INCWADI EYA KUTITOSI

1 UPowula, inceku kaZimu nompostoli kaJesu Krestu ngokuvumelana nokukholwa kwabakhethiweko bakaZimu nelwazi elinembileko leqiniso elivumelana nokuzinikela kuZimu 2 begodu elisekelwe ethembeni lokuphila okungapheliko,+ uZimu ongeze aleya amala+ akuthembisa kade khulu 3 kodwana ngesikhathi sakhe esifaneleko, wenza ilizwi lakhe laziwa ngokutjhumayela engaphathiswa khona+ ngokuvumelana nomyalo woMsindisethu, uZimu. 4 Ngitlolela uTitosi umntwana wamambala ngokuvumelana nokukholwa esikuhlanganyelako:

Kwanga ungaba nomusa omkhulu nokuthula okuvela kuZimu uBaba noKrestu Jesu uMsindisethu.

5 Ngakutjhiya eKrete bona ulungise izinto ezitlhoga ukulungiswa nokuthi ubeke abadala idorobho nedorobho njengombana ngakuyala ngathi: 6 Kufuze kube yindoda engamangalelwa ngalitho, indoda enomfazi munye, enabantwana abakholwako abangamangalelwa ngokuzinikela emanyaleni namkha ukuvukela.+ 7 Njengenceku kaZimu, umdala ebandleni* kufuze kungabi khona amangalelwa ngakho, angabi nekani,+ angasilingeki msinya,+ angabi sidakwa, angabi sisilwi, angabi marhamaru bona afumane inzuzo yokungathembeki 8 kodwana amukele iimvakatjhi,+ athande okuhle, abe nomkhumbulo oqaqulukileko,*+ abe ngolungileko, othembekileko,+ ozibambako,+ 9 okakarela elizwini elithembekileko* malungana nekghono lakhe lokufundisa,+ bona akghone ukukhuthaza* ngefundiso eyakhako+ nokusola+ abaphikisako.

10 Ngombana kunabantu abanengi abavukelako, abakhuluma izinto ezingasizi ngalitho, nabakhohlisi, khulukhulu labo ababambelele ekusokeni.+ 11 Kuqakathekile ukubavala imilomo ngombana abantwaba baketula yoke imizi ngokufundisa izinto okungakafuzi bazifundise ukuthi bazifumanele inzuzo yokungathembeki. 12 Omunye wabaphorofidi babo wathi: “Abantu beKrete bahlala baleya amala, baziimbandana ezirhiribidelako namagovu avilaphako.”

13 Ubufakazobu buliqiniso. Nje-ke ragela phambili ubasola ngokuqinileko bona badzimelele ekukholweni, 14 bangazinaki iinolwana zamaJuda nemiyalo yabantu abafulathele iqiniso. 15 Zoke izinto zihlwengile ebantwini abahlwengileko+ kodwana kilabo abasilapheleko nabangakholwako, akunalitho elihlwengileko ngombana iingqondo zabo nabonembeza babo basilaphele.+ 16 Bavuma tjhatjhalazi bona bayamazi uZimu kodwana bayamphika ngemisebenzabo+ ngombana bayanyenyisa begodu abalaleli, abakufanelekeli ukwenza nanyana ngimuphi umsebenzi omuhle.

2 Wena, hlala ukhuluma izinto ezikhambisana nefundiso eyakhako.+ 2 Amadoda amadala awalinganisele emikghwenawo, abe ngazimiseleko, anomkhumbulo oqaqulukileko, adzimelele ekukholweni, ethandweni nekukghodlheleleni. 3 Ngokunjalo nabafazi abadala kufuze baziphathe ngendlela ehlonipha uZimu, bangabi barhwayeli, bangabi ziingqila zewayini elinengi, babe bafundisi bokuhle, 4 bona baluleke* abafazi abasesebatjha bona bathande amadodabo, bathande abantwababo, 5 babe nomkhumbulo oqaqulukileko, babe msulwa, basebenze ekhaya,* baziphathe kuhle, bazithobe emadodenabo,+ bona ilizwi lakaZimu lingahlanjalazwa.

6 Ngokufanako, raga ngokukhuthaza amasokana bona abe nomkhumbulo oqaqulukileko,+ 7 uziveze usibonelo semisebenzi emihle ngazo zoke iindlela. Fundisa okumsulwa* ngakho koke ukuzimisela,+ 8 usebenzise ikulumo eyakhako engekhe yasolwa,+ ukuthi labo abaphikisako bahlaziseke, bangabi nalitho elimbi abangalitjho ngathi.+ 9 Iingqila azizithobe kubanikazi bazo kizo zoke izinto,+ zilinge ukubathabisa, zingaphendulani nabo, 10 zingabebeli+ kodwana zithembeke ngokupheleleko bona ngazo zoke iindlela zikghabise ifundiso yoMsindisethu, uZimu.+

11 Ngombana umusa omkhulu kaZimu ubonakalisiwe, uletha isindiso kiyo yoke imihlobo yabantu.+ 12 Usibandula bona sale ukungahloniphi uZimu neenkanuko zephasi+ begodu siphile ngomkhumbulo oqaqulukileko, ngokulunga nangokuzinikela kuZimu phakathi kwephaseli,+ 13 kukulapho silindele ithemba elithabisako+ nokubonakaliswa okuphazimulako kwakaZimu omkhulu noMsindisethu, uJesu Krestu, 14 owazinikela+ bona asitjhaphulule*+ kiyo yoke imihlobo yokungabi namthetho begodu wazihlwengisela abantu abayipahlakhe ekhethekileko, abatjhisakalela imisebenzi emihle.+

15 Ragela phambili ukhuluma izintwezi, uyala* begodu usola ngawo woke amandla.+ Ungavumeli muntu akunyaze.

3 Ragela phambili nokubakhumbuza bona balalele begodu bathobele aborhulumende neemphathimandla,+ balungele woke umsebenzi omuhle 2 bona bangakhulumi kumbi ngomuntu, bangathandi ukuphikisana, babonelele+ begodu babe nommoya ophasi kibo boke abantu.+ 3 Ngombana nathi khesaba ngabanganangqondo, singalaleli, silahlekiswa, siziingqila eenkanukweni nekuzithabiseni okuhlukahlukeneko, siraga nokwenza okumbi nokuba nomona, sinyenyisa begodu sihloyana.

4 Nanyana kunjalo, kuthe umusa woMsindisethu, uZimu,+ nethando lakhe ngabantu nakubonakaliswako 5 (ingasi ngebanga lananyana ngimiphi imisebenzi yokulunga esiyenzileko+ kodwana ngebanga lesirhawu sakhe),+ wasisindisa ngokusihlanza okusilethe ekuphileni+ nangokusenza sibe batjha ngommoya ocwengileko.+ 6 Wasithululela ummoya lo ngobunengi ngoJesu Krestu uMsindisethu,+ 7 ukuthi ngemva kokobana kuthiwe silungile ngomusakhe omkhulu,+ sibe ziindlalifa+ ngokuvumelana nethemba lokuphila okungapheliko.+

8 Amezwi la athembekile, ngifuna bona uragele phambili ukhuluma ngezintwezi, bona labo abakholwa uZimu bahlale badzimelelise imikhumbulwabo ekwenzeni imisebenzi emihle. Izintwezi zihle begodu ziyabazuzisa abantu.

9 Kodwana zibalekele iimpikiswano ezibudlhadlha, irhubhululo lokulandelana kwabokhokho, ukunghanghisana nokulwa ngomThetho ngombana azizuzisi begodu azinamsebenzi.+ 10 Malungana nomuntu othuthukisa ifundiso ehlukileko,+ male+ ngemva kokumyelelisa kokuthoma nakwesibili,+ 11 wazi ukuthi umuntu onjalo uphambukile endleleni, uyona begodu uyazahlulela.

12 Nangithumela u-Arithema namkha uThikhikhusi+ kuwe, yenza koke okusemandlenakho bona uze kimi eNikhopholi ngombana kulapho ngiqunte ukuhlala ubusika khona. 13 Yenza koke ongakwenza bona usize uZena, owazi kuhle umThetho no-Apholo ukuthi bangatlhayeli litho ekhambweni labo.+ 14 Abantu bethu nabo kufuze bafunde ukuhlala benza imisebenzi emihle bona basize ebujamweni oburhabako+ bona bangabi ngabangatheliko.+

15 Boke abanami bayakulotjhisa. Ungilotjhisele labo abasithandako ekukholweni.

Kwanga umusa omkhulu ungaba nani noke.