Indaba 49

Ilanga Liyajama

QALA uJoshuwa. Uthi: ‘Langa jama!’ Ilanga liyajama. Lihlala phakathi nesibhakabhaka imini yoke. NguJehova obangela lokho! Kodwana khesibone bona kubayini uJoshuwa afuna bona ilanga lingatjhingi.

Lokha amakhosi amahlanu angakalungi weKanana athoma ukulwa nebeGibhiyoni, beGibhiyoni bathuma indoda kuJoshuwa bona iyombawa azobarhelebha. Yathi kuJoshuwa: ‘Rhaba uze kithi!’ ‘Sibawa usisindise! Woke amakhosi wenarha akhuphuke ukuzokulwa neenceku zakho.’

Khonokho uJoshuwa nawo woke amadodakhe wepi bakhamba. Bakhamba ubusuku boke. Lokha nebafika eGibhiyoni, amajoni wamakhosi amahlanu asaba athoma ukubaleka. UJehova wenza bona amatje amakhulu wesinanja awe esibhakabhakeni, amajoni amanengi abulawa sinanja kunokubanyana abulawe nguJoshuwa namadodakhe wepi.

UJoshuwa wabona bonyana msinyana ilanga lizokutjhinga. Kuzokuba mnyama, begodu amanengi wamajoni wamakhosi amahlanu angakalungi azokubaleka. Kungalokho uJoshuwa athandaza kuJehova wathi: ‘Langa jama!’ Lokha ilanga neliragela phambili likhanya, ama-Israyeli ayithumba ipi.

Bekusesenamanye amakhosi amanengi amambi eKanana ahloya uZimu nabantu bakhe. Kwamthatha iimnyaka epheze ibe sithandathu uJoshuwa nebutho lakhe ukuhlula amakhosi ayi-31 wenarha leyo. Nesele bakwenzile lokhu, uJoshuwa waqiniseka bona inarha yeKanana ihlukaniselwa iintjhaba zakwa-Israyeli ezifuna indawo.

Kwadlula iimnyaka eminengi, emaswapheleni uJoshuwa wafa anemnyaka eyi-110. Lokha yena nabangani bakhe basaphila, abantu bebalalela uJehova. Kodwana amadoda alungileko la nafako, abantu bathoma ukwenza izinto ezimbi baba nemiraro. La, kulapho batlhoga khona irhelebho lakaZimu.

Joshuwa 10:6-15; 12:7-24; 14:1-5; Abahluleli 2:8-13.