Indaba 32
Iimbetho Eziyi-10
QALA iinthombezi. Ngasinye sitjengisa isibetho uJehova asiletha eGibhide. Uyambona esithombeni sokuthoma u-Aroni afaka intongakhe eMlanjeni iNayile. Lokha nakayifakileko, woke amanzi emlanjeni aphenduka iingazi. Iimfesi zafa begodu umlambo wathoma ukunuka.
Ngokulandelako uJehova wabangela bona kuphume iinrhwarha eMlanjeni iNayile. Bezizele yoke indawo—enondweni, eempanini zokubhaga, eembedeni yabantu—kiyo yoke indawo. Lapho iinrhwarhwezi nazifako amaGibhide azibuthelela zaba ziintundu, begodu inarha yoke yanuka ngebanga lazo.
U-Aroni wabetha phasi ngentonga yakhe, begodu ihlabathi yaphenduka abonompopoloza. Lezi ziinunwana ezincancani ezilumanako. Abonompopolozaba basibetho sesithathu enarheni yeGibhide.
Zoke iimbethwezi zatshwenya amaGibhide ingasi ama-Israyeli. Isibetho sesine kiyo yoke imizi yeGibhide bekuziimbawa. Isibetho sesihlanu saba seembandaneni. Iinkomo, izimvu neembuzi ezinengi eGibhide zafa.
Ngokulandelako uMosisi no-Aroni bathatha umlotha bawuphosa emoyeni. Babangela amathumba amambi ebantwini neembandaneni. Lesi bekusibetho sesithandathu.
Ngemva kwalokho uMosisi waphakamisela isandla sakhe phezulu, uJehova wathumela umdumo nesinanja. Bekusinanja esimbi khulu ekhe saba khona eGibhide.
Isibetho sobunane bekusikhonyana. Azankhe kube neentethe ezinengi kangaka ngaphambili. Zadla yoke into egade itjhiywe sinanja.
Isibetho sethoba bekubumnyama. Kwaba mnyama tshu amalanga amathathu, kodwana lapho gade kuhlala khona ama-Israyeli bekukhanya.
Emaswapheleni, uZimu watjela abantu bakhe bona banyenyeze iingazi zembuzana namtjhana zelamjana emagosenini weminyango yabo. Ingilozi kaZimu yadlula kilo loke leGibhide. Lokha neyibona iingazi, beyingabulali muntu emzini loyo. Kodwana kiyo yoke imizi ekungakanyenyezwa iingazi emagosenini wabo, ingilozi kaZimu beyibulala woke amazibulo wabantu noweenlwana. Lesi bekusibetho sesi-10.
Ngemva kwesibetho samaswaphela, uFaro watjela ama-Israyeli bona akhambe. Boke abantu bakaZimu bebakulungele ukukhamba, begodu ngabo bona ubusukobo balitjhiya iGibhide.
Eksodosi izahluko 7 ukuya ku-12.