INCWADI EYA KWEBE-EFESU

1 UPowula, umpostoli kaKrestu Jesu ngokwentando kaZimu, kwabacwengileko abase-Efesu,+ abathembekileko ebunyeni noKrestu Jesu:

2 Kwangathi ningaba nomusa omkhulu nokuthula okuvela kuZimu uBabethu neKosini uJesu Krestu.

3 Akadunyiswe uZimu noYise weKosethu uJesu Krestu ngombana usibusise ngazo zoke iimbusiso zommoya ocwengileko eendaweni zezulwini ngebanga lokuba kwethu sebunyeni noKrestu+ 4 njengombana asikhetha bona sibe munye naye* ngaphambi kokusungulwa kwephasi* bona kufuze sicwengeke begodu singabi nebala+ phambi kwakhe ngombana siyamthanda. 5 Ngombana wasikhetha kusesengaphambili+ bona simbelekelwe njengamadodanakhe+ ngoJesu Krestu, ngokuvumelana nalokho okumthabisako nentandwakhe+ 6 bona kudunyiswe umusakhe omkhulu+ ophazimulako asinikele wona ngesihle ngaloyo amthandako.+ 7 Ngaye siyatjhatjhululwa ngesihlengo ngebanga leengazi zakhe,+ okutjho, ukulitjalelwa kwemitjhaphwethu+ ngokuvumelana nokunotha komusa omkhulu kaZimu.

8 Umusa omkhulu lo, uwenze waphuphuma kithi kikho koke ukuhlakanipha nokuzwisisa 9 ngokuthi asenze sazi ifihlo ecwengileko+ yentandwakhe. Kuvumelana nalokho okumthabisako ukuthi yena ngokwakhe wanqopha 10 bona kube nendlela yokunqophisa izinto lokha isikhathi esibekiweko sizaliseka bona abuthele zoke izinto kuKrestu, izinto ezisezulwini nezinto ezisephasini.+ Iye, kuye 11 loyo esimunye naye begodu esabelwe bona sibe ziindlalifa naye+ njengombana sikhethwe kusesengaphambili ngokuvumelana nomnqopho waloyo owenza zoke izinto njengombana aqunta ngokuvumelana nentandwakhe 12 bona kuthi thina esingebokuthoma ukuba nethemba kuKrestu sisebenzele idumo lephazimulwakhe. 13 Kodwana nani naba nethemba kuye ngemva kokuzwa ilizwi leqiniso, iindaba ezimnandi zesindiswenu. Kuthe nasenikholiwe, uZimu wanibeka itshwayo+ ngommoya ocwengileko othenjisiweko, 14 okukuqinisekiswa kusesengaphambili* ngelifa lethu,+ ngomnqopho wokutjhaphulula ipahla kaZimu+ ngesihlengo,+ kube lidumo eliphazimulako kuye.

15 Kungakho nami, solo ngezwa ngokukholwa eninakho eKosini uJesu nethando enilitjengisa boke abacwengileko, 16 ngingalisi ukuthokoza ngani. Ngiragela phambili ngikhuluma ngani emithandazwenami 17 bona uZimu weKosethu uJesu Krestu, uBaba wephazimulo, aninikele ukuhlakanipha nesambulo selwazini elinembileko ngaye.+ 18 Uvule amehlo weenhliziyo zenu bona nazi ukuthi unibizele kiliphi ithemba bona ngibuphi ubunjinga obuphazimulako abuphathele abacwengileko njengelifa+ 19 nokuthi abumadaniseki kangangani ubukhulu bamandlakhe kithi makholwa.+ Ubukhulu bawo bubonakala endleleni awasebenzise ngayo amandlakhe 20 endabeni kaKrestu, nakamvusa kwabafileko begodu amhlalisa ngesidleni sakhe+ eendaweni zezulwini, 21 phezulu khulu kinanyana ngimuphi urhulumende nelawulo namandla nobukhosi, naphezu kwananyana ngiliphi igama ekhelathiywa,+ ingasi ephasineli kwaphela kodwana nakwelizako. 22 Godu ubeke zoke izinto ngaphasi kweenyawo zakhe,+ wamenza ihloko yazo zoke izinto eziphathelene nebandla,+ 23 elimzimbakhe,+ elizaliswe ngaye begodu nguye ophelelisa zoke izinto kibo boke.

2 Ngaphezu kwalokho, uZimu waniphilisa, ngitjho nanyana benifile emitjhaphweni nezonweni zenu,+ 2 enakhe nakhamba kizo ngokwendlela yephaseli,+ ngokombusi welawulo lomoya,+ ummoya+ kwanjesi osebenza kwabangalaleliko. 3 Hlangana nabo nathi soke sakhe saziphatha ngokuvumelana neemfiso zenyama,+ senza intando yenyama neyemicabangwethu+ begodu ngokwemvelo besibantwana belaka+ njengabo boke. 4 Kodwana uZimu unomusa omkhulu+ begodu ngebanga lethando lakhe elikhulu asithande ngalo,+ 5 usenze saphila kunye noKrestu, ngitjho nanyana besifile ezonweni+ ngomusa omkhulu nisindisiwe. 6 Ngaphezu kwalokho, wasivusa ndawonye, wasihlalisa ndawonye eendaweni zezulwini ebunyeni noKrestu Jesu+ 7 bona ephasini elizako atjengise ukunotha okudluleleko komusakhe omkhulu ngesirhawu anaso kithi ebunyeni noKrestu Jesu.

8 Ngomusa omkhulu lo nisindisiwe ngokukholwa,+ ingasi ngebanga lokuthi niyakolodwa kunalokho, kungebanga lesipho sakaZimu. 9 Awa akusingebanga lemisebenzi+ bona kungabi nomuntu oba nebanga lokuzikhakhazisa. 10 Simsebenzi wezandla zakaZimu begodu sibunjwe+ ebunyeni noKrestu Jesu+ bona senze imisebenzi emihle, uZimu asilungiselele yona kusesengaphambili bona sikhambe kiyo.

11 Yeke khumbulani nina bantu beentjhaba ngenyama bona benibizwa ngokuthi “anikasoki” ngilabo “abasokileko” enyameni ngezandla zabantu. 12 Ngesikhatheso beninganaKrestu, nihlukanisiwe nesitjhaba sakwa-Israyeli, nibabantu abangaziwako eemvumelwaneni zesithembiso;+ beninganathemba begodu beninganaZimu ephasini.+ 13 Kodwana nje ebunyeni noKrestu Jesu, nina enakhe naba kude seniseduze ngeengazi zakaKrestu. 14 Ngombana yena ukuthula kwethu,+ loyo owenza iinqhema ezimbili zaba nobunye,+ watjhabalalisa neboda ebeliphakathi kwazo lizihlukanisile.+ 15 Ngenyamakhe waqeda ubutha, umThetho wemiyalo obewuphethe imithetho bona enze iinqhema ezimbili zibe munye naye zibe mumuntu munye omutjha+ begodu enze ukuthula, 16 enze neenqhema zombilezi ezisemzimbeni munye bona zibuyisane ngokuzeleko noZimu ngesigodo sokuhlunguphazwa*+ ngombana ngaye ubulele ubutha.+ 17 Begodu weza, watjhumayela iindaba ezimnandi zokuthula kini ebenikude nokuthula kilabo abaseduze 18 ngebanga lakhe thina soke eenqhemeni ezimbilezi, sitjhaphulukile ukutjhidela kuBaba ngommoya munye.

19 Ngalokho anisesebabantu abangaziwako abavela kwezinye iintjhaba+ kodwana nizizakhamuzi+ ezikunye nabacwengileko namalunga wendlu kaZimu+ 20 begodu nakhelwe phezu kwesisekelo sabapostoli nabaphorofidi,+ kukulapho uKrestu Jesu alilitje eliyihloko lesisekelo.+ 21 Ebunyeni naye umakhiwo woke uhlanganiswa ndawonye ngokuvumelana,+ ukhula uba lithempeli lakaJehova.*+ 22 Ebunyeni naye nani nakhiwa ndawonye bona nibe yindawo uZimu azokuhlala kiyo ngommoya.+

3 Ngombana ngebangeli, mina Powula, isibotjhwa+ sakaKrestu Jesu bona kuzuze nina, bantu beentjhaba 2 nangabe kwamambala, nezwa ngobuphathi+ bomusa omkhulu kaZimu obanikelwa mina ngebanga lenu 3 bona ngaziswa ifihlo ecwengileko ngesambulo njengombana ngitlolile phambilini ngokurhunyeziweko. 4 Nje-ke nanifunda lokhu, ningalemuka ukuzwisisa kwami ifihlo ecwengileko+ kaKrestu. 5 Kwezinye iinzukulwana ifihlo le akhenge yambulwe emadodaneni wabantu njengombana nje yambulwa ngommoya ebapostolini bakhe abacwengileko nebaphorofidini+ 6 ukuthi abantu beentjhaba kufuze ebunyeni noKrestu Jesu nangeendaba ezimnandi, babe ziindlalifa namalunga womzimba+ akunye nathi begodu badle nathi isithembiso. 7 Ngibe sisebenzi salokhu ngokuvumelana nesipho sesihle somusa omkhulu kaZimu enganikelwa sona ngokusebenza kwamandlakhe.+

8 Kimi, umuntu omncani ngitjho nakomncani kinabo boke abacwengileko,+ nganikelwa umusa omkhulu lo+ bona ngimemezele eentjhabeni iindaba ezimnandi ezimalungana nokunotha kwakaKrestu okungaphenyekiko 9 begodu kufuze ngenze woke umuntu abone ukunqotjhiswa kwefihlo ecwengileko+ ebeyifihleke isikhathi eside kuZimu, obumbe zoke izinto. 10 Lokhu kwaba njalo bona nje, ngebandla,+ kwambulwe kiborhulumende nakubalawuli eendaweni zezulwini ukuhlakanipha kwakaZimu okubonakaliswa ngeendlela ezinengi ezihlukahlukeneko.+ 11 Lokhu kuvumelana nomnqopho ongapheliko awenza malungana noKrestu,+ uJesu iKosethu, 12 ngaye sinetjhaphuluko yokukhuluma begodu ngesibindi singatjhidela kuZimu+ ngokutjhaphulukileko ngokukholwa kwethu kuye. 13 Nje-ke nginibawa bona ningapheli amandla ngebanga lesizi engilifumana ngokusiza nina ngombana lokhu kutjho idumo kini.+

14 Ngombana ngebangeli ngiguqa ngamadolo kuBaba, 15 loyo yoke imindeni yezulwini neyephasini ethiyelelwe ngaye. 16 Ngithandazela ukuthi anivumele ngephazimulwakhe ekulu bona nenziwe nibe namandla emuntwini eninguye ngaphakathi,+ ngamandla wommoyakhe 17 begodu ngokukholwa kwenu uKrestu ahlale eenhliziyweni zenu ngethando.+ Kwangathi ningaba nemirabhu eqinileko,+ nidzimelele esisekelweni+ 18 bona kunye nabo boke abacwengileko nikghone kuhle ukuzwisisa ngokuzeleko ububanzi, ubude, ukuphakama nokutjhinga kweqiniso, 19 nokwazi ithando lakaKrestu,+ elidlula loke ilwazi bona nizaliswe ngalo kufikela esilinganisweni sakho koke ukuphelela kwakaZimu.

20 Nje-ke kiloyo okghona ukwenza ngokwamandlakhe asebenza kithi,+ akenze okukhulu ngokungalinganisekiko ngaphezu kwazo zoke izinto esizibawako namkha esizicabangako,+ 21 idumo alibe kuye ngebandla nangoKrestu Jesu kizo zoke iinzukulwana bekube ngokungapheliko. Amen.

4 Nje-ke, mina sibotjhwa+ eKosini, ngiyanirabhela bona nikhambe ngokufanele+ ukubizwa enabizelwa khona, 2 ngakho koke ukuthobeka+ nommoya ophasi, ngesineke,+ nibekezelelana ngethando,+ 3 nenze koke okusemandlenenu bona nihlale ebunyeni bommoya nesibopho esibumbanisako sokuthula.+ 4 Kunomzimba munye+ nommoya munye,+ njengombana nabizelwa ethembeni linye+ lokubizwa kwenu; 5 kuneKosi yinye,+ ukukholwa kunye, ibhabhadiso linye; 6 kunoZimu munye onguYise wabo boke, ophezu kwabo boke, osebenza ngabo boke begodu okibo boke.

7 Nje-ke ngamunye wethu wanikelwa umusa omkhulu ngokwendlela uKrestu alinganise ngayo isipho sesihle.+ 8 Ngombana umtlolo uthi: “Nakakhuphukela phezulu wathatha iinthunjwa; waphana ngezipho ezibabantu.”+ 9 Nje-ke amezwi athi ‘wakhuphuka,’ atjho ukuthini? Atjho nokobana wehlela eendaweni eziphasi, okutjho ukuthi, ephasini. 10 Yena loyo owehlako nguye owakhuphukela+ ngaphezu kwalo loke izulu,+ bona enze zoke izinto zizaliseke.

11 Waphana ngabanye bona babe bapostoli,+ abanye babe baphorofidi,+ abanye babe bavangeli,*+ abanye babe belusi nabafundisi,+ 12 ngehloso yokulungisa* abacwengileko bona benze umsebenzi wokuba yinceku, bakhe umzimba kaKrestu,+ 13 bekube kulapho soke sifikelela ubunye bokukholwa nobelwazi elinembileko leNdodana kaZimu, ekubeni babantu abakhule ngokupheleleko,*+ sikhulele ekuvuthweni njengoKrestu. 14 Yeke singasaba bantwana, abaphetjhulwa magagasi begodu baphoselwa le nale nginanyana ngimuphi ummoya wefundiso+ yobuqili babantu, ngamaqhingabo wokukhohlisa. 15 Kodwana ngokukhuluma iqiniso, asikhuleni ngethando kizo zoke izinto kiloyo oyihloko, uKrestu.+ 16 Ngaye umzimba woke+ uhlanganiswa ndawonye ngokuvumelana bewenziwe usebenzisane ngokuthi elinye nelinye ilunga linikele lokho okutlhogekako. Ilunga ngalinye nalisebenza kuhle, lokho kuba nomthelela ekukhuleni komzimba njengombana wona ngokwawo uzakha ethandweni.+

17 Yeke ngilokhu engikutjhoko nengifakaza ngakho eKosini ukuthi ningasakhamba njengombana iintjhaba zikhamba,+ ngokucabanga kwazo okungasizi ngalitho.+ 18 Zisebumnyameni ngokwengqondo begodu zihlukaniswe nokuphila okuvela kuZimu ngebanga lokungafuni ukwazi uZimu nangebanga lokuqina kweenhliziyo zazo. 19 Njengombana bangasanawo namancani amazizo wokuziphatha okuhle, bazinikela ekwenzeni amanyala bangabi neenhloni*+ bona benze yoke imihlobo yokusilaphala ngokuba marhamaru.

20 Kodwana azange nifunde bona uKrestu unjalo, 21 nangabe kwamambala namuzwa begodu nafundiswa ngaye njengombana iqiniso likuJesu. 22 Nafundiswa bona nihlubule ubuntu obudala+ obuvumelana nendlela ebeniziphatha ngayo esikhathini esidlulileko begodu obonakaliswako ngokuvumelana neenkanuko zabo ezikhohlisako.+ 23 Nokuthi kufuze niragele phambili nenziwe batjha emandleni alawula imikhumbulwenu*+ 24 begodu kufuze nimbathe ubuntu obutjha+ obadalwa ngokuvumelana nentando kaZimu ngokulunga kwamambala nokuthembeka.

25 Nje-ke njengombana senihlubule ukukhohlisa, ngamunye wenu akakhulume iqiniso nomakhelwanakhe+ ngombana nimalunga womunye nomunye.+ 26 Silingekani kodwana ningoni;+ ilanga lingatjhingi nisasilingekile;+ 27 ningamnikeli uDeveli ithuba.*+ 28 Owebako akalise ukweba; kunalokho, akasebenze budisi, enze umsebenzi omuhle ngezandla zakhe+ bona abe nokuthileko angakuhlanganyela nomuntu odududu.+ 29 Kungaphumi ilizwi elibolileko emlonyenenu+ kodwana akuphume okuhle kwaphela ngomnqopho wokwakha kuye ngetlhogeko bona nidlulisele okuzuzisako kwabezwako.+ 30 Godu ningawenzi ube lisizi ummoya ocwengileko kaZimu,+ ngawo enitshwayelwe+ ilanga lokutjhatjhululwa ngesihlengo.+

31 Hlubulani yoke imihlobo yehloyo elimazako,+ ukusilingeka, ilaka, ukuphudlhelana, ikulumo elimazako,+ nayo yoke into elimazako.+ 32 Kodwana yibani nomusa komunye nomunye, nirhawukelane ngesisa,+ nilibalelane ngokutjhaphulukileko njengombana noZimu anilibalele ngokutjhaphulukileko ngoKrestu.+

5 Ngalokho lingisani uZimu+ njengabantwana abathandekako, 2 ragelani phambili nikhamba ethandweni+ njengombana noKrestu asithanda*+ bewazinikela ngebanga lethu* bona abe mhlatjelo, iphunga elimnandi kuZimu.+

3 Ukuziphatha kumbi ngokomseme* nayo yoke imihlobo yokusilaphala namkha ukuba marhamaru akungaphathwa nokuphathwa hlangana nani+ njengombana kufanele abantu abacwengileko+ 4 namkha ukuziphatha okuhlazisako namkha ikulumo ebudlhadlha namkha amahlaya asilapheleko,+ izinto ezingakafaneli, kunalokho akuthokozwe uZimu.+ 5 Ngombana niyakwazi lokhu, nikulemukile ngokwenu ukuthi akunamuntu oziphatha kumbi ngokomseme*+ namkha umuntu osilapheleko namkha umuntu omarhamaru,+ okutjho ukulotjha iinthombe, ozokuzuza ilifa emBusweni kaKrestu noZimu.+

6 Ningavumeli muntu anikhohlise ngamezwi angatjho litho ngombana ngebanga lezinto ezinjalo ilaka lakaZimu liyeza phezu kwabangalaleliko. 7 Ngalokho ningabi bahlanganyeli nabo 8 ngombana benibumnyama kodwana nje nikukhanya+ malungana neKosi.+ Ragelani phambili nikhamba njengabantwana bokukhanya 9 ngombana iinthelo zokukhanya zihlanganisa yoke imihlobo yobuhle, yokulunga neyeqiniso.+ 10 Ragelani phambili niqiniseka ukuthi khuyini okwamukelekako+ eKosini; 11 nilise ukuhlanganyela emisebenzini engatheliko engeyobumnyama;+ kunalokho yembulani lokho engikho. 12 Ngombana izinto azenza emsitheleni ziyahlazisa ngitjho nokukhuluma ngazo. 13 Nje-ke zoke izinto ezambulwako* zenziwa zibonakale ngomkhanyo ngombana zoke izinto ezenziwa zibonakale, zikukhanya. 14 Ngalokho, kuthiwa: “Vuka, wena oleleko, uvuke kwabafileko+ noKrestu uzokuphazimula phezu kwakho.”+

15 Nje-ke tjhejisisani bona indlela enikhamba ngayo ayisinjengeyabantu abangakahlakaniphi kodwana injengeyabahlakaniphileko, 16 nisisebenzise kuhle isikhathi* senu+ ngombana amalanga esiphila kiwo la mambi. 17 Ngebanga lalokhu, lisani ukuba ngabanganangqondo kodwana ragelani phambili nilemuka lokho okuyintando kaJehova.*+ 18 Godu ningadakwa liwayini+ ngombana kilo kunamanyala kodwana ragelani phambili nizaliswa ngommoya. 19 Khulumisanani ngamarhubo, ngeendumiso kuZimu nangeengoma zokulotjha uZimu, bhinani+ nidumise uJehova* ngombhino+ eenhliziyweni zenu,+ 20 nithokoze+ uZimethu uBaba ngaso soke isikhathi ngazo zoke izinto ngegama leKosethu uJesu Krestu.+

21 Zithobeni komunye nomunye+ ekusabeni uKrestu. 22 Abafazi abazithobe emadodenabo+ njengokungathi bazithoba eKosini 23 ngombana indoda iyihloko yomkayo+ njengombana noKrestu ayihloko yebandla,+ okunguye umsindisi womzimba lo. 24 Eqinisweni njengombana ibandla lizithoba kuKrestu, abafazi nabo kufuze bazithobe emadodenabo kikho koke. 25 Madoda, ragelani phambili nithanda abafazi benu+ njengombana noKrestu alithanda ibandla bewazinikela ngebanga lalo+ 26 ukuthi alicwengise ngokulihlanza ngamanzi welizwi+ 27 bona athule ibandla kuye lisephazimulweni yalo, linganabala namkha ukutjhwabana namkha okhunye okunjalo+ kodwana licwengile begodu limsulwa.+

28 Ngendlela efanako amadoda kufuze athande abafazi bawo njengemizimbawo. Indoda ethanda umkayo izithanda yona 29 ngombana akakho umuntu owakhe wazonda umzimbakhe,* kunalokho uyawondla begodu awuthande njengombana noKrestu enza kilo ibandla 30 ngombana simalunga womzimbakhe.+ 31 “Ngalokho indoda izokutjhiya uyise nonina inamathele kumkayo* begodu ababilaba bazokuba yinyama yinye.”+ 32 Ifihlo ecwengileko le+ yikulu. Nje ngikhuluma ngoKrestu nangebandla.+ 33 Nanyana kunjalo, ngamunye wenu kufuze athande umkakhe+ njengombana azithanda yena; ngakwelinye ihlangothi, umfazi kufuze ayihloniphe khulu indodakhe.+

6 Bantwana, lalelani ababelethi benu+ abanobunye neKosi ngombana lokhu kulungile. 2 “Hlonipha uyihlo nonyoko,”+ lo myalo wokuthoma oza nesithembiswesi: 3 “Bona kukukhambele kuhle* begodu uphile isikhathi eside ephasini.” 4 Bobaba, ningabasilingi abantwabenu+ kodwana ragelani phambili nibakhulisa ngesiyalo+ nangesinqophiso sakaJehova.*+

5 Nina ngqila, lalelani amakhosenu wephasini,+ ngokusaba nangokuthuthumela okusuka eenhliziyweni zenu, njengokungathi nilalela uKrestu, 6 ingasi kwaphela naniqaliweko bona nithabise abantu+ kodwana njengeengqila zakaKrestu ezenza intando kaZimu ngomphefumulo woke.*+ 7 Yibani ziingqila ezinommoya omuhle ngasuthi niziingqila zakaJehova,*+ ingasi zabantu 8 ngombana niyazi ukuthi nanyana yini elungileko umuntu ngamunye ayenzako, uzoyifumana godu kuJehova,*+ nanyana asigqila namkha amumuntu otjhaphulukileko. 9 Nani makhosi, ragelani phambili nokubaphatha ngendlela efanako, ningabathuseli ngombana niyazi ukuthi iKosabo neyenu isezulwini+ begodu yona ayikhethululi.

10 Emaswapheleni, ragelani phambili nifumana amandla+ eKosini nebukhulwini bamandlayo. 11 Mbathani izembatho zepi ezipheleleko+ ezivela kuZimu bona nikghone ukujamelana ngokuqinileko namaqhinga kaDeveli 12 ngombana asikurakurani+ neengazi nenyama kodwana sikurakurana naborhulumende, abalawuli, ababusi bephasi bobumnyamobu namabutho wemimoya emimbi+ eendaweni zezulwini. 13 Ngebangeli mbathani izembatho zepi ezipheleleko ezivela kuZimu+ bona nikghone ukudzimelela ngelanga elimbi begodu ngemva kokuqeda koke, nijame niqine.

14 Nje-ke, jamani niqine, nibophe ibhande leqiniso emadininenu,+ nembathe isivikelo sesifuba sokulunga,+ 15 iinyawo zenu zimbathiswe amanyathelo wokulungela ukutjhumayela iindaba ezimnandi zokuthula.+ 16 Ngaphandle kwakho koke lokhu, phathani isihlangu esikhulu sokukholwa,+ enizokukghona ngaso ukucima yoke imicibitjholo evuthako yomumbi.+ 17 Godu, yamukelani isikoporo* sesindiso,+ nesabula yommoya, okulilizwi lakaZimu,+ 18 kukulapho ngawo woke umhlobo wokuthandaza+ nokuncenga niragele phambili nithandaza ngommoya+ ngazo zoke iinkhathi. Bona nenze lokhu, hlalani niphapheme, nibancengele qobe boke abacwengileko. 19 Ningithandazele nami bona nginikelwe amezwi nangivula umlomami bona ngikghone ukukhuluma ngesibindi ekwembuleni ifihlo ecwengileko yeendaba ezimnandi,+ 20 engisebenza njengomzenda+ obotjhwe ngeenketani ngebanga lazo bona ngikhulume ngazo ngesibindi njengombana kufuze ngikhulume.

21 Godu bona nazi ngami nokuthi nginjani, uThikhikhusi,+ umfowethu othandekako nesisebenzi esithembekileko eKosini, uzonazisa koke.+ 22 Ngimthumela kini ngomnqopho lo bona nazi ukuthi sinjani nokuthi aduduze iinhliziyo zenu.

23 Kwanga abafowethu bangaba nokuthula nethando ngokukholwa okuvela kuZimu uBaba neKosini uJesu Krestu. 24 Kwanga umusa omkhulu ungaba nabo boke labo abathanda iKosethu uJesu Krestu ngethando elingapheliko.