INCWADI YOKUTHOMA KAPITROSI

1 UPitrosi, umpostoli+ kaJesu Krestu, ezakhamuzini zesikhatjhana ezirhatjhekele ePontusi, eGalatiya, eKaphadosiya,+ e-Asiya neBhithiniya, kilabo abakhethwe 2 ngokwazi kwakaZimu uBaba kusesengaphambili+ nangokucwengiswa ngommoya+ ngomnqopho wokulalela nokufafazwa ngeengazi zakaJesu Krestu:+

Kwanga umusa omkhulu nokuthula kungandiswa kini.

3 Akadunyiswe uZimu onguBaba weKosethu uJesu Krestu ngombana ngesirhawu sakhe esikhulu usinikele ukubelethwa kabutjha+ ethembeni eliphilako+ ngokuvuswa kwakaJesu Krestu kwabafileko,+ 4 elifeni elingonakaliko, elihlwengileko nelingatjhwabiko.+ Libekelwe nina ezulwini,+ 5 nina enivikelwa ngamandla kaZimu ngokukholwa ngebanga lesindiso elungele ukwambulwa esikhathini sokuphela. 6 Ngebanga lalokhu nithaba khulu, nanyana nje kutlhogeka nibe lisizi kwesikhatjhana ngeenlingo ezihlukahlukeneko+ 7 bona ukukholwa kwenu okulingiweko,+ kwezinga elikhulu kunegolide elitjhabalalako naphezu kobana lilingwe* ngomlilo, kunenze nidunyiswe, niphazinyuliswe begodu nihlonitjhwe ekwambulweni kwakaJesu Krestu.+ 8 Nanyana ningakhenge nimbone, niyamthanda. Nanyana ningamboni nje, niyakholwa kuye begodu nithaba khulu ngethabo elingahlathululekiko neliphazimulako 9 njengombana namukela umphumela wokukholwa kwenu, okukusindiswa kwenu.+

10 Malungana nesindiso le, abaphorofidi abaphorofida ngomusa omkhulu olungiselelwe nina baphenyisisa ngekuthalo begodu bahlolisisa ngokuzimisela.+ 11 Baragela phambili baphenyisisa ukuthi ummoya ongaphakathi kwabo uthi kuzokwenzekani begodu ngasiphi isikhathi malungana noKrestu+ njengombana unikela ubufakazi kusesengaphambili ngokutlhaga kwakaKrestu+ nephazimulo azoyifumana ngemva kwalokho. 12 Bembulelwa ukuthi abazisebenzeli bona kodwana basebenzela nina, malungana nalokho esele nitjelwe khona ngilabo abamemezela iindaba ezimnandi kini ngommoya ocwengileko owathunyelwa uvela ezulwini.+ Iingilozi zifisa khulu ukuzwisisa izintwezi.

13 Qiniselani iingqondo zenu umsebenzi,+ niqaquluke ngokupheleleko,+ bekani ithemba lenu emuseni omkhulu ozokulethwa kini ekwambulweni kwakaJesu Krestu. 14 Njengabantwana abalalelako, lisani ukubunjwa ziinkanuko ebeninazo ngesikhathi ninganalwazi 15 kodwana njengoCwengileko owanibizako, cwengekani kikho koke ukuziphatha kwenu+ 16 kutloliwe kwathiwa: “Kufuze nicwengeke ngombana nami ngicwengile.”+

17 Nangabe nibiza uBaba owahlulela ngokungakhethi+ ngokuya ngokomsebenzi womunye nomunye, ziphatheni ngokusaba+ phakathi nesikhathi sokuba kwenu zizakhamuzi zesikhatjhana. 18 Ngombana niyazi ukuthi endlelenenu yokuphila elilize enayifumana kibokhokho benu,* akhenge nitjhatjhululwe* ngezinto ezonakalako njengesiliva namkha igolide.+ 19 Kodwana bekungeengazi eziligugu,+ njengezemvana enganabala nemsulwa,+ ekungezakaKrestu.+ 20 Kuliqiniso, waziwa kusesengaphambili lingakathomi iphasi+ kodwana wabonakaliswa ekupheleni kweenkhathi ngebanga lenu.+ 21 Ngaye niyakholwa kuZimu,+ owamvusa kwabafileko+ begodu wamnikela iphazimulo,+ ukuze ukukholwa nethemba lenu kube kuZimu.

22 Njengombana senizicwengisile ngokulalela kwenu iqiniso nafumana ithando elinganabuzenzisi+ ngomunye nomunye, thandanani khulu ngokusuka ehliziyweni.+ 23 Ngombana ninikelwe ukubelethwa kabutjha,+ ingasi ngembewu eyonakalako kodwana ngembewu engonakaliko,+ ngelizwi lakaZimu ophilako nohlala ngokungapheliko.+ 24 Ngombana “boke abantu banjengotjani nephazimulo yabo yoke injengethuthumbo lesimini. Utjani buyatjhwaba nethuthumbo liyathintitheka 25 kodwana ilizwi lakaJehova* lihlala ngokungapheliko.”+ ‘Ilizweli’ liziindaba ezimnandi ezamenyezelwa kini.+

2 Nje-ke lahlani boke ubumbi,+ ukukhohlisa, ubuzenzisi, umona, nakho koke ukudlana iinthende. 2 Njengamasana asanda ukubelethwa,+ yakhani ukululukela ibisi elimsulwa lelizwi, bona ngalo nikhulele esindisweni,+ 3 kwaphela nangabe ninambithile ukuthi iKosi inomusa.

4 Njengombana niza kuye, olilitje eliphilako elininwe babantu+ kodwana elikhethiweko, eliligugu kuZimu,+ 5 nina ngokwenu njengamatje aphilako niyindlu eyakhiwa ngommoya kaZimu+ bona nibe buphristi obucwengileko begodu ninikele imihlatjelo ngokuvumelana nommoya kaZimu+ nowamukelekako kuye ngoJesu Krestu.+ 6 EmTlolweni kuthiwa: “Qalani! Ngibeka eZiyoni ilitje elikhethiweko, ilitje lesisekelo eliligugu begodu akekho okholwa kilo ozokudana.”*+

7 Nje-ke uligugu kini ngombana nimakholwa kodwana kwabangakholwako, “ilitje abakhi abalininako,+ libe lilitje eliqakatheke ukuwadlula woke”*+ 8 begodu “lilitje nedwala elisiqabo.”+ Bayawa ekukholweni ngombana abalilaleli ilizwi. Lesi siphetho esibalindeleko. 9 Kodwana “nilihlanga elikhethiweko, ubuphristi bobukhosi, isitjhaba esicwengileko,+ isitjhaba esiyipahla ekhethekileko,+ bona nimemezele kiyo yoke indawo ubuhle”+ baloyo owanibiza anikhupha ebumnyameni anisa ekukhanyeni kwakhe okukarisako.+ 10 Ngombana phambilini beningasisitjhaba kodwana nje nisitjhaba sakaZimu.+ Khenangarhawukelwa kodwana nje nifumene isirhawu.+

11 Bathandekako, nginikhuthaza kwanga nibabantu abavela kwenye inarha nezakhamuzi zesikhatjhana+ bona nilise iinkanuko zenyama,+ ezilwisana nani.+ 12 Hlalani niziphatha kuhle hlangana neentjhaba,+ ukuthi nazinisola ngokwenza okumbi, zibe bofakazi bemisebenzenu emihle+ begodu umphumela kube kuphazimulisa uZimu elangeni lakhe lokuhlola.

13 Ngebanga leKosi zithobeni kikho koke okwenziwe mumuntu,+ kungaba sekosini+ njengephakemeko 14 namkha ebabusini njengabathunywe nguye bona bajezise abenzi bobumbi kodwana badumise labo abenza okuhle.+ 15 Ngombana kuyintando kaZimu ukuthi ngokwenza okuhle nithulise ikulumo yokungazi yabantu abanganangqondo.+ 16 Yibani njengabantu abatjhaphulukileko,+ nisebenzise itjhaphulukwenu, ingasi njengesigubuzeso sokwenza okumbi+ kodwana njengeengqila zakaZimu.+ 17 Hloniphani yoke imihlobo yabantu,+ thandani yoke ihlangano yabafowethu,+ sabani uZimu,+ hloniphani ikosi.+

18 Iinsebenzi azizithobe ebaphathini bazo ngakho koke ukusaba okulindelekileko,+ ingasi kwabalungileko nababonelelako kwaphela kodwana nakilabo okubudisi ukubathabisa. 19 Kuyathabisa umuntu nakakghodlhelela ubudisi* begodu atlhage ngokungabi nabulungiswa ngebanga lakanembezakhe kuZimu.+ 20 Kuzuzisa ngani nangabe niyabetjhwa ngebanga lokona begodu niyakukghodlhelela?+ Kodwana nangabe nikghodlhelela ukutlhaga ngebanga lokwenza okuhle, lokhu kuyinto ethabisako kuZimu.+

21 Eqinisweni, nabizelwa endleleni le yokuphila ngombana noKrestu watlhaga ngebanga lenu,+ anitjhiyela isibonelo sokobana nilandele umtlhalakhe eduze.+ 22 Akhenge enze isono+ namkha kufumaneke ukukhohlisa emlonyenakhe.+ 23 Nakathukwako+ akhenge abuyisele ngehlamba.+ Nakatlhagako+ akhenge athusele kodwana wazibeka kiloyo owahlulela+ ngokulunga. 24 Yena ngokwakhe wathwala izono zethu+ emzimbenakhe esigodweni,*+ bona sife ezonweni, siphile ekulungeni. Nje-ke “nilatjhiwe ngamancebakhe.”+ 25 Beninjengezimvu ezidurhako+ kodwana nje senibuyele kumelusi+ nomtlhogomeli wemiphefumulwenu.*

3 Ngendlela efanako, nina bafazi zithobeni emadodenenu+ bona nakukhona ongalilaleli ilizwi, azuzwe ngaphandle kwelizwi kodwana ngokuziphatha kwabafazi bawo+ 2 ngombana abe bofakazi bokuzibonela bokuziphatha kwenu okumsulwa+ kuhlanganise nokuhlonipha okukhulu. 3 Ukuzikghabisa kwenu akungabi ngekwangaphandle kokuluka iinhluthu nokufaka imikghabiso yegolide+ namkha izambatho zakanokutjho 4 kodwana akube mumuntu osithekileko wehliziyo ombethe isambatho sokungonakali sommoya onokuthula nobumnene,+ okungokwezinga eliphezulu emehlweni kaZimu. 5 Ngombana le yindlela abafazi abacwengileko bangesikhathi esidlulileko ebebanethemba kuZimu ebebazikghabisa ngayo, bazithoba emadodenabo 6 njengoSara owalalela u-Abrahama, ambiza ngokuthi kosi.+ Nani nibe bantwana bakhe, kwaphela naniragela phambili nenza okuhle begodu ningasabi.+

7 Ngendlela efanako, nina madoda ragelani phambili nihlala nabo ngokwazi.* Njengombana abafazi babuthakathaka kunani, kufuze nibaphathe ngehlonipho+ njengezitja ezibogabogako ngombana nabo baziindlalifa kunye nani+ zomusa omkhulu wokuphila, bona imithandazwenu ingaliyeki.

8 Emaswapheleni, noke yibani nomkhumbulo onobunye,*+ nizwelane, nithandane njengamalunga womndeni, nibe nesirhawu+ nokuthobeka.+ 9 Ningabuyiseli ubumbi ngobumbi+ namkha ukuthukana ngokuthukana.+ Kunalokho, buyiselani ngokubusisa+ ngombana nabizelwa endleleni le yokuphila bona nizuze isibusiso.

10 Ngombana “nanyana ngubani othanda ukuphila begodu ohlala athabile kufuze atjheje ilimu lakhe kokumbi+ neendebe zakhe ekukhulumeni ngokukhohlisa. 11 Akafulathele okumbi+ enze okuhle,+ akafune ukuthula begodu alwele ukukufumana.+ 12 Ngombana amehlo kaJehova* akwabalungileko neendlebe zakhe zilalela ukuncenga kwabo+ kodwana ubuso bakaJehova* bulwisana nalabo abenza okumbi.”+

13 Kuhlekuhle ngubani ozonilimaza nanithanda okuhle?+ 14 Kodwana ngitjho nanyana ningatlhaga ngebanga lokulunga, niyathaba.+ Ningakusabi abakusabako* namkha nithikaziseke.+ 15 Kodwana cwengisani uKrestu njengeKosi eenhliziyweni zenu, nihlale nikulungele ukuvikela phambi kwabo boke abafuna ngekani ibanga lethemba eninalo kodwana nikwenze ngommoya ophasi+ nangokuhlonipha okukhulu.+

16 Hlalani ninonembeza omuhle,+ bona nanyana yini abayikhuluma kumbi ngani, labo abanikhuluma kumbi bahlaziseke+ ngebanga lokuziphatha kwenu okuhle njengabalandeli bakaKrestu.+ 17 Kungcono ukutlhaga ngebanga lokwenza okuhle,+ nangabe kuyintando kaZimu bona kwenzeke, kunokobana nitlhage ngombana nenza okumbi.+ 18 UKrestu wafa kanye kwaphela afela izono,+ umuntu olungileko ngebanga labantu abangakalungi,+ ukuthi anidosele kuZimu.+ Wabulawa enyameni+ kodwana waphiliswa emmoyeni.+ 19 Asebujamwenobu wakhamba wayokutjhumayeza imimoya ejele,+ 20 leyo engakhange ilalele ngaphambilini lokha uZimu alinde ngokubekezela emihleni kaNowa+ nakusakhiwa umkhumbi,+ lapho abantu abambalwa okumiphefumulo* ebunane, abasindiswa khona emanzini.+

21 Nje-ke ibhabhadiso lilitshwayo lalokhu, nalo kwanje liyanisindisa (ingasi ngokususa isila enyameni kodwana ngokubawa unembeza omuhle kuZimu),+ ngokuvuswa kwakaJesu Krestu. 22 Ungesidleni sakaZimu+ ngombana waya ezulwini begodu iingilozi, abalawuli nababusi benziwa bamthobela.+

4 Njengombana uKrestu atlhaga enyameni,+ nani hlomani ngendlela yokucabanga efanako* ngombana umuntu otlhagileko enyameni uzilisile izono+ 2 bona ngesikhathi esimsaleleko asenyameni, angasaphileli iinkanuko zabantu+ kodwana aphilele intando kaZimu.+ 3 Esikhathini esidlulileko nenza okwenziwa ziintjhaba+ ngesikhathi nihlanganyela ekwenzeni izenzo zamanyala ningabi neenhloni,* eenkanukweni ezingalawulwako, ekurhamuleni khulu, eminyanyeni engalawulekiko, emaphaliswaneni wokurhamula nekulotjheni iinthombe okunyenyisako.+ 4 Bararekile ngombana anisahlanganyeli nabo endlelenabo yokuphila ngamanyala, nje-ke banikhuluma kumbi.+ 5 Kodwana abantwaba bazoziphendulela kiloyo olungele ukwahlulela abaphilako nabafileko.+ 6 Eqinisweni, kungebangeli iindaba ezimnandi zatjhunyayelwa nakwabafileko,+ khona kuzakuthi nanyana bahlulelwa enyameni ngokombono wabantu, baphile ngokuvumelana nommoya ngokombono kaZimu.

7 Ukuphela kwazo zoke izinto kutjhidele. Nje-ke, qaqulukani emkhumbulweni,+ niphaphamele imithandazo.+ 8 Ngaphezu kwakho koke, thandanani khulu+ ngombana ithando ligubuzesa izono ezinengi.+ 9 Yibani nommoya wokwamukela iimvakatjhi ngaphandle kokunghonghoyila.+ 10 Ngokwezinga ngamunye afumene ngalo isipho, akasisebenzise ekusizeni abanye njengabaphathi abahle bomusa omkhulu kaZimu obonakaliswa ngeendlela ezihlukahlukeneko.+ 11 Nangabe kukhona okhulumako, akakhulume njengaloyo okhuluma izahlulelo zakaZimu, nangabe kukhona osizako, akasize njengosame emandleni anikelwe nguZimu+ ukuthi ezintweni zoke uZimu aphazinyuliswe+ ngoJesu Krestu. Iphazimulo namandla ngekwakhe bekube ngokungapheliko. Amen.

12 Bathandekako, ningararwa ziinlingo ezivuthako eniqalene nazo+ ngasuthi nivelelwa yinto engakajayeleki. 13 Kunalokho, ragelani phambili nithaba+ ngezinga enibahlanganyeli ngalo ekutlhageni kwakaKrestu+ bona nithabe begodu nijekezele nangesikhathi sokwambulwa kwephazimulwakhe.+ 14 Niyathaba nabanithukako ngebanga legama lakaKrestu+ ngombana ummoya wephazimulo, ummoya kaZimu uhlezi phezu kwenu.

15 Nanyana kunjalo, akungabi namunye wenu otlhaga ngebanga lokuba mbulali namkha lisela namkha mumenzi wokumbi namkha mcabheli eendabeni zabanye abantu.+ 16 Nje-ke nakukhona otlhaga ngombana amKrestu akangabi neenhloni+ kodwana akaragele phambili aphazimulisa uZimu kukulapho aphatha igameli. 17 Ngombana sikhathi esibekiweko sokobana ukwahlulela kuthome ngendlini kaZimu.+ Nje-ke nangabe kuthoma ngathi,+ uzokuba yini-ke umphumela kilabo abangalaleli iindaba ezimnandi zakaZimu?+ 18 “Godu nangabe umuntu olungileko usindiswa budisi, kuzokwenzekani-ke emuntwini ongasabi uZimu nesoni?”+ 19 Nje-ke, labo abatlhaga ngokuvumelana nentando kaZimu abaragele phambili bazibeke kuMdali othembekileko kukulapho benza okuhle.+

5 Njengomdala okunye nani, ufakazi wemitlhago kaKrestu nomhlanganyeli wephazimulo ezokwambulwa,+ ngenza nasi isibawo kubadala abahlangana nani: 2 Yelusani umhlambi kaZimu+ eniphathiswe wona bona niwutjheje, nibe batlhogomeli* ingasi ngokukatelelwa kodwana ngokuzithandela phambi kwakaZimu,+ ingasi ngethando lenzuzo yokungathembeki+ kodwana ngokuzimisela, 3 ningazenzi amakhosi phezu kwalabo abalilifa lakaZimu+ kodwana nibe ziimbonelo emhlanjini.+ 4 Kuzakuthi umelusi omkhulu+ nasele abonakalisiwe, nizokwamukela isihlohlo sephazimulo esingatjhwabiko.+

5 Ngendlela efanako, nina masokana zithobeni emadodeni amadala.*+ Noke mbathani ukuthobelana ngombana uZimu ulwisana nabazikhakhazisako kodwana abathobekileko ubanikela umusakhe omkhulu.+

6 Zithobeni ngaphasi kwesandla sakaZimu esinamandla bona aniphakamise ngesikhathi esifaneleko,+ 7 kukulapho niphosela koke okunitshwenyako kuye+ ngombana unendaba nani.+ 8 Hlalani niqaqulukile, phaphamani!+ Inaba lenu uDeveli, likhambakhamba njengebhubezi elibhodlako, lifuna umuntu elingamrhiribidela.+ 9 Kodwana lwisanani naye,+ niqine ekukholweni, nazi ukuthi yoke ihlangano yabafowenu ephasini iqalana nemitlhago efanako.+ 10 Ngemva kokuthi nitlhage isikhatjhana, uZimu womusa omkhulu woke, onibizele ephazimulwenakhe engapheliko+ ebunyeni noKrestu, uzokuqedelela ukubandulwa kwenu. Uzonenza niqine,+ uzonenza nibe namandla,+ uzonibeka esisekelweni esiqinileko. 11 Amandla awabe kuye ngokungapheliko. Amen.

12 NgoSilvanu,*+ engimthatha njengomfowethu othembekileko, nginitlolele amezwi ambalwa ukuthi nginikhuthaze bengininikele nobufakazi obuthembekileko bokuthi lo mumusa omkhulu wamambala kaZimu. Dzimelelani kiwo. 13 Umfazi oseBhabhiloni okhethiweko njengani uyanilotjhisa, ngokufanako noMarkosi+ indodanami. 14 Lotjhisanani ngokumangana kwethando.

Kwanga noke enisebunyeni noKrestu ningaba nokuthula.