INCWADI YESIBILI EYA KUTHIMOTHI

1 UPowula, umpostoli kaKrestu Jesu ngentando kaZimu ngokuvumelana nesithembiso sokuphila okufumaneka ngoKrestu Jesu,+ 2 kuThimothi, umntwana othandekako:+

Kwanga ungafumana umusa omkhulu, isirhawu nokuthula okuvela kuZimu uBaba nakuKrestu Jesu iKosethu.

3 Ngiyathaba ngoZimu, enginikela kuye umsebenzi ocwengileko njengombana bekwenza abokhokho bami nangonembeza ohlwengileko, akhenge ngilise ukukukhumbula ekurabheleni kwami ubusuku nemini. 4 Njengombana ngikhumbula iinyembezi zakho, ngilulukela ukukubona bona ngizaliswe ngethabo. 5 Ngombana ngikhumbula ukukholwa kwakho okunganabuzenzisi,+ okuthome kwanzinza kugogwakho uLowisi nakunyoko uYunisi kodwana engiqinisekako nokuthi kukhona nakuwe.

6 Ngebangeli ngikukhumbuza bona usibasele njengomlilo isipho sakaZimu esikuwe osifumene ngokuthi ngikubeke izandla.+ 7 Ngombana uZimu akhenge asinikele ummoya wobutjhatjha+ kodwana usinikele ummoya wamandla+ nethando nokuba nomkhumbulo oqaqulukileko. 8 Nje-ke ungabi neenhloni ngobufakazi obumalungana neKosethu+ namkha ngami, engisibotjhwa ngebanga layo kodwana kwamukele ukutlhaga+ ngebanga leendaba ezimnandi ngokuthembela emandleni kaZimu.+ 9 Yena usisindisile, wasibiza ngokubizwa okucwengileko,+ ingasi ngebanga lemisebenzethu kodwana ngebanga lomnqophwakhe nomusa omkhulu.+ Lokhu sanikelwa khona ngokuphathelene noKrestu Jesu ngaphambi kweenkhathi zakade 10 kodwana nje kwenziwa kwaba semtarini ngokubonakaliswa koMsindisethu, uKrestu Jesu,+ oqede ukufa,+ wasembulela ukuphila+ nokungonakali+ ngeendaba ezimnandi,+ 11 engikhethelwe bona ngibe mtjhumayeli, mpostoli nomfundisi wazo.+

12 Kungebangeli nami ngitlhaga ngalokhu,+ kodwana anginanhloni.+ Ngombana ngiyamazi engikholwa kuye begodu ngiyaqiniseka ukuthi uzokukghona ukuvikela koke engimphathise khona bekube lilangelo.+ 13 Ragela phambili ubambelele esisekelweni samezwi azuzisako+ owezwe kimi ngokukholwa nethando okumphumela ovela ebunyeni noKrestu Jesu. 14 Vikela igugweli oliphathiswe ngommoya ocwengileko, onzinze kithi.+

15 Uyazi ukuthi boke abantu esifundeni se-Asiya+ bangijikele, kubandakanye uFigelo no-Erimogenesi. 16 Kwangathi iKosi ingawurhawukela umndeni ka-Onesiforu+ ngombana bekahlala angikhuthaza begodu akhenge abe neenhloni ngokubotjhwa kwami ngeenketani. 17 Kunalokho nakaseRoma, wangifuna ngetjiseko bewangifumana. 18 Kwanga iKosi ingamenza afumane isirhawu esivela kuJehova* ngelangelo. Wena uyazi kuhle yoke imisebenzi ayenzileko e-Efesu.

2 Ngalokho-ke, wena mntwanami,+ ragela phambili uzuza amandla emuseni omkhulu okuKrestu Jesu 2 nezinto owazizwa kimi ezasekelwa bofakazi abanengi,+ izintwezi ziphathise amadoda athembekileko azokufanelekela ngokwaneleko ukufundisa abanye. 3 Njengesotja elihle+ lakaKrestu Jesu, kwamukele ukutlhaga.+ 4 Akakho umuntu othi alisotja azibandakanye* kwezerhwebo* zokuphilokhu bona azifumanele ukwamukeleka kiloyo omtlolise njengesotja. 5 Ngitjho nemidlalweni, umuntu akafumani unongorwana ngaphandle kobana aphalisane ngokuvumelana nemithetho.+ 6 Umlimi osebenza budisi kufuze abe ngewokuthoma ukudla iinthelo. 7 Hlala ucabanga ngalokhu engikutjhoko; iKosi izokwenza uzwisise* zoke izinto.

8 Khumbula bona uJesu Krestu wavuswa kwabafileko+ begodu bekangowekoro kaDavida,*+ ngokweendaba ezimnandi engizitjhumayelako,+ 9 engitlhaga begodu ngibotjhwa njengesilelesi+ ngebanga lazo. Nanyana kunjalo, ilizwi lakaZimu alikabotjhwa.+ 10 Ngalokho, ngiragela phambili ngikghodlhelelela zoke izinto ngebanga labakhethiweko+ ukuthi nabo bafumane isindiso efumaneka ngoKrestu Jesu, kuhlanganise nephazimulo engapheliko. 11 Amezwi la athembekile: Ngokuqinisekileko nasifa ndawonye, sizokuphila ndawonye+ 12 nasiragela phambili sikghodlhelela, sizokubusa ndawonye njengamakhosi;+ nasiphikako naye uzosiphika,+ 13 nasingakathembeki, yena uhlala athembekile ngombana angekhe aziphika.

14 Hlala ubakhumbuza izintwezi, ubayale* phambi kwakaZimu bona bangaphikisani ngamezwi, okuyinto engasizi ngalitho ngombana ilimaza* abalaleleko. 15 Yenza koke okusemandlenakho bona uziveze wamukeleka kuZimu, isisebenzi esingananhloni ngalitho, esiphatha ilizwi leqiniso kuhle.+ 16 Kodwana zale iinkulumo ezingatjho litho ezonakalisa okucwengileko+ ngombana zizokubangela ukuphambuka khulu kuZimu, 17 ilizwi labo lizokurhatjheka njengesilonda esibhibhidlhako. UHimenewu noFileto baphakathi kwabo.+ 18 Abantwaba baphambukile eqinisweni, bathi ukuvuswa kwabafileko sekwenzekile+ begodu baketula nokukholwa kwabanye. 19 Ngaphandle kwalokho, isisekelo esiqinileko sakaZimu sihlala sijamile, sinamezwi athi, “UJehova* uyabazi abangebakhe,”+ begodu “Woke umuntu obiza igama lakaJehova*+ akakwale ukungalungi.”

20 Nje-ke endlini ekulu kunezitja ingasi zegolide nezesiliva kwaphela kodwana nezekhuni nezebumba, ezinye ngezisetjenziselwa izinto eziqakathekileko kodwana ezinye ngezisetjenziselwa izinto ezingakaqatheki. 21 Yeke nangabe umuntu uhlalela kude nalezi ezingakaqakatheki, uzokuba sisitja esisetjenziselwa izinto eziqakathekileko, esicwengisiweko, esilisizo kumnikazi, esilungiselelwe yoke imisebenzi emihle. 22 Ngalokho balekela iimfiso zobutjha kodwana lwela ukulunga, ukukholwa, ithando, ukuthula, unalabo ababiza iKosi ngehliziyo ehlwengileko.

23 Ngaphezu kwalokho, kwale ukuphikisana okubudlhadlha nokungatjho litho,+ wazi ukuthi kubanga ukulwa. 24 Ngombana inceku yeKosi akukafuzi ilwe, kufuze ibe nomusa kibo boke,+ ifanelekele ukufundisa, izibambe nayoniweko,+ 25 ibayale ngommoya ophasi abaphikisako.+ Mhlamunye uZimu angabanikela ukutjhuguluka* okurholela elwazini elinembileko leqiniso,+ 26 baqaquluke begodu baphunyurhe esithiyweni sakaDeveli njengombana sekababambe baphila bona benze intandwakhe.+

3 Kodwana yazi ukuthi emihleni yokuphela+ kuzakufika iinkhathi ezibudisi okubudisi ukuqalana nazo. 2 Ngombana abantu bazakuba ngabazithandako, abathanda imali, abazikhakhazisako, abazibona bangcono kunabanye, abahlambalazi, abangalaleli ababelethi, abangathokoziko, abangakathembeki, 3 abanganalo ithando lemvelo, abangafuni isivumelwano, abarhwayeli, abangazibambiko, abanelaka, abangakuthandi okuhle, 4 abathengisa abanye, abanekani, abakhukhumele ngokuzigqaja, abathanda ukuzithabisa kunokuthanda uZimu, 5 ababonakala bazinikele kuZimu kodwana bawaphika amandla wokuzinikelokho;+ ubafulathele laba. 6 Kilaba kuvela abantu abakhukhuthela imizi bathumbe abafazi ababogabogako abadisibezwe zizono, abadoswa ziinkanuko ezihlukahlukeneko, 7 bahlala bafunda kodwana abafiki elwazini elinembileko leqiniso.

8 Nje-ke ngendlela uJanesi noJambresi abaphikisa ngayo uMosi nalaba baragela phambili nokuphikisa iqiniso. Abantu abanjalo bonakele ngokupheleleko emkhumbulweni, abamukeleki ngokuphathelene nokukholwa. 9 Nanyana kunjalo, angekhe basathuthuka ngombana ubudlhadlha babo buzokuba semtarini kibo boke njengombana kwenzeka emadodeni amabili lawa.+ 10 Kodwana wena wayilandela ngokuseduze ifundiswami, indlela yokuphila kwami,+ umnqophwami, ukukholwa kwami, ukubekezela kwami, ithando lami, ukukghodlhelela kwami, 11 ukuhlunguphazwa nokutlhaga engaqalana nakho e-Anthiyokiya,+ e-Ikhoniyo+ neListra.+ Ngakukghodlhelela ukuhlunguphazokhu begodu iKosi yangihlangula kikho koke.+ 12 Kuhlekuhle, boke abafisa ukuphila ngokuzinikela kuZimu njengabafundi bakaKrestu Jesu nabo bazokuhlunguphazwa.+ 13 Kodwana abantu abambi nabazenzisi bazokuthuwelela basuka kokumbi baye kokumbi khulu, bakhohlisa begodu bakhohliswa.+

14 Kodwana wena, ragela phambili ezintweni owazifundako begodu wanikelwa ubufakazi obukholwekako bona uzikholelwe,+ wazi ukuthi uzifunde kubani 15 nokuthi wayazi useselisana+ imitlolo ecwengileko,+ ekghona ukukuhlakaniphisela isindiso ngokukholwa kuKrestu Jesu.+ 16 Zoke izinto ezitlolwe emiTlolweni eCwengileko zivela kuZimu,+ ziyasiza ekufundiseni,+ ekusoleni, ekunqophiseni izinto nangokuyala ngokulunga+ 17 bona umuntu kaZimu abe nobukghoni obuzeleko, akulungele ngokupheleleko ukwenza nanyana ngimuphi umsebenzi omuhle.

4 Ngikuyala ngokuqinileko phambi kwakaZimu nakuKrestu Jesu, ozokwahlulela+ abaphilako nabafileko+ begodu ngokubonakaliswa kwakhe+ nomBuswakhe:+ 2 Tjhumayela ilizwi;+ ube kilo ngokurhabako ngeenkhathi ezivumako nangeenkhathi ezibudisi; usole,+ ukhalime, ukhuthaze, ngaso soke isineke nangekghono lokufundisa.+ 3 Ngombana kuzokuba nesikhathi lapho bangekhe babekezelele ifundiso eyakhako*+ kodwana ngokuvumelana neenkanuko zabo, bazozibandakanya nabafundisi bona bakitaze iindlebe zabo.*+ 4 Bazokufulathela iqiniso, balalele iindaba ezimamala. 5 Nje-ke, wena, hlala uqaqulukile ezintweni zoke, ukghodlhelele ubudisi,+ yenza umsebenzi womvangeli,* uwenze ngokupheleleko umsebenzakho.+

6 Ngombana sengithululwa njengomnikelo wesiselo+ begodu isikhathi sokutjhatjhululwa kwami+ sesitjhidele. 7 Ngikulwile ukulwa okuhle,+ ngagijima umjarho bekwaba sekupheleni,+ ngibambelele ekukholweni. 8 Ukusukela nje ukuya phambili, ngibekelwe isihlohlo sokulunga,+ leso iKosi, umahluleli olungileko,+ ezonginikela sona njengomtlomelo ngelangelo,+ ingasi mina kwaphela kodwana nabo boke abathande ukubonakaliswa kwayo.

9 Yenza koke okusemandlenakho bona uze kimi ngokurhabako. 10 Ngombana uDemasi+ ungilahlile ngebanga lokuthanda kwakhe iphaseli begodu utjhinge eThesalonika, uKresikesi eGalatiya, uTitosi eDalimathiya. 11 NguLukasi kwaphela onami. Nawuzako, uze noMarkosi ngombana ulisizo kimi emsebenzini. 12 Kodwana ngithumele uThikhikhusi+ e-Efesu. 13 Nawuzako, uze nesambatho engasitjhiya eTrowasi kuKaripo nemisongo, khulukhulu yesikhumba.

14 U-Alekzandra osebenza ngekhopha ungiphethe kumbi khulu. UJehova* uzombuyiselela ngokwemisebenzakhe.+ 15 Nawe kufuze umtjheje ngombana uphikise umlayezwethu ngezinga elidluleleko.

16 Ekuzivikeleni kwami kokuthoma akekho owangisekelako kodwana boke bangilahla, kwanga angeze babekwa umlandu. 17 Kodwana iKosi yajama hlanu kwami, yangipha amandla bona ngami ukutjhunyayelwa kwenziwe ngokupheleleko neentjhaba zoke zikuzwe;+ ngatjhatjhululwa nemlonyeni webhubezi.+ 18 IKosi izongitjhaphulula kiwo woke umsebenzi omumbi begodu izongisindisela umBuswayo wezulwini.+ Iphazimulo ayibe kiyo ngokungapheliko. Amen.

19 Ungilotjhisele kuPeresila, u-Akhwila+ nomndeni ka-Onesiforu.+

20 U-Erasitusi+ usele eKorinte kodwana ngitjhiye uTrofimusi+ agula eMiletusi. 21 Yenza koke okusemandlenakho bona ufike ngaphambi kobusika.

U-Ebhulu uyakulotjhisa, ngokunjalo noPudesi noLinusi noKlawudiya nabo boke abafowethu.

22 IKosi ibe nommoya owutjengisako. Umusayo omkhulu ube nawe.