Nje-ke bebathi: “Utjho ukuthini nakathi, ‘isikhatjhana’? Asazi ukuthi ukhuluma ngani.” 19 UJesu bekazi ukuthi bafuna ukumbuza, yeke wathi kibo: “Nibuzana nodwa na ngombana ngithe: ‘Kuzaba sikhatjhana ningasangiboni kodwana ngemva kwesikhatjhana ningibone godu’? 20 Ngiqinisile ngithi kini, nizokulila benirhahlawule kodwana iphasi lizokuthaba; nizokutlhuwa kodwana ukutlhuwa kwenu kuzokutjhugululwa kube lithabo.+ 21 Umfazi nakabelethako, uyatlhuwa ngombana isikhathi sakhe sifikile, kodwana nasekambelethile umntwana, akasalikhumbuli isizi ngebanga lethabo lokuthi kubelethwe umuntu ephasini. 22 Ngokufanako nani, nje nitlhuwile kodwana ngizonibona godu iinhliziyo zenu zizokuthaba+ begodu akunamuntu ongathatha ithabo lenu. 23 Mhlokho angekhe ningibuze litho. Ngiqinisile ngithi kini, nanibawa nanyana yini kuBaba,+ uzonipha yona ngegama lami.+ 24 Bekube nje anikabawi litho ngegama lami. Bawani nizokufumana, khona ithabo lenu lizokupheleliswa.

25 “Ngikhulume nani izintwezi ngemifanekiso. Isikhathi siyeza lapho ngingeze ngisakhuluma nani ngemifanekiso kodwana ngizonitjela ngoBaba ngokunqophileko. 26 Mhlokho nizokubawa kuBaba ngegama lami; ngokutjho lokhu, angitjho ukuthi ngizonibawela. 27 Ngombana uBaba ngokwakhe uyanithanda ngombana ningithandile+ nakholwa ukuthi ngize njengomjameli kaZimu.+ 28 Ngize njengomjameli kaBaba begodu ngize ephasini. Nje ngiyakhamba ephasini, ngiya kuBaba.”+

29 Abafundi bakhe bathi: “Arha! Nje-ke khona ukhuluma ngokunqophileko awusebenzisi imifanekiso. 30 Nje sesiyazi ukuthi wazi zoke izinto, awutlhogi nokobana kube nomuntu okubuzako. Ngalokhu siyakholwa ukuthi uvela kuZimu.” 31 UJesu wathi kibo: “Niyakholwa nje? 32 Qalani! Isikhathi siyeza, kuhlekuhle sesifikile, lapho nizokuphadlhalala noke, ngamunye atjhinge ngendlinakhe ningitjhiye ngingedwa.+ Kodwana angisingedwa ngombana uBaba unami.+ 33 Nginitjele izintwezi ukwenzela bona nibe nokuthula ngami.+ Ephasini nizokuba nesizi kodwana yibani nesibindi! Ngilihlulile iphasi.”+

17 Ngemva kobana uJesu akhulume lokhu, waqala ezulwini, wathi: “Baba, isikhathi sesifikile. Phazimulisa indodanakho ukwenzela bona nayo ikuphazimulise+ 2 njengombana uyinikele amandla phezu kwabo boke abantu+ ukuthi ibanikele ukuphila okungapheliko+ boke labo oyinikele bona.+ 3 Labo abazokufumana ukuphila okungapheliko+ kufuze bazi wena,* okunguwe wedwa uZimu weqiniso+ naloyo omthumileko, uJesu Krestu.+ 4 Ngikuphazimulisile ephasini,+ ngokuqeda umsebenzi onginikele wona bona ngiwenze.+ 5 Nje-ke Baba, ngiphazimulisa eqadi kwakho ngephazimulo egade nginayo eqadi kwakho ngaphambi kobana kube nephasi.+

6 “Ngilibonakalisile* igama lakho ebantwini onginikele bona ephasini.+ Bekungebakho, wabanikela mina begodu balilalele ilizwi lakho. 7 Nje-ke sebayazi bonyana zoke izinto onginikele zona zivela kuwe 8 ngombana ngibanikelile amezwi owanginikela wona,+ bawamukele begodu sebazi kuhle ukuthi ngize njengomjamelakho,+ bayakholwa nokuthi ungithumile.+ 9 Ngiyababawela; angibaweli iphasi kodwana ngibawela labo onginikele bona ngombana ngebakho 10 nazo zoke izinto zami ngezakho nezakho ngezami+ begodu ngiphazinyulisiwe hlangana nabo.

11 “Angisekho ephasini kodwana bona basephasini,+ mina ngiza kuwe. Baba oCwengileko, bavikele+ ngebanga legama lakho, onginikele lona, bona babe munye njengombana nathi simunye.+ 12 Nangisesenabo, bengihlala ngibavikela+ ngebanga legama lakho, onginikele lona; ngibavikele, akakho namunye wabo olahlekileko+ ngaphandle kwendodana yokutjhatjalaliswa+ bona imitlolo izaliseke.+ 13 Kodwana nje ngiza kuwe begodu ngitjho izintwezi ephasini bona ithabo lami lipheleliswe kibo.+ 14 Ngibanikele ilizwi lakho kodwana iphasi libahloyile ngombana abasiyingcenye yephasi+ njengombana nami ngingasiyingcenye yephasi.

15 “Angibawi ukuthi ubasuse ephasini kodwana ngibawa ubavikele ngebanga lomumbi.+ 16 Abasiyingcenye yephasi+ njengombana nami ngingasiyingcenye yephasi.+ 17 Bacwengise ngeqiniso;+ ilizwi lakho liliqiniso.+ 18 Njengombana ungithumele ephasini nami ngibathumele ephasini.+ 19 Ngiyazicwengisa ngebanga labo bona nabo bacwengiswe ngeqiniso.

20 “Angibaweli laba kwaphela kodwana ngibawela nalabo abazokukholwa kimi ngemva kokuzwa ilizwi labo, 21 khona bazakuba munye boke+ njengombana nawe Baba umunye nami, nami ngimunye nawe+ ukuthi nabo babe munye nathi bona iphasi likholwe ukuthi ungithumile. 22 Ngibanikele iphazimulo onginikele yona bona babe munye njengombana nathi simunye.+ 23 Mina ngimunye nabo nawe umunye nami ukuthi bapheleliswe ebunyeni, khona iphasi lizakwazi ukuthi ungithumile nokuthi uyabathanda njengombana nami ungithandile. 24 Baba, ngifuna ukuthi labo onginikele bona babe nami lapha ngikhona+ bonyana babone iphazimulo onginikele yona ngombana ungithande ngaphambi kokuthonyiswa kwephasi.+ 25 Baba olungileko, kwamambala iphasi alikakwazi+ kodwana mina ngiyakwazi+ nalaba bayazi ukuthi ungithumile. 26 Ngibazisile igama lakho begodu ngizolenza laziwe+ ukwenzela bona ithando ongithande ngalo libe kibo nokuthi ngimunye nabo.”+

18 Ngemva kokutjho izintwezi, uJesu waphuma nabafundi bakhe bayama uMrhoba weKidroni*+ baya lapho kunesimu khona begodu yena nabafundi bakhe bangena kiyo.+ 2 UJudasi, obekazomthengisa naye bekayazi indawo leyo ngombana esikhathini esinengi uJesu bekahlangana nabafundi bakhe lapho. 3 Yeke uJudasi waletha isiqhema samasotja nabonogada babaphristi abakhulu nebabaFarisi, beza baphethe iimbani neenkhali.+ 4 UJesu akwazi koke ebekuzokwenzeka kuye, wabandamela wathi kibo: “Nifuna ubani?” 5 Bamphendula bathi: “UJesu weNazaretha.”+ Wathi kibo: “Nginguye.” UJudasi, omthengisileko naye bekajame nabo lapho.+

6 UJesu nakathi kibo, “Nginguye,” babuyela emuva, bawela phasi.+ 7 Ngalokho wababuza godu: “Nifuna ubani?” Bathi: “UJesu weNazaretha.” 8 UJesu wathi kibo: “Nginitjelile ukuthi nginguye. Nje-ke nangabe nifuna mina, lisani amadoda la akhambe.” 9 Lokhu bekuzokuzalisa lokho akutjhoko nakathi: “Kilabo onginikele bona, angikalahlekelwa nangoyedwa.”+

10 USimoni Pitrosi, obekaphethe isabula, warharhabula isisebenzi somphristi ophakemeko, wasiqunta indlebe yangesidleni.+ Igama lesigqileso bekunguMalirhusi. 11 Yeke uJesu wathi kuPitrosi: “Faka isabula esikhwanyeni sayo.+ Akukafuzi na ngisele ikapho engiyinikelwe nguBaba?”+

12 Amasotja nenduna yawo nabonogada bamaJuda babamba uJesu bambopha. 13 Bathoma ngokumusa ku-Anasi ngombana bekamumukhwe kaKhayafasi,+ obekamphristi ophakemeko ngomnyaka loyo.+ 14 Eqinisweni, uKhayafasi nguye owaluleka amaJuda wathi, kuzuzisa wona ukuthi kufe umuntu munye afele boke abantu.+

15 USimoni Pitrosi nomunye umfundi, bebalandela uJesu.+ Umfundi loyo bekaziwa mphristi ophakemeko, wangena noJesu ngesirhodlweni somphristi ophakemeko 16 kodwana uPitrosi bekajame ngaphandle esangweni. Umfundi loya, obekaziwa mphristi ophakemeko, waphumela ngaphandle wakhuluma nomlindisango begodu wangenisa uPitrosi. 17 Isisebenzi somntazana ebesimlindisango sathi kuPitrosi: “Kghani nawe ungomunye wabafundi bendoda le?” Wathi: “Angisuye.”+ 18 Nje-ke iingqila nabonogada bebajame hlanu komlilo wamalahle abawubasileko, ngombana bekumakhaza begodu bebotha umlilo. UPitrosi bekajame nabo azifuthumeza.

19 Umphristi omkhulu wabuza uJesu ngabafundi bakhe nangefundiswakhe. 20 UJesu wathi kuye: “Ngikhulume nephasi tjhatjhalazi. Bengihlala ngifundisa esinagogeni nethempelini,+ lapho woke amaJuda ahlangana khona, akunalitho engilikhulume ngemsitheleni. 21 Kubayini ubuza mina? Buza labo abezwe lokho engibatjele khona. Laba bayakwazi engikukhulumileko.” 22 Ngemva kokutjho izintwezi, omunye wabonogada obekajame lapho wawahla uJesu ngepama ebusweni,+ wathi: “Yindlela ophendula ngayo umphristi omkhulu le?” 23 UJesu wamphendula wathi: “Nangabe kunento embi engiyikhulumileko, fakazela into embi leyo kodwana nangabe lokho engikukhulumileko kuliqiniso, ungibethelani?” 24 Yeke u-Anasi wamthumela abotjhiwe kuKhayafasi umphristi ophakemeko.+

25 USimoni Pitrosi bekajame lapho otha umlilo. Ngalokho bathi kuye: “Kghani nawe ungomunye wabafundi bakhe?” Waphika, wathi: “Angisuye.”+ 26 Omunye weensebenzi zomphristi ophakemeko, obekahlobana nomuntu loya uPitrosi amqunta indlebe,+ wathi: “Ngikubone esimini unaye, akusinjalo?” 27 Nanyana kunjalo, uPitrosi waphika godu khonokho umkukurumbu walila.+

28 Ngemva kwalokho basusa uJesu kuKhayafasi bamusa ngendlini yombusi.+ Bekusekuseni khulu. Kodwana bona akhenge bangene ngendlini yombusi, ukwenzela bona bangasilaphazeki+ kodwana bakghone ukudla iPhasika. 29 UPilatu waphumela ngaphandle waya kibo wathi: “Nimbeka muphi umlandu umuntu lo?” 30 Bamphendula bathi: “Ngathana umuntu lo akakenzi okumbi,* bengekhe simlethe kuwe.” 31 UPilatu wathi kibo: “Mthatheni nina nimgwebe ngokomthethwenu.”+ AmaJuda athi kuye: “Akukavumeleki ngathi bona sibulale umuntu.”+ 32 Lokhu bekuzokuzalisa ilizwi elakhulunywa nguJesu nakaveza indlela azokuhlongakala ngayo.+

33 UPilatu wangena ngendlini yombusi godu wabiza uJesu wathi kuye: “UyiKosi yamaJuda na?”+ 34 UJesu wamphendula wathi: “Umbuzo loyo usuka kuwe na namkha kunabantu abakutjele ngami?” 35 UPilatu wathi kuye: “AngisimJuda angithi? Isitjhaba sekhenu nabaphristi abakhulu bakulethe kimi. Wenzeni?” 36 UJesu wamphendula+ wathi: “UmBuswami awusiyingcenye yephaseli.+ Ngathana umBuswami bewuyingcenye yephaseli, abalandeli bami bebazokulwa bona nginganikelwa emaJudeni.+ Kodwana umBuswami awuveli emthonjeni lo.” 37 Ngalokho uPilatu wathi kuye: “Alo-ke, uyikosi na?” UJesu wamphendula wathi: “Wena ngokwakho uyatjho ukuthi ngiyikosi.+ Ngombana ngibelethelwe lokho begodu ngizele lokhu ephasini, bona ngifakazele iqiniso.+ Woke umuntu osehlangothini leqiniso uyalilalela ilizwi lami.” 38 UPilatu wathi kuye: “Liyini iqiniso?”

Ngemva kokutjho lokhu, waphumela ngaphandle godu waya emaJudeni, wathi kiwo: “Angifumani umlandu kuye.+ 39 Ukungezelela kilokho, ninesiko lokuthi kufuze nginitjhaphululele umuntu ngePhasika.+ Nifuna nginitjhaphululele iKosi yamaJuda na?” 40 Godu arhuwelela athi: “Ingasi umuntu lo, kodwana uBharabhasi!” UBharabhasi bekasilelesi.+

19 UPilatu wathatha uJesu wambetha.+ 2 Amasotja aluka isihlohlo sameva amthwesa sona, ambathisa nesambatho esisipiridzana,+ 3 bekasolo aya kuye athi: “Bayede, wena Kosi yamaJuda!” Godu asolo amwahla ngeempama ebusweni.+ 4 UPilatu waphumela ngaphandle godu wathi emaJudeni: “Qalani! Ngimkhuphela ngaphandle kini bona nazi ukuthi angifumani mlandu kuye.”+ 5 Yeke uJesu waphumela ngaphandle, athwele isihlohlo sameva ambethe nesambatho esisipiridzana. UPilatu wathi kiwo: “Nangu-ke umuntu lo!” 6 Nanyana kunjalo, kuthe abaphristi abakhulu nabonogada nabambonako, barhuwelela bathi: “Akabulawelwe esigodweni! Akabulawelwe esigodweni!”+ UPilatu wathi kibo: “Mthatheni nina niyombulala ngombana angifumani mlandu kuye.”+ 7 AmaJuda amphendula athi: “Thina sinomthetho begodu ngokomthethwethu kufuze afe+ ngombana uzenze indodana kaZimu.”+

8 UPilatu nakezwa lokho, wasaba khulu, 9 wangena ngendlini yombusi godu wathi kuJesu: “Uvelaphi?” UJesu azange amphendule.+ 10 Nje-ke uPilatu wathi kuye: “Awufuni ukungikhulumisa? Awazi na ukuthi nginamandla wokukutjhaphulula namandla wokukubulala?”* 11 UJesu wamphendula wathi: “Bengekhe ube namandla phezu kwami ngathana bewungakawanikelwa ezulwini. Kungakho umuntu onginikele kuwe anesono esikhulu kunesakho.”

12 Kungebangelo uPilatu bekasolo afunana nendlela yokumtjhaphulula kodwana amaJuda arhuwelela athi: “Nawungatjhaphulula umuntu lo, kutjho bona awusimngani kaKhesari. Nanyana ngubani ozenza ikosi uphikisana noKhesari.”+ 13 Ngemva kokuthi uPilatu ezwe lokho, waphumela noJesu ngaphandle, wahlala esihlalweni sokwahlulela endaweni ebizwa ngokuthi yiLithostrotosi* kodwana ngesiHebheru, yiGabatha. 14 Bekulilanga lokuLungiselela+ iPhasika; bekungaba yisimbi ye-12 ngamadina.* Wathi emaJudeni: “Qalani ikosenu!” 15 Nanyana kunjalo, arhuwelela athi: “Msuse! Msuse! Akatjhinge esigodweni!”* UPilatu wathi kiwo: “Ngibulale ikosenu na?” Abaphristi abakhulu baphendula bathi: “Ikosethu nguKhesari kwaphela.” 16 Wabanikela yena bona ayokubulawelwa esigodweni.+

Bamthatha-ke uJesu. 17 Azithwalele isigodo sokuhlunguphazwa,* waphuma watjhinga endaweni ekuthiwa yiNdawo yeKhakhayi,+ ngesiHebheru ibizwa ngokuthi yiGolgotha.+ 18 Bambethela esigodweni+ lapho namanye amadoda amabili, amphahlile, uJesu ahlangana nawo.+ 19 Godu uPilatu watlola umtlolo wawubeka esigodweni sokuhlunguphazwa.* Bewutlolwe ukuthi: “UJesu umNazaretha iKosi yamaJuda.”+ 20 AmaJuda amanengi awufunda umtlolo lo ngombana indawo uJesu ebekabethelwe kiyo esigodweni beyiseduze nedorobho, begodu bewutlolwe ngesiHebheru, ngesiLathini, nangesiGirigi. 21 Yeke, abaphristi abakhulu bamaJuda bathi kuPilatu: “Ungatloli ukuthi, ‘IKosi YamaJuda’ kodwana ukuthi yena wathi, ‘NgiyiKosi YamaJuda.’” 22 UPilatu waphendula wathi: “Engikutlolileko, ngikutlolile.”

23 Kwathi amasotja nasekaqedile ukubethela uJesu esigodweni, athatha izambatho zakhe zangaphandle azihlukanisa zaba ziingcenye ezine, isotja ngalinye lafumana ingcenye yinye, athatha nesambatho sakhe sangaphakathi. Kodwana isambatho sangaphakathi besinganamthungo, silukiwe kusukela phezulu kuya phasi. 24 Abonisana athi: “Asingasidabuli kodwana asenzeni ifumbe ukuqunta ukuthi sizokuba ngesakabani.”+ Lokho bekuzokuzalisa umtlolo othi: “Bahlukaniselana izambatho zami,+ benzelana ifumbe ngesambatho sami.” Ngambala amasotja azenza izintwezi.

25 Eduze nesigodo sokuhlunguphazwa* sakaJesu, bekujame unina+ nodadwabo kanina; uMariya umkaKlopasi noMariya Marhdalina.+ 26 UJesu nakabona unina nomfundi amthandako+ bajame eduze, wathi kunina: “Qala! Indodanakho!” 27 Ngokulandelako wathi emfundini loyo: “Qala! Unyoko!” Kusukela ngesikhatheso, umfundi loyo wamthatha wayokuhlala naye emzinakhe.

28 Ngemva kwalokhu uJesu nasekazi ukuthi zoke izinto seziphethekile bona kuzaliseke umtlolo wathi: “Ngomile.”+ 29 Khonapho bekunomjeka uzele iwayini elimunyu. Yeke bahloma isipontji esizele iwayini elimunyu emhlangeni wehisopi* basiphakamisela phezulu emlonyenakhe.+ 30 Ngemva kokufumana iwayini elimunyu, uJesu wathi: “Kuphethiwe!”+ Wakhothamisa ihloko, wahlongakala.+

31 Njengombana bekulilanga lokuLungiselela,+ amaJuda abawa uPilatu bona alayele ukuthi kuphulwe imilenze yabo neendumbu zabo zisuswe ukwenzela bona iindumbu zingazokuhlala eengodweni zokuhlunguphazwa+ ngelanga leSabatha (ngombana ilanga leSabathelo bekungelikhulu).+ 32 Nje-ke amasotja eza aphula imilenze yendoda yokuthoma neyendoda leya enye ebeyisesigodweni naye. 33 Kodwana nawafika kuJesu, abona ukuthi sekahlongakele, azange ayiphule imilenzakhe. 34 Kodwana elinye lamasotja lamhlaba ngomkhonto ehlangothini,+ kwaphuma iingazi namanzi. 35 Loyo okubonileko ufakaze ngakho begodu ubufakazi bakhe buliqiniso, uyazi nokuthi lokho akutjhoko kuliqiniso ukwenzela bona nani nikholwe.+ 36 Eqinisweni, izintwezi zenzeke bona kuzaliseke umtlolo othi: “Alikho nalinye ithambo lakhe elizokuphulwa.”+ 37 Godu omunye umtlolo uthi: “Bazomqala loyo abamhlabileko.”+

38 Ngemva kwalokhu, uJosefa we-Arimathiya, obekamfundi kaJesu kodwana angafuni ukuziveza ngombana asaba amaJuda,+ wabawa uPilatu bona amvumele athathe isidumbu sakaJesu, uPilatu wamvumela. Nje-ke weza wathatha isidumbu.+ 39 UNikhodemusi,+ indoda eyaya kuJesu ebusuku kokuthoma, naye weza, aphethe iinthako zemire nomarobazibukhali ezingaba makhilogremu ama-30.+ 40 Basithatha-ke isidumbu sakaJesu basiphuthela ngelineni namakha,+ ngokuvumelana nesiko lamaJuda lokubulunga. 41 Nje-ke, bekunesimu endaweni abulawelwe kiyo esigodweni begodu esimini leyo bekunethuna+ elitjha okungakhenge kulaliswe muntu kilo. 42 Ngebanga lokuthi bekulilanga lokuLungiselela+ lamaJuda begodu nethunelo beliseduze, balalisa uJesu lapho.

20 Ngelanga lokuthoma leveke, uMariya Marhdalina waya ethuneni ekuseni+ kusesemnyama, wabona ilitje egade livale ithuna* lisusiwe.+ 2 Yeke weza agijima waya kuSimoni Pitrosi nakomunye umfundi, loyo uJesu ebekamthanda,+ wathi kibo: “Bayithethe iKosi ethuneni,+ asazi ukuthi bayilalisephi.”

3 UPitrosi nomfundi loyo baphuma baya ethuneni. 4 Bobabili bathoma ukugijima kodwana umfundi loyo watjhiya uPitrosi ngebelo wafika qangi ethuneni. 5 Wahlola, wabona amatjhila welineni alapho+ kodwana akhenge angene. 6 Nje-ke kwafika noSimoni Pitrosi obekamlandela, wangena ngethuneni. Wabona amatjhila welineni alapho. 7 Itjhila ebelisehlokwakhe belingasi namanye amatjhila kodwana belisongiwe lisendawenalo lilodwa. 8 Umfundi loya owafika qangi ethuneni naye wangena, wabona begodu wakholwa. 9 Ngombana bebangakawuzwisisi umtlolo nawuthi kufuze avuke kwabafileko.+ 10 Yeke abafundaba babuyela emizinabo.

11 UMariya wasolo ajame ngaphandle eduze nethuna, alila. Asalila njalo, wahlola ngethuneni, 12 wabona iingilozi ezimbili+ zimbethe okumhlophe zihlezi lapha isidumbu sakaJesu besilaliswe khona, enye ihlezi ngehlokweni enye ihlezi ngeenyaweni. 13 Zathi kuye: “Mfazi, ulilelani?” Wathi kizo: “Bathethe iKosami, angazi ukuthi bayilalisephi.” 14 Ngemva kokutjho lokhu, waphenduka wabona uJesu ajame lapho kodwana akhenge alemuke ukuthi nguJesu.+ 15 UJesu wathi kuye: “Mfazi, ulilelani? Ufuna ubani?” UMariya acabanga ukuthi mtlhogomeli wesimu, wathi kuye: “Mnumzana, nangabe uyithethe, ngitjela ukuthi uyilalisephi, ngizakuya ngiyoyithatha.” 16 UJesu wathi kuye: “Mariya!” UMariya nakajikako, wathi kuye ngesiHebheru: “Raboni!” (okutjho ukuthi “Mfundisi!”) 17 UJesu wathi kuye: “Lisa ukungibamba ngombana angikakhuphukeli kuBaba. Kodwana khamba uye kubafowethu+ uthi kibo, ‘Ngikhuphukela kuBaba,+ uBabenu, kuZimami,+ uZimenu.’” 18 UMariya Marhdalina wayokutjela abafundi wathi: “Ngiyibonile iKosi!” Wabatjela lokho emtjele khona.+

19 Mhlokho ntambama, ngelanga lokuthoma leveke, iminyango beyilodlhelwe ngombana abafundi bebasaba amaJuda, uJesu wafika wajama phakathi kwabo wathi kibo: “Ukuthula akube nani.”+ 20 Ngemva kokutjho njalo, wabatjengisa izandla zakhe nehlangothi lakhe.+ Abafundi bathaba nababona iKosi.+ 21 UJesu godu wathi kibo: “Ukuthula akube nani.+ Njengombana uBaba angithumile+ nami ngiyanithuma.”+ 22 Ngemva kokutjho lokhu wabavuthela ngomoya wathi kibo: “Yamukelani ummoya ocwengileko.+ 23 Nangabe nilibalela izono zananyana ngubani zilitjalelwe, nangabe anizilibaleli izono zananyana ngubani, azikalitjalelwa.”

24 Kodwana uTomasi,+ omunye wabali-12 obekuthiwa liWele, bekangekho uJesu nakafikako. 25 Yeke abanye abafundi bebamtjela bathi: “Siyibonile iKosi!” Kodwana wathi kibo: “Ngaphandle kobana ngibone iimbobo zeempikiri ezandleni zayo, ngifake nomunwami eembotjeni zeempikiri, ngifake nesandla sami ehlangothini layo,+ angekhe ngikholwe.”

26 Ngemva kwamalanga abunane abafundi bakhe bebangendlini noTomasi bekanabo. UJesu weza wajama phakathi kwabo, ngitjho nanyana iminyango beyilodlhelwe, wathi: “Ukuthula akube nani.”+ 27 Wathi kuTomasi: “Faka umunwakho la, ubone nezandla zami bese uthatha isandla sakho usifake ehlangothini lami, ulise ukuzaza* kodwana ukholwe.” 28 UTomasi wathi kuye: “Kosami, Zimami!” 29 UJesu wathi kuye: “Ngombana ungibonile, uyakholwa? Bayathaba abakholwa bangakaboni.”

30 Kuliqiniso ukuthi uJesu wenza nezinye iimbonakaliso ezinengi phambi kwabafundi, ezingakatlolwa emsongweni lo.+ 31 Kodwana lezi zitlolwe phasi bona nikholwe ukuthi uJesu unguKrestu, iNdodana kaZimu begodu ngebanga lokukholwa nifumane ukuphila ngegama lakhe.+

21 Ngemva kwalokhu uJesu waziveza* godu ebafundini, eLwandle leThibheriyasi. Waziveza nganasi indlela. 2 Bekuhlangene uSimoni Pitrosi, uTomasi (obekuthiwa liWele),+ uNathaniyeli+ weKana yeGalile, amadodana kaZebediya+ nabanye babafundi bakhe ababili. 3 USimoni Pitrosi wathi kibo: “Ngisayokuthiya iinhlambi.” Bathi kuye: “Sikhamba nawe.” Baphuma bangena ngesikepeni kodwana phakathi nobusukobo akhenge babambe litho.+

4 Nanyana kunjalo, kuthe nakusako, uJesu wajama eligwini kodwana abafundi akhenge balemuke ukuthi nguJesu.+ 5 UJesu wathi kibo: “Bantwana, aninakho okudliwako na?”* Baphendula bathi: “Awa!” 6 Wathi kibo: “Phoselani inede ngesidleni sesikepe, nizokufumana okuthileko.” Bayiphosa kodwana babhalelwa kuyidosa ngebanga leenhlambi ezinengi abazibambileko.+ 7 Umfundi obekathandwa nguJesu+ wathi kuPitrosi: “YiKosi!” USimoni Pitrosi, nakezwa ukuthi yiKosi, wambatha isambatho sakhe sangaphandle ngombana bekangakambathi ngokupheleleko, waziphosa ngelwandle. 8 Kodwana abanye abafundi beza ngesikepe esincani, badosa inede ezele iinhlambi ngombana bebangasikude neligu, bekungaba mamitha ama-90.*

9 Nabaphumela eligwini, babona umlilo wamalahle phezu kwawo kuneenhlambi noburotho. 10 UJesu wathi kibo: “Lethani ezinye zeenhlambi eniqeda ukuzibamba.” 11 USimoni Pitrosi wakhwela esikepeni, wadosela inede elizele iinhlambi ezikulu eligwini, bezili-153. Nanyana bezizinengi, inede akhenge idabuke. 12 UJesu wathi kibo: “Yenize nizokudla.” Akakho namunye ebafundini owaba nesibindi sokumbuza ukuthi: “Ungubani?” Ngombana bebazi ukuthi yiKosi. 13 UJesu weza wathatha uburotho, wabanikela sona, wenza okufanako nangeenhlambi. 14 Leli besekulihlandla lesithathu+ uJesu abonakala ebafundini ngemva kokuthi avuswe kwabafileko.

15 Nasebaqede ukudla, uJesu wathi kuSimoni Pitrosi: “Simoni ndodana kaJwanisi, ungithanda ukudlula lokhu?” Wamphendula wathi: “Iye Kosi, uyazi ukuthi ngiyakuthanda.” UJesu wathi kuye: “Yondla izimvana zami.”+ 16 Godu wathi kuye ihlandla lesibili: “Simoni ndodana kaJwanisi, uyangithanda na?” Waphendula wathi: “Iye Kosi, uyazi ukuthi ngiyakuthanda.” UJesu wathi kuye: “Lusa izimvana zami.”+ 17 Wathi kuye ihlandla lesithathu: “Simoni ndodana kaJwanisi, uyangithanda na?” UPitrosi wabalisizi nakezwa ukuthi sekambuze ihlandla lesithathu ukuthi: “Uyangithanda na?” Ngalokho wathi kuye: “Kosi, wazi zoke izinto; uyazi ukuthi ngiyakuthanda.” UJesu wathi kuye: “Yondla izimvana zami.+ 18 Ngiqinisile ngithi kuwe, nawusesemutjha, bewuthanda ukuzimbathisa, ukhambe uye lapho bewufuna ukuya khona. Kodwana nasele uluphele, uzokuthabulula izandla zakho begodu omunye umuntu uzokumbathisa, akuse lapho ungafuni khona.” 19 UJesu watjho lokhu ukutjengisa indlela uPitrosi azokufa ngayo aphazimulise uZimu. Ngemva kokutjho lokho, wathi kuye: “Ragela phambili nokungilandela.”+

20 UPitrosi waphenduka, wabona umfundi obekathandwa nguJesu+ alandela, loya owayama esifubeni sakaJesu esidlweni santambama, wathi: “Kosi, ngubani okuthengisako?” 21 Nakambonako, uPitrosi wathi kuJesu: “Kosi, uthini ngendoda le?” 22 UJesu wathi kuye: “Nangabe yintandwami bona ahlale aphila bengibuye, lokho kukutshwenya ngani? Wena ragela phambili nokungilandela.” 23 Yeke indaba le yarhatjheka ebafundini ukuthi umfundi lo angekhe ahlongakale. Kodwana uJesu akhenge athi kuye angekhe ahlongakala, uthe: “Nangabe yintandwami bona ahlale aphila bengibuye, lokho kukutshwenya ngani?”

24 Umfundi lo+ nguye ofakaza ngezintwezi nowatlola izintwezi begodu siyazi ukuthi ubufakazi bakhe buliqiniso.

25 Eqinisweni kunezinye izinto ezinengi ezenziwa nguJesu, ngathana zatlolwa ngokuzeleko, ngicabanga ukuthi ngitjho nephasi loke bengekhe lakghona ukuthwala imisongo ebeyingatlolwa.+