INCWADI KAJAKOPO

1 UJakopo,+ isigqila sakaZimu neseKosi uJesu Krestu, eentjhabeni ezili-12 ezirhatjhekele eendaweni ezihlukahlukeneko:

Lotjhani!

2 Thabani bafowethu nanihlangana neenlingo ezihlukahlukeneko+ 3 njengombana nazi ukuthi ukulingwa okunjalo kokukholwa kwenu kuveza ukukghodlhelela.+ 4 Kodwana vumelani ukukghodlhelela kuphelelise umsebenzakho bona nibe ngabapheleleko nabaqaqulukileko kikho koke, ningatlhayeli litho.+

5 Nje-ke nangabe omunye wenu utlhoga ukuhlakanipha, akaragele phambili akubawa kuZimu,+ uzokuphiwa khona+ ngombana ubapha boke ngomusa ngaphandle kokusola.*+ 6 Akaragele phambili abawa ngokukholwa,+ angazazi nakanye+ ngombana ozazako unjengegagasi lelwandle eliphetjhulwa mumoya liye ngapha nangapha. 7 Eqinisweni, umuntu loyo akukafuzi alindele ukwamukela litho kuJehova* 8 umumuntu onganatlha,+ ongakadzimeleli kizo zoke iindlela zakhe.

9 Umfowethu otlhagileko akathabe ngombana nje usesikhundleni esiphezulu+ 10 nonjingileko akathabele ukwehliswa kwakhe+ ngombana uzokutjhabalala njengethuthumbo lemmangweni. 11 Njengombana ilanga liphuma nokutjhisa kwalo okukhulu, litjhwabise isitjalo nethuthumbo laso lithintitheke nobuhle balo butjhabalale, kunjalo-ke nangomuntu onjingileko, uzokutjhabalala asagijimisa ubunjinga.+

12 Uyathaba umuntu oragela phambili akghodlhelela isilingo+ ngombana nakamukelwako uzokufumana isihlohlo sokuphila,+ leso uJehova* asithembise labo abaragela phambili bamthanda.+ 13 Umuntu nakalingwako, akangathi: “Ngilingwa nguZimu.” Ngombana uZimu akalingwa ngezinto ezimbi begodu naye akalingi muntu. 14 Kodwana ngamunye ulingwa ngokudoswa nangokuyengwa yikanukwakhe.+ 15 Nje-ke ikanuko nasele ivundile,* ibeletha isono, isono nasele senziwe, siletha ukufa.+

16 Ningakhohliswa bafowethu abathandekako. 17 Nanyana ngisiphi isipho esihle begodu nanyana ngisiphi isipho esipheleleko sivela phezulu,+ sehla sivela kuBaba weenkhanyisi zezulwini,+ ongatjhugulukiko njengemithunzi etjhidako.+ 18 Bekuyintandwakhe ukusenza sibe khona ngelizwi leqiniso,+ ukuthi sibe mhlobo othileko weenthelo zokuthoma zeembunjwa zakhe.+

19 Yazini lokhu bafowethu abathandekako: Woke umuntu kufuze abe msinya ekulaleleni, abe buthaka ekukhulumeni,+ abe buthaka ekusilingekeni+ 20 ngombana ukusilingeka komuntu akulethi ukulunga kwakaZimu.+ 21 Ngalokho, susani koke ukusilaphala nawo woke amachaphazela wobumbi,+ namukele ngomusa ukudzinyeleliswa kwelizwi elikghona ukunisindisa.

22 Yeke, yibani babenzi belizwi,+ ningabi ngabalizwako kwaphela, nizikhohlisa ngokucabanga okumamala. 23 Ngombana nangabe umuntu umumuzwi welizwi angasi mumenzi,+ unjengomuntu oqala ubuso bakhe esibonibonini. 24 Ngombana uyaziqala bese uyakhamba, akhohlwe msinyana bona umumuntu onjani. 25 Kodwana loyo oqalisisa emthethweni opheleleko+ ongowetjhaphuluko, aragele phambili kiwo, akakabi mumuzwi okhohlwako kodwana ube mumenzi womsebenzi, uzokuthaba kilokho akwenzako.+

26 Nangabe nanyana ngubani ucabanga ukuthi ulotjha uZimu kodwana angalawuli ilimu lakhe,+ ukhohlisa ihliziywakhe, nokulotjha kwakhe kulilize. 27 Umhlobo wokulotjha* ohlwengileko ngokombono kaZimethu uBaba ngilo: Kutlhogomela iintandani+ nabahlolokazi+ esizini labo,+ nokuhlala unganabala elivela ephasini.+

2 Bafowethu angeze nabambelela ekukholweni kweKosethu ephazimulako uJesu Krestu kukulapho ninebandlululo, akusinjalo?+ 2 Nakungenzeka kungene umuntu ofake iindzilamnwana zegolide nezambatho zakanokutjho emhlanganwenenu, bese kungena nomuntu otlhagako ombethe amaratha, 3 inga-kghani nimthathela phezulu loyo ombethe izambatho zakanokutjho bese nithi kuye, “Hlala lapha endaweni emabothobotho,” bese nithi kotlhagako, “Jama njalo wena” namkha “Hlala lapha ngaphasi kwesinabelo seenyawo zami”?+ 4 Nangabe kunjalo, aninabandlululo na phakathi kwenu+ begodu anikabi bahluleli abenza iinqunto ezimbi?+

5 Lalelani, bafowethu abathandekako. Kghani uZimu akhenge akhethe abatlhagako ngokombono wephasi bona babe ziinjinga ekukholweni+ neendlalifa zomBuso, awuthembise labo abamthandako?+ 6 Kodwana nina nibehlise isithunzi abatlhagako. Kghani akusiziinjinga ezinigandelelako+ begodu zinidosele emakhotho? 7 Kghani azihlambalazi igama elihle enabizwa ngalo? 8 Nje-ke, nangabe nilandela umthetho wobukhosi ngokuvumelana nomtlolo othi, “Kufuze uthande umakhelwanakho njengombana uzithanda wena,”+ nenza kuhle khulu. 9 Kodwana naniragela phambili ninebandlululo,+ nenza isono begodu umthetho unilahle ngecala njengabaphula umthetho.+

10 Ngombana nangabe umuntu ulalela woke umThetho kodwana athathe igadango elimbi endaweni yinye, sekaweqe woke umthetho.+ 11 Ngombana loyo othi, “Ungafebi,”*+ uthi godu, “Ungabulali.”+ Nje-ke, nangabe awufebi kodwana uyabulala, usiseqamthetho. 12 Ragelani phambili nikhuluma begodu niziphatha njengalabo abazokwahlulelwa ngomthetho wabantu abatjhaphulukileko.*+ 13 Ngombana loyo onganasirhawu uzokwahlulelwa ngaphandle kwesirhawu.+ Isirhawu siyasihlula isahlulelo.

14 Kuzuzisa ngani, bafowethu, umuntu nakathi uyakholwa kodwana anganamisebenzi?+ Ukukholokho angekhe kumsindise, akusinjalo?+ 15 Nangabe umfowethu namkha udadwethu akanazambatho* nokudla okwaneleko kwelanga 16 kodwana omunye wenu athi kuye, “Khamba ngokuthula ufuthumale begodu usuthe” kodwana ungamuphi akutlhogako emzimbenakhe, kuzuzisa ngani lokho?+ 17 Ngokufanako nokukholwa, nakukodwa tere, kunganamisebenzi, kufile.+

18 Nanyana kunjalo, omunye uzakuthi: “Wena unokukholwa, mina nginemisebenzi. Ngitjengisa ukukholwa kwakho ngaphandle kwemisebenzi, mina ngizokutjengisa ukukholwa kwami ngemisebenzi.” 19 Angithi niyakholwa bona kunoZimu munye? Kuhle khulu lokho. Kodwana namadimoni ayakholwa begodu ahlengezele.+ 20 Unendaba nokwazi na, wena muntu onganalwazi, ukuthi ukukholwa ngaphandle kwemisebenzi kulilize? 21 Kghani u-Abrahama ubabethu azange kuthiwe ulungile ngemisebenzi ngemva kokuthi anikele ngendodanakhe u-Isaka e-aldareni?+ 22 Niyabona ukuthi ukukholwa kwakhe bekukhambisana nemisebenzakhe nokuthi ukukholwa kwakhe kwapheleliswa ngemisebenzakhe,+ 23 kwazaliseka umtlolo othi: “U-Abrahama wakholwa kuJehova,* waqalwa njengolungileko”+ begodu wabizwa ngokuthi mngani kaJehova.*+

24 Niyabona ukuthi umuntu kuzokuthiwa ulungile ngemisebenzi ingasi ngokukholwa kwaphela. 25 Ngokwendlela efanako, uRarhabu ingwadla akhenge na kuthiwe ulungile ngemisebenzi ngemva kokwamukela kuhle iinthunywa begodu wazibalekisa ngenye indlela?+ 26 Njengombana umzimba ngaphandle kommoya ufile,+ ngokufanako nokukholwa ngaphandle kwemisebenzi kufile.+

3 Bafowethu, abasibanengi kini ekufuze babe bafundisi njengombana nazi ukuthi sizokufumana isahlulelo esibudisi.*+ 2 Ngombana soke siyatjhapha iinkhathi ezinengi.+ Nangabe kunomuntu ongatjhaphi ngelizwi, umuntu loyo akanasono, ukghona nokulawula umzimbakhe woke ngasuthi uwulawula ngetomu. 3 Nasifaka amatomu emilonyeni yeenjomani bona sizenze zisilalele, sinqophisa nemizimbazo yoke. 4 Qalani godu nemikhumbi: Nanyana imikhulu begodu iragwa mimoya enamandla, inqotjhiswa ngephini elincani khulu iye lapho umuntu otjhayelako afuna iye khona.

5 Nje-ke nelimu sisitho esincani somzimba, nanyana kunjalo lizikhakhazisa khulu. Akhese nibone ukuthi kutlhogeka umlilo omncani kangangani ukuthungela ihlathi elikhulu! 6 Ilimu nalo limlilo.+ Ilimu lijamele iphasi lokungalungi hlangana namalunga womzimbethu ngombana lisilaphaza umzimba woke,+ litjhise yoke indlela yokuphila ngomlilo begodu lona litjhiswa ngomlilo yiGehena.* 7 Ngombana yoke imihlobo yeembandana, yeenyoni, yeenlwana ezirhurhubako neyeenlwana zelwandle iyathanjiswa begodu ithanjiswe babantu. 8 Kodwana akunamuntu ongathambisa ilimu. Alilawuleki begodu liyalimaza, lizele itjhefu ebulalako.+ 9 Ngalo sidumisa uJehova,* uBaba, nanyana kunjalo, ngalo siqalekisa abantu ababe khona “ngomfanekiso kaZimu.”+ 10 Emlonyeni munye kuphuma isibusiso nesiqalekiso.

Bafowethu, akukalungi bona izinto zenzeke ngendlela le.+ 11 Umthombo awenzi bona amanzi amnandi namanzi ababako avinyilike endaweni efanako, akusinjalo? 12 Bafowethu, umuthi wamafeyi angekhe uthele ama-oliva namkha umuthi wamadiribe uthele amafeyi, akusinjalo?+ Ngokufanako emanzini anetswayi angekhe kwaphuma amanzi amnandi.

13 Ngubani ohlakaniphileko nonelemuko hlangana nani? Akathi ngokuziphatha kwakhe kuhle atjengise imisebenzi eyenziwe ngokuthobeka okuvela ekuhlakanipheni. 14 Kodwana nangabe ninomona+ nokubanga+ eenhliziyweni zenu, ningazikhakhazisi+ begodu nirhwayele iqiniso. 15 Lokhu akusikuhlakanipha okuvela phezulu ngekwephasi,+ kobulwana, nokobudimoni. 16 Ngombana nanyana kukuphi lapho kunomona nokubanga khona, kuzokuba nokutjharagana nakho koke okonakeleko.+

17 Kodwana ukuhlakanipha kwaphezulu kokuthoma kumsulwa,+ kunokuthula,+ kuyabonelela,+ kukulungele ukulalela, kuzele isirhawu neenthelo ezihle,+ akukhethululi,+ akunabuzenzisi.+ 18 Ngaphezu kwalokho, isithelo sokulunga sitjalwa ebujamweni bokuthula+ malungana nalabo abenza ukuthula.+

4 Zivelaphi izipi nokulwa phakathi kwenu? Kghani aziveli eenkanukweni zenu zenyama ezilwisanako phakathi kwenu?+ 2 Niyakhanuka kodwana anibi nalitho. Niragela phambili nibulala begodu nimarhamaru kodwana anikghoni ukufumana. Niragela phambili nilwa ngasuthi nisepini.+ Anibi nalitho ngebanga lokuthi anibawi. 3 Nanibawako, anifumani ngombana nibawa ngomnqopho omumbi, bona nikusebenzise eenkanukweni zenu zenyama.

4 Nina eningakathembeki,* anazi na bona ubungani nephasi kububutha noZimu? Nje-ke nanyana ngubani ofuna ukuba mngani wephasi uzenza inaba lakaZimu.+ 5 Namkha nicabanga ukuthi umtlolo uyazitjhwela na nawuthi: “Umona ongaphakathi kwethu usolo urhalela izinto zoke”?+ 6 Nanyana kunjalo umusa omkhulu awunikelako mkhulu kunawo. Yeke uthi: “UZimu ulwisana nabazikhakhazisako+ kodwana ubenzela umusa omkhulu abathobekileko.”+

7 Nje-ke zithobeni kuZimu+ kodwana nilwisane noDeveli+ begodu uzonibalekela.+ 8 Tjhidelani kuZimu naye uzokutjhidela kini.+ Hlanzani izandla zenu nina zoni,+ nicwengise iinhliziyo zenu+ nina abanganatlha. 9 Yibani lisizi, nizile benilile.+ Ukuhleka kwenu akuphenduke ukuzila, nethabo lenu liphenduke ukudana. 10 Zithobeni phambi kwakaJehova,*+ uzoniphakamisa.+

11 Lisani ukukhulumana kumbi bafowethu.+ Nanyana ngubani okhuluma kumbi ngomfowabo namkha ahlulele umfowabo ukhuluma kumbi ngomthetho begodu wahlulela umthetho. Nje-ke nawahlulela umthetho, awusimumenzi womthetho kodwana umumahluleli. 12 KunoMnikelimthetho noMahluleli munye kwaphela,+ loyo okghona ukusindisa nokutjhabalalisa.+ Kodwana wena, ungubani bona wahlulele umakhelwanakho?+

13 Nje-ke lalelani nina enithi: “Namhlanjesi namkha kusasa sizokuya edorobheneli, siqede umnyaka lapho, senze irhwebo begodu senze inzuzo,”+ 14 kukulapho ningazi ukuthi ukuphila kwenu kuzokuba njani kusasa.+ Ngombana niyikungu evela isikhatjhana bese inyamalale.+ 15 Kunalokho, kufuze nithi: “UJehova* nakathandileko,+ sizokuphila senze lokhu nalokha.” 16 Kodwana nje niyazikhakhazisa, nizigabisa ngani kwaphela. Koke ukuzigabisa okunjalo kumbi. 17 Nje-ke, nangabe umuntu uyazi ukuthi angakwenza njani okuhle kodwana angakwenzi, kusisono kuye.+

5 Lalelani-ke, nina bantu abanjingileko, lilani nirhahlawule ngebanga lamatlhuwo azonehlela.+ 2 Umnothwenu ubolile nezambatho zenu zidliwe ziingogwana.*+ 3 Igolide nesiliva lenu likghore ngokupheleleko nokukghora kwalo kuzokuba bufakazi obunilahlako begodu kuzokudla inyamenu. Lokho enizibulungele khona kuzokuba njengomlilo ngemihla yokuphela.+ 4 Qalani! Imirholo eniyigugudlheleko yeensebenzi ezivune amasimenu isolo iyalila nokulilela kwabavuni isizo kufikile eendlebeni zakaJehova* wamabutho.+ 5 Niphile ipilo emabothobotho begodu nazanelisa ephasini. Nizinonisile* ngelanga lokuhlatjwa.+ 6 Nilahlile, nabulala olungileko. Akaniphikisi na?

7 Nje-ke bafowethu, bekezelani bekube sekubeni khona kweKosi.+ Qalani! Umlimi uhlala alindele isithelo esiligugu sephasi, abekezele bekune izulu lokuthoma nezulu lamva.+ 8 Nani bekezelani,+ qinani ngombana ukuba khona kweKosi sekutjhidele.+

9 Ninganghonghoyili* ngomunye nomunye bafowethu, ukuthi ningahlulelwa.+ Qalani! UMahluleli ujame phambi kweminyango. 10 Bafowethu, kuthatheni njengesibonelo ukuhlunguphazeka+ nokubekezela+ kwabaphorofidi abakhuluma egameni lakaJehova.*+ 11 Qalani! Sithi bayathaba* labo abakghodlheleleko.+ Nizwile ngokukghodlhelela kwakaJobho+ nabona nomphumela uJehova* awunikelako,+ ukuthi uJehova unethando khulu begodu unesirhawu.+

12 Ngaphezu kwakho koke bafowethu, lisani ukufunga, kungaba ngezulu namkha ngephasi namkha ngananyana ngisiphi isifungo. Kodwana u-“Iye” wenu akatjho u-iye no-“Awa,” atjho u-awa,+ bona ningafanelwa sisahlulelo.

13 Ukhona oqalene nobudisi hlangana nani? Akaragele phambili athandaza.+ Ukhona othabileko? Akavume amarhubo.+ 14 Ukhona ogulako hlangana nani? Akabize abadala+ bebandla, bamthandazele, bamzese ngamafutha+ egameni lakaJehova.* 15 Umthandazo wokukholwa uzokwenza ogulako* aphile noJehova uzomvusa. Godu nangabe wenze izono uzokulitjalelwa.

16 Nje-ke, zivumeni ngokutjhaphulukileko izono zenu+ komunye nomunye begodu nithandazelane, ukuthi nilapheke. Ukurabhela komuntu olungileko kunomphumela onamandla.+ 17 U-Eliya bekamumuntu onamazizo afana nawethu kodwana wathandaza ngokuzimisela bona izulu lingani, azange line enarheni iminyaka emithathu neenyanga ezisithandathu.+ 18 Wathandaza godu, izulu lana nenarha yathela.+

19 Bafowethu, nakukhona hlangana nani ophambukiswako eqinisweni bese omunye ambuyise, 20 yazini ukuthi nanyana ngubani obuyisa isoni+ endlelenaso eyonakeleko, uzosisindisa* ekufeni begodu uzokugubuzesa izono ezinengi.+