INCWADI EYA KUMAHEBHERU

1 Eenkhathini ezidlulileko uZimu wakhuluma nabokhokho bethu ngabaphorofidi iinkhathi ezinengi nangeendlela ezinengi.+ 2 Kwanjesi ekupheleni kwemihla le ukhulume nathi ngeNdodana,+ leyo ayibeke bona ibe yindlalifa yazo zoke izinto+ begodu ngayo wenze iphasi.+ 3 Yona isibonakaliso sephazimulo kaZimu+ nomfanekiso wamambala wobuyena bakhe,+ isekela zoke izinto ngelizwi lamandlayo. Ngemva kobana ihlanze izono zethu,+ yahlala ngesidleni sakaZimu omKhulu endaweni ephakemeko.+ 4 Yeke ibe ngcono kuneengilozi+ kangangobana izuze njengelifa igama elihle khulu kunelazo.+

5 Ngokwesibonelo, ngiyiphi ingilozi uZimu athi kiyo: “Uyindodanami; namhlanjesi ngibe nguyihlo”?+ Wathi godu: “Ngizokuba nguyise, yena uzokuba yindodanami”?+ 6 Nakathumela iZibulo lakhe+ ephasini godu wathi: “Zoke iingilozi zakaZimu azimkhothamele.”

7 Godu wathi ngeengilozi: “Wenza iingilozi zibe mimoya neenceku zakhe+ zibe lilangabi lomlilo.”+ 8 Kodwana malungana neNdodana, uthi: “UZimu usihlalo sakho sobukhosi+ bekube ngokungapheliko nentonga yomBuswakho ngeyokulunga.* 9 Uthande ukulunga, wahloya ukungabi namthetho. Kungebangelo uZimakho akuzese+ ngamafutha wokuthaba ukudlula abangani bakho.”+ 10 Godu: “Ekuthomeni, wena Kosi, ubeke iinsekelo zephasi nomkayi umsebenzi wezandla zakho. 11 Zona zizokutjhabalala, kodwana wena uzokusolo unjalo begodu njengesambatho, zizokuluphala, 12 uzozibhinca njengesambatho eside, begodu zizokutjhentjhwa njengesambatho. Kodwana wena usolo unjalo neminyakakho angeze yaphela.”+

13 Kodwana ngiyiphi ingilozi athi ngayo: “Hlala ngesidleni sami bekube kulapho ngibeka amanabakho bona abe ngaphasi kweenyawo zakho”?+ 14 Kanti zoke azisimimoya eyenza umsebenzi ocwengileko,+ ethunyelwe ukusiza labo abazokuzuza isindiso njengelifa?

2 Kungakho kutlhogeka bona sizitjheje ngaphezu kokujayelekileko izinto esizizwileko+ bona singathomi sikhukhuleke.+ 2 Ngombana nangabe ilizwi elakhulunywa ngeengilozi+ laba ngeliqinisekileko begodu koke ukweqa umthetho nesenzo sokungalaleli kwafumana isijeziso esivumelana nobulungiswa,+ 3 sizokuphunyurha njani nasiliselele isindiso ekulu kangaka?+ Ngombana yathoma ukukhulunywa ngeKosethu+ begodu yaqinisekiswa kithi ngilabo abayizwileko, 4 kukulapho uZimu ahlanganyela ekunikeleni ubufakazi ngeembonakaliso neemangaliso nemisebenzi yamandla ehlukahlukeneko+ nommoya ocwengileko wabiwa ngokuvumelana nentandwakhe.+

5 Ngombana iphasi elizako esikhuluma ngalo,+ akakalibeki ngaphasi kweengilozi. 6 Kodwana kwenye indawo ufakazi othileko wathi: “Uyini-ke umuntu bona umkhumbule namkha indodana yomuntu bona uyitlhogomele?+ 7 Umenze waba phasana kuneengilozi; wamthwesa isihlohlo sephazimulo nedumo, wambeka phezu kwemisebenzi yezandla zakho. 8 Zoke izinto uzibeke ngaphasi kweenyawo zakhe.”+ Ngokubeka zoke izinto ngaphasi kwakhe,+ uZimu akhenge atjhiye litho lingasingaphasi kwakhe.+ Kodwana nje, okwanje asikaziboni zoke izinto zingaphasi kwakhe.+ 9 Kodwana siyambona uJesu, owenziwe waba phasana kuneengilozi,+ nje othweswe isihlohlo sephazimulo nedumo ngombana wafa+ bona ngomusa omkhulu kaZimu anambithe ukufa ngebanga labo boke.+

10 Ngombana bekufanele bona loyo zoke izinto ekungezakhe begodu ezibe khona ngaye, nakaletha amadodana amanengi ephazimulweni,+ kufuze enze uMjameli omKhulu wesindiswawo+ aphelele ngokutlhaga.+ 11 Ngombana kokubili loyo ocwengisako nalabo abacwengiswako+ bavela koyedwa+ begodu ngebangeli akananhloni ukubabiza ngokuthi bafowabo+ 12 njengombana athi: “Ngizokumemezela igama lakho kubafowethu; hlangana nebandla ngizokudumisa ngengoma.”+ 13 Godu wathi: “Ngizokuthembela kuye.”+ Wathi godu: “Qala! Mina nabantwana engibaphiwe nguJehova.”*+

14 Nje-ke njengombana ‘abantwana’ babahlanganyeli beengazi nenyama, ngokufanako naye wahlanganyela ezintweni ezifanako+ bona kuthi ngokufa kwakhe atjhabalalise loyo oneendlela zokubangela ukufa,+ okunguDeveli+ 15 begodu atjhaphulule boke ababe ziingqila zokusaba ukufa ukuphila kwabo koke.+ 16 Ngombana eqinisweni akasizi iingilozi kodwana usiza abantwana baka-Abrahama.*+ 17 Nje-ke, bekufuze afane “nabafowabo” ngazo zoke iindlela+ bona abe mphristi ophakemeko onesirhawu nothembekileko ezintweni ezimalungana noZimu bona anikele umhlatjelo wokubuyisana+ ngebanga lezono zabantu.+ 18 Njengombana yena ngokwakhe atlhaga nakalingwako,+ uyakghona ukusiza labo abalingwako.+

3 Ngebanga lalokho, bafowethu abacwengileko, bahlanganyeli bokubizwa* kwezulwini,+ cabangani ngompostoli nomphristi ophakemeko esimvumako, uJesu.+ 2 Wathembeka kiloyo ombekileko+ njengombana noMosi bekanjalo kiyo yoke indlu kaZimu.+ 3 Nje-ke yena* uqalwa njengofanelwe yiphazimulo+ ukudlula uMosi ngombana loyo owakha indlu udunyiswa ukudlula indlu ngokwayo. 4 Kwamambala, enye nenye indlu yakhiwe ngothileko kodwana owakhe zoke izinto nguZimu. 5 Nje-ke uMosi bekasisebenzi esithembekileko kiyo yoke indlu kaZimu njengobufakazi bezinto ebezizokukhulunywa ngemva kwalokho 6 kodwana uKrestu bekathembekile njengendodana+ phezu kwendlu kaZimu. Kwamambala siyindlwakhe+ nangabe sikakarele etjhaphulukwenethu yokukhuluma nethemba esizikhakhazisa ngalo bekube sekupheleni.

7 Yeke njengombana ummoya ocwengileko utjho,+ “Namhlanjesi nanilalela ilizwi lakhe, 8 ningaqinisi iinhliziyo zenu njengalokha nakubangwa ilaka elikhulu nanjengelanga lokulingwa emmangweni,+ 9 lapho abokhokho benu abangilinga khona naphezu kokubona imisebenzami iminyaka ema-40.+ 10 Kungakho ngasinyenya isizukulwanesi bengathi: ‘Basolo baphambuka eenhliziyweni zabo begodu abakazazi iindlela zami.’ 11 Yeke ngafunga ngisilingekile ngathi: ‘Angekhe bangene ekuphumuleni kwami.’”+

12 Yelelani, bafowethu ngombana ngiyasaba ukuthi kungenzeka kinanyana ngubani wenu kwakheke ihliziyo embi enganakukholwa ngokutjhida kuZimu ophilako+ 13 kodwana hlalani nikhuthazana qobe langa, ikani nakusathiwa “Kunamhlanjesi”+ bona kungabi namunye wenu owenziwa lukhuni mamandla akhohlisako wesono. 14 Ngombana kuhlekuhle siba bahlanganyeli bakaKrestu kwaphela nasikukakarela bekube sekupheleni ukuqiniseka ebesinakho ekuthomeni.+ 15 Njengombana kutjhiwo ukuthi, “Namhlanjesi nanilalela ilizwi lakhe, ningaqinisi iinhliziyo zenu njengalokha kubangwa ilaka elikhulu.”+

16 Ngombana bobani abezwako kodwana bambangela ilaka elikhulu? Kghani bekungasingilabo abaphuma eGibhide ngaphasi kwakaMosi na?+ 17 Ngaphezu kwalokho, uZimu wanyenyiswa bobani iminyaka ema-40?+ Kghani bekungasingilabo abonako, labo abafela emmangweni?+ 18 Wafunga kibobani ukuthi angekhe bangene ekuphumuleni kwakhe? Bekungasikilabo abangakhenge balalele na? 19 Nje-ke siyabona ukuthi bebangekhe bangene ngebanga lokungakholwa.+

4 Njengombana isithembiso sokungena ekuphumuleni kwakhe sisesekhona, asizitjhejeni bona singalahlekelwa sithembiswesi.+ 2 Nathi iindaba ezimnandi zamenyezelwa kithi,+ njengakibo kodwana ilizwi abalizwako akhenge libazuzise ngombana bebangakabunjaniswa kukholwa nalabo abalalela. 3 Ngombana thina esikholwako siyangena ekuphumuleni njengombana atjho: “Yeke ngafunga ngisilingekile, ‘Angekhe bangene ekuphumuleni kwami,’”+ nanyana imisebenzakhe yaqedwa kusukela ekuthonyisweni kwephasi.+ 4 Kwenye indawo watjho okulandelako malungana nelanga lekhomba: “Ngelanga lekhomba uZimu waphumula kiyo yoke imisebenzakhe”+ 5 godu lapha uthi: “Angekhe bangene ekuphumuleni kwami.”+

6 Yeke njengombana kusasalele abanye ukungena kikho nalabo iindaba ezimnandi ezamenyezelwa kibo qangi akhenge bangene ngebanga lokungalaleli+ 7 godu watshwaya ilanga elithileko ngokuthi ngemva kwesikhathi eside athi erhubweni lakaDavida, “Namhlanjesi” njengombana kukhulunywe ngehla, “Namhlanjesi nanilalela ilizwi lakhe, ningaqinisi iinhliziyo zenu.”+ 8 Ngombana nangabe uJotjhuwa+ wabarholela endaweni yokuphumula, uZimu bekangekhe ngemva kwalokho akhulume ngelinye ilanga. 9 Nje-ke abantu bakaZimu basalindelwe kuphumula kwesabatha.+ 10 Ngombana umuntu ongene ekuphumuleni kwakaZimu naye uphumulile emisebenzinakhe njengombana noZimu aphumulile kweyakhe.+

11 Yeke asenzeni koke okusemandlenethu bona singene ekuphumulenokho bona kungabi nowela endleleni yokuphila efanako yokungalaleli.+ 12 Ngombana ilizwi lakaZimu liyaphila begodu linamandla,+ libukhali ukudlula isabula esika mahlangothi womabili,+ lihlaba bekuhlukane umphefumulo* nommoya,* amathambo* nomongo begodu likghona ukuhlukanisa imicabango neenhloso zehliziyo. 13 Ayikho indalo efihlekileko emehlwenakhe+ kodwana zoke izinto zisebaleni begodu zembuliwe emehlweni waloyo esizoziphendulela kuye.+

14 Njengombana sinomphristi ophakemeko omkhulu otjhinge ezulwini, uJesu iNdodana kaZimu,+ asibambeleleni ekumvumeni kwethu tjhatjhalazi.+ 15 Ngombana asinamphristi ophakemeko ongekhe azwelane nokubogaboga kwethu+ kodwana sinaloyo owalingwa ngazo zoke iindlela njengathi kodwana anganasono.+ 16 Yeke asitjhideleni esihlalweni somusa omkhulu ngetjhaphuluko yokukhuluma+ bona sifumane isirhawu nomusa omkhulu bona usisize ngesikhathi esifaneleko.

5 Ngombana omunye nomunye umphristi ophakemeko othathwe hlangana nabantu ubekwe ngebanga labo phezu kwezinto ezihlobene noZimu+ bona anikele ngezipho nangemihlatjelo ngebanga lezono.+ 2 Ukghona ukuzwelana* nabanganalwazi nalabo abaphambukako* njengombana naye aqalana nokubogaboga kwakhe 3 begodu ngebanga lalokho kufuze enze iminikelo ngebanga lezono zakhe njengombana enza ngezono zabantu.+

4 Umuntu akathathi idumeli ngokuthanda kwakhe kodwana ulifumana kwaphela nakabizwe nguZimu njengombana bekunjalo ngo-Aroni.+ 5 Nje-ke uKrestu naye akhenge aziphazimulise+ ngokuba mphristi ophakemeko kodwana uphazinyuliswe ngiloyo owathi kuye: “Wena uyindodanami; namhlanjesi ngibe nguyihlo.”+ 6 Njengombana godu athi kwenye indawo, “Wena umphristi ngokungapheliko ngokwendlela kaMelkizedeki.”+

7 Nakasaphila ephasini, uKrestu wancenga ngokusuka ehliziyweni, ngokulila okukhulu nangeenyembezi,+ kiloyo obekangakghona ukumsindisa ekufeni begodu imithandazwakhe yaphendulwa ngebanga lokusaba kwakhe uZimu. 8 Ngitjho nanyana bekayindodana, wafunda ukulalela ezintweni atlhaga ngazo.+ 9 Ngemva kokuthi enziwe waphelela,+ ube yindlela yokusindiswa ngokungapheliko kibo boke abamlalelako+ 10 ngombana ukhethwe nguZimu bona abe mphristi ophakemeko ngokwendlela kaMelkizedeki.+

11 Kunengi esingakutjho ngaye begodu kubudisi nokuhlathulula ngombana senithathela kude ukuzwa. 12 Ngitjho nanyana ngesikhathesi bekufuze ngathana senibafundisi, nisatlhoga godu kube nomuntu onifundisa ukusuka ekuthomeni izinto ezisisekelo+ zomlayezo ocwengileko kaZimu begodu senibuyele ekutlhogeni ibisi, ingasi ukudla okuqinileko. 13 Ngombana woke umuntu oragela phambili nokusela ibisi akakajayelani nelizwi lokulunga ngombana umntwana omncani.+ 14 Kodwana ukudla okuqinileko kungekwabantu abavuthiweko, labo abathe ngokusebenzisa amandlabo wokuzwisisa bawabandulela ukuhlukanisa kokubili okuhle nokumbi.

6 Nje-ke njengombana sesidlulile efundisweni esisekelo+ ngoKrestu, asirageleni phambili ngetjiseko ekuvuthweni,+ singabeki isisekelo godu okutjho, ukutjhuguluka emisebenzini efileko nokukholwa kuZimu, 2 ifundiso ngemihlobo ehlukahlukeneko yebhajadiso nokubekwa kwezandla,+ ukuvuswa kwabafileko+ nesahlulelo sasafuthi. 3 Sizokwenza lokhu nangabe kwamambala uZimu uyavuma.

4 Ngombana ngokuphathelene nalabo ekhebakhanyiselwa+ nabanambithe isipho sezulwini sesihle nababe bahlanganyeli bommoya ocwengileko 5 begodu abanambithe ilizwi lakaZimu elihle namandla wephasi elizako 6 kodwana abawileko,+ akukghoneki ukuthi bavuselelwe bona babuye batjhuguluke ngebanga lokuthi babethela iNdodana kaZimu esigodweni godu bayembula bona ihlaziseke tjhatjhalazi.+ 7 Ngombana ihlabathi ifumana isibusiso kuZimu nayimunya amanzi wezulu eliyinela qobe bese iveze iintjalo ezilisizo kilabo elinyelwa bona. 8 Kodwana nayiveza ameva nekhula, iyahlobokwa begodu isengozini yokuqalekiswa, emaswapheleni izokutjhiswa.

9 Kodwana ngokuphathelene nani, bathandekako, siqiniseka ngezinto ezingcono, izinto ezihlobene nesindiso, ngitjho nanyana sikhuluma ngendlela le. 10 Ngombana uZimu akasimumbi bona angakhohlwa umsebenzenu nethando enilitjengise egameni lakhe+ ngokusiza abacwengileko nokuragela phambili nibasiza. 11 Kodwana sifisa bona ngamunye wenu akhuthale ngendlela efanako ukuthi nibe nesiqinisekiso esizeleko sethemba+ bekube sekupheleni+ 12 bona ningavilaphi+ kodwana nibe balingisi balabo abazuza iinthembiso njengelifa ngokukholwa nangokubekezela.

13 Lokha uZimu nakenza isithembiso ku-Abrahama njengombana bekangekhe afunge ngomunye omkhulu kunaye, wazifunga yena,+ 14 wathi: “Ngizokubusisa, ngizokwenza isizukulwana sakho sibe sinengi.”+ 15 Nje-ke ngemva kobana u-Abrahama abekezele, wafumana isithembiswesi. 16 Ngombana abantu bafunga ngothileko ongaphezu kwabo begodu isifungo sabo sisiphetho sananyana ngiyiphi ipikiswano ngebanga lokuthi sisiqinisekiso esingokomthetho kibo.+ 17 Ngendlela efanako le, uZimu nakaqunta ukukwenza kube semtarini ukungatjhuguluki komnqophwakhe* eendlalifeni zesithembiso,+ wakuqinisekisa ngesifungo, 18 bona kuthi ngezinto ezimbili engeze zatjhuguluka okungekhe kwenzeka bona uZimu aleye amala+ ngazo, thina esibalekele esiphephelweni sifumane isikhuthazo esinamandla sokukakarela ethembeni elibekwe phambi kwethu. 19 Sinethembeli+ elinjenge-ankera yomphefumulo,* liqinisekile begodu lidzimelele, lingena ngaphakathi kwerharideni,+ 20 lapho kungene khona ngebanga lethu ihlahlandlela, uJesu,+ obe mphristi ophakemeko ngokungapheliko ngokwendlela kaMelkizedeki.+

7 Ngombana uMelkizedeki ikosi yeSalema, umphristi kaZimu oPhezukoke, wahlangana no-Abrahama abuya ukuyokubulala amakhosi, wambusisa,+ 2 u-Abrahama wamnikela koke kwetjhumi. Kokuthoma, igama lakhe litjhugululwe ngokuthi “iKosi yokuLunga” begodu uyikosi yeSalema, okutjho, “iKosi yokuThula.” 3 Njengombana anganababa, anganamma, anganarhelo lokulandelana kwabokhokho, anganamlando wokubelethwa nokuhlongakala kwakhe kodwana enziwe waba njengeNdodana kaZimu, uhlala amphristi ngokungapheliko.+

4 Qalani-ke bona bekamkhulu kangangani umuntu lo, loyo u-Abrahama, ukhokhwethu, amnikela kwetjhumi okungcono khulu epahlenakhe ayifumene epini.+ 5 Ngokuvumelana nomThetho, labo abavela emadodaneni kaLevi+ ababaphristi banomyalo wokubuthelela kwetjhumi okuvela ebantwini,+ okutjho kubafowabo, ngitjho nanyana abantwabo baziinzukulwana zaka-Abrahama. 6 Kodwana umuntu lo obekangaveli emndenini kaLevi wamukela kwetjhumi okuvela ku-Abrahama begodu wabusisa loyo obekaneenthembiso.+ 7 Nje-ke angekhe kwaphikwa ukuthi omncani ubusiswa ngomkhulu. 8 Ngakwelinye ihlangothi babantu abafako abamukela kwetjhumi kodwana ngakwelinye, ngothileko okufakazwa ngaye bona uyaphila.+ 9 Kungatjhiwo nokobana ngitjho noLevi, owamukela kwetjhumi, ubhadele kwetjhumi ngo-Abrahama, 10 ngombana bekasesesizukulwana esizako sakakhokhwakhe lokha uMelkizedeki ahlangana naye.+

11 Yeke nangabe ukuphelela bekufumaneka ngobuphristi bobuLevi+ (ngombana bebuyingcenye yomThetho owanikelwa abantu), alo-ke bekusatlhogekelani bona kuvele omunye umphristi okuthiwa ungokwendlela kaMelkizedeki+ ingasi ngendlela ka-Aroni? 12 Njengombana ubuphristi butjhugululwa, kuyatlhogeka bona nomThetho utjhugululwe.+ 13 Ngombana umuntu okutjhiwo izintwezi ngaye bekavela kwenye ikoro, okungekho namunye wayo owakhe wasebenza e-aldareni.+ 14 Kusemtarini bona iKosethu ivela kwaJuda+ kodwana uMosi akhenge atjho litho ngokuthi abaphristi bavela ekorweni leyo.

15 Lokhu kwaba semtarini khulu lokha nakuvela omunye umphristi+ onjengoMelkizedeki,+ 16 obe mphristi, ingasi ngefuneko engokomthetho esekelwe ekorweni yenyama kodwana ngamandla wokuphila okungatjhabalalisekiko.+ 17 Ngombana kufakazwa ngaye kuthiwa: “Wena umphristi ngokungapheliko ngokwendlela kaMelkizedeki.”+

18 Nje-ke, umyalo wangaphambilini ubekelwe ngeqadi ngombana uyabogaboga begodu uyabhalelwa.+ 19 Ngombana umThetho awukenzi litho laphelela+ kodwana ukwethulwa kwethemba elingcono+ kwenze izinto zaphelela, ngalo sitjhidela kuZimu.+ 20 Godu njengombana lokhu kungakhenge kwenziwe ngaphandle kokuthi kwenziwe isifungo 21 (kwamambala kunabantu ababe baphristi ngaphandle kwesifungo kodwana lo ube mphristi ngesifungo esenziwe malungana naye ngiloyo owathi: “UJehova* ufungile begodu angekhe atjhugulule umkhumbulwakhe, ‘Wena umphristi ngokungapheliko’”),+ 22 uJesu ube siqinisekiso sesivumelwano esingcono.+ 23 Ngaphezu kwalokho, abanengi kwatlhogeka ukuthi babe baphristi ngokulandelana+ ngombana ukufa kwabavimbela bona baragele phambili babaphristi 24 ngebanga lokuthi uragela phambili aphila ngokungapheliko,+ ubuphristi angekhe budluliselwe kwabanye. 25 Yeke ukghona nokubasindisa ngokupheleleko labo abatjhidela kuZimu ngaye ngombana uhlala aphila bona abancengele.+

26 Kuyafaneleka ngathi bona sibe nomphristi ophakemeko onjalo, othembekileko, onganamlandu, ongakasilaphazwa,+ ohlukaniswe nezoni begodu ophakeme ukudlula izulu.+ 27 Ngokungafani nabaphristi abaphakemekwabo, yena akutlhogeki enze imihlatjelo qobe langa,+ kokuthoma ngebanga lezono zakhe bese kuba ngebanga lezono zabantu,+ ngombana wakwenza lokhu kwaba kanye kwaphela lokha nakazinikela bona abe mhlatjelo.+ 28 Ngombana umThetho ubeka amadoda anokubogaboga+ bona abe baphristi abaphakemeko, kodwana ilizwi lesifungo+ esifungwe ngemva komThetho libeka indodana, eyenziwe yaphelela+ ngokungapheliko.

8 Nje-ke nanti iphuzu eliyihloko lalokho esikutjhoko: Sinomphristi ophakemeko onjenga lo,+ uhlezi ngesidleni sesihlalo sobukhosi sakaZimu omKhulu ezulwini,+ 2 isisebenzi sendawo ecwengileko+ nesetende lamambala, elijanyiswe nguJehova,* ingasi mumuntu. 3 Ngombana omunye nomunye umphristi ophakemeko ukhethwa bona anikele ngezipho nangemihlatjelo; nje-ke bekutlhogeka ngaye lo bona naye abe nokuthileko akunikelako.+ 4 Ngathana bekasephasini, bekangekhe abe mphristi+ njengombana sekunabantu abanikela ngezipho ngokuvumelana nomThetho. 5 Abantwaba banikela ngomsebenzi ocwengileko njengesibonelo, isithunzi+ sezinto zezulwini+ njengombana noMosi, nasekazokwakha itende, walayelwa nguZimu: Ngombana uthi: “Qinisekisa bona wenza zoke izinto ngokwendlela otjengiswe ngayo entabeni.”+ 6 Kodwana uJesu wafumana umsebenzi omuhle khulu ngombana naye mlamuli+ wesivumelwano esingcono khulu,+ esihlonywe ngokomthetho eenthembisweni ezingcono.+

7 Ngathana isivumelwano sokuthomesa besinganamtjhapho, bekungekhe kwatlhogeka bona kube nesesibili.+ 8 Ngombana ufumana umtjhapho ngabantu nakathi: “‘Qalani-ke! Kuza amalanga, lapho ngizokwenza khona isivumelwano esitjha nendlu ka-Israyeli kunye nendlu kaJuda,’ kutjho uJehova.* 9 Angekhe sibe njengesivumelwano engasenza nabokhokho babo ngelanga engabamba ngalo isandla sabo bona ngibakhuphe enarheni yeGibhide+ ngombana akhenge bahlale esivumelwaneni sami, yeke ngalisa ukubatjheja,’ kutjho uJehova.*

10 “‘Ngombana lesi sivumelwano engizosenza nendlu ka-Israyeli ngemva kwamalanga lawo,’ kutjho uJehova.* ‘Ngizokufaka imithethwami emkhumbulwenabo begodu ngizoyitlola neenhliziyweni zabo.+ Ngizokuba nguZimabo, bazokuba babantu bami.+

11 “‘Akakho kibo ozokuthi esakhamuzini sekhabo nakumfowabo: “Kufuze wazi uJehova!”* Ngombana boke bazongazi, kusukela komncani ukuya komkhulu kibo. 12 Ngombana ngizokuba nesirhawu ezenzweni zabo zokungalungi begodu angekhe ngisazikhumbula izono zabo.’”+

13 Nakathi “isivumelwano esitjha,” wenze sakade sangasaba nomsebenzi.+ Nje-ke lokho okungasenamsebenzi nokuluphalako kuseduze nokutjhabalala.+

9 Nje-ke, isivumelwano saphambilini besineemfuneko ezingokomthetho zomsebenzi ocwengileko nendawaso ecwengileko+ ephasini. 2 Ngombana kwakhiwa ikumba yokuthoma yetende, lapho bekunelithi lesibani+ netafula nomqaliso woburotho bomnikelo;*+ ibizwa ngokuthi yiNdawo eCwengileko.+ 3 Kodwana ngemva kwerharideni lesibili+ bekunekumba yetende ebizwa ngokuthi yiNdawo eCwengeke Khulu.+ 4 Lapho bekunesitja segolide+ sokutjhisela ipepho nomfaji wesivumelwano+ ebewusindwe woke ngegolide,+ ngaphakathi kwawo bekunomjeka wegolide onemana+ nentonga ka-Aroni etlhurhileko+ namatje asipara+ wesivumelwano; 5 ngaphezu kwawo bekunamakherubhi agubuzese ngesithunzi sawo isigubuzeso sokubuyisana.+ Kodwana nje akusisikhathi sokunaba ngezintwezi.

6 Ngemva kokuthi izintwezi zenziwe ngendlela le, abaphristi bangena qobe ekumbeni yokuthoma yetende bona benze imisebenzi ecwengileko+ 7 kodwana umphristi ophakemeko ungena yedwa ekumbeni yesibili kanye ngomnyaka,+ akangeni angakaphathi iingazi+ azinikela ngebanga lakhe+ nangebanga lezono zabantu+ abazenze bangazi. 8 Ngalokho ummoya ocwengileko ukwenza kukhanye ukuthi indlela etjhinga endaweni ecwengileko beyingakembulwa ngesikhathi itende lokuthoma lisesekhona.+ 9 Itendeli limfanekiso wesikhathi sanje+ begodu ngokuvumelana nelungiselelweli, kunikelwa izipho nemihlatjelo.+ Nanyana kunjalo, izintwezi azikghoni ukwenza unembeza womuntu owenza umsebenzi ocwengileko aphelele.+ 10 Ziphathelene kwaphela nokudla neenselo nokuhlanzwa ngokwesiko+ okuhlukahlukeneko.* Bezizimfuneko ezingokomthetho ezimalungana nomzimba+ begodu bekufuze zilandelwe bekube sikhathi esibekiweko sokunqophisa izinto.

11 Nanyana kunjalo, ngesikhathi uKrestu afika njengomphristi ophakemeko wezinto ezihle esezenzekile, wadlula etendeni eliqakatheke khulu neliphelele khulu, elingakenziwa ngezandla, okutjho ukuthi, elingasingelendalo le. 12 Wangena endaweni ecwengileko, ingasi ngeengazi zeembuzi namathole aduna kodwana ngeengazi zakhe,+ kwaba kanye kwaphela, wasifumanela isindiso* engapheliko.+ 13 Ngombana nangabe iingazi zeembuzi nezeenkunzi+ nemilotha yethokazana* efafazwa kilabo abasilaphaziweko icwengisela ukuhlanjululwa kwenyama,+ 14 iingazi zakaKrestu+ owathi ngommoya ohlala ngokungapheliko wazinikela ngaphandle komtjhapho kuZimu, zizobahlambulula kangangani-ke abonembeza bethu emisebenzini efileko+ bona sinikele umsebenzi ocwengileko kuZimu ophilako?+

15 Kungakho amlamuleli wesivumelwano esitjha+ ngombana wafa njengesihlengo bona atjhaphulule abantu+ ekweqeni umthetho okwenzeke ngaphasi kwesivumelwano sangaphambili bona kuthi labo ababiziweko bafumane isithembiso selifa elingapheliko.+ 16 Ngombana lapho kunesivumelwano khona, ukufa komenzi wesivumelwano omumuntu kutlhogeka bona kube khona 17 ngebanga lokuthi isivumelwano sisebenza ekufeni njengombana singasebenzi umenzi wesivumelwano omumuntu nakasaphilako. 18 Ngebanga lalokho nesivumelwano saphambilini azange senziwa sasebenza ngaphandle kweengazi. 19 Ngombana ngemva kokuthi uMosi akhulume woke umyalo womThetho kibo boke abantu, wathatha iingazi zamathole aduna neembuzi namanzi newulu ebomvu be nehisopi, wafafaza incwadi* nabantu boke, 20 wathi: “Lezi ziingazi zesivumelwano uZimu aniyale bona nisilalele.”+ 21 Ngokufanako, wafafaza netende nazo zoke izitja zomsebenzi ocwengileko ngeengazi.+ 22 Iye, ngokomThetho pheze zoke izinto zihlanjululwa ngeengazi+ begodu ngaphandle kobana iingazi ziphalazwe akwenzeki ukulitjalelwa kwezono.+

23 Ngalokho, bekutlhogeka bona umfanekiso+ wezinto zezulwini uhlanjululwe ngeendlelezi+ kodwana izinto zezulwini zitlhoga imihlatjelo engcono khulu. 24 Ngombana uKrestu akhenge angene endaweni ecwengileko eyenziwe ngezandla,+ emfanekiso walokho okungokwamambala+ kodwana wangena ezulwini ngokwalo,+ kangangobana nje ubonakala phambi kwakaZimu ngebanga lethu.+ 25 Lokho akhenge kwenzelwe bona azinikele kanengi, njengalokha umphristi ophakemeko angena endaweni ecwengileko qobe mnyaka+ neengazi ekungasingezakhe. 26 Ngathana bekunjalo, bekuzakufanele atlhage kanengi kusukela ekuthonyisweni kwephasi. Kodwana nje uzibonakalise kwaba kanye kwaphela ekupheleni kwephasi bona aqede isono ngomhlatjelwakhe.+ 27 Godu njengombana abantu balindelwe kukufa kube kanye kwaphela kodwana ngemva kwalokhu bafumane isahlulelo, 28 ngokufanako noKrestu wanikelwa kwaba kanye kwaphela bona athwale izono zabanengi;+ nasekabonakala kwesibili uzabe angasazokuqalana nesono begodu uzokubonwa ngilabo abamfuna ngeqiniso bona basindiswe.+

10 Njengombana umThetho unesithunzi+ sezinto ezihle ezizako+ kodwana ingasi zona ngokwazo, angekhe wenza labo abatjhidelako bona baphelele+ ngemihlatjelo efanako esolo inikelwa qobe mnyaka. 2 Ngathana bekunjalo, kghani bekungekhe kwaliswa ukunikelwa kwemihlatjelo? Ngombana labo abanikela umsebenzi ocwengileko abahlanzwe kanye bebangekhe basazizwa banezono. 3 Ngokuphambene nalokho, imihlatjelo le isikhumbuzo sezono qobe mnyaka+ 4 ngombana akukghoneki bona iingazi zeenkunzi nezeembuzi zisuse izono.

5 Yeke nakeza ephasini, wathi kuZimu: “‘Akhenge uyifune imihlatjelo neminikelo kodwana ungilungiselele umzimba. 6 Akhenge uyamukele iminikelo etjhiswako epheleleko neminikelo yesono.’+ 7 Nje-ke ngathi: ‘Qala! Ngizile (emsongweni kutloliwe ngami) ukuzokwenza intandwakho, Zimu.’”+ 8 Ngemva kokuthoma ngokuthi: “Akhenge uyifune namkha uyamukele imihlatjelo neminikelo, iminikelo etjhiswako epheleleko neminikelo yesono” imihlatjelo enikelwa ngokomThetho 9 wathi godu: “Qala! Ngizile ukuzokwenza intandwakho.”+ Uqeda okungekokuthoma bona athomise okungekwesibili. 10 ‘Ngentando’ le+ sicwengisiwe ngomnikelo womzimba kaJesu Krestu kube kanye kwaphela.+

11 Godu, umphristi ngamunye ujama endawenakhe qobe langa bona anikele umsebenzi ocwengileko+ begodu enze umhlatjelo ofanako kanengi,+ umhlatjelo ongeze wasusa izono ngokupheleleko.+ 12 Kodwana umuntu lo wanikela ngomhlatjelo munye ngebanga lezono kwaba kanye kwaphela, wahlala ngesidleni sakaZimu,+ 13 kusukela lapho ulinde bekube kulapho izitha zakhe zibekwa njengesinabelo seenyawo zakhe.+ 14 Ngombana kungomhlatjelo munye enze ngawo bona labo abacwengiswako baphelele+ ngokungapheliko. 15 Ngaphezu kwalokho nommoya ocwengileko uyafakaza kithi, ngombana ngemva kobana uthe: 16 “‘Lesi sivumelwano engizosenza nabo ngemva kwamalanga lawo,’ kutjho uJehova.* ‘Ngizokufaka imithethwami eenhliziyweni zabo, ngizoyitlola nemikhumbulwenabo.’”+ 17 Godu uthi: “Angekhe ngisazikhumbula izono zabo nezenzo zabo zokungabi namthetho.”+ 18 Lapho kunokulitjalelwa kwalokhu, awusekho umnikelo wesono.

19 Nje-ke bafowethu njengombana sinesibindi sokusebenzisa indlela yokungena endaweni ecwengileko+ ngeengazi zakaJesu, 20 asivulele yona njengendlela etja nephilako ngokudlula erharidenini,+ eliyinyamakhe 21 begodu njengombana sinomphristi obabazekako owengamele indlu kaZimu,+ 22 asitjhideleni kuZimu ngeenhliziyo ezithembekileko nangokukholwa okupheleleko, iinhliziyo zethu zifafazwe zahlwengeka kunembeza omumbi+ nemizimbethu ihlanzwe ngamanzi ahlwengileko.+ 23 Asikubambeni ngokuqinileko ukulivuma tjhatjhalazi ithemba lethu ngaphandle kokutekateka+ ngombana loyo othembisileko uthembekile. 24 Asicabangelaneni ukuthi sivuselelane ithando nemisebenzi emihle,+ 25 singakuliseleli ukuhlangana kwethu ndawonye+ njengombana abanye banomukghwa loyo, kodwana sikhuthazane,+ khulukhulu njengombana nibona ilanga litjhidela.+

26 Ngombana nasenza isono ngabomu ngemva kobana sesamukele ilwazi elinembileko leqiniso,+ awusekho umhlatjelo wezono oseleko+ 27 kodwana kunokulindela okuthileko okuthusako kwesahlulelo nelaka elivuthako elizokuqeda abaphikisako.+ 28 Nanyana ngubani odelela umThetho kaMosi ufa ngaphandle kokurhawukelwa ngobufakazi bababili namkha abathathu.+ 29 Nicabanga bona sikhulu kangangani-ke isijeziso esifanele umuntu ogadange iNdodana kaZimu noziqale njengezijayelekileko iingazi zesivumelwano+ acwengiswa ngazo nosilinge ummoya womusa omkhulu ngokudelela?+ 30 Ngombana siyamazi owathi: “Ngekwami ukuzibuyiselela; ngizokubuyisela.” Godu: “UJehova* uzokwahlulela abantu bakhe.”+ 31 Kuyinto esabekako ukuwela ezandleni zakaZimu ophilako.

32 Ngalokho, ragelani phambili nikhumbula amalanga waphambilini, okwathi ngemva kobana senikhanyiselwe,+ nakghodlhelela ukulwa okukhulu ngokutlhaga. 33 Ngezinye iinkhathi bekubukiswa ngani tjhatjhalazi ngokunithuka nangokunenza nibe lisizi, ngezinye iinkhathi nahlanganyela nalabo ebebaqalene nobujamobo. 34 Ngombana nabarhawukela labo abasejele begodu nakwamukela ngethabo ukudlelezelwa izinto zenu,+ nazi ukuthi nina ninokungcono khulu nokungapheliko.+

35 Yeke, ningakulahli ukuba nesibindi kwenu, enizokunikelwa umvuzo onothileko+ ngebanga lakho. 36 Ngombana nitlhoga ukukghodlhelela+ bona ngemva kobana senenze intando kaZimu, nifumane ukuzaliseka kwesithembiso. 37 Kusele “isikhathi esincani khulu”+ begodu “ozako uzokufika, angekhe ariyade.”+ 38 “Kodwana olungileko wami uzokuphila ngebanga lokukholwa”+ begodu “nakahlehla isinyava, angithabi ngaye.”+ 39 Nje-ke asisimihlobo yabantu ebuyela emuva ekutjhatjalalisweni+ kodwana simihlobo yabantu ekholwako bona kusindiswe ukuphila kwethu.

11 Ukukholwa kulindelwa okuqinisekisiweko kwalokho esinethemba ngakho,+ ubufakazi obanelisako* balokho okungokwamambala okungabonwako. 2 Yeke, abantu bekadeni* bafumana ubufakazi.

3 Ngokukholwa siyalemuka ukuthi iphaseli lahlelwa ngelizwi lakaZimu ukuthi okubonwako kube khona ezintweni ezingabonakaliko.

4 Ngokukholwa u-Abela wanikela uZimu umhlatjelo osezingeni eliphezulu kunokaKayini+ begodu ngokukholokho wamukela ubufakazi bokuthi ulungile ngombana uZimu wamukela* izipho zakhe,+ ngitjho nanyana ahlongakele, usakhuluma+ ngokukholwa kwakhe.

5 Ngokukholwa u-Inogo+ wadluliswa bona angaboni ukufa, akhenge asafumaneka ndawo ngombana uZimu wamdlulisa+ ngombana ngaphambi kobana adluliswe wafumana ubufakazi bokuthi uthabise uZimu. 6 Ngaphezu kwalokho, ngaphandle kokukholwa akukghoneki ukuthabisa uZimu ngombana nanyana ngubani otjhidela kuZimu kufuze akholelwe ukuthi ukhona nokobana uba mvuzi walabo abamfuna ngetjiseko.+

7 Ngokukholwa, uNowa+ ngemva kokufumana isiyeleliso esivela kuZimu sezinto ebezingakabonwa,+ walalela uZimu,* wakha umkhumbi+ bona asindise umndenakhe begodu ngebanga lokukholokhu walahla iphasi,+ waba yindlalifa yokulunga okumphumela wokukholwa.

8 Ngokukholwa, u-Abrahama+ nakabizwako, walalela ngokuthi aphume endawenekhabo watjhinga endaweni ebekazoyizuza njengelifa; waphuma, ngitjho nanyana bekangazi bona uyaphi.+ 9 Ngokukholwa wahlala njengomuntu ovela kwenye inarha,+ enarheni yesithembiso ngasuthi usenarheni ekungasingeyakhe, wahlala ematendeni+ no-Isaka noJakopo, iindlalifa ezikunye naye zesithembiso esifanako.+ 10 Ngombana bekalinde idorobho elineensekelo zamambala, lelo umtlami nomakhi walo kunguZimu.+

11 Ngokukholwa noSara wafumana amandla wokuba sidisi,* ngitjho nanyana iminyakakhe yokuba sidisi beseyidlulile+ ngombana wamqala njengothembekileko loyo owenze isithembiso. 12 Ngebangeli, ngomuntu munye obekanjengofileko,+ kwabelethwa abantwana+ abanengi njengeenkwekwezi zomkayi nokungekhe kwakghoneka ukubabala njengehlabathi yelwandle.+

13 Ngokukholwa boke laba bafa, ngitjho nanyana bangakhenge bafumane ukuzaliseka kweenthembiso+ kodwana bazibona zisesekude,+ bazamukela begodu bavuma tjhatjhalazi ukuthi bavela kwenye inarha nezakhamuzi zesikhatjhana enarheni. 14 Ngombana labo abakhuluma njalo benza kube semtarini bona bayifuna ngetjiseko indawo ekungeyabo. 15 Nje-ke, ngathana bebasolo bakhumbula indawo abayitjhiyako,+ bebazokuba nethuba lokubuyela kiyo. 16 Kodwana nje balwela ukufikelela indawo engcono, okutjho indawo okungeyezulwini. Nje-ke, uZimu akananhloni ngabo bona abizwe ngokuthi unguZimabo+ ngombana ubalungiselele idorobho.+

17 Ngokukholwa, u-Abrahama nakalingwako,+ kwaba ngasuthi sekanikele ngo-Isaka, iye, loyo owamukela iinthembiso ngethabo bekakulungele ukunikela ngendodanakhe okukuphela kwayo,+ 18 ngitjho nanyana kwathiwa kuye: “Iinzukulwana zakho zizokuza ngo-Isaka.”+ 19 Kodwana bekazi ukuthi uZimu angakghona ukumvusa kwabafileko begodu wamamukela abuya ekufeni ngendlela engokomfanekiso.+

20 Ngokukholwa u-Isaka naye wabusisa uJakopo+ no-Esewu+ malungana nezinto ezisezako.

21 Ngokukholwa, uJakopo nasekazokufa,+ wabusisa ngayinye yamadodana kaJosefa+ begodu walotjha uZimu adzimelele ngedondolo lakhe.+

22 Ngokukholwa, uJosefa nasekazokufa, wakhuluma ngokufuduka kwamadodana ka-Israyeli begodu wanikela iinqophiso* malungana namathambakhe.*+

23 Ngokukholwa uMosi wafihlwa babelethi bakhe iinyanga ezintathu ngemva kokubelethwa kwakhe+ ngombana babona ukuthi umntwana bekamuhle+ begodu akhenge basabe umyalo wekosi.+ 24 Ngokukholwa, uMosi nasekakhulile,+ wabhala ukubizwa ngokuthi yindodana yendodakazi kaFaro,+ 25 wakhetha ukuphathwa kumbi nabantu bakaZimu kunokobana athatjiswe sisono kwesikhatjhana 26 ngombana waqala ukuhlaziswa kwakaKrestu njengobunjinga obukhulu ukudlula amagugu weGibhide ngombana waqala ngetjiseko ekufumaneni umvuzo. 27 Ngokukholwa watjhiya iGibhide+ kodwana angasabi ilaka lekosi+ ngombana waragela phambili adzimelele ngasuthi uyambona ongabonakaliko.+ 28 Ngokukholwa wagidinga iPhasika nokufafazwa kweengazi eminyango bona umtjhabalalisi angalimazi* amazibulwabo.+

29 Ngokukholwa bayama iLwandle eliBomvu ngasuthi bakhamba endaweni eyomileko+ kodwana kuthe amaGibhide nakalinga ukuyama, acwila.+

30 Ngokukholwa amaboda weJerikho awa ngemva kokuthi abantu bamatjhe bawabhoda amalanga alikhomba.+ 31 Ngokukholwa uRarhabu ingwadla akhenge atjhabalale nalabo abangakhenge balalele ngombana wamukela iinhloli ngokuthula.+

32 Ngikuphi okhunye engingakutjho? Ngombana isikhathi angekhe sangivumela nangingaragela phambili ngihlathulula ngoGidiyoni,+ uBharaki,+ uSamsoni,+ uJafta,+ uDavida+ kunye noSamyela+ nabanye abaphorofidi. 33 Ngokukholwa bahlula imibuso,+ benza ukulunga, bafumana iinthembiso,+ bavala imilomo yamabhubezi,+ 34 bacima amandla womlilo,+ baphunyurha ekubulaweni ngesabula,+ kusukela ekubogabogeni benziwa babanamandla,+ babanamandla epini,+ bahlula amabutho asahlelako.+ 35 Abafazi bafumana abafileko babo ngokuvuswa+ kodwana amanye amadoda bewahlunguphazwa ngombana bewangamukeli ukutjhatjhululwa ngesihlengo esithileko bona afumane ukuvuswa okungcono. 36 Kwamambala, abanye balingwa ngokuthi kuhlekiswe ngabo begodu barithwe, ngaphezu kwalokho, babotjhwa+ bafakwa emajele.+ 37 Bakghadlhwa ngamatje,+ balingwa, baquntulwa phakathi ngesarha, babulawa ngesabula,+ bakhambakhamba bambethe iinkhumba zezimvu, iinkhumba zeembuzi,+ kukulapho batlhoga, basesizini,+ baphathwa kumbi+ 38 nephasi belingakabafaneli. Bazulazula emmangweni, eentabeni, emarholweni+ nemigodini yephasi.

39 Nje-ke boke laba nanyana bamukele ubufakazi obuhle ngebanga lokukholwa kwabo, akhenge bafumane ukuzaliseka kwesithembiso 40 ngombana uZimu bekabone kungakenzeki okuthileko okungcono+ bona bangapheleliswa ngaphandle kwethu.

12 Ngebanga lokuthi sinelifu elikhulu kangaka labofakazi elisibhodileko, asilahle woke umthwalo nesono esisirareja lula,+ siwugijime ngokukghodlhelela umjarho obekwe phambi kwethu+ 2 njengombana siqale ngetjiseko kuMjameli omKhulu noMphelelisi wokukholwa kwethu, uJesu.+ Ngebanga lethabo ebelibekwe phambi kwakhe wakghodlhelela isigodo sokuhlunguphazwa,* azange abe nendaba nokuhlaziswa, wahlala ngesidleni sesihlalo sobukhosi sakaZimu.+ 3 Kwamambala, cabangisisani khulu ngaloyo okghodlhelele ikulumo enjalo ephikisako yezoni+ elimaza zona bona ningadinwa begodu niphele amandla.+

4 Ekulweni kwenu nesonweso nisengakalwi bekube sezingeni lokobana kuphalake iingazi zenu. 5 Senisikhohlwe tjhira, isikhuthazo esithi nimadodana, nasithi: “Ndodanami, ungakunyazi ukukhalima okuvela kuJehova* namkha uphele amandla nawulungiswa nguye 6 ngombana uJehova* uyabakhalima labo abathandako, eqinisweni, ujezisa* nanyana ngubani amamukela njengendodana.”+

7 Kufuze nikghodlhelele ngombana leyo yingcenye yokuyalwa kwenu. UZimu uniphatha njengamadodana.+ Ngombana ngiyiphi indodana engakhalinywa nguyise?+ 8 Kodwana nangabe akhenge nihlanganyele noke ekufumaneni isiyalwesi, nimavezandlebe, ingasi amadodana. 9 Ngaphezu kwalokho abobaba bethu benyama bebajayele ukusikhalima, sabahlonipha. Akukafuzi na sizithobe khulu kuBaba owasikhetha ngommoya ocwengileko begodu siphile?+ 10 Ngombana basikhalima isikhatjhana ngokuvumelana nalokho ebekubonakala kukuhle kibo kodwana yena wenza lokho bona kuzuze thina ukuthi sihlanganyele ekucwengekeni kwakhe.+ 11 Kuliqiniso, akukho ukukhalinywa okubonakala kuthabisa kwanjesi, kodwana kubuhlungu* nanyana kunjalo ngemva kwalokho labo ababandulwe ngikho kubalethela isithelo sokuthula esikulunga.

12 Nje-ke qinisani izandla ezirephelelako namadolo abogabogako,+ 13 niragele phambili nenzela iinyawo zenu iindlela+ ezinqophileko bona okurholopheleko kungathuweleli, kunalokho, kulatjhwe. 14 Lwelani ukuba nokuthula nabantu boke+ nokucwengeka+ okunganamuntu ozokubona iKosi ngaphandle kwakho. 15 Tjhejani bona kungabi namunye obhalelwa kufumana umusa omkhulu kaZimu bona kungabi nomrabhu onetjhefu ovelako ubangele imiraro begodu abanengi basilaphazwe ngiwo;+ 16 tjhejani nokobana hlangana nani lapho kungabi noziphatha kumbi ngokomseme* namkha ongazihloniphi izinto ezicwengileko, njengo-Esewu, owathengisa amalungelwakhe wobuzibulo ngesidlo sinye.+ 17 Ngombana niyazi bona ngemva kwalokho nasekafuna ukuzuza isibusiso njengelifa, wadinywa sona ngombana nanyana alinga ngamandla ukutjhugulula umkhumbulo* ngeenyembezi,+ kwaba lilize.

18 Ngombana akhenge nitjhidele kokuthileko okuthintekako+ nokutjhiswe ngomlilo+ nelifini elinzima nebumnyameni obukhulu nesiwuruwurwini+ 19 nekubethweni kwebhorompita+ nephimbweni elikhuluma amezwi,+ okwathi nabalizwako, abantu barabhela bona kungasakhulunywa litho kibo.+ 20 Ngombana akhenge bawujamele umyalo othi: “Ngitjho nanyana kungaba silwana esithinta intaba, kufuze sikghadlhwe ngamatje.”+ 21 Godu isibonakaliswesi besithusa khulu kangangobana uMosi wathi: “Ngiyasaba begodu ngiyahlengezela.”+ 22 Kodwana senitjhidele eNtabeni yeZiyoni+ nedorobheni lakaZimu ophilako, iJerusalema lezulwini+ nematjhumini weenkulungwana zeengilozi 23 ezibuthene ndawonye+ nebandleni lezibulo elitloliswe ezulwini nakuZimu umaHluleli wabo boke+ nekuphileni kwabalungileko ababelethwe ngommoya ocwengileko+ abenziwe baphelela+ 24 nakuJesu umlamuli+ wesivumelwano esitjha+ neengazini ezifafaziweko, ezikhuluma ngcono kuneengazi zaka-Abela.+

25 Yelelani bona ningavumi ukungalaleli loyo okhulumako.* Ngombana nangabe labo abasephasini abala ukulalela loyo onikela isiyeleliso esivela kuZimu akhenge baphunyurhe, kangangani-ke ngathi, angeze saphunyurha nasifulathela loyo okhuluma avela ezulwini!+ 26 Mhlokho ilizwi lakhe lasikinya iphasi+ kodwana nje uthembisile wathi: “Godu angekhe ngisasikinya iphasi kwaphela kodwana ngizokusikinya nezulu.”+ 27 Nje-ke ilizwi elithi “godu” litjengisa ukususwa kwezinto ezisikinyiweko, izinto ezenziweko bona izinto ezingakasikinywa zisale. 28 Njengombana sizokufumana umBuso ongeze wasikinywa, asirageleni phambili samukela umusa omkhulu, ngawo esizokunikela kuZimu umnikelo owamukelekako womsebenzi ocwengileko ngokusaba nangehlonipho. 29 Ngombana uZimethu umlilo otjhabalalisako.+

13 Ragelani phambili nithandana njengamalunga womndeni.+ 2 Ningakhohlwa ukwamukela iimvakatjhi,*+ ngombana ngakho abanye bamukela iingilozi bangazi.+ 3 Ningabakhohlwa labo abasejele,+ ngasuthi nani nibotjhwe nabo,+ nalabo abatlhoriswako njengombana nani nisemzimbeni wenyama.* 4 Umtjhado awuhlonipheke phakathi kwabo boke nombhede womtjhado ungabi nokusilaphala+ ngombana uZimu uzokwahlulela abantu abaziphatha kumbi ngokomseme* nabafebako.*+ 5 Indlelenu yokuphila ayingabi nalo ithando lemali,+ kukulapho naneliseka ngezinto ezikhona.+ Ngombana uthe: “Angekhe nginitjhiye begodu angekhe nginilahle.”+ 6 Bona sibe nesibindi khulu sithi: “UJehova* umsizami; angekhe ngisabe. Umuntu angangenzani?”+

7 Khumbulani labo abadosa phambili phakathi kwenu,+ abakhulume ilizwi lakaZimu kini begodu njengombana nicabangisisa ngomphumela wokuziphatha kwabo, nilingise ukukholwa kwabo.+

8 UJesu Krestu akakatjhuguluki kusukela izolo nanamhlanjesi bekube nini nanini.

9 Ningadurhiswa ziimfundiso ezihlukahlukeneko nezirarako ngombana kungcono bona ihliziyo iqiniswe ngomusa omkhulu kunangokudla,* okungabazuzisiko labo abadzimelele kikho.+

10 Sine-aldara lapho labo abenza umsebenzi ocwengileko etendeni abanganalungelo lokudla kilo.+ 11 Ngombana imizimba yeenlwana, lezo iingazi zazo umphristi ophakemeko ebekangena nazo endaweni ecwengileko njengomnikelo wesono, itjhiselwa ngaphandle kwekampa.+ 12 Nje-ke noJesu watlhaga ngaphandle kwesango ledorobho+ bona acwengise abantu ngeengazi zakhe.+ 13 Yeke, asitjhingeni kuye ngaphandle kwekampa, sithwele ihlazo alithwalako+ 14 ngombana lapha asinalo idorobho elizokuhlala likhona kodwana silifuna ngetjiseko lelo elizako.+ 15 Ngaye asihlale sinikela uZimu umhlatjelo wokudumisa+ okutjho, isithelo semilomethu+ evuma tjhatjhalazi igama lakhe.+ 16 Ngaphezu kwalokho, ningakukhohlwa ukwenza okuhle nokwabelana lokho eninakho nabanye+ ngombana uZimu uthatjiswa khulu mihlatjelo enjalo.+

17 Lalelani labo abadosa phambili hlangana nani+ begodu nizithobe+ ngombana banelusile njengalabo abazoziphendulela+ bona lokhu bakwenze ngethabo ingasi ngokububula ngombana lokho bekuzonilimaza.

18 Ragelani phambili nisithandazela ngombana sithemba bona sinonembeza othembekileko* njengombana sifisa ukuziphatha ngokuthembeka ezintweni zoke.+ 19 Kodwana nginikhuthaza ngokukhethekileko bona nithandazele ukuthi ngibuyiselwe kini msinyana.

20 Nje-ke kwanga uZimu wokuthula, owavusa kwabafileko umelusi omkhulu+ wezimvu, iKosethu uJesu, ngeengazi zesivumelwano esingapheliko, 21 anganihlomisa ngayo yoke into ehle bona nenze intandwakhe begodu ngoJesu Krestu enze kithi lokho okuthabisa khulu emehlwenakhe, iphazimulo ayibe kuye bekube ngokungapheliko. Amen.

22 Nje-ke bafowethu, nginikhuthaza bona nililalele ngesineke ilizwi lesikhuthazweli ngombana nginitlolele incwadi efitjhani. 23 Nginazisa ukuthi umfowethu uThimothi utjhatjhululiwe. Nakangeza msinyana, ngizabe nginaye nanginibonako.

24 Nilotjhise boke abadosa phambili hlangana nani nabo boke abacwengileko. Labo abaseTariyana+ bayanilotjhisa.

25 Umusa omkhulu awube nani noke.