INCWADI YESIBILI EYA KWEBETHESALONIKA

1 UPowula, uSilvanu* noThimothi,+ ebandleni lebeThesalonika elisebunyeni noZimu uBabethu neKosi uJesu Krestu:

2 Kwanga ningaba nomusa omkhulu nokuthula okuvela kuZimu uBaba neKosi uJesu Krestu.

3 Sikatelelekile bona sihlale sithokoza uZimu ngani, bafowethu. Kufanele lokho ngombana ukukholwa kwenu kukhula ngendlela erarako nethando omunye nomunye wenu analo ngabanye liyakhula.+ 4 Ngebanga lalokho siyazikhakhazisa ngani+ hlangana nawo woke amabandla kaZimu, ngebanga lokukghodlhelela nokukholwa kwenu kikho koke ukuhlunguphazwa nobudisi* eniqalene nabo.*+ 5 Lokhu kubufakazi besahlulelo esilungileko sakaZimu, esirholela ekubeni nithathwe njengabafanelwe mBuso kaZimu, lowo eqinisweni enitlhaga ngebanga lawo.+

6 Lokhu kubandakanya nokuthi kulungile ngoZimu ukubuyisela ngesizi kilabo abanibangela isizi.+ 7 Kodwana nina eniqalene nesizi nizokuphunyuzwa kunye nathi ekwambulweni kweKosi uJesu+ ivela ezulwini ineengilozi zayo ezinamandla+ 8 ngomlilo ovutha amalangabi, njengombana izibuyiselela kilabo abangamaziko uZimu nalabo abangazilaleli iindaba ezimnandi ezimalungana neKosethu uJesu.+ 9 Bona labo bazokugwetjelwa isijeziso sokutjhatjalaliswa ngokungapheliko+ phambi kweKosi nephazimulweni yamandlayo, 10 nayizela ukuzokuphazinyuliswa malungana nabacwengileko bayo begodu ngelangelo izokubatjazwa ngibo boke abatjengise ukukholwa kiyo nani nizokuba hlangana nabo ngombana nabukholwa ubufakazi esabunikelako.

11 Ngilokho esihlala sithandazela bona kwenzeke ukuthi uZimethu anithathe njengabafanele ukufumana ukuphila anibizele kikho+ begodu ngamandlakhe enze ngokupheleleko boke ubuhle obumthabisako nawo woke umsebenzi wokukholwa. 12 Lokhu kwenzeka bona igama leKosethu uJesu liphazinyuliswe kini begodu nani niphazinyuliswe ebunyeni nayo, ngokuvumelana nomusa omkhulu kaZimethu noweKosi uJesu Krestu.

2 Nanyana kunjalo, bafowethu, malungana nokuba khona kweKosethu uJesu Krestu+ nokubuthelwa kwethu ndawonye kuye,+ siyanibawa 2 bona ningasikinywa msinyana emkhumbulwenenu namkha nithuswe mlayezo obonakala ngasuthi uvela kuZimu+ namkha mlayezo okhulunywe ngomlomo namkha yincwadi ebonakala ivela kithi, ethi ilanga lakaJehova*+ lifikile.

3 Akungabi namuntu onilahlekisa* ngananyana ngiyiphi indlela ngombana angekhe lifike ngaphandle kokuthi ukuhlubuka+ kufike qangi begodu umuntu onganamthetho+ ambulwe, indodana yokutjhatjalaliswa.+ 4 Uyaphikisa begodu uziphakamisa ukudlula nanyana yini okuthiwa nguzimu namkha into elotjhwako* bona ahlale ethempelini lakaZimu, uziveza tjhatjhalazi bona unguzimu. 5 Anikhumbuli na ukuthi nangisesenani, bengihlala nginitjela ngezintwezi?

6 Nje niyazi ukuthi khuyini okumliyako bona ambulwe ngesikhathi sakhe esifaneleko. 7 Eqinisweni, ifihlo yokungabi namthethokhu sele isebenza+ kodwana kwaphela bekube kulapho loyo oliyako okwanje asukile endleleni. 8 Nje-ke, eqinisweni, loyo onganamthetho uzokwambulwa, loyo iKosi uJesu ezomsusa ngommoya womlomayo+ begodu imtjhabalalise ngokubonakaliswa kokuba+ khona kwayo. 9 Kodwana ukuba khona kwaloyo onganamthetho kungebanga lemisebenzi yamandla kaSathana+ neembonakaliso zamala neemangaliso+ 10 nakho koke ukukhohlisa okungakalungi+ kilabo abatjhabalalako, njengesijeziso ngombana akhenge bamukele ithando leqiniso ukuthi basindiswe. 11 Kungebangelo uZimu abavumela bona bakhohliswe yifundiso yamala bona bakholwe amezwi wamala+ 12 ukuthi boke bahlulelwe ngombana akhenge bakholwe iqiniso kodwana bathatjiswe kukungalungi.

13 Nanyana kunjalo, qobe sikatelelekile bona sithokoze uZimu ngani, bafowethu abathandwa nguJehova ngombana kusukela ekuthomeni uZimu wanikhethela+ isindiso ngokunicwengisa+ ngommoyakhe nangokukholelwa kwenu eqinisweni. 14 Unibizele kilokhu ngeendaba ezimnandi esizimemezelako ukuthi nifumane iphazimulo yeKosethu uJesu Krestu.+ 15 Nje-ke, bafowethu, dzimelelani,+ nihlale nibambelele ezintweni enazifundiswako,+ nanyana nazifumana ngomlayezo okhulunywa ngomlomo namkha ngencwadi evela kithi. 16 Ngaphezu kwalokho, kwanga iKosethu uJesu Krestu ngokwayo noZimu uBabethu, owasithanda,+ wasinikela nenduduzo engapheliko nethemba elihle+ ngomusa omkhulu, 17 angaduduza iinhliziyo zenu begodu anenze niqine kizo zoke izenzo namezwi amahle.

3 Emaswapheleni bafowethu, ragelani phambili nisithandazela+ bona ilizwi lakaJehova* liragele phambili nokurhatjheka msinyana+ begodu liphazinyuliswa njengombana kwenzeka kini 2 nokobana sisindiswe ebantwini abalimazako nabambi+ ngombana ukukholwa akusiyinto yabo boke abantu.+ 3 Kodwana iKosi ithembekile, izoniqinisa beyinivikele komumbi. 4 Ngaphezu kwalokho, siyaqiniseka ngani eKosini ukuthi niyazilalela begodu nizokuragela phambili nizilalela iinqophiso zethu. 5 Kwanga iKosi ingaragela phambili inqophisa iinhliziyo zenu ngokuphumelelako ethandweni lakaZimu+ nekukghodlheleleni+ ngebanga lakaKrestu.

6 Nje-ke sininikela iinqophiso bafowethu, ngegama leKosethu uJesu Krestu bona nitsomuke kinanyana ngimuphi umfowethu okhamba ngokungakahleleki,+ ongakhambi ngokuvumelana neenqophiso enizifumene* kithi.+ 7 Ngombana nina ngokwenu niyazi ukuthi kufuze nisilingise njani+ ngombana azange siziphathe ngendlela engakahleleki hlangana nani, 8 azange sidle nokudla kwamuntu simahla.+ Kunalokho, ngokusebenza budisi nokuzikhandla besisebenza ubusuku nemini bona singathwesi nanyana ngubani wenu umthwalo obudisi.+ 9 Ingasi bona asinalungelo lokwenza lokho+ kodwana kungebanga lokuthi besifuna ukuba sibonelo ekufuze nisilingise.+ 10 Kuhlekuhle, ngesikhathi sinani, besijayele ukuninikela umyalo othi: “Nangabe umuntu akafuni ukusebenza nokudla angadli.”+ 11 Ngombana siyezwa ukuthi abanye bakhamba ngokungakahleleki hlangana nani,+ abasebenzi nakancani kodwana bacabhela eendabeni ezingabafuniko.+ 12 Ebantwini abanjalo sinikela isiyalo nesikhuthazo ngeKosi uJesu Krestu bona basebenze ngokuthula begodu badle ukudla abakusebenzeleko.+

13 Nina-ke bafowethu, ningadinwa kukwenza okuhle. 14 Kodwana nangabe kukhona ongalilaleli ilizwi lethu eliza ngencwadi le, akahlale atshwayiwe begodu nilise ukuzihlanganisa naye+ ukuthi abe neenhloni. 15 Kodwana ningamqali njengenaba, ragelani phambili nimkhuthaza+ njengomfowethu.

16 Nje-ke kwanga iKosi yokuthula ingahlala ininikela ukuthula ngazo zoke iindlela.+ Kwanga iKosi ingaba nani noke.

17 Nakhu ukulotjhisa kwami, mina Powula, ngesami isandla+ okulitshwayo kizo zoke iincwadi, le yindlela engitlola ngayo.

18 Umusa omkhulu weKosethu uJesu Krestu awube nani noke.