INCWADI YESIBILI EYA KWEBEKORINTE

1 UPowula, umpostoli kaKrestu Jesu ngentando kaZimu noThimothi+ umfowethu, ebandleni lakaZimu eliseKorinte, kuhlanganise nabo boke abacwengileko abakiyo yoke i-Akhaya:+

2 Kwanga ningaba nomusa omkhulu nokuthula okuvela kuZimu uBabethu neKosi uJesu Krestu.

3 Akadunyiswe uZimu noBaba weKosethu uJesu Krestu,+ uBaba wesirhawu+ noZimu wayo yoke induduzo,+ 4 osiduduza* kilo loke isizi lethu*+ bona sikghone ukududuza abanye+ kinanyana ngiliphi isizi* ngenduduzo esiyifumana kuZimu.+ 5 Njengombana ukutlhaga ngebanga lakaKrestu kukunengi kithi,+ yeke nenduduzo esiyifumana ngoKrestu yinengi. 6 Nje-ke nangabe siqalana nesizi,* kungebanga lokududuzwa nokusindiswa kwenu; begodu nasiduduzwako, kungebanga lokududuzwa kwenu, okunisiza nikghodlhelele imitlhago efana nesiqalana nayo. 7 Siyanithemba begodu siyazi ukuthi njengombana nani nitlhaga njengathi, nizokududuzwa njengathi.+

8 Asifuni bona ningazi bafowethu ngesizi esaqalana nalo esifundeni se-Asiya.+ Besigandeleleke khulu kwaba ngaphezu kwamandlethu, kangangobana besiqiniseka ngokuthi sizokufa.+ 9 Eqinisweni sazizwa ngasuthi sifumene isigwebo sokufa. Lokho kwenzeka bona singazithembi thina kodwana sithembe uZimu+ ovusa abafileko. 10 Wasisindisa engozini ekulu yokufa begodu usazosisindisa, sithembele kuye ukuthi uzokuragela phambili asisindisa.+ 11 Nani ningasisiza ngokusibawela,+ ukuthi abanengi basithokozele ngomusa esiwufumene ngebanga lemithandazo yabanengi.+

12 Ngombana into esizikhakhazisa ngayo kukobana unembezethu ufakazela ukuthi ephasini, khulukhulu kini saziphatha ngokucwengeka nangokuthembeka okuvela kuZimu, ingasi ngokuhlakanipha kwenyama+ kodwana ngomusa omkhulu kaZimu. 13 Asinitloleli ezinye izinto ngaphandle kwalokho eningakufunda* neningakuzwisisa, ngithemba bona nizokuragela phambili nizwisisa izintwezi ngokuzeleko* 14 njengombana nani nizwisise ngokwezinga elithileko ukuthi singunobangela wokuzikhakhazisa kwenu njengombana nani nizokuba ngunobangela wokuzikhakhazisa kwethu ngelanga leKosethu uJesu.

15 Ngombana bengiqiniseka ngalokhu, benginqophe ukuthoma ngize kini, bona nibe nethuba lesibili lokuthi nithabe godu,* 16 benginqophe ukunivakatjhela nangiya eMasedoniya begodu ngibuyele kini nangisuka eMasedoniya bese ningiphekelele eJudiya.+ 17 Nangiba nomnqopho onjalo, akhenge ngiyithathe lula indaba le, kghani akusinjalo? Namkha ngihlosa izinto ngendlela yenyama bona ngithi “Iye, iye” bese ngithi “Awa, awa”? 18 UZimu uthembekile nesikutjhoko kuthembekile, angekhe sithi “iye” ibe kungu-“awa.” 19 Indodana kaZimu uKrestu Jesu, loyo thina okungimi, uSilvanu* noThimothi+ esatjhumayela ngaye kini, akhenge abe ngu-“iye” ibe kungu-“awa” kodwana kuye u-“iye” ube ngu-“iye.” 20 Nanyana zizinengi kangangani iinthembiso zakaZimu, zibe ngu-“iye” ngaye.+ Ngaye sithi “Amen” kuZimu+ bona simdumise. 21 Kodwana nguZimu oqinisekisako ukuthi nina nathi singebakaKrestu begodu nguye osizesileko.+ 22 Ubeke netshwayo lakhe phezu kwethu+ begodu usinikele isiqinisekiso salokho okuzako,* okumumoya+ eenhliziyweni zethu.

23 Nje-ke ngibiza uZimu abe ngufakazi wokobana angikezi eKorinte bekube nje ngombana ngifuna ukuphephisa nina. 24 Asitjho ukuthi simakhosi phezu kokukholwa kwenu+ kodwana siziinsebenzi ezikunye nani ukuthi nithabe ngombana kungebanga lokukholwa kwenu bona nisajamile.

2 Ngenze isiqunto sokobana ngingaseza kini ngidanile godu. 2 Ngombana nanginidanisako, ngubani ozongithabisa ngaphandle kwaloyo engimdanisileko? 3 Ngitlole engikwenzileko bona nangizako ngingadani ngebanga lenu kodwana ngithabe ngombana ngiyaqiniseka ukuthi okungilethela ithabo, kunilethela noke ithabo elifanako. 4 Ngombana nganitlolela ngeenyembezi ezinengi ngitshwenyekile begodu ngisebuhlungwini obukhulu, ingasi bona nginidanise+ kodwana bona nginazise ukuthi nginithanda kangangani.

5 Nje-ke nakunomuntu obangele ukudana,+ akakadanisi mina kodwana unidanise noke ngokwezinga elithileko ingasi bona ngifuna ukuba nelunya khulu kilokho engikutjhoko. 6 Ukukhalimokhu okunikelwe linengi kumanele umuntu onjalo 7 kufuze nimlibalele ngomusa begodu nimduduze,+ ukuthi angahlulwa kudana okudluleleko.+ 8 Ngalokho nginikhuthaza bona nimqinisekise ukuthi niyamthanda.+ 9 Ngombana leli libanga elenza nganitlolela godu: Ukuqinisekisa ukuthi nizokunikela ubufakazi bokulalela kwenu ezintweni zoke. 10 Kilabo enibalibalelako nami ngiyabalibalela. Eqinisweni, nanyana yini engiyilibaleleko (nangabe kunengikulibaleleko) yenziwe ngebanga lenu phambi kwakaKrestu, 11 bona singabanjwa nguSathana+ ngombana siyawazi amaqhingakhe.*+

12 Nangifika eTrowasi+ bona ngimemezele iindaba ezimnandi malungana noKrestu begodu ngavulelwa nomnyango eKosini, 13 ummoyami akhenge uzizwe utjhaphulukile ngebanga lokungafumani uTitosi+ umfowethu. Nje-ke ngabalayelisa ngasuka ngaya eMasedoniya.+

14 Akuthokozwe uZimu, ohlala asinqophisa njengamasotja asekhambweni lokubukisa ukuthumba epini sikunye noKrestu begodu ngathi, wenze ilwazi lakhe laziwa kiyo yoke indawo njengephunga elimnandi! 15 Ngombana kuZimu siliphunga elinuka kamnandi lakaKrestu hlangana nalabo abasindisiweko nahlangana nalabo abatjhabalalako; 16 kilabo abatjhabalalako siliphunga lokufa elidosela ekufeni,+ kilabo abasindisiweko siliphunga lokuphila elidosela ekuphileni. Ngubani ozifanelekela kuhle izintwezi? 17 Ngithi esizifanelekelako ngombana asisibathengisi belizwi* lakaZimu+ njengombana abantu abanengi benza, sikhuluma ngakho koke ukuthembeka njengabathunywe bavela kuZimu bakunye noKrestu.

3 Kghani sithoma ukuzibuka godu? Namkha njengabanye abantu sitlhoga iincwadi zokusibuka eziza kini namkha ezivela kini? 2 Nina ngokwenu niyincwadethu+ etlolwe eenhliziyweni zethu begodu eyaziwako nefundwa ngibo boke abantu. 3 Ngombana nibonakaliswa niyincwadi kaKrestu etlolwe ngithi iinsebenzi,+ engakatlolwa nge-enke kodwana ngommoya kaZimu ophilako, engakatlolwa ematjeni+ kodwana eenhliziyweni.+

4 NgoKrestu uZimu usenze saqiniseka ngalokhu. 5 Asitjho bona thina singenza umsebenzi lo ngokwethu kodwana uZimu nguye osisizako bona senze umsebenzi lo,+ 6 nguye osenza sikufanelekele ngokwaneleko ukuba ziinsebenzi zesivumelwano esitjha,+ ingasi zomthetho otloliweko+ kodwana zommoya ngombana umthetho otloliweko ugwebela ukufa+ kodwana ummoya uyaphilisa.+

7 Nje-ke nangabe umThetho oletha ukufa nowatlolwa ematjeni+ weza ngephazimulo ekulu kangangobana abantwana bakwa-Israyeli akhenge bakghone ukuqala ubuso bakaMosi ngebanga lephazimulo esebusweni bakhe,+ iphazimulo ebeyizokuqedwa, 8 kubayini ukusebenza kommoya+ kungabi ngephazimulo ekulu ukudlula le?+ 9 Ngombana nangabe umthetho okhupha isigwebo+ bewuphazimula,+ uzokuphazimula kangangani umsebenzi osiza abantu babe ngabalungileko.+ 10 Eqinisweni, ngitjho nalokhu okwakhe kwenziwa kwaphazimula, kuthathelwe iphazimulo ngebanga lephazimulo edlula lokho.+ 11 Ngombana nangabe lokho ebekuzokuqedwa kwalethwa ngephazimulo,+ qala bona beyizokuba yikulu kangangani iphazimulo yalokho okusalako!+

12 Njengombana sinethemba elinjalo+ sisebenzisa itjhaphuluko ekulu yokukhuluma 13 begodu asenzi okwenziwa nguMosi nakathatha itjhila azigubuzese ngalo ubuso bakhe+ bona abantwana bakwa-Israyeli bangasolo baqale ekupheleni kwalokho ebekuzokupheliswa. 14 Kodwana imikhumbulwabo yafiphazwa.+ Ngombana bekube kunamhlanjesi, isigubuzeso esifanako sihlala singakasuswa lokha nakufundwa isivumelwano esidala,+ sisuswa kwaphela ngoKrestu.+ 15 Eqinisweni bekube kunamhlanjesi, nanyana kunini nakufundwa imitlolo kaMosi,+ isigubuzeso siba phezu kweenhliziyo zabo.+ 16 Kodwana umuntu nakatjhugulukela kuJehova,* isigubuzeso siyasuswa.+ 17 Nje-ke uJehova* Mmoya+ begodu lapho kunommoya kaJehova* khona, kunetjhaphuluko.+ 18 Soke njengombana sisesenobuso obungakagutjuzeswa sibonakalisa iphazimulo kaJehova* njengeemboniboni, sitjhugululelwa emfanekisweni ofanako ukusuka kwenye iphazimulo kuye kwenye njengombana yenziwa nguJehova* uMmoya.*+

4 Nje-ke njengombana sinomsebenzi lo ngebanga lomusa esenzelwe wona, asipheli amandla. 2 Kodwana silahle izinto eziphathisa iinhloni, nezinto ezenzelwa ngemsitheleni, akhenge sikhambe ngobuqili namkha sihlanekele ilizwi lakaZimu+ kodwana ngokwenza iqiniso libonakale, siyazinyula kibonembeza babo boke abantu phambi kwakaZimu.+ 3 Eqinisweni, nangabe iindaba ezimnandi esizimemezelako zigutjuzesiwe, zigutjuzeswe hlangana nalabo abatjhabalalako, 4 kibo, uzimu wephaseli+ uphophaze imikhumbulo yabangakholwako+ bona ukukhanya kweendaba ezimnandi eziphazimulako ezimalungana noKrestu, omfanekiso kaZimu,+ kungakhanyi.+ 5 Ngombana asitjhumayeli ngathi kodwana sitjhumayela ngoJesu Krestu oyiKosi nangathi esiziingqila zenu ngebanga lakhe. 6 Ngombana uZimu nguye owathi: “Ukukhanya akukhanye ebumnyameni”+ begodu yena ukhanye eenhliziyweni zenu bona abakhanyisele+ ngephazimulo yelwazi lakaZimu ngobuso bakaKrestu.

7 Nanyana kunjalo, sinegugweli+ ezitjeni zebumba*+ ukuthi amandla angaphezu kajayelekileko abe ngavela kuZimu ingasi kithi.+ 8 Sigandelelwe ngazo zoke iindlela kodwana asikaminyaniswa kangangobana singakghoni ukusikinyeka; sirarekile kodwana akutjho bona asinandlela yokuphuma;*+ 9 siyahlunguphazwa kodwana asilahlwa;+ sidulwa phasi kodwana asitjhatjalaliswa.+ 10 Qobe emzimbenethu sikghodlhelela ukuphathwa ngendlela ebangela ukufa, leyo uJesu aphathwa ngayo,+ ukuthi ukuphila kwakaJesu nakho kubonakaliswe emzimbenethu. 11 Ngombana thina senziwa siqalane poro nokufa+ ngebanga lakaJesu, bona ukuphila kwakaJesu kubonakaliswe enyamenethu efako. 12 Nje-ke ukufa kuyasebenza kithi kodwana kini kusebenza ukuphila.

13 Ngombana sinommoya wokukholwa onjengalowo okutlolwe ngawo ukuthi: “Ngakholwa ngalokho ngakhuluma,”+ nathi siyakholwa ngalokho siyakhuluma, 14 siyazi ukuthi loyo owavusa uJesu, uzosivusa nathi kunye noJesu begodu uzosethula sikunye nani.+ 15 Ngombana zoke izinto zingebanga lenu, ukuthi ukwanda komusa omkhulu kube kunengi khudlwana ngombana abanye abanengi bayathokoza ephazimulweni kaZimu.+

16 Nje-ke asipheli amandla kodwana nangabe umuntu esinguye ngaphandle uyonakala, ngokuqinisekileko umuntu esinguye ngaphakathi uyavuseleleka ilanga nelanga. 17 Nanyana isizi lingelesikhatjhana* begodu lilincani, liveza iphazimulo ekulu khulu kithi nengapheliko+ 18 njengombana sidzimelelisa amehlwethu, ingasi ezintweni ezibonwako kodwana ezintweni ezingabonwako.+ Ngombana izinto ezibonwako ngezesikhatjhana kodwana izinto ezingabonwako zingezingapheliko.

5 Siyazi ukuthi nangabe indlwethu yephasini, itendeli, iyagirizwa,+ sizokuba nomakhiwo ovela kuZimu, indlu engakenziwa ngezandla+ ehlala ngokungapheliko ezulwini. 2 Ngendlini le siyabubula kwamambala, sifuna ukumbatha indlwethu evela ezulwini,+ 3 nasiyimbathako angekhe sifunyanwe sihlubule. 4 Thina abangetendeneli siyabubula, sithwele budisi ngombana asifuni ukuyihlubula le kodwana sifuna ukumbatha leya enye,+ bona lokho okufako kuginywe kuphila.+ 5 Nje-ke nguZimu osilungiselele lokhu,+ osinikele ummoya bona usiqinisekise ngalokho okuzako.+

6 Ngalokho sihlala sinesibindi khulu begodu sazi ukuthi ikhaya lethu nalisesemzimbeni lo, asikho eKosini+ 7 ngombana sikhamba ngokukholwa, asikhambi ngokubona. 8 Sinesibindi khulu begodu singanyula ukungabi khona emzimbeni lo, siyokuhlala neKosi lapho ikhona.+ 9 Nje-ke nanyana sisekhaya nayo namkha singasinayo, silwela ukuthi samukeleke kiyo. 10 Ngombana soke kufuze sivele phambi kwesihlalo sokwahlulela sakaKrestu, ukuze ngamunye abuyiselwe ngokwalokho akwenzileko nakasesemzimbeni lo, kungaba ngokuhle namkha okumbi.+

11 Nje-ke njengombana sikwazi ukusaba iKosi, sisolo senza abantu basikholwe kodwana uZimu usazi kuhle. Nanyana kunjalo, ngithemba bona nabonembeza benu basazi kuhle. 12 Asizibuki kini godu kodwana sininikela isizathu sokuzikhakhazisa ngathi, ukuze nikghone ukuphendula labo abazikhakhazisa ngokuqaleka kwangaphandle+ ingasi ngokwalokho okusehliziyweni. 13 Ngombana nangabe besirhapha,+ besirhaphela uZimu; nangabe besiphile kuhle emkhumbulweni, besikwenzela nina. 14 Ithando uKrestu analo liyasiraga ngombana siswaphelise ngokuthi, umuntu munye wabafela boke,+ nje-ke boke bafile. 15 Wafela boke bona labo abaphilako bangasaziphileli+ kodwana baphilele loyo owabafelako begodu wavuswa.

16 Nje-ke kusukela nje asazi muntu ngombono wenyama.+ Ngitjho nanyana kungenzeka ukuthi khesazi uKrestu ngokwenyama, ngokuqinisekileko asisamazi ngendlela leyo.+ 17 Yeke nangabe umuntu usebunyeni noKrestu, uyindalo etja,+ izinto ezidala zidlulile, qalani sekube nezinto ezitja. 18 Kodwana zoke izinto zivela kuZimu osenze sabuyisana naye ngoKrestu,+ wasinikela nomsebenzi wokubuyisana,+ 19 okutjho bona uZimu bekenza iphasi libuyisane naye ngoKrestu,+ akhenge abale imitjhaphwalo,+ wasiphathisa nomlayezo wokubuyisana.+

20 Nje-ke sibazenda+ abajamele uKrestu,+ ngasuthi uZimu uncenga ngathi. Njengabajameli bakaKrestu, siyancenga sithi: “Buyisanani noZimu.” 21 Loyo obekangasazi isono,+ wenziwa umnikelo wesono ngebanga lethu bona ngaye sibe kulunga kwakaZimu.+

6 Njengombana sisebenza naye,+ sikhuthaza nani bona ningamukeli umusa omkhulu kaZimu bese nilahlekelwe mnqophwawo.+ 2 Ngombana uthi: “Ngesikhathi esamukelekako ngikuzwile begodu ngakusiza ngelanga lesindiso.”+ Qalani! Nje sikhathi esamukeleka ngokukhethekileko. Qalani! Nje lilanga lesindiso.

3 Asinikeli ibanga lokuwa ngananyana ngiyiphi indlela, bona umsebenzethu ungafumaneki unomtjhapho+ 4 kodwana ngazo zoke iindlela sizibiza ngokuthi siziinsebenzi zakaZimu,+ ngokukghodlhelela okukhulu, ngamatshwenyeko, ngeenkhathi zokuba dududu, ngobudisi,+ 5 ngokudulwa, ngokudlhunywa emajele,+ ngemiguruguru, ngokusebenza budisi, ngokuphilelwa, ngeenkhathi zokutlhoga ukudla,+ 6 ngobumsulwa, ngelwazi, ngokubekezela,+ ngomusa,+ ngommoya ocwengileko, ngethando elinganabuzenzisi,+ 7 ngekulumo eliqiniso, ngamandla kaZimu;+ ngeenkhali zokulunga+ ngesandleni sokudla* nangesinceleni,* 8 ngephazimulo nangehlazo, ngombiko omumbi nangombiko omuhle. Siqalwa njengabakhohlisi kodwana sineqiniso, 9 siqalwa njengabangaziwako kodwana siyaziwa, siqalwa njengabafanelwe kukufa kodwana siyaphila,+ siqalwa njengabajezisiweko kodwana asikabulawa,+ 10 siqalwa njengabasesizini kodwana sihlala sithabile, siqalwa njengabatlhagako kodwana senza abanengi banjinge, siqalwa njengabanganalitho kodwana sinazo zoke izinto.+

11 Sivule umlomethu bona sikhulume* nani maKorinte, sanivulela neenhliziyo zethu. 12 Asikalinganiselwa endleleni esinithanda ngayo+ kodwana nina nilinganiselwe endleleni enisithanda ngayo. 13 Yeke nangiphendulako ngikhuluma ngasuthi ngikhuluma nabantwabami, nani vulani iinhliziyo zenu.+

14 Ningabotjhelwa ejogini linye* nabangakholwako.+ Ngombana kunabudlelwana buphi ukulunga nokungalungi na?+ Namkha kunokwabelana kuphi ukukhanya nobumnyama?+ 15 Ngaphezu kwalokho, kunakuphi ukuvumelana hlangana kwakaKrestu noBheliyara?*+ Namkha umuntu othembekileko ufana ngani nongakholwako?+ 16 Ithempeli lakaZimu linakuphi ukuvumelana neenthombe?+ Ngombana silithempeli lakaZimu ophilako+ njengombana uZimu atjhwile: “Ngizokuhlala hlangana nabo,+ ngikhambe hlangana nabo, ngizokuba nguZimabo bona bazokuba babantu bami.”+ 17 “‘Yeke phumani hlangana nabo, nizihlukanise,’ kutjho uJehova,* ‘nilise ukukghwatha into engakahlwengeki’”;+ “‘ngizonamukela.’”+ 18 “‘Ngizokuba ngubaba kini,+ nina nizokuba madodana namadodakazi kimi,’+ kutjho uJehova* uMninimandla Woke.”

7 Nje-ke njengombana sineenthembiswezi+ bathandekako, asizihlambululeni kikho koke ukusilaphala kwenyama nokommoya,+ siphelelise ukucwengeka ekusabeni uZimu.

2 Senzelani indawo eenhliziyweni zenu.+ Asikoni muntu, asikonakalisi muntu, asikasizakali ngamuntu.+ 3 Angitjho lokhu bona nginigwebe. Ngombana ngitjhwile phambilini ukuthi niseenhliziyweni zethu bona sife ndawonye begodu siphile ndawonye. 4 Ngitjhaphulukile ukukhuluma nani. Ngizikhakhazisa khulu ngani. Ngizele induduzo, ngithaba khulu kikho koke ukutlhaga kwethu.+

5 Nasifika eMasedoniya+ imizimbethu akhenge ikufumane ukuphumula kodwana saragela phambili nokutlhaga ngazo zoke iindlela bekunokulwa ngaphandle, kunokusaba ngaphakathi. 6 Kodwana uZimu oduduza abadanileko,+ usiduduzile ngokuba khona kwakaTitosi 7 ingasi ngokuba khona kwakhe kwaphela kodwana nangenduduzo ayifumene ngebanga lenu njengombana asibikele ngendlela eningihlulukele ngayo, isizi lenu, ukutshwenyeka kwenu ngami, nje-ke ngathaba khulu.

8 Ngitjho nanyana nganidanisa ngencwadami,+ angizisoli. Ngitjho nanyana ngazisola ekuthomeni (ngiyabona ukuthi incwadi leya inidanisile, nanyana bekungokwesikhatjhana kwaphela), 9 nje ngiyathaba, ingasi ngombana benidanile kodwana ngombana ukudana kwenze bona nitjhuguluke. Benidane ngendlela ethabisa uZimu, ukuze ningalimali ngebanga lethu. 10 Ngombana ukudana ngendlela ethabisa uZimu kwenza abantu batjhiye izono zabo+ bafumane isindiso kodwana ukudana kwephasi kuveza ukufa. 11 Qalani bona ukudana ngendlela ethabisa uZimu kuveze ukuzinikela okukhulu kini, kuveze ukuzihlwengisa, ukusilingeka, ukwesaba, isifiso esinamandla, ukukhuthala, ukulungisa okungakalungi!+ Kikho koke lokhu nizibonakalise nicwengile* endabeni le. 12 Nanyana nganitlolela, akhenge ngitlole ngebanga laloyo owenze okumbi,+ namkha ngebanga laloyo owoniweko kodwana bona itjisekwenu ngathi yenziwe ibonakale hlangana nani phambi kwakaZimu. 13 Kungebangelo siduduzekile.

Kodwana ukungezelela enduduzwenethu, sathaba khulu ngebanga lokuthi uTitosi uthabile ngombana noke navuselela ummoyakhe. 14 Nangabe ngizikhakhazise ngani kuye, akhenge ngiphathiswe iinhloni kodwana njengombana zoke izinto esanitjela zona beziliqiniso, nokuzikhakhazisa kwethu kuTitosi kubonakale kuliqiniso. 15 Godu unithanda khulu nakakhumbula ukulalela kwenu noke+ nendlela enamamukela ngayo ngokwesaba nangokuhlengezela. 16 Ngiyathaba ngokuthi ngiyanithemba* ngazo zoke iindlela.

8 Nje-ke bafowethu, sifuna nazi ngomusa omkhulu kaZimu owenzelwe amabandla weMasedoniya.+ 2 Ngesikhathi sokulingwa okukhulu ngaphasi komtlhago, ithabo labo elikhulu nokungabi nalitho kwabo okukhulu kwenza bona baphe khulu. 3 Ngombana benza ngokusemandlenabo,+ kuhlekuhle ngiyafakaza ukuthi bekungaphezu kwamandlabo,+ 4 kukulapho bona ngokwabo ngokuzisukela kibo basolo basirabhela ukuthi babe nelungelo lokupha ngomusa bona bahlanganyele emsebenzini wokusiza abacwengileko.+ 5 Benze okungaphezu kwalokho ebesikulindele kibo ngombana kokuthoma bazinikela eKosini nakithi ngokuvumelana nentando kaZimu. 6 Ngalokho sakhuthaza uTitosi+ ukuthi njengombana athoma umsebenzi lo hlangana nani, kufuze aqedelele ukubuthelela isipho senu somusa. 7 Nanyana kunjalo njengombana ninothile ngakho koke, ngokukholwa, ngelizwi, ngelwazi, nangakho koke ukuthembeka nethandweni lethu ngani, kwanga ninganotha nekupheni komusokhu.+

8 Angitjho lokhu bona nginibekele umthetho kodwana bona nginenze nazi ngokuthembeka kwabanye begodu ngilinge nokuthembeka kwethando lenu. 9 Ngombana niyawazi umusa omkhulu weKosethu uJesu Krestu, ukuthi nanyana bekanothile watlhaga ngebanga lenu+ bona ninothe ngokutlhaga kwakhe.

10 Kilokhu ngibeka lami lobubodlhana:+ Lokhu kuzuzisa nina njengombana sekudlule umnyaka ningakathomi isenzwesi kwaphela kodwana natjengisa nesifiso sokusenza. 11 Nje-ke, qedelelani nalokho enikuthomileko, ukuthi ukulungela kwenu ukunikela kuqedelelwe ngokuya ngokwalokho eninakho. 12 Ngombana nangabe ukulungela kukhona qangi, kwamukeleka ngokukhethekileko ngokwalokho umuntu anakho,+ ingasi ngokwalokho umuntu anganakho. 13 Ngombana angifuni ukukwenza kube bulula kwabanye kodwana kube budisi kini 14 kodwana ngokulinganisa, inala yenu yanje iqede ukutlhoga kwabo, bona nenala yabo iqede ukutlhoga kwenu bona nibe nokulinganako. 15 Kutloliwe ukuthi: “Umuntu obe nokunengi azange abe nokunengi ngokudluleleko, nomuntu obe nokuncani azange abe nokuncani ngokudluleleko.”+

16 Nje-ke sithokoza uZimu ngokuthi uTitosi unendaba nani njengathi+ 17 ngombana usabelile esikhuthazweni kodwana njengombana akhuthele, uzozizela kini. 18 Kodwana sithumela kunye naye umfowethu loyo idumo lakhe ngokuphathelene neendaba ezimnandi elirhatjhekele kiwo woke amabandla. 19 Ingasi lokho kwaphela kodwana wakhethwa mabandla ukuthi abe mkhambisanethu njengombana sidlulisela isipho somusesi bona kuphazinyuliswe iKosi begodu kube bufakazi bokuzimisela kwethu ukusiza. 20 Ngalokho sigegeda bona kungabi nomuntu ozosibona iphoso malungana nomnikelo wesihle esiwukhambisako lo.+ 21 Ngombana ‘sitlhogomela yoke into ngokuthembeka, ingasi phambi kwakaJehova* kwaphela kodwana naphambi kwabantu.’+

22 Ngaphezu kwalokho, sithumela kunye nabo umfowethu esimhlole kanengi samfumana akhuthele ezintweni ezinengi kodwana nje sekakhuthele ukudlula phambilini ngebanga lokunithemba kwakhe okukhulu. 23 Nangabe kunombuzo malungana noTitosi, mkhambisanami* nesisebenzi engikunye naso bona kuzuze nina; namkha nangabe kunemibuzo ngabafowethu, babapostoli bamabandla nephazimulo kaKrestu. 24 Nje-ke tjengisani ubufakazi bokuthi niyabathanda,+ nitjengise namabandla ukuthi kubayini besizikhakhazisa ngani.

9 Malungana nomsebenzi owenzelwa abacwengileko,+ akutlhogeki bona nginitlolele 2 ngombana ngiyakwazi ukuzimisela kwenu engizikhakhazisa ngakho ebantwini beMasedoniya, ukuthi i-Akhaya sekumnyaka izilungiselele begodu ukukhuthala kwenu kukhuthaze inengi labo. 3 Kodwana ngithumela abafowethu, bona ukuzikhakhazisa kwethu ngani kungabonakali kulilize endabeni le nokuthi nikulungele kwamambala njengombana ngatjho ukuthi nizokulungela. 4 Nakungasinjalo, beMasedoniya nabeza nami banifumane ningakakulungeli, thina nani sizokuphathwa ziinhloni ngokunithemba kwethu. 5 Nje-ke ngicabange bona kuyatlhogeka ngikhuthaze abafowethu bona beze kini kusesenesikhathi, balungise isipho senu esikhulu somusa enisithembise kusesengaphambili, ukuthi isiphwesi sibe sesilungile njengesipho somusa ingasi njengokuthileko okudlelezelweko.

6 Malungana nalokhu, loyo otjala kancani uzokuvuna kancani, naloyo otjala okunengi uzokuvuna okunengi.+ 7 Omunye nomunye akenze njengombana aquntile ehliziywenakhe, ingasi ngokuzikhuja namkha ngokukatelelwa+ ngombana uZimu uthanda umuphi othabileko.+

8 Ngaphezu kwalokho, uZimu ukghona ukwenza bona umusakhe omkhulu wande kini bona nihlale naneliseke ngokupheleleko kikho koke, nibe nokunengi kiwo woke umsebenzi omuhle.+ 9 Kutloliwe ukuthi: “Wabe ngesihle, uphe abatlhagileko. Ukulunga kwakhe kuhlala ngokungapheliko.”+ 10 Loyo onikela umtjali imbewu enengi noburotho bokudla uzoninikela imbewu begodu anandisele yona bona niyitjale, uzokwandisa nesivuno sokulunga kwenu.) 11 Ninjingiswa kikho koke ngebanga layo yoke imihlobo yokuphana, okuveza amezwi wokuthokoza uZimu ngathi 12 ngombana umsebenzi watjhatjhalazi lo awuphi abacwengileko abakutlhogako kwaphela+ kodwana uba mthombo wobunjinga emezwini amanengi wokuthokoza uZimu. 13 Ngobufakazi obunikelwa msebenzi lo, baphazimulisa uZimu ngombana niyazithoba eendabeni ezimnandi ezimalungana noKrestu njengombana namemezela tjhatjhalazi begodu ninesandla esivulekileko emnikelweni eniwenzele bona nabo boke abanye.+ 14 Ngokunincengela, batjengisa indlela abanithanda ngayo ngebanga lomusa omkhulu kaZimu ophezu kwenu.

15 Akathokozwe uZimu ngesipho sakhe sesihle esingahlathululekiko.

10 Nje-ke mina Powula, ngiyanincenga ngommoya ophasi nangomusa kaKrestu,+ nanyana nginyazeka nanginani+ kodwana nginesibindi nangingekho kini.+ 2 Ngiyanincenga ukuthi nangilapho, kungatlhogeki bona ngibe nesibindi begodu ngithathe amagadango aqinileko engilindele ukuwathathela labo abasiqala ngasuthi sakhamba ngendlela yenyama. 3 Ngombana nanyana sikhamba enyameni, asilwi ipi ngokwalokho esingikho enyameni. 4 Ngombana iinkhali zepi yethu akusingezenyama+ kodwana ngoZimu zinamandla+ wokuketula izinto ezidzinyeleliswe ngokuqinileko. 5 Ngombana siketula imicabango nayo yoke into ephakemeko, ephakanyiswe yajamelana nelwazi lakaZimu,+ sithumba nayo yoke imicabango siyenze ilalele uKrestu, 6 sikulungele nokujezisa woke umuntu ongalaleliko,+ ngemva kokuthi nitjengise bona nilalela ngokupheleleko.

7 Niqala izinto ngokubonakala kwangaphandle. Nangabe kukhona ozibetha isifuba ngokuthi ungowakaKrestu, akacabange godu ngeqinisweli: Njengombana angewakaKrestu, nathi singebakaKrestu. 8 Ngitjho nanyana bengingazikhakhazisa ngokudluleleko ngamandla iKosi esinikele wona wokunakha singanigirizi,+ bengekhe ngihlaziswe. 9 Angifuni kubonakale ngasuthi bengilinga ukunithusa ngeencwadi zami. 10 Ngombana bathi: “Iincwadi zakhe zitjhujile begodu zinamandla kodwana nakalapha akanasithunzi nekulumakhe ayazisi.” 11 Umuntu onjalo akacabange ukuthi lokho esikutjho* ngeencwadi nasingekho, ngilokho esizokwenza* nasikhona.+ 12 Ngombana angekhe sathoma sazibeka esigabeni esithileko namkha sizimadanise nabanye abazibukako.+ Kodwana nabazilinganisa ngabo begodu bazimadanise nabo ngokwabo, abazwisisi.+

13 Nanyana kunjalo, angekhe sizikhakhazise ngaphandle kwemikhawulo esibekelwe yona kodwana ngaphakathi komkhawulo wesifunda uZimu asilinganisele sona, wawenza wafika ngitjho nakini.+ 14 Kwamambala, asenzi okungale kwesabelwe khona ngasuthi imikhawulwethu beyingafiki nakini ngombana besingebokuthoma ukufika kini ngeendaba ezimnandi ngoKrestu.+ 15 Awa, asizikhakhazisi ngaphandle kwemikhawulo esabelwe yona ngemisebenzi yomunye umuntu kodwana sithemba ukuthi njengombana ukukholwa kwenu kuragela phambili kwanda, lokho esikwenzileko kungenziwa kwande phakathi nesifunda sethu. Sizokwazi ukwenza okungeziweko 16 bona simemezele iindaba ezimnandi nakwezinye iinarha ezingaphetjheya kwenu, bona singazikhakhazisi ngalokho esekwenziwe esifundeni somunye umuntu. 17 “Kodwana loyo ozikhakhazisako, akazikhakhazise ngoJehova.”*+ 18 Ngombana akusingiloyo ozibukako owamukelekako+ kodwana ngiloyo obukwa nguJehova.*+

11 Ngifisa ngasuthi ningangibekezelela ekungabini nengqondo kwami okuncani. Kodwana eqinisweni, niyangibekezelela! 2 Nginesikhwele esinjengesakaZimu ngani ngombana nganithembisa ukunendisa endodeni yinye bona nginethule kuKrestu njengentombi emsulwa.+ 3 Kodwana ngiyasaba bona ngendlela ethileko njengombana inyoka yayenga u-Eva ngobuqili bayo,+ iingqondo zenu zingonakaliswa zisuswe ekuthembekeni nebumsulweni obufanele uKrestu.+ 4 Kwanje, nangabe kuza umuntu begodu atjhumayele omunye uJesu ngaphandle kwaloyo esatjhumayela ngaye, namkha nangabe namukela omunye ummoya ngaphandle kwaloyo enawamukelako, namkha ezinye iindaba ezimnandi ngaphandle kwalezi enazamukelako,+ nimbekezelela lula. 5 Ngombana ngicabanga ukuthi akhenge ngibonakale nakanye ngimncani ebapostolini benu abazitjhaya abalungileko.+ 6 Kodwana ngitjho nanyana ngilitjhapha ekukhulumeni,+ ngokuqinisekileko angisilo elwazini, sikwenze kwabonakala lokho kini ngazo zoke iindlela nakizo zoke izinto.

7 Kghani ngenze isono ngokuzithoba bona niphakanyiswe ngombana ngazitjhumayela ngethabo iindaba ezimnandi zakaZimu kini ngesihle?+ 8 Amanye amabandla ngawadlelezela ngokwamukela isekelo ukuthi ngenzele nina.+ 9 Kodwana ngesikhathi nginani ngitlhoga okuthileko, akhenge ngibe mthwalo nemuntwini oyedwa ngombana abafowethu abavela eMasedoniya bangisekela ngakho koke engikutlhogako.+ Ngazo zoke iindlela ngalwela ukuhlala ngingasimthwalo kini begodu ngizokuragela phambili nokwenza njalo.+ 10 Njengombana iqiniso lakaKrestu likimi, angeze ngilise ukuzikhakhazisokhu+ eemfundeni ze-Akhaya. 11 Kubayini? Ngombana nginganithandi? UZimu uyazi ukuthi ngiyanithanda.

12 Kodwana engikwenzako ngizokuragela phambili ngikwenza,+ bona ngisuse ibanga lalabo abafuna isisekelo sokufunyanwa balingana nathi ezintweni abazikhakhazisa ngazo. 13 Ngombana abantu abanjalo babapostoli bamala, baziinsebenzi ezikhohlisako, bazenza ngasuthi babapostoli bakaKrestu.+ 14 Akurari lokho ngombana uSathana ngokwakhe usolo azenza ngasuthi uyingilozi yokukhanya.+ 15 Yeke akusiyinto ekulu neensebenzi zakhe nazisolo zizenza ngasuthi ziinsebenzi zokulunga. Kodwana ukuphela kwazo kuzokuba njengemisebenzazo.+

16 Godu ngithi: Akungabi nomuntu ocabanga ukuthi anginangqondo. Kodwana ngitjho nanyana nicabanga njalo, ngamukelani njengomuntu onganangqondo, ukuthi nami ngizikhakhazise kancani. 17 Engikutjhoko nje, angikutjho ngokulandela isibonelo seKosi kodwana njengombana kungenza umuntu onganangqondo, ozithembako nozikhakhazisako. 18 Njengombana abanengi bazikhakhazisa ngokuvumelana nenyama, nami ngizozikhakhazisa. 19 Njengombana nina “ninengqondo,” nibabekezelela ngethabo abanganangqondo. 20 Eqinisweni, nibekezelela nanyana ngubani onigqilazako, nanyana ngubani onidlelezela izinto zenu, nanyana ngubani onihluthula lokho eninakho, nanyana ngubani oziphakamisako kini, nanyana ngubani onibetha ebusweni.

21 Ngitjho lokhu bona kuhlaziseke thina, njengombana kungabonakala ngasuthi senze izinto ngokubogaboga.

Kodwana nangabe abanye benza ngesibindi, ngikhuluma njengomuntu onganangqondo nami ngenza ngesibindi. 22 BamaHebheru? Nginguye nami.+ Bama-Israyeli? Nginguye nami. Baziinzukulwana* zaka-Abrahama? Ngingiso nami.+ 23 Baziinsebenzi zakaKrestu? Ngiphendula njengomuntu ohlanyako, mina ngingesikhulu: Ngenze umsebenzi omnengi,+ ngivalelwe ejele kanengi,+ ngabetjhwa kanengi, ngapheze ngafa kanengi.+ 24 Amahlandla amahlanu, ngabetjhwa maJuda imivimbo ema-39,+ 25 ngabetjhwa ngeentonga kathathu,+ ngakghadlhwa ngamatje kanye,+ ngaphukelwa mkhumbi kathathu,+ ngahlala ubusuku nemini phakathi kwelwandle; 26 emakhambweni kanengi, eengozini zemilanjeni, eengozini zabadlelezeli, eengozini ezivela ebantwini bekhethu,+ eengozini ezivela eentjhabeni,+ eengozini edorobheni,+ eengozini emmangweni, eengozini elwandle, eengozini ezivela kubafowethu bamala, 27 ekusebenzeni budisi nekuzikhandleni, ekuhlubayeleni kanengi,+ endlaleni nekomeni,+ kanengi nginganakudla,+ emakhazeni nekutlhogeni izambatho.

28 Ngaphandle kwezintwezo zangaphandle, kukhona okungigandelela qobe langa: Ukutshwenyeka ngawo woke amabandla.+ 29 Ngubani obogabogako, mina ngingabogabogi na? Ngubani okhutjwako, mina ngingavuthi ngobukhali na?

30 Nangabe kufuze ngizikhakhazise, ngizozikhakhazisa ngezinto ezitjengisa ukubogaboga kwami. 31 UZimu noYise weKosi uJesu, loyo okufuze adunyiswe ngokungapheliko, uyazi ukuthi angileyi amala. 32 EDamaseku umbusi ongaphasi kwekosi u-Areta wagada idorobho labantu beDamaseku bona angibambe 33 kodwana ngehliselwa phasi ngomantji ngefesidere leboda ledorobho,+ ngaphunyurha ezandleni zakhe.

12 Kufuze ngizikhakhazise. Akuzuzisi kodwana ngizokudlulela emibonweni+ nezambulweni zeKosi.+ 2 Ngazi umuntu othileko omfundi kaKrestu, okwathi eminyakeni eli-14 edlulileko wathathwa wasiwa ezulwini lesithathu ukuthi bekasemzimbeni namkha ngaphandle komzimba, angazi kwazi uZimu. 3 Iye ngiyamazi umuntu onjalo, ukuthi bekasemzimbeni namkha ngaphandle komzimba, angazi kwazi uZimu 4 owathathwa wasiwa epharadesi wezwa amezwi angakhulumekiko begodu okungakavumeleki bona umuntu awatjho. 5 Ngizozikhakhazisa ngomuntu onjalo kodwana angekhe ngizikhakhazise ngami ngaphandle kokubogaboga kwami. 6 Kodwana ngitjho nanyana ngifuna ukuzikhakhazisa, lokho angekhe kutjho bona anginangqondo ngombana ngizabe ngikhuluma iqiniso. Angekhe ngikwenze lokho, ukuthi kungabi nomuntu ozongibuka ngaphezu kwalokho akubona kimi namkha akuzwa kimi, 7 ngebanga lokufumana imibono engakajayeleki kwaphela.

Ukuthi ngingaziphakamisi ngokudluleleko, nganikelwa iliva enyameni,+ ingilozi kaSathana isolo ingiwahla ngepama bona ngingaziphakamisi ngokudluleleko. 8 Ngarabhela iKosi amahlandla amathathu ngalokhu bona lisuke kimi. 9 Kodwana yathi kimi: “Umusami omkhulu ukwanele ngombana amandlami enziwa aphelele ekubogabogeni.”+ Ngalokho-ke, ngethabo elikhulu ngizozikhakhazisa ngokubogaboga kwami, bona amandla kaKrestu ahlale phezu kwami njengetende. 10 Ngalokho ngiyathaba ngokubogaboga, ngokuthukwa, ngeenkhathi zokutlhaga, ngokuhlunguphazwa nangobudisi ngebanga lakaKrestu. Ngombana nangibogabogako, kulapho-ke nginamandla khona.+

11 Ngibe ngonganangqondo. Ningikatelele bona ngibe njalo ngombana bekufuze ngibukwe ngini. Ngombana azange ngibe phasi nangento yinye kunabapostoli benu abahlabo, ngitjho nanyana ngingasililitho.+ 12 Kwamambala, ubufakazi bobupostoli bami bavezwa kini ngokukghodlhelela okukhulu,+ ngeembonakaliso neemangaliso nemisebenzi yamandla.+ 13 Okukuphela kwebanga elenza bona nibe phasi kunawo woke amabandla, kukuthi azange ngibe mthwalo kini.+ Ngibawa ningilibalele ngomtjhapho loyo.

14 Qalani! Nje sekulihlandla lesithathu ngilungele ukuza kini, begodu angekhe ngibe mthwalo. Ngombana angifuni izinto zenu,+ ngifuna nina ngombana akukalindeleki bona abantwana+ babekele ababelethi babo umnotho kodwana babelethi okufuze babekele abantwababo. 15 Mina-ke ngizokusebenzisa koke enginakho ngethabo begodu ngisetjenziswe ngokupheleleko ngebanga lenu.+ Nangabe nginithanda khulu kangaka, kufuze ngithandwe kancani na? 16 Nanyana kunjalo, azange ngibe mthwalo kini.+ Kodwana nithi ‘bengiliqili’ begodu nganibamba “ngokukhohlisa.” 17 Azange ngisizakale ngani ngokusebenzisa nanyana ngubani walabo engabathumela kini, akusinjalo? 18 Ngakhuthaza uTitosi ngathumela nomfowethu bona akhambe naye. UTitosi azange asizakale ngani nakancani, akusinjalo?+ Sakhamba emmoyeni ofanako, akusinjalo? Emtlhaleni ofanako, akusinjalo?

19 Kghani soke isikhathesi benisolo nicabanga ukuthi siyazivikela kini? Sikhuluma phambi kwakaZimu simunye noKrestu. Kodwana bathandekako, koke esikwenzako sikwenzela bona kwakheke nina. 20 Ngombana ngiyasaba ukuthi kungenzeka nangifikako, nginifumane ningasingilokho engifisa bona nibe ngikho begodu ngingabi njengombana nifisa kodwana kunalokho, kungaba nombango, umona, ukubhoka ngobukhali, ukuhlukana, ukudlana iinthende, ukuhleba, ukuzikhukhumeza netjharagano. 21 Mhlamunye nangizako godu, uZimami angangihlazisa phambi kwenu begodu kungafuze ngililele abanengi abona phambilini kodwana abangakhenge batjhuguluke ekusilaphazekeni kwabo, nekuziphatheni okumbi ngokomseme* nekwenzeni kwabo amanyala bangabi neenhloni.*

13 Leli lihlandla lesithathu ngiza kini. “Indaba enye nenye kufuze iqinisekiswe ngabofakazi ababili namkha abathathu.”+ 2 Nanyana ngingekho nje kuba ngasuthi bengikhona ihlandla lesibili begodu ngibayelelisa kusesengaphambili labo abona ngaphambili nabo boke abanye, ukuthi nakungenzeka ngize godu angekhe ngibarhawukele 3 njengombana nifuna ubufakazi bokuthi uKrestu, ongabogabogi kini kodwana onamandla hlangana nani, kwamambala ukhuluma asebenzisa mina. 4 Ngombana eqinisweni, wabulawelwa esigodweni ngebanga lokubogaboga kodwana uyaphila ngebanga lamandla kaZimu.+ Kwamambala, nathi sibogaboga naye kodwana sizokuphila ndawonye naye+ ngebanga lamandla kaZimu malungana nani.+

5 Ragelani phambili nokuhlola bona nisekukholweni na; ragelani phambili nihlolisisa lokho nina eningikho.+ Namkha anilemuki na ukuthi uJesu Krestu umunye nani? Nakungasinjalo kutjho bona anamukeleki. 6 Eqinisweni ngithemba bona nizokulemuka ukuthi asisibabantu abangamukelekiko.

7 Nje-ke sithandaza kuZimu bona ningenzi litho elimbi, ingasi bona sibonakale samukelekile kodwana bona nenze okuhle ngitjho nanyana singabonakala singakamukeleki. 8 Angekhe senza litho elingakhambisani neqiniso kodwana senza kwaphela okukhambisana neqiniso. 9 Eqinisweni siyathaba nanyana kunini nasibogabogako kodwana nina ninamandla. Sithandazela bona nilungiswe. 10 Kungebangeli ngitlola izintwezi njengombana ngingekho, ukuze nangifikako, ngingabi bukhali ekusebenziseni ilungelo lami engilinikelwe yiKosi,+ lokwakha ingasi lokugiriza.

11 Emaswapheleni bafowethu, ragelani phambili nithaba, nilungiseka, niduduzeka,+ nicabanga ngokuvumelana,+ niphila ngokuthula,+ uZimu wethando nokuthula+ uzokuba nani. 12 Lotjhisanani ngokumangana okucwengileko. 13 Boke abacwengileko bayanilotjhisa.

14 Umusa omkhulu weKosi uJesu Krestu nethando lakaZimu nokuhlanganyela emmoyeni ocwengileko akube nani noke.