INCWADI YOKUTHOMA KAJWANISI

1 Lokho ebekukhona kusukela ekuthomeni, esikuzwileko, esikubone ngamehlwethu, esikuqalisisileko nezandla zethu ezikuthintileko malungana nelizwi lokuphila,+ 2 (ukuphila kwenziwa kwabonakala, sikubonile begodu siyafakaza,+ siyanibikela nangokuphila okungapheliko+ ebekunoBaba nokwenziwa kwabonakala kithi), 3 lokho esikubonileko nesikuzwileko siyanibikela+ bona nani nihlanganyele nathi. Ukuhlanganyela kwethokhu kukuBaba neNdodanakhe uJesu Krestu.+ 4 Sinitlolela izintwezi bona ithabo lethu lipheleliswe.

5 Lo mlayezo esawuzwa kuye begodu esinazisa wona: UZimu ukukhanya,+ abukho nakancani ubumnyama kuye. 6 Nasithi, “Sihlanganyela naye,” khisibe siragela phambili sikhamba ebumnyameni, sileya amala begodu asiphili ngeqiniso.+ 7 Yeke nasikhamba ekukhanyeni njengombana asekukhanyeni, sihlanganyela nomunye nomunye begodu iingazi zakaJesu iNdodanakhe zisihlanza kizo zoke izono.+

8 Nasithi, “Asinasono,” siyazikhohlisa+ begodu iqiniso alikho kithi. 9 Nasivuma izono zethu, yena uthembekile begodu ulungile bona asilibalele izono zethu begodu asihlanze kikho koke ukungalungi.+ 10 Nasithi, “Azange khesone,” simenza umleyimala nelizwi lakhe alikho kithi.

2 Bantwanyana bami, nginitlolela izintwezi bona ningasenzi isono. Kodwana nakungenzeka kube khona owenza isono sinomsizi* kuBaba, uJesu Krestu+ olungileko.+ 2 Yena umhlatjelo wokwenza ukubuyisana+ ngebanga lezono zethu+ ingasi zethu kwaphela kodwana nezephasi loke.+ 3 Godu ngalokhu silemuka ukuthi sesiyamazi: Nasiragela phambili silalela imiyalwakhe. 4 Loyo othi, “Sengiyamazi” kodwana angalaleli imiyalwakhe umleyimala neqiniso alikho emuntwini loyo. 5 Kodwana nanyana ngubani olilalelako ilizwi lakhe, ithando lakaZimu liphelelisiwe+ emuntwini loyo. Sazi ngalokhu ukuthi simunye naye.+ 6 Loyo othi uhlala amunye naye ungaphasi kwesibopho sokuragela phambili akhamba njengombana loyo akhamba.+

7 Bathandekako, anginitloleli umyalo omutjha kodwana umyalo omdala ebenisolo ninawo kusukela ekuthomeni.+ Umyalo omdala lo ulilizwi enalizwako. 8 Godu, nginitlolela umyalo omutjha oliqiniso endabenakhe neyenu ngombana ubumnyama buyadlula nokukhanya kweqiniso sekuyakhanya.+

9 Loyo othi usekukhanyeni khisibe uhloya+ umfowabo usesesebumnyameni.+ 10 Loyo othanda umfowabo uhlala asekukhanyeni,+ akunabanga lokuwa kuye. 11 Kodwana loyo ohloya umfowabo usebumnyameni begodu ukhamba ebumnyameni,+ akazi ukuthi uyaphi+ ngombana ubumnyama buphophaze amehlwakhe.

12 Bantwanyana, nginitlolela ngombana izono zenu zilitjalelwe ngebanga legama lakhe.+ 13 Bobaba, nginitlolela ngombana seniyamazi loyo obekakhona kusukela ekuthomeni. Masokana, nginitlolela ngombana senimhlulile omumbi.+ Bantwana, nginitlolela ngombana seniyamazi uBaba.+ 14 Bobaba, nginitlolela ngombana seniyamazi loyo obekakhona kusukela ekuthomeni. Masokana, nginitlolela ngombana niqinile+ nelizwi lakaZimu lihlala kini+ begodu nimhlulile omumbi.+

15 Ningathandi iphasi namkha izinto ezisephasini.+ Nangabe umuntu uthanda iphasi, ithando lakaBaba alikho kuye+ 16 ngombana koke okusephasini ikanuko yenyama+ nekanuko yamehlo+ nokuzikhakhazisa ngalokho umuntu anakho,* akuveli kuBaba kodwana kuvela ephasini. 17 Ngaphezu kwalokho, iphasi liyadlula ngokufanako nekanukwalo+ kodwana loyo owenza intando kaZimu uhlala ngokungapheliko.+

18 Bantwana, sekuli-iri lamaswaphela njengombana nezwa ukuthi umphikisi kaKrestu uyeza,+ ngitjho nanje bavelile abaphikisi bakaKrestu abanengi,+ kungeqiniswelo sazi ukuthi li-iri lamaswaphela. 19 Baphuma hlangana nathi kodwana bebangasingebethu+ ngombana ngathana bebangebethu, bebazokuhlala nathi. Kodwana baphumela ngaphandle ukuthi kutjengiswe bona akusingibo boke abangebethu.+ 20 Godu ninokuzeswa okuvela kocwengileko+ begodu noke ninelwazi. 21 Anginitloleli ngombana ningalazi iqiniso+ kodwana ngombana niyalazi begodu awekho amanga avela eqinisweni.+

22 Ngubani umleyimala nakungasingiloyo ophika ukuthi uJesu unguKrestu?+ Lo ngiloyo omphikisi kaKrestu,+ loyo ophika uBaba neNdodana. 23 Woke umuntu ophika iNdodana akanaye noBaba.+ Kodwana nanyana ngubani ovuma iNdodana+ unoBaba godu.+ 24 Ngokuphathelene nani, lokho enikuzwe kusukela ekuthomeni kufuze kuhlale kini.+ Nangabe lokho enikuzwe kusukela ekuthomeni kuhlala kini, nizokuhlala nimunye neNdodana begodu nimunye noBaba. 25 Ngaphezu kwalokho, lokhu ngilokhu yena asithembise khona, ukuphila okungapheliko.+

26 Nginitlolela izintwezi malungana nalabo abalinga ukunidurhisa. 27 Ngokuphathelene nani, ukuzeswa enikufumene kuye+ kuhlala kini begodu anitlhogi muntu bona anifundise kodwana ukuzeswa okuvela kuye kunifundisa ngazo zoke izinto+ begodu kuliqiniso akusimamala. Njengombana kunifundisile, hlalani nimunye naye.+ 28 Nje-ke bantwanyana, hlalani nimunye naye ukuthi nakabonakaliswako sibe netjhaphuluko yokukhuluma+ singahlehli isinyava ngebanga leenhloni ekubeni khona kwakhe. 29 Nangabe niyazi ukuthi ulungile, niyazi nokuthi nanyana ngubani owenza okulungileko ubelethwe nguye.+

3 Qalani bona likhulu kangangani ithando uBaba asithande ngalo+ ukuthi kufuze sibizwe ngokobana sibantwana bakaZimu!+ Kwamambala ngilokho esingikho. Kungebangelo iphasi lingasazi+ ngombana alikamazi uZimu.+ 2 Bathandekako, nje sesibantwana bakaZimu+ kodwana akukabonakaliswa lokho esizokuba ngikho.+ Siyazi ukuthi nakabonakaliswako sizokuba njengaye ngombana sizombona njengombana anjalo. 3 Woke umuntu onethembeli kuye uyazicwengisa+ njengombana loyo acwengile.

4 Woke umuntu oraga nokwenza isono uraga nokweqa umthetho begodu isono sikukweqa umthetho. 5 Godu niyazi ukuthi wabonakaliswa bona asuse izono zethu+ begodu asikho isono kuye. 6 Woke umuntu ohlala amunye naye akaragi nokwenza isono,+ akekho ombonileko namkha osekamazi oraga nokwenza isono. 7 Bantwanyana akungabi nomuntu onidurhisako, loyo oraga nokwenza okulungileko ulungile njengombana naloyo alungile. 8 Loyo oraga nokwenza isono uvela kuDeveli ngombana uDeveli bekasolo ona kusukela ekuthomeni.+ Kungebangeli iNdodana kaZimu yabonakaliswa bona itjhabalalise imisebenzi kaDeveli.+

9 Woke umuntu obelethwe nguZimu akaragi nokwenza isono+ ngombana imbewu kaZimu ihlala emuntwini onjalo begodu angekhe arage nokwenza isono ngombana ubelethwe nguZimu.+ 10 Abantwana bakaZimu nabantwana bakaDeveli babonakala ngeqinisweli: Nanyana ngubani ongaragi nokwenza okulungileko akaveli kuZimu, ngokufanako naloyo ongathandi umfowabo.+ 11 Ngombana lo mlayezo eniwuzwileko kusukela ekuthomeni, bona kufuze sithandane+ 12 singafani noKayini, obekavela komumbi begodu wabulala umfowabo.+ Ambulalelani? Ngombana imisebenzakhe beyimimbi+ kodwana yomfowabo beyilungile.+

13 Ningarareki bafowethu ukuthi iphasi liyanihloya.+ 14 Siyazi ukuthi sidlulile ekufeni saya ekuphileni+ ngombana sithanda abafowethu.+ Loyo ongathandiko uhlala ekufeni.+ 15 Woke umuntu ohloya umfowabo umbulali,+ begodu niyazi ukuthi akunambulali onokuphila okungapheliko okuhlezi kuye.+ 16 Ngalokhu sesiyalazi ithando ngombana loyo wadela ukuphila kwakhe* ngebanga lethu+ begodu singaphasi kwesibopho sokudela ukuphila kwethu* ngebanga labafowethu.+ 17 Kodwana nanyana ngubani onezinto eziphathekako zephaseli, abone umfowabo atlhoga kodwana angamrhawukeli, ithando lakaZimu lihlala njani kuye?+ 18 Bantwanyana kufuze sithande ingasi ngelizwi namkha ngelimu+ kodwana ngesenzo+ nangeqiniso.+

19 Ngalokhu sizokwazi ukuthi singebeqiniso begodu sizokuqinisekisa* iinhliziyo zethu phambi kwakhe 20 malungana nananyana yini iinhliziyo zethu ezisilahla kiyo ngombana uZimu mkhulu kuneenhliziyo zethu begodu wazi zoke izinto.+ 21 Bathandekako, nangabe iinhliziyo zethu azisilahli, sinetjhaphuluko yokukhuluma phambi kwakaZimu+ 22 begodu nanyana yini esiyibawako siyayifumana kuye+ ngombana silalela imiyalwakhe begodu senza okuthabisako emehlwenakhe. 23 Eqinisweni, lo myalwakhe: Ukuthi sikholwe egameni leNdodanakhe uJesu Krestu+ begodu sithandane+ njengombana asinikela umyalo. 24 Ngaphezu kwalokho, loyo olalela imiyalwakhe uhlala amunye naye begodu naye umunye naloyo.+ Nje-ke ngommoya asinikela wona, siyazi ukuthi uhlala amunye nathi.+

4 Bathandekako ningakholwa woke amezwi aphefumulelweko+ kodwana ahloleni amezwi aphefumulelweko lawo, nibone ukuthi avela kuZimu na+ ngombana sekuvele abaphorofidi bamala abanengi ephasini.+

2 Nasi indlela yokwazi ukuthi amezwi aphefumulelweko avela kuZimu: Woke amezwi aphefumulelweko avuma uJesu Krestu njengoweza njengomuntu wenyama avela kuZimu.+ 3 Kodwana woke amezwi aphefumulelweko angamvumiko uJesu awaveli kuZimu.+ Ngaphezu kwalokho, la mamezwi aphefumulelweko womphikisi kaKrestu enezwa ukuthi uyeza+ begodu nje sewakhona ephasini.+

4 Bantwanyana nina nivela kuZimu begodu nibahlulile+ ngombana loyo omunye nani+ mkhulu kunaloyo omunye nephasi.+ 5 Bavela ephasini+ kungebangelo bakhuluma okuvela ephasini begodu nephasi liyabalalela.+ 6 Thina sivela kuZimu. Nanyana ngubani osekazi uZimu uyasilalela,+ nanyana ngubani ongaveli kuZimu akasilaleli.+ Siwahlukanisa ngalokhu amezwi aphefumulelweko weqiniso namezwi aphefumulelweko womtjhapho.+

7 Bathandekako, asirageleni phambili sithandana+ ngombana ithando livela kuZimu, yeke woke umuntu onethando ubelethwe nguZimu begodu uyamazi uZimu.+ 8 Nanyana ngubani onganathando akakamazi uZimu ngombana uZimu ulithando.+ 9 Ngalokhu ithando lakaZimu lembuliwe endabenethu ukuthi uZimu wathumela iNdodanakhe ebelethwe yodwa+ ephasini bona sifumane ukuphila ngayo.+ 10 UZimu wathumela iNdodanakhe bona ibe mhlatjelo wokwenza ukubuyisana+ ngebanga lezono zethu.+ Wenza lokhu ngombana wasithanda ingasi bona thina sathanda yena.

11 Bathandekako, nangabe le yindlela uZimu asithande ngayo, yeke nathi singaphasi kwesibopho sokuthandana.+ 12 Akekho okhe wabona uZimu ngananyana ngisiphi isikhathi.+ Nasiragela phambili sithandana uZimu uhlala akithi nethando lakhe liyapheleliswa kithi.+ 13 Ngalokhu siyazi ukuthi sihlala simunye naye nokuthi naye umunye nathi ngombana usinikele ummoyakhe. 14 Ukungezelela kilokho, thina ngokwethu sibonile begodu siyafakaza ukuthi uBaba uthumele iNdodanakhe njengoMsindisi wephasi.+ 15 Nanyana ngubani ovumako ukuthi uJesu uyiNdodana kaZimu,+ uZimu uhlala amunye nomuntu onjalo, naye uhlala amunye noZimu.+ 16 Sesiyalazi begodu siyalikholwa ithando uZimu analo ngathi.+

UZimu ulithando,+ loyo ohlala ethandweni uhlala amunye noZimu, noZimu uhlala amunye naye.+ 17 Ithando liphelelisiwe ngendlela le kithi bona sikhulume ngokutjhaphulukileko+ ngelanga lesahlulelo njengombana loyo anjalo, nathi sinjalo ephasineli. 18 Akukho ukusaba ethandweni,+ onethando elipheleleko akasabi ngombana ukusaba kuyasikhandela. Kwamambala, loyo osabako akakapheleliswa ethandweni.+ 19 Siyathanda ngombana yena usithande qangi.+

20 Nangabe kukhona othi, “Ngiyamthanda uZimu” kodwana ahloya umfowabo umleyimala.+ Ngombana loyo ongamthandi umfowabo+ ambonileko, angekhe amthanda uZimu angakhenge ambone.+ 21 Godu sinomyalo lo ovela kuye, ukuthi nanyana ngubani othanda uZimu kufuze athande nomfowabo.+

5 Woke umuntu okholwako bona uJesu unguKrestu, mntwana kaZimu+ begodu woke umuntu othanda uZimu uthanda abantwana bakaZimu. 2 Ngalokhu siyazi bona sithanda abantwana bakaZimu+ nasithanda uZimu begodu siphethe imiyalwakhe. 3 Ukuthanda uZimu kutjho ukulalela imiyalwakhe+ begodu imiyalwakhe ayisibudisi+ 4 ngombana woke umuntu obelethwe nguZimu uhlula iphasi.+ Ngokukholwa kwethu sihlule iphasi.+

5 Ngubani ongahlula iphasi?+ Kghani akusingiloyo okholwa bona uJesu uyiNdodana kaZimu?+ 6 Lo nguye oweza ngamanzi neengazi, uJesu Krestu ingasi ngamanzi kwaphela+ kodwana ngamanzi nangeengazi.+ Ummoya uyafakaza+ ngombana ummoya uliqiniso. 7 Kunabofakazi abathathu: 8 Ummoya,+ amanzi+ neengazi,+ kokuthathu kuyavumelana.

9 Nasamukela ubufakazi babantu, ubufakazi bakaZimu bukhulu kunabo. Lobu bufakazi uZimu abunikelako, ubufakazi abunikeleko ngeNdodanakhe. 10 Umuntu okholwa eNdodaneni kaZimu unobufakazi ngaphakathi kwakhe. Umuntu ongakholwako kuZimu umenze umleyimala+ ngombana akhenge abukholwe ubufakazi obanikelwa nguZimu malungana neNdodanakhe. 11 Lokhu kubufakazi bokuthi uZimu wasinikela ukuphila okungapheliko+ begodu ukuphilokhu kuseNdodanenakhe.+ 12 Loyo oneNdodana unokuphilokhu, onganaNdodana kaZimu akanakho ukuphilokhu.+

13 Nginitlolela izintwezi bona nazi ukuthi ninokuphila okungapheliko,+ nina enikholwa egameni leNdodana kaZimu.+ 14 Nakhu esiqiniseka ngakho ngaye,+ ukuthi nanyana yini esiyibawa ngokuvumelana nentandwakhe, uyasizwa.+ 15 Nasazi ukuthi uyasizwa nasibawa nanyana yini, siyazi ukuthi sizozifumana izinto esizibawileko njengombana sizibawe kuye.+

16 Nangabe omunye ubona umfowabo enza isono esingalethi ukufa uzomthandazela begodu uZimu uzomnikela ukuphila.+ Ngilokho azokwenza kilabo abangenzi isono esiletha ukufa. Kunesono esiletha ukufa.+ Kumalungana nesonweso ngingamtjeli bona amthandazele. 17 Koke ukungalungi kusisono+ kodwana kunesono esingalethi ukufa.

18 Siyazi ukuthi woke umuntu obelethwe nguZimu akaragi nokwenza isono kodwana loyo obelethwe nguZimu* uyamvikela begodu omumbi angekhe ambambe.+ 19 Siyazi ukuthi sivela kuZimu kodwana iphasi loke lisemandleni kaSathana.*+ 20 Kodwana siyazi ukuthi iNdodana kaZimu ifikile+ begodu isinikele ilemuko bona sifumane ilwazi laloyo oliqiniso. Simunye naloyo oliqiniso,+ ngeNdodanakhe uJesu Krestu. Lo nguZimu weqiniso nokuphila okungapheliko.+ 21 Bantwanyana, zitjhejeni eenthombeni.+