INCWADI EYA KWEBEKOLOSE

1 UPowula, okuyintando kaZimu bona abe mpostoli kaKrestu Jesu noThimothi+ umfowethu, 2 kwabacwengileko nabafowethu abathembekileko abasebunyeni noKrestu eKolose:

Kwanga ningaba nomusa omkhulu nokuthula okuvela kuZimu uBabethu.

3 Sithokoza uZimu qobe, uBaba weKosethu uJesu Krestu, nasinithandazelako, 4 soloko sezwa ngokukholwa kwenu kuKrestu Jesu nethando eninalo ngabo boke abacwengileko 5 ngebanga lethemba enibekelwe lona ezulwini.+ Nezwa phambilini ngethembeli ngomlayezo weqiniso leendaba ezimnandi 6 ezifike kini. Njengombana iindaba ezimnandi zithela iinthelo begodu zanda kilo loke iphasi,+ ngilokho ezikwenzako nakini kusukela ngelanga enezwa ngalo begodu nawazi ngokunembileko umusa omkhulu kaZimu ngeqiniso. 7 Ngilokho enakufunda ku-Ephafrasi+ inceku ethandekako esikunye nayo, osisebenzi sakaKrestu ngebanga lethu. 8 Wasazisa nangethando lenu elivezwa ngommoya.

9 Kungebangeli nathi kusukela ngelanga esezwa ngalo, singakhenge silise ukunithandazela+ nokunibawela bona nizaliswe ngelwazi elinembileko+ lentandwakhe kikho koke ukuhlakanipha nokuzwisisa okunikelwa mmoya kaZimu+ 10 ukuthi nikhambe ngokufaneleko kuJehova* bona nimthabise ngokupheleleko njengombana niragela phambili nithela iinthelo kiyo yoke imisebenzi emihle begodu nikhula elwazini elinembileko lakaZimu;+ 11 kwanga ningaqiniswa ngawo woke amandla ngokuvumelana namandlakhe aphazimulako+ bona nikghodlhelele ngokupheleleko ngokubekezela nangethabo 12 njengombana nithokoza uBaba, owanenza nafanelekela ukuhlanganyela elifeni labacwengileko+ ekukhanyeni.

13 Wasisindisa emandleni wobumnyama,+ wasidlulisela embusweni weNdodanakhe ethandekako, 14 ngayo sifumana ukutjhatjhululwa kwethu ngesihlengo, ukulitjalelwa kwezono zethu.+ 15 Yona imfanekiso kaZimu ongabonakaliko,+ izibulo layo yoke indalo;+ 16 zoke ezinye izinto ezulwini nephasini zadalwa ngayo, izinto ezibonakalako nezinto ezingabonakaliko,+ kungaba ziinhlalo zobukhosi namkha ububusi namkha aborhulumende namkha abalawuli. Zoke ezinye izinto zadalwa ngayo+ begodu zadalelwa yona. 17 Godu yona ingaphambi kwazo zoke ezinye izinto+ begodu ngayo zoke ezinye izinto zenziwa zaba khona, 18 iyihloko yomzimba, okulibandla.+ Yona isithomo, izibulo kwabafileko+ bona ibe ngeyokuthoma kizo zoke izinto 19 ngombana uZimu wakuthabela bona koke ukuphelela kuhlale kiyo+ 20 begodu ngayo abuyisane nazo zoke izinto+ ngokwenza ukuthula ngeengazi+ eyaziphalaza esigodweni sokuhlunguphazwa,* kungaba zizinto zephasini namkha zizinto ezisezulwini.

21 Nina enakhe naba kude noZimu begodu nimanaba ngombana imikhumbulwenu beyisemisebenzini emimbi, 22 nje ubuyisane nani ngomzimba wenyama waloyo owafako bona aniveze nicwengile, ninganabala begodu ninganamlandu phambi kwakhe+ 23 kwaphela nangabe niragela phambili ekukholweni,+ nidzimelele esisekelweni+ begodu niqine,+ ningatjhidiselwa kude nethemba leendaba ezimnandi enazizwako nezatjhunyayelwa kiyo yoke indalo engaphasi kwezulu.+ Mina Powula ngaba sisebenzi+ seendaba ezimnandezi.

24 Nje-ke ngiyathaba ekutlhageni kwami ngebanga lenu+ begodu ngiqalene nokutshwenyeka kwakaKrestu okusatlhayelako enyamenami ngebanga lomzimbakhe,+ okulibandla.+ 25 Ngibe sisebenzi sebandleli ngokuvumelana nobuphathi+ obuvela kuZimu enganikelwa bona ukuthi kuzuze nina bona ngitjhumayele ilizwi lakaZimu ngokupheleleko, 26 ifihlo ecwengileko+ ebeyifihlekile ephasini+ neenzukulwaneni ezidlulileko. Kodwana nje seyambuliwe kwabacwengileko bakhe,+ 27 labo uZimu athabele ukubazisa umnotho ophazimulako wefihlo ecwengileko le,+ okunguKrestu asebunyeni nani, ithemba lephazimulwakhe.+ 28 Nguye esimmemezelako, esiyelelisa begodu sifundise boke abantu ngakho koke ukuhlakanipha bona siveze woke umuntu aphelele ebunyeni noKrestu.+ 29 Ngebanga lalokhu, ngisebenza budisi, ngiyazikhandla ngamandlakhe asebenza ngaphakathi kwami.+

2 Ngombana ngifuna nilemuke ukuthi ngikurakura khulu kangangani ngebanga lenu, ngebanga lalabo abaseLawodikeya+ nangebanga labo boke abangakhenge khebangibone.* 2 Bona iinhliziyo zabo ziduduzeke,+ zibe yinyanda yinye ethandweni+ nokuthi zibe nabo boke ubunjinga obumphumela wesiqinisekiso esizeleko sokuzwisisa kwabo bona bazuze ilwazi elinembileko lefihlo ecwengileko kaZimu, okunguKrestu.+ 3 Kuye kufihlwe ngobuthakgha woke amagugu wokuhlakanipha nelwazi.+ 4 Ngitjho lokhu bona kungabi namuntu onikhohlisa ngamezwi wobuqili. 5 Ngitjho nanyana ngingasinani ngokomzimba, nginani ngommoya, ngithabela ukubona ukuziphatha ngokuhleleka+ nangokuqina kokukholwa kwenu kuKrestu.+

6 Nje-ke njengombana namukele uKrestu Jesu iKosi, ragelani phambili nikhamba ebunyeni naye, 7 nidzimelele, nakhelwe kuye,+ niqine ekukholweni+ njengombana nafundiswa begodu niphuphuma ngokuthokoza.+

8 Tjhejani bona kungabi namuntu onithumba* ngefundiso yamala nangekohliso elilize+ ngokwesiko labantu, ngokwezinto ezisisekelo zephasi, ingasi ngokukaKrestu 9 ngombana boke ubuntu bakaZimu obupheleleko buhlezi kuye.+ 10 Nje-ke nifumene ukuphelela ngaye, loyo oyihloko yabo boke aborhulumende nabalawuli.+ 11 Ngetjhebiswano lenu naye nani nasokwa ingasi ngokusokwa okwenziwa ngezandla zabantu ngokususa umzimba wenyama+ kodwana ngokusoka okwenziwa nguKrestu.+ 12 Ngombana nibulungwe naye ekubhajadisweni kwakhe+ nangetjhebiswano lenu naye nani navuswa+ noke ngokukholwa kwenu emsebenzini wamandla kaZimu, owamvusa kwabafileko.+

13 Ukungezelela kilokho nanyana benifile ezonweni zenu nebujamwenu bokungasokwa kwenyamenu, uZimu unenze naphila kunye naye.+ Ngomusa usilibalele soke izono zethu,+ 14 wasula nencwadi ebeyitlolwe ngesandla+ ebeyinemithetho+ begodu iphikisana nathi.+ Uyisuse endleleni ngokuyibethela esigodweni sokuhlunguphazwa.*+ 15 Ngaso* uhlubulise aborhulumende nabalawuli, wakhangisa ngabo phambi kwabo boke abantu, wenza kwaziwe ukuthi ubahlulile+ begodu wabadosa njengeembotjhwa.

16 Nje-ke, ningavumeli nanyana ngubani anahlulele ngenikudlako nenikuselako+ namkha ngokugidinga umnyanya namkha ukuthwasa kwenyanga+ namkha isabatha.+ 17 Izintwezo zisithunzi sezinto ezisezako+ kodwana okungokwamambala nguKrestu.+ 18 Akungabi namuntu onithathela umtlomelo,+ othatjiswa kuthobeka kwamala nehlobo lokulotjha leengilozi. Abantu abanjalo bakatelela ezintweni abazibonileko begodu umkhumbulwabo wenyama ubenza bakhukhumale ngokuzikhakhazisa ngaphandle kwebanga, 19 kukulapho bangabambeleli ehloko,+ kiloyo okondliwa ngaye woke umzimba begodu uhlanganiswe ngokuvumelana ngamalunga nemisipha, uragele phambili ukhula ngokukhula okunikelwa nguZimu.+

20 Nangabe nafa noKrestu malungana nezinto ezisisekelo zephasi,+ kubayini niphila ngasuthi niseseyingcenye yephasi ngokuragela phambili nizithoba emiyalweni ethi:+ 21 “Ningabambi namkha ninambithe namkha nithinte”? 22 Imiyalo le iqaliselwe ezintweni ezitjhatjalaliswako ngemva kokusetjenziswa. Le miyalo efundiswa babantu.+ 23 Izintwezi zibonakala zihlakaniphile. Kodwana labo abazenzako bazikhethela indlela abafuna ukulotjha ngayo. Baphatha imizimbabo makghwakghwa+ ngombana bafuna abantu bathi bathobekile. Kodwana izintwezo azisizi ngalitho ekulweni neemfiso zenyama.

3 Nangabe navuswa noKrestu,+ ragelani phambili nifuna izinto zaphezulu, lapho uKrestu ahlezi khona esandleni sokudla sakaZimu.+ 2 Hlalani nidzimelelise iingqondo zenu ezintweni eziphezulu,+ ingasi ezintweni ezisephasini.+ 3 Ngombana nafa begodu ukuphila kwenu bekufihleke noKrestu ebunyeni noZimu. 4 Kuzakuthi uKrestu, okuphila kwethu,+ nakabonakaliswako nani-ke nizokubonakaliswa naye ephazimulwenakhe.+

5 Nje-ke, bulalani amalunga womzimbenu+ asephasini malungana nokuziphatha kumbi ngokomseme,* ukusilaphala, iinkanuko zomseme ezingalawulwako,+ ikanuko elimazako, nokuba marhamaru, okukulotjha iinthombe. 6 Ilaka lakaZimu liyeza ngebanga lezinto ezinjalo. 7 Nani beniziphatha* njalo endlelenenu yokuphila yaphambilini.*+ 8 Kodwana nje kufuze nikususe koke lokhu kini: ilaka, ukusilingeka, ubumbi,+ ikulumo elimazako+ nekulumo eyonakeleko+ emlonyenenu. 9 Ningakhulumi amala komunye nomunye.+ Hlubulani ubuntu* obudala+ kunye nemikghwabo, 10 nimbathe ubuntu obutjha,+ obenziwa bube butjha ngelwazi elinembileko ngokuvumelana nomfanekiso waloyo obudalileko,+ 11 lapho kungekho khona umGirigi namkha umJuda, ukusoka namkha ukungasoki, umuntu ovela kwenye inarha, umSkithi,* isigqila namkha ongasisigqila kodwana uKrestu uzizinto zoke kibo boke.+

12 Ngokunjalo, njengabakhethiweko bakaZimu,+ abacwengileko nabathandwako, mbathani isirhawu nethando,+ umusa, ukuthobeka,+ ummoya ophasi+ nokubekezela.+ 13 Ragelani phambili nibekezelelana begodu nilibalelane ngokutjhaphulukileko+ ngitjho nanyana kungaba khona onebanga lokunghonghoyila ngomunye.+ Njengombana uJehova* anilibalela ngokutjhaphulukileko nani kufuze nenze okufanako.+ 14 Kodwana ngaphezu kwakho koke lokhu, mbathani ithando+ ngombana lisibopho esipheleleko sobunye.+

15 Godu, ukuthula kwakaKrestu akubuse* eenhliziyweni+ zenu ngombana nabizelwa ekuthulenokho ngomzimba munye. Hlalani nithokoza. 16 Ilizwi lakaKrestu alihlale kini ngokunothileko ngakho koke ukuhlakanipha. Ragelani phambili nifundisana begodu nikhuthazana* ngamarhubo,+ iindumiso zakaZimu, iingoma zokulotjha uZimu ezibhinwa ngokuthokoza, nibhinela uJehova* eenhliziyweni zenu.+ 17 Nanyana yini eniyenza ngelizwi namkha ngesenzo, yenzani koke egameni leKosi uJesu, nithokoze uZimu uBaba ngaye.+

18 Nina bafazi, zithobeni emadodenenu+ ngombana lokho kuyathandeka eKosini. 19 Nina madoda, ragelani phambili nithanda abomkenu+ begodu ningababhokeli ngobukhali.+ 20 Nina bantwana, lalelani ababelethi benu kikho koke+ ngombana lokhu kuyithabisa khulu iKosi. 21 Nina bobaba, ningabasilingi abantwabenu+ bona bangadani. 22 Nina ngqila, lalelani amakhosenu wephasini+ kikho koke, ingasi kwaphela nawaniqalileko bona nithabise abantu kodwana ngokuthembeka okuvela ehliziyweni, nangokusaba uJehova.* 23 Nanyana yini eniyenzako, yenzeni ngomphefumulo woke* ngasuthi niyenzela uJehova,*+ ingasi abantu, 24 ngombana niyazi ukuthi umvuzwenu olilifa nizowufumana kuJehova.*+ Yibani ziingqila zeKosi, uKrestu. 25 Ngokuqinisekileko loyo owenza okumbi uzokufumana umvuzo wobumbi abenzileko+ begodu akukho ukukhethulula.+

4 Nina baphathi, phathani iingqila zenu ngendlela elungileko nefaneleko, nazi ukuthi nani ninoMphathi ezulwini.+

2 Phikelelani emthandazweni,+ nihlale niphapheme begodu nithokoza.+ 3 Nisithandazele nathi+ ukuthi uZimu asivulele umnyango bona sitjhumayele ilizwi begodu simemezele ifihlo ecwengileko ngoKrestu, engibotjhwe ngebanga layo+ 4 nokobana ngiyimemezele ngokukhanyako ngendlela engifanele ngenze ngayo.

5 Ragelani phambili nikhamba ngokuhlakanipha nanisebenzelana nabangaphandle, nisisebenzise kuhle isikhathi senu.*+ 6 Amezwenu awabe nomusa ngaso soke isikhathi, anungwe ngetswayi+ bona nazi ukuthi kufuze nimphendule njani umuntu ngamunye.+

7 UThikhikhusi,+ umfowethu othandekako, isisebenzi esithembekileko, isigqila engikunye naso eKosini, uzonitjela zoke iindaba ngami. 8 Ngimthumela kini bona nazi ukuthi sinjani nokuthi aduduze iinhliziyo zenu. 9 Uza no-Onesimusi,+ umfowethu othembekileko nothandekako, ovela hlangana nani; bazonitjela zoke izinto ezenzeka lapha.

10 U-Aristakusi,+ isibotjhwa engikunye naso, uyanilotjhisa noMarkosi+ umzala kaBharinabhasi (loyo enafumana iinqophiso zokobana nimamukele+ nakeza kini) 11 noJesu obizwa ngokuthi nguJustusi, ongowabasokileko. Ngilaba kwaphela abaziinsebenzi engikunye nazo zomBuso kaZimu begodu babe mthombo wenduduzo ekulu* kimi. 12 U-Ephafrasi,+ isigqila sakaKrestu Jesu esivela hlangana nani, uyanilotjhisa. Uhlala azinikela ngebanga lenu emithandazwenakhe bona ekugcineni nikghone ukujama ngokupheleleko begodu niqiniseka ngayo yoke intando kaZimu. 13 Ngombana ngiyamfakazela ukuthi wenza imizamo emikhulu ngebanga lenu nangebanga lalabo abaseLawodikeya neHerapholisi.

14 ULukasi,+ udorhodere othandekako, uyanilotjhisa noDemasi uyanilotjhisa.+ 15 Ningilotjhisele abafowethu abaseLawodikeya nakuNimfasi nebandleni elisemzinakhe.+ 16 Nasele niyifundile incwadi le, hlelani bona ifundwe+ nebandleni lamaLawodikeya nani nifunde leyo evela eLawodikeya. 17 Godu nithi ku-Akhiphasi:+ “Tjheja umsebenzi owawamukela eKosini bona uwenze ngokupheleleko.”

18 Nakhu ukulotjhisa kwami, mina Powula engikutlole ngesandla sami.+ Hlalani nikhumbula ukubotjhwa kwami.+ Umusa omkhulu ube nani.