INCWADI EYA KWEBEFILIPI

1 UPowula noThimothi, iingqila zakaKrestu Jesu, kibo boke abacwengileko abamunye noKrestu Jesu abaseFilipi+ nabadala* neenceku ezisizako:+

2 Kwangathi ningaba nomusa omkhulu nokuthula okuvela kuZimu uBabethu neKosi uJesu Krestu.

3 Ngithokoza uZimami ngaso soke isikhathi nanginikhumbulako 4 ekurabheleni koke engikwenzela nina noke. Okhunye nokhunye ukurabhela engikwenzako, ngikwenza ngethabo,+ 5 ngebanga lendima eniyidlalileko ekurhatjhweni kweendaba ezimnandi kusukela ngelanga lokuthoma bekube nje. 6 Ngombana ngiyaqiniseka ngalokhu ukuthi loyo owathoma umsebenzi omuhle kini uzowuphelelisa+ bekube lilanga lakaKrestu Jesu.+ 7 Kufanele ngami bona ngicabange qobe ngani noke ngombana nisehliziywenami, nina enibahlanganyeli kunye nami emuseni omkhulu ekubotjhweni kwami,+ ekuvikeleni kunye nekuhlomeni iindaba ezimnandi ngokomthetho.+

8 Ngombana uZimu ungufakazami wokuthi nginihlulukele kangangani noke, nokuthi nginithanda ngendlela uKrestu Jesu bekanithanda ngayo. 9 Nakhu engiragela phambili ngikuthandazela ukuthi ithando lenu liragele phambili landa ngokungeziweko+ ngelwazi elinembileko+ nelemuko elizeleko+ 10 bona niqiniseke ngezinto eziqakatheke khulu+ bona nibe msulwa, ningawisi abanye+ bekube lilanga lakaKrestu 11 nokuthi nizaliswe ngesithelo sokulunga, esifumaneka ngoJesu Krestu,+ kube yiphazimulo nedumo kuZimu.

12 Nje-ke ngifuna nazi bafowethu ukuthi kuhlekuhle ubujamo bami benze iindaba ezimnandi zarhatjheka 13 kangangobana ukubotjhwa kwami+ ngebanga lakaKrestu sekwaziwa+ phakathi kwabo boke abonoGada bomBusi nakibo boke abantu. 14 Nje-ke inengi labafowethu eKosini selinesibindi ngebanga lokubotjhwa kwami, litjengisa nesibindi esikhulu ngokungeziweko sokukhuluma ilizwi lakaZimu ngokungasabi.

15 Kuliqiniso ukuthi abanye batjhumayela ngoKrestu baragwa mumona nombango kodwana abanye batjhumayela ngeenhloso ezihle. 16 Laba besibili bamemezela uKrestu baragwa lithando, ngombana bayazi ukuthi ngikhethelwe ukuvikela iindaba ezimnandi+ 17 kodwana laba bokuthoma bakwenza ngomrhobholo, abakwenzi ngomnqopho omuhle ngombana bafuna ukungibangela imiraro ekubotjhweni kwami. 18 Uba yini umphumela? Kukuthi ngazo zoke iindlela, kungaba ngokuzenzisa namkha ngeqiniso, uKrestu uyamenyezelwa begodu ngiyathaba ngalokho. Eqinisweni, ngizokuragela phambili ngithaba 19 ngombana ngiyazi ukuthi lokhu kuzokubangela ukusindiswa kwami ngokurabhela kwenu+ nokusekelwa mmoya kaJesu Krestu.+ 20 Lokhu kuvumelana nokulindela kwami ngetjiseko nethemba lokuthi angekhe ngiphathiswe iinhloni ngananyana ngiyiphi indlela kodwana ngokuthi ngayo yoke itjhaphuluko yokukhuluma, uKrestu kwanje nanjenganini phambilini, uzokuphakanyiswa ngebanga lomzimbami, kungaba ngokufa+ namkha ngokuphila.

21 Ngombana endabenami, ukuphila kunguKrestu+ nokufa kuyinzuzo.+ 22 Nje-ke nangabe kufuze ngiragele phambili ngiphila enyameni, lokhu kuziinthelo zomsebenzami kodwana lokho ebengizokukhetha, angikwenzi kwaziwe. 23 Ngihlukene phakathi ezintweni ezimbilezi ngombana ngiyakufisa ukutjhatjhululwa nokuba noKrestu,+ kuhlekuhle, khona kungcono khulu.+ 24 Kunalokho, kutlhogeka khulu bona ngihlale enyameni ngebanga lenu. 25 Yeke njengombana ngiqiniseka ngalokhu, ngiyazi ukuthi ngizokuhlala, ngirage nginani noke bona nithuthuke begodu nithabe ekukholweni 26 bona ukuthaba kwenu kuphuphume kuKrestu Jesu ngebanga lami nangiba nani godu.

27 Kwaphela ziphatheni ngendlela efanela iindaba ezimnandi ngoKrestu,+ bona nanyana ngingeza nginibone namkha ngingekho, ngifumane umbiko ngani begodu ngizwe ukuthi nisadzimelele emmoyeni munye, ngomphefumulo munye,*+ nisebenza budisi ngokubambisana ngebanga lokukholwa okusekelwe eendabeni ezimnandi, 28 banganithusi nakancani abaphikisi benu. Yona into le ibufakazi bokutjhatjalaliswa+ kwabo kodwana bokusindiswa kwenu;+ lokhu kuvela kuZimu. 29 Ngombana ninikelwe ilungelo ngebanga lakaKrestu, ingasi lokukholelwa kuye kwaphela kodwana nokutlhaga ngebanga lakhe.+ 30 Ngombana nilwa ipi enangibona ngiyilwa,+ enisezwa bona ngisayilwa nanje.

2 Yeke nangabe kukhona nanyana ngisiphi isikhuthazo kuKrestu, nanyana ngiyiphi induduzo enikelwa ngethando, nanyana ngikuphi ukucabangelana, nanyana ngiliphi ithando nesirhawu, 2 zalisani ithabo lami ngokuba nomkhumbulo ofanako nokuba nethando elifanako, nibe munye ngokupheleleko, ninomcabango munye engqondweni.+ 3 Ningenzi litho ngombango+ namkha ngokuzikhakhazisa+ kodwana ngokuzithoba, nithathe abanye njengabakhulu kunani+ 4 njengombana ningatshwenyeki ngehlalakuhle yenu kwaphela+ kodwana nitshwenyeka nangehlalakuhle yabanye.+

5 Hlalani ninomkhumbulo onjengalowo uKrestu Jesu ebekanawo,+ 6 yena nanyana bekanjengoZimu,+ akhange acabange ukuthatha isikhundla sakaZimu, azenze olingana naye.+ 7 Kodwana wazehlisa waba njengenceku+ begodu waba mumuntu.+ 8 Ngaphezu kwalokho, nakeza njengomuntu, wazithoba begodu walalela bekwaba sekufeni,+ iye, ekufeni esigodweni sokuhlunguphazwa.*+ 9 Ngalokhu, uZimu wamphakamisela esikhundleni esiphezulu+ wamnikela negama elingaphezu kwawo woke amanye amagama+ 10 ukuthi egameni lakaJesu woke amadolo aguqe walabo abasezulwini nalabo abasephasini nalabo abangaphasi kwehlabathi+ 11 begodu woke umuntu kufuze avume tjhatjhalazi ukuthi uJesu Krestu uyiKosi+ kube yiphazimulo kuZimu uBaba.

12 Ngalokho-ke bathandekako bami, njengombana benilalela ngaso soke isikhathi, ingasi kwaphela nangikhona kodwana nanje ngingekho, zimiseleni khulu ukulalela, ragelani phambili nisebenzela ukusindiswa kwenu ngokusaba nangokuhlengezela. 13 Ngombana uZimu nguye oniqinisako, oninikela kokubili isifiso namandla wokusebenza ngebanga lalokho okumthabisako. 14 Ragelani phambili nenza zoke izinto ngaphandle kokububula+ nokuphikisana+ 15 bona nibe msulwa ningabi namlandu, abantwana bakaZimu+ abanganabala hlangana nesizukulwana esikhohlakeleko nesonakeleko,+ hlangana naso nikhanya njengeenkhanyisi ephasini,+ 16 nilibambe ngokuqinileko ilizwi lokuphila.+ Ngalokho ngizokuba nebanga lokuthaba ngelanga lakaKrestu, ngazi ukuthi akhenge ngigijimele ilize namkha ngikhandlekele ilize. 17 Ngitjho nanyana ngithululwa njengomnikelo wesiselo+ emhlatjelweni+ nemsebenzini ocwengileko ukukholwa kwenu okunirholele kiwo, ngithaba kunye nani noke. 18 Ngendlela efanako nani kufuze nithabe nami.

19 Nje-ke nginethemba lokobana nangabe kuyintando yeKosi uJesu, nginithumele uThimothi+ msinyana bona ngikhuthazeke nangifumana iindaba eziphathelene nani. 20 Ngombana anginaye omunye onomkhumbulo ofana newakhe ozonitlhogomela kwamambala kilokho okunitshwenyako. 21 Ngombana boke abanye bazifunela kwabo kwaphela, abanandaba nokufunwa nguJesu Krestu. 22 Kodwana niyabazi ubufakazi abunikelako ngaye ukuthi njengomntwana+ osebenza noyise, wasebenza budisi nami ukurhatjha iindaba ezimnandi. 23 Ngalokho-ke nguye enginethemba lokumthumela msinyana nasele ngibonile ukuthi izinto zingijamele njani. 24 Kwamambala, ngiyaqiniseka eKosini ukuthi nami ngizokuza msinyana.+

25 Kodwana kwanje ngibona kuqakathekile bona nginithumele u-Ephafrodithu, umfowethu, isisebenzi engikunye naso, isotja engikunye nalo, isithunywa senu nenceku engisiza ngalokho engikutlhogako+ 26 njengombana akhanukela ukunibona noke begodu agandelelekile ngombana nezwa ukuthi khewagula. 27 Kuliqiniso bona khewagula bewapheze wafa kodwana uZimu waba nomusa kuye, kuhlekuhle, ingasi kuye kwaphela kodwana nakimi ukuthi ngingabi nobuhlungu phezu kobuhlungu. 28 Nje-ke, ngimthumela kini ngokurhaba okukhulu ukuthi nanimbonako nithabe godu nami ngingatshwenyeki khulu. 29 Mamukeleni ngokujayelekileko eKosini ngethabo loke begodu niragele phambili niwaphatha ngethando amadoda anjalo+ 30 ngombana wapheze wafa ngebanga lomsebenzi kaKrestu,* afaka ukuphila kwakhe engozini* bona avale isikhundla sokungabi khona kwenu lapha bona ningisize.+

3 Emaswapheleni, bafowethu, ragelani phambili nokuthaba eKosini.+ Akusimraro kimi ukunitlolela izinto ezifanako ngombana lokhu kuvikela nina.

2 Tjhejani labo abanjengezinja; tjhejani labo ababangela ukulimala; tjhejani labo abakhuthaza ukusoka.*+ 3 Ngombana thina singilabo abasokwe kwamambala,+ abenza umsebenzi ocwengileko ngommoya kaZimu nangokuzikhakhazisa kuKrestu Jesu+ begodu esingasekeli ukuzithemba kwethu enyameni 4 nangabe kunomuntu onamabanga wokuzithemba enyameni, eqinisweni ngimi.

Nangabe omunye umuntu ucabanga ukuthi unamabanga wokuzithemba enyameni, mina nginangeziweko: 5 ngasokwa ngelanga lobunane,+ ngingowesitjhaba sakwa-Israyeli, wekoro kaBhenjamini, ngimHebheru obelethwa maHebheru;+ malungana nomthetho, ngimFarisi;+ 6 malungana netjiseko, ngahlunguphaza ibandla;+ malungana nokulunga okusekelwe emthethweni, ngazibonakalisa ngimsulwa. 7 Nanyana kunjalo, izinto ebezizuzisa mina, ngiziqale njengokulahlekelwa* ngebanga lakaKrestu.+ 8 Ukungezelela kilokho, eqinisweni ngiqala zoke izinto njengokulahlekelwa ngebanga lelwazi lakaKrestu Jesu iKosami elisezingeni eliphezulu. Ngebanga lakhe ngilahle zoke izinto begodu ngiziqala njengeenzibi ezinengi bona ngizuze uKrestu 9 nokuthi ngifumaneke ngimunye naye, ingasi ngokulunga kwami ekulandeleni umThetho kodwana ngebanga lokulunga okuza ngokukholwa+ kuKrestu,+ ukulunga okuvela kuZimu okusekelwe ekukholweni.+ 10 Umnqophwami kukwazi yena namandla wokuvuswa kwakhe+ nokuhlanganyela ekutshwenyekeni kwakhe,+ ngizinikele ekufeni okunjengekwakhe,+ 11 ukubona ukuthi kungenzeka na ngifumane ivuko lokuthoma kwabafileko.+

12 Ingasi ukuthi sengilifumene namkha sengenziwe ngaphelela kodwana ngilwela+ ukubona ukuthi nami ngingakubamba na lokho uKrestu Jesu angikhethele khona.+ 13 Bafowethu, okwanjesi angiziqali njengolibambileko kodwana kunento yinye eqinisekileko: Ukukhohlwa izinto ezingemva+ nokuphikelela phambili ezintweni ezisezako,+ 14 Ngiphikelela emnqophweni wokufumana unongorwana+ wokubizwa kwaphezulu+ kwakaZimu ngoKrestu Jesu. 15 Nje-ke, akuthi labo abavuthiweko+ hlangana nathi babe nomkhumbulo lo, begodu nangabe utjhigamele ekucabangeni ngenye indlela, uZimu uzokwambulela umkhumbulo ofaneleko. 16 Nanyana kunjalo, ngezinga esesithuthuke ngalo, asirageleni phambili nokukhamba ngokuhlelekileko endleleni efanako le.

17 Ngilingisani ngobunye,+ bafowethu, niqalisise labo abakhamba endleleni evumelana nesibonelo esinibekele sona. 18 Ngombana banengi ebengijayele ukukhuluma ngabo kodwana nje, ngikhuluma ngabo ngeenyembezi, bakhamba njengamanaba wesigodo sokuhlunguphazwa* sakaKrestu. 19 Ukuphela kwabo kutjhatjalaliswa, uzimabo mathumbabo, iphazimulwabo kuhlekuhle kuhlaziseka kwabo begodu babeke imikhumbulwabo ezintweni zephasi.+ 20 Kodwana sizizakhamuzi+ zezulwini+ begodu simlindele ngetjiseko umsindisi ovela lapho, iKosi uJesu Krestu,+ 21 ozokutjhugulula umzimbethu obogabogako bona ube njengomzimbakhe ophazimulako,+ ngamandlakhe amakhulu akghone ukwenza koke bona kube ngaphasi kwelawulo lakhe.+

4 Nje-ke, bafowethu engibathandako nengibahlulukelako, nina enikuthaba kwami nesihlohlo sami,+ dzimelelani+ ngendlela le eKosini, bathandekako bami.

2 Ngikhuthaza u-Eyodiya noSintike bona babe nomkhumbulo ofanako eKosini.+ 3 Ngiyakubawa nawe godu njengesisebenzi samambala esikunye nami bona uragele phambili usiza abafazaba abasebenze budisi babambisene nami ngebanga leendaba ezimnandi, kunye noKlemente nazo zoke iinsebenzi ezikunye nami, lezo amagamazo asencwadini yokuphila.+

4 Hlalani nithabile eKosini. Ngiyabuyelela ngithi: Thabani!+ 5 Ukubonelela kwenu+ akwaziwe ngibo boke abantu. IKosi iseduze. 6 Ningatshwenyeki ngalitho+ kodwana kikho koke, iimbawo zenu azaziwe nguZimu+ ngomthandazo, ngokurabhela kunye nokuthokoza 7 begodu ukuthula+ kwakaZimu okudlula koke ukuzwisisa kuzokuvikela iinhliziyo zenu+ nemicabangwenu ngoKrestu Jesu.

8 Kwamaswaphela bafowethu nanyana ngiziphi izinto eziliqiniso nanyana ngiziphi izinto eziqakathekileko nanyana ngiziphi izinto ezilungileko nanyana ngiziphi izinto ezimsulwa nanyana ngiziphi izinto ezithandekako nanyana ngiziphi izinto okukhulunywa kuhle ngazo nanyana ngiziphi izinto ezihle nanyana ngiziphi izinto ezifanelwa kudunyiswa, ragelani phambili nicabanga* ngezintwezi.+ 9 Izinto enazifundako, nazamukela, nazizwa benazibona ngokuphathelene nami, yenzani zona,+ uZimu wokuthula uzokuba nani.

10 Ngithaba khulu eKosini ngokuthi emaswapheleni nikuvuselele ukutshwenyeka kwenu ngami.+ Nanyana benitshwenyekile ngami, beninganalo ithuba lokukutjengisa. 11 Angitjho lokhu ngombana kukhona engikutlhogako, ngifunde ukwaneliseka nanyana ngisebujamweni obunjani.+ 12 Ngiyazi ukuthi kunjani ukuba nokuncani+ nokuba nokunengi. Kikho koke begodu kibo boke ubujamo ngifunde ifihlo yokusutha nokulamba, yokuba nokunengi nokuba dududu. 13 Nginamandla kikho koke ngebanga lalowo ongipha amandla.+

14 Nanyana kunjalo, nenze kuhle ngokuhlanganyela nami esizini lami. 15 Kuhlekuhle, nina beFilipi niyazi nokuthi ekuthomeni kokumenyezelwa kweendaba ezimnandi, nangisuka eMasedoniya, alikho ibandla elahlanganyela nami endabeni yokupha nokwamukela, ngaphandle kwenu ninodwa+ 16 ngombana ngesikhathi ngiseThesalonika, nangithumela okuthileko engikutlhogako ingasi kanye kodwana kabili. 17 Ingasi bona ngifuna isipho kodwana ngifuna isithelo esizokwandisa umnothwenu. 18 Kunalokho, nginokungaphezu kwalokho engikutlhogako. Nginayo yoke into njengombana sengifumene lokho enikuthumele ngo-Ephafrodithu,+ iphunga elimnandi,+ umhlatjelo owamukelekako, omthabisa khulu uZimu. 19 Ngebanga lalokho uZimami uzoninikela koke enikutlhogako+ ngokuya ngokunotha kwakhe ngephazimulo ngoKrestu Jesu. 20 Nje-ke iphazimulo ayibe kuZimethu uBaba bekube ngokungapheliko. Amen.

21 Ningilotjhisele boke abacwengileko abasebunyeni noKrestu Jesu. Abafowethu abanami bayanilotjhisa. 22 Boke abacwengileko kodwana khulukhulu bendlu kaKhesari,+ bayanilotjhisa.

23 Umusa omkhulu weKosi uJesu Krestu awube nommoya eniwutjengisako.