INCWADI YESIBILI KAPITROSI

1 USimoni Pitrosi, isigqila nompostoli kaJesu Krestu, kilabo abafumane ukukholwa okuligugu njengokwethu ngokulunga kwakaZimethu noMsindisi uJesu Krestu:

2 Kwanga umusa omkhulu nokuthula kungandiswa kini ngelwazi elinembileko+ lakaZimu noJesu iKosethu 3 ngombana amandlakhe avela kuZimu asinikela zoke izinto esizitlhogako bona siphile ukuphila kokuzinikela kuZimu ngelwazi elinembileko laloyo owasibiza+ ngephazimulo nobuhle bakhe. 4 Ngezintwezi usinikele iinthembiso eziligugu nezihle khulu+ bona ngazo nibe bahlanganyeli bephazimulo kaZimu njengeembunjwa zommoya+ njengombana niphunyurhile ekonakaleni kwephasi okuvezwa ngekanuko embi.

5 Ngebanga lalokhu, lingani ngekuthalo yoke+ bona ningezelele ekukholweni kwenu ubuhle,+ ebuhleni benu, ilwazi,+ 6 elwazini lenu, ukuzibamba, ekuzibambeni kwenu,+ ukukghodlhelela, ekukghodlheleleni kwenu, ukuzinikela kuZimu,+ 7 ekuzinikeleni kwenu kuZimu, ukuthandana njengamalunga womndeni, ekuthandaneni kwenu njengamalunga womndeni, ithando.+ 8 Nangabe izintwezi zikhona kini begodu ziyaphuphuma, zizonivikela bona ningapholi namkha ningatheli+ malungana nelwazi elinembileko leKosethu uJesu Krestu.

9 Ngombana nanyana ngubani onganazo izintwezi usiphofu, uvala amehlwakhe bona angaboni ukukhanya*+ begodu ukukhohliwe ukuhlanzwa kwakhe ezonweni zakhe+ zakade. 10 Nje-ke bafowethu, yenzani koke enikukghonako bona niqinisekise ukubizwa+ nokukhethwa kwenu ngombana naniragela phambili nenza izintwezi, angeze nabhalelwa.+ 11 Eqinisweni, ngokwenza lokhu nizokunikelwa ngokunothileko ukungena emBusweni ongapheliko+ weKosethu noMsindisi uJesu Krestu.+

12 Ngebanga lalokhu nginqophe ukuhlala nginikhumbuza izintwezi, nanyana nizazi begodu nikakarele eqinisweni enilaziko. 13 Kodwana ngikuqala njengokulungileko, nangisesesetendeneli,*+ ukunivusa ngeenkhumbuzo+ 14 ngombana ngiyazi ukuthi itendami izokususwa msinyana njengombana neKosethu uJesu Krestu yakukhanyisa lokho kimi.+ 15 Ngizokuhlala ngenza koke okusemandlenami ukuthi ngemva kokukhamba kwami, nikghone ukukhumbula* izintwezi ngokwenu.

16 Bekungasikulandela iindaba ezimamala ezenziwe ngobukghwari nasinitjela ngamandla nangokuba khona kweKosethu uJesu Krestu kodwana besibofakazi bobukhulu bakhe.+ 17 Ngombana wamukela kuZimu uBaba idumo nephazimulo lokha amezwi anjengala adluliselwa kuye ngephazimulo ekulu: “Le yiNdodanami, engiyithandako, engiyamukeleko.”+ 18 Amezwi la sawezwa avela ezulwini nasinaye entabeni ecwengileko.

19 Nje-ke sinelizwi lesiphorofido elenziwe laqiniseka ngokungeziweko begodu nenza kuhle ngokulitjheja njengesibani+ esikhanya endaweni emnyama (bekube kulapho nakusako kuvele nekwekwezi yokusa+) eenhliziyweni zenu. 20 Ngombana kokuthoma niyakwazi lokhu, ukuthi asikho isiphorofido somTlolo esivela emibonweni yabantu. 21 Ngombana isiphorofido akhenge khesalethwa ngentando yomuntu+ kodwana abantu bakhuluma okuvela kuZimu basunduzwa mmoya ocwengileko.+

2 Nanyana kunjalo, kwaba nabaphorofidi bamala phakathi kwabantu njengombana kuzokuba nabafundisi bamala phakathi kwenu.+ Bazokungenisa ngokukhukhutha iinqhema ezitjhabalalisako begodu bazokuphika nomnikazabo owabathengako,+ bazilethele ukutjhatjalaliswa ngokurhabako. 2 Ngaphezu kwalokho, abanengi bazokulandela ukwenza kwabo amanyala bangabi neenhloni,*+ kanti ngebanga labo indlela yeqiniso izokukhulunywa kumbi.+ 3 Godu, ngokuba marhamaru kwabo bazonidlelezela ngamezwi akhohlisako. Kodwana isahlulelo sabo esakhutjhwa kade+ asikhambi kabuthaka bazokutjhatjalaliswa.+

4 Ngokuqinisekileko uZimu akhenge alise ukujezisa iingilozi ezonako+ kodwana waziphosa eTartarusi,*+ wazibopha ngeenketani* ebumnyameni obukhulu bona zibekelwe isahlulelo.+ 5 Akhenge alise ukujezisa iphasi lekadeni+ kodwana wasindisa uNowa umtjhumayeli wokulunga+ kunye nabanye abalikhomba+ nakaletha umthwalela ephasini labantu abangamsabiko uZimu.+ 6 Godu ngokuyitjhisa thokgho iSodoma neGomora, wayilahla+ abekela abantu abangamsabiko uZimu isibonelo sezinto ezizako.+ 7 Kodwana wamhlenga uLoti olungileko,+ obekagandeleleke khulu ngebanga labantu abanganamthetho ebebenza amanyala bangabi neenhloni* 8 ngombana ilanga nelanga umuntu olungileko lo bekahlunguphaza umphefumulwakhe* olungileko ngebanga lokukhohlakala ebekakubona begodu akuzwa njengombana ahlala hlangana nabo. 9 Nje-ke, uJehova* uyakwazi ukubahlangula esilingweni+ abantu abathembekileko kuye kodwana abekele abantu abambi ukutjhatjalaliswa* ngelanga lesahlulelo,+ 10 khulukhulu labo abafuna ukusilaphaza inyama yabanye+ begodu badelele ubukhosi.+

Banesibindi esirarako begodu banekani, abasabi ukukhuluma kumbi ngabaphazimulako, 11 kukulapho iingilozi, nanyana zinamandla amakhulu kunabo, zingabamangaleli ngeenkulumo ezimbi ngombana zihlonipha uJehova.*+ 12 Kodwana abantwaba, njengeenlwana ezinganangqondo eziragwa mazizo angokwemvelo begodu ezizalelwa ukubanjwa zitjhatjalaliswe, bakhuluma kumbi ngezinto abangazaziko.+ Bazokurhayilwa ngokutjhatjalaliswa okulethwa yindlelabo yokuphila etjhabalalisako, 13 ukulimala kube mvuzo wendlelabo yokuphila elimazako.

Bakuthatha njengokuthabisako ukuzitika ngepilo emabothobotho,+ ngitjho nemini libalele. Banjengamabala asilaphaza ibandla, bazithabisa ngeemfundiso zabo ezikhohlisako kukulapho badla nani eminyanyeni.+ 14 Amehlwabo azele ubufebe*+ begodu abakghoni ukulisa isono, bayenga nalabo abangakadzimeleli. Banehliziyo ebandulelwe ukuba marhamaru. Babantwana abaqalekisiweko. 15 Batjhiye indlela enqophileko, baphambukisiwe. Balandele indlela kaBhalami+ indodana kaBhewori, owathanda umvuzo wokwenza okumbi+ 16 kodwana wakhalinywa ngokungenzi kwakhe okulungileko.+ Udumbana ongakwazi ukukhuluma wakhuluma ngelizwi lomuntu wavimba indlela yokurhapha yomphorofidi lo.+

17 Bamithombo enganamanzi nekungu eragwa siwuruwuru esikhulu, babekelwe ubumnyama obubudlula boke.+ 18 Batjho amezwi azwakala ngasuthi ahlakaniphile kodwana alilize. Ngeenkanuko zenyama+ nangokwenza amanyala bangabi neenhloni,* bayenga abantu abasanda ukuphunyurha kilabo abaphila ngokwenza umtjhapho.+ 19 Babathembisa itjhaphuluko, khisibe kwabona baziingqila zokonakala+ ngombana nangabe umuntu uhlulwa ngothileko, usigqila sakhe.*+ 20 Ngokuqinisekileko nangabe ngemva kokuphunyurha ezintweni ezisilaphazako zephasi+ ngelwazi elinembileko leKosi noMsindisi uJesu Krestu, babuyele ezintweni abazihlulileko, ubujamo babo bamuva buzokuba bumbi khulu kunebokuthoma.+ 21 Ngombana bekungaba ngcono ngabo ukungayazi ngokunembileko indlela yokulunga kunokuthi ngemva kokuyazi bafulathele umyalo ocwengileko abawufumeneko.+ 22 Okutjhiwo sisaga esiliqiniswesi kwenzekile kibo: “Inja ibuyele emahlanzwenayo, nefarigi ehlanjisiweko ibuyele ekuzibhudabhudeni edakeni.”+

3 Bathandekako, le yincwadi yesibili enginitlolela yona, kiyo njengakeyokuthoma, nginisiza bona nicabange ngendlela efaneleko ngokunikhumbuza+ 2 bona nikhumbule amezwi akhulunywa ngaphambilini* baphorofidi abacwengileko nomyalo weKosi noMsindisi ngabapostoli benu. 3 Kokuthoma yazini lokhu, ukuthi emihleni yokuphela kuzokufika abanyefuli nokunyefula kwabo, barage ngokweenkanuko zabo+ 4 bathi: “Kuphi ukuba khona kwakhe okuthenjisiwekokho?+ Ngombana kusukela ngelanga abokhokho bethu abalala ngalo ekufeni, zoke izinto ziraga patsi ngendlela ebezingayo kusukela ekuthomeni kwendalo.”+

5 Akhenge balinake ngabomu iqinisweli, ukuthi kade bekunezulu nephasi elajama laqina phezu kwamanzi naphakathi kwamanzi ngelizwi lakaZimu+ 6 nokuthi ngawo iphasi langesikhatheso latjhatjalaliswa lokha nalirhurhulwa mamanzi.+ 7 Kodwana ngelizwi elifanako izulu nephasi elikhona nje kubekelwe umlilo begodu kubekiwe bekube lilanga lesahlulelo nokutjhatjalaliswa kwabantu abangamsabiko uZimu.+

8 Nje-ke bathandekako, ningavumi iqinisweli liniphunyurhe ukuthi ilanga linye kuJehova* linjengeminyaka eyikulungwana, neminyaka eyikulungwana injengelanga linye.+ 9 UJehova* akariyadi malungana nesithembiso sakhe+ njengombana abanye bacabanga bona uyariyada kodwana uyanibekezelela ngombana angafisi ukuthi namunye atjhabalale kodwana ufisa bona boke batjhuguluke.+ 10 Ilanga lakaJehova*+ lizokuza njengesela,+ lapho izulu lizokudlula+ ngokuduma okukhulu njengombana izakhi zizabe zitjhisa khulu zizokuncibilika begodu iphasi nemisebenzi ekilo lizokwambulwa.+

11 Njengombana zoke izintwezi zizokuncibilika, cabangani ukuthi kufuze nibe babantu abanjani ezenzweni ezicwengileko zokuziphatha nezenzweni zokuzinikela kuZimu 12 njengombana nilindile begodu nihlala nikhumbula ukuba khona kwelanga lakaJehova,*+ ngalo izulu lizokutjhatjalaliswa+ ngomlilo nezakhi zincibilike emtjhisweni omkhulu! 13 Kodwana kunezulu elitjha nephasi elitjha esililindele ngokwesithembiso sakhe+ begodu lapho kuzokuhlala ukulunga.+

14 Nje-ke bathandekako njengombana nilindele izintwezi, yenzani koke okusemandlenenu bona ekugcineni anifumane nimsulwa, ninganabala begodu nisekuthuleni.+ 15 Ngaphezu kwalokho, qalani ukubekezela kweKosethu njengesindiso njengombana nomfowethu othandekako uPowula anitlolela ngokuvumelana nokuhlakanipha anikelwa khona,+ 16 akhuluma ngezintwezi njengombana enza kizo zoke iincwadi zakhe. Kodwana ezinye izinto eziseencwadinezi kubudisi ukuzizwisisa, lezo abantu abanganalwazi* nabangakadzimeleli abazihlanakelako njengombana benza nakiyo yoke imiTlolo, kube kutjhabalala kwabo.

17 Nje-ke nina bathandekako njengombana nifumene ilwazeli kusesengaphambili, tjhejani bona ningadurhiswa nabo ngemitjhapho yabantu abanganamthetho begodu niwe ekudzimeleleni kwenu.+ 18 Kodwana ragelani phambili nikhula emuseni omkhulu nelwazini leKosethu noMsindisi uJesu Krestu. Ayibe kuye iphazimulo kokubili nje nangokungapheliko. Amen.