INCWADI EYA KWEBEGALATIYA

1 UPowula, umpostoli, loyo ubupostoli bakhe obungaveli ebantwini begodu obungazange buze ngomuntu kodwana ngoJesu Krestu+ noZimu uBaba,+ owamvusa kwabafileko 2 kunye nabo boke abafowethu abanami, ngitlolela amabandla weGalatiya ngithi:

3 Kwanga ningaba nomusa omkhulu nokuthula okuvela kuZimu uBabethu neKosini uJesu Krestu. 4 Wazinikela ngebanga lezono zethu+ bona asihlenge ephasini elimbeli+ ngokuvumelana nentando kaZimethu uBaba,+ 5 iphazimulo ayibe kuye bekube ngokungapheliko. Amen.

6 Ngiyarareka ukuthi nimfulathela msinya kangaka loyo owanibiza ngomusa omkhulu kaKrestu, nitjhinga komunye umhlobo weendaba ezimnandi.+ 7 Ingasi bona zikhona ezinye iindaba ezimnandi kodwana kunabathileko abanitshwenyako,+ abafuna ukuhlanakela iindaba ezimnandi ezimalungana noKrestu. 8 Kodwana ngitjho nanyana omunye wethu namkha ingilozi evela ezulwini ingamemezela okuthileko athi kuziindaba ezimnandi, khisibe akufani neendaba ezimnandi esazimemezela kini, akaqalekiswe. 9 Njengombana khesatjho phambilini, ngiyabuyelela nanje: Nanyana ngubani omemezela okuthileko athi kuziindaba ezimnandi khisibe akufani nalokho enakwamukelako, akaqalekiswe.

10 Kghani ngilinga ukwamukelwa babantu namkha nguZimu? Namkha ngilinga ukuthabisa abantu? Nangabe bengisathabisa abantu, bengekhe ngibe sigqila sakaKrestu. 11 Ngombana ngifuna nazi bafowethu ukuthi iindaba ezimnandi engazimemezela kini aziveli ebantwini+ 12 ngombana azange ngizifumane emuntwini namkha ngizifundiswe kodwana ngazambulelwa nguJesu Krestu.

13 Nezwa ngokuziphatha kwami kwaphambilini ngesikhathi ngisekolweni yobuJuda+ ukuthi bengisolo ngilihlunguphaza kabuhlungu begodu ngilisahlela ibandla lakaZimu+ 14 nokuthi bengithuthuka khulu ekolweni yobuJuda ukudlula iintanga zami esitjhabeni sekhethu ngombana bengiwatjhisakalela khulu amasiko wabobaba.+ 15 Kodwana kuthe uZimu, owenza bona ngibelethwe begodu wangibiza ngomusakhe omkhulu,+ nakakubona kukuhle 16 ukwambula iNdodanakhe ngami bona ngimemezele iindaba ezimnandi eziphathelene nayo eentjhabeni,+ azange ngiyokubonisana namuntu* khonokho; 17 azange ngikhuphukele neJerusalema kilabo ebebabapostoli ngaphambi kwami kodwana ngatjhinga e-Arabhiya, ngemva kwalokho ngabuyela eDamaseku.+

18 Ngemva kweminyaka emithathu ngakhuphukela eJerusalema+ ngiyokuvakatjhela uKhefasi,*+ ngahlala naye amalanga ali-15. 19 Kodwana azange ngibabone abanye abapostoli, ngabona uJakopo+ umfowabo leKosi kwaphela. 20 Nje-ke malungana nezinto enginitlolela ngazo, ngiyaniqinisekisa phambi kwakaZimu ukuthi angileyi amala.

21 Ngemva kwalokho ngatjhinga eemfundeni zeSiriya neSilisiya.+ 22 Kodwana bengingaziwa ubuso nobuso emabandleni weJudiya amunye noKrestu. 23 Bebezwa ngobatjho kuthiwa: “Umuntu loya obekasihlunguphaza+ sekamemezela iindaba ezimnandi ngokukholwa ebekakusahlela.”+ 24 Nje-ke bathoma ukudumisa uZimu ngebanga lami.

2 Nje-ke ngemva kweminyaka eli-14 ngakhuphukela eJerusalema godu nginoBharinabhasi+ noTitosi.+ 2 Ngakhuphuka ngebanga lesambulo, ngakhuluma kibo iindaba ezimnandi engizitjhumayelako hlangana neentjhaba. Lokhu bekwenzelwa ngemsitheleni kodwana ngakwenza phambi kwamadoda ahlonitjhwa khulu, ukuqinisekisa bona umsebenzi ebengiwenza namkha engiwenzileko ungabi lilize. 3 Nanyana kunjalo, ngitjho noTitosi+ obekanami, akhange akatelelwe bona asoke+ nanyana bekamGirigi. 4 Kodwana indaba leyo yavela ngebanga labafowethu bamala abangeniswa ngesidu,+ abangena ngokukhukhutha bona bazokuhlola itjhaphuluko+ esinayo ebunyeni noKrestu Jesu bona basigqilaze ngokupheleleko;+ 5 akhange sibathobele+ nakancani bona iqiniso leendaba ezimnandi liragele phambili likini.

6 Kodwana malungana nalabo ebebabonakala ngasuthi baqakathekile,+ ukuthi bebayini akwenzi mehluko kimi ngombana uZimu akayi ngokuqaleka komuntu kwangaphandle, abantu abahlonitjhwa khulwabo abakadluliseli litho elitjha kimi. 7 Kunalokho, nababona ukuthi ngiphathiswe iindaba ezimnandi zalabo abangakasoki+ njengombana uPitrosi bekaphathiswe zalabo abasokileko 8 ngombana loyo onikele uPitrosi amandla wobupostoli kilabo abasokileko unikele nami amandla ebantwini beentjhaba+ 9 begodu nabalemuka ukuthi nginikelwe umusa omkhulu,+ uJakopo,+ uKhefasi* noJwanisi, ebebabonakala baziinsika, basibamba isandla sinoBharinabhasi+ njengetshwayo lokuvumelana bona siye eentjhabeni kodwana bona baye ebantwini abasokileko. 10 Basibawa kwaphela bona sikhumbule abatlhagako begodu ngilokho nami engalwela ukukwenza.+

11 Nanyana kunjalo, uKhefasi*+ nakeza e-Anthiyokiya,+ ngaphikisana naye ubuso nobuso ngombana bekusemtarini ukuthi utjhaphile. 12 Ngaphambi kobana kufike abantu abathileko abavela kuJakopo,+ bekajayele ukudla nabantu beentjhaba+ kodwana kuthe nabafikako, walisa ukwenza lokhu, wazihlukanisa, asaba labo besigaba esisokileko.+ 13 Woke amanye amaJuda nawo ahlanganyela naye ekuzenzisenokhu kangangobana noBharinabhasi wadoselwa bona ahlanganyele nabo ekuzenziseni kwabo. 14 Kodwana nangilemuka ukuthi bebangakhambi ngokuvumelana neqiniso leendaba ezimnandi,+ phambi kwabo boke, ngathi kuKhefasi:* “Nangabe wena nanyana umJuda nje, uphila njengabantu beentjhaba begodu ungaphili njengamaJuda, kubayini ukatelela abantu beentjhaba bona baphile ngokuvumelana nesiko lamaJuda?”+

15 Thina esimaJuda ngokubelethwa, esingasizizoni ezivela eentjhabeni, 16 siyalemuka ukuthi umuntu kuthiwa ulungile, ingasi ngemisebenzi yomthetho kodwana ngokukholwa+ kuJesu Krestu+ kwaphela. Nje-ke sibeke ukukholwa kwethu kuKrestu Jesu bona kuthiwe silungile ngokukholwa kuKrestu, ingasi ngemisebenzi yomthetho ngombana akakho okuzokuthiwa ulungile ngemisebenzi yomthetho.+ 17 Nje-ke nangabe sifunyenwe sizizoni kukulapho sifuna kuthiwe silungile ngoKrestu, alo-ke uKrestu usisebenzi sesono na? Awa akusinjalo! 18 Nangabe izinto engazigirizako ngiyazakha godu, ngitjengisa ukuthi ngisiseqamthetho. 19 Ngombana ngomthetho ngafa ngokuphathelene nomthetho+ bona ngiphile ngakuZimu. 20 Ngibethelwe esigodweni kunye noKrestu.+ Akusesengimi ophilako+ kodwana nguKrestu ophila ebunyeni nami. Eqinisweni, ukuphila engikuphilako nje enyameni, ngikuphila ngokukholelwa eNdodaneni kaZimu,+ eyangithanda, yazinikela ngebanga lami.+ 21 Angiwali umusa omkhulu kaZimu+ ngombana nangabe ukulunga kufumaneka ngomthetho, eqinisweni-ke uKrestu wafela ilize.+

3 Maye! MaGalatiya anganangqondo. Ngubani onilethe ngaphasi komthelela omumbi lo,+ nina ebeninoJesu Krestu owabonakaliswa phambi kwenu tjhatjhalazi njengobethelwe esigodweni?+ 2 Ngifuna ukunibuza into yinye nasi: Nafumana ummoya ngemisebenzi yomthetho namkha ngebanga lokukholelwa kilokho enakuzwako?+ 3 Aninangqondo na? Ngemva kobana nithome ngokukhamba ngokuvumelana nommoya, niqedelela ngokukhamba ngokuvumelana nenyama na?+ 4 Natlhaga kangaka nitlhagela ilize na? Nangabe kwamambala natlhagela ilize. 5 Nje-ke, inga-kghani loyo oninikela ummoya enze nemisebenzi yamandla+ hlangana nani wenza lokho ngebanga lemisebenzi yomthetho namkha ngebanga lokukholwa kwenu kilokho enikuzwileko? 6 Njengombana u-Abrahama “akholwa kuJehova* begodu waqalwa njengolungileko.”+

7 Ngokuqinisekileko niyazi ukuthi ngilabo abanamathela ekukholweni abamadodana ka-Abrahama.+ 8 Nje-ke umtlolo ubona kungakenzeki ukuthi uZimu uzokuthi abantu beentjhaba balungile ngebanga lokukholwa, wabikezela iindaba ezimnandi ku-Abrahama, wathi: “Ngawe zoke iintjhaba zizokubusiswa.”+ 9 Labo ababambelele ekukholweni bayabusiswa kunye no-Abrahama, ebekakholwa.+

10 Boke abathembele emisebenzini yomthetho baqalekisiwe ngombana kutloliwe kwathiwa: “Uqalekisiwe woke umuntu ongahlali kizo zoke izinto ezitlolwe emsongweni womThetho ngokuzenza.”+ 11 Ukungezelela kilokho, kusemtarini ukuthi ngomthetho akekho ekuthiwa ulungile kuZimu+ ngombana “olungileko uzokuphila ngebanga lokukholwa.”+ 12 Nje-ke umThetho awukasekelwa ekukholweni. Kunalokho “nanyana ngubani owenza izintwezi uzokuphila ngebanga lazo.”+ 13 UKrestu wasithenga,+ asitjhaphulula+ esiqalekisweni somThetho ngokuthi abe siqalekiso esikhundleni sethu ngombana kutloliwe kwathiwa: “Uqalekisiwe woke umuntu ophanyekwa esigodweni.”+ 14 Lokhu kwenzeka bona isibusiso saka-Abrahama siye eentjhabeni ngoKrestu Jesu+ bona sifumane ummoya othenjisiweko+ ngebanga lokukholwa kwethu.

15 Bafowethu, ngikhuluma ngisebenzisa umfanekiso ojayelekileko ebantwini: Nasele isivumelwano siqinisekisiwe, ngitjho nanyana siqinisekiswe mumuntu, akekho ongasiqeda namkha ongangezelela okuthileko kiso. 16 Nje-ke iinthembiso zatjelwa u-Abrahama nabantwabakhe.*+ Akuthiwa “neenzukulwaneni zakho,” ngomqondo wokuthi zinengi. Kunalokho, kuthiwa “nesizukulwaneni sakho,”* ngomqondo womuntu munye, uKrestu.+ 17 Ukungezelela kilokho, ngithi: UmThetho, oze ngemva kweminyaka ema-430,+ awusuli isivumelwano esenziwa nguZimu ngaphambilini bona kusulwe isithembiso. 18 Ngombana nangabe ilifa lisekelwe emthethweni, kutjho bona alisayi ngesithembiso kodwana uZimu ngomusa ulinikele u-Abrahama ngesithembiso.+

19 Nje-ke, kubayini kwanikelwa umThetho? Wanikelwa bona ukweqiwa komthetho kubonakale,+ bekube kulapho kufika khona isizukulwana*+ okwenziwe isithembiso ngaso begodu umthetho loyo wadluliselwa ngeengilozi+ ngesandla somlamuli.+ 20 Nje-ke akekho umlamuli nakubandakanyeke umuntu munye kodwana uZimu munye kwaphela. 21 Alo-ke, umThetho uphikisana neenthembiso zakaZimu? Awa akusinjalo! Ngombana nangabe kwanikelwa umthetho onikela ukuphila, ukulunga kuhlekuhle bekuzokuba ngebanga lomthetho. 22 Kodwana umTlolo waletha zoke izinto ngaphasi kwamandla wesono bona isithembiso esifumaneka ngokukholwa kuJesu Krestu sinikelwe labo abatjengisa ukukholwa.

23 Nanyana kunjalo, ngaphambi kobana kufike ukukholwa, besitlhogonyelwa mthetho, singaphasi kwamandla womthetho, siqale ekukholweni ebekuzokwambulwa.+ 24 Nje-ke umThetho ube mtlhogomelethu* osidosela kuKrestu+ bona kuthiwe silungile ngebanga lokukholwa.+ 25 Kodwana njengombana nje ukukholwa kufikile,+ asisekho ngaphasi komtlhogomeli.*+

26 Eqinisweni, noke nimadodana kaZimu+ ngebanga lokukholwa kuKrestu Jesu.+ 27 Ngombana noke enabhajadiselwa kuKrestu nembethe uKrestu.+ 28 AkunamJuda namkha umGirigi,+ akunasigqila namkha umuntu otjhaphulukileko,+ akunamuntu omduna namkha omsikazi+ ngombana noke nisebunyeni noKrestu Jesu.+ 29 Ngaphezu kwalokho, nangabe ningebakaKrestu, kwamambala nibantwana* baka-Abrahama,+ iindlalifa+ ngebanga lesithembiso.+

4 Nje-ke ngithi lokha indlalifa nayisesemntwana omncani, ayikahluki esigqileni nanyana iyikosi yezinto zoke 2 kodwana ingaphasi kwabaphathi nabatlhogomeli bekube lilanga elibekwe nguyise kusesengaphambili. 3 Nathi ngokufanako, nasisesebantwana, besigqilazwe zizinto zobuntwana zephasi.+ 4 Kodwana nakuphela isikhathi esibekiweko, uZimu wathumela iNdodanakhe, eyabelethwa mfazi+ begodu ebeyingaphasi komthetho+ 5 bona itjhaphulule labo abangaphasi komthetho+ ngokubathenga bona sifumane ukumbelekelwa njengamadodana.+

6 Nje-ke ngombana nimadodana, uZimu uthumele ummoya+ weNdodanakhe eenhliziyweni zethu,+ wona uyarhuwelela uthi: “Abha,* Baba!”+ 7 Nje-ke aniseseziingqila kodwana nimadodana; yeke nanimadodana kaZimu uzoninikela ilifa.+

8 Nanyana kunjalo, ngesikhathi ningakamazi uZimu, benigqilazwe bozimu bamala. 9 Kodwana njengombana senazi uZimu namkha senaziwa nguZimu, kuza njani bona nibuyele ezintweni zobuntwana ezibogabogako+ nezililize, nifune ukuba ziingqila zazo godu?+ 10 Ngokutjheja okukhulu, nihlonipha amalanga neenyanga+ neenkhathi neminyaka. 11 Ngiyanisabela ukuthi ngasuthi ngidlale ngamandlami kini.

12 Ngiyanirabhela bafowethu, yibani njengami ngombana nami khengaba njengani.+ Akukho okumbi eningenze khona. 13 Kodwana niyazi ukuthi bekukugula enyameni okwangenza ngafumana ithuba lokumemezela iindaba ezimnandi kini. 14 Nanyana ubujamo bepilwami bebusilingo kini, azange ningidelele namkha ninginyenye;* nangamukela njengengilozi kaZimu, njengoKrestu Jesu. 15 Liphi ithabo ebeninalo? Ngombana ngiyafakaza ukuthi ngathana bekukghoneka, benizokugobhodlha amehlwenu ninginikele wona.+ 16 Nje-ke, kghani sengibe linaba lenu ngombana nginitjela iqiniso? 17 Banetjisakalo yokunithumbela kibo kodwana lokho abakwenzi ngomnqopho omuhle; bafuna ukunihlukanisa nami ukuthi nibe netjisakalo yokulandela bona. 18 Nanyana kunjalo, kuhle ngaso soke isikhathi bona othileko anifune ngetjiseko ngomnqopho omuhle begodu ingasi nanginani kwaphela, 19 bantwanyana bami,+ enginemirhelo ngani godu bekube kulapho uKrestu akheka kini. 20 Okwanjesi ngifisa ngathana ngingaba nani, ngikhulume ngendlela ehlukileko ngombana niyangirara.

21 Akhe ningitjele nina enifuna ukuba ngaphasi komthetho: Aniwuzwa umThetho na? 22 Ngokwesibonelo, kutloliwe ukuthi u-Abrahama waba namadodana amabili, enye ngomntazana osisebenzi+ enye ngomfazi otjhaphulukileko*+ 23 kodwana loyo owabelethwa mntazana osisebenzi, wabelethwa ngendlela ejayelekileko*+ kwathi loyo owabelethwa ngomfazi otjhaphulukileko, wabelethwa ngesithembiso.+ 24 Izintwezi zingaqalwa njengedrama engokomfanekiso; ngombana abafazaba bajamele iimvumelwano ezimbili, esinye ngeseNtabeni yeSinayi,+ esibeletha abantwana bobugqila, esinguHagari. 25 Nje-ke uHagari ujamele iSinayi,+ intaba ese-Arabhiya, ufanekisela iJerusalema lanamhlanjesi ngombana lisebugqileni nabantwabalo. 26 Kodwana iJerusalema laphezulu litjhaphulukile begodu lingumma kithi.

27 Ngombana kutloliwe ukuthi: “Thaba, wena mfazi oyinyumba; rhuwelela ngethabo, wena mfazi ongananhlungu zokubeletha ngombana abantwana bomfazi olahliweko babe banengi kunebaloyo onendoda.”+ 28 Nje-ke nina bafowethu, nibantwana besithembiso njengo-Isaka.+ 29 Kodwana njengesikhathineso loyo owabelethwa ngendlela ejayelekileko* wathoma ukutlhorisa loyo obelethwe ngommoya,+ nanamhlanjesi kwenzeka okufanako.+ 30 Nanyana kunjalo, uthini umtlolo? “Qotha umntazana osisebenzi nendodanakhe ngombana indodana yomntazana osisebenzi angekhe ibe yindlalifa nendodana yomfazi otjhaphulukileko.”+ 31 Nje-ke bafowethu, asisibantwana bomntazana osisebenzi kodwana bomfazi otjhaphulukileko.

5 Ngombana uKrestu wasitjhaphulula bona sithabele itjhaphuluko enjalo. Yeke, qinani,+ ningavumi ukufakwa godu ejogini lobugqila.+

2 Qalani! Mina Powula ngiyanitjela ukuthi nangabe niyasokwa, uKrestu angekhe abe lisizo kini.+ 3 Godu ngifakaza kiwo woke umuntu osokwako ukuthi ubophekile ukwenza koke okutjhiwo mThetho.+ 4 Nihlukaniswe noKrestu, nina enilinga bona kuthiwe nilungile ngomthetho;+ ningaphandle komusakhe omkhulu. 5 Ngombana thina, ngommoya silindele ngetjiseko ukulunga esinethemba lokukufumana ngokukholwa. 6 Ngombana ebunyeni noKrestu ukusoka namkha ukungasoki akutjho litho+ kodwana ukukholwa okusebenza ngethando ngikho okuqakathekileko.

7 Benigijima kuhle.+ Ngubani onikhandele bona niragele phambili nilalela iqiniso? 8 Ifundiso yalabo abanikhandelako ayiveli kiloyo onibizako. 9 Isibiliso esincani sibilisa ihlama yoke.+ 10 Ngiyaqiniseka ukuthi nina enimunye neKosi+ angekhe nicabange ngenye indlela kodwana loyo onitshwenyako+ nanyana kungaba ngubani, uzokufumana isahlulelo esimfaneleko. 11 Nangabe mina bafowethu ngisatjhumayela ukusokwa, kubayini ngisahlunguphazwa? Nakunjalo isiqabo sesigodo sokuhlunguphazwa*+ sesisusiwe. 12 Ngifisa ngasuthi abantu abalinga ukunitshwenya bangaziphakula.*

13 Nabizelwa etjhaphulukweni bafowethu; kwaphela ningasebenzisi itjhaphuluko le njengethuba lokulandela iimfiso zenyama+ kodwana ngethando, yibani ziingqila zomunye nomunye.+ 14 Ngombana umThetho woke uzaliswe* ngomyalo munye othi: “Kufuze uthande umakhelwanakho njengombana uzithanda wena.”+ 15 Nangabe nihlala nilimazana begodu nisahlelana,+ yelelani bona ningatjhabalalisani.+

16 Kodwana ngithi: Ragelani phambili nikhamba ngeenqophiso zommoya,+ angekhe nenze iimfiso zenyama.+ 17 Ngombana inyama ilwisana nommoya esifisweni sayo nommoya ulwisana nenyama, koke lokhu kuyaphikisana, kangangobana zona kanye izinto enifuna ukuzenza anizenzi.+ 18 Ngaphezu kwalokho, nangabe ninqotjhiswa mmoya, anisingaphasi komthetho.

19 Nje-ke imisebenzi yenyama ibonakala kuhle, kuziphatha kumbi ngokomseme,*+ kusilaphala, kukwenza amanyala ungabi neenhloni,*+ 20 kulotjha iinthombe, bungoma,*+ bubutha, kukulwa, sikhwele, ilaka, kuphikisana, kukwahlukana, kukwenza iinqhema zokuhlubuka, 21 mumona, budakwa,+ minyanya engalawulekiko nezinye izinto ezifana nalezi.+ Nginiyelelisa kusesengaphambili ngezintwezi, ngendlela esenginiyelelise ngayo ukuthi labo abenza izinto ezinjalo angekhe bawuzuze njengelifa umBuso kaZimu.+

22 Ngakwelinye ihlangothi, iinthelo zommoya zilithando, ithabo, ukuthula, ukubekezela, umusa, ubuhle,+ ukukholwa, 23 ukuba nommoya ophasi, ukuzibamba.+ Awukho umthetho olwisana nezinto ezinjalo. 24 Labo abangebakaKrestu Jesu bayibethele esigodweni inyama kuhlanganise neenkanuko neemfiso zayo.+

25 Nangabe siphila ngommoya, asirageleni phambili sikhamba ngokufaneleko ngommoya.+ 26 Asingaziphakamisi,+ sivuse ukuphalisana,+ simonakalelane.

6 Bafowethu, ngitjho nanyana umuntu angathatha igadango elingakalungi angakatjheji, nina eninqotjhiswa mmoya lingani ukumlungisa ngommoya ophasi.+ Kodwana nizitjheje+ ngombana ngisaba ukuthi nani ningalingeka.+ 2 Ragelani phambili nokuthwalisana imithwalo,+ ngokwenza njalo nizokuzalisa umthetho kaKrestu.+ 3 Ngombana umuntu nakazitjela ukuthi ulilitho khisibe akasililitho,+ uyazikhohlisa. 4 Kodwana omunye nomunye akahlole lokho yena akwenzako+ begodu uzokuba nebanga lokuthaba malungana naye ayedwa, ingasi ngokuzimadanisa nomunye umuntu.+ 5 Ngombana omunye nomunye uzozithwalela umthwalwakhe.+

6 Ngaphezu kwalokho, nanyana ngubani ofundiswa* ilizwi akahlanganyele kizo zoke izinto ezihle naloyo onikela ifundiso enjalo.*+

7 Ningadurhiswa: UZimu akahlekwa ubudlhadlha. Lokho umuntu akutjalako, uzokuvuna khona;+ 8 loyo otjala ngombono wenyama, uzokuvuna ukonakala okuvela enyamenakhe kodwana loyo otjala ngombono wommoya, uzokuvuna ukuphila okungapheliko okuvela emmoyeni.+ 9 Ngalokho singalisi ukwenza okuhle ngombana ngesikhathi esifaneleko sizokuvuna nangabe asidinwa.*+ 10 Nje-ke, nasisesenethuba,* asenzeni okuhle kibo boke kodwana khulukhulu kilabo abahlobene nathi ekukholweni.

11 Qalani ukuthi nginitlolele ngamaledere amakhulu kangangani ngesandla sami.

12 Boke labo abafuna ukuziveza babahle enyameni* ngibo abalinga ukunikatelela ukuthi nisokwe, benza lokhu kwaphela bona babalekele ukuhlunguphazwa ngebanga lesigodo sokuhlunguphazwa* sakaKrestu. 13 Ngombana nalabo abasokwako abakwenzi okutjhiwo mThetho+ kodwana bafuna nina nisokwe bona babe nebanga lokuzikhakhazisa ngenyamenu. 14 Kodwana mina ngifisa ukungazikhakhazisi, ngaphandle kokuzikhakhazisa ngesigodo sokuhlunguphazwa* seKosethu uJesu Krestu,+ ngaye iphasi libulewe* malungana nami begodu nami malungana nephasi. 15 Ngombana ukusokwa nokungasokwa akutjho litho+ kodwana okuqakathekileko yindalo etja.+ 16 Malungana nabo boke labo abakhamba ngokuhlelekileko ngomthetho wokuziphatha lo, ukuthula nomusa akube phezu kwabo, iye, phezu kwaka-Israyeli kaZimu.+

17 Kusukela nje akungabi nomuntu ongitshwenyako ngombana emzimbenami nginamatshwayo wokuthi ngisigqila sakaJesu.+

18 Umusa omkhulu weKosethu uJesu Krestu ube nommoya eniwutjengisako, bafowethu. Amen.